မှုခင်း

မြေလတ်အသံ၊ ဧပြီ ၃၊ ၂၀၂၆။

ထိုင်းနိုင်ငံ၊ ဘန်ကောက်မြို့၊ မင်ဘူရီခရိုင်မှာ အသက် ၇ နှစ်အရွယ် သမီးဖြစ်သူကို သတ်ဖြတ်ထွက်ပြေးခဲ့တဲ့ မြန်မာအမျိုးသမီး ၁ ဦး ကော့လန်းကျွန်းကို ထွက်ပြေးတိမ်းရှောင်စဉ် ဖမ်းဆီးရရှိခဲ့တယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။

ပြီးခဲ့သည့် ဧပြီ ၁ ရက်က ဘန်ကောက်မြို့၊ မင်ဘူရီခရိုင်၊ ရမ်ခမ်းဟမ်း လမ်းသွယ် ၁၉၀ ရှိ နေအိမ် ၁ လုံးမှာ အသက် ၃၄ နှစ်အရွယ် မြန်မာနိုင်ငံသား မမျိုး (ခ) မမျိုးပပထွန်း က သူ့ရဲ့ အသက် ၇ နှစ်အရွယ် သမီးအရင်းကို လည်ပင်းညှစ်သတ်ခဲ့တာလို့ ဆိုပါတယ်။

ယမန်နေ့ ဧပြီ ၂ ရက် မွန်းလွဲပိုင်းမှာ စုံစမ်းစစ်ဆေးရေးရဲတပ်ဖွဲ့နဲ့ ပတ္တရားခရီးသွားရဲတပ်ဖွဲ့တို့ ပူးပေါင်းပြီး ချွန်ဘူရီခရိုင်၊ ဘန်လမွန်ရှိ ကော့လန်းကျွန်းပေါ်က ဟိုတယ်အခန်း ၁ ခုမှာ မမျိုးပပထွန်း ကို ဖမ်းဆီးနိုင်ခဲ့တယ်လို့ သိရပါတယ်။

ကိုယ်ရေးကိုယ်တာ ပြသနာတွေနဲ့ စိတ်ဖိစီးမှုတွေကြောင့် ကိုယ့်ကိုယ်ကိုယ် အဆုံးစီရင်ဖို့ ဆုံးဖြတ်ခဲ့ကာ ဧပြီ ၁ ရက် နေ့လယ် ၂ နာရီခန့်မှာ သမီးဖြစ်သူကို လည်ပင်းညှစ်သတ်ခဲ့ပြီးနောက် နောင်တရ စိတ်ပြောင်းကာ ကော့လန်းကျွန်းကို ထွက်ပြေးခဲ့တာဖြစ်ကြောင်း မမျိုးပပထွန်းက စကားပြန်ကနေတဆင့် ထွက်ဆိုချက်ပေးခဲ့တယ်လို့ ဆိုပါတယ်။

ရဲတပ်ဖွဲ့ရဲ့ ထုတ်ပြန်ချက်အရ တရားခံက ပြစ်မှုအားလုံးကိုဝန်ခံထားပြီး သူ့မှာ စိတ်ကျရောဂါ (Depression) ခံစားနေရကာ လူနေမှုဘဝအခက်အခဲတွေ အမြဲကြုံတွေ့နေရသူဖြစ်တယ်လို့ပြောကြားခဲ့ပြီး မမျိုးပပထွန်းဟာ ဘရူနိုင်းနိုင်ငံမှာ အလုပ်သွားရောက်လုပ်ကိုင်ရာကနေ ထိုင်းနိုင်ငံကိုရောက်ရှိလာတာ ရက်ပိုင်းသာ ရှိသေးတယ်လို့ သိရပါတယ်။

စိတ်ဖိစီးမှုတွေကြောင့် သမီးနဲ့အတူ သေကြောင်းကြံစည်ရာမှ လူသတ်မှု ဖြစ်ပွားခဲ့တာဖြစ်ပြီး ရဲတပ်ဖွဲ့အနေနဲ့ တရားခံကို နောက်ထပ်စစ်ဆေးမေးမြန်းမှုတွေပြုလုပ်ဖို့ မင်ဘူရီရဲစခန်းကို ခေါ်ဆောင်ထိန်းသိမ်းထားတယ်လို့ သိရပါတယ်။

Ref – MGR online.

ဝေါ၊ မတ် ၃၀၊ ၂၀၂၆။

ပဲခူးတိုင်း၊ ဝေါမြို့နယ်၊ ညောင်ခါးရှည်စစ်ဆေးရေးဂိတ်အနီး ရန်ကုန်-မော်လမြိုင်လမ်းမှာ ယာဥ်တိုက်မှုဖြစ်ပြီး လူ ၃ ဦးသေဆုံးတယ်လို့ အခင်းဖြစ်စဥ်ကိုကူညီလုပ်ဆောင်ပေးခဲ့သူတွေထံက သိရပါတယ်။

မတ်လ ၂၉ ရက် ယမန်နေ့ည ၇ နာရီခန့်က ညောင်ခါးရှည်စစ်ဆေးရေးဂိတ်နဲ့ ၂ ဖာလုံခန့်အကွာမှာ ရန်ကုန်ဘက်ကို ဦးတည်ရပ်ထားတဲ့ ၁၂ ဘီးကုန်တင်ယာဥ်ကို လားရာတူအတိုင်းမောင်းနှင်လာတဲ့ အငှားတက္ကစီယာဥ်က တိုက်မိခဲ့တာလို့ ဆိုပါတယ်။

” ကျနော်တို့မေးကြည့်တော့ ကုန်ကားကရပ်ထားတာကို အနောက်ကနေ တက္ကစီက ဘယ်ဘက်ခြမ်းကိုဝင်ဆောင့်တာလို့ပြောတယ်။ ၂ စီးစလုံးက လားရာတူပဲ။ ဘယ်လိုဖြစ်ပြီး တိုက်တာလဲဆိုတော့ ဘယ်သူမှလည်းမျက်မြင်မရှိတော့ အဲ့နေရာကလည်းမှောင်နေတယ်။ မျက်မြင်မရှိတော့ ပြောရခက်တယ်။ “လို့ ကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် တက္ကစီယာဥ်ပေါ်ပါ ရန်ကုန်တိုင်း၊ သင်္ကန်းကျွန်းမြို့နယ်နေသူတွေဖြစ်တဲ့ အသက် ၂၀ အရွယ်အမျိုးသမီး ၁ ဦး၊ အသက် ၄၀ အရွယ် ယာဥ်မောင်းအမျိုးသားနဲ့ အသက် ၆၀ အရွယ် အမျိုးသမီးတို့ အခင်းဖြစ်နေရာမှာပဲ သေဆုံးသွားခဲ့တယ်လို့ ဆိုပါတယ်။

သေဆုံးသွားသူတွေကို ဒေသခံလူမှုကူညီရေးအသင်းတွေက ညောင်ခါးရှည်တိုက်နယ်ဆေးရုံကို ပို့ဆောင်ပေးခဲ့ကြရတယ်လို့ သိရပါတယ်။

ပြီးခဲ့တဲ့ ဇန်နဝါရီလ ၇ ရက်ကလည်း ဝေါမြို့နယ်အပိုင် ရန်ကုန်- မော်လမြိုင်လမ်းမှာ စက်ချို့ယွင်းလို့ရပ်ထားတဲ့ ယာဥ်ကို နောက်ယာဥ်ကဝင်တိုက်လို့ ၃ ဦးသေဆုံးခဲ့သေးတယ်လို့ သိရပါတယ်။

ဝက်လက်၊ မတ် ၂၈၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ကျီးပြားရွာအလှူပွဲမှာဖြစ်ခဲ့တဲ့ရန်ပွဲနဲ့ဆက်စပ်ပြီး အောင်ချမ်းသာရွာ ရပ်ကျေးပကဖ၊ ပအဖအဖွဲ့ဝင် ၃ ဦးနဲ့ ရုန်းသာရွာသား ၄ ဦးတို့ကို ဖမ်ဆီးစစ်ဆေးနေတယ်လို့ ဒေသခံတွေနဲ့ ဝက်လက်မြို့နယ်ပလဖတာဝန်ခံဆီက သိရပါတယ်။

ဖြစ်စဥ်မှာပါဝင်တဲ့ အောင်ချမ်းသားရွာပအဖတာဝန်ခံ ဦးတင်မိုး၊ ပကဖတာဝန်ခံ ကိုချက်ကြီး၊ ပကဖအဖွဲ့ဝင် ကိုသိန်းဝင်းတို့ကို မတ်လတတိယပတ်အတွင်းမှာ ဖမ်ဆီးခဲ့တာဖြစ်ပြီး မတ်လ ၂၆ ရက်မှာ ရုန်းသာကျေးရွာက အသက် ၂၀ ကျော်အရွယ်ရှိ ဒူးဝါး၊ အောင်ခန့်နိုင်၊ အောင်မြတ်စိုး၊ ဇင်ကိုလွင်တို့ကို ဆက်လက်ဖမ်းဆီးခဲ့တာလို့ ဆိုပါတယ်။

“အလှူမှာ အဖွဲ့လိုက်ရန်ဖြစ်ကြတာလေ။ အုပ်ချုပ်ရေးအဖွဲ့တွေဘက်ကလည်း ဒဏ်ရာရတဲ့သူတွေ ရှိတယ်။ အုပ်ချုပ်ရေးမှူးကလည်း တရားလိုလုပ်ပြီး အမှုပြန်ဖွင့်ထားတော့ ကျနော်တို့ဘက်က ပြန်ထိန်းထားတယ်။ ဟိုဘက်က ပအဖ၊ ပကဖတွေလည်းဖမ်းထားပြီ။”လို့ ပြောပါတယ်။

ပြီးခဲ့တဲ့ ဇန်နဝါရီ ၂၂ ရက် ညပိုင်းမှာ ဝက်လက်မြို့နယ်၊ ကျီးပြားရွာမှာပြုလုပ်တဲ့ ရှင်ပြုအလှူ ၁ ခုမှာ ကခုန်နေကြတဲ့ ရုန်းသာရွာသားတွေနဲ့ အောင်ချမ်းသာရွာသားတွေအကြား စကားများရန်ဖြစ်ရာက အောင်ချမ်းသာရွာပအဖတာဝန်ခံ ဦးတင်မိုး၊ ပကဖတာဝန်ခံ ကိုချက်ကြီး၊ ပကဖအဖွဲ့ဝင် ကိုသိန်းဝင်းတို့ အပါ လူ ၂၀ ကျော်က ရုန်းသာရွာသားတွေဖြစ်တဲ့ အောင်ခန့်နိုင်၊ ခန့်သူရကျော်၊ သက်နောင်ထွန်း၊ ဇင်ကိုလွင် တို့ ၄ ဦးကို ဓား၊ စကေဘာတွေနဲ့ ထိုးနှက်ခဲ့တာပါ။

အခင်းဖြစ်ပြီးနောက် ရုန်းသာရွာသားတွေကို ဓါးနဲ့ထိုးခဲ့သူတွေဖြစ်တဲ့ အောင်ချမ်းသာရွာက ဦးတင်မိုး၊ ကိုချက်ကြီး၊ ကိုသိန်းဝင်းတို့ကိုဖမ်းဆီးထိန်းသိမ်းခဲ့ပြီးနောက် အောင်ချမ်းသာရွာသားတွေဘက်က ရန်ပွဲမှာပါဝင်တဲ့ ရုန်းသာရွာသားတွေကို ပြန်လည်အမှုဖွင့်ခဲ့တာကြောင့် နှစ်ဖက်ဖမ်းဆီးမှုတွေ ပြုလုပ်ခဲ့တာလို့ မြို့နယ်ပလဖတာဝန်ခံက ပြောပါတယ်။

နှစ်ဖက်အပြန်အလှန်အမှုဖွင့်ထားတဲ့အတွက် ဖမ်းဆီးထားသူတွေကို အာမခံပေးလို့မရဘဲ နှစ်ဖက်စလုံးကို ဝက်လက်မြို့နယ်တရားရုံးဆီ လွှဲပြောင်းပေးမှာဖြစ်တယ်လို့ သူက ဆက်ပြောပါတယ်။

ဖမ်းဆီးခံထားရသူ ရုန်းသာရွာသား ၄ ဦးအနက် ဒူးဝါးနဲ့ အောင်မြတ်စိုးတို့ဟာ ရန်ပွဲမှာမပါဝင်သူတွေဖြစ်တာကြောင့် မြို့နယ်ပလဖ အနေနဲ့ သေချာစိစစ်ပေးစေချင်တယ်လို့ ဖမ်းဆီးခံရသူတွေနဲ့ နီးစပ်သူတဦးကပြောပါတယ်။

“ဓားနဲ့ထိုးတဲ့ ပအဖကတိုင်လို့ ဖမ်းတာလို့ သိရတယ်။ ဒီကလေးတွေကို တဖက်ကအမှုဖွင့်တာနဲ့ ဖမ်းတယ်တဲ့။ ဘာပြစ်မှုမှလည်းမရှိဘဲနဲ့ တရားမျှတမှု မရှိသလိုဖြစ်နေတယ်။ တဖက်မှာလည်း ဘာဒဏ်ရာမှမရထားဘဲနဲ့ ဓားကိုင်ပြီး လူမသေသေအောင်သတ်ဖို့လုပ်ခဲ့တဲ့သူတွေက အကြာကြီး လွတ်နေပြီးတော့ ကိုယ့်ဘက်ကကလေးတွေကျတော့ တဖက်ကတိုင်ရုံနဲ့ ဖမ်းတာလားပေါ့”လို့ ပြောပါတယ်။

အဆိုပါရန်ပွဲအတွင်း ဓါး၊ စကေဘာတွေနဲ့ထိုးနှက်ခံရတာကြောင့် ရုန်းသာရွာသား အောင်ခန့်နိုင်၊ သက်နောင်ထွန်း၊ ခန့်သူရကျော်၊ ဇင်ကိုလွင်တို့ ၄ ဦးမှာ ထိုးသွင်းဒဏ်ရာတွေအများအပြားရရှိခဲ့ပြီး အဲ့ဒီထဲက အောင်ခန့်နိုင်နဲ့ ခန့်သူရကျော်တို့မှာ ဒဏ်ရာပြင်းထန်တာကြောင့် ၁ လနီးပါးကြာ ဆေးရုံတက် ကုသမှုခံယူခဲ့ရဝာာလည်း ဖြစ်ပါတယ်။

စာတည်း – လင်း

မန္တလေး၊ မတ် ၂၇၊ ၂၀၂၆။

မန္တလေး၊ မဟာအောင်မြေမြို့နယ်၊ ရှမ်းပိုင်းရပ်ကွက်၊ ၈၇ လမ်းနဲ့ ၃၆ လမ်းအနီးမှာ ဆီပန့်အသေးထောင်ပြီး ဓါတ်ဆီရောင်းတဲ့ အိမ်မီးလောင်ပြီး အမျိုးသား ၁ ဦးသေဆုံးခဲ့တယ်လို့ မြို့ခံတွေဆီက သိရပါတယ်။

မတ်လ ၂၆ ရက် မနေ့ကမနက် ၁၀ နာရီမှာ မီးလောင်ခဲ့တာကြောင့် အသက် ၁၇ နှစ်အရွယ် မောင်မင်းခန့်မောင် သေဆုံးပြီး မိခင်ဖြစ်သူဒဏ်ရာရခဲ့တယ်လို့ ဆိုပါတယ်။

“ကလေး အပေါ်ထပ်မှာ အိပ်နေတာလို့ပြောတယ်။ မီးငြိမ်းမှ DB (Dead Body) ထုတ်လာရတာ။ ကလေးအမေကတော့ မီးလောင်ဒဏ်ရာက မစိုးရိမ်ရပေမယ့် သားစိတ်နဲ့ စိတ်ကဖြစ်နေလို့ ဆေးရုံပို့လိုက်ရတာပါ”လို့ လူမှုကူညီရေးအသင်းတာဝန်ရှိသူတဦးက ပြောပါတယ်။

ဒီမီးလောင်ကျွမ်းမှုနဲ့ပတ်သက်ပြီး အသေးစိတ်ကိုတော့ မီးသတ်ဦးစီးဌာနက စိစစ်ဆဲလို့ ထုတ်ပြန်ထားပါတယ်။

ပြီးခဲ့တဲ့ မတ်လ၂၁ ရက် ၁ ရက်တည်းမှာပဲ ပုသိမ်ကြီးနဲ့ ပြည်ကြီးတံခွန်မြို့နယ်တို့မှာ မီးလောင်မှုတွေဖြစ်ခဲ့တာကြောင့် နေအိမ်နဲ့ ဂိုထောင် ၂ လုံးပျက်စီးခဲ့သေးတယ်လို့ သိရပါတယ်။

သတင်း – MG

ဝက်လက်၊ မတ် ၂၃၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ရွှေပန်းကုန်းရွာမှာ တောင်သူ ၂ ဦးအချင်းများရာက ၁ ဦးခေါင်းဖြတ် သတ်ခံခဲ့ရတယ်လို့ ဒေသခံတွေဆီက သိရပါတယ်။

မတ်လ ၂၁ ရက်မနက်ပိုင်းမှာ ရွှေပန်းကုန်းရွာနေ အသက် ၅၀ အရွယ် ဇော်မျိုးလှိုင် (ခ) မော့တော့နဲ့ အသက် ၇၀ အရွယ် ဦးတင်သန်းတို့ဟာ ၎င်းတို့ပိုင် ကပ်လျက်လယ်ကွက်အတွင်း အလုပ်လုပ်နေရာကနေ အချင်းများပြီး ဇော်မျိုးလှိုင် (ခ) မော့တော့ က ဓါးနဲ့ခုတ်သတ်ခဲ့တာလို့ ဆိုပါတယ်။

“လယ်ချင်းကပ်လျက်ကို အချင်းချင်းမတည့်ကြတာ၊ မတည့်ကြတော့ သတ်ခံရတဲ့ လူကနေပြီး ဟိုဖက်အခင်းနဲ့ လယ်ကြားထဲကို ဆူးကိုင်းချတာတွေ ဘာတွေလုပ်တာ၊ ဖြစ်ချင်တော့ မနေ့က သတ်ခံရတဲ့သူက သတ်တဲ့လူ လယ်ကွက်ဖက်ကို၊ ငှက်ပျောခင်းဖက်ကို ပေါင်းသတ်ဆေးဆိုလား၊ ပိုးသတ်ဆေးဆိုလား သွားဖြန်းတာ၊ အဲဒါ မခံနိုင်တော့ကျ သတ်မိသွားတာ။” လို့ ဒေသခံတဦးက ပြောပါတယ်။

လူသတ်မှုဖြစ်စဉ်ကို မျက်မြင်သိသူ မရှိခဲ့ပေမယ့် ကျူးလွန်သူ ဇော်မျိုးလှိုင် (ခ) မော့တော့ ကိုယ်တိုင်က ရပ်ကျေးပအဖဆီမှာ လာရောက် အဖမ်းခံခဲ့တာလို့ အထက်ပါဒေသခံက ဆိုပါတယ်။

“ဟိုတိုင်းဆို ဘယ်သူမှမသိဘူး၊ သူကိုယ်တိုင်ကိုက ပအဖရုံးကို လာပြီးတော့ လာပြောတာပေါ့၊ သူလူသတ်ခဲ့တယ် ဆိုတဲ့အကြောင်း။” လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။

ဇန်နဝါရီ ၂၂ ရက်ကလည်း ဝက်လက်မြို့နယ်၊ ကျီးကန်ရွာက ကျေးရွာလမ်းကော်မတီ အဖွဲ့ဝင် စပါးပွဲစား ၁ ဦး ရွာတော်ရွာနဲ့ မဲကုန်းရွာကြားမှာ ပစ္စတိုနဲ့ ဦးခေါင်းကိုပစ်သတ်ခံခဲ့ရပြီး ဖေဖော်ဝါရီလ ၁၂ ရက်မှာလည်း ဝက်လက်မြို့နယ်၊ ရွာသာကြီးရွာ အသက် ၅၀အရွယ် လင်မယား ၂ ဦး သူတို့ပိုင် လယ်ကွက်တွေမှာပဲ ပေါက်ပြားနဲ့ ခုတ်သတ်ခံခဲ့ရတဲ့ဖြစ်စဥ်တွေ ရှိခဲ့ပါသေးတယ်။

စာတည်း – လင်း

ဝက်လက်၊ ဖေဖော်ဝါရီ ၁၃၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်မှာ ရပ်ကျေးပကဖအဖွဲ့ဝင်တွေက အရပ်သား ၄ ဦးကို ဓားနဲ့ထိုး၊ တုတ်နဲ့ရိုက်နှက်မှုဖြစ်ပွားခဲ့ပြီး ဖြစ်စဥ်အပေါ် ရွာခံတွေဘက်က မြို့နယ်ပလဖထံ တိုင်ကြားထားပေမယ့် လက်ခံအမှုဖွင့်ပေးတာမရှိသေးဘူးလို့ ဒေသခံတွေဆီက သိရပါတယ်။

ဇန်နဝါရီ ၂၂ ရက် ညပိုင်းက ကျီးပြားရွာရှင်ပြုအလှူပွဲဆိုင်းဝိုင်းမှာ ကခုန်နေတဲ့ ရုန်းသာရွာသားတွေဖြစ်တဲ့ အောင်ခန့်နိုင်၊ ခန့်သူရကျော်၊ သက်နောင်ထွန်း၊ ဇင်ကိုလွင် တို့ ၄ ဦးကို အလှူပွဲမှာလုံခြုံရေးယူထားတဲ့ အောင်ချမ်းသာရွာပကဖအဖွဲ့ဝင်တွေက အလှူပွဲအနီးမှာပဲ ဓား၊ စကေဘာတွေနဲ့ ထိုးခဲ့တာလို့ မျက်မြင်တွေ့ရှိသူတွေကို ကိုးကားပြီး ဓားထိုးခံရသူတဦးရဲ့မိသားစုဝင်က မြေလတ်အသံကို ပြောပါတယ်။

ဇန်နဝါရီ ၂၂ ရက် ည ၇ နာရီခန့်မှာ ကျီးပြားကျေးရွာမှာပြုလုပ်တဲ့ ရှင်ပြုအလှူ ၁ ခုမှာ ထည့်သွင်းထားတဲ့ ဆိုင်းဝိုင်းမှာ ကခုန်နေကြတဲ့ ရုန်းသာရွာသားတွေနဲ့ အောင်ချမ်းသာရွာသားတွေ တိုက်မိကြရာမှ စကားများရန်ဖြစ်ခဲ့ကြတယ်လို့ ဆိုပါတယ်။

“ပထမတခါအခင်းဖြစ်ပွားလိုက်တော့ အောင်ချမ်းသာရွာဘက်က ပကဖ၊ ပအဖတွေက ရုန်းသာရွာသားတွေနဲ့သူတို့ရွာသားတွေဖြစ်တော့ ခဏထိန်းပေးလိုက်တာ။ ထိန်းပေးလိုက်တော့ အဆင်ပြေသွားကြပြီ။ အဲဒီမှာ ခါးပြတ်ခေါ်တာလား အဲလိုမျိုးပါတဲ့တီးဝိုင်းပေါ့နော်။ အလှူမှာ ခဏရပ်သွားတယ်။ ၁ ဖွဲ့နဲ့ ၁ ဖွဲ့လည်း ခွဲလိုက်တယ်။ မိနစ် ၂၀ နာရီဝက်လောက်နေတော့ ဆိုင်းတွေဘောက်တွေပြန်ဖွင့်တော့ ကလေးတွေ(ရုန်းသာရွာသားတွေ)ဆိုကြ ကကြတော့ အောင်ချမ်းသာရွာဘက်ကနေ လူ ၃ ယောက်လောက်က ရုန်းသာရွာက ကလေးတွေကိုစိန်ခေါ်တာတဲ့။ ဒီဘက်က ကလေးတွေက သူတို့ခေါ်ရာနောက်ကိုလိုက်သွားတာ အမှောင်ထဲကို။ အဲ့ကိုရောက်တော့ လူအစိတ်သုံးဆယ်လောက်က ဓားတွေနဲ့ထိုးတာ။ မီးတွေလည်းအကုန်ဖြတ်ပြီးထိုးတာ။ ထိုးတဲ့အထဲမှာမှ ပါတာက ပကဖ၊ ပအဖ ရပ်ကျေးတွေပါတယ်။ ထိုးတဲ့သူတွေထဲမှာ အတိအကျသိတာကတော့ ဦးတင်မိုး(ပအဖတာဝန်ခံ)၊ ကိုချက်ကြီး(ပကဖတာဝန်ခံ)၊ ကိုသိန်းဝင်း(ပကဖအဖွဲ့ဝင်) အဲ့ ၃ ယောက်ကတော့မျက်မြင်သက်သေတွေလည်း အကုန်လုံးရှိတယ်။”လို့ ဓါးထိုးခံရသူတွေရဲ့ မိသားစုဝင်တဦးကပြောပါတယ်။

ဓားနဲ့ထိုး၊ တုတ်နဲ့ရိုက်ခံရလို့ အောင်ခန့်နိုင် အသက် ၂၃ နှစ်မှာ ဝမ်းဗိုက်(အရှိုက်)နေရာအနီး ထိုးသွင်းဒဏ်ရာ၊ ခန့်သူရကျော် ၁၉ နှစ် မှာ ဆီးခုံအနီးထိုးသွင်းဒဏ်ရာ၊ သက်နောင်ထွန်း အသက် ၃၀ နှစ်မှာ နောက်ကျောထိုးသွင်းဒဏ်ရာ၊ ဇင်ကိုလွင် မှာ လက်ပြတ်ရှဒဏ်ရာတို့ အသီးသီးရှိခဲ့ကြတာပါ။

ဒဏ်ရာရသူတွေထဲက အောင်ခန့်နိုင်နဲ့ခန့်သူရကျော်တို့က မန္တလေးတိုင်းအတွင်းကဆေးရုံ ၁ ခုမှာ ဖေဖော်ဝါရီ ၁၂ ရက်အထိ အရေးပေါ်လူနာအဖြစ်ဆေးကုသနေရကာ သက်နောင်ထွန်းနဲ့ ဇင်ကိုလွင်တို့ဟာ သာမာန်ဒဏ်ရာသာရရှိခဲ့တာကြောင့် လက်ရှိမှာ ပျောက်ကင်းသလောက်ဖြစ်နေပြီလို့ ဆို​ပါတယ်။

ဖြစ်စဥ်နဲ့ပတ်သက်ပြီး ဓားထိုးမှုမှာပါဝင်တဲ့ အောင်ချမ်းသာရွာပကဖ၊ ပအဖအဖွဲ့ဝင်တွေကို အရေးယူပေးဖို့ မြို့နယ်ပလဖတာဝန်ရှိသူတွေထံ ဖေဖော်ဝါရီလ ၁၂ ရက်အထိ ရက် ၂၀ ကျော်အတွင်း ၃ ကြိမ် တိုင်ကြားခဲ့ပေမယ့် လက်ရှိအထိ မြို့နယ်ပလဖဘက်က လက်ခံအမှုဖွင့်ပေးတာမျိုး မရှိသေးဘူးလို့ သိရပါတယ်။

” ကလေးတွေကို ဆေးရုံပို့ပြီးနောက်ရက် တိုက်နယ်ပကဖတာဝန်ခံ ကိုသက်နိုင်ဦးနဲ့ မြို့နယ်ပကဖတာဝန်ခံ ကိုနေမျိုးအောင် ဆီသွားပြီး စကားသွားပြောတော့ ပလဖရုံးမှာ အမှုသွားဖွင့်ပါလို့ပြောတယ်။ ကျနော်တို့သွားဖွင့်မယ်ဆိုပြီးတော့ ကာယကံရှင်တွေရယ် ရွာပကဖ၊ ပအဖတွေကိုခေါ်ပြီး ဒဏ်ရာရနည်းတဲ့ ၂ ယောက်ရယ် မျက်မြင်သက်သေတွေရယ်သွားပြီးတော့ ပလဖ ကိုချစ်ကို(မြို့နယ်ပလဖတာဝန်ခံ)ဆီ အမှုသွားဖွင့်တာ။ ဒါတွေက အဖွဲ့ဝင်တွေဖြစ်နေလို့ မြို့နယ်ပကဖက သူတို့ဆီလွှဲစာပေးမှ အမှုဖွင့်ပေးလို့ရမယ်ပြောပြီး အမှုဖွင့်မခံလိုက်ဘူး” လို့ အထက်ပါမိသားစုဝင်က ပြောပါတယ်။

အမှုအခြေအနေကို မြို့နယ်ပလဖတာဝန်ခံ ဦးချစ်ကိုထံ မြေလတ်အသံကမေးမြန်းခဲ့ရာ အမှုဖြစ်စဥ်မှာ ကျေးရွာပကဖတာဝန်ခံတွေပါဝင်နေတာကြောင့် သက်ဆိုင်ရာခရိုင်ပကဖခွင့်ပြုချက်နဲ့ လွှဲစာရပါက အမှုဖွင့်ဆောင်ရွက်ပေးသွားမှာဖြစ်တယ်လို့ တုံ့ပြန်ပါတယ်။

” ပကဖဘက်က လုပ်ငန်းမပြတ်သေးလို့။ လုပ်ငန်းပြတ်ပြီးလွှဲတာနဲ့ အမှုတန်းဖွင့်မှာ။ သူတို့တာဝန်ခံတွေပါနေတာကိုး။ နစ်နာသူဘက်က အမှုလာတိုင်တယ်။ ကျနော်တို့က မြို့နယ်ပကဖနဲ့ချိတ်ဆက်တယ်။ စစ်ဘက်နယ်ဘက်ဥပဒေကရှိသေးတာဆိုတော့ စစ်ဘက်က အရေးယူမှာလားမယူဘူးလား။ မယူဘူးဆိုကျနော်တို့ နယ်ဘက်က အရေးယူမယ်။ သူတို့(ဓားနဲ့ထိုးသူတွေ)ကိုတော့ ပကဖဘက်က တာဝန်ရပ်ဆိုင်းတာတွေလုပ်ပေးရမှာ။ သူတို့(ပကဖ)ဘက်က စစ်ဆေးနေဆဲဆိုတော့ ကျနော်တို့က စောင့်နေတာ။ ဆေးစာလည်းရထားရေးထားပြီးပြီး အမှုကကောက်ဖွင့်ရုံပဲ”လို့ ပြောပါတယ်။

မြို့နယ်ပကဖဘက်က အမှုဖြစ်စဥ်မှာပါဝင်နေတဲ့ ရပ်ကျေးပကဖအဖွဲ့ဝင်တွေကို စစ်ဆေးနေမှုရှိ၊ မရှိ သိရှိနိုင်ရေး မြို့နယ်ပကဖတာဝန်ခံ ကိုနေမျိုးအောင်ဆီ မြေလတ်အသံက ဖုန်းနဲ့ဆက်သွယ်ပေမယ့် ဆက်သွယ်မရသေးပါဘူး။

စာတည်း – ဟိန်းစံ

ရေတာရှည်၊ ဖေဖော်ဝါရီ ၅၊ ၂၀၂၆ ။

ပဲခူးတိုင်း၊ ရေတာရှည်မြို့နယ်အပိုင် ရန်ကုန်-မန္တလေးအမြန်လမ်းမိုင်တိုင် ၁၅၇/၇ အနီးမှာ ခရီးသည်တင်ကားနဲ့အိမ်စီးကားတိုက်မိပြီး ၁ ဦးသေဆုံးကာ ၃ ဦးဒဏ်ရာရခဲ့တယ်လို့ ကူညီဆောင်ရွက်ပေးခဲ့သူတွေထံကသိရပါတယ်။

ဖေဖော်ဝါရီ ၅ ရက်ဒီကနေ့မနက် ၂ နာရီကျော်မှာ နေပြည်တော်ကနေ ရန်ကုန်ဘက်ကိုဦးတည်မောင်းနှင်လာတဲ့ ခရီးသည်တင်ယာဥ်နဲ့ တဖက်ယာဥ်ကြောကနေ (U Turn) ဂငယ်ကွေ့ ကွေ့ပြီး လမ်းကူးလာတဲ့အိမ်စီးကားတို့ တိုက်မိခဲ့တာလို့ ဆိုပါတယ်။

” ခရီးသည်တင်ယာဥ်က လမ်းမှန်တယ်။ အိမ်စီးကားက (တဖက်ယာဥ်ကြောနေ) လမ်းဒီဘက်ချိုးမယ့်အခြေနေမှာ လမ်းမှန်နဲ့သွားတွေ့တာ။ အိမ်စီးကားဖင်ကိုတိုက်ပြီး စီယာတိုင်ကိုညာဘက်ဆွဲလိုက်တော့ လမ်းဘေးကာထားတဲ့တန်းတွေ သွား တိုက်မိသွားတာ။”လို့ ကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် အသက် ၅၀ ကျော်အရွယ် ခရီးသည်တင်ယာဥ်မောင်းအမျိုးသား နေရာမှာသေဆုံးပြီး ယာဥ်ပေါ်ပါ အသက် ၂၀ ကျော်အရွယ် ခရီးသည်အမျိုးသမီး ၃ ဦးဒဏ်ရာရခဲ့ကာ သေဆုံးထိခိုက်သူတွေကိုတော့ လူမှုကူညီရေးအသင်းတွေက တောင်ငူပြည်သူ့ဆေးရုံကို တင်ပို့ထားရတယ်လို့ သိရပါတယ်။

ဖေဖော်ဝါရီ ၄ ရက် မနက်ပိုင်းကလည်း ပျော်ဘွယ်မြို့နယ်၊ ပေပင်လေးကျေးရွာအနီး အမြန်လမ်းပေါ်မှာ ခရီးသည်တင်ယာဥ် ၁ စီး အင်ဂျင်အပူလွန်ကဲကာ မီးလောင်မှုဖြစ်ပွားခဲ့ပြီး ကား ၁ စီးလုံး ပျက်စီးဆုံးရှုံးခဲ့ပေမယ့် လူထိခိုက်တာမရှိဘူးလို့ သိရပါတယ်။

အမရပူရ၊ ဇန်နဝါရီ ၃၀၊ ၂၀၂၆။

မန္တလေးတိုင်း၊ အမရပူရမြို့နယ်၊ ရှမ်းလေးကျွန်းကျေးရွာလမ်းပေါ်မှာ ဦးခေါင်းဒဏ်ရာတွေနဲ့ သေဆုံးနေတဲ့ လူငယ်အလောင်း ၁ လောင်းကိုတွေ့ခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

သေဆုံးသူဟာ အသက် ၂၅ နှစ် အရွယ်ဖြစ်ပြီး ဦးခေါင်းဒဏ်ရာတွေနဲ့ ကျေးရွာမြောက်ဘက်ခြမ်း ကားလမ်းမဘေး ဇန်နဝါရီ ၂၉ ရက် မနက် ၆ နာရီကျော်မှာ ရွာခံတွေကတွေ့ခဲ့ရတာလို့ ဆိုပါတယ်။

“ခေါင်းမှာတော့ ဒဏ်ရာတွေ့တယ်။ ဓားခုတ်ဒဏ်ရာနဲ့ ကွဲနေတာမျိုး။ သူသေနေတာကို လမ်းသွားလမ်းလာတွေက တွေ့ကြတာ။ “လို့ ကျေးရွာနဲ့နီးစပ်သူတဦးက ပြောပါတယ်။

သေဆုံးသူနဲ့အချက်အလက်တွေကို မသိရှိရသေးဘဲ အလောင်းကိုတော့ အမရပူရဆေးရုံကို ပို့ဆောင်ထားပြီး ပိုင်ရှင်မပေါ်သေးတာကြောင့် ဇန်နဝါရီ ၃၀ ရက်မနက်ပိုင်းထိ ဆေးရုံရင်ခွဲရုံမှာ ရှိနေတယ်လို့ ဆိုပါတယ်။

ပြီးခဲ့တဲ့ စက်တင်ဘာ ၁၅ ရက်ကလည်း မန္တလေးတိုင်း၊ မိတ္ထီလာမြို့၊ နန်းတော်ကုန်းရပ်ကွက်နယ်မြေ၊ မြောက်ကန်စောင်း၊ ကလေးကစားကွင်းအနီးမှာ စလော့ဂိမ်းရှုံးနေတဲ့ အမျိုးသား ၂ ဦးက သူငယ်ချင်းဖြစ်သူ ဝက်ကုန်သည် အမျိုးသားကို သတ်ဖြတ်ငွေယူပြီး အလောင်းစွန့်ပစ်တဲ့ဖြစ်စဥ် ရှိခဲ့ပါသေးတယ်။

စာတည်း – လင်း

မြေလတ်အသံ၊ ဇန်နဝါရီ ၃၀၊ ၂၀၂၆။

နေပြည်တော်ကောင်စီနယ်မြေ၊ ဥတ္တရသီရိမြို့နယ်အတွင်းမှာ အမျိုးသမီး ၁ ဦးကို အဓမ္မပြုကျင့်သတ်ဖြတ်ပြီးပစ္စည်းလုယက်သူတွေကို သေဒဏ်နဲ့ နှစ်ရှည်ထောင်ဒဏ်တွေချမှတ်ခဲ့တယ်လို့ ဇန်နဝါရီ ၂၉ ရက် ယမန်နေ့ညမှာ စစ်ကော်မရှင်က ထုတ်ပြန်ပါတယ်။

ပြစ်ဒဏ်ချမှတ်ခံရသူတွေဟာ ဥတ္တရသီရိမြို့နယ်နေ အသက် ၂၃ နှစ်အရွယ် မအိအိငြိမ်း ကို အဓမ္မပြုကျင့်သတ်ဖြတ်ခဲ့ကြတဲ့ ဇမ္ဗူသီရိမြို့နယ်မှာ ဆောက်လုပ်ရေးလုပ်ငန်းလုပ်ကိုင်သူ သိန်းဇော်(ခ) ကိုသိန်း ၄၃ နှစ်နဲ့ သောင်းဝင်းအောင် (ခ)ချစ်ဖူး တို့ဖြစ်ပြီး ၎င်းတို့ကို ဥတ္တရသီရိခရိုင်တရားရုံးက လူသတ်မှု၊ အဓမ္မပြုကျင့်မှု၊ ပစ္စည်းလုယက်မှုတွေအပါအဝင် ရာဇသတ်ကြီးပုဒ်မ ၅ ခုနဲ့ မသေမချင်းကြိုးကွင်းစွပ်သတ်စေရန်(သေဒဏ်)၊ ထောင်ဒဏ် ၇၀ နှစ်တို့ကို သီးခြားစီ ကျခံစေရန် ချမှတ်ခဲ့တာပါ။

ဒါ့အပြင် လုယက်လာတဲ့ပစ္စည်းတွေကို ဖျောက်ဖျက်ရာမှာပူးပေါင်းပါဝင်တဲ့အမျိုးသား ၃ ဦးကိုလည်း ရာဇသတ်ကြီးပုဒ်မ ၂ ခုနဲ့ ထောင်ဒဏ် ၃ နှစ်၊ ထောင်ဒဏ် ၆ လ တို့ သီးခြားစီကျခံစေရန်ဆိုကာ အမိန့်ချမှတ်ခဲ့တာပါ။

၂၀၂၅ ဩဂုတ် ၃၀ ရက် နေ့လယ် ၁ နာရီခန့်မှာ ဥတ္တရသီရိမြို့နယ်၊ မောင်းရမ်းကျေးရွာ နေအိမ်ကနေ အသက် ၂၃ နှစ်အရွယ် မအိအိငြိမ်း ဟာ တဦးတည်းဆိုင်ကယ်စီးနင်းထွက်ခွာသွားပြီးနောက် ညနေ ၆ နာရီခွဲခန့်မှာ ၎င်းကို ငန်းစပ်ကျေးရွာ သားသတ်ရုံအနီးချုံတောအတွင်း ဒဏ်ရာတွေနဲ့သေဆုံးလျက်ပြန်လည်တွေ့ရှိခဲ့တာလို့ ထုတ်ပြန်ချက်က ဆိုပါတယ်။

အခင်းဖြစ်စဥ်နဲ့ပတ်သက်ပြီး ကျူးလွန်သူ ၂ ဦးနဲ့ပူးပေါင်းပါဝင်သူ ၃ ဦးကို ရဲတပ်ဖွဲ့က စက်တင်ဘာ ၂ ရက် မှာဖမ်းဆီးနိုင်ခဲ့ပြီးနောက် ဥတ္တရသီရိတရားရုံးမှာ တရားစွဲတင်ခဲ့ပြီးနောက် ၅ လအကြာမှာ အခုလို ပြစ်ဒဏ်တွေချမှတ်ခဲ့တာပါ။

ဖမ်းဆီးခံရသူတွေရဲ့ထွက်ဆိုချက်တွေအရ သိန်းဇော် နဲ့ သောင်းဝင်းအောင်တို့ ၂ ဦးဟာ အခင်းဖြစ်နေ့မှာ အရက်သေစာသောက်စားနေပြီး မအိအိငြိမ်း တဦးတည်းဆိုင်ကယ်စီးနင်းလာတာကိုတွေ့ရှိတာကြောင့် တားဆီးကာဝိုင်းဝန်းအဓမ္မပြုကျင့်စဥ် ရုန်းကန်ထွက်ပြေးတာကြောင့် သစ်သားတုတ်နဲ့ လည်းပင်းနဲ့ဦးခေါင်းကို ၈ ချက်ရိုက်နှက်ခဲ့ရာ မအိအိငြိမ်း သေဆုံးသွားခဲ့ပြီး ၎င်းထံက ရွှေထည်တွေနဲ့ ဆိုင်ကယ်ကို လုယူခဲ့တယ်လို့ ဖော်ပြထားပါတယ်။

မြေလတ်အသံ၊ ဇန်နဝါရီ ၂၃၊ ၂၀၂၆ ။

စစ်ကိုင်းတိုင်း၊ ရွှေဘိုခရိုင်၊ ဒီပဲယင်းမြို့နယ်၊ တည်တောရွာပစ်ခတ်မှုမှာ ဖမ်းဆီးခံထားရတဲ့ ရွှေဘိုခရိုင်အခြေစိုက် ကျောင်းသားလေး – LPDF တပ်ဖွဲ့ဝင် ၁၂ ဦးကို တရားစီရင်ပေးဖို့ မိသားစုဝင်တွေက တောင်းဆိုလိုက်ပါတယ်။

အဲ့ဒီ LPDF တပ်ဖွဲ့ဝင် ၁၂ ဦးကို ဒီပဲယင်းမြို့နယ်အရှေ့ခြမ်းပြည်သူ့လုံခြုံရေးအဖွဲ့(ပလဖ) လက်အောက် ဒီပဲယင်းနဲ့ကနီနယ်အစပ်ရှိ ပလဖအချုပ်ထောင်မှာ ဖမ်းဆီးထိန်းသိမ်းထားတာဖြစ်ပြီး ၂ နှစ်နီးပါးကြာအထိ အမှုဖွင့်တရားစွဲဆိုတာတွေ လုပ်ဆောင်တာမရှိလို့ အခုလိုတောင်းဆိုရတာလို့ ဆိုပါတယ်။

” ဘာအမှုမှလည်းမတင်ဘူး။ စစ်လည်းမစစ်ဆေးပေးဘူး။ တကယ်လို့ အပြစ်ရှိတယ်ဆိုရင် ရတယ်။ ဘယ်နှစ်နှစ်ဖြစ်ဖြစ် စစ်ဆေးပြီးချလိုက်။ အခုက အဲ့လိုလည်းမဟုတ်ဘူး။ စစ်လည်းမစစ်ဆေးဘဲနဲ့ တမင်တကာ ဒီအတိုင်းထားထားတာ”လို့ ဖမ်းဆီးခံထားရသူတဦးရဲ့မိသားစုဝင်က မြေလတ်အသံကို ပြောပါတယ်။

ဖမ်းဆီးခံထားရသူတွေနဲ့ပတ်သက်ပြီး အပြစ်မရှိပါက ချက်ချင်းပြန်လွှတ်ပေးစေချင်ပြီး အပြစ်ရှိပါကလည်း ဥပဒေအရ အမြန်ဆုံးအမိန်ချပေးဖို့ လိုလားတယ်လို့ ဆိုပါတယ်။

အချုပ်နဲ့ဖမ်းဆီးထားစဥ်မှာလည်း ဒီပဲယင်းအရှေ့ခြမ်းပလဖတာဝန်ခံ ကိုကျော်ထက်အောင် က အကျဥ်းသားတွေအပေါ်နှိပ်စက်တာ၊ အလုပ်ကြမ်းတွေခိုင်းစေတာ၊ ရေနဲ့အစားအစာလောက်ငှစွာမပေးတာ၊ မိသားစုတွေနဲ့ပုံမှန်တွေ့ခွင့်မပြုတာတွေအပါအဝင် အခြားအကျဥ်းသားအခွင့်အရေးတွေလည်း ချိုးဖောက်ဖိနှိပ်ခံနေတယ်လို့ မိသားစုဝင်က ပြောပါတယ်။

” အရမ်းပူတဲ့အချိန် ၃ လပိုင်း(မတ်)၊ ၄ လပိုင်း(ဧပြီ)တောင် ၁ ရက်ကို ဘလူးမောင်တိန်ရေဘူးအသေးဗူးလေးနဲ့ ၁ ယောက်ကို ၁ ဗူးပေးတယ်။ ရေဆိုလည်း ၁၀ ရက် ၁ ကြိမ်ပဲ ပေးချိုးတယ်” လို့အထက်ပါမိသားစုဝင်က ဆက်ပြောပါတယ်။

ပြီးခဲ့တဲ့ ၂၀၂၄ မေ ၂၈ ရက်မနက်ပိုင်းမှာ ကျောင်းသားလေး LPDF အဖွဲ့ဝင် အောင်မြတ်မွန်နဲ့ Black Tiger မိုးကြိုးမုန်တိုင်းအဖွဲ့ဝင်ဟောင်း သန့်ဇင်ထက်အပါ ၃ ဦးတို့အကြား အချင်းများရန်ဖြစ်ခဲ့ကြောင်း၊ အချင်းများချိန်တွင် အောင်မြတ်မွန်ကိုင်ဆောင်တဲ့ ပစ္စတိုသေနတ်နဲ့ လက်ကိုင်ဖုန်းတို့ သန့်ဇင်ထက်အဖွဲ့က ရရှိသွားခဲ့ကြောင်း၊ ၎င်းပစ္စတိုသေနတ်နဲ့ လက်ကိုင်ဖုန်းကို သန့်ဇင်ထက်နေအိမ်မှာ ကျောင်းသားလေးအဖွဲ့အပါ ဒေသတွင်းအဖွဲ့အစည်းတွေက လိုက်လံတောင်းခံရာက ပစ်ခတ်မှုတွေဖြစ်ခဲ့တာလို့ ဆိုပါတယ်။

” ဝိုင်းတဲ့အထဲက ကျောင်းသားလေးအဖွဲ့ဝင်တွေရော ရပ်ရွာလူကြီးတွေကော(ပကဖ၊ ပလဖ)တွေကော ဝိုင်းပြီး တောင်းပေးကြတယ်။ သူတိုပစ္စည်းတွေကိုပြန်ပေးလိုက်ပြီး ညှိနှိုင်းပေးကြတယ်။ ရွာကလူတွေလည်းထွက်ကြည့်နေကြတာဆိုတော့ လူကတော့များတယ်။ အိမ်ထဲကနေ လက်ပစ်ဗုံးတွေကတအားထုနေတော့ မကပ်ရဲကြတော့ လက်နက်ကိုင်တွေချည်းပဲဆိုတော့ တင်းတင်းကြပ်ကြပ်မတားရဲကြဘဲ ဖြစ်ကုန်တာ”လို့ အထက်ပါမိသားစုဝင်က ပြောပါတယ်။

သေနတ်ပြန်လည်တောင်းခံရာကနေ ကျောင်းသားလေး-LPDF တွေနဲ့ သန့်ဇင်ထက်တို့အကြား နှစ်ဖက်အပြန်အလှန်အပြန်အလှန်ပစ်ခတ်မှုတွေနဲ့ နေအိမ်တွင်းဗုံးပေါက်ကွဲမှုတွေဖြစ်ပွားခဲ့ပြီး သန့်ဇင်ထက်၊ ဇနီးဖြစ်သူအပါအဝင် မိသားစုဝင် ၅ ဦးသေဆုံးသွားခဲ့တာပါ။

အထက်ပါဖြစ်စဥ်တွေဖြစ်ပွားပြီးနောက် မေ ၃၀ ရက်မှာ သေနတ်ပစ်ခတ်မှု၊ လူသေဆုံးမှုတွေနဲ့ပတ်သက်ပြီး ကျောင်းသားလေး-LPDF ၁၉ ဦးကို ရွှေဘိုခရိုင်တပ်ရင်း ၁၂ က ဖမ်းဆီးခဲ့ပြီး အဲ့ဒီကနေတဆင့် ဇွန်လအတွင်းမှာ ၎င်းတို့ ၁၉ ဦးကို ဒီပဲယင်းမြို့နယ်အရှေ့ခြမ်းပလဖထံ ထပ်မံလွှဲပြောင်းပေးခဲ့တယ်လို့ သိရပါတယ်။

ဖမ်းဆီးခံရပြီးနောက် ၃ လအကြာ ၂၀၂၄ ဩဂုတ်လအတွင်းမှာ LPDF ၁၉ ဦးအနက် ၆ ဦးမှာ အာမခံနဲ့ပြန်လွတ်လာခဲ့ပေမယ့် ကျန်တပ်ဖွဲ့ဝင်တွေဖြစ်တဲ့ အောင်မြတ်မွန်၊ ဇာနည်အောင်၊ မျိုးဇော်ဌေး၊ ဟန်သူထွန်း၊ ချမ်းရဲဇော်၊ ထက်ဇော်၊ ကိုညောင် ၊ စိုင်းခန့်ကျော်၊ တောသား၊ စုဟန်၊ မင်းမင်းထက်၊ ခေါင်းကြီး၊ ငနောင်တို့ ၁၃ ဦးမှာ လက်ရှိအထိ ဒီပဲယင်းပလဖလက်အောက်အချုပ်ထောင်တွေမှာ ဆက်လက်ဖမ်းဆီးခံထားရတာလည်း ဖြစ်ပါတယ်။

၂၀၂၅ အောက်တိုဘာလမှာ အောင်မြတ်မွန်၊ မင်းခေါင်အပါ ၃ ဦးကို ခင်ဦးမြို့နယ်ပလဖစခန်း၊ ထက်ဇော်အပါ ၂ ဦးကို ဝက်လက်မြို့နယ်ပလဖစခန်းတွေကို အသီးသီးခွဲကာ ပို့ဆောင်လိုက်ပြီး ကျန်သူတွေကိုတော့ ဒီပဲယင်းအရှေ့ခြမ်းပလဖစခန်းမှာပဲ ဆက်လက်ချုပ်ထားတယ်လို့ သိရပါတယ်။

ဝက်လက်ပလဖစခန်းမှာချုပ်နှောင်ခံထားရတဲ့ LPDF ၂ ဦးအနက် တည်တောရွာသား ကိုထက်ဇော်မှာ အစာအိမ်အချဥ်ဖောက်ပြီး သေဆုံးသွားခဲ့ကြောင်း ပြီးခဲ့တဲ့ ဇန်နဝါရီ ၄ ရက်မှာ မြို့နယ်ပလဖက ကျန်ရစ်သူမိသားစုတွေထံ အကြောင်းကြားလာတာကြောင့် ယင်းဖြစ်စဥ်မှာ ဖမ်းဆီးခံရသူ ၁၂ ဦးသာ ကျန်တော့တာပါ။

ကိုထက်ဇော် သေဆုံးခဲ့ပြီးတဲ့နောက် အကျဥ်းထောင်တွေမှာရှိနေတဲ့ LPDF တွေရဲ့ ကျန်းမာရေးနဲ့ အသက်အန္တရာယ်ကို စိုးရိမ်နေတယ်လို့ မိသားစုဝင်တွေက ပြောပါတယ်။

ဖမ်းဆီးခံထားရသူတွေရဲ့အခြေအနေနဲ့ပတ်သက်ပြီး ဒီပဲယင်းအရှေ့ခြမ်းပလဖတာဝန်ခံ ကိုကျော်ထက်အောင် ကို မြေလတ်အသံက ဖုန်းနဲ့ဆက်သွယ်ခဲ့ပေမယ့် ဆက်သွယ်မရခဲ့ပါဘူး။

ဒီပဲယင်းမြို့နယ်ပြည်သူ့လုံခြုံရေးအဖွဲ့တာဝန်ခံကို မေးမြန်းရာမှာတော့ အဲ့ဒီ တည်တောရွာ ဖြစ်စဥ် LPDF တွေအမှုဟာ အမျိုးသားညီညွတ်ရေးအစိုးရ-NUG ပြည်ထဲရေးဝန်ကြီးဌာနက တိုက်ရိုက်ကိုင်တွယ်နေတာဖြစ်လို့ သူ့အနေနဲ့ သီးခြားဖြေကြားဖို့မရှိဘူးလို့ တုံ့ပြန်ပါတယ်။

ဖြစ်စဥ်နဲ့ပတ်သက်ပြီး ဆောင်ရွက်နေတဲ့အခြေအနေကို သိရှိနိုင်ရေး NUGအစိုးရ သတင်းထုတ်ပြန်ရေးအဖွဲ့ကတဆင့် ပြည်ထဲရေးဝန်ကြီးဌာနကို မြေလတ်အသံက ဆက်လက်မေးမြန်းခဲ့ပေမယ့် သတင်းတင်ပြချိန်အထိ ပြန်လည်ဖြေကြားလာတာ မရှိသေးပါဘူး။

စာတည်း – ဟိန်းစံ