မြေလတ်အသံ၊ ဒီဇင်ဘာ ၇၊ ၂၀၂၅။

မြန်မာပြည်ဖွား ချင်းလူငယ်ဖိုက်တာ ဂျော့ရှ်ဝါဗန် ဟာ လက်ရှိချန်ပီယံ ပန်တိုဂျာကို ပထမအချီ ၂၆ စက္ကန့်မှာပဲ TKO (Technical Knockout) နဲ့ အနိုင်ရှိပြီး UFC ဖလိုင်းဝိတ်တန်း ချန်ပီယံဖြစ်လာပါပြီ။

ဒါဟာ အာရှတိုက်ဖွား ဖိုက်တာတွေထဲမှာ ပထမဆုံးသော UFC ချန်ပီယံ ဖြစ်ပြီး UFC သမိုင်းတလျှောက် ဒုတိယမြောက် အသက်အငယ်ဆုံး ချန်ပီယံလည်း ဖြစ်ပါတယ်။

ဂျော့ရှ်ဝါဗန်ဟာ ချန်ပီယံခါးပတ်ကို ၄ ကြိမ်အထိ ကာကွယ်ထားနိုင်ခဲ့တဲ့ ဖလိုင်းဝိတ်တန်းရဲ့ အကောင်းဆုံးဖိုက်တာ ပန်တိုဂျာကို အနိုင်ယူပြီး သူဖြစ်ချင်ခဲ့တဲ့ဆန္ဒတွေအတိုင်း မြန်မာ့ဂုဏ်ဆောင် UFC ချန်ပီယံတစ်ယောက် ဖြစ်လာတာလည်း ဖြစ်ပါတယ်။

မြေလတ်အသံ၊ ဒီဇင်ဘာ ၆၊ ၂၀၂၅။

ပရီးမီးယားလိဂ် ပွဲစဉ် ၁၅ စနေနေ့ညပွဲစဉ်တွေရဲ့ အစောဆုံးပွဲဖြစ်တဲ့ အက်စတွန်ဗီလာနဲ့ အာဆင်နယ် တွေ့ဆုံမှုမှာ အိမ်ရှင်အက်စတွန်ဗီလာက နောက်ဆုံးမိနစ်အနိုင်းဂိုးသွင်းယူပြီး ၂ ဂိုး ၁ ဂိုး ရလဒ်နဲ့ အာဆင်နယ်ကို အနိုင်ရရှိခဲ့ပါတယ်။

လူစုံတက်စုံနဲ့ပွဲထွက်လာခဲ့တဲ့ အူနိုင်းအမ်မရီရဲ့ အက်စတွန်ဗီလာကို အဓိက ဗဟိုခံစစ်မှာ ဒဏ်ရာပြသနာတွေကြုံနေရလို့ ဟင်ကာပီ၊ တင်ဘာ အတွဲနဲ့ပွဲထွက်လာခဲ့တဲ့ အာဆင်နယ်အသင်းက ဗီလာပါ့ခ်မှာ ခက်ခက်ခဲခဲရင်ဆိုင်ခဲ့ရတာပါ။

လက်ရှိပုံစံကောင်းရနေပြီး နိုင်ပွဲဆက်နေတဲ့ အက်စတွန်ဗီလာအသင်း အာဆင်နယ်ကို အကောင်းဆုံးယှဉ်ပြိုင်ကစားနိုင်ခဲ့တာဖြစ်ပြီး ပထမပိုင်း ၃၆ မိနစ်မှာ မက်တီကက်ချ်ရဲ့သွင်းဂိုးနဲ့ ဦးဆောင်ခဲ့ကာ အာဆင်နယ်အသင်းကတော့ သွင်းဂိုးမရရှိခဲ့တာကြောင့် ပထမပိုင်းကို ၁ – ၀ ရလဒ်နဲ့ ပြီးဆုံးခဲ့ပါတယ်။

ဒုတိယပိုင်း ပြန်လည်စတင်ချိန်မှာတော့ အာဆင်နယ်အသင်းက ပုံမှန်ခြေစွမ်းအောက်ရောက်နေတဲ့ အက်ဇီး နေရာမှာ ထရော့ဆက် နဲ့ တိုက်စစ်က မာရီနို နေရာမှာ ယောခရက်ဇ် တို့ကို လူစားလဲစေခဲ့ပါတယ်။

ဒုတိယပိုင်း ၅၂ မိနစ်မှာ လူစားဝင်ကစားသမား ထရော့ဆက်က အာဆင်နယ်အတွက် ချေပဂိုးပြန်လည်သွင်းပေးခဲ့ပြီး အဲ့ဒီနောက်မှာ အာဆင်နယ်က တောက်လျှောက် တိုက်စစ်ဆင်ကစားခဲ့ပေမယ့် အက်စတွန်ဗီလာအသင်းက အကောင်းဆုံးပုံစံနဲ့ ခုခံခဲ့သလို တန်ပြန်တိုက်စစ်တွေနဲ့လည်း အာဆင်နယ်ကို အကြိမ်ကြိမ် ခြိမ်းခြောက်ခဲ့တာပါ။

မိနစ် ၉၀ ပြည့်လို့ နာကျင်အချိန်ပို ၄ မိနစ်ပေးထားချိန်မှာ ဟင်ကာပီရဲ့ မပြတ်သားတဲ့ရှင်းထုတ်မှုကြောင့် ရရှိခဲ့တဲ့ လက်ပစ်ဘောကနေတဆင့် အက်စတွန်ဗီလာ အသင်းအတွက် အခွင့်အရေးကောင်းဖြစ်ခဲ့ပြီး အာဆင်နယ်အသင်း တသင်းလုံးဆင်းပိတ်နေတဲ့ကြားကနေ ဗီလာကွင်းလယ်လူ ဘူအန်ဒီယာရဲ့သွင်းဂိုးကို နောက်ဆုံးမိနစ်မှာ ခွင့်ပြုပေးခဲ့ရတာပါ။

အာဆင်နယ်အသင်းအတွက် ဒီရှုံးပွဲဟာ ဒီရာသီ ဒုတိယမြောက်ရှုံးပွဲဖြစ်ပြီး အာဆင်နယ်နည်းပြဟောင်း အူနိုင်းအမ်မရီနဲ့တွေ့တိုင်း ရုန်းကန်ရလေ့ရှိတဲ့ အာဆင်နယ်အသင်း ဒီတခေါက်မှာလည်း ဗီလာပါ့ခ်ကနေ အမှတ်ဗလာနဲ့ အိမ်ပြန်ခဲ့ရပြီပဲ ဖြစ်ပါတယ်။

လက်ရှိမှာ အာဆင်နယ်အသင်းက အဆင့် ၁ နေရာမှာပဲ ဆက်လက်ရပ်တည်နေပြီး အက်စတွန်ဗီလာအသင်းက အာဆင်နယ်နဲ့ ၃ မှတ်အကွာ အဆင့် ၂ နေရာ(ယာယီ) ရပ်တည်နေကာ ဒီရာသီ အဓိက ချန်ပီယံပြိုင်ဘက်ဖြစ်တဲ့ မန်ချက်စတာစီးတီးအသင်းက ၁ ပွဲလျော့ ၅ မှတ်အကွာနဲ့ အဆင့် ၃ နေရာမှာ ရှိနေတာလည်း ဖြစ်ပါတယ်။

Photo – Premier League.

မြေလတ်အသံ၊ နိုဝင်ဘာ ၂၄၊ ၂၀၂၅။

ပရီးမီးယားလိဂ် ပွဲစဉ် ၁၂ တနင်္ဂနွေည နောက်ဆုံးပွဲဖြစ်တဲ့ အာဆင်နယ်နဲ့ စပါးတို့ရဲ့ မြောက်လန်ဒန်ဒါဘီမှာ အာဆင်နယ်အသင်းက ၄ ဂိုး ၁ ဂိုးနဲ့ ဂိုးပြတ်နိုင်ပွဲ ရယူနိုင်ခဲ့ပါတယ်။

ကွင်းတွင်းကွင်းပြင် ပြိုင်ဆိုင်မှုပြင်းထန်လေ့ရှိကြတဲ့ မြောက်လန်ဒန်ဒါဘီမှာ အာဆင်နယ်က အဓိကတိုက်စစ်မှူး ယောခရက်ဇ် ဒဏ်ရာရနေလို့ မာရီနိုကို တိုက်စစ်နေရာမှာ ပွဲထွက်စေခဲ့ပြီး နောက်ခံလူ ဂါဘရီရယ်လည်း ဒဏ်ရာရနေတာကြောင့် ဟင်ကာပီ က ပွဲထွက်ကစားခဲ့တာပါ။

စပါးအသင်းကတော့ ရစ်ချာလီဆန်၊ အိုဒါဘာ့တ်၊ ကူဒက်စ် တိုက်စစ်အတွဲနဲ့ပွဲထွက်လာခဲ့ပြီး အဓိက ကစားသမားတချို့ဖြစ်တဲ့ မက်ဒီဆန်၊ ဘစ်ဇူးမား၊ ကူလူဆက်စကီးနဲ့ ဆိုလန်ကီတို့ ဒဏ်ရာကြောင့် ပါဝင်နိုင်ခဲ့ခြင်းမရှိခဲ့ပါဘူး။

ပထမပိုင်းအစောပိုင်းမှာ အာဆင်နယ်အသင်း ဂိုးရရှိဖို့ရုန်းကန်ခဲ့ရပြီး စပါးက ခံစစ်အသားပြုကစားခဲ့တာကြောင့် အာဆင်နယ်တိုက်စစ်လမ်းကြောင်းဖော်ဆောင်ရာမှာ ထိရောက်မှုမရှိခဲ့ဘဲ ပွဲကစားချိန် ၃၆ မိနစ်မှာတော့ မီခေးလ် မာရီနိုရဲ့ ဖန်တီးပေးမှုကနေ တောင်ပံကစားသမား ထရောဆက်ခက်ခက်ခဲခဲ ဂိုးသွင်းနိုင်ခဲ့လို့ အာဆင်နယ်အသင်း စတင်ဦးဆောင်နိုင်ခဲ့ပါတယ်။

အဲ့ဒီနောက် နောက်ထပ် ၅ မိနစ်အကြာမှာပဲ ဒက်ကလန်ရိုက်စ်ရဲ့ ဖန်တီးမှုကနေတဆင့် အက်ဇီးက နောက်ထပ်ဦးဆောင်ဂိုးရယူနိုင်ခဲ့ကာ ပထမပိုင်းအပြီး ၂-၀ နဲ့ အိမ်ရှင်တို့ ဦးဆောင်နိုင်ခဲ့ပါတယ်။

ဒုတိယပိုင်းစစချင်း ၄၆ မိနစ်မှာပဲ အာဆင်နယ်က တတိယမြောက်ဦးဆောင်ဂိုးကို အက်ဇီးကပဲ ထပ်မံသွင်းယူခဲ့လို့ ၃ ဂိုးပြတ်နဲ့ဦးဆောင်ထားနိုင်ခဲ့ကာ ပွဲကစားချိန် ၅၅ မိနစ်မှာ အာဆင်နယ်ကွင်းလယ်လူ ဇူဘီမန်ဒီရဲ့ အမှားကနေတဆင့် စပါးတိုက်စစ်မှူး ရစ်ချာလီဆန်က ကွင်းလယ်ကနေ အဝေးကန်ချက်နဲ့လှလှပပ ကန်သွင်းနိုင်ခဲ့လို့ စပါးအသင်း ချေပဂိုး ၁ ဂိုး စတင်ရရှိခဲ့ပါတယ်။

အဲ့ဒီနောက် စပါးကပဲ ဆက်လက်ဖိအားပေး တိုက်စစ်ဆင်နေခဲ့ပေမယ့် ပွဲကစားချိန် ၇၆ မိနစ်မှာ ထရောဆက်ရဲ့ ဖန်တီးမှုကနေတဆင့် အက်ဇီးကပဲ သူ့ရဲ့ ဟက်ထရစ်သွင်းဂိုးကို သွင်းယူနိုင်ခဲ့ပြီး အာဆင်နယ်က ၄ ဂိုး ၁ ဂိုးနဲ့ ပွဲကိုဆက်လက်ထိန်းချုပ်ကစားသွားခဲ့ကာ ပွဲပြီးတဲ့အထိ ဂိုးပြတ်အနိုင်ရလဒ်ကို ရယူသွားနိုင်ခဲ့တာပါ။

ဒီရာသီ ချန်ပီယံပြေးလမ်းမှာ အဓိကပြိုင်ဘက်တွေဖြစ်တဲ့ မန်ချက်စတာစီးတီးနဲ့ လီဗာပူးလ်တို့ ရှုံးပွဲတွေ့ကြုံနေရချိန်မှာ အာဆင်နယ်အသင်းက ရရှိလာတဲ့အခွင့်အရေးကို အမိအရ ရယူနိုင်ခဲ့တာပဲဖြစ်ပါတယ်။

နိုင်ငံတကာပွဲစဉ်တွေအပြီးမှာ ဒဏ်ရာရကစားသမားတွေကြောင့် ရုန်းကန်ရလေ့ရှိတဲ့ အာဆင်နယ်အသင်းအတွက် မြောက်လန်ဒန်ဒါဘီနိုင်ပွဲဟာ အဖိုးတန်နိုင်ပွဲဖြစ်ပြီး ဒီနိုင်ပွဲကြောင့် အဆင့် ၁ နေရာကနေ အဆင့် ၂ က ချဲလ်ဆီးကို ၆ မှတ်ဖြတ်ထားကာ အမှတ်ပေးဇယားကို ဦးဆောင်နေဆဲဖြစ်ပါတယ်။

စပါးအသင်းကတော့ အဆင့် ၉ နေရာကို ယာယီရောက်ရှိနေပြီး မန်ချက်စတာယူနိုက်တက်နဲ့ အဲဗာတန်တို့ယှဉ်ပြိုင်ရမယ့် ပွဲစဉ် ၁၂ လက်ကျန်ပွဲအပြီးမှာတော့ အဆင့်အပြောင်းအလဲ ထပ်ရှိလာနိုင်ပါသေးတယ်။

မြေလတ်အသံ၊ နိုဝင်ဘာ ၂၂၊ ၂၀၂၅။

ဒီနေ့ညယှဉ်ပြိုင်ကစားနေတဲ့ ပရီးမီးယားလိဂ် ပွဲစဉ် ၁၂ မှာ လက်ရှိချန်ပီယံ လီဗာပူးလ်အသင်းက နော်တင်ဟမ်ဖောရက်စ်ကို ၃ ဂိုး ဂိုးမရှိနဲ့ ဂိုးပြတ်ရှုံးနိမ့်ခဲ့ပါတယ်။

လီဗာပူးလ်က ဆိုဘော့ဇ်လိုင်းကို ညာနောက်ခံလူအဖြစ် ပွဲထွက်ခဲ့ပြီး ဂက်ပို၊ အီဆက်၊ ဆာလာ တိုက်စစ်အတွဲနဲ့ ပွဲထွက်လာခဲ့ကာ ဘောလုံးပိုင်ဆိုင်မှု ၇၅ ရာခိုင်နှုန်းအထိ ရယူထားနိုင်ခဲ့ပေမယ့် သွင်းဂိုးတွေတော့ ရယူနိုင်ခြင်းမရှိခဲ့ပါဘူး။

ပထမပိုင်း ၃၃ မိနစ်မှာ ဖောရက်စ်ရဲ့ တလုံးတည်းသော ထောင့်ကန်ဘောကနေ နောက်ခံလူ မူရီလို က အပြင်းကန်သွင်းပြီး ဖောရက်စ်အသင်း ဦးဆောင်ဂိုးရရှိခဲ့ပေမယ့် ဂိုးပေါက်ကန်သွင်းမှု ၁၀ ကြိမ်အထိရှိခဲ့တဲ့ လီဗာပူးလ်ကတော့ သွင်းဂိုးမရရှိခဲ့လို့ ပထမပိုင်းကို ၀-၁ ရလဒ်နဲ့ ပြီးဆုံးခဲ့ပါတယ်။

ဒုတိယပိုင်းစစချင်းမှာပဲ ဖောရက်စ်အတွက် ဒုတိယသွင်းဂိုးကို နောက်ခံလူ ဆဗွန်နာက ထပ်မံသွင်းယူခဲ့လို့ လီဗာပူးလ်အတွက် ပိုမိုခက်ခဲလာခဲ့ပြီး ပွဲကစားချိန် ၇၈ မိနစ်မှာ ဂစ်ဘ်ဝှိုက်ရဲ့ သွင်းဂိုးကို ထပ်မံခွင့်ပြုခဲ့ပြီးတဲ့နောက် လီဗာပူးလ်အသင်း ပြန်မလာနိုင်တော့ဘဲ ၀-၃ ရလဒ်နဲ့ ဂိုးပြတ် ရှုံးနိမ့်ခဲ့ရတာပါ။

ဒဏ်ရာရကစားသမားအချို့ရှိနေပေမယ့် နည်းပြ အာနေးဆလော့အနေနဲ့ အကောင်းဆုံးလူစာရင်းကို ပွဲထုတ်ခဲ့တာဖြစ်ပြီး အိမ်ကွင်းမှာ ဂိုးပြတ်ရှုံးနိမ့်ခဲ့ရတာဟာ ချန်ပီယံပြေးလမ်းပေါ်ပြန်တက်ဖို့ ကြိုးစားနေတဲ့လီဗာပူးလ်အတွက် ပိုမိုခက်ခဲတဲ့ အခြေအနေ ဖြစ်ခဲ့ရပါတယ်။

မန်စီးတီးနဲ့ ဖောရက်စ်တို့ကို ၂ ပွဲဆက် ၃ ဂိုးပြတ်ရှုံးခဲ့တဲ့ လီဗာပူးလ်ဟာ လက်ရှိမှာ အဆင့် ၁၁ အထိ (ယာယီ)ရောက်ရှိသွားခဲ့ပြီး အန်ဖီးလ်မှာ နိုင်ပွဲရှာဖွေခဲ့တဲ့ နော်တင်ဟမ်ဖောရက်စ်ကတော့ အဆင့် ၁၆ နေရာမှာ (ယာယီ) ရပ်တည်နေပါတယ်။

ဒါ့အပြင် စနေနေ့ည အခြားသောပွဲစဉ်တွေမှာတော့ ချဲလ်ဆီး၊ ဘရိုက်တန်၊ ဖူလ်ဟမ်နဲ့ ခရစ္စတယ်ပဲလေ့စ်တို့ အနိုင်ရရှိခဲ့ကြပြီး ဘုန်းမောက်နဲ့ဝက်ဟမ်းကတော့ ၂ ဂိုးစီ သရေရလဒ် ထွက်ပေါ်ခဲ့ပါတယ်။

မြေလတ်အသံ၊ နိုဝင်ဘာ ၅၊ ၂၀၂၅။

ချန်ပီယံလိဂ် ပွဲစဉ် ၄ ရဲ့ လီဗာပူးလ် နဲ့ ရီရဲလ်မက်ဒရစ် ထိပ်တိုက်တွေ့ဆုံမှုမှာ အိမ်ရှင်လီဗာပူးလ်က ၁ ဂိုး ဂိုးမရှိရလဒ်နဲ့ နိုင်ပွဲရယူခဲ့ပြီး ရီရဲလ်မက်ဒရစ်ကို ဒီရာသီ ချန်ပီယံလိဂ်မှာ ပထမဆုံးရှုံးပွဲကြုံစေခဲ့ပါတယ်။

ရှုံးပွဲဆက်နေခဲ့တဲ့ လီဗာပူးလ်အသင်းဟာ ပြီးခဲ့တဲ့ တနင်္ဂနွေမနက် ပရီးမီးယားလိဂ်ပွဲစဉ်မှာ အက်စတွန်ဗီလာကို အိမ်ကွင်းနိုင်ပွဲရယူခဲ့ပြီးတဲ့နောက် ချန်ပီယံလိဂ်ထိပ်သီးအသင်း ရီရဲလ်မက်ဒရစ်ကိုလည်း အိမ်ကွင်းမှာပဲ နောက်ထပ်နိုင်ပွဲရယူခဲ့တာပါ။

ရီရဲလ်မက်ဒရစ်အသင်းဟာ ပွဲအစကတည်းက အိမ်ရှင်အသင်းကိုဖိအားပေးတိုက်စစ်ဆင်ကစားခဲ့သလို ဘောလုံးပိုင်ဆိုင်မှုလည်း အသာစီးရယူထားနိုင်ခဲ့ပေမယ့် ကျစ်လျစ်ကောင်းမွန်နေတဲ့ လီဗာပူးလ်ခံစစ်ကို ကျော်ဖြတ်နိုင်ခဲ့ခြင်းမရှိဘဲ သေချာတဲ့ဂိုးပေါက်ခြိမ်းခြောက်မှုတွေလည်း မလုပ်နိုင်ခဲ့ပါဘူး။

လီဗာပူးလ်ဘက်ကတော့ တန်ပြန်တိုက်စစ်နဲ့ ပြစ်ဒဏ်ဘောတွေကတဆင့် ဂိုးရဖို့ကြိုးစားခဲ့ပေမယ့် ဒီပွဲမှာ မက်ဒရစ်ဂိုးသမား ကော်တွိုက်စ် က အပိုင်အခွင့်အရေးတွေကို လက်စွမ်းပြ ကာကွယ်ထားနိုင်ခဲ့တာကြောင့်ထမပိုင်းမှာ ဂိုးမရှိသရေရလဒ်နဲ့ ပထမပိုင်း ပြီးဆုံးခဲ့တာပါ။

ဒုတိယပိုင်းမှာတော့ လီဗာပူးလ်အသင်းက ပိုမိုတိုက်စစ်ဆင်ခဲ့ပြီး ပြစ်ဒဏ်ဘောတွေလည်း မကြာခဏရရှိခဲ့ရာကနေ ပွဲကစားချိန် ၆၁ မိနစ်မှာရရှိခဲ့တဲ့ပြစ်ဒဏ်ဘောကို ဆိုဘော့စလိုင်းက ကန်တင်ပြီး မက်အလစ္စတာက ခေါင်းတိုက်သွင်းယူခဲ့လို့ ဦးဆောင်ဂိုးရရှိခဲ့တာဖြစ်ပါတယ်။

လက်ကျန်မိနစ်တွေမှာတော့ ရီရဲလ်မက်ဒရစ်က ချေပဂိုးရဖို့ကြိုးစားခဲ့ပေမယ့် လီဗာပူးလ်ခံစစ်ကိုတောင် ကျော်ဖြတ်နိုင်ခြင်းမရှိလို့ ဂိုးပေါက်ကန်သွင်းခွင့်မရခဲ့သလို တန်ပြန်တိုက်စစ်ကနေရရှိလာတဲ့အခွင့်အရေး တချို့ကိုလည်း ဂိုးအဖြစ်မပြောင်းလဲနိုင်ခဲ့တဲ့ လီဗာပူးလ်းတိုက်စစ်မှူးတွေကြောင့် နောက်ထပ်သွင်းဂိုးတွေ မမြင်တွေ့ခဲ့ရတော့ဘဲ ၁-၀ ရလဒ်နဲ့ ပွဲပြီးဆုံးခဲ့ပါတယ်။

ဒီပွဲမှာ လီဗာပူးလ်အသင်းက ရီရဲလ်မက်ဒရစ်ကို စိတ်ကြိုက် ဘောလုံးပေးကိုင်ခဲ့ပြီးမှ ဘာမှလုပ်မရအောင် ကစားသွားခဲ့တာဖြစ်ပြီး မက်ဒရစ်ဘက်က ဂိုးကန်သွင်းမှု ၈ ကြိမ်မှာ ၂ ကြိမ်ပဲ ဂိုးပေါက်တည့်ခဲ့တာဖြစ်ပြီး လီဗာပူးလ်ကတော့ ၁၇ ကြိမ် ဂိုးကန်သွင်းခွင့်ရခဲ့ကာ ၉ ကြိမ် ဂိုးပေါက်တည့်ပြီး ၁ ဂိုးရရှိခဲ့တာပါ။

ဒါ့အပြင် ရီရဲလ်မက်ဒရစ်က မိနစ် ၈၀ မှာ လူစားလဲဝင်ရောက်လာခဲ့တဲ့ လီဗာပူးလ်ကစားသမားဟောင်း အလက်ဇန်းဒါး အာနိုးကို အသင်းဟောင်းပရိသတ်တွေက ဖိအားပေးလှောင်ပြောင်ခဲ့ပြီး အာနိုး ဘောလုံးလက်ခံရယူတိုင်းမှာလည်း လီဗာပူးလ်ပရိတ်သတ်က လှောင်ပြောင်နေခဲ့တာ ဖြစ်ပါတယ်။

ဒီနိုင်ပွဲကြောင့် လီဗာပူးလ်သင်းဟာ ချန်ပီယံလိဂ် အဆင့် ၆ နေရာကို ယာယီတက်လှမ်းခဲ့ပြီး ချန်ပီယံလိဂ်ပထမဆုံးရှုံးပွဲကြုံခဲ့ရတဲ့ မက်ဒရစ်ကတော့ လီဗာပူးလ်နဲ့အမှတ်တူ အဆင့် ၅ နေရာအထိ ရောက်ရှိခဲ့တာပဲ ဖြစ်ပါတယ်။

ဒါ့အပြင် ဗုဒ္ဓဟူးမနက် ချန်ပီယံလိဂ်ပွဲစဉ်တွေမှာတော့ အာဆင်နယ်၊ အက်သလက်တီကို၊ မိုနာကို၊ ဘိုင်ယန်၊ စပါးအသင်းတွေကလည်း နိုင်ပွဲတွေရရှိခဲ့ပါတယ်။

◼️ ချဲလ်ဆီးနဲ့ လီဗာပူးလ် ရှုံးနိမ့်ခဲ့တဲ့ စနေည ပရီးမီးယားလိဂ်ပွဲစဉ်များ

မြေလတ်အသံ၊ အောက်တိုဘာ ၂၆၊ ၂၀၂၅။

ပရီးမီးယားလိဂ်ပွဲစဉ် ၉ စနေနေ့ညနဲ့ တနင်္ဂနွေမနက် ပွဲစဉ်တွေမှာတော့ မန်ချက်စတာယူနိုက်တက်က ဘရိုက်တန်ကို ၄ ဂိုး ၂ ဂိုးနဲ့ အနိုင်ရခဲ့ပြီး အဆင့် ၄ နေရာကို ယာယီတက်လှမ်းနိုင်ခဲ့ပါတယ်။

ယူနိုက်တက် အိမ်ကွင်း အိုးထရက်ဖို့ဒ်မှာ ယှဉ်ပြိုင်ခဲ့တဲ့အဲ့ဒီပွဲစဉ်မှာ ယူနိုက်တက်က ပွဲချိန်မိနစ် ၇၀ ကျော်အထိ ၃ ဂိုးပြတ်နဲ့ ဦးဆောင်ထားနိုင်ခဲ့တာဖြစ်ပြီး အဲ့ဒီနောက် ချေပဂိုး ၂ ဂိုး ခွင့်ပြုပေးခဲ့ရလို့ သရေရလဒ်နဲ့ နီးစပ်ခဲ့ပေမယ့် နာကျင်အချိန်ပို နောက်ဆုံးမိနစ်မှာ အနိုင်သေချာစေမယ့်ဂိုးကို ထပ်မံရရှိခဲ့တာကြောင့် ယူနိုက်တက်တို့ အဆင့် ၄ အထိ ယာယီတက်လှမ်းနိုင်ခဲ့ပါတယ်။

ဒီပွဲမှာ ယူနိုက်တက်အတွက် သွင်းဂိုးတွေကို ကွန်ညာ ၁ ဂိုး၊ ကက်စမဲရိုး ၁ ဂိုးနဲ့ အမ်ဘူမိုက ၂ ဂိုး သွင်းယူပေးခဲ့တာဖြစ်ပြီး ဘရိုက်တန်အတွက် ဝဲဘက်ခ်နဲ့ ကော့စ်တူးလက် တို့က ၁ ဂိုးစီ သွင်းယူပေးခဲ့တာပါ။

ယူနိုက်တက်က ဒီနေ့နိုင်ပွဲကြောင့် ပရီးမီးယားလိဂ် ၃ ပွဲဆက် အနိုင်ရရှိခဲ့တာဖြစ်ပြီး ကွန်ညာ အနေနဲ့လည်း ယူနိုက်ကစားသမားဘဝ ပထမဆုံးသွင်းဂိုးရရှိခဲ့တာဖြစ်ပါတယ်။

ဒါ့အပြင် အခြားပွဲစဉ်တွေမှာတော့ ချဲလ်ဆီးက ဆန်းဒါးလန်းကို အိမ်ကွင်းမှာ ၁-၂ ရလဒ်နဲ့ရှုံးနိမ့်ခဲ့ပြီး နယူးကာဆယ်က ဖူလ်ဟမ်ကို ၂-၁ နဲ့အနိုင်ရရှိခဲ့ကာ လီဗာပူးလ်ကတော့ ဘရန်ဖို့ဒ်အိမ်ကွင်းမှာ ၃-၂ နဲ့ ရှုံးနိမ့်ခဲ့ပါတယ်။

ချဲလ်ဆီးကို အနိုင်ရရှိခဲ့တဲ့ တန်းတက်အသင်း ဆန်းဒါးလန်းက လက်ရှိ အဆင့် ၂ နေရာအထိ ယာယီတက်လှမ်းထားနိုင်ခဲ့ပြီး ယူနိုက်တက်က အဆင့် ၄၊ လီဗာပူးလ်က အဆင့် ၆ နဲ့ ချဲလ်ဆီးက အဆင့် ၈ နေရာအသီးသီးမှာ ယာယီရပ်တည်နေကြပါတယ်။

မြေလတ်အသံ၊ အောက်တိုဘာ ၂၀၊ ၂၀၂၅။

ပရီးမီးယားလိဂ် ပွဲစဉ် ၈ အောက်တိုဘာ ၁၉ ရက် တနင်္ဂနွေနေ့နောက်ဆုံးပွဲဖြစ်တဲ့ လီဗာပူးလ်နဲ့ မန်ချက်စတာယူနိုက်တက်တို့ရဲ့ အင်္ဂလန်ဒါဘီမှာ ယူနိုက်တက်က ၂-၁ ရလဒ်နဲ့ လီဗာပူးလ်ကို အန်ဖီးလ်မှာ အနိုင်ယူခဲ့ပါတယ်။

ပွဲအစ ၂ မိနစ်မှာပဲ ယူနိုက်တက်ကို ဦးဆောင်ဂိုး ၁ ခွင့်ပြုပေးခဲ့ရတဲ့ အိမ်ရှင် လီဗာပူးလ် အတွက် ကစားရခက်ခဲတဲ့ပွဲဖြစ်ခဲ့ပြီး ကိုဒီဂက်ပို ရဲ့ တိုင်ထိတာတွေနဲ့ တိုက်စစ်ကစားသမားတွေ အပိုင်အခွင့်အရေး လွဲချော်မှုတွေကြောင့် ပထမပိုင်းအပြီးမှာ အမ်ဘူမိုရဲ့ဦးဆောင်ဂိုးနဲ့ပဲ ယူနိုက်တက်က အသာစီးရယူထားခဲ့တာပါ။

ဒုတိယပိုင်း ၇၈ မိနစ်မှာတော့ အကြိမ်ကြိမ် ကံခေနေတဲ့ ဂက်ပို က ချေပဂိုးကို ရယူနိုင်ခဲ့ပြီး ယူနိုက်တက်ကတော့ ခံစစ်ပဲကစားနေရတာကြောင့် လီဗာပူးလ်တို့ အနိုင်ဂိုးထပ်ရသွားနိုင်မလား ထင်မှတ်နေချိန်မှာပဲ ချေပဂိုးပေးပြီး ၆ မိနစ်အကြာမှာ မက်ဂွိုင်းယားရဲ့ ခေါင်းတိုက်သွင်းဂိုးနဲ့ ယူနိုက်တက်က ထပ်မံဦးဆောင်ခဲ့ပါတယ်။

အဲ့ဒီနောက် လက်ကျန်မိနစ်တွေမှာ လီဗာပူးလ်က နောက်ထပ် ချေပဂိုးပြန်လည်သွင်းယူနိုင်ရေး ကြိုးစားခဲ့ပေမယ့် ယူနိုက်တက်နောက်တန်းကို ကျော်ဖြတ်နိုင်ခြင်းတာကြောင့် ပွဲအပြီးမှာ ၁-၂ ရလဒ်နဲ့ အင်္ဂလန်ဒါဘီမှာ အရှုံးနဲ့ ရင်ဆိုင်ခဲ့ရတာပါ။

ဒီရာသီ ၂ ပွဲဆက် နိုင်ပွဲမရရှိသေးတဲ့ ယူနိုက်တက်ကတော့ လီဗာပူးလ်ကို အနိုင်ယူပြီး ပထမဆုံး ၂ ပွဲဆက်နိုင်ပွဲ ရယူနိုင်ခဲ့ကာ လက်ရှိ အမှတ်ပေးဇယား အဆင့် ၉ နေရာမှာ ဆက်လက်ရပ်တည်နေပါတယ်။

ဒါ့အပြင် လီဗာပူးလ်အသင်းအနေနဲ့ ပြိုင်ပွဲစုံ ၄ ပွဲဆက် ရှုံးပွဲကြုံတွေ့နေရပြီး ဒီနေ့ရှုံးပွဲကြောင့် အဆင့် ၂ ကနေ အဆင့် ၄ အထိ ရောက်ရှိသွားကာ အဆင့် ၁ က အာဆင်နယ်နဲ့ ၄ မှတ် ကွာဟခဲ့ပြီပဲ ဖြစ်ပါတယ်။

မြေလတ်အသံ၊ အောက်တိုဘာ ၅၊ ၂၀၂၅။

ပရီးမီးယားလိဂ် ပွဲစဉ် ၇ စနေနေ့ညရဲ့ နောက်ဆုံးပွဲဖြစ်တဲ့ ချဲလ်ဆီးနဲ့ လီဗာပူးလ် ပွဲစဉ်မှာ ချဲလ်ဆီးက လီဗာပူးလ်ကို ၂-၁ ရလဒ်နဲ့ အနိုင်ရရှိခဲ့ပါတယ်။

စတန်းဖို့ဒ်ဘရစ်ချ်မှာယှဉ်ပြိုင်ခဲ့တဲ့ ဒီပွဲမှာ ပရီးမီးယားလိဂ် ၂ ပွဲဆက်ရှုံးထားခဲ့ရတဲ့ ချဲလ်ဆီးအသင်းက အိမ်ကွင်းမှာ အကောင်းဆုံးယှဉ်ပြိုင်ခဲ့ပြီး ပွဲစဉ် ၆ မှာ ပထမဆုံးရှုံးပွဲတွေ့ထားတဲ့ လက်ရှိချန်ပီယံ လီဗာပူးလ်အသင်းကလည်း အဆင့် ၁ နေရာ ဆက်လက်ရပ်တည်နိုင်ရေးအတွက် အစွမ်းကုန် ကြိုးစားခဲ့တာပါ။

ပထမပိုင်း ပွဲချိန် ၁၄ မိနစ်မှာ ချဲလ်ဆီး ကွင်းလယ်ကူ ကိုင်စီဒိုရဲ့ လှပတဲ့ အဝေးကန်ချက်နဲ့ အိမ်ရှင်အသင်း ဦးဆောင်နိုင်ခဲ့ပြီး ပထမပိုင်းအပြီးမှာ ၁-၀ ရလဒ်နဲ့ ချဲလ်ဆီးက ဦးဆောင်ထားတာပါ။

ဒုတိယပိုင်းမှာတော့ လီဗာပူးလ်က လူစားပြောင်းလဲမှု ၃ ကြိမ်ပြုလုပ်ပြီးတဲ့နောက် ၆၃ မိနစ်မှာ အီဆက်ရဲ့ ဖန်တီးမှုကနေတဆင့် ကိုဒီဂတ်ပို က အမှားအယွင်းမရှိကန်သွင်းခဲ့ပြီး လီဗာပူးလ်အတွက် ချေပဂိုး ပြန်လည် သွင်းယူပေးခဲ့ပါတယ်။

အဲ့ဒီနောက် လက်ကျန်မိနစ်တွေမှာ အနိုင်ရလဒ်ရရှိအောင် ၂ သင်းလုံး ပိုမိုကြိုးစားခဲ့ပေမယ့် ပွဲအဖြေကို ပြောင်းလဲနိုင်ခဲ့ခြင်းမရှိသလို ပြစ်ဒဏ်ဘောတွေကို လျစ်လျူရှုထားတဲ့ ကွင်းလယ်ဒိုင်ကြောင့် ပွဲက ပိုမိုကြမ်းတမ်းပြီး အကြိတ်အနယ်ရှိခဲ့တာပါ။

မိနစ် ၉၀ ပြည့်ပြီး နာကျင်အချိန်ပို ၇ မိနစ် ခွင့်ပြုပေးခဲ့ရာက နာကျင်အချိန်ပို ၆ မိနစ်မှာ ချဲလ်ဆီးရဲ့ လူစားဝင် လူငယ်တောင်ပံကစားသမား အက်စတီဗိုက ကူကူရယ်လာရဲ့ ပေးပို့မှုကို ချိန်သားကိုက် ပိတ်ဆို့နိုင်ခဲ့လို့ အနိုင်ဂိုးရရှိခဲ့ပြီး ပွဲအပြီးမှာတော့ ၂-၁ ရလဒ်နဲ့ အိမ်ရှင် ချဲလ်ဆီးအသင်း အနိုင်ရရှိခဲ့တာပဲ ဖြစ်ပါတယ်။

ပွဲချိန်အတွင်း ချဲလ်ဆီးနည်းပြ အန်ဇို မာရက်စကာနဲ့ လီဗာပူးလ်နည်းပြ အာနဲစလော ၂ ဦးလုံး အဝါကဒ်ပြသခံထားရပြီး ပွဲပြီးကာနီးမှာတော့ အန်ဇိုမာရက်စကာက နောက်ထပ် အဝါကဒ်နဲ့အတူ ၂ ဝါ ၁ နီနဲ့ ထုတ်ပယ်ခံခဲ့ရပါသေးတယ်။

ဒီပွဲစဉ် ရလဒ်ကြောင့် လီဗာပူးလ်က ပြိုင်ပွဲစုံ ၃ ပွဲဆက်ရှုံးနိမ့်ခဲ့သလို အဆင့် ၁ နေရာက အာဆင်နယ်နဲ့ ၁ အကွာနဲ့ အမှတ်ပေးဇယား အဆင့် ၂ နေရာကိုရောက်ရှိသွားခဲ့ပြီး ချဲလ်ဆီးကတော့ အဆင့် ၆ နေရာမှာ ရပ်တည်နေပါတယ်။