အုပ်ချုပ်ရေးမှူး

ပဲခူး၊ ဖေဖော်ဝါရီ ၁၀၊ ၂၀၂၃။

ပဲခူးတိုင်းအနောက်ခြမ်း ပေါင်းတည်မြို့ကို စစ်ကောင်စီက မာရှယ်လောထုတ်အပြီး ၈ ရက်အကြာ ဖေဖေါ်ဝါရီလ ၁၀ ရက် ဒီနေ့နေ့လယ် ၁၂ နာရီလောက်မှာ အုပ်ချုပ်ရေးမှူးတဦးကို နန်းထိုက်အောင်စစ်ဆင်ရေးအဖြစ် ရှင်းလင်းခဲ့တယ်လို့ Paungde People Defence Force ဆီက သိရပါတယ်။

ပေါင်းတည်မြို့နယ် သပြေကြီးအုပ်စုက အသက် ၅၂ နှစ်အရွယ် အုပ်ချုပ်ရေးမှူး ကိုတင်မော်ဝင်းဆိုသူကို ပြည်ခရိုင် PDF ၃၆၀၁ တပ်ရင်း ၁၊ တပ်ခွဲ ၅ နွေဦးအဖွဲ့က သေနတ်နဲ့ ၃ ချက် ပစ်ခတ်ခဲ့တာ ဖြစ်တယ်လို့ PPDF တပ်ဖွဲ့ဝင်တဦးက ပြောပါတယ်။

“ပထမသပြေကြီးစု အုပ်ချုပ်ရေးမှူးက ကျနော်တို့ ရှင်းလင်းပြီးလို့ သူကဒုတိယမြောက်တက်လာတဲ့သူ၊ ဆိုင်ကယ်နဲ့တယောက်တည်းရယ်။ သူနေတဲ့ ဇီးကုန်းလေးရွာကို ပြန်တာမှာ သပြေကြီးစုရွာနဲ့ ဇီးကုန်းလေးရွာကို လယ်ပြင်လမ်းဖောက်ထားတဲ့လမ်းမှာ ပစ်ခတ်ခဲ့တာပါ။ ကျောကို ၂ ချက် ဆိုင်ကယ်လဲကျတော့ နားထင်ကို တချက် ပစ်ခဲ့ပါတယ်” လို့ ပြောပါတယ်။

လက်ရှိသေဆုံးခဲ့တဲ့ ကိုတင်မော်ဝင်း မတိုင်ခင် သပြေကြီးစု ကျေးရွာအုပ်ချုပ်ရေးမှူး လုပ်ခဲ့တဲ့ အသက် ၅၀ ကျော်အရွယ် ကိုမြဟန် ကို ပြီးခဲ့တဲ့နှစ် ဇွန်လ ၁၈ ရက်က လယ်ကွင်းပြင်မှာပဲ သေနတ်နဲ့ ရှင်းလင်းခံလိုက်ရတာ ဖြစ်ပါတယ်။

ကိုတင်မော်ဝင်းဟာ ပျူစောထီးအဖွဲ့ဝင် ဖြစ်သလို လူဦးရေစာရင်းကောက်တာ လောင်းကစားဝိုင်းတွေကို လစဉ်ကြေး၊ လိုင်းကြေးကောက်တာတွေ ပြုလုပ်ပြီး ပြည်သူကို စိတ်ဒုက္ခပေးသူ ဖြစ်တယ်လို့ PPDF ရဲ့ ထုတ်ပြန်ချက်မှာ ဖော်ပြထားပါတယ်။

ပေါင်းတည်မြို့နယ်အတွင်း စစ်ကောင်စီလက်ထက် အုပ်ချုပ်ရေးမှူး ၅ ဦးထက်မနည်း သေဆုံးခဲ့ပြီး ပစ်ခတ်တိုက်ခိုက်ခံရသူတွေလည်း ရှိခဲ့သလို ပြီးခဲ့တဲ့နှစ် နိုဝင်ဘာလ ၁၁ ရက်က ရှင်းလင်းခံရတဲ့ ကြို့ပင်သာ အုပ်ချုပ်ရေးမှူးနေရာမှာလည်း အုပ်ချုပ်ရေးမှူး မရှိသလို နယ်မြေထိစပ်နေတဲ့ မဲခေါင်းအုပ်စုမှာလည်း အုပ်ချုပ်ရေးမှူးလုပ်မယ့်သူ မရှိဘူးလို့ ဒေသခံတွေဆီက သိရပါတယ်။

မန္တလေး၊ ဖေဖော်ဝါရီ ၅၊ ၂၀၂၃။

မန္တလေးတိုင်း၊ ပြည်ကြီးတံခွန်မြို့နယ်၊ သင်ပန်းကုန်းရပ်ကွက်အုပ်ချုပ်ရေးမှူး သေနတ်နဲ့ပစ်ခံရပြီး သေဆုံးသွားတယ်လို့ သိရပါတယ်။

ဖေဖော်ဝါရီလ ၄ ရက်မနေ့ကမနက် ၁၁ နာရီဝန်းကျင်မှာ သင်ပန်းကုန်းရပ်ကွက်၊ ၁၂၁×၁၂၂ လမ်းကြား၊ ၅၁ (ဘီ)လမ်းရှိ အုပ်ချုပ်ရေးမှူး ဦးသာဌေး ၆၉ နှစ်ဟာ နေအိမ်မှာရှိနေချိန် သေနတ်သမားတွေက ဝင်ရောက်ပစ်ခတ်သွားတာလို့ ဒေသခံတဦးက ပြောပါတယ်။

“သူက အရင်ကရာအိမ်မှူးပါ။ သူရပ်ကွက် အုပ်ချုပ်ရေးမှူးနေရာမှာ သူကအုပ်ကြီးဖြစ်တာ မကြာသေးဘူး။ အဲ့ဒါကို အိမ်မှာရှိနေတဲ့အချိန် ပစ်သတ်သွားတာ။ သူကအသက်လည်း တော်တော်ကြီးနေပြီ။ အရင်ကတည်းက ရာအိမ်မှူးလုပ်ခဲ့တာဆိုတော့ ဟိုနေရာဒီနေရာပါတာတော့ရှိတယ်”လို့ ပြောပါတယ်။

သေနတ်နဲ့ပစ်ခံရလို့ အုပ်ချုပ်ရေးမှူး ဦးသာဌေးဟာ ဦးခေါင်း၊ ရင်ဘတ်တွေမှာ ကျည်ဖောက်ဝင်ဒဏ်ရာ ၃ ချက်ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

ဦးသာဌေးဟာ ကျူးကျော်များရှင်းလင်းရေးဟုဆိုကာ အများပြည်သူပိုင်နေအိမ်တွေကိုဖျက်ဆီးဖို့ စာရင်းကောက်ရာမှာ ဦးဆောင်သူ၊ ဧည့်စာရင်းလက်ခံသူ၊ မဲစာရင်း၊ လူဦးရေစာရင်း၊ အိမ်ထောင်စုစာရင်းကောက်ရာမှာ ဦးဆောင်ပါဝင်နေသူဖြစ်လို့ သေနတ်နဲ့ ၇ ချက် ပစ်ခတ်ရှင်းလင်းခဲ့တယ်လို့ အောင်စည်တော်စစ်ဆင်ရေးအဖွဲ့က ထုတ်ပြန်ထားပါတယ်။

ဇန်နဝါရီလ ၃၁ ရက်ကလည်း မန္တလေးတိုင်း၊ ပုသိမ်ကြီးမြို့နယ်၊ နန္ဒာတောင်ကျေးရွာသားလမ်းမှာ ဒလန်လို့လူသိများတဲ့ အမျိုးသမီးငယ်ကို မင်္ဂလာဆောင်ကနေ ဆိုင်ကယ်နဲ့ပြန်လာချိန် ဒေသကာကွယ်ရေးတပ်ဖွဲ့တခုက ပစ်ခတ်ရှင်းလင်းခဲ့ပါသေးတယ်။

မန္တလေး၊ ဒီဇင်ဘာ ၂၅၊ ၂၀၂၂။

မန္တလေးတိုင်း၊ ဝမ်းတွင်းမြို့နယ်၊ ညောင်တိုကျေးရွာက အုပ်ချုပ်ရေးမှူး သားအဖ သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

ဒီဇင်ဘာလ ၂၄ ရက်မနေ့ကည ၈ နာရီခန့်မှာ ညောင်တိုကျေးရွာနေ အသက် ၅၀ နှစ်ဝန်းကျင် အုပ်ချုပ်ရေးမှူးဦးပြေအေး နဲ့ သူ၏သား ၂၅ နှစ်ဝန်းကျင် ကိုစိုင်မြင့်အောင်ပြေ (ခ) ပုလုံးတို့ကို နေအိမ်မှာပဲ လက်နက်ကိုင်အဖွဲ့တခုကပစ်သတ်ခဲ့တာလို့ ဒေသခံတဦးက ပြောပါတယ်။

“သူတို့သားအဖပစ်သတ်ခံရတာက ဟုတ်တယ်။ အုပ်ချုပ်ရေးမှူးဆိုတော့ သူတို့ကရွာထဲမှာ လူတွင်ကျယ်လုပ်ချင်တာလည်း ရှိတာပေါ့။ ဒါကြောင့်လာပစ်သတ်သွားတာလားတော့မသိရဘူး”လို့ ပြောပါတယ်။

အုပ်ချုပ်ရေးမှူးသားအဖအသတ်ခံရတယ်လို့သတင်းရပြီး လာရောက်စစ်ဆေးတဲ့ စစ်ကောင်စီအင်အား ၂၀ ခန့်ပါတဲ့ကားလည်း ရိုးစုကျေးရွာနဲ့ ဖုန်းစိုးကျေးရွာကြားမှာ မိုင်းဆွဲခံခဲ့ရကာ ထိခိုက်သေဆုံးမှုကိုမသိရသေးဘူးလို့ ဆိုပါတယ်။

အုပ်ချုပ်ရေးမှူး ကိုပြည်အေးဆိုသူမှာ မြို့နယ်အတွင်း အကြီးစားပျူစောထီးခေါင်းဆောင်ဖြစ်ပြီး၊ ကျေးရွာနေပြည်သူများအပေါ် အမြဲတမ်းဗိုလ်ကျအနိုင်ကျင့်နေသူဖြစ်သလို သားဖြစ်သူဟာလည်း ပျူစောထီးအဖွဲ့ဝင်တဦးဖြစ်ပြီး ရွာတွေကို PDF တွေ မလာအောင်၊ PDFတွေကိုရှာဖွေပြီး စစ်ကောင်စီကိုသတင်းပေးနေလို့ ရှင်းလင်းခဲ့တာဖြစ်သလို အလောင်းကောက်ဖို့လာတဲ့ စစ်ကောင်စီကားကိုလည်းမိုင်းဆွဲခဲ့တာဖြစ်တယ်လို့ WTRF (wundwin township revolution force)က ထုတ်ပြန်ထားပါတယ်။

ဒါ့အပြင် ဒီဇင်ဘာလ ၁၀ ရက်မှာလည်း သဲတောလေးကျေးရွာ အုပ်ချုပ်ရေးမှူးမောင်ရှိန်ကို WTRF အဖွဲ့က သုတ်သင်ရှင်းလင်းခဲ့ပါသေးတယ်။

မန္တလေး၊ ဒီဇင်ဘာ ၂၃၊ ၂၀၂၂။

မန္တလေးတိုင်း၊ ငါန်းဇွန်မြို့နယ်၊ ညှောင်လေးပင်ကျေးရွာက စစ်ကောင်စီအတွက် မိုင်းရှာတော်တဲ့ စစ်ကောင်စီခန့်အုပ်ချုပ်ရေးမှူးတဦး ဒီဇင်ဘာလ ၂၃ ရက်ဒီနေ့မနက် ၉ နာရီ ၃၅ မိနစ်မှာ ပစ်ခတ်ရှင်းလင်းခံရတယ်လို့ သိရပါတယ်။

စစ်ကောင်စီခန့်အုပ်ချုပ်ရေးမှူး မင်းဆန်းဟာ ဒီနေ့မနက်မှာဆိုင်ကယ်နဲ့ထွက်လာစဉ် ငါန်းဇွန်-ငါန်းမြားလမ်းမကြီး တောင်ရွာဘိုရွာနဲ့ မြောက်ရွာဘိုလမ်းကြားမှာ YGYR-Youth Guerrilla Counter Revolution တပ်ဖွဲ့က ပစ်ခတ်ရှင်းလင်းခဲ့ပါတယ်။

“သူကဆိုင်ကယ်စီးရင်အမြဲအမြန်စီးတာ ကျနော်တို့ကနောက်ကနေလိုက်ပစ်ရတာ။ သူ့ရဲ့ခေါင်းကို ၂ ချက်ပစ်လိုက်တယ်။ အဲဒီနေရာမှာပဲ ဆိုင်ကယ်ရောလူရောလဲသွားတယ်။ သူ့ကြောင့်ကျနော်တို့အဖွဲရဲ့ မိုင်း ၅ လုံးအပြင် အခြားသူတွေရဲ့မိုင်းလုံး ၃၀ လောက် စကစဆီပါသွားခဲ့ရတယ်” လို့ TGYR တပ်ဖွဲ့ဝင်တဦးက မြေလတ်အသံကို ပြောပါတယ်။

မင်းဆန်းဆိုသူဟာစစ်ကောင်စီတပ်ဖွဲ့တွေနဲ့ပေါင်းပြီး ရွာထဲကဒေသခံတွေကို လိုက်လံဖမ်းဆီးခိုင်းတာ၊ ဖမ်းဆီးထားတဲ့သူတွေကိုငွေကြေးတွေနဲ့ ပြန်လည်ရွေးချယ်ခိုင်းခြင်းမျိုးတွေကိုလည်း ပြုလုပ်လေ့ရှိတယ်လို့ ဆိုပါတယ်။

“သူကစကစတွေကိုခေါ်ပြီးဖမ်းခိုင်းတယ်။ သူ့ကြောင့်အဖမ်းခံရတဲ့သူကများတယ်။ တယောက်ဆိုသိန်းတရာလောက်ကုန်ခဲ့တယ်၊ နောက်တယောက်ကလည်း ၅၀ လောက်ကုန်ပြီ အခုထိမလွတ်သေးဘူး”လို့ တပ်ဖွဲ့ဝင်ကဆက်ပြောပါတယ်။

အလားတူငါန်းဇွန်မြို့နယ်၊ မင်းကြီးကြပ်ကျေးရွာက စစ်ကောင်စီအတွက်မိုင်းရှာဖွေရာမှာ အလွန်အားကိုးရသူတဦးဖြစ်တဲ့ ဟန်ဝင်း ကိုလည်း ပြီးခဲ့တဲ့ဒီဇင်ဘာ ၁၆ ရက်မှာ TGYR တပ်ဖွဲ့တွေက ပစ်ခတ်ရှင်းလင်းခဲ့ကြပါတယ်။

ဟန်ဝင်းနဲ့မင်းဆန်းတို့ဟာစစ်ကောင်စီအတွက် အတူတကွသတင်းပေးမိုင်းရှာပေးနေသူတွေပဲဖြစ်တယ်လို့ သိရပါတယ်။

ပဲခူး၊ ဒီဇင်ဘာ ၂၁၊ ၂၀၂၂။

ပဲခူးတိုင်း​ဒေသကြီး၊ တောင်ငူခရိုင်၊ ထန်းတပင်မြို့နယ်၊ ကျီတော်ကျေးရွာအုပ်ချုပ်ရေးမှူးပစ်သတ်ခံရတယ်လို့ သိရပါတယ်။

ဒီဇင်ဘာလ ၂၀ ရက်နေ့ မနက် ၅ နာရီကျော်ခန့်မှာ ကျီတော်ကျေးရွာအုပ်ချုပ်ရေးမှူး ဦးဌေးအောင်ကို နေအိမ်မှာပဲ ဒေသကာကွယ်ရေးအဖွဲ့တွေက ပစ်ခတ်ရှင်းလင်းခဲ့တာဖြစ်တယ်လို့ ပဲခူးတိုင်းဒေသကြီးပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောပါတယ်။

“သူ့သမက်က စကစတပ်က အရာရှိဖြစ်တယ်။ ထန်းတပင်မှာ စကစ အားကိုးရဆုံး အုပ်ချုပ်ရေးမှူးတယောက်ဖြစ်တယ်။ ဒါကြောင့်လဲဒီဘက်က အဖွဲ့တွေကပစ်ခတ်ရှင်းလင်းလိုက်တာဖြစ်တယ်။” လို့ ပြောပါတယ်။

သေနတ်နဲ့ပစ်ခံရလို့ အုပ်ချုပ်ရေးမှူး ဦးဌေးအောင် ၅၆ နှစ်ဟာ ဦးခေါင်း၊ ဝမ်းဗိုက်တွေမှာ သေနတ်ဒဏ်ရာ ၇ ချက်ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

အုပ်ချုပ်ရေးမှူး ဦးဌေးအောင်ကို နန်းထိုက်အောင်စစ်ဆင်ရေးအနေနဲ့ ထန်းတပင်ပကဖ (ကျွဲရိုင်းအဖွဲ့) ကရှင်းလင်းခဲ့တာ ဖြစ်ပါတယ်။

ဦးဌေးအောင်ရဲ့သားမက်ဖြစ်သူဟာ စစ်ကောင်စီရဲ့ အမှတ်(၄၀၂)ခြေမြန်တပ်ရင်းမှ ဗိုလ်ကြီးရဲဝင်းအောင် (ကြည်း-၅၉၉၉၀) ဖြစ်​ပြီး သားမက်အားကိုး၊ စစ်ကောင်စီအားကိုးနဲ့ ပြည်သူအပေါ် ထင်တိုင်းကြဲအနိုင်ကျင့် ဗိုလ်ကျနေသူဖြစ်တယ်လို့ ဆိုပါတယ်။

ထန်းတပင်မြိုနယ်ထဲမှာ စစ်ကောင်စီဒေါက်တိုင်အုပ်ချုပ်ရေးမှူးတွေနဲ့စစ်ကောင်စီအဖွဲ့တွေ မကြာခဏတိုက်ခိုက်ခံရပြီး ထိခိုက်သေဆုံးတာတွေရှိနေတာပါ။

မြေလတ်အသံ၊ သြဂုတ် ၂၊ ၂၀၂၂။

ပြီးခဲ့သည့် ဇူလိုင်လ ၁၉ရက်နေ့မှစတင်ကာ စစ်ကောင်စီက ဖမ်းဆီးခဲ့သည့် ရခိုင်ပြည်နယ် မောင်တောမြို့နယ်မှ ရပ်ကျေးအုပ်ချုပ်ရေးမှူး ၂ဦးပါ အရပ်သား ၁၀ဦးနှင့် အဆက်အသွယ်မရရှိသည် မှာ ယနေ့ ဩဂုတ် ၂ရက်ဆိုလျှင် ရက်ပေါင်း ၁၄ ရက်ရှိသွားပြီဟု မိသားစုဝင်များကပြောသည်။

ဖမ်းဆီးခံရပြီး သတင်းအစအနမရရှိကြသူများမှာ မောင်တောမြို့နယ်၊ ကြိမ်ချောင်းအုပ်ချုပ်ရေးမှူး ဦးကိုကိုအောင်၊တရိန်းအုပ်ချုပ်ရေးမှူး ဦးအိမ်စိုးမောင်၊ သာယာကုန်းကျေးရွာတာဝန် ခံ ဦးဘသိန်း ၊ကြိမ်ချောင်းရွာသား ဦးထွန်းအေးကြိုင် ၊ ဦးထွန်ရွှေ နှင့် ပန်းတောပြင်စစ်ဆေးရေးဂိတ်မှ ၂ဦးတို့ဖြစ်သည်။

ယင်းအပြင် ကျောက်တော်မြို့ပေါ်ရှိ ကဝိရတနာ စစ်ဘေးရှောင်စခန်းမှ ဆေးဆရာ ဦးကျော်ဟိန်းနှင့် ပုဏ္ဏာမြို့၊စံပြရပ်ကွက်မှ ဦးစောအေးမောင်နှင့် ကိုမိုးသီးခိုင်တို့ဖြစ်ကြပြီး ၎င်းတို့ကို ခမရ (၅၅၀) တပ်ရင်းမှ စစ်ကောင်စီတပ်သားများက ဖမ်းဆီးခဲ့ခြင်းဖြစ်သည်ဟု မိသားစုဝင်များက ဆိုသည်။

ဖမ်းဆီးခံရသူ ဦးကျော်ဟိန်း၏ ဇနီးဖြစ်သူ ဒေါ်အေးသန်းက”စစ်သားတွေ ဖမ်းသွားတဲ့နေ့ကစလို့ ဒီနေ့ ဒီအချိန်ထိ ကျွန်မယောကျ်ားနဲ့ပတ်သက်လို့ ဘာတခုမှ မသိရ၊မကြားရဘူး။ ဘယ်နေရာမှာရောက် လို့ရှိနေမလဲ။ သတ်ပစ်ပြီလား၊မသတ်သေးဘူးလား အရမ်းသိချင်ပါတယ်။ ကိုယ်နဲ့သိတဲ့လူတွေ ကိုလည်း ဖုန်းဆက်မေးတယ်။ သူတို့များသိမလားလို့ ဒါပေမဲ့ ဘာတခုမှမထူးပါဘူး။ ကျွန်မ ယောင်္ကျား သေသွားပြီဆိုရင်လည်း သေပြီ။ မသေးသေးဘူးဆိုရင်လည်း ဘယ်နေရာမှာရောက်ထား ထားတယ်ဆိုတာလည်းပဲ သိချင်နေမိပါတယ်။”ဟု ဆိုသည်။

အဆိုပါ ဦးကျော်ဟိန်းကို ပြီးခဲ့သည့်ဇူလိုင် ၁၉ ရက် ည၉နာရီအချိန်ခန့်တွင် ကံကြီးရှင် စစ်ဘေးရှောင်စခန်းမှ လူနာကြည့်၍ပြန်လာစဉ် မီးရထားဘူတာတွင် စစ်ကောင်စီတပ်သားများက ဖမ်းဆီးသွားခဲ့ခြင်းဖြစ်သည်။

အလားတူ ဇူလိုင် ၂၀ရက်နေ့တွင် ဖမ်းဆီးခံလိုက်ရသည့် ကြိမ်ချောင်းကျေးရွာအုပ်ချုပ်ရေးမှူးနှင့် ရွာသား ၂ဦး၊ တရိန်းအုပ်ချုပ်ရေးမှူး ၊သာယာကုန်းကျေးရွာတာဝန်ခံတို့မှာလည်း အပြစ်တစုံတရာ ပြုလုပ်ထားခြင်းမရှိသည့်အတွက် အမြန်ဆုံး ပြန်လွှတ်ပေးစေလိုကြောင်း မိသားစုဝင်များက တောင်းဆိုနေကြသည်။

ကြိမ်ချောင်းအုပ်ချုပ်ရေးမှူး၏ ဆွေမျိုးတဦးက ” ဖမ်းခေါ်သွားတာကတော့ နခခ ၇ကိုပါ။ ကျွန်တော် တို့သွားတွေ့ကြတော့ တွေ့ခွင့်လုံးဝမရဘူး။ အစောင့်ရဲသားတွေ ပြောတာကတော့ သူတို့ဒီမှာ မရှိဘူးတဲ့။ ဘယ်ရောက်သွားလည်း မေးတော့ မသိဘူးပြောတယ်။ အခုဆိုရင် တော်တော်လည်း စိတ်ပူနေရတယ်။ သူ့မယားဆိုရင် အဲဒီစိတ်နဲ့ ထမင်းတောင် ကောင်းကောင်းမစားဘူးဖြစ် နေတယ်။ ကျွန်တော်တို့က ဖမ်းထားတဲ့သူတွေကို အပြစ်ရှိတယ်လို့တွေ့ရင် ထောင်ချပေါ့။ အပြစ်မရှိဘူးဆိုရင် ပြန်လွှတ်ပေးလည်။ အခုက ဘာတွေ မှန်းလည်းမသိတော့ဘူး။ တရားဥပဒက တော်တော် လည်း စိတ်ပျက်ဖို့ကောင်းတယ်။”ဟု ဆိုသည်။

ထို့အတူ ပုဏ္ဏားကျွန်းမြို့ခံ ၂ဦးဆိုလျှင်လည်း ၎င်းတို့ကို မည်သည့်နေရာ၌ ဖမ်းဆီးထားသည်ကို သာ သိခွင့်ရချင်ကြောင်း မိသားစုများကဆိုသည်။

ရခိုင်ပြည်နယ်တွင် စစ်ကောင်စီက ဇွန်လနှင့်ဇူလိုင် လအတွင်း ဖမ်းဆီးခဲ့သည့် အပြစ်မဲ့အရပ် သားပြည်သူ ၅၅ဦးရှိခဲ့ပြီး ယင်းထဲမှ ၁၄ဦးကို ပြန်လွှပေးခဲ့သည်ဟု သိရှိရသည်။ပြန်မလွှပေသူများ ကိုမှု စစ်ကောင်စီဖက်မှ ပုဒ်မအမျိုးမျိုးတပ်ကာ တရားစွဲ၊ ထောင်ချမှုများ ပြုလျှက်ရှိနေသည်။

ပဲခူး၊ မတ် ၁၉၊ ၂၀၂၂။

ရွေးကောက်ပွဲကျင်းပရန်အတွက်ဆိုကာ ပဲခူးတိုင်းဒေသကြီး၊ ပြည်ခရိုင်ရှိ မြို့နယ်အချို့တွင် အိမ်ထောင်စုစာရင်းများကို ရပ်ကျေးအုပ်ချုပ်ရေးမှူးများက တဆင့်လိုက်လံကောက်ခံနေကြောင်း အုပ်ချုပ်ရေးမှူးများထံကသိရသည်။

မတ်လဆန်းကစတင်ကာ ပန်းတောင်းမြို့၊ ပြည်မြို့ တို့တွင် လိုက်လံကောက်ယူနေခြင်းဖြစ်ပြီး ၂၀၂၃ ခုနှစ်တွင် ရွေးကောက်ပွဲကျင်းပ ရန်အတွက် အိမ်ထောင်စုစာရင်းများကို လိုက်လံကောက်ခံနေပြီး အိမ်ထောင်စုစာရင်း၊ မှတ်ပုံတင်မရှိသူများကို ပန်းခင်းစီမံချက်ဆိုကာ လုပ်ခိုင်းနေကြောင်း သိရသည်။

“ဒီမှာတော့ ရွေးကောက်ပွဲအတွက်ဆိုပြီး လူစာရင်းတွေကောက်ခိုင်းနေပြီ အရင်စာရင်းတွေကို မယုံလို့လုပ်နေတာ ထင်တယ်။ မရှိသူတွေကိုလည်း လုပ်ပေးနေတယ် ပန်းခင်းစီမံချက်ဆိုပြီး တချို့တွေလည်း လုပ်လားမလုပ်လားတော့သေချာမသိဘူး ထောက်ခံစာတွေလည်း လာလုပ်နေတာပဲ” လို့ ရပ်ကျေးအုပ်ချုပ်ရေးမှူးတဦးကပြောသည်။

အဆိုပါ အိမ်ထောင်စုစာရင်းကောက်ယူနေမှုများတွင် အချို့ စစ်ကောင်စီခန့်အုပ်ချုပ်ရေးမှူးများမှာ ဒေသခံပြည်သူများထံက ငွေကြေးတောင်းခံမှုများရှိနေပြီး အိမ်ထောင်စုစာရင်းထဲမှ နေအိမ်တွင် မရှိသူများကိုလည်း မေးမြန်းမှုများ ပြုလုပ်နေကြောင်း ဒေသခံများကပြောသည်။

စစ်ကောင်စီကလည်း ခရီးသွားလာရာတွင် ထောက်ခံစာဖြင့်သွားလာခြင်းကို ခွင့်မပြုတော့ပဲ မှတ်ပုံတင်ဖြင့်သာ သွားလာရန် ထုတ်ပြန်ကြေညာထားသည်။

ပဲခူး၊ မတ် ၁၆၊ ၂၀၂၂။

ပဲခူးတိုင်းအနောက်ခြမ်းမှာရှိတဲ့ ပေါင်းတည်မြို့သားနှစ်ဦးက စစ်ဘောမတွေမြန်မြန်သေရင်ကောင်းမှာလို့ အချင်းချင်းစကားပြောခဲ့တာကို အပြစ်ရှာကာရပ်ကွက်အုပ်ချုပ်ရေးမှူးက ရဲစခန်းကိုတိုင်ကြားခဲ့လို့ ပြီးခဲ့တဲ့ မတ်လ ၁၃ ရက်နေ့က ၄၇၊ ၃၀ (က)၊ ၅၀ (က)/၄၉ စတဲ့အကြမ်းဖက် ပုဒ်မတွေနဲ့ ဖမ်းဆီးအမှုဖွင့်ခံခဲ့ရပါတယ်။

အုပ်ဖို ၂ ရပ်ကွက် စေတနာနာရေးကူညီမှုအသင်းရုံးနောက်ဖက်က ထန်းတောစုထဲမှာနေကြတဲ့ ကိုသက်လှ(ခ)ကိုသက်နဲ့ ကိုအောင်တင်ဝင်းတို့ဖြစ်တယ်လို့ သိရပါတယ်။

“သူတို့နှစ်ယောက်ရေချိုးရင်း ရေတွင်းမှာ ပြောတဲ့စကားကို ဘယ်သူကကြားပြီး အုန်းသိန်းကိုတိုင်လည်းမသိဘူး။ သူတို့နှစ်ယောက်အဖမ်းခံရပြီး နောက်နေ့မှာ ကာယကံရှင်မိသားစုနဲ့ ရပ်ကွက်ထဲက ရပ်မိရပ်ဖတွေက သွားတောင်းပန်တယ်။ ဒါပေမယ့်​ ကျေအေးမပေးဘူး ဒါမျိုးနောက်မလုပ်ရဲအောင် မှတ်လောက်သားလောက်ဖြစ်အောင် လုပ်ရမယ်လို့ပြောတယ်။ ပထမတော့ ရဲက ၄၇ နဲ့ စွဲတာ ကျေအေးဖို့သွားပြောပြီး နောက်နေ့မှ ထပ်ပြီးပုဒ်မတွေက တိုးသွားတာ အုန်းသိန်းက စစ်ကောင်စီအုပ်ချုပ်ရေးမှူးဖြစ်လာပြီးတော့မှ ရပ်ကွက်ထဲမှာ အာဏာပြတာပေါ့ဗျ” လို့ အဲဒီရပ်ကွက်နေသူတဦးက မြေလတ်အသံကို ပြောပါတယ်။

ပြီးခဲ့တဲ့ရက်ပိုင်းကလည်း ရပ်ကွက်ထဲက လူငယ် ၃ ယောက်ကို PDF နဲ့ ဆက်သွယ်တယ်ဆိုပြီး အဲဒီအုပ်ချုပ်ရေးမှူးကဦးဆောင်ပြီး စစ်ကောင်စီတပ်တွေနဲ့ လာဖမ်းသွားကာ စစ်ကြောရေးမှာ ရိုက်နှက်စစ်ဆေးခဲ့ပြီး အပြစ်မရှိလို့ ခံဝန်လက်မှတ်ထိုးခိုင်းကာ ပြန်လွှတ်ပေးခဲ့တယ်လို့ သိရပါတယ်။

စစ်ကောင်စီဟာမြို့နယ်အတွင်းမှာ ဖမ်းဆီးမှုတွေပြုလုပ်ပြီး သူတို့စွတ်စွဲသလိုမဟုတ်ပါက ခံဝန်ထိုးခိုင်းပြီး ချိန်းခြောက်ကာ ပိုက်ဆံတောင်းယူပြီးမှ လွှတ်ပေးတယ်လို့လည်း ကာယကံရှင်တွေနဲ့နီးစပ်သူတဦး ဆီက သိရပါတယ်။

ပဲခူး၊ ဇန်နဝါရီ ၂၀၊၂၀၂၂။

ပဲခူးတိုင်းဒေသကြီး၊ ပြည်မြို့တွင် မီတာခများ လာဆောင်ကြရန် အသံချဲ့စက်ဖြင့် လိုက်လံအော်နေသလို အုပ်ချုပ်ရေးမှူးများကလည်း တအိမ်တက်ဆင်းလိုက်လံ ပြောနေကြောင်း မြို့ခံများထံကသိရသည်။

ယခုရက်ပိုင်းအတွင်း ပြည်မြို့တွင်း လမ်းများသို့ အသံချဲ့စက်ဖြင့်လိုက်လံ အော်နေခြင်းဖြစ်ပြီး စစ်ကောင်စီခန့် ရာအိမ်မှူး၊ ဆယ်အိမ်မှူးများက နေအိမ်များသို့ လိုက်လံအသိပေးနေကာ ရပ်ကွက်ရုံးများတွင် လာဆောင်နိုင်ကြောင်း ပြောဆိုကြသည်ဟု မြို့ခံများက ပြောသည်။

“ကျမတို့ရပ်ကွက်ထဲတော့ တအိမ်တက်ဆင်းကိုလိုက်ပြောနေတာ။ မီတာခတွေလာဆောင်ကြဖို့တဲ့ သူတို့ရပ်ကွက်ရုံးမှာလည်း ဆောင်လို့ရတယ်လို့ပြောနေတယ်။ တခြားရပ်ကွက်တွေတော့ မသိဘူး” ဟု မြို့ခံတဦးကပြောသည်။

မီတာခများဆောင်ရာတွင် ယခင်လများအတွက်ပါ ပေါင်းဆောင်ရမည်ဖြစ်ပြီး မီတာခများတွက်ချက်ရာတွင်လည်း နေအိမ်များရှိ မီတာများ ဓါတ်တိုင်များရှိ မီတာဗုံးများကို သေချာလိုက်လံစစ်ဆေးတွက်ချက်ခြင်းမဟုတ်ဘဲ ခန့်မှန်းတွက်ချက်နေကြသည့်အတွက် သုံးစွဲမှုထက်ပိုမိုကျသင့်နေမှုများလည်း ရှိကြောင်း မြို့ခံများထံကသိရသည်။

“မီတာခတွေက အရင်လကဟာတွေပါပေါင်းဆောင်ရမယ်ဆိုတော့ မတတ်နိုင်ဘူး။ ငွေကနည်းမှာမဟုတ်ဘူးလေ။ ကျတော်တို့ကတော့ မဆောင်နိုင်တော့ဘူး မဆောင်လို့ မီတာဖြုတ်သွားမယ်ဆိုလည်း ဖြုတ်စေတော့။ တော်တော်များများက ဆောင်နိုင်ကြမှာမဟုတ်ဘူး။ ဆောင်လည်း အခုကမီးကပေးချင်တဲ့အချိန်ပေး ပျက်ချင်တဲ့အချိန်ပျက်နေတာပဲ ရပ်ကွက်ရုံးတွေမှာလာဆောင်ကြဖို့ အိမ်တွေကိုလိုက်ပြောနေပြီ ကျတော်တို့ဆီတော့မလာသေးဘူး” ဟု မြို့ခံတဦးကပြောသည်။

လက်ရှိစစ်ကောင်စီလက်ထက် ၂၀၂၁ ခုနှစ် နှောင်းပိုင်းလများနှင့် ၂၀၂၂ ခုနှစ် ယနေ့အချိန်ထိ လျှပ်စစ်မီးအားအချိန်ပြည့်ပေးနိုင်ခြင်းမရှိဘဲ အချိန်ပိုင်းအလိုက်ပေးခြင်း၊ ပျက်ချင်သည့်အချိန်များတွင် ပျက်ခြင်းများ၊ မကြာခဏ မီးပျက်ခြင်းများကို ပြည်သူများရင်ဆိုင်နေရသည်။