အုပ်ချုပ်ရေးမှူး

ပေါင်းတည်၊ ဧပြီ ၂၁၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့နယ်၊ ဇီးပင်လှရွာ အုပ်ချုပ်ရေးမှူးကို ဧပြီလ ၂၀ ရက် မနေ့ညနေက သေနတ်နဲ့ ပစ်သတ်ခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ – PPDFရဲ့တာဝန်ရှိသူက ပြောပါတယ်။

အသက် ၅၈ နှစ်အရွယ် အုပ်ချုပ်ရေးမှူး ကိုဌေးအောင်ဟာ ညနေ ၄ နာရီခွဲလောက်မှာ ပေါင်းတည်မြို့ဘက်ကနေ မှတ်တိုင်ရွာဘက်ကို ဆိုင်ကယ်နဲ့တဦးတည်းအပြန် ဘုရားငါးဆူရွာနဲ့မြို့ကြီးရွာအကြား မြေနီလမ်းမှာ သေနတ်နဲ့ ပစ်သတ်ခဲ့တာလို့ ဆိုပါတယ်။

“ကျနော်တို့ရဲဘော်တွေ ပစ်ခတ်တာကို သိသွားပုံရတယ်။ ဆိုင်ကယ်ကို လှဲပြီးမြောင်းထဲဆင်းပြေးတာကို ၅ ချက် ပစ်ခတ်ခဲ့တာပါ။ ရေအိုင်ထဲမှာ ပွဲချင်းပြီးပဲ” လို့ PPDFရဲ့တာဝန်ရှိသူက ပြောပါတယ်။

စစ်ကောင်စီရဲ့ဝါဒဖြန့်တယ်လီဂရမ်မှာတော့ ကိုဌေးအောင်ရဲ့ခန္ဓာကိုယ်မှာ ပစ္စတိုသေနတ်ဒဏ်ရာ ၄ ချက် ရရှိခဲ့တယ်လို့ ဆိုပါတယ်။

အဲဒီတိုက်ခိုက်မှု့ကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ ပြည်ခရိုင်တပ်ရင်း ၃၆၀၁ မြို့ပြပြောက်ကျားတပ်ခွဲ ၃ နဲ့ တပ်ခွဲ ၄ တို့က လုပ်ဆောင်ခဲ့တာလို့ သိရပါတယ်။

အခုသေဆုံးတဲ့ အုပ်ချုပ်ရေးမှူးဟာ ပြီးခဲ့နှစ် အောက်တိုဘာလ ၁၈ ရက်ညက ပစ်သတ်ခံရတဲ့ ဇီးပင်လှကျေးရွာ အုပ်ချုပ်ရေးမှူး ကိုအောင်ထွန်းနိုင်ရဲ့နေရာမှာ အစားထိုးလုပ်ကိုင်တဲ့ စစ်ကောင်စီခန့် အုပ်ချုပ်ရေးမှူး ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ဧပြီလ ၁၅ ရက် မနက် ၁၀ နာရီလောက်ကလည်း ပေါင်းတည်မြို့နယ်၊ အဂ္ဂရာပြည့်အုပ်စု၊ အုပ်ချုပ်ရေးမှူး ကိုထွန်းထွန်းဦးကို သခွတ်စောက်ရွာက သူရဲ့နေအိမ်အတွင်းမှာ ပေါင်းတည်ပြည်သူ့ကာကွယ်ရေးတပ်ဖွဲ့က ပစ်ခတ်ရှင်းလင်းခဲ့ပါသေးတယ်။

ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့၊ ပြည်ခရိုင်တပ်ရင်း ၃၆၀၁ တပ်ခွဲ ၄၊ တပ်ခွဲ ၅ နဲ့ ၃၆၀၂ တပ်ခွဲ ၄ ပူးပေါင်းအဖွဲ့ဟာလည်း ဧပြီလ ၂၀ ရက် မနေ့ကပဲ ပဲခူးရိုးမပေါ်ကို စစ်သားအင်အား ၂၇ ဦးလောက်နဲ့ စစ်ကြောင်းထိုးလာတဲ့ စစ်ကောင်စီတပ်ကို ပေါင်းတည်မြို့နယ်၊ ကိုင်းကွင်းရွာအနီးကနေ မိုင်း ၂ လုံးဆွဲကာ တိုက်ခိုက်ခဲ့လို့ စစ်သား ၃ ဦးလောက် ဒဏ်ရာရခဲ့ပါသေးတယ်။

စာတည်း – လင်း

စစ်ကိုင်း၊ ဧပြီ ၂၀၊ ၂၀၂၃။

စစ်ကိုင်းတိုင်း၊ စစ်ကိုင်းမြို့၊ စိန်ကုန်းရပ်ကွက် စစ်ကောင်စီခန့် အုပ်ချုပ်ရေးမှူး ဧပြီလ ၂၀ ရက် ဒီမနက် ၁၀ နာရီခန့်မှာ သေနတ်နဲ့ပစ်သတ်ခံရလို့ သေဆုံးသွားတယ်လို့ သိရပါတယ်။

သေဆုံးသွားသူမှာ အသက် ၄၀ နှစ်အရွယ် စစ်ကောင်စီခန့် အုပ်ချုပ်ရေးမှူး ဦးကျော်စိုး ဆိုသူဖြစ်ပြီး မီးရထားရပ်၊ နှင်းရွှေရည် လက်ဖက်ရည်ဆိုင်မှာ ထိုင်နေချိန် အမည်မသိ သေနတ်သမားတွေက ပစ်ခတ်သွားတာလို့ ဒေသခံတဦးက မြေလတ်အသံကို ပြောပါတယ်။

“သူက အဖော်တွေနဲ့ ဆိုင်ရဲ့ဝင်ပေါက်နားလောက်က ခုံမှာထိုင်ပြီး လက်ဖက်ရည်သောက်နေချိန် လာဝင်ပစ်သွားတာလို့တော့ သိရတယ်။ သူက ခု စကစအာဏာသိမ်းမှ အုပ်ချုပ်ရေးမှူးဖြစ်လာသူလို့တော့ သိရတယ်။ စကစခန့် အုပ်ကြီးဆိုတော့ စကစ ခိုင်းတာတွေတော့ လုပ်ပေးရမှာပေါ့” လို့ ပြောပါတယ်။

သေနတ်နဲ့ ပစ်ခံရလို့ အုပ်ချုပ်ရေးမှူး ဦးကျော်စိုးမှာ နှာခေါင်းနဲ့လည်ပင်းတွေမှာ သေနတ်ဒဏ်ရာတွေရ ပြီးနေရာမှာပဲ သေဆုံးသွားတယ်လို့ ဆိုပါတယ်။

အုပ်ချုပ်ရေးမှူး ပစ်သတ်ခံရပြီးနောက် စစ်အုပ်စုနဲ့ ရဲအဖွဲ့တွေက လာရောက်စစ်ဆေးစုံစမ်းမေးမြန်းခဲ့ပြီးနောက် အလောင်းကို စစ်ကိုင်းဆေးရုံကို ယူသွားတယ်လို့ သိရပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေး အင်အားစုတွေဘက်က တစုံတရာ ထုတ်ပြန်လာတာမျိုး မရှိသေးပါဘူး။

၂၀၂၂ စက်တင်ဘာလ ၁ ရက်နေ့ မနက်ပိုင်းက စစ်ကိုင်းမြို့၊ စီတီးရပ်ကွက် အုပ်ချုပ်ရေးမှူး ဦးကျော်နိုင် ဟာ စစ်ကိုင်း ကောင်းမှုတော်ဘုရားကြီး အရှေ့ဘက်လမ်းပေါ်မှာ ပစ်သတ်ခံရသေးတယ်လို့ သိရပါတယ်။

စာတည်း – ရင်ငြိမ်း

ပေါက်ခေါင်း၊ ဧပြီ ၁၉၊ ၂၀၂၃။

ပဲခူးတိုင်း၊ ပြည်ခရိုင်၊ ပေါက်ခေါင်းမြို့နယ်၊ သဖန်းကိုင်းကျေးရွာအုပ်စု အုပ်ချုပ်ရေးမှူးကိုအေးနိုင်ကို ဧပြီလ ၁၉ ရက် နေ့လယ်က သေနတ်နဲ့ပစ်ခတ်ရှင်းလင်းခဲ့တယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ – PPDFတပ်ဖွဲ့ဝင်တဦးက ပြောပါတယ်။

အဲဒီအုပ်ချုပ်ရေးမှုးကို ပေါက်ခေါင်းမြို့နယ်၊ သဖန်းကိုင်းကျေးရွာနဲ့ကြို့ပင်ဝိုင်းကျေးရွာကြားလမ်းပေါ်မှာ ဒီနေ့ နေ့လယ် ၁ နာရီခွဲလောက်က ပစ်သတ်ခဲ့တာဖြစ်ပါတယ်။

“သူကပေါင်းတလည်ကနေ ဆိုင်ကယ်နဲ့တယောက်တည်းပြန်လာတာကို ပစ်ခတ်ခဲ့တာပါ။ ရင်ဘက်ကို နှစ်ချက်မှန်ပါတယ်။ နေရာတင်ပွဲချင်းပြီး” လို့ PPDFတပ်ဖွဲ့ဝင်တဦးက ပြောပါတယ်။

စစ်ကောင်စီကခန့်အပ်ထားတဲ့ အုပ်ချုပ်ရေးမှူး ကိုအေးနိုင်ဟာ နေအိမ်မှာအရက်ဆိုင်ဖွင့်ကာ စစ်သားနဲ့ ရဲတွေကို အရက်တိုက်ကျွေးမွေးနေသူဖြစ်ပြီး သမချေးငွေ၊ စိုက်ပျိုးရေးချေးငွေတွေကို ပြည်သူတွေဆီကနေ အဓမ္မတောင်းခံနေသူဖြစ်သလို လောင်းကစားဒိုင်တွေဆီက လိုင်းကြေးငွေကို ကိုယ်တိုင်ကောက်ခံပြီး စစ်ကောင်စီထံ ပေးနေသူလည်းဖြစ်တယ်လို့လည်း ထုတ်ပြန်ချက်က ဆိုပါတယ်။

ဒါ့အပြင်ကျေးရွာအုပ်စုအတွင်းရှိ လူငယ်တွေကို စစ်တပ်ထဲဝင်ရန် စည်းရုံးနေသူလည်းဖြစ်တယ်လို့ဆိုပါ တယ်။

အဲဒီတိုက်ခိုက်မှုကို ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ PPDF ပြည်ခရိုင် တပ်ရင်း ၃၆၀၁တပ်ခွဲ ၅ (နွေဦး)အဖွဲ့က လုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ဧပြီလ ၁၃ ရက် ညကလည်းနွေဦးအဖွဲ့ဟာ မာရှယ်လောထုတ်ပြန်ထားတဲ့ သာယာဝတီခရိုင်၊ နတ်တလင်းမြို့က ပွဲသာကျေးရွာအုပ်ချုပ်ရေးမှူးကိုတင်ထွန်းကို အလှူပွဲကအပြန် သေနတ်နဲ့ ပစ်သတ်ရှင်းလင်းခဲ့ပါသေးတယ်။

စာတည်း – လင်းဇေ

ရွှေဘို၊ ဧပြီ ၁၄၊ ၂၀၂၃။

စစ်ကိုင်းတိုင်းဒေသကြီး၊ ရွှေဘိုမြို့၊ အမှတ် ၇ ရပ်ကွက်၊ ချီပါစုရပ်မှာ စစ်ကောင်စီခန့် အုပ်ချုပ်ရေးမှူး သေနတ်နဲ့ ၃ ချက်ပစ်ခတ်ခံရပြီး သေဆုံးသွားတယ်လို့ မြို့ခံတွေဆီက သိရပါတယ်။

ဧပြီလ ၁၃ ရက်နေ့မနက် ၉ နာရီခန့်မှာ ချီပါစုရပ်၊ နေရဗ္ဗန် ဘုရားဝင်းအတွင်းမှာ အမှတ် ၇ ရပ်ကွက် အုပ်ချုပ်ရေးမှူး ဦးသန်းဇော် (ခ) ဦးဆွေ ၆၃ နှစ် ရှိနေချိန်မှာ သေနတ်သမားတွေက ဝင်ပစ်သွားတာလို့ ဒေသခံတဦးက ပြောပါတယ်။

“သိရသလောက်က သူက ဘုရားဝင်းအတွင်း ဇောင်းတန်းမှာထိုင်ပြီး အခြားသူတွေနဲ့စကားပြောနေချိန် လာဝင်ပစ်သွားတယ်လောက်ပဲ သိရတယ်။ ကျည်ထိတာတော့ ၃ ချက်။ နေရာမှာပဲ သေသွားတယ်” လို့ ပြောပါတယ်။

ပစ်ခတ်ခံရလို့ ဦးသန်းဇော် (ခ) ဦးဆွေမှာ နားထင်၊ ပုခုံးနဲ့ဝမ်းဗိုက်တွေမှာ ဒဏ်ရာတွေရရှိပြီးနေရာမှာပဲ သေဆုံးသွားတယ်လို့ ဆိုပါတယ်။

အခင်းဖြစ်ပွားပြီးနောက် စစ်ကောင်စီတပ်ဖွဲ့တွေ ရောက်လာကာ စစ်ဆေးမှုတွေ ပြုလုပ်ပြီး အလောင်းကိုတော့ ဒေသလူမှုကူညီရေးအသင်းတွေက ကောက်ယူပြီး ရွှေဘိုဆေးရုံကို ပို့ပေးလိုက်ရတယ်လို့ သိရပါတယ်။

အဲဒီပစ်ခတ်မှုကို Buffalo soldiers Freedom force (SBDF2) က လုပ်ဆောင်ခဲ့တာဖြစ်ပြီး တော်လှန်ရေးအင်အားစုတွေကို စိန်ခေါ်သလို စစ်ကောင်စီနဲ့ ပူးပေါင်းလုပ်ဆောင်နေတာကြောင့် ရှင်းလင်းခဲ့တာဖြစ်တယ်လို့ ပြောဆိုထားပြီး ပစ်ခတ်ရှင်းလင်းခဲ့ချိန်မှာအုပ်ချုပ်ရေးမှူးဆီကနေ လက်ပစ်ဗုံးတလုံး သိမ်းဆည်းရမိခဲ့တယ်လို့ ဆိုပါတယ်။

ဧပြီလ ၂ ရက်နေ့က ရွှေဘိုတက္ကသိုလ်မှာ အထိုင်ချတပ်စွဲထားတဲ့ စစ်ကောင်စီတပ်ကို ကာကွယ်ရေးအဖွဲ့တွေက ဝင်ရောက်ပစ်ခတ်ချိန် နှစ်ဖက်သေဆုံးမှုတွေ ရှိခဲ့သေးတယ်လို့ သိရပါတယ်။

စာတည်း – 007

နတ်တလင်း၊ ဧပြီ ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ နတ်တလင်းမြို့နယ်က ကျေးရွာအုပ်ချုပ်ရေးမှူးတဦးကို ဧပြီလ ၁၂ ရက်မနေ့ညနေက သေနတ်နဲ့ပစ်ခဲ့ရာမှာ ဒဏ်ရာရရှိသွားတယ်လို့ ပေါင်းတည်ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောပါတယ်။

နတ်တလင်းမြို့နယ်၊ ပွဲသာအုပ်စု၊ အုပ်ချုပ်ရေးမှူး ကိုတင်ထွန်းကို ကုန်ကလေးရွာက ဆိုင်ကယ်နဲ့ပြန်လာချိန် သပြေစမ်းရွာအနီးမှာ မနေ့ည ၇ နာရီလောက်က ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ – ပြည်ခရိုင် ၃၆၀၁ PPDF တပ်ရင်း၊ တပ်ခွဲ ၅ နွေဦးတပ်ဖွဲ့က ပစ္စတိုနဲ့ ပစ်ခတ်ခဲ့တာလို့ သိရပါတယ်။

“အဲဒီနေရာက လမ်းကျဥ်းတယ်။ အလှူကပြန်တဲ့သူတွေနဲ့ ရှုပ်သွားတော့ ရှောင်တိမ်းပစ်ခတ်ရင်း နားထင်ကို ရှပ်ထိသွားတာ ကျတော်တို့လည်း လွတ်အောင်ပြန်ဆုတ်ခဲ့ရတယ်” လို့ PPDFက သတင်းတာဝန်ခံက ပြောပါတယ်။

ဒေသခံတဦးကတော့ အဲဒီအုပ်ချုပ်ရေးမှူးဟာ တတောင့်ထိုးလက်လုပ်သေနတ် ကိုင်ဆောင်ထားတယ်လို့လည်း​ ဆိုပါတယ်။

နတ်တလင်းမြို့နယ် ကုန်းကလေးရွာ အိမ်တက်ပွဲကအပြန်မှာ ပစ်ခတ်ခဲ့တာဖြစ်ပြီး အဲဒီအုပ်ချုပ်ရေးမှူးဟာ စစ်ကောင်စီအလိုကျ အပတ်စဉ်လောင်းကစားလိုင်းကြေး ကောက်ခံပေးတာ၊ သမချေးငွေနဲ့ စိုက်ဘဏ်ချေးငွေ ခြိမ်းခြောက်တောင်းတဲ့အပြင် ကျေးရွာအုပ်စုထဲမှာ နေသူအချို့ကို PDF လို့ စွပ်စွဲဖမ်းဆီးတာအပြင် နည်းမျိုးစုံနဲ့ ပြည်သူကို ဒုက္ခပေးနေသူလို့ ထုတ်ပြန်ချက်မှာ ဖော်ပြပါတယ်။

နွေဦးအဖွဲ့ဟာ ပြီးခဲ့တဲ့ဧပြီလ ၉ ရက်မနက်ကလည်း ပေါင်းတည်မြို့က သင်္ကြန်မဏ္ဍပ်ကို ဗုံးဖောက်ခွဲ့ခဲ့သလို ဧပြီလ ၁၁ ရက်ညကလည်း သဲကုန်းမြို့နယ်မှာ ဘောလုံးပွဲလုံခြုံရေးယူပြန်လာတဲ့ စစ်သားနဲ့ရဲတွေကို မိုင်းဆွဲတိုက်ခိုက်ခဲ့ပါသေးတယ်။

နတ်တလင်းမြို့နယ်ဟာ စစ်ကောင်စီခန့် ပဲခူးတိုင်းဝန်ကြီးချုပ် မျိုးဆွေဝင်းရဲ့ ဇာတိမြို့ဖြစ်ပြီး စစ်ကောင်စီက မာရှယ်လောထုတ်ပြန်ထားတဲ့ မြို့နယ်တခု ဖြစ်ပါတယ်။

စာတည်း – 007

သာယာဝတီ၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ သာယာဝတီမြို့နယ်၊ သာယာအေးကျေးရွာအုပ်စုအတွင်းက မူရင်းပိုင်ရှင် တောင်သူတွေဆီ စွန့်လွှတ်ပြီးဖြစ်တဲ့ တပ်ပိုင်မြေတွေရဲ့ ပိုင်ဆိုင်မှု ပုံစံ-၇ တွေကို စစ်ကောင်စီကျေးရွာအုပ်စု အုပ်ချုပ်ရေးမှူးက မတ်လ ၂၁ ရက်နေ့ကစတင်ကာ လော်စပီကာနဲ့အော်ပြီး ပြန်အပ်ခိုင်းနေတယ်လို့ သိရပါတယ်။

သာယာဝတီမြို့အခြေစိုက် ခလရ ၃၅ တပ်က ယခင်စစ်အစိုးရလက်ထက်မှာ သိမ်းဆည်းထားတဲ့ သာယာအေးကျေးရွာအုပ်စုအတွင်းက လယ်မြေဧက ၃၀၀ ကို ၂၀၁၃ ခုနှစ်မှာ တပ်ပိုင်မြေအဖြစ်ကနေ စွန့်လွှတ်ခဲ့ရတာဖြစ်ပြီး လက်ရှိမှာ အဲ့ဒီမြေ ပိုင်ဆိုင်ထားသူတွေဆီက ပိုင်ဆိုင်မှု ပုံစံ-၇ စာချုပ်တွေကို ရပ်၊ကျေးလယ်ယာမြေစီမံခန့်ခွဲရေးကော်မတီထံ အပ်နှံခိုင်းနေတာလို့ ဒေသခံတဦးက မြေလတ်အသံကို ပြောပါတယ်။

“ဒီမြေတွေက ဦးသိန်းစိန်လက်ထက်မှာ တောင်သူတွေ အမှန်တကယ် စိုက်ပျိုးမြေတွေဖြစ်လို့ တပ်ပိုင်မြေအဖြစ်ကနေ စွန့်လွှတ်ခဲ့ပြီး သူ့မူရင်းပိုင်ရှင်တွေကို တရားဝင်ပြန်လွှဲထားတဲ့ မြေတွေ။ ခုလို ပုံစံ ၇ ပြန်အပ်ခိုင်းတာက တပ်ပိုင်မြေအဖြစ် ပြန်သိမ်းဖို့ ပြင်ဆင်နေတာလို့ ယူဆပါတယ်” လို့ ပြောပါတယ်။

အရပ်သားအစိုးရလက်ထက်တုန်းကလည်း စစ်ကောင်စီတပ်က အဲ့ဒီမြေဧက ၃၀၀ နဲ့ပတ်သက်လို့ မူရင်းပိုင်ရှင်တွေကို ပြန်လည်လွှဲပြောင်းပေးရာမှာ အငြင်းပွားမှုတွေရှိခဲ့တယ်ဆိုပြီး အကြောင်းပြကာ ပြန်လည်သိမ်းယူဖို့ ကြိုးစားခဲ့ဖူးတယ်လို့ ဆိုပါတယ်။

“NLD လက်ထက် ၂၀၁၇ လောက်မှာ အဲ့ဒီမြေတွေနဲ့ပတ်သက်ပြီးတော့ ဒီမူရင်းပိုင်ရှင်တွေကြားမှာ အငြင်းပွားတာတွေဖြစ်လို့ ၃၅ တပ်က ပြန်သိမ်းဖို့ လုပ်သေးတယ်။ NLD ခံနေလို့ သူတို့မအောင်မြင်တာ” လို့ သူကဆက်ပြောပါတယ်။

အဲ့ဒီမြေဧက ၃၀၀ ရဲ့ ပိုင်ဆိုင်မှုစာချုပ်ပုံစံ ၇ တွေ စစ်ကောင်စီရပ်/ကျေးလယ်ယာမြေစီမံခန့်ခွဲရေးကော်မတီကို ပြန်လည်အပ်နှံဖို့ ခလရ ၃၅ တပ်က တပ်ကြပ်ကြီး သိန်းဦးနဲ့ သာယာအေးရွာအုပ်စု အုပ်ချုပ်ရေးမှူးတို့က ဦးစီးလုပ်ဆောင်နေတာလို့ ဆိုပါတယ်။

သာယာအေးကျေးရွာအုပ်စုထဲမှာ သင်တောရိုး၊ ကညင်ကောက်၊ သာယာအေး၊ ဂွေးချောင်းစတဲ့ရွာတွေ ပါဝင်တာဖြစ်ပြီး စစ်ကောင်စီတပ်က အဲ့ဒီရွာတွေထဲ လယ်မြေဧက ၃၀၀ ကို ၁၉၉၃ ခုနှစ် စစ်အစိုးရခေတ်မှာ တပ်ပိုင်မြေအဖြစ် သိမ်းဆည်းခဲ့တာဖြစ်ကာ ၂၀၁၃ ခုနှစ်မှာ တပ်ပိုင်မြေအဖြစ်ကနေ ပြန်လည်စွန့်လွှတ်ခဲ့ရတာလို့ သိရပါတယ်။

မတ္တရာ၊ မတ် ၂၃၊ ၂၀၂၃။

မကွေးတိုင်း၊ ပခုက္ကူမြို့နယ်၊ မြစ်ခြေမြို့မှာ စစ်ကောင်စီခန့် အုပ်ချုပ်ရေးမှူးအပါ အမျိုးသား ၂ ဦး မတ်လ၂၁ ရက် ညနေ ၄ နာရီကျော်က သေနတ်နဲ့ပစ်ခတ်ခံရလို့ သေဆုံးသွားတယ်လို့ ဒေသခံတွေဆီက သိရပါတယ်။

ပစ်သတ်ခံရသူတွေဟာ အသက် ၄၆ နှစ်အရွယ် မြစ်ခြေ၊ အမှတ် ၁ ရပ်ကွက် စစ်ကောင်စီခန့်အုပ်ချုပ်ရေးမှူး ပျူစောထီးခေါင်းဆောင် နိုင်လင်းအောင်နဲ့ ကမ္ဘာအေးရပ်ကွက်နေ အသက် ၅၁ နှစ်အရွယ် ဝေဖြိုးအောင်ခရီးသည်တင်ယာဥ်လိုင်းဂိတ်မှူး ဦးယုဟန် တို့ဖြစ်ပြီး၊ သူတို့ ၂ ဦးဟာ နိုင်လင်းအောင်ရဲ့နေအိမ်မှာ ရှိနေချိန် သေနတ်ကိုင်ဆောင်ထားသူ အမျိုးသား ၄ ဦးက ဝင်ရောက်ပစ်ခတ်ခဲ့တာလို့ အမည်မဖော်လိုတဲ့ မြို့ခံအမျိုးသားတဦးက မြေလတ်အသံကို ပြောပါတယ်။

“နိုင်လင်းအောင်က အုပ်ကြီးတာဝန်လည်း ယူထားတယ်။ ပြီးတော့ မြစ်ခြေမြို့ရဲ့ပျူစောထီးခေါင်းဆောင် ဖြစ်တယ်။ သူက ရင်ဘတ်မှာ သေနတ်ဒဏ်ရာ ၃ ချက်ရပြီးတော့ နေအိမ်ထဲမှာတင် ပွဲချင်းပြီး သေတယ်။ ပြီးတော့ သူ့အိမ်ကိုရောက်နေတဲ့ ကားဂိတ်မှူးမှာလည်း ရင်ဘတ်နဲ့လက်မှာ ဒဏ်ရာနဲ့ ပွဲချင်းပြီးသေတယ်” လို့ ပြောပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးတပ်ဖွဲ့တွေဘက်က တစုံတရာသတင်းထုတ်ပြန်တာမျိုး မရှိသေးသလို ဘယ်အဖွဲ့က လုပ်ဆောင်တယ်ဆိုတာ အတည်မပြုနိုင်သေးပါဘူး။

စစ်ကောင်စီအုပ်ချုပ်ရေးမှူးနဲ့ ကားဂိတ်မှူးတို့ ပစ်သတ်ခံရပြီးတဲ့နောက် မတ်လ ၂၂ ရက် မနေ့ကမနက် ၈ နာရီကျော်မှာ အိုင်ရှည်ရပ်ကွက်မှာ လက်ဖက်ရည်ဆိုင်ထိုင်နေတဲ့ ဦးဝင်းမြင့် ၅၂ နှစ်နဲ့ သားဖြစ်သူ ကိုကျော်မိုး ၂၃ နှစ်တို့ကို စစ်ကောင်စီတပ်သားတွေက ဖမ်းဆီးခေါ်ဆောင်သွားတယ်လို့ ဆိုပါတယ်။

“အဲ့ဒီသားဖကို ဖမ်းပြီးတော့ မြစ်ခြေရဲစခန်းကို ဖမ်းခေါ်သွားတယ်။ ဘာဖြစ်လို့ဖမ်းတာလည်းတော့ မသိရဘူး။ အုပ်ကြီးနဲ့ဂိတ်မှူးပစ်ခတ်ခံရတာနဲ့ ပတ်သက်ပြီး ဖမ်းတာလို့ ထင်တယ်” လို့ သူကဆက်ပြောပါတယ်။

မတ်လ ၈ ရက်နေ့ကလည်း ပခုက္ကူ၊ ကျွန်းအိုကျေးရွာ ပျူစောထီးခေါင်းဆောင်ဆိုသူကို တော်လှန်ရေးတပ်ဖွဲ့တွေက ပစ်ခတ်ရှင်းလင်းခဲ့ပြီး ကျည်ဆံ၊ လက်ပစ်ဗုံးတွေ သိမ်းဆည်းရရှိခဲ့တယ်လို့ သိရပါတယ်။

စာတည်း – ရင်ငြိမ်း

ကန့်ဘလူ၊ မတ် ၁၆၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့ပေါ် ရပ်ကွက်တချို့မှာရှိတဲ့ ပြည်သူတွေကို အုပ်ချုပ်ရေးမှူးက ဦးဆောင်ပြီး ပြည်သူ့စစ်သင်တန်းတက်ဖို့ စေခိုင်းခဲ့တယ်လို့ ဒေသခံတွေဆီက သိရပါတယ်။

ကျွန်းလှမြို့၊ ရှမ်းစုရပ်ကွက်မှာ နေထိုင်တဲ့ စစ်ကောင်စီခန့်အုပ်ချုပ်ရေးမှူး သန်းထိုက် နဲ့အတူ သူရဲ့နောက်လိုက် ၂ ဦးဖြစ်တဲ့ ငတူးနဲ့ ငဝင်းတို့က ဦးဆောင်ပြီး ပြည်သူ့စစ်သင်တန်းကို မဖြစ်မနေတက်ရမယ်လို့ ပြောဆိုခဲ့တာလို့ ကျွန်းလှတက်ကြွလှုပ်ရှားသူများအဖွဲ့က မြေလတ်အသံကို ပြောပါတယ်။

“အခုက သင်တန်းကို မတက်မနေ တက်ရမဲ့သဘော။ သူတို့ဘက်က လူအင်အားမရှိတော့ ပြည်သူတွေကို ဖိအားပေး ခြိမ်းခြောက်တယ်လို့ ပြောလို့ရတယ်။ ရပ်ကွက်က လူတွေလည်း ပြဿနာ ပိုကြီးမှာ ကြောက်ကြတော့ အကုန်သွားကြတာ များတယ်။ အစည်းအဝေးကိုလည်း သူတို့ရပ်ကွက်က အုပ်ချုပ်ရေးမှူးတွေ ဦးဆောင်ပြီးလုပ်ကြတာ” လို့ ပြောပါတယ်။

မတ်လ ၁၄ ရက်က ပြုလုပ်ခဲ့တဲ့ အစည်းအဝေးပွဲမှာ အုပ်ချုပ်ရေးမှူးလည်း ဖြစ်သလို ပျူခေါင်းဆောင်လည်း ဖြစ်တဲ့ သန်းထိုက်က ရပ်ကွက်သူ၊ ရပ်ကွက်သားတွေအနေနဲ့ ပြည်သူတွေကို ကာကွယ်ဖို့၊ ပြည်သူ့စစ်မရှိတဲ့ရွာတွေ မီးရှို့ဖျက်ဆီးခံရတဲ့အတွက် မဖြစ်မနေ ပြည်သူ့စစ်သင်တန်းတက်ရမည်ဖြစ်ကြောင်း၊ ကိုယ့်အသိစိတ်နဲ့ကိုယ် တက်ရောက်ကြဖို့နဲ့ မတက်ရောက်တဲ့ သူတွေကိုလည်း မဲနှိုက်ရွေးချယ်သွားမယ်လို့ ပြောဆိုခဲ့ကြောင်းကို ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ရေးသားထားပါတယ်။

ပြည်သူ့စစ်သင်တန်းတက်ဖို့ အစည်းအဝေးခေါ်ယူပြီးတဲ့နောက်မှာ ပျူစောထီးတပ်ဖွဲ့တွေက ကျွန်းလှမြို့အဝင်အထွက်ဂိတ်တွေကို ပြန်လည်ပိတ်ထားခဲ့တဲ့အပြင် ဖြတ်သန်းသွားလာမှုကိုလည်း ကန့်သတ်ထားတယ်လို့ သိရပါတယ်။

ပြီးခဲ့တဲ့ ဇန်နဝါရီလ ၂၂ ရက်ကလည်း ကန့်ဘလူမြို့နယ်၊ ဇီးကုန်းတိုက်နယ်အတွင်းမှာ နေထိုင်တဲ့ ပြည်သူတွေကို ပျူစောထီးတပ်ဖွဲ့က လက်နက်အားကိုးပြီး ပျူသင်တန်းတက်ရောက်ခိုင်းတဲ့အပြင် ပြည်သူတွေဆီကနေလည်း ငွေကြေးကောက်ခံတာတွေ လုပ်ခဲ့တယ်လို့ ဆိုပါတယ်။

ကန့်ဘလူ၊ မတ် ၁၂၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ နဂါးပေါ်ကျေးရွာက အုပ်ချုပ်ရေးမှူးအပါအဝင် ပျူစောထီး ၂ ဦး စုစုပေါင်း ၃ ဦး ပစ်ခတ်ရှင်းလင်းခံရတယ်လို့ သိရပါတယ်။

မတ်လ ၁၀ ရက်နေ့ည ၉ နာရီကျော်ခန့်မှာ နဂါးပေါ်ရွာနေ ပျူစောထီး ထွန်းညွှန့် (၃၂ နှစ်) နဲ့အတူ နေအိမ်မှာရှိနေတဲ့ ပျူစောထီး ဦးအုန်းကြိုင် (၅၂ နှစ်) နဲ့ အုပ်ကြီး ဇော်အောင် (၅၀ နှစ်) ကို ဝင်ရောက်ပစ်ခတ်ရှင်းလင်းခဲ့တာ ဖြစ်တယ်လို့ ကန့်ဘလူ ပကဖ အဖွဲ့ဝင်တဦးက ပြောပါတယ်။

“သွားရှင်းတုန်းကတော့ ထွန်းညွန့်နဲ့ အုန်းကြိုင်ကို ဝင်ရှင်းတာ။ ဖြစ်ချင်တော့ အုပ်ကြီးကလည်း ရှိနေတာ။ အုပ်ကြီးက ရွာကိုတော့ နည်းနည်းငဲ့တယ်။ ပျူရွာဖွဲ့ခိုင်းတာကို သူက မလုပ်တာ။ ၃ ယောက်စလုံးက သေနတ်ကိုင်တာ။ သူက စကစခန့်အုပ်ကြီးဆိုတော့ ပါသွားတာပေါ့” လို့ ပြောပါတယ်။

ပစ်ခတ်ရှင်းလင်းချိန်မှာ အုန်းကြိုင် ဆိုသူဟာ ထွက်ပြေးတာကြောင့် ကျေးရွာသုသာန်အနီးမှာ ထပ်မံပစ်ခတ်ရှင်းလင်းလိုက်ရတယ်လို့ ဆိုပါတယ်။

သေနတ်နဲ့ ပစ်ခတ်ရှင်းလင်းခံရလို့ ထွန်းညွန့်နဲ့ အုပ်ကြီးဇော်အောင်ဟာ ထွန်းညွန့်နေအိမ်မှာ သေဆုံးသွားပြီး အုန်းကြိုင်ဆိုသူကတော့ ရွာသုသာန်နားမှာ သေဆုံးသွားတယ်လို့ သိရပါတယ်။

အုပ်ချုပ်ရေးနဲ့အဖွဲ့ ရှင်းခံရပြီးနောက် မတ်လ ၁၁ ရက်နေ့မနက်မှာ စစ်ကောင်စီတပ်ဖွဲ့ဟာ ကျေးရွာထဲကို ရောက်လာပြီး ဒေသခံတွေကို စစ်ဆေးမေးမြန်းတာ PDF မိသားစုဝင်တွေလို့ ထင်တဲ့ ပြည်သူတွေကို စာရင်းမှတ်သွားတယ်လို့ သိရပါတယ်။

၂၀၂၂ ခုနှစ် စက်တင်ဘာလ ၅ ရက်နေ့ကလည်း ကန့်ဘလူမြို့နယ်၊ အင်ကြင်းစုကျေးရွာက စစ်ကောင်စီခန့်အုပ်ချုပ်ရေးမှူး ဦးကြည်လွင်နဲ့ သတင်းပေး ခင်မောင်သိန်းဆိုသူဟာလည်း ရှင်းလင်းခံရလို့ သေဆုံးခဲ့သေးတယ်လို့ သိရပါတယ်။

မင်းတုန်း၊ ဖေဖော်ဝါရီ ၂၄၊ ၂၀၂၃။

မကွေးတိုင်း၊ မင်းတုန်းမြို့နယ်၊ ဝက်ကော်ကျေးရွာအုပ်စု၊ ဝက်ကော်ကျေးရွာ အုပ်ချုပ်ရေးမှူး ဖေဖော်ဝါရီလ ၂၃ ရက် မနေ့ကမနက် ၈ နာရီလောက်မှာ ဖမ်းဆီးသတ်ဖြတ်ခံလိုက်ရတယ်လို့ သိရပါတယ်။

အုပ်ချုပ်ရေးမှူး ဦမြင့်အောင် အသက် ၅၉ နှစ်ဟာ နေအိမ်မှာရှိနေချိန် သေနတ်သမား ၄ ဦးက ဆိုင်ကယ်တွေနဲ့ရောက်လာပြီး ဖမ်းဆီးခေါ်ဆောင်သွားပြီးနောက် ကျေးရွာနဲ့တမိုင်အကွာ ဆင်ဖြူတောင်ကျောနားမှာ သတ်လိုက်တာလို့ ဒေသခံတဦးက ပြောပါတယ်။

“သူသတ်ဖြတ်ခံလိုက်ရတာက ဟုတ်တယ်။ လာဖမ်းသွားပြီး လက်ကြိုးတုတ်ပြီး ခေါင်းဖြတ် သတ်သွားတာ။ သူကတော့ စကစခန့်အုပ်ကြီးဆိုတော့ စကစ က ခိုင်းတာ လုပ်ရတာတော့ ရှိတယ်။ အလောင်းတော့ ပြန်ရလာတာတော့ ရှိတယ်” လို့ ပြောပါတယ်။

ဦးမြင့်အောင်ဟာ ဖမ်းဆီးခံရပြီးနောက် လည်ပင်းကို ပြတ်တဲ့အထိ ဓားနဲ့ခုတ်ဖြတ်ခံထားရတာလို့ ဆိုပါတယ်။

“အဲ့လို သတ်ဖြတ်ခံထားရတယ်လို့တော့ သိရတယ်။ ဒီဘက်ခြမ်းမှာက အဲ့လိုဖြစ်တာ တော်တော်ရှားတယ်။ ကျနော်နဲ့ သိတဲ့အဖွဲ့တွေကို မေးကြည့်သလောက်က သူတို့မလုပ်ဘူးလို့ ပြောကြတယ်။ လုပ်တဲ့အဖွဲ့က သတင်းကို ဖုံးထားချင်လို့ မထုတ်ပြန်တာလားတော့ မသိဘူး” လို့ ဒေသကာကွယ်ရေးအဖွဲ့ တာဝန်ရှိသူတဦးက ပြောပါတယ်။

ဒီလုပ်ဆောင်မှုကို ဘယ်အဖွဲ့က ဘာကြောင့်လုပ်တယ်ဆိုတာ မသိရသေးသလို အုပ်ချုပ်ရေးမှူးအလောင်းကိုတော့ ဒေသခံတွေက ကျေးရွာကို ပြန်သယ်သွားကြတယ်လို့ သိရပါတယ်။

၂၀၂၂ ခုနှစ်၊ ဩဂုတ်လထဲမှာလည်း မင်းတုန်းမြို့နယ်၊ ပြောင်းကျေးရွာက အုပ်ချုပ်ရေးမှူးကို PDF တွေက ပစ်ခတ်ရှင်းလင်းခဲ့ပေမယ့် အသက်မသေဘဲ ဒဏ်ရာသာ ရရှိခဲ့ပါတယ်။