ပေါက်၊ ဩဂုတ် ၂၅၊ ၂၀၂၅။

မကွေးတိုင်း၊ ပေါက်မြို့နယ်အရှေ့ပိုင်း၊ ပေခုနှစ်ပင်ရွာကို ဩဂုတ် ၂၅ ရက် ဒီမနက် ၉ နာရီကျော်မှာ စစ်ကော်မရှင်စီစစ်ကြောင်းက ဝင်ရောက်မီးရှို့ပြီး တည်ပင်ကန်ရွာက အမျိုးသား ၁ ဦးကို ဖမ်းဆီးသွားတယ်လို့ ပေါက်မြို့ခံတွေဆီက သိရပါတယ်။

ကပစ ၂၄ တပ်ကနေ ပြန်ထွက်လာတဲ့ အင်အား ၂၀၀ ဝန်းကျင်ပါစစ်ကောင်စီစစ်ကြောင်းက အိမ်ခြေ ၁၀၀ ကျော်၊ အိမ်ထောင်စု ၉၀ စု၊ လူဦးရေ ၁,၀၀၀ ကျော်နေထိုင်တဲ့ ပေခုနှစ်ပင်ရွာကို မီးရှို့ဖျက်ဆီးခဲ့တဲ့ အတွက် နေအိမ် ၆ လုံးကျော်ပျက်စီးခဲ့တာလို့ ဆိုပါတယ်။

“နေအိမ် ၆ လုံးကျော် မီးရှို့ခံရတာ၊ ပြည်သူ ၁ ဦးကောဖမ်းသွားတယ်၊ ယာကြီးပြင်ရွာအနီးတဝိုက်ကပါ၊ တည်ပင်ကန်ရွာက အသက် ၄၀ ကျော် အမျိုးသား အဖမ်းခံရတာပါ၊ ရိက္ခာယာဉ်တန်းစစ်ကြောင်းနဲ့ ဒီးဒုတ်ကွင်းရွာက ပျူစောထီးတွေနဲ့ ပေါင်းပြီးရှို့တာ၊ ဒေသခံပြည်သူတွေက အရင်ကတည်းက တိမ်းရှောင်နေရတာ”လို့ ပေါက်မြို့ခံ ကိုလရောင်က ပြောပါတယ်။

အဲ့ဒီရိက္ခာယာဉ်တန်း ၁၀၇ စီး၊ အင်အား ၂၀၀ ပါ စစ်ကြောင်းနဲ့ ဒီးဒုတ်ကွင်းရွာက ပြည်သူ့စစ်တွေဟာ လက်ရှိအချိန်ထိ ပေါက်မြို့နယ်၊ တည်ပင်ကန်ရွာမှာရှိနေတယ်လို့ သိရပါတယ်။

ဩဂုတ် ၂၂ ရက် နေ့လယ် ၁၂ နာရီကျော်ကလည်း မိတ္ထီလာဘက်ကလာတဲ့ ဂျက်ဖိုက်တာ ၁ စီးဟာ ဆယ်ဝကျေးရွာကို လေကြောင်းကနေ ဗုံးကြဲခဲ့တာကြောင့် ကလေးငယ် ၁ ဦးအပါအဝင် ၂ ဦးသေဆုံးပြီး ၆ ဦးဒဏ်ရာရခဲ့ပါသေးတယ်။

စာတည်း – လင်း

လက်နက်ကြီးတွေနဲ့ပစ်ခတ်လို့ မီးနေသည်တဦး သွေးလန့်သေဆုံး

ဒိန်းဂျား၊ ဟယ်သာ

ပုလဲ၊ ဩဂုတ် ၂၅၊ ၂၀၂၅။

စစ်ကိုင်းတိုင်း၊ ပုလဲမြို့နယ်၊ လက်ပုကန်ကျေးရွာကို စစ်ကော်မရှင်တပ်ကဝင်ရောက်ကာ ဒေသခံတွေရဲ့ ပစ္စည်းတွေသယ်ယူနေပြီး လက်နက်ကြီးတွေနဲ့လည်းရွာနဲ့အနီးတဝိုက်ကို ပစ်ခတ်နေတာကြောင့် ထိခိုက်၊ သေဆုံးမှုတွေလည်းရှိနေတယ်လို့ ဒေသခံတွေဆီက သိရပါတယ်။

ဩဂုတ် ၂၄ ရက် မနေ့ကမနက် ၁၀ နာရီလောက်မှာ လက်ပုကန်ကျေးရွာကိုဝင်ရောက်လာတဲ့ စစ်ကော်မရှင်တပ်က ၆၀ မမ လက်နက်ကြီးနဲ့ပစ်ခတ်ချိန် ကြောင်သန်းရွာကို ကျရောက်ပေါက်ကွဲတာကြောင့် ကလေးမွေးထားခါစ အသက် ၂၇ နှစ်အရွယ် ရွာခံအမျိုးသမီးသွေးလန့်သေဆုံးခဲ့တယ်လို့ ဆိုပါတယ်။

“သားဖွားထားတာက လပိုင်းဆိုတော့ သွေးနုသားနုဆိုတော့ စစ်ဘေးရှောင်ရလို့ စိတ္တဇ အပိုင်းတွေ လည်းပါမှာ၊ သွေးလန့်ပြီးတော့ ဆုံးသွားတာ၊ ကလေးက ၁ လပြည့်ဖို့ ၂ ရက်ပဲလိုတော့တာ” လို့ ကြောင်သန်းရွာ စစ်ဘေးရှောင်တဦးက ပြောပါတယ်။

ဒ့ါအပြင်လက်နက်ကြီးထိမှန်ပြီး ကြောင်သန်းရွာက နေအိမ် ၂ လုံးနဲ့ နွားတဲ ၁ ခုပျက်စီးပြီး နွား ၁ ကောင်လည်းသေဆုံးခဲ့တယ်လို့ ဆိုပါတယ်။

ကြောင်သန်းရွာဟာ အိမ်ခြေ ၆၅၀ နဲ့ လူဦးရေ ၂,၀၀၀ ကျော်ရှိပြီး ခုလိုလက်နက်ကြီးနဲ့ တိုက်ခိုက်ခံရတာကြောင့် ဒေသခံတွေလည်းတိမ်းရှောင်နေကြတယ်လို့ အထက်ပါစစ်ဘေးရှောင်တဦးက ပြောပါတယ်။

အဆိုပါစစ်ကြောင်းဟာ သြဂုတ် ၂၀ ရက်ကစတင်ကာ မင်းတိုင်ပင်ကျေးရွာက အိမ်ခြေ ၆၀ ရာခိုင်နှုန်းနဲ့ အိုင်မရွာကနေအိမ်တွေကိုလည်း မီးရှို့ဖျက်ဆီးခဲ့သေးတယ်လို့ သိရပါတယ်။

အဲ့ဒီနောက် သြဂုတ် ၂၄ ရက်မနက်ပိုင်းမှာ လက်ပုကန်ရွာကိုရောက်ရှိလာပြီး ဘုန်းကြီးကျောင်းနဲ့ စာသင်ကျောင်းမှာ ညအိပ်တပ်စွဲနေခဲ့ပြီးနောက် သြဂုတ် ၂၅ ရက် ဒီမနက်ပိုင်းမှာတော့ ရွာရှိ ဒေသခံနေအိမ်တွေက ပစ္စည်းတွေကို ဇီးဖြူကုန်းရွာဘက်ဆီသယ်ယူနေတာလို့ နောက်ထပ် ဒေသခံတဦးကပြောပါတယ်။

“မနေ့ညတုန်းက လက်ပုကန် ဘုန်းကြီးကျောင်းနဲ့ စာသင်ကြောင်းမှာအိပ်တယ်၊ လက်ပုကန်ရောက် အင်အားက ၂၀၀ ကျော်တယ်၊ အင်မထီးကနေလှည်းတွေ လူတွေအများကြီးလာသယ်တယ်လို့ပဲသိရတာ လှည်းတွေနဲ့သယ်နေတုန်းမှာပဲ ကျန်တဲ့တစ်ကြောင်းကကျ ကြောင်သန်းရွာကို သွားတယ် အခု ကြောင်သန်းရွာမှာပါပဲ “လို့ ဒေသခံတဦးကဆိုပါတယ်။

ဇွန် ၁၉ ရက်မှာ ကန့်ဒေါင့်ရွာရဲစခန်းကို တော်လှန်ရေးတပ်တွေစတင်သိမ်းပိုက်ခဲ့စဥ်ကတည်းက အင်မထီးရွာထဲမှာ စစ်ကော်မရှင်တပ်က စုစုပေါင်းအင်အား ၃၀၀ ခန့်တပ်စွဲထားခဲ့ပြီးနောက်မှာ ကန့်ဒေါင့်ရွာအနီးနားက မင်းတိုင်ပင်၊ မဲဇရပ်ရွာ၊ ဦးနှောက်၊ ချောင်းနား၊ နှောရိုးစတဲ့ ကျေးရွာတွေကို စစ်ကြောင်းတွေ ခွဲထိုးနေကြပြီး ပြည်သူတွေနေအိမ်ဆီက ပစ္စည်းတွေယူဆောင်နေခဲ့ကြတာလို့ သိရပါတယ်။

ဒ့ါအပြင် စစ်ကော်မရှင်စစ်ကြောင်းတွေကြောင့် မင်းတိုင်ပင်၊ လက်ပုကန်၊ နှောကန်၊ နှောရိုး၊ ကျောက်ဖျာကန်၊ မြေနီကုန်း၊ ငှက်ပျောတော၊ စပါးစေ့၊ မန်ကျည်းကုန်း၊ အိုးဘို၊ အိုင်းမ၊ သရက်ချောင်းနား၊ သပြေကုန်း၊ ညောင်ပင်စု၊ ကုန်းကိုင်း၊ ကုက္ကိုလ်ကုန်း စတဲ့ကျေးရွာတွေက ဒေသခံ ၈,၀၀၀ ကျော်နေရပ်စွန့်ခွာထွက်ပြေးနေရတယ်လို့လည်း သိရပါတယ်။

စာတည်း – လင်း

ညောင်ဦး၊ ဩဂုတ် ၂၃၊ ၂၀၂၅။

မန္တလေးတိုင်း၊ ညောင်ဦးမြို့နယ်မှာ ကျူရှင်ဆရာမ ၁ ဦးနဲ့ အသက် ၆၀ အရွယ် အမျိုးသား ၁ ဦး ပစ်ခတ်ခံရပြီး သေဆုံးခဲ့တယ်လို့ ဒေသခံတွေဆီက သိရပါတယ်။

သြဂုတ် ၂၂ ရက်ညနေ ၅ နာရီမှာ စဉ့်ကူတိုက်နယ်၊ ဈေးတန်းရပ်က ကျူရှင်ဆရာမ အသက် ၄၀ အရွယ်ရှိ ဒေါ်အိခိုင်၊ အမေဖြစ်သူနဲ့ မောင်ဖြစ်သူတို့ကို လက်နက်ကိုင်အဖွဲ့တခုက ဝင်ရောက်ပစ်ခတ်ခဲ့ရာ ဒေါ်အိခိုင်ကတော့ ပွဲချင်းပြီးသေဆုံးခဲ့တယ်လို့ ဆိုပါတယ်။

“ကျောင်းဆရာမတော့ မဟုတ်ဘူး၊ ကျူရှင်ဆရာမပါ၊ ဘွဲ့ရပြီးသားပါ၊ ကလေးတွေကိုကျူရှင်သင်နေတာ၊ အစိုးရခန့် ဆရာမတော့မဟုတ်ဘူး၊ သူရယ် သူ့အမေနဲ့ မောင် ၃ ဦးကို ပစ်သွားတာ၊ သူ့ အမေကတော့ လက်မောင်းပိတ်မှန်တယ်၊ သူ့မောင်ကတော့ လက်ကောခါးကော မှန်သွားတယ်၊ မနေ့ကတော့မကွေးအထူးဆေးရုံပို့လိုက်ကြတယ်၊ သူ့မောင်ကတော့ အခြေအနေမကောင်းဘူး ပြောတာပဲ၊” လို့ စဉ့်ကူရွာခံတဦးက ပြောပါတယ်။

ဒေါ်အိခိုင်တို့အိမ်ဟာ ကွမ်းယာဆိုင်နဲ့ စတိုးဆိုင်ဖွင့်လှစ်ထားတာဖြစ်ပြီး သူတို့တွေဟာ အရင်ကတော့ ကြံ့ခိုင်ရေးပါတီဝင်တွေဖြစ်ဖူးပေမယ့် အခုတော့မဟုတ်တော့ဘူးလို့ အထက်ပါဒေသခံက ပြောပါတယ်။

အလောင်းကိုတော့ ဒီကနေ့ ညနေမှာသင်္ဂြိုဟ်ခဲ့ပြီး နေအိမ်မှာလည်း စစ်ကော်မရှင်တပ်တွေက စစ်ဆေးမှုတွေလုပ်နေတယ်လို့ သိရပါတယ်။

အလားတူ မနေ့ကညနေပိုင်းမှာလည်း စဉ့်ကူတိုက်နယ်၊ မြို့မတောင်ပိုင်းက မှတ်ပုံတင်တွေလိုက်လုပ်ပေးသူ အသက် ၆၀ အရွယ် ဦးမောင်ဝင်းဆိုသူကိုလည်း လက်နက်ကိုင်အဖွဲ့တွေက ပစ်ခတ်ရာ သေဆုံးခဲ့သေးတယ် လို့ ဆိုပါတယ်။

“သူကတော့ ဘယ်သူကခေါ်ခေါ် ၅ ထောင်ပေး ၇ ထောင်ပေးနဲ့ မှတ်ပုံတင်လုပ်ပေးတာ၊ သူက မှတ်ပုံတင်အဖွဲ့တွေနဲ့ သိတာ၊ ဦးဝင်းမောင်ကိုလည်း တချိန်ထဲသတ်သွားတာ၊ စိန်တရာဇာတ်ရဲ့ တောင်ဘက်နားမှာ နေတာ၊ ၂ ဖွဲ့ခွဲသတ်သွားတာ၊” လို့ အထက်ပါဒေသခံကပြောပါတယ်။

ခုလိုပစ်သတ်ခဲ့ကြတဲ့သူတွေဟာ ဒေသကာကွယ်ရေးတပ်တွေလို့သိရပြီး အင်အား ၅၀ လောက်နဲ့ ၂ ဖွဲ့ခွဲပြီး ပစ်ခတ်သွားကြတာလို့ သူကဆက်ပြောပါတယ်။

ဒီပစ်ခတ်မှုနဲ့ပတ်သက်ပြီး ဘယ်အဖွဲ့အစည်းတွေ လုပ်ဆောင်တယ်ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဇူလိုင် ၃၁ ရက်ကလည်း ညောင်ဦးမြို့နယ်၊ ငါးသရောက်မြို့၊ ဆည်ရွာမှာ မူလတန်းပြဆရာမ ၁ ဦးကို တော်လှန်ရေးတပ်တွေက ဝင်ရောက်ပစ်ခတ်ခဲ့တာကြောင့် သေဆုံးခဲ့တယ်လို့ သိရပါတယ်။

စာတည်း – လင်း

ချောက်၊ ဩဂုတ် ၂၃၊ ၂၀၂၅။

မကွေးတိုင်း၊ ချောက်မြို့ပေါ်နဲ့ မြို့အနီးကျေးရွာတွေမှာ သြဂုတ်လအတွင်း စစ်ကော်မရှင်တပ်က ပေါ်တာဆွဲဖမ်းဆီးမှုတွေ ဆက်တိုက်လုပ်နေပြီး ဖမ်းမိသူတွေကိုလည်း သိန်းဆယ်နဲ့ချီတောင်းကာ ပြန်ရွေးခိုင်းနေတယ်လို့ ချောက်မြို့ခံတွေဆီက သိရပါတယ်။

ချောက်မြို့ပေါ် နဲ့ အုံမြှားကြီးရွာ၊ ကျောက်တဲရွာတွေအပါ မြို့အနီးရှိကျေးရွာတွေက အသက် ၄၀ ဝန်းကျင် အမျိုးသားတွေ ဖမ်းဆီးခံခဲ့ရပြီး ဩဂုတ် ၁ ရက်ကနေ ၂၃ ရက်အတွင်း ဖမ်းခံရသူဦးရေ စုစုပေါင်း ၆၀ ဦးလောက်ရှိနိုင်တယ်လို့ ဆိုပါတယ်။

“ချောက်မြို့ပေါ်ကအပြင် ရွာဘက်တွေကလည်း ပါသွားတာ၊ ကျမတို့အိမ်နားကကို ၂ ဦးပါသွားတယ်၊ အဓိကတော့ ပိုက်ဆံပေးရင်လွှတ်တယ်၊ တခါတော့ လွှတ်မှာပဲ၊ လူတွေလည်း တခါပဲပေးနိုင်မှာပဲ၊ သိန်း ၃၀ တောင်းတာလည်းရှိတယ်၊ သိန်း ၆၀၊ သိန်း ၈၀၊ သိန်း ၅၀ တောင်းတာလည်းရှိတယ်၊ မပေးနိုင် ပါပေါ့၊ ဒါပဲရှိတော့တယ်” လို့ ချောက်မြို့ခံအမျိုးသမီးတဦးက ပြောပါတယ်။

မြို့ပေါ်မှာဖမ်းမိသူတွေကို ငွေကျပ်သိန်း ၂၀ ကနေ ၈၀ အတွင်းတောင်းကာ ပြန်ရွေးခိုင်းပြီး ကျေးရွာဘက်တွေက ဖမ်းဆီးခံရသူတွေကိုတော့ ငွေကျပ်သိန်း ၁၀၀ ကျော်က စတင်တောင်းနေတာလို့လည်း သူကဆက်ပြောပါတယ်။

“တပ်စွဲနေတာတော့ မရှိဘူး၊ ပတ်ပြီးဖမ်းတာ၊ နောက်ဆုံးလူပို့ခါနီးမှာ ဆွဲတာက ကျောက်တဲရွာဘက်မှာ တော်တော်ဆွဲသွားတယ်၊ အုံမြှားကြီးရွာဘက်ကလည်း ပါသွားတယ်၊ ပြန်လိုချင်လို့ တောင်းရင်းလည်း ရွာတွေဘက်ကို (ပိုက်ဆံ)တော်တော်များများတောင်းတယ်၊” လို့ ဆိုပါတယ်။

ဖမ်းဆီးထားတဲ့သူတွေကို ချောက်မြို့ စစ်ကွင်းရပ်ကွက် ခလရ ၁၃ မှာအရင်ထားရှိပြီးနောက် ရှမ်းပြည်နယ်၊ ကျိုင်းတောင်း (အမှတ် ၁၃ တပ်မတော်တန်းမြင့်လေ့ကျင့်ရေးကျောင်း) သင်တန်းကျောင်းကိုပို့ပြီး စစ်သင်တန်းတက်ခိုင်းတယ်လို့သိရကြောင်း သူကဆက်ပြောပါတယ်။

ခုလိုပေါ်တာဆွဲဖမ်းဆီးမှုတွေရှိနေတာကြောင့် ည ၈ နာရီထိုးရင် ဒေသခံတွေ အသွားအလာနည်းသွားကြတယ်လို့ ဆိုပါတယ်။

ပြီးခဲ့တဲ့ ဇူလိုင်လပိုင်းမှာလည်း ချောက်မြို့နဲ့ အနီးတဝိုက်ကျေးရွာတွေက ဒေသခံတွေကို စစ်ကော်မရှင်တပ်က အဓမ္မဖမ်းဆီးပြီး ရှမ်းပြည်တောင်ပိုင်း သင်တန်းကျောင်းကို စစ်သင်တန်းလုပ်ဖို့ပို့ဆောင်ခဲ့ကာ တချို့ကိုလည်း ရှေ့တန်းကိုပို့ခံခဲ့ရတယ်လို့ ချောက်မြို့ခံ အမျိုးသမီးတဦးဆီက သိရပါတယ်။

စာတည်း – လင်း

ကျော်ကြီး ၊ ဒိန်းဂျား

ပေါက်၊ ဩဂုတ် ၂၃၊ ၂၀၂၅။

မကွေးတိုင်း၊ ပေါက်မြို့နယ်၊ ဆယ်ဝကျေးရွာမှာ စစ်ကော်မရှင်တပ်က လေကြောင်းကနေ ဗုံးကြဲခဲ့တာ ကြောင့် ကလေးငယ် ၁ ဦးအပါအဝင် ၂ ဦးသေဆုံးပြီး ၆ ဦးဒဏ်ရာရတယ်လို့ ရွာခံတွေဆီက သိရပါတယ်။

ဩဂုတ် ၂၂ ရက်နေ့လယ် ၁၂ နာရီကျော်မှာ မိတ္ထီလာဘက်ကလာတဲ့ ဂျက်ဖိုက်တာ ၁ စီးဟာ ဆယ်ဝကျေးရွာထဲကို ပထမအကြိမ် ဗုံးသီး ၃ လုံးကြဲချပြီး မိနစ်ပိုင်းအကြာမှာ နောက်ထပ် ၁ လုံးကြဲချခဲ့တယ်လို့ ဆိုပါတယ်။

“ဗုံးက ရွာထိပ်နဲ့ ရွာလယ်ဝန်းကျင်ကျတာ။ ရွာက ဟိုတလောကလည်း ယာဥ်တန်းစစ်ကြောင်းက မီးရှို့ ခံလိုက်ရသေးတာကို။ အဲ့တော့ အရပ်သားပြည်သူတွေက သူတို့အိမ်လေးတွေကို ပြန်ပြီးရှင်းလင်းရေးလုပ်နေတာ။ ရှင်းလင်းရေးလုပ်နေချိန်မှာပဲ ဂျက်ဖိုက်တာနဲ့လာလုပ်တာ။” လို့ ဆယ်ဝရွာခံတဦးက ပြောပါတယ်။

လေကြောင်းကနေ ဗုံးကြဲခံရတာကြောာင့် အသက် ၃၈ နှစ်အရွယ် ကိုမင်းအောင်ဆိုသူနေရာတင် သေဆုံးခဲ့ပြီး အသက် ၈ နှစ်အရွယ် မဖြိုးရတီငြိမ်းကတော့ ဆေးခန်းပို့ဆောင်ချိန်မှာ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၅၅ နှစ်အရွယ် ဒေါ်ဝင်း၊ ၄၅ နှစ်အရွယ် ကိုမျိုးဦး၊ ရန်ကုန်က အလည်လာသူ အသက် ၅၀ အရွယ် အမျိုးသမီး ၁ ဦး၊ ၅၀ နှစ်အရွယ် ဒေါ်ဌေးဌေးဝင်း၊ ဦးသန်းဇော်၊ အသက် ၂၅ နှစ်အရွယ် မအေးငြိမ်းတို့ ထိခိုက်ဒဏ်ရာရပြီး နွား ၂ ကောင်သေဆုံးကာ နေအိမ် ၇ လုံးပျက်စီးခဲ့ပါတယ်။

“တိုက်ပွဲဖြစ်ပွားခြင်းတော့ မရှိဘူး၊ သက်သက်မဲ့ အကြောင်းမဲ့ လာရောက်ကြဲချတာ၊ သူတို့ ဘာသတင်းရလဲ လမသိဘူး၊ အဲ့ဒီမှာပြည်သူတွေပဲရှိတာ၊ ၂ ဦးကတော့ ပွဲချင်းပြီးသေတယ်။” လို့ ပေါက်မြို့ခံ ကိုလရောင်က ပြောပါတယ်။

ဆယ်ဝရွာဟာ အိမ်ခြေ ၁၀၀ နဲ့ လူဦးရေ ၃၀၀ ဝန်းကျင်ရှိပြီး ခုလိုလေကြောင်းကနေတိုက်ခိုက်ခံရတာ ကြောင့် ဒေသခံတွေလည်းတိမ်းရှောင်နေကြတယ်လို့ သိရပါတယ်။

ပြီးခဲ့တဲ့ ဩဂုတ် ၂၁ ရက်ကလည်း မကွေးတိုင်း၊ ပေါက်မြို့နယ် အရှေ့ခြမ်းကို တံတားဦးလေတပ်ကနေ Y 12 နဲ့ ဗုံးကြဲတိုက်ခိုက်ခဲ့ပါသေးတယ်။

စာတည်း – လင်း

ဝက်လက်၊ ဩဂုတ် ၁၈၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ နဘဲပင်လှရွာဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဘုန်းကြီးကျောင်းနဲ့ ဓမ္မာရုံပျက်စီးပြီး ထိခိုက်ဒဏ်ရာရာသူတွေ ရှိခဲ့တယ်လို့ ရွှေဘိုခရိုင်အမှတ် ၁၈ တပ်ရင်း တပ်ခွဲ ၄ Bo Tiger ဆီက သိရပါတယ်။

ဩဂုတ် ၁၈ ရက် မနက် ၁၀ နာရီလောက်မှာ ဂျက်ဖိုက်တာနဲ့ ပေါင် ၃၀၀ ဗုံး ၂ လုံးကြဲချတာကြောင့် ဘုန်းကြီးကျောင်းနဲ့ ဓမ္မာရုံပျက်စီးခဲ့ပြီး သက်တော် ၇၀ အရွယ်သံဃာ ၁ ပါး နဲ့ အမျိုးသား ၁ ဦး၊ ၁၀ နှစ်အရွယ် ကိုရင် ၁ ပါး ထိခိုက်ဒဏ်ရာရခဲ့တယ်လို့ ဆိုပါတယ်။

“နဘဲပင်လှရွာ ဘုန်းကြီးကျောင်းထဲကို တပ်ရင်းတပ်ဖွဲ့တွေ ရှိတယ်ထင်ပြီး ကြဲချသွားတာ၊ အရင်တုန်းက တပ်ရင်းတပ်ဖွဲ့တွေနေဖူးထိုင်ဖူးတဲ့ နေရာတွေဆိုတော့ သတင်းပေးတဲ့လူက အတိအကျ ပေးသွားတာ၊ တပ်ရင်းတပ်ဖွဲ့တွေက မရှိတာကကြာပါပြီ၊ ၂ ကြိမ်ကြဲသွားတာ၊ ပြီးတော့ စက်လက်တွေ နဲ့လည်း ကုတ်(ပစ်)သွားတယ်၊” လို့ Bo Tiger အဖွဲ့ခေါင်းဆောင် ဗိုလ်ကျားကြီးက ပြောပါတယ်။

ဒီပစ်ခတ်မှုကြောင့် ဘုရားကျောင်းဆောင်ကြီးထဲက အခန်းတွေ၊ ဘုန်းကြီးကျောင်းနဲ့ ဓမ္မာရုံတွေပျက်စီးခဲ့ပြီး အခု ၁ ကြိမ်နဲ့ဆိုရင် ဝက်လက်မြို့နယ်ထဲကို ဗုံးကြဲတာဟာ သြဂုတ်လအတွင်း ၆ ကြိမ်လောက်ရှိတာကြောင့် ဒေသခံတွေတမ်းရှောင်နေရတာတော့ရှိတယ်လို့ သူကဆက်ပြောပါတယ်။

နဘဲပင်လှရွာဟာ အိမ်ခြေ ၂၀၀ နဲ့ လူဦးရေ ၃၀၀ ဝန်းကျင်ရှိပြီး ခုလိုလေကြောင်းကနေတိုက်ခိုက်ခံရတာကြောင့် ဒေသခံတွေလည်းကြောက်လန့်နေကြတယ်လို့ သိရပါတယ်။

ပြီးခဲ့တဲ့ ဩဂုတ် ၁၃ ရက်ကလည်း စစ်ကိုင်းတိုင်း၊ ဝက်လက်မြို့ ရွှေကျင်ကျေးရွာအရှေ့ဘက်ရှိ ရွှေညောင်တော်ကုန်းပေါ်က ဘုန်းကြီးကျောင်းကိုလည်း စစ်ကောင်စီက ဗုံးကြဲတိုက်ခိုက်ခဲ့ပါသေးတယ်။

စာတည်း – လင်း