မှုခင်း

မြေလတ်အသံ၊ နိုဝင်ဘာ ၆၊ ၂၀၂၅။

မကွေးတိုင်း၊ ဂန့်ဂေါခရိုင်၊ ထီးလင်းမြို့နယ်မှာ အမျိုးသား ၂ ဦး စကားများရန်ဖြစ်ရာမှ အချင်းချင်း ဓားခုတ်မှုဖြစ်ကာ ၁ ဦးသေဆုံးခဲ့ပြီး တရားခံကို မြို့နယ်ပလဖကဖမ်းမိထားတယ်လို့ ဒေသခံတွေဆီက သိရပါတယ်။

ရင်ရောင်းကျေးရွာမှ အသက် ၄၄ နှစ်အရွယ် ကိုရဲကျော်စွာနဲ့ ၃၈ နှစ်အရွယ် ကိုညီညီစိုးတို့ ၂ ဦးဟာ အောက်တိုဘာ ၄ ရက်နေ့လယ် ၃ နာရီမှာ ရန်ဖြစ်ပြီး ဦးရဲကျော်စွာနေအိမ်အတွင်း ဓါးခုတ်မှုဖြစ်ပြီး ညီညီစိုးရဲ့ဗိုက်ကိုဓါးထိုးခံရကာ နေရာတင်သေဆုံးခဲ့တာလို့ ဆိုပါတယ်။

“မနက်ပိုင်းအတူတူ ထင်းခုတ်အငှားလိုက်ကြပြီး စကားများခဲ့ကြတာတဲ့။ နေ့လယ်ပြန်ရောက်ပြီးတော့ သေတဲ့ ညီညီစိုးက ရဲကျော်စွာအိမ်ဝန်းထဲဝင်ပြီး ဓားနဲ့ခုတ်တာတဲ့။ ဒါကို ရဲကျော်စွာက ခုခံရင်း လက်လွန်သွားတာတဲ့” လို့ မြေပြင်အခြေအနေကိုသိရှိသူအမျိုးသားတဦးက ပြောပါတယ်။

ဓားထိုးမှုဖြစ်ပြီးနောက် ကိုရဲကျော်စွာဟာ ထွက်ပြေးသွားခဲ့ပေမယ့် ၎င်းကို အခင်းဖြစ်တဲ့နေ့ ည ၁၀ နာရီကျော်မှာ ထီးလင်းမြို့နယ် ပလဖနဲ့ကျေးရွာပလဖပူးပေါင်းအဖွဲ့တို့က ရင်ရောင်းကျေးရွာရဲ့ တောတွင်းရှိ တဲဆောင်တခုမှာဖမ်းမိခဲ့တယ်လို့ အထက်ပါ အမျိုးသားကပြောပါတယ်။

ပြီးခဲ့တဲ့ဇွန် ၁၉ ရက်နေ့လယ် ၃ နာရီကျော်ကလည်း ဂန့်ဂေါမြို့နယ်၊ စိုင်ဒူးကျေးရွာမှ အသက် ၅၀ အရွယ် ဦးဖြူမွှေးဟာ ကျေးရွာအပြင်ဖက်ရှိ အုတ်လုပ်တဲ့ဝန်းမှာ အုတ်လုပ်သားဦးဆန်းထွန်းရဲ့ သတ်ဖြတ်တာကိုခံလိုက်ရပြီးနောက် အလောင်းကို အိမ်သာကျင်းထဲကတွေ့ရှိခဲ့ရတယ်လို့ ဒေသခံတွေဆီက သိရပါတယ်။

စာတည်း – လင်း

မြေလတ်အသံ၊ နိုဝင်ဘာလ ၅၊ ၂၀၂၅။

နေပြည်တော်၊ ပျဥ်းမနားမြို့မှာ ယမန်နေ့ နိုဝင်ဘာ ၄ ရက်တန်ဆောင်မုန်းလပြည့်ည ပံ့သကူလိုက်ကောက်သူတွေ ကား၊ ဆိုင်ကယ်တွေနဲ့တိုက်မိလို့ ကိုရင် ၁ ပါးအပါ ၃ ဦးပြင်းထန်ဒဏ်ရာတွေရခဲ့တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

ယမန်နေ့ည ၈ နာရီကျော်က ပျဥ်းမနားမြို့၊ ပန်းခင်းရပ်မီးပွိုင့်အနီး ရန်ကုန်-မန္တလေးလမ်းဟောင်းမှာ ပံ့သကူကောက်သူတွေနဲ့ စည်ကားနေချိန် ကားတစီးက လမ်းဘေးမှာရပ်နေတဲ့ အသက် ၁၁ နှစ်အရွယ် မိန်းကလေး ၁ ဦးကို တိုက်မိခဲ့တယ်လို့ ဆိုပါတယ်။

အလားတူ ည ၉ နာရီခန့်မှာလည်း ပျဥ်းမနားမြို့၊ လက်ပန်ခါးလှကျေးရွာအနီး ရန်ကုန်-မန္တလေးလမ်းဟောင်းပေါ်မှာ လမ်းပေါ်တက် ပံသကူကောက်သူ အသက် ၅၀ ကျော်အရွယ် အမျိုးသား ၁ ဦးနဲ့အသက် ၁၀ နှစ်အရွယ် ကိုရင် ၁ ပါးကို ဆိုင်ကယ်က ဝင်တိုက်မိခဲ့တာပါ။

” ရှေ့က ကားပေါ်က ကြဲသွားတာကို နောက်က ဆိုင်ကယ်၊ ကားတွေမကြည့်တော့ဘူး၊ ဝင်ကောက်တော့တိုက်မိတာ။ ဖြစ်တာက ၂ နေရာပါ။ ကောင်မလေးက လမ်းဘေးကနေ ပိုက်ဆံကြဲနေတာ။ ရုတ်ရုတ်သဲသဲတွေဖြစ်နေတော့ ကားသမားလည်းပြာသွားတာနေမယ် ဝင်တိုက်မိတာ။ ကားက လမ်းအတိုင်းမောင်းလာတဲ့ကားပါ”လို့ အခင်းဖြစ်ပွားမှုကို ကူညီဆောင်ရွက်ပေးခဲ့သူဒေသခံတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် မိန်းကလေးငယ်မှာ လက်၊ ခြေထောက်နဲ့ ယာဘက်မျက်လုံးပြင်းထန်ဒဏ်ရာရခဲ့ပြီး ကိုရင်နဲ့ သက်ကြီးအမျိုးသားမှာလည်း စိုးရိမ်ရဒဏ်ရာတွေရထားတာကြောင့် ပျဥ်းမနားမြို့ ကုတင် ၂၀၀ ဆေးရုံကို ပို့ဆောင်ကုသနေရတယ်လို့ ဆိုပါတယ်။

တန်ဆောင်မုန်းလပြည့်ညဟာ မြန်မာ့ရိုးရာဓလေ့ ပံ့သကူပစ်လေ့ရှိကြပြီး ပံ့သကူပစ်သူတွေက ငွေနဲ့ပစ္စည်းတွေကို လမ်းတွေပေါ် မှာထားခဲ့ကြရာ ကောက်ယူသူတွေကလည်း ရှာဖွေကောက်ယူကြတာပါ။

လမ်းမတွေပေါ် ပစ်တဲ့ ပံ့သကူငွေတွေကို လုယက်ကောက်ယူသူများပြားတာကြောင့် ပံ့သကူကောက်ယူသူတွေနဲ့ လမ်းသွား၊ လမ်းလာယာဥ်တွေအကြား မတော်တဆမှုတွေ နှစ်စဥ်ဖြစ်ပွားနေပြီး လူသေဆုံးတဲ့ဖြစ်စဥ်တွေ ရှိနေတာလည်း ဖြစ်ပါတယ်။

စာတည်း – ဟိန်းစံ

◼ စစ်တပ်နဲ့ဆက်သွယ်မှု၊ ငွေကြေးအလွဲသုံးစားလုပ်မှုအပါ အမှု ၅ မှုနဲ့ဖမ်းဆီးခဲ့ဟုဆို

မြေလတ်အသံ၊ နိုဝင်ဘာ ၂၊ ၂၀၂၅။

အမျိုးသားညီညွှတ်ရေးအစိုးရ – NUG ရဲ့ စစ်ကိုင်းတိုင်း၊ ကန့်ဘလူမြို့နယ် အခွန်တော်အရာရှိဖြစ်သူနဲ့ အဖွဲ့ဝင် ၆ ဦးကို စစ်ကော်မရှင်ထောက်တိုင်တွေနဲ့ဆက်သွယ်မှုအပါ အမှု ၅ မှုနဲ့ ဖမ်းဆီးစစ်ဆေးနေတယ်လို့ ကန့်ဘလူမြို့နယ် ပြည်သူ့အုပ်ချုပ်ရေးအဖွဲ့ဆီက သိရပါတယ်။

အခွန်တော်အရာရှိ ဦးမြင့်ကျော် (ခ) အာခိုင်၊ စာရေးအမျိုးသမီး ၁ ဦး၊ အခွန်တော်အဖွဲ့ဝင်အမျိုးသား ၅ ဦးတို့ကို ငွေကြေးအလွဲသုံးစားပြုလုပ်မှု၊ လုပ်ပိုင်ခွင့်အာဏာကိုအသုံးချမှု၊ မြို့နယ်ပအဖ တံဆိပ်စည်းအတု ပြုလုပ်မှု၊ သက်သေခံပစ္စည်းများဖျောက်ဖျက်မှု၊ စစ်ကော်မရှင်ထောက်တိုင်တွေကို ဆက်သွယ်မှုတို့နဲ့ အောက်တိုဘာ ၁၂ ရက်မှာ ဖမ်းဆီးခဲ့တာလို့ ဆိုပါတယ်။

“သူတို့က အခွန်ချလန်တွေကို လစဥ်လစဥ် မြို့နယ်ပအဖစည်းတံဆိပ်နဲ့ စည်းတံဆိပ် တုံးအတုနဲ့ပေါ့။ အတုနဲ့ အခွန်ချလန်တွေကို သူကြိုက်တဲ့အမောက် (Amount) ကို ပြန်ရေးပြီးတော့မှ ဘဏ္ဍာရေးတာဝန်ခံဆီကို အပ်တာပေါ့။ အခွန်ချလန်အစစ်တွေပေါ့။ တကယ်ကောက်ထားတဲ့ ချလန်တွေကို မီးရှို့ ဖျက်ဆီးတာတွေ လစဥ် လစဥ်လုပ်တယ်။ ဒါလည်း စစ်ဆေးပေါ်ပေါက်တယ်။ ပအဖရဲ့စည်းတံဆိပ်တုံး အတုကို ၁၂ ရက်နေ့ ထိန်းသိမ်းတဲ့နေ့က အခွန်တော်အရာရှိအဖွဲ့က စာရေးမက အိမ်သာထဲကိုပစ်ချခဲ့တယ်။ ပစ်ချခဲ့တာကို စစ်ဆေးပေါ်ပေါက်တော့ ရဲဘော်တွေက အဲ့ဒါကို ခက်ခက်ခဲခဲ အိမ်သာထဲထိလိုက်ရှာပြီးတော့ ယူထားရတယ်”လို့ ကန့်ဘလူပအဖတာဝန်ရှိသူက ပြောပါတယ်။

သူတို့ကိုမဖမ်းဆီးခင်မှာ စစ်ဘက်ဆိုင်ရာ ခရိုင်ကွပ်ကဲရေးတာ၀န်ရှိသူတွေ၊ တပ်ရင်းတပ်ဖွဲ့တွေနဲ့ ညှိနှိုင်းပြီးမှ ဖမ်းဆီးခဲ့တာဖြစ်ပြီး စစ်ဆေးပေါ်ပေါက်ချက်တွေအရ အရပ်ဘက်တရားစီရင်ရေးကို လွှဲပြောင်းကာ အရေးယူဆောင်ရွက်နေတာလို့ သိရပါတယ်။

လက်ရှိမှာ ဖမ်းခံထားရသူ ၇ ဦးကို ကန့်ဘလူမြို့နယ်ပလဖ က အမှုဖွင့်ပြီး အချုပ်ခန်းမှာချုပ်နှောင်ထားကာ ဘယ်လို ပုဒ်မတွေနဲ့အမှုဖွင့်ထားလဲဆိုတာကိုတော့ မသိရဘူးလို့ သူကဆက်ပြောပါတယ်။

ဦးမြင့်ကျော်ဟာ အခွန်တော်အရာရှိဖြစ်တဲ့ ၂၀၂၂ ကနေ အခုနှစ် စက်တင်ဘာလအထိ စစ်ကော်မရှင်တပ်မှ ဗိုလ်မှူးဇနီးဖြစ်သူတွေ၊ CDM မလုပ်ကြတဲ့ ရဲတပ်သားတွေနဲ့ ဖုန်းကနေတဆင့် ဆက်သွယ်မှုတွေ ပြုလုပ်ခဲ့တာကို သူကိုင်ဆောင်တဲ့ဖုန်းမှာ စစ်ဆေးတွေ့ရှိခဲ့တယ်လို့သိရပါတယ်။

ဒါ့အပြင် ဦးမြင့်ကျော်ဟာ စစ်အာဏာမသိမ်းခင်အချိန်တုန်းက စစ်ကော်မရှင်လက်အောက်ခံ ရဲတပ်ဖွဲ့ဝင် ၁ ဦးဖြစ်ပြီး ရဲတပ်ဖွဲ့ကနေထွက်ပြေးမှု၊ မူးယစ်ဆေးရောင်းဝယ်မှုတွေနဲ့ ထောင်ကျဖူးသူဖြစ်တယ်လို့လည်း အထက်ပါပအဖတာဝန်ရှိသူက ဆိုပါတယ်။

ဦးမြင့်ကျော် (ခ) အာခိုင်ကို ၎င်းရဲ့အစ်ကိုရင်းဖြစ်သူ လက်ရှိအဓမ္မမှုနဲ့ တရားရင်ဆိုင်နေရဆဲဖြစ်တဲ့ ကန့်ဘလူ ခရိုင်ပအဖတာဝန်ခံ ဦးမဲခေါင်က ပြီးခဲ့တဲ့ ၂၀၂၂ ခုနှစ်မှာ ကန့်ဘလူမြို့ နယ်ရဲ့ အခွန်တော်အရာရှိအဖြစ် ခန့်အပ်ခဲ့တာလို့ အထက်ပါတာဝန်ရှိသူက ပြောပါတယ်။

ခရိုင်ပအဖတာဝန်ခံ ဦးမဲခေါင်အပါအဝင် ၄ ဦးဟာ ပြီးခဲ့တဲ့ ၂၀၂၃ နဲ့ ၂၀၂၄ ခုနှစ်အတွင်း ပလဖ အချုပ်ခန်းတွေအတွင်း ချုပ်နှောင်ခံထားရတဲ့ အကျဉ်းသူအမျိုးသမီး ၄ ဦးကို လိင်အကြမ်းဖက်မှု ကျူးလွန်ခဲ့တာကြောင့် လက်ရှိမှာ တန့်ဆည်မြို့နယ်ပလဖအကျဥ်းထောင်မှာ ချုပ်နှောင်ခံရပြီး အမှုရင်ဆိုင်နေရဆဲဖြစ်တယ်လို့ သိရပါတယ်။

စာတည်း – လင်း

မြေလတ်အသံ၊ အောက်တိုဘာ ၂၇၊ ၂၀၂၅။

မကွေးတိုင်း၊ ဆောမြို့က အသက် ၁၃ နှစ် အရွယ်မိန်းကလေးကို အဓမ္မပြုကျင့်ကာ သတ်ပြီး အလောင်းဖျောက်သူကို NUG အစိုးရဲ့ ဆောမြို့နယ်ပကဖ၊ ပလဖနဲ့ ပအဖပူးပေါင်းအဖွဲ့တွေက ပူးပေါင်းဖမ်းဆီးခဲ့တယ်လို့ ဆောမြို့နယ်ပအဖနဲ့ နီးစပ်သူတဦးက ပြောပါတယ်။

အသတ်ခံရသူမှာ ဆောမြို့၊ သီရိ(ရတနာ)ရပ်ကွက်မှ ၁၃ နှစ်အရွယ် မအေးငြိမ်းလင်းဖြစ်ပြီး အောက်တိုဘာ ၂၁ ရက်က ပျောက်ဆုံးခဲ့ပြီးနောက် သေဆုံးနေတဲ့ ရုပ်အလောင်းကို ဆောမြို့ပြည်သူ့ ဆေးရုံရဲ့ အခန်းတခန်းမှာ အောက်တိုဘာ ၂၅ ရက်မနက်ပိုင်းက တွေ့ရှိခဲ့တာလို့ ဆိုပါတယ်။

“၂၅ ရက်နေ့မှာ အနီးအနားကပြည်သူတဦးကတွေ့တာပါ။ အပုပ်နံ့ထွက်နေလို့သွားကြည့်ရင်းကနေ တွေ့တာပါဗျ။ ဆေးရုံက ပိတ်ထားတာကြာပြီဗျ။ အာဏာသိမ်းမှုဖြစ်စဉ် CDM တွေလုပ်ချိန်ကတည်း ကဗျ” လို့ ဆောမြို့နယ်ပအဖနဲ့ နီးစပ်သူတဦးက ပြောပါတယ်။

ဒီဖြစ်စဥ်နဲ့ပတ်သက်ပြီး အသက် ၂၁ နှစ်အရွယ် မင်းမင်းစိုးကို အောက်တိုဘာ ၂၅ ရက်ညနေ ၄ နာရီကျော်မှဖမ်းဆီးနိုင်ခဲ့ပြီး စစ်ဆေးမေးမြန်းချက်အရ ၎င်းဟာ မအေးငြိမ်းလင်းကို အဓမ္မပြု သတ်ဖြတ်ပြီး အလောင်းဖျောက်ခဲ့တယ်လို့ ‌၀န်ခံထွက်ဆိုထားကြောင်း ဆောမြို့နယ်ပအဖနဲ့နီးစပ်သူ အမျိုးသားတဦးက ပြောပါတယ်။

မင်းမင်းစိုးဟာ ယခင်ပြစ်မှုကျူးလွန်းခဲ့ဖူးသူဖြစ်ပြီး ဖမ်းဆီးခံထားရာက ထွက်ပြေးလွတ်မြောက်နေသူ ဖြစ်တယ်လို့လည်း ဆိုပါတယ်။

“တရားခံက အရင်ကလည်း အလားတူပြစ်မှုကျူးလွန်ထားလို့ အဖမ်းခံထားရတာနေမှ ထွက်ပြေး လွတ်မြောက်နေသူဖြစ်တယ်။ တပ်ရင်းခုခုမှာ အရင်တုန်းကတာဝန် ထမ်းဆောင်ဖူးတာ ရှိခဲ့တယ်။ အခုကတော့ တပ်ရင်းနဲ့သက်ဆိုင်မှုမရှိဘူးလို့သိရတယ်” လို့ သူကဆိုပါတယ်။

ဒီပြစ်မှုအတွက်ဘယ်လိုမျိုး ပြစ်ဒဏ်ချမှတ်သွားမယ်ဆိုတာနဲ့ အခြေအနေအသေးစိတ်ကို သိရဖို့ ဆောမြို့နယ်ပြည်သူ့အုပ်ချုပ်ရေးအဖွဲ့ကို မြေလတ်အသံကဆက်သွယ်မေးမြန်းထားပေမယ့် အကြောင်းပြန်တာ မရှိသေးပါဘူး။

ဒီဖြစ်စဥ်နဲ့ပတ်သက်ပြီး ကျူးလွန်သူကို သေဒဏ်အမိန့်ချမှတ်ဖို့ အောက်တိုဘာ ၂၆ ရက် မနေ့ကနေ့လယ် ၃ နာရီဝန်းကျင်မှာ ဆောမြို့ခံပြည်သူတွေက ဆန္ဒပြတောင်းဆိုခဲ့ကြတယ်လို့ ဒေသခံတွေဆီက သိရပါတယ်။

ပြီးခဲ့တဲ့စက်တင်ဘာ ၇ ရက်မနက်ပိုင်းမှာလည်း ဝက်လက်မြို့နယ်၊ ရွာသာကြီးရွာ အသက် ၁၁ နှစ်အရွယ်မိန်းကလေးကို အဓမ္မပြုကျင်ခဲ့တဲ့ ဒေသကာကွယ်ရေးတပ်ဖွဲ့ဝင်တဦးကို ပြင်းထန်တဲ့ပြစ်ဒဏ်ပေးဖို့ ဒေသခံတွေက ဆန္ဒပြတောင်းဆိုတဲ့ဖြစ်စဥ်ရှိခဲ့ပါသေးတယ်။

စာတည်း – လင်း

◼️ အမှုပိတ်သိမ်းဖို့ ကျောင်းအုပ်ကြီးဦးဆောင်ပြီး ကျပ်သိန်း ၇၀၀ နဲ့ ညှိနှိုင်းနေ

စလင်း၊ အောက်တိုဘာ ၂၅၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့ အမှတ် ၁ အခြေခံပညာအထက်တန်းကျောင်း(အထက ၁)မှာ တက်ရောက်နေတဲ့ အထက်တန်းကျောင်းသူကို ရည်းစားဖြစ်သူကျောင်းသားနဲ့ သူငယ်ချင်းတွေက အုပ်စုဖွဲ့အဓမ္မပြုကျင့်ခဲ့တယ်လို့ မြို့ခံတွေဆီက သိရပါတယ်။

စလင်းမြို့ G-10 ကျောင်းသူကို တကျောင်းတည်းတက်ရောက်နေတဲ့ ရည်းစားဖြစ်သူနဲ့ သူငယ်ချင်း ၃ ဦးက အောက်တိုဘာ ၂၃ ရက် နေ့လယ် ၁၂ နာရီကျော်မှာ မြင်တင်ရပ်ကွက်ရှိ ထီးကြီးဘုရားအတွင်း ခေါ်ဆောင်ပြီး အဓမ္မပြုကျင့်ခဲ့တာလို့ ဆိုပါတယ်။

” G-12ကျောင်းသား(ရည်းစားဖြစ်သူ)က သူ့မွေးနေ့ရှိတယ်ဆိုပြီး ကျောင်းသူမလေးကို ထီးကြီးဘုရားကို ခေါ်ဆောင်သွားခဲ့ပါတယ်။ သူ့ရဲ့ သူငယ်ချင်း ၃ ဦးကိုလည်းခေါ်ခဲ့ပါတယ်။ သူ့ရဲ့သူငယ်ချင်းတွေကလည်း G-12 အောင်မြင်ပြီးကြပါပြီ။ ထီးကြီးဘုရားမှာ ကျောင်းသားတွေက အရက်သေစာ သောက်စားမူးယစ်ပြီး ကျောင်းသူမလေးကို ဝိုင်းဝန်းအဓမ္မပြုကျင့်ကြတယ်”လို့ စလင်းမြို့ခံတဦးက မြေလတ်အသံကို ပြောပါတယ်။

ရည်းစားဖြစ်သူကျောင်းသားနဲ့ သူငယ်ချင်းတွေက ပါးစပ်ကိုပိတ်ပြီး တလှည့်စီအဓမ္မပြုကျင့်တာ၊ ရိုက်နှက်တာတွေလုပ်စဥ် ကျောင်းသူမှာသတိလစ်မေ့မျောသွားပြီးနောက် ထီးကြီးဘုရားထဲမှာ ထားခဲ့ခံရတာလို့ သိရပါတယ်။

“အဓမ္မပြုကျင့်ရာတွင် ကျောင်းသူမလေးရဲ့ ရည်းစားဖြစ်တဲ့ ကျောင်းသားက လည်ပင်းညှစ်ခြင်း ပါးရိုက်ခြင်း ပါးစပ်အားပိတ်ခြင်းများပြုလုပ်၍ ၃ ဦးပေါင်း ၁ ဦးချင်းစီက အဓမ္မပြုကျင့်ခဲ့ပြီး ကျန်တဦးက ဖုန်းဖြင့် videoဖိုင်ရိုက်ပြီး (Telegram)မှာ တင်ခဲ့ပါတယ်၊ အဓမ္မကျင့်ပြီးနောက် ကျောင်းသူမလေး သတိမေ့မျောနေချိန် ထီးကြီးဘုရားအတွင်းထားရှိခဲ့တယ်” လို့ ဆိုပါတယ်။

ဒီအခြေအနေတွေကို နစ်နာသူမိန်းကလေးရဲ့ပြန်လည်ပြောပြချက်အရ ၎င်းနဲ့နီးစပ်သူတွေဆီကတဆင့် သိရှိခဲ့တာလို့ အထက်ပါမြို့ခံကပြောပါတယ်။

အခင်းဖြစ်ပွားပြီးနောက် အဓမ္မပြုကျင့်ခံရတဲ့ကျောင်းသူ သတိပြန်ရလာပြီး ဘုရားအနီးဝန်းကျင်ရှိ ဒေသခံတွေကို ၎င်းအဓမ္မပြုကျင့်ခံရကြောင်းပြောဆိုအကူ အညီတောင်းခံတာကြောင့် ဒေသခံတွေကစလင်းဆေးရုံကို ပို့ဆောင်ပေးခဲ့ရတာပါ။

လက်ရှိမှာ အဓမ္မပြုကျင့်ခဲ့သူ G-12 ကျောင်းသားနဲ့သူငယ်ချင်း ၄ ဦးကို စလင်းရဲစခန်းက ဖမ်းဆီးထိန်းသိမ်းထားပြီး အဓမ္မပြုကျင့်စဥ် ရိုက်ကူးထားတဲ့ ဗီဒီယိုဖိုင်ကိုလည်း ရဲဘက်က သိမ်းယူထားတယ်လို့ သိရပါတယ်။

ဖြစ်စဥ်နဲ့ပတ်သက်ပြီး အမှုကြေအေးနိုင်ရေး ရဲတပ်ဖွဲ့၊ စလင်းအထက ၁ ကျောင်းအုပ်ကြီး၊ ကျောင်းဆရာ၊ ဆရာမတွေနဲ့ ကျောင်းသားမိဘတွေက နစ်နာသူကျောင်းသူမိဘတွေဆီ ကျပ်သိန်း ၇၀၀ နဲ့ ညှိနှိုင်းဆောင်ရွက်မှုတွေ လုပ်ဆောင်နေတယ်လို့ သိရပါတယ်။

စာတည်း – ဟိန်းစံ

မကွေး၊ အောက်တိုဘာ ၂၃၊ ၂၀၂၅။

မကွေးတိုင်း၊ မကွေးမြို့၊ နတ်မောက်လမ်း၊ ကန်လှရွာအနီးမှာ အောက်တိုဘာ ၂၂ ရက် နေ့လယ် ၁ နာရီဝန်းကျင်မှာ ကားတိုက်မှုဖြစ်ပြီး ကလေးငယ် ၁ ဦးအပါအဝင် ၅ ဦးသေဆုံးခဲ့တယ်လို့ မကွေးမြို့ခံတွေဆီက သိရပါတယ်။

ကန်လှကျေးရွာအနီး မိုင်တိုင်အမှတ် ၃၃၃/၁ ဖာလုံမှာ မကွေးဘက်ကလာတဲ့ Light Truck ကားနဲ့ ချောက်မြို့နယ်၊ ဆင်ကရွာကလာတဲ့ ဆီဘောက်စာကားတို့ မျက်နှာချင်းဆိုင်တိုက်မိခဲ့တာလို့ ဆိုပါတယ်။

“Light Truck ကားက ချောက်မြို့နယ်၊ ဆင်ကရွာကလာတာပါ၊ မကွေး ကညန ကို လိုင်စင်သက်တမ်း တိုးပြီးအပြန်မှာ ဖြစ်တာပါ။ သေဆုံးတဲ့အလောင်းတွေကိုတော့ မကွေးဆေးရုံမှာ ရင်ခွဲစစ်ဆေးမှု ပြုလုပ်ပြီးတော့ ဆရာဝန်အတည်ပြုချက်ရပြီး သက်ဆိုင်ရာသူတို့ရဲ့ နေရာဒေသတွေကို ပြန်လည် ပို့ဆောင်ပေးခဲ့တယ်” လို့ မကွေးမြို့ခံတဦးကပြောပါတယ်။

ကားတိုက်မှုမှာ ဆီဘောက်စာကားပေါ်လိုက်ပါလာတဲ့ ယာဉ်မောင်းနဲ့ ယာဉ်နောက်လိုက် အမျိုးသား ၂ ဦး၊ Light Truck ပေါ်မှာလိုက်ပါလာတဲ့ အမျိုးသား ၁ ဦး၊ အမျိုးသမီး ၁ ဦးနဲ့ အသက် ၁ နှစ် ၆ လအရွယ် ၁ ဦးသေဆုံးခဲ့တာပါ။

လက်ရှိမှာ ပျက်စီးသွားတဲ့ကားတွေကိုတော့ မကွေးရဲစခန်းမှာပို့ဆောင်ထားပြီး အမှုဖွင့်တရားဆွဲဆိုတာတွေလုပ်ဆောင်နေတယ်လို့ သိရပါတယ်။

အောက်တိုဘာ ၁၆ ရက်ကလည်း မကွေးမြို့ ရန်ကင်းရပ်ကွက် အ.ထ.က (၁) လမ်းနဲ့ သုခိတာလမ်းဆုံ KBZ Bank 3 အနီးမှာ ကားနဲ့ဆိုင်ကယ်ယာဥ်တိုက်မှုတခုဖြစ်ခဲ့ပါသေးတယ်။

စာတည်း – လင်း

မိတ္ထီလာ၊ အောက်တိုဘာ ၁၈၊ ၂၀၂၅။

မန္တလေးတိုင်း၊ မိတ္ထီလာမြို့၊ ရန်ကုန်-မန္တလေးလမ်းဟောင်း ရှမ်းတဲလေတပ်အရှေ့မှာ Express ကားနဲ့ ဟိုက်ဂျက်ကားတိုက်မိပြီး အမျိုးသမီး ၁ ဦးသေဆုံးကာ ၄ ဦးဒဏ်ရာရခဲ့တယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

အောက်တိုဘာ ၁၇ ရက်မနက် ၁၁ နာရီခန့်မှာ မန္တလေးဘက်ကနေ မိတ္ထီလာမြို့ဘက်ကို မောင်းလာတဲ့ ခရီးသည်တင် Express ကားဟာ ရှေ့မှာသွားနေတဲ့ ဟိုက်ဂျက်ကားကိုနောက်ကနေ ဝင်တိုက်ခဲ့တာလို့ဆိုပါတယ်။

“ကားကျော်တဲ့အကျော်မှာ နောက်ကနေဝင်တိုက်လိုက်တာ။ ဟိုက်ဂျက်နောက်မှာစီးတာက အမေကြီးတယောက်၊ ကလေးငယ်နဲ့သေသူအမျိုးသမီး၊ ရှေ့မှာက ယာဥ်မောင်းနဲ့ သေသူယောင်္ကျားပါတယ်။ နောက်ကတိုက်လိုက်တဲ့ အရှိန်နဲ့ နောက်ခန်းပါသူ ၃ ဦးက ကားပေါ်ကပြုတ်ကျသွားတယ်။ အမေကြီးနဲ့ကလေးက ဘေးကိုကျပြီးတော့ ကောင်မလေးကတော့ Express ကားအောက်ထဲကျသွားတာ”လို့ ကူညီဆောင်ရွက်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် ဟိုက်ဂျက်ကားမှာလိုက်ပါလာကြတဲ့ အရှေ့ဆည်ကုန်းကျေးရွာနေ အသက် ၂၇ နှစ်အရွယ် မသန္တာဟာ နေရာတင် ပွဲချင်းပြီးသေဆုံးပြီး အသက် ၁ နှစ်ခွဲအရွယ် ကလေးငယ်၊ အသက် ၆၀ ကျော်အရွယ် အမျိုးသမီး၊ အသက် ၃၀ ကျော်အရွယ်အမျိုးသား ၂ ဦးတို့ ထိခိုက်ဒဏ်ရာရခဲ့တယ်လို့ ဆိုပါတယ်။

ကား ၂ စီးလုံးလည်းပျက်စီးမှုရှိခဲ့ပြီး Express ကားပေါ်လိုက်ပါလာသူတွေကတော့ ထိခိုက်မှုတွေမရှိခဲ့ဘူးလို့ သူကပြောပါတယ်။

ယာဥ်တိုက်မှုကြောင့် ထိခိုက်သေဆုံးသူတွေကို မိတ္ထီလာပြည်သူ့ဆေးရုံကို ပို့ဆောင်ထားရပြီး အောက်တိုဘာ ၁၈ ရက်မှာတော့ သေဆုံးသူအလောင်းကိုကျေးရွာပြန်သယ်သွားပြီး ကျန်ဒဏ်ရာရသူတွေကတော့ဆေးရုံမှာ ဆက်လက် ဆေးကုသနေရတယ်လို့ သိရပါတယ်။

ပြီးခဲ့တဲ့ ဇွန် ၂ ရက်ကလည်း မိတ္ထီလာမြို့နယ်၊ ဖလန်ကျင်းကျေးရွာအနီး မိတ္ထီလာ-ကျောက်ပန်းတောင်လမ်းမှာ ခရီးသည်တင်ယာဥ် တိမ်းမှောက်လို့ အမျိုးသမီး ၆ ဦးသေ ၁၁ ဦးဒဏ်ရာရတယ်လို့ သိရပါတယ်။

စာတည်း – လင်း

မန္တလေး၊ အောက်တိုဘာ ၁၅၊ ၂၀၂၅။

မန္တလေးတိုင်း၊ မိတ္ထီလာမြို့နဲ့ပြင်ဦးလွင်မြို့တွေမှာ တရက်တည်း အမျိုးသား ၂ ဦးဓာတ်လိုက် သေဆုံးခဲ့တယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

အောက်တိုဘာ ၁၄ ရက် မနက် ၉ နာရီကျော်ခန့်မှာ ပြင်ဦးလွင်မြို့၊ ရပ်ကွက်ကြီး ၁၀၊ (ခ) ရပ်ကွက်၊ လမ်းသွယ် ၂ နေ အသက် ၄၈ နှစ်အရွယ် ဦးတင်မျိုးလှိုင်ဟာ နေအိမ်ခြံထဲရှိ ကြောင်လျှာပင်မှအသီးခူး နေချိန် ဓာတ်လိုက်သေဆုံးခဲ့တာလို့ ဆိုပါတယ်။

“ပတ်ဝန်းကျင်ကအပြောအရ ကြောင်လျှာသီးခူးရင်းနဲ့ တံချူက ဓာတ်ကြိုးပေါ်က ကျသွားလို့ဖြစ်တာ။ လက့်မှာတော့ အပူလောင်ဒဏ်ရာတွေတော့ရှိတယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

ဦးတင်မျိုးလှိုင်ကိုတော့ ဒေသလူမှုကူညီရေးအသင်းတွေက ပြင်ဦးလွင်ဆေးရုံကို ပို့ဆောင်ပေးခဲ့ကြရတယ်လို့ဆိုပါတယ်။

အလားတူ အဆိုပါညနေ ၄ နာရီကျော်မှာလည်း မိတ္တီလာမြို့၊ ပေါက်ချောင်းရပ်ကွက်၊ မိတ္ထီလာတောင်ကန် ကန်ပတ်လမ်းမှာ ပလုံကောက်တဲ့ အမျိုးသား ၁ ဦး ဓာတ်လိုက်သေဆုံးခဲ့ပါသေးတယ်။

သေဆုံးသူဟာ လူးခင်းကြီးကျေးရွာနေသူ အသက် ၅၀ ကျော်အရွယ် ဦးအောင်ကျော်ထွန်းဆိုသူဖြစ်ပြီး ရေကန်ထဲ ပလုံဆင်းကောက်ချိန် ဓာတ်လိုက်သေဆုံးခဲ့တယ်လို့ဆိုပါတယ်။

“အပ်မိနေတဲ့ ဓာတ်ကြိုးကိုကိုင်မိတာ။ ဓာတ်တိုင်ကဆင်းတဲ့ အပ်ကြိုးပါ။ ဓာတ်တိုင်ကရေစပ်မှာ အောက်မှာလည်းရေရှိနေတယ်။ ရေထဲရောက်မှကြိုးကိုလှမ်းကိုင်လာတာဖြစ်မယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

ဓာတ်လိုက်သေဆုံးသွားတဲ့ ဦးအောင်ကျော်ထွန်းကို ဒေသခံတွေက မိတ္ထီလာပြည်သူ့ဆေးရုံကို ပို့ဆောင်ပေးခဲ့ရပြီး အောက်တိုဘာ ၁၅ ရက်ဒီကနေမှာ ဆေးရုံကနေအလောင်းကို နေအိမ်ပြန်သယ်ပြီးနာရေးပြုလုပ်မယ်လို့ သိရပါတယ်။

ပြီးခဲ့တဲ့ ဇူလိုင် ၁၈ ရက်ကလည်း ပဲခူးမြို့၊ ဥဿာမြို့သစ်၊ နယ်မြေ ၅၊ ရပ်ကွက်ကြီး ၁၊ ရေစက်လမ်းထိပ်မှာ ပြုတ်ကျနေတဲ့ ဓာတ်ကြိုးကို ခလုတ်တိုက် လဲကျတဲ့ကလေးငယ် ဓာတ်လိုက်သေဆုံးသွားတယ်လို့ သိရပါတယ်။

စာတည်း – လင်း

ရွှေတောင်၊ အောက်တိုဘာ ၁၃၊ ၂၀၂၅။

ပဲခူးတိုင်း၊ ရွှေတောင်မြို့ဈေးအနီး ရေအနက် ၁၅ ပေကျော်ရှိတဲ့ မီးသတ်ကန်မှာ ငါးမျှားသွားတဲ့ အလယ်တန်းကျောင်းသား ၂ ဦး ရေနစ်သေဆုံးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၁၂ ရက်ညနေ ၃ နာရီခန့်မှာ ကြာနီကန် အထက(ခွဲ) ကျောင်းမှာတက်နေတဲ့ ကြာနီကန်ရပ်ကွက်၊ ဒေါနခြံလမ်းနဲ့ ထီးတန်းလမ်းနေ အသက် ၁၃ နှစ်အရွယ် ကျောင်းသား ၂ ဦးဟာ ငါးမျှားရင်း ရေနစ်ခဲ့တာလို့ ဆိုပါတယ်။

“ကလေးနှစ်ယောက်က ငါးမျှားနေတာ။ တယောက်က ငါးမျှားတံအောက်ကျသွားတာကို ဆင်းဆယ်ပုံ ရတယ်။ မီးသတ်ကန်က အနက်ကြီး။ ကျန်တဲ့ကောင်လေးက ခြေထောက်လှမ်းပေးတာ။ ခြေထောက်ကနေဆွဲတင်ပေါ့။ အဲ့မှာနှစ်ယောက်စလုံးနစ်သွားတာ။ ကန်ကစောက်ကြီးဖြစ်နေတာ”လို့ ကူညီကယ်ဆယ်ရေးလုပ်ပေးခဲ့တဲ့ ဒေသခံတဦးကပြောပါတယ်။

ရေနစ်ပြီးနာရီဝက်ကျော်အကြာမှာ အလောင်းတွေကိုပြန်လည်ဆည်ယူနိုင်ခဲ့ပြီးနောက် လူမှုကူညီရေး အသင်းတွေက ရွှေတောင်ဆေးရုံကို ပို့ပေးထားရပြီး အောက်တိုဘာ ၁၃ ရက်ဒီကနေ့မှ မိသားစုဝင်တွေက နေအိမ်ပြန်သယ်ကြမယ်လို့ သိရပါတယ်။

စက်တင်ဘာ ၂၆ ရက်ကလည်း ပဲခူးမြို့၊ ဥဿာမြို့သစ်၊ ၉ ရပ်ကွက်က ရေနုတ်မြောင်းထဲမှာ ကလေးဆေးဖိုးအတွက် ဘူးခွံဆင်းကောက်သူ အမျိုးသမီး ရေနစ်သေဆုံးခဲ့ပါသေးတယ်။

စာတည်း – လင်း