စောကျော်ငြိမ်း

မကွေး၊ ဇန်နဝါရီ ၁၃၊ ၂၀၂၅။

မကွေးတိုင်း၊ သရက်ခရိုင်၊ မင်းလှမြို့နယ်အတွင်း ပုသိမ်-မုံရွာ ကားလမ်းပေါ်မှာ ခရီးသွားလာနေတဲ့ ယာဥ်တွေ၊ ခရီးသွားပြည်သူတွေနဲ့ စျေးဆိုင်တွေကို ရှောင်တခင်စစ်ဆေးမှုတွေ ပြုလုပ်ခဲ့တယ်လို့ အထက်မင်းလှပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဇန်နဝါရီ ၁၂ ရက် နေ့လယ် ၁၂ နာရီကျော်ကနေ ညနေ ၅ နာရီခန့်အထိ စစ်ဆေးမှုတွေ လုပ်ဆောင်ခဲ့တာဖြစ်ပြီး စစ်ကောင်စီလက်အောက်ခံတပ်ဖွဲ့ဝင်တွေနဲ့ Non CDM ဝန်ထမ်းတွေ အရပ်သားအသွင်ယူကာ အရပ်ဝတ်နဲ့ ခရီးသွားလာမှုတွေရှိနေလို့အဓိက စစ်ဆေးခဲ့တာလို့ ဆိုပါတယ်။

“ဆိုင်ကယ်ရောကားပေါ်အထိ စစ်တယ်။ မသင်္ကာစရာတော့ မတွေ့ခဲ့ပါဘူး။ ပြည်သူတွေက စစ်ဆေးတာကို ကြည်ဖြူစွာ လက်ခံပေးကြတယ်” လို့ အထက်မင်းလှပကဖ တာဝန်ခံ ရန်ကြီးအောင်က ပြောပါတယ်။

ပုသိမ်-မုံရွာလမ်းမကြီးဘေးမှာ အချိန်၊ နေရာမရွေးတိုက်ပွဲတွေ ဖြစ်ပေါ်လာနိုင်တာကြောင့် လမ်းမကြီးတလျှောက်နဲ့ ကျေးရွာချင်းဆက်လမ်းတွေမှာ သွားလာတာတွေ မပြုလုပ်ကြဖို့ အထက်မင်းလှပကဖ က ဇန်နဝါရီ ၁၁ ရက်က သတင်းထုတ်ပြန်ခဲ့ပါတယ်။

အဲ့ဒီလိုထုတ်ပြန်ပြီးတဲ့နောက် ပုသိမ်-မုံရွာလမ်းပိုင်းရဲ့သွားလာမှုတွေကို အထက်မင်းလှ ပကဖ က စစ်ဆေးခဲ့တာဖြစ်ပြီး စစ်ဆေးမှုလုပ်ဆောင်တဲ့နေရာနဲ့ ၁ မိုင်ကျော်အကွာမှာ ရှမ်းတပ်ကြီးနယ်မြေရဲစခန်းတည်ရှိပြီး အဲ့ဒီမှာ ကပစနဲ့ တပ်မ ၈၈ လက်အောက် စစ်ကောင်စီတပ်၊ ရဲတပ်ဖွဲ့ပူးပေါင်းအင်အား ၄၀ ကျော်တပ်စွဲထားတယ်လို့ သိရပါတယ်။

လက်ရှိစစ်ရေးအခြေအနေတွေအရ ပုသိမ် – မုံရွာလမ်းမကြီးဘေး ထိစပ်နေတဲ့ ရှမ်းတပ် တိုက်နယ်အတွင်းက ကန်တုတ်၊ ဆောင့်ညှောင်၊ ကန်နီ၊ လက်ပံတံခါး၊ ကဒေါင်းဇောက် စတဲ့ ကျေးရွာတွေအပါအဝင် ရွာပေါင်း ၂၀ ကျော်မှာရှိတဲ့ ပြည်သူတွေ အသွားအလာဂရုစိုက်ကြဖို့ကိုလည်း အထက်မင်းလှ ပကဖက သတိပေးပါတယ်။

ဒါ့အပြင် ဇန်နဝါရီ ၈ ရက်ကစတင်ကာ စစ်ကောင်စီတပ်က အထက်ပါကျေးရွာတွေရဲ့ ကျေးရွာချင်းဆက်လမ်းဝင်ပေါက်တွေမှာ ကင်းပုန်းဝပ်တာ၊ ကျေးရွာတွေကို စစ်ကြောင်းထိုးတာနဲ့ ဒရုန်းဗုံးချတိုက်ခိုက်တာတွေလုပ်ဆောင်နေကာ ရှမ်းတပ်ကြီးတာဝါတိုင်အနီး အောင်မင်္ဂလာဘုန်းတော်ကြီးကျောင်းမှာလည်း တပ်စွဲနေထိုင်နေတာကြောင့် စစ်ကောင်စီတပ်စခန်းအနီးတွေမှာ နေထိုင်ကြတဲ့ ပြည်သူတွေ အမြန်ဆုံးပြောင်းရွေ့နေထိုင်ဖို့လည်း ထုတ်ပြန်ချက်က ဆိုပါတယ်။

ရခိုင်ပြည်နယ်၊ အမ်းမြို့နယ်ကို အာရက္ခတပ်တော် – AA နဲ့ တော်လှန်ရေးမဟာမိတ်အဖွဲ့တွေ သိမ်းပိုက်နိုင်ခဲ့တာကြောင့် နယ်မြေထိစပ်နေတဲ့ အထက်မင်းလှနယ်အတွင်းကို စစ်ကောင်စီဘက်က စစ်ကြောင်းထိုးတာ လမ်းပိုင်းပိတ်ဆို့တာတွေရှိလာတဲ့အတွက် လမ်းပိုင်းစစ်ဆေးမှုအတွင်း ပြည်သူတွေ စိတ်အားမငယ်ဖို့ကိုလည်း အားပေးစကားပြောဆိုခဲ့ကြတယ်လို့ သိရပါတယ်။

စာတည်း – ဟိန်းစံ

မကွေး၊ ဇွန် ၁၈၊ ၂၀၂၃။

မကွေးတိုင်း၊ ပခုက္ကူခရိုင်၊ ပေါက်မြို့နယ်၊ ရေပြာရဲစခန်းက ရဲတပ်ကြပ်တဦးကို ဇွန်လ ၁၇ ရက်မနေ့က ပစ်ခတ်ရှင်းလင်းခဲ့တယ်လို့ ပေါက်ဒေသကာကွယ်ရေးအဖွဲ့ဆီက သိရပါတယ်။

အသက် ၃၀ နှစ်အရွယ် ရဲတပ်ကြပ် ရန်နိုင်အောင် (ခေါ်) မဲလုံးကို ရဲစခန်းဂိတ်အနီးမှာ စကားပြောနေချိန် သေနတ်နဲ့ ၂ ချက် ပစ်ခတ်ရှင်းလင်းခဲ့တာလို့ သိရပါတယ်။

“မနေ့ညနေပိုင်းက ရှင်းခဲ့တာဗျ။ ခန္ဒာကိုယ်အရှေ့ပိုင်းကို နှစ်ချက်ပစ်လိုက်တယ်။ အဲဒီနေရာမှာပဲ လဲကျသွားတယ်။ ဘေးနားကလူတွေတော့ မထိခိုက်ပါဘူး” လို့ ပေါက်ဒေသကာကွယ်ရေး ရဲဘော်တဦးက ပြောပါတယ်။

ရဲတပ်ကြပ် ရန်နိုင်အောင်ဟာ ခရီးသွားပြည်သူတွေဆီကနေ ငွေတောင်းယူတာ၊ စစ်ကောင်စီ စစ်ကြောင်းနဲ့ အတူ ကျေးရွာတွေကို မီးရှို့ဖျက်ဆီးရာမှာလည်း လိုက်ပါတာတွေ ရှိတာကြောင့် ရှင်းလင်းခဲ့တာဖြစ်သလို အလောင်းကိုတော့ ညပိုင်းရောက်မှ ရဲစခန်းထဲကို သယ်သွားကြတယ်လို့ သူက ဆက်ပြောပါတယ်။

ပေါက်မြို့နယ်ကကျေးရွာတွေကို စစ်ကောင်စီတပ်ဖွဲ့ဝင်တွေနဲ့ ပျူတွေက မကြာခဏ စစ် ကြောင်းထိုးတာတွေ ရှိနေပြီး၊ မေ ၂၈ ရက်မှာတော့ ချောင်းနားရွာဟောင်း၊ ပြစ်ထဲရွာ၊ တဲတော်ယာရွာတောင်စုရွာတွေကို ၅ ရက်ကြာ မီးရှို့ဖျက်ဆီးကာ ရွာသားတွေကို သတ်ဖြတ်ခဲ့တာတွေလုပ်ခဲ့တယ်လို့ သိရပါတယ်။

စာတည်း – လင်း

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ မုံရွာခရိုင်၊ အရာတော်မြို့နယ်ထဲက ပျက်စီးနေတဲ့ကျေးလက်လမ်းပိုင်းတချို့ကို အရာတော်မြို့နယ် ပြည်သူ့ကာကွယ်ရေးအဖွဲ့ – နဂါးနီတပ်ခွဲ တပ်ဖွဲ့ဝင်တွေက ဒေသခံတွေနဲ့အတူ ကူညီပြုပြင်ပေးခဲ့တယ်လို့ အဲ့ဒီအဖွဲ့ဆီက သိရပါတယ်။

ဇွန်လ ၁၇ ရက် မနေ့ကမနက်ပိုင်းမှာ အရာတော်မြို့နဲ့ကျေးရွာ ၅ ရွာကို ဆက်သွယ်ထားတဲ့ လမ်းပိုင်းနေရာတွေမှာ မိုးရွာတာများပြီး ဒေသခံတွေသွားလာရတာ ခက်ခဲနေလို့ ရဲဘော် အင်အား ၂၀ ကျော်က သွားရောက်ပြုပြင်ပေးခဲ့တာလို့ သိရပါတယ်။

“လမ်းက ချိုင့်ခွက်တွေ မြောင်းတွေလိုဖြစ်နေတော့ သွားလာရတာခက်ခဲနေတယ်။ ယာဥ်အန္တရာယ် ဖြစ်မှာစိုးတာနဲ့ ကျေးလက်နေပြည်သူတွေ အဆင်ပြေဖို့ ကူညီလုပ်ကိုင်ရတာပါ”လို့ အရာတော်မြို့နယ် ပြည်သူ့ကာကွယ်ရေးအဖွဲ့ နဂါးနီတပ်ခွဲမှ သတင်းတာဝန်ခံက မြေလတ်အသံကို ပြောပါတယ်။

နဂါးနီတပ်ခွဲဟာ ပြည်သူကိုအခြေပြုထားတဲ့အဖွဲ့ဖြစ်သလို ပြည်သူကို စည်းရုံးရင်းနဲ့ တိုက်ပွဲဝင်မှ အောင်နိုင်မယ်လို့ ခံယူထားတဲ့အတွက် ပြည်သူတွေရဲ့အခက်အခဲကို ကူညီဆောင်ရွက်ပေးရတာ ဖြစ်တယ်လို့ သူကဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၁၉ ရက်နေ့ကလည်း နဂါးနီပြည်သူ့ကာကွယ်ရေးတပ်ဖွဲ့ အနေနဲ့ ရွှေဘိုမြို့နယ်က စစ်ရှောင်ပြည်သူတွေကို စားနပ်ရိက္ခာတွေ ကူညီထောက်ပံ့ပေးခဲ့တယ်လို့ သိရပါတယ်။

အဲ့ဒီအဖွဲ့ဟာ ပြည်သူအကျိုးပြုလုပ်ငန်းတွေလုပ်ကိုင်ရာမှာ လမ်းတံတားပြင်ရုံသာမက ရပ်ရွာလုံခြုံရေးနဲ့ စစ်ဘေးရှောင်တွေကို ကူညီပံပိုးတာတွေလည်း လုပ်ကိုင်နေပြီး၊ စစ်ကောင်စီကို တိုက်ခိုက်ဖို့အတွက် လက်နက်ကြီးတချို့ကိုပါ ထုတ်လုပ်တာတွေလုပ်နေတယ်လို့ သိရပါတယ်။

စာတည်း – လင်း

မြေလတ်အသံ၊ ဇွန် ၁၇၊ ၂၀၂၃။

နိုင်ငံတော်အတိုင်ပင်ခံပုဂ္ဂိုလ်၊ ဒေါ်အောင်ဆန်းစုကြည်ရဲ့ ၇၈ နှစ်ပြည့်မွေးနေ့ကို ပန်းသပိတ်ပြုလုပ်ပြီး ဂုဏ်ပြုမှာဖြစ်လို့ ပြည်သူလူထုတွေပါဝင်ကြဖို့ လူထုသပိတ် တက်ကြွလှုပ်ရှားသူတဦးဖြစ်တဲ့ ဒေါက်တာတေဇာဆန်း က ဆိုပါတယ်။

နေပြည်တော်အချုပ်ထောင်မှာ စစ်ကောင်စီရဲ့ မတရားဖမ်းဆီးတာကို ခံထားရတဲ့ ဒေါ်အောင်ဆန်းစုကြည်ရဲ့ ဇွန်လ ၁၉ ရက်နေ့မှာ ကျရောက်မယ့် ၇၈ နှစ်ပြည့်မွေးနေ့ကို ဂုဏ်ပြုတဲ့အနေနဲ့ ပန်းသပိတ်ပြုလုပ်ရတာလို့ လူထုသပိတ်တက်ကြွလှုပ်ရှားသူ ဒေါက်တာတေဇာဆန်းက မြေလတ်အသံကို ပြောပါတယ်။

အဲဒီနေ့မှာ ဒေါ်အောင်ဆန်းစုကြည်အပါအဝင် အဓမ္မဖမ်းဆီးခံထားရတဲ့ ရဟန်းရှင်လူကျောင်းသားပြည်သူ နိုင်ငံရေးအကျဥ်းသားပေါင်း ၁၀၀၀၀ ကျော်ရဲ့ ဂုဏ်ကျေးဇူးကိုလေးစား အသိအမှတ်ပြု တန်ဖိုးထားတဲ့အနေနဲ့ရော ခေတ်အဆက်ဆက် တော်လှန်ရေးမှာရှေ့တန်းက ပါဝင်ခဲ့ကြတဲ့ တော်လှန်အမျိုးသမီးထုနဲ့ ပြည်သူအပေါင်းရဲ့ ဂုဏ်ကျေးဇူးကိုအသိမှတ်ပြုတဲ့အနေနဲ့ တနိုင်ငံလုံး ပြည်လုံးကျွတ် ပန်းသပိတ်လှုပ်ရှားမှုကို ဆင်နွှဲကြဖို့ ဖြစ်တယ်လို့ သူက ဆိုပါတယ်။

“ပန်းသပိတ်က ဘာကိုရည်ရွယ်ရသလဲဆိုရင် စစ်အာဏာရူးတွေက ကျနော်တို့ပြည်သူတွေကို ကြောက်ရွံတုန်လှုပ် သွေးပျက်သွားစေချင်တယ်။ ဒါကြောင့် နည်းလမ်းပေါင်းစုံနဲ့ အကြမ်းဖက်ပြီး ပြည်သူတွေကို ဖမ်းဆီးနှိပ်စက်သတ်ဖြတ်၊ ရွာတွေကို မီးရှို့နေတယ်။ ဒါပေမယ့်ကျနော်တို့ ပြည်သူတွေရဲ့ တော်လှန်သွေးက ရဲရဲနီတယ်။ သွေးကြောင်မသွားဘူး။ ကျနော်တို့က ဖိလေကြွလေဖြစ်တယ်။ တော်လှန်နေတဲ့ ပန်းတွေရဲရဲနီပြီး ဖွေးဖွေးလှုပ်လို့ ‘ဗေဒါပျံအံကိုခဲ ပန်းပန်လျက်ပဲ’ ရှိတယ်ဆိုတဲ့ ပြည်သူတွေဖြစ်တယ်ဆိုတာ ပြချင်တာ” လို့ဒေါက်တာတေဇာဆန်းက ပြောပါတယ်။

ပန်းသပိတ်မှာလည်း ပြည်သူတွေအနေနဲ့ လှည်းနေလှေအောင်းမြင်းဇောင်းမကျန် ပန်းနဲ့ပတ်သက်တဲ့ ဘုရားပန်းလဲတာ၊ ပန်းပန်တာ၊ ပန်းခူးတာ စတဲ့ဘယ်လိုလှုပ်ရှားမှုကိုမဆို အချိန်၊ ပန်းအမျိုးအစားနဲ့အရောင်အသွေး၊ နည်လမ်းကန့်သတ်တာတွေမရှိဘဲ၊ ပြည်သူတွေဉာဏ်ရှိသလို လက်လှမ်းမီသလို တီထွင်ကြံဆပြီးတော့ မြေပြင်နဲ့အွန်လိုင်းပေါ်မှာ လုံခြုံရေးအသိနဲ့ သတိရှိရှိ ပါဝင်ပေးကြဖို့လည်း ဆက်ပြောပါတယ်။

စစ်အာဏာရှင်တော်လှန်ရေးမှာ ဒေါက်တာတေဇာဆန်းအနေနဲ့ ယခုလက်ရှိထောက်ပို့ကဏ္ဍမှာ ရဲဘော်တဦးအဖြစ်ပါဝင်နေသလို၊ လူထုသပိတ်တက်ကြွလှုပ်ရှားသူတဦး အဖြစ်လည်း ပါဝင်တော်လှန်နေသူတဦး ဖြစ်ပါတယ်။

စာတည်း – နွေဦးငြိမ်းချမ်း

စစ်ကိုင်း၊ ဇွန် ၁၅၊ ၂၀၂၃။

စစ်ကိုင်းတိုင်း၊ ကျွန်းလှမြို့နယ်မှာရှိတဲ့ ကျောက်အိုင်ရွာကို ပျူစောထီးတွေက ဝင်ရောက်ခဲ့ပြီး အိမ်တွေဖျက်ဆီး ပစ္စည်းတွေ ခိုးယူသွားတယ်လို့ ကျွန်းလှတက်ကြွလှုပ်ရှားသူများအဖွဲ့ထံက သိရပါတယ်။

ဇွန်လ ၁၃ ရက် မနက် ၆ နာရီဝန်းကျင်မှာ ကျောက်အိုင်ရွာထဲ ကိုပျူအင်အား ၁၀၀ ခန့်ကဆိုင်ကယ်အစီး ၄၀ ကျော်၊ ကားတစီးနဲ့ ဝင်ရောက်လာပြီး၊ အိမ်တွေဖျက်ဆီးကာ အသုံးအဆောင်ပစ္စည်းတွေကို မတရားခိုးယူသွားတာလို့ ကျွန်းလှတက်ကြွလှုပ်ရှားသူများအဖွဲ့ တာဝန်ရှိသူတဦးက ပြောပါတယ်။

“အိမ်တွေမီးရှို့ဆိုပြီးတော့ ပြောဝင်လာတယ်။ ရွာသားတွေ ထွက်ပြေး​ကြလို့ ​သေနတ်တွေနဲ့လိုက်ပစ်တယ်။ ရွာထဲမှာ လူမရှိတော့မှ သူတို့စိတ်ကြိုက် အိမ်ကြီးအိမ်ကောင်းကို ရွေးဝင်တယ်။ သူတိုကြိုက်တဲ့ပစ္စည်းဆိုရင် အကုန်ခိုးသယ်ကြတယ်” လို့ အထက်ပါ တာဝန်ရှိသူကပြောပါတယ်။

ကျောက်အိုင်ရွာမှာ အိမ်ခြေ ၃၀၀ ကျော်ရှိပြီး ယခုတကြိမ်မှာတော့ ပျူတွေက အိမ် ၂ လုံးကို ဖျက်ဆီးသလို အခြားအိမ် ၅ လုံးထဲရှိ ဆိုင်ကယ် ၄ စီး၊ ပြောင်းမျိုး ၃ အိတ်၊ စားဆီပုံးကြီး ၃ ပုံး၊ မိုးကာလိပ် ၃ လိပ် အပြင် အခြားပစ္စည်းတွေလည်း ယူသွားတယ်လို့ ကျွန်းလှဒေသခံက ပြောပါတယ်။

ဖျက်ဆီးပြီးနောက် အဲဒီ နေ့လည် ၁ နာရီလောက်မှာပဲ ပျူအဖွဲ့တွေက ပစ္စည်းတွေသယ်ယူကာ ကျွန်းလှမြို့ဘက်ပြန်သွားကြတယ်လို့ သိရပါတယ်။

“အဲ့ဒီရွာကို ဖေဖော်ဝါရီလ ၂၀၂၂ ခုနှစ်မှာ ပထမဆုံး ပျူတွေဝင်လာတုန်းက ဘာအပြစ်မှမရှိတဲ့ ရွာသား ၂ ဦးကို ရွာလယ်လမ်းမှာ ပစ်သတ်ခဲ့တယ်။ ဒုတိယနဲ့တတိယအခေါက်မှာ မဆိုးသေးဘူး။ အခု စတုတ္ထအကြိမ်မှာ ထင်ရာစိုင်းလုပ်ခဲ့ကြတယ်လို့ ” ကျွန်းလှဒေသခံ တဦးကမြေလတ်အသံကို ပြောပါတယ်။

ပျူတွေက ကျောက်အိုင်ရွာကို ယခင်ကတည်းက ပျူရွာအဖြစ်ဖွဲ့ခိုင်းသလို၊ ကျေးရွာစာသင်ကျောင်းတွေ ဖွင့်ခိုင်းပေမယ့် ရွာသားတွေက မလိုက်နာကြလို့ အနိုင်ကျင့်နေတာဖြစ်နိုင်တတယ်လို့ ဒေသခံတွေက ပြောဆိုကြပါတယ်။

စာတည်း – 007