မှုခင်း

မန္တလေး၊ ဇူလိုင် ၂၄၊ ၂၀၂၆။

မန္တလေးတိုင်း၊ ချမ်းမြသာစည်မြို့နယ်က မီလျံနာရွှေဆိုင် ဓားပြတိုက်မှုမှာ ပြစ်မှုကျူးလွန်သူ ၆ ဦးကို ဖမ်းမိထားတယ်လို့ ဖြစ်စဥ်ကိုသိထားတဲ့ မြို့ခံတွေထံက သိရပါတယ်။

ဓားပြတိုက်မှုဖြစ်ပွားပြီး ၂ ရက်အကြာ ဇူလိုင်လ ၂၂ ရက်နေ့မှာ ပြစ်မှူကျူးလွန်သူတွေအနက် ၂ ဦးကို တံတားဦးမြို့အပိုင် အမြန်လမ်းပေါ်မှာ ဖမ်းမိခဲ့ပြီးနောက် ကျန် ၄ ဦးကို ဇူလိုင်လ ၂၃ ရက်နေ့က ထပ်မံဖမ်းဆီးနိုင်ခဲ့တာလို့ ဆိုပါတယ်။

“အမြန်လမ်းမှာ နှစ်ယောက်မိပြီးတော့ နောက်နှစ်ယောက်ကို စစ်ကိုင်းသွားမယ့်လမ်းပေါ်မှာ ထပ်မိတယ်။ တယောက်က တံလျှပ်မော်တောင်ရပ်ကွက်က တည်းခိုခန်းတခုမှာ မိတာ။ နောက်တယောက်ကိုလည်း မြို့ထဲမှာ ထပ်မိတာ။ နောက်ဆုံးတယောက်က သေနတ်ကိုင်တဲ့တယောက်ပါ”လို့ ဖြစ်စဥ်ကိုသိထားတဲ့ မြို့ခံတဦးက ပြောပါတယ်။

ပြစ်မှူကျူးလွန်သူ ၆ ဦးအနက် ၄ ဦးဟာ မန္တလေးဇာတိတွေဖြစ်ပြီး ၂ ဦးက စစ်ကိုင်းဇာတိတွေဖြစ်ကာ ၆ ဦးအနက် ၄ ဦးဟာ ခိုးမှု၊ ဓားပြမှုတွေနဲ့ ထောင်ကျဖူးသူတွေဖြစ်တယ်လို့ ဆို​ပါတယ်။

လက်ရှိမှာတော့ ပြစ်မှူကျူးလွန်သူတွေကို မန္တလေးတိုင်း ရဲတပ်ဖွဲ့ရုံးမှာ ထိန်းသိမ်းထားပြီး စစ်ဆေးနေတယ်လို့ သိရပါတယ်။

ဓားပြတိုက်မှု ကျူးလွန်သူ ၆ ဦးကိုဖမ်းမိထားပေမယ့် ပြစ်မှူကျူးလွန်ချိန်က အသုံးပြုခဲ့တဲ့သေနတ်တလက်နဲ့ ရွေထည်အချို့ကိုသာ ပြန်လည်သိမ်းဆည်းရမိထားသေးပြီး ရွှေထည်ပစ္စည်းအများစုကိုတော့ ပြစ်မှူကျူးလွန်သူတွေကိုစစ်ဆေးပြီး သက်သေခံအဖြစ်သိမ်းဆည်းနိုင်ဖို့ ရဲအဖွဲ့က ဆောင်ရွက်နေတယ်လို့ သိရပါတယ်။

ဇူလိုင်လ ၂၀ ရက်နေ့ ည​နေ ၃ နာရီကျော်ခန့်မှာ ချမ်းမြသာစည်မြို့နယ်၊ ၁၁၀ လမ်း၊ ၆၂ လမ်းနဲ့ ၆၄ လမ်းကြားမှာတည်ရှိတဲ့ မီလျံနာရွှေဆိုင်ကို ဆိုင်ကယ် ၃ စီးနဲ့ အမျိုးသား ၆ ဦးပါတဲ့ ဓားပြတွေဟာ ပစ္စတိုသေနတ်တလက်နဲ့ရောက်လာပြီး သေနတ်တချက်ပစ်ဖောက်ကာ ဆိုင်ဝန်ထမ်းကို ရိုက်နှက်ပြီး ရွှေထည်ပစ္စည်းမျိုးစုံ တပိဿာကျော်ကို ယူဆောင်သွားတယ်လို့ သိရပါတယ်။

မန္တလေး၊ ဇူလိုင် ၂၁၊ ၂၀၂၆။

မန္တလေးတိုင်း၊ ချမ်းမြသာစည်မြို့နယ်၊ ၁၁၀ လမ်း၊ ၆၂ လမ်းနဲ့ ၆၄ လမ်းကြားမှာတည်ရှိတဲ့ မီလျံနာရွှေဆိုင် ဓားပြတိုက်ခံရပြီး ရွှေတပိဿာကျော် ပါသွားတယ်လို့ မြို့ခံတွေထံက သိရပါတယ်။

ဇူလိုင်လ ၂၀ ရက်နေ့ ည​နေ ၃ နာရီကျော်ခန့်မှာ ဆိုင်ကယ် ၃ စီးနဲ့ အမျိုးသား ၆ ဦးပါတဲ့ ဓားပြတွေက ဆိုင်ကိုဝင်စီးပြီး ရွှေတွေကိုယူသွားတာလို့ဆိုပါတယ်။

“သေနတ်အတိုတလက်ပါတယ်။ တချက်ဖောက်ပြီးတော့ ဆိုင်ထဲဝင်လာတယ်။ ဆိုင်ကယ်ဦးထုပ်တွေ ဆောင်းထားတယ်။ ကောင်တာကိုရိုက်ခွဲပြီး ရွှေတွေယူပြီးချက်ချင်းပြန်ထွက်သွားတာ။ မိနစ်ပိုင်းလေးပဲကြာတယ်။ မြန်တယ်။ ရွှေဆိုင်ကလည်း ကာစတန်မာတွေသိပ်မရှိတဲ့ဆိုင်ဆိုတော့”လို့ ဖြစ်စဥ်ကိုသိတဲ့ မြို့ခံတဦးက ပြောပါတယ်။

ဓားပြတိုက်ခံရလို့ ရွှေဆိုင်အတွင်းက ရွှေလက်ကောက်၊ လက်စွပ်၊ နားကပ်ပုံစံမျိုးစုံ တပိဿာကျော်ပါသွားတယ်လို့ ဆိုပါတယ်။

ဒါ့အပြင် ဓားပြတွေက သေနတ်ဒင်နဲ့ထုခဲ့လို့ ဆိုင်ဝန်ထမ်းအမျိုးသား ၁ ဦး ဒဏ်ရာ (မစိုးရိမ်ရ) ရခဲ့ကာ ဓားပြတိုက်ခံရချိန်မှာ ဆိုင်ရှင်အပြင် ဆိုင်ဝန်ထမ်း အမျိုးသား ၄ ဦးနဲ့အမျိုးသမီး ၂ ဦးရှိနေပေမယ့် ပြန်လည်မခုခံနိုင်ပဲ ဓားပြတွေက လွတ်မြောက်သွားပါတယ်။

ရွှေဆိုင်ဓားပြတိုက်ခံရပြီးနောက် စစ်ကောင်စီအဖွဲ့တွေလာရောက်စစ်ဆေးသွားပေမယ့် ဇူလိုင်လ ၂၁ ရက်နေ့အထိ ဓားပြတွေကို ဖမ်းမမိသေးဘူးလို့ သိရပါတယ်။

ဇွန်လ ၂၀ ရက်နေ့ကလည်း ကြို့ပင်ကောက်မြို့၊ စျေးချိုမြောက်ရပ်ကွက်၊ မြို့မစျေးရှိ မြမြင့်မိုရ်ရွှေဆိုင်ပိုင်ရှင် အသက် ၅၇ ဦးဝင်းလွင်ဆိုသူ ပစ်သတ်ခံရလို့ သေဆုံးသွားသေးတယ်လို့ သိရပါတယ်။

ပဲခူး၊ ဇူလိုင် ၁၈၊ ၂၀၂၆။

ပဲခူးတိုင်း၊ ပဲခူးမြို့၊ ဥဿာမြို့သစ်၊ ၈ ရပ်ကွက်၊ တက္ကသိုလ်ဘုရားလမ်းမှာ လင်မယားချင်းစကားများရန်ဖြစ်ချိန် အမျိုးသားဖြစ်သူက ဓားနဲ့ထိုး ငရုတ်ကျည်ပွေ့နဲ့ထုတာကြောင့် အမျိုးသမီးဖြစ်သူ သေဆုံးခဲ့တယ်လို့ ဒေသခံတွေဆီက သိရပါတယ်။

ဇူလိုင် ၁၇ ရက်ညနေ ၅ နာရီခန့်မှာ အသက် ၄၆ နှစ်အရွယ် ဒေါ်နွဲ့နွဲ့စန်းနဲ့ အမျိုးသားဖြစ်သူ အသက် ၄၃ နှစ်အရွယ် ဦးဇော်မင်းတို့ဟာ နေအိမ်မှာရှိနေချိန် စကားများရန်ဖြစ်ခဲ့တယ်လို့ ဆိုပါတယ်။

“လင်မယားချင်းစကားများရင်းနဲ့ ယောက်ျားဘက်က လက်လွန်တာလို့သိရတယ်။ သားသမီးတွေအပြောအရ လင်မယားချင်းက မကြာခဏစကားများတာရှိတယ်။ အဖေလုပ်သူကလည်း အသောက်အစားရှိတယ်။ သိရသလောက်က စကားများတော့ ယောက်ျားက မိန်းမကို ခေါင်းကိုအရင်ထုတယ်။ ပြီးမှ ဓါးနဲ့ထိုးတာ”လို့ ဒေသခံတဦးက ပြောပါတယ်။

ဒေါ်နွဲ့နွဲ့စန်းမှာ ဝဲဘက်ရင်ညွန့်၊ ချိုင်းအောက်မှာ ထိုးသွင်းဒဏ်ရာ၊ နဖူးထိပ်နဲ့ ခါးနောက်ကျောရိုက်နှက်ဒဏ်ရာတွေနဲ့ သေဆုံးခဲ့တယ်လို့ ဆိုပါတယ်။

အမျိုးသမီးသေဆုံးနေတာကို အလုပ်ကပြန်လာတဲ့သားသမီးတွေက တွေ့မှသိရတာဖြစ်ပြီး အမျိုးသားဖြစ်သူကတော့ နေအိမ်ကနေ ထွက်ပြေးသွားတယ်လို့ ဒေသခံတဦးက ပြောပါတယ်။

နေအိမ်ပြန်လာတဲ့ သားသမီးတွေက မိခင်အလောင်းကိုတွေ့လို့ ပတ်ဝန်းကျင်နဲ့ ရပ်ကွက်တာဝန်ရှိသူတွေကိုအကြောင်းကြားပြီး တာဝန်ရှိသူတွေလာရောက်စစ်ဆေးရာမှာ လူသတ်မှုဖြစ်တဲ့နေရာအနီးကနေ သွေးစွန်းနေတဲ့ဓားနဲ့ ငရုတ်ကျည်ပွေ့တို့ကိုလည်း တွေ့ရတယ်လို့ ဆိုပါတယ်။

ထွက်ပြေးသွားတဲ့ အမျိုးသားကိုတော့ ရဲတွေကလိုက်လံရှာဖွေဖမ်းဆီးရာ ည ၈ နာရီခန့်မှာ ရပ်ကွက်ထဲက အသိ ၁ ဦးနေအိမ်မှာ ပုန်းနေချိန်ဖမ်းမိခဲ့ပြီး အမှတ် ၃ နယ်မြေရဲစခန်းမှာ ထိန်းသိမ်းစစ်ဆေးနေတယ်လို့ သိရပါတယ်။

ကျောက်ဆည်၊ ဇူလိုင် ၈၊ ၂၀၂၆။

မန္တလေးတိုင်း၊ ကျောက်ဆည်မြို့၊ စျေးတန်းရပ်၊ ဒေါ်သိုက်ကြီးကွေ့မှာ အရာခံဗိုလ်တဦး ဆိုင်ကယ်မှောက်သေဆုံးခဲ့တယ်လို့ မြို့ခံတွေထံက သိရပါတယ်။

သေဆုံးသူဟာ ကျောက်ဆည်မြို့ ပင်မခဲယမ်းမီးကျောက်တပ်က အသက် ၅၀ ကျော်အရွယ်ရှိ အရာခံဗိုလ်အောင်မင်းကြည် ဆိုသူဖြစ်ပြီး ဇူလိုင်လ ၇ ရက်နေ့မနက် ၁ နာရီမှာ ဆိုင်ကယ်မှောက်သေဆုံးသွားတာလို့ဆိုပါတယ်။

“သူဟာသူ စလစ်ဖြစ်ပြီးမှောက်တာလား ဘယ်လိုဖြစ်ပြီး မှောက်တာလဲတော့ မသိရဘူး။ လမ်းသွားလမ်းလာတွေတွေ့ပြီး အကြောင်းကြားမှ သိရတာ။ ​ဖြစ်တဲ့နေရာမှာတင်သေဆုံးနေပြီ။”လို့ မြို့ခံတဦးကပြောပါတယ်။

ဆိုင်ကယ်တိမ်းမှောက်မှုကြောင့် ဦးအောင်မင်းကြည်မှာ ဦးခေါင်းနဲ့မျက်နှာထိခိုက်ဒဏ်ရာ၊ ဇက်ကျိုးအခြေနေနဲ့နေရာမှာပင် သေဆုံးသွားပါတယ်။

သေဆုံးသူရဲ့အလောင်းကို မြို့ခံလူမှုကူညီရေးအသင်းတွေက ကောက်ယူပြီး ကျောက်ဆည်ပြည်သူ့ဆေးရုံကို ပို့ဆောင်ပေးခဲ့ရပြီးနောက် မနက်ပိုင်းမှာပင် သက်ဆိုင်ရာတပ်က အလောင်းကိုလာယူသွားတယ်လို့ ဆိုပါတယ်။

ဓာတ်ပုံ – သေဆုံးသူ အရာခံဗိုလ်အောင်မင်းကြည်နဲ့ သက်သေခံကဒ်ပြား

စလင်း၊ ဇူလိုင် ၃၊ ၂၀၂၆။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့အနီး နွယ်တမယ်တံတားစောင့် စစ်ကော်မရှင်တပ်သားအချင်းချင်း ဓားထိုးမှုဖြစ်လို့ ၁ ဦးသေတယ်လို့ မြို့ခံတွေဆီက သိရပါတယ်။

ဇူလိုင်လ ၂ ရက်နေ့ည ၈ နာရီခန့်မှာ တံတားစောင့် စစ်ကော်မရှင်တပ်သား ၂ ဦး စကားများရန်ဖြစ်ရာမှ တပ်သား ၁ ဦးက နောက်တပ်သား ၁ ဦးကို ဓားနဲ့ထိုးခဲ့တာလို့ ဆိုပါတယ်။

“အချင်းချင်းမူးပြီး စကားများကြတာ။ ရိုးရိုးတပ်သားတွေ။ နှစ်ယောက်မှာ တယောက်က ဓားနဲ့ထိုးတာ။ တယောက်က အုတ်ခဲနဲ့ထုတာ။ ဓားနဲ့ထိုးခံရတဲ့တပ်သားက ပွဲချင်းပြီးပဲ”လို့ မြို့ခံတဦးက ပြောပါတယ်။

ဓားနဲ့ထိုးခံရတဲ့ အသက် ၃၈ နှစ်အရွယ် စစ်ကော်မရှင်တပ်သားဟာ နေရာမှာပင်သေဆုံးသွားပြီး အုတ်ခဲနဲ့ထုခံရသူတပ်သားကတော့ ဆင်ဖြုကျွန်းဆေးရုံမှာ ဆေးကုသမှုခံယူနေရပါတယ်။

သေဆုံးသူ စစ်ကော်မရှင်တပ်သားရဲ့အလောင်းကိုတော့ ဇူလိုင်လ ၃ ရက်နေ့မနက်ပိုင်းက ဆင်ဖြူကျွန်းမြို့ သုသာန်မှာ သင်္ဂြိုလ်လိုက်တယ်လို့ ဆိုပါတယ်။

နွယ်တမယ်တံတားမှာ ၂၀၂၅ ခုနှစ်အစပိုင်းလောက်ကတည်းကစပြီး ပခုက္ကူအခြေစိုက် တပ်မ ၁၀၁ တပ်မ လက်အောက်ခံတပ်တွေက တံတားလုံခြုံရေးစောင့်နေတာဖြစ်ပြီး အနည်းဆုံးအင်အား ၂၀ ခန့်ရှိတယ်လို့ သိရပါတယ်။

ဇွန်လ ၃၀ ရက်နေ့ကလည်း စလင်းမြို့နယ်၊ ဆင်ဖြုုကျွန်းမြို့၊ အေးစုဖိုစု ရပ်ကွက်မှာ အမျိုးသမီး ၁ ဦးကို ဆေးကြောင်နေတဲ့ စစ်ကော်မရှင်တပ်သားကနေအိမ်ပေါ်တက်သေနတ်နဲ့ပစ်သတ်သွားလို့သေဆုံးခဲ့သေးတယ်လို့သိရပါတယ်။

ဖြူး၊ ဇွန် ၂၂၊ ၂၀၂၆။

ပဲခူးတိုင်း၊ ဖြူးမြို့နယ်အပိုင် ရန်ကုန်-မန္တလေး အမြန်လမ်းပေါ်မှာ ရပ်ထားတဲ့ ခရီးသည်တင်ကားကို နောက်ထပ်ခရီးသည်တင်ကားတစီးက ဝင်တိုက်ရာ ၃ ဦးသေတယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

ဇွန် ၂၂ ရက်မနက် ၃ နာရီမှာ အမြန်လမ်းကားလမ်း မိုင်တိုင်အမှတ် ၁၁၇/၇ ဖာလုံမှာ ရန်ကုန်ဘက်ကို ခေါင်းတည်ထားပြီး စက်ပျက်လို့ပြင်နေတဲ့ ရတနာဖြိုး Express ကားကို မန္တလေးဘက်ကနေ ရန်ကုန်ဘက်ကိုမောင်းလာတဲ့ ရွှေမန္တလာ Express ကားက နောက်ကနေဝင်တိုက်ခဲ့တာလို့ ဆိုပါတယ်။

“ရှေ့က Express ကားပဲ။ ကားပျက်လို့ ပြင်နေတာကို ရွှေမန္တလာကနောက်ကနေ ဝင်တိုက်တာ။ ရတနာဖြိုးက ယာဥ်မောင်းနဲ့ ရွှေမန္တလာက ယာဥ်မောင်း၊ ယာဥ်နောက်လိုက် သေတာ။ ဘယ်လိုကြောင့်ဝင်တိုက်မိလည်းတော့ သေချာမသိရသေးဘူး”လို့ ကူညီဆောင်ရွက်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် ရတနာဖြိုး Express ယာဥ်မောင်း အသက် ၄၀ အရွယ်အမျိုးသား၊ ရွှေမန္တလာ Express က အသက် ၄၀ အရွယ်ယာဥ်မောင်းအမျိုးသားနဲ့ အသက် ၂၀ ကျော်အရွယ်ယာဥ်နောက်လိုက်တို့ သေဆုံးခဲ့တယ်လို့ ဆိုပါတယ်။

ဒါ့အပြင် ရွှေမန္တလာ Express ယာဥ်ပေါ်က အသက် ၁၄ နှစ်ကျော်အရွယ်ကိုရင် ၁ ပါးနဲ့ အသက် ၃၀ ကနေ ၅၀ ကြား အမျိုးသား ၃ ဦးဒဏ်ရာရခဲ့ပါတယ်။

ယာဥ်တိုက်မှုကြောင့်သေဆုံးထိခိုက်သူတွေကို အမြန်လမ်းမီးသတ်နဲ့ ဖြူးမြို့လူမှုကူညီရေးအသင်းတွေက ဖြူးမြို့နယ်ပြည်သူ့ဆေးရုံကို ပို့ဆောင်ပေးခဲ့ရတယ်လို့ ဆိုပါတယ်။

မေ ၂၅ ရက်ကလည်း တံတားဦးမြို့နယ်၊ ရန်ကုန်-မန္တလေးအမြန်လမ်းပေါ်မှာ အိမ်စီးကား တိမ်းမှောက်လို့ အမျိုးသမီး ၂ ဦးသေ ၃ ဦးဒဏ်ရာရတယ်လို့ သိရပါတယ်။

စာတည်း -လင်း

ကြို့ပင်ကောက်၊ ဇွန် ၂၀၊ ၂၀၂၆။

ပဲခူးတိုင်း၊ ကြို့ပင်ကောက်မြို့၊ စျေးချိုမြောက်ရပ်ကွက်၊ မြို့မစျေးရှိ ရွှေဆိုင်ပိုင်ရှင်တဦး ပစ်ခတ်ခံရပြီး သေဆုံးသွားတယ်လို့ မြို့ခံတွေဆီက သိရပါတယ်။

ပစ်သတ်ခံရသူဟာ မြမြင့်မိုရ် ရွှေဆိုင်ပိုင်ရှင် အသက် ၅၇ အရွယ် ဦးဝင်းလွင်ဖြစ်ပြီး ဇွန်လ ၂၀ ရက်နေ့လယ် ၁၂ နာရီကျော်က ဆိုင်မှာတဦးတည်းရှိနေချိန် ပစ်သတ်ခံရတာလို့ ဆိုပါတယ်။

“သူမိန်းမက ထမင်းချိုင့်ပြန်ယူတဲ့အချိန်မှာ သူ့ယောက်ျားတယောက်တည်းကျန်ခဲ့တာ။ အဲါဒီချိန်မှာ လာပစ်သွားတာ။ သေနတ်သံကိုလည်း မကြားရဘူးထင်တယ်။ ဘေးနားဆိုင်ကလူတွေလည်း မသိကြဘူး။ သူ့မိန်းမပြန်လာတော့အော်မှ ပတ်ဝန်းကျင်ကသိကြတာ။ “လို့ မြို့ခံတဦးက ပြောပါတယ်။

သေဆုံးသူ ဦးဝင်းလွင်ဟာ စစ်တပ်နဲ့ပတ်သက်သူမဟုတ်ဘဲ ရွှေဆိုင်လုပ်ငန်းကိုလုပ်ကိုင်တဲ့ ရွှေလုပ်ငန်းရှင်တဦးဖြစ်ကာ ပစ်ခတ်ခံရတာကြောင့် ဘယ်ဘက်ရင်ဘတ်မှာ ကျည်ထိဒဏ်ရာ ၁ ချက်ရပြီး နေရာတင်သေဆုံးခဲ့တာလို့ ဆိုပါတယ်။

အဆိုပါ ပစ်ခတ်မှုကို ဘယ်သူတွေက ဘာကြောင့်ပစ်ခတ်သွားတယ်ဆိုတာနဲ့ ရွှေထည်တွေ ယူဆောင်သွားတာရှိ၊ မရှိကိုတော့မသိရသေးဘူးလို့ ဆိုပါတယ်။

ပစ်ခတ်မှုဖြစ်ပြီးနောက် စစ်ကော်မရှင်အဖွဲ့တွေလာရောက်စစ်ဆေးပြီး အလောင်းကို ကြို့ပင်ကောက်ဆေးရုံကို ပို့ဆောင်ခဲ့တယ်လို့ မြို့ခံတဦးက ပြောပါတယ်။

မတ် ၂၂ ရက်ကလည်း ကြို့ပင်ကောက်မြို့၊ သဲကုန်းရပ်ကွက်နေ NLD လွှတ်တော်ကိုယ်စားလှယ်ရဲ့ အမျိုးသမီးဖြစ်သူ ပစ်သတ်ခံရလို့သေဆုံးခဲ့ပါသေးတယ်။

စာတည်း – လင်း

ရေတာရှည်၊ ဇွန် ၁၅၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ ညောင်ပင်သာကျေးရွာ ရန်ကုန်-မန္တလေး လမ်းဟောင်းပေါ်မှာ ပရဟိတအသင်းကားတစီးကဝင်တိုက်မိတာကြောင့် အမျိုးသား ၁ ဦးသေဆုံးခဲ့တယ်လို့ အသင်းနဲ့နီးစပ်သူတွေဆီက သိရပါတယ်။

ဇွန် ၁၄ ရက်မနက် ၅ နာရီခွဲ နေပြည်တော်ကနေလူနာပို့ပြီး တောင်ငူဘက်ကိုပြန်လာတဲ့ တောင်ငူအခြေစိုက်ပရဟိတအသင်းတခုရဲ့ကားဟာ လမ်းဘေးလမ်းလျှောက်နေသူအမျိုးသားကို ဝင်တိုက်မိခဲ့တာလို့ ဆိုပါတယ်။

“လမ်းသွားတဲ့သူကို ဝင်တိုက်မိသွားတာ။ ယာဥ်မောင်းအိပ်ငိုက်သွားတယ်လို့ ပြောတယ်။ ကျန်းမာရေးအရလမ်းလျှောက်တာလားမသိဘူး။ (ကားက) လူနာပို့ပြီး ပြန်လာတာ။ “လို့ ပရဟိတအသင်းနဲ့နီးစပ်သူတဦးက ပြောပါတယ်။

ယာဥ်တိုက်မှုကြောင့် ရေတာရှည်မြို့နေ အသက် ၃၀ ကျော်အရွယ်အမျိုးသားမှာ နေရာမှာတင် သေဆုံးသွားခဲ့ပြီး အလောင်းကိုတော့ရေတာရှည်ဆေးရုံကို ပို့ဆောင်ပေးခဲ့ရတယ်လို့ ဆိုပါတယ်။

အဲ့ဒီနောက် အဆိုပါပရဟိတအသင်းကားမောင်းသူကို ရဲကဖမ်းဆီးပြီး ရေတာရှည်မြို့မရဲစခန်းမှာ ချုပ်နှောင်ထားတယ်လို့ အထက်ပါနီးစပ်သူက ပြောပါတယ်။

သေဆုံးသွားတဲ့အမျိုးသားကို ဇွန် ၁၆ ရက်မှာ နာရေးချမှာဖြစ်ပြီး နစ်နာသူမိသားစုအတွက် သက်ဆိုင်ရာအသင်းဘက်ကလည်း လိုအပ်တဲ့ကူညီမှုမျိုးလုပ်ဆောင်ပေးနေတယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၅ ရက်ကလည်း ရေတာရှည်မြို့နယ်အပိုင် ရန်ကုန်-မန္တလေး အမြန်လမ်းပေါ်မှာ ယာဥ်တိုက်မှုဖြစ်ပြီး ယာဥ်မောင်းသေဆုံးကာ ခရီးသည် ၃ ဦးဒဏ်ရာရတယ်လို့ သိရပါတယ်။

စာတည်း – လင်း

လက်ပံတန်း၊ ဇွန် ၁၂၊ ၂၀၂၆

ပဲခူးတိုင်းအနောက်ခြမ်း၊ လက်ပံတန်းမြို့နယ်၊ ရေနောက်ရွာဟောင်းကျေးရွာမှာ ရွာခံ ၅ ဦးကို ဒေသတွင်း တော်လှန်ရေးတပ်ဖွဲ့ဝင်တွေက သေနတ်နဲ့ ပစ်သတ်သွားတယ်လို့ ​ဒေသခံတွေဆီက သိရပါတယ်။

သေဆုံးသူတွေဟာ ရေနောက်ရွာဟောင်းကျေးရွာနေ အသက် ၅၀ ကျော် ဦးတင်သိန်း နဲ့ ဇနီးဖြစ်သူ အသက် ၄၅ နှစ် ဒေါ်ခင်ဦး၊ အသက် ၅၅ နှစ် ဦးလွန်းခိုင်နဲ့ ဇနီးဖြစ်သူ အသက် ၅၀ ဒေါ်မိချို၊ အသက် ၅၇ နှစ် ဒေါ်အေးမြင့်တို့ဖြစ်ပြီး ဇွန်လ ၁၀ ရက် ညပိုင်းက ၎င်းတို့နေအိမ်တွေမှာ အသီးသီးရှိနေချိန် ဝင်ရောက်ပြီး သေနတ်နဲ့ပစ်သတ်သွားတာလို့ ဆိုပါတယ်။

” ပြည်သူတွေကို အကြောင်းမဲ့လာပစ်သတ်သွားတဲ့သဘောမျိုး။ ပြောရရင် သူတို့နဲ့အဆင်မပြေတာရှိလို့နေမှာပေါ့။ စစ်တပ်နဲ့ ဘာမှမပတ်သက်တဲ့သူတွေ။ နေအိမ် ၃ အိမ်မှာ ဝင်ပစ်သွားတာ” လို့ လက်ပံတန်းဒေသခံတဦးက မြေလတ်အသံကို ပြောပါတယ်။

ပစ်သတ်ခံရသူ ၅ ဦးဟာ မျှစ်ချိုး၊ ဝါးခုတ်၊ လက်သမားစတဲ့ ကြုံရာကျပန်းအလုပ်လုပ်ကိုင်ကြတဲ့ သာမန်အရပ်သား လက်လုပ်လက်စားတွေဖြစ်ပြီး စစ်တပ်အပါအဝင် ဒေသတွင်းလက်နက်ကိုင်တပ်တွေနဲ့ ပတ်သက်သူတွေမဟုတ်ကြောင်း ဒေသခံတွေက ပြောပါတယ်။

သေဆုံးသွားသူတွေရဲ့ ရုပ်အလောင်းတွေကို ရွာခံတွေက ယမန်နေ့ ဇွန်လ ၁၁ ရက်မှာ ကျေးရွာမှာပဲသင်္ဂြိုဟ်ပေးခဲ့တယ်လို့ သိရပါတယ်။

အရပ်သားပြည်သူတွေကိုသတ်ဖြတ်တာဟာ တော်လှန်ရေးကို ပုံရိပ်ဖျက်နေတဲ့ ကိစ္စရပ်တွေဖြစ်တယ်လို့ ဒေသတွင်းကာကွယ်ရေးအဖွဲ့ဝင်တဦးက မှတ်ချက်ပြုပါတယ်။

” စုစုပေါင်းသတ်ခံရတာ ၆ ဦးလို့ သိထားရတယ်။ နောက် ၁ ရွာမှာ ၁ ယောက်။ အဲဒါကို အသေးစိတ်ရဖို့စုံစမ်းနေတယ်။ ဒီဘက်ကအဖွဲ့(ကာကွယ်ရေးတပ်ဖွဲ့)တွေ အကုန်စိတ်တိုနေကြတယ်။ ဒီအတိုင်းအချောင်သတ်တဲ့ပုံစံဖြစ်နေတယ်”လို့ သူက ပြောပါတယ်။

အရပ်သားတွေအသတ်ခံရတာနဲ့ပတ်သက်ပြီး လက်ပံတန်းမြို့နယ်ပြည်သူ့ကာကွယ်ရေးတပ်ဖွဲ့ (ပကဖ)တာဝန်ခံကို မြေလတ်အသံက မေးမြန်းခဲ့ရာမှာ ဖြစ်စဥ်ကိုသိရှိထားပြီး အသေးစိတ်အခြေအနေတွေကို ဆက်လက်စုံစမ်းနေဆဲဖြစ်တယ်လို့သာ ပြန်လည်ဖြေကြားပါတယ်။

သာယာဝတီခရိုင်အတွင်းမှာ တောင်ပိုင်းတိုင်းစစ်ဌာန ဗျူဟာ ၂၂ နဲ့ လက်အောက် တပ်ရင်း ၃၈၀၁၊ ၃၈၀၂၊ ၃၈၀၃၊ လက်ပံတန်းပြည်သူ့ကာကွယ်ရေးတပ်ဖွဲ့စတဲ့ တပ်ရင်း၊ တပ်ဖွဲ့တွေ အဓိကစစ်ရေးလှုပ်ရှားနေပြီး အခြားတော်လှန်ရေးတပ်ဖွဲ့တွေလည်း စစ်ရေးလှုပ်ရှားမှုရှိနေတာလည်း ဖြစ်ပါတယ်။

ဧပြီလ ၂၅ ရက်ကလည်း အုတ်ဖိုမြို့နယ်၊ သုံးပွင့်ဆိုင်ကျေးရွာအနီးတောစပ်မှာ သစ်ကယ်ရီသမား ၁ ဦးကို PDF တပ်ဖွဲ့ဝင်တွေက ဖမ်းဆီးသတ်ဖြတ်ခဲ့လို့ သေဆုံးခဲ့တယ်လို့ သိရပါတယ်။