ပေါက်၊ စက်တင်ဘာ ၂၃၊ ၂၀၂၅။

မကွေးတိုင်း၊ ပေါက်မြို့နယ်၊ စွန်ဆိပ်ကုန်းကျေးရွာနဲ့ သံပုရာအိုင်ကျေးရွာက ဒေသကာကွယ်ရေးစခန်း ၂ ခုကို စစ်ကော်မရှင်တပ်က တိုက်ခိုက်သိမ်းပိုက်သွားတယ်လို့ ဒေသကာကွယ်ရေးအဖွဲ့နဲ့နီးစပ်သူတွေထံက သိရပါတယ်။

စက်တင်ဘာ ၂၀ ရက် နေ့လယ် ၁၂ နာရီခန့်မှာ ယာကြီးပြင်ရွာပျူစောထီးစခန်းကနေ ထွက်လာတဲ့ စစ်ကော်မရှင်တပ်အင်အား ၂၀၀ ခန့်ပါစစ်ကြောင်းဟာ စွန်ဆိပ်ကုန်းကျေးရွာရှိ ဒေသကာကွယ်ရေးတပ်ဖွဲ့စခန်းတခုကို တိုက်ခိုက်ပြီးနောက် သိမ်းပိုက်ခံလိုက်ရတာလို့ ဆိုပါတယ်။

” ကျနော်တို့ဆီကို ရုတ်တရက်ဝင်လာပြီး ရွာကိုဝင်တယ်။ ပြီးတော့စခန်းကိုတန်းလာတယ်။ စခန်းကိုတော့ အင်အား ၅၀ လောက်နဲ့ဝိုင်းတယ်။ ပစ်ခတ်မှုက ၁၀ မိနစ်၊ ၁၅ မိနစ်လောက်ခံပစ်သေးတယ်။ ကျနော်တို့လည်း အင်အားမမျှတော့ ဆုတ်ပေးလိုက်ရတယ်”လို့ ပေါက်ဒေသကာကွယ်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

စစ်ကော်မရှင်တပ်ရဲ့ အင်အားသုံးဝင်စီးတာခံရလို့ ကာကွယ်ရေးအဖွဲ့ဝင်တွေထိခိုက်ကျဆုံးတာမရှိဘဲ ကာကွယ်ရေးအဖွဲ့ပိုင် ငွေသားကျပ်သိန်း ၂၀၀၊ လက်နက် ၃ လက်၊ ဒရုန်း ၂ စီး၊ အိုင်ကွန် ၁၆ လုံး၊ ကျည်ကာဦးထုပ် ၂၁ လုံး၊ မိုင်းမျိုးစုံ ၄၅ လုံး စစ်သုံးပစ္စည်းတွေနဲ့စားသောက်ကုန် စုစုပေါင်း ခန့်မှန်း ကျပ်သိန်း ၇၀၀ ခန့် ဆုံးရှုံးခဲ့တယ်လို့ ဆိုပါတယ်။

စစ်ကော်မရှင်တပ်စစ်ကြောင်းဟာ စွန်ဆိပ်ကုန်းစခန်းကို သိမ်းပိုက်ပြီးနောက် နေ့လယ် ၂ နာရီကျော်မှာ စွန်ဆိပ်ကုန်းနဲ့ ၁ မိုင်ကျော်အကွာရှိ သံပုရာအိုင်ကျေးရွာဒေသကာကွယ်ရေးစခန်းကို ထပ်မံဝင်ရောက်စီးနင်းပြီး ဆေးပစ္စည်းတွေနဲ့ရိက္ခာတွေကို မီးရှို့ဖျက်ဆီးခဲ့တယ်လို့ သိရပါတယ်။

အဲ့ဒီစစ်ကြောင်းဟာ ဒေသကာကွယ်ရေးစခန်းတွေကို စီးနင်းမီးရှို့ပြီးတဲ့နောက် ယာကြီးပြင်ကျေးရွာစခန်းကို နေ့ချင်းပြန်ဆုတ်ခွားသွားတယ်လို့ ဆိုပါတယ်။

စစ်ကော်မရှင်တပ်သားတွေ စစ်ကြောင်းထိုးဝင်လာလို့ စွန်ဆိပ်ကုန်း၊ သံပုရာအိုင်ကျေးရွာတွေက ဒေသခံ ၁,၅၀၀ ကျော် စစ်ဘေးရှောင်ခဲ့ရပြီး စက်တင်ဘာ ၂၃ ရက် ဒီကနေ့မှာ ဒေသခံအချို့နေရပ်ပြန်လည်ဝင်ရောက်နေထိုင်နေပြီလို့ သိရပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ စွန်ဆိပ်ကုန်းကျေးရွာနဲ့ သံပုရာအိုင်ကျေးရွာက PDF စခန်းတွေကိုသိမ်းဆည်းရမိပြီး လက်နက်၊ စစ်အသုံးအဆောင်ပစ္စည်းတွေနဲ့ ရိက္ခာ၊ ဆေးဝါးပစ္စည်းတွေကို သိမ်းဆည်းရမိတယ်လို့ ဓာတ်ပုံမှတ်တမ်းတွေနဲ့ ဖော်ပြထားပြီး မှတ်တမ်းဓာတ်ပုံတွေဟာ သိမ်းပိုက်ခံလိုက်ရတဲ့ စခန်းနဲ့ ကာကွယ်ရေးတပ်ဖွဲ့ပိုင်ပစ္စည်းတွေဖြစ်ကြောင်း မြေပြင်တပ်ဖွဲ့ဝင်တွေက အတည်ပြုပါတယ်။

ဩဂုတ်လ ၂၂ ရက်ကလည်း ပေါက်မြို့နယ်၊ ဆယ်ဝကျေးရွာမှာ စစ်ကောင်စီဘက်က လေကြောင်းကနေ ဗုံးကြဲခဲ့လို့ ရွာခံ ၂ ဦးသေဆုံးပြီး ၆ ဦးဒဏ်ရာရတယ်လို့ သိရပါတယ်။

စာတည်း – ဟိန်းစံ

တိုက်ပွဲတွင်း စစ်ကော်မရှင်တပ်ဖွဲ့ဝင် ၃ ဦးသေဆုံးပြီး လက်နက်ခဲယမ်းတွေလည်းသိမ်းဆည်း

မော်လိုက်၊ ဩဂုတ် ၂၀၊ ၂၀၂၅။

စစ်ကိုင်းတိုင်း၊ မော်လိုက်မြို့နယ်၊ ထော်သာရွာက စစ်ကော်မရှင်တပ်ဖွဲ့ဝင်တွေနဲ့ ပျူစောထီးတွေအထိုင်ချထားတဲ့ ပျူစောထီးစခန်းကို တော်လှန်ရေးတပ်တွေက တိုက်ခိုက်သိမ်းပိုက်ခဲ့ပြီးနောက် ပျူစောထီးတွေနဲ့ မိသားစုဝင် ၁၉၀ ဦးကိုဖမ်းဆီးခဲ့တယ်လို့ အမှတ် ၁ စစ်ဒေသက သြဂုတ် ၂၀ ရက် ဒီကနေ့မှာ ထုတ်ပြန်လာပါတယ်။

အဲ့ဒီစခန်းကို ဩဂုတ် ၁၅ ရက်မှာ မော်လိုက်ခရိုင်တပ်ရင်း (၂၊ ၄) နဲ့ ဖောင်းပြင်မြို့နယ် ပကဖ ပူးပေါင်းအဖွဲ့တို့က တိုက်ခိုက်သိမ်းပိုက်ခဲ့တာဖြစ်ပြီး တိုက်ပွဲတွေအတွင်း စစ်ကော်မရှင်တပ်ဖွဲ့ဝင် ၃ ဦးရဲ့ အလောင်းကို ရရှိပြီး ၉ ဦး ထိခိုက်ဒဏ်ရာရခဲ့တယ်လို့ ဆိုပါတယ်။

ဒါ့အပြင် အဲ့ဒီစခန်းကို ဦးဆောင်ထားတဲ့ ပျူစောထီးခေါင်းဆာင် အဲပန် အပါအဝင် ပျူစောထီးတွေရဲ့ မိသားစုဝင်စုစုပေါင်း ၁၉၀ ဦးကို ဖမ်းဆီးရမိပြီး ပျူစောထီးအဖွဲ့ဝင် ၂၀ ခန့်ကတော့ ထွက်ပြေးလွတ်မြောက်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

ထော်သာရွာစခန်း သိမ်းပိုက်နေချိန် ချင်းတွင်းမြစ်ကြောင်းအတိုင်း စုန်ဆင်းလာသော ဖလက်ခွံတွေပေါ်က စစ်ကော်မရှင်တပ်ဖွဲ့ဝင် အင်အား ၁၃၀ ခန့်နဲ့ တောင်းအင်ရွာက စစ်ကော်မရှင်တပ်အင်အား ၅၀ ခန့်ကလည်း စစ်ကူပေးဖို့ အင်းတပေါင်းရွာကိုထိုးစစ်ဆင်ခဲ့ပေမယ့် ထော်သာရွာကို သိမ်းပိုက်ခဲ့နိုင်ခဲ့တယ်လို့ ဆိုပါတယ်။

ဒါ့အပြင် ထော်သာရွာစခန်းသိမ်းတိုက်ပွဲအတွင်း ၆၀ မမ ပြောင်း၊ RPG အပါ လက်နက် ၂၃ လက်၊ ခဲယမ်းအချို့နဲ့ ငွေကျပ်သိန်း ၁၅၀ ကျော် သိမ်းဆည်းနိုင်ခဲ့တယ်လို့ သိရပါတယ်။

သတင်း – ဒိန်းဂျား၊

ရွှေဘို၊ ဇူလိုင် ၁၁၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်အတွင်းက စစ်ကောင်စီတပ်နဲ့ပျူစောထီးပူးပေါင်းအထိုင်စခန်း ၄ ခုကို သိမ်းပိုက်ခဲ့တဲ့ တိုက်ပွဲတွေအတွင်း ဒုတပ်ရင်းမှူး ၁ ဦးအရှင်ဖမ်းမိကာ လက်နက်၊ ခဲယမ်းအများအပြားသိမ်းယူနိုင်ခဲ့တယ်လို့ တော်လှန်ရေးတပ်ဖွဲ့တွေဆီက သိရပါတယ်။

ဇူလိုင် ၄ ရက် မနက် ၅ နာရီခန့်ကစတင်ကာ စခန်း ၃ ခုပေါင်း အင်အား ၁၄၀ ခန့်ရှိတဲ့ ဟင်္သာကြီးကျေးရွာရှိ စစ်တပ်စခန်းကုန်း၊ ဘိုးနတ်တောင်စခန်းကုန်းနဲ့ တောင်လှစခန်းကုန်းတွေကို ဒေသကာကွယ်ရေးပူးပေါင်းတပ်တွေဘက်က တပြိုင်နက်ဝင်ရောက်တိုက်ခိုက်ခဲ့တာလို့ ဆိုပါတယ်။

” (ဟင်္သာကြီး)ရွာထဲရောက်မှ သူပစ်ကိုယ်ပစ်ကျတာ။ စခန်း ၃ ခုလုံးကိုအဖွဲ့တွေ ခွဲခွဲပြီး တပြိုင်နက်တည်းဝင်လုံးတာ။ * *တွေဘက်ကဆို သေဆုံးများတယ်။ အချို့အလောင်းဆို နေရာဝင်ထိုင်ရတော့ ပုပ်စော်နံမှာစိုးလို့တခါတည်းရှင်းရတာ”လို့ ရွှေဘိုခရိုင်တပ်ရင်း ၂၃ IO(ထောက်လှမ်းရေး) အမျိုးသမီးက မြေ လတ်အသံကို ပြောပါတယ်။

စစ်ကောင်စီစခန်း ၃ ခုအနက် ဟင်္သာကြီးနဲ့ ဘိုးနတ်တောင်စခန်းကုန်းတို့ကို ညနေ ၃ လောက်မှာ သိမ်းဆည်းနိုင်ခဲ့ပြီး တောင်လှစခန်းကုန်းကိုတော့ ဇူလိုင် ၅ ရက်မနက်ပိုင်းမှာ သိမ်းပိုက်နိုင်ခဲ့တယ်လို့ ဆိုပါတယ်။

အထက်ပါစခန်း ၃ ခုကနေ ဆုတ်ခွာထွက်ပြေးသွားတဲ့ စစ်ကောင်စီတပ်ဖွဲ့တွေဟာ ဘိုးထွန်းကျော် ဗျူဟာစခန်းကုန်းမှာ သွားရောက်ပူးပေါင်းခဲ့တာကြောင့် ၎င်းစခန်းကုန်းကိုဆက်လက်တိုက်ခိုက်ခဲ့ရာ ဇူလိုင် ၇ ရက်မှာ ထပ်မံသိမ်းပိုက်နိုင်ခဲ့တယ်လို့ သိရပါတယ်။

ဒါ့အပြင် စစ်ကောင်စီတပ်ဖွဲ့တွေရဲ့ စခန်းတွေပတ်လည်မှာ မိုင်းအလုံး ၃၀၀ ကျော်ထောင်ထားပြီး ဗန်ကာတွေနဲ့ အခိုင်အမာတပ်စွဲထားတာကြောင့် တော်လှန်ရေးတပ်ဖွဲ့ဝင်တွေအနေနဲ့ အနီးကပ်ရင်ဆိုင် တိုက်ခိုက်ခဲ့ရတယ်လို့ ဆိုပါတယ်။

ရွှေဘိုခရိုင် ၉၇၀၆ တပ်ရင်းက ရှေ့တန်းတပ်ဖွဲ့ဝင် ၁ ဦးက”ကျည်ပေါက်တာအရမ်းများတယ်။ ဖိုက်တာနဲ့လည်း လာကြဲတယ်။ ကျနော်တို့ရဲဘော်တွေအကုန်လုံး အသေခံဝင်လုံးပြီးအရတိုက်ခဲ့ရတာ”လို့ ပြောပါတယ်။

အဆိုပါ တိုက်ပွဲတွေအတွင်း စစ်ကောင်စီဘက်က ၉ ဦးသေဆုံးခဲ့ကာ ဟင်္သာကြီးကျေးရွာထဲကနေ ကျောက်မြောင်းအခြေစိုက် ခမရ ၁၂ ဒုတပ်ရင်းမှူး ဗိုလ်မှူး ချမ်းလွင်မောင်ကို ဒဏ်ရာရလျက် အရှင်ဖမ်းမိခဲ့ပြီး သိမ်းဆည်းရမိတဲ့ စစ်ကောင်စီတပ်ဖွဲ့ဝင်တွေရဲ့ လက်နက်တွေဟာ များပြားတာကြောင့် အရေအတွက်စိစစ်ဆဲဖြစ်တယ်လို့ ဆိုပါတယ်။

လက်ရှိမှာ တိုက်ပွဲဖြစ်ပွားရာနေရာတွေကို စစ်ဆင်ရေးနယ်မြေအဖြစ်သတ်မှတ်ကာ မိုင်းရှင်းလင်းရေးနဲ့ နယ်မြေရှင်းလင်းရေး လုပ်ငန်းတွေလုပ်နေပြီး ဒေသကာကွယ်ရေးပူးပေါင်းတပ်ဖွဲ့ဝင်တွေဘက်ကလည်း ထိခိုက်ဒဏ်ရာရသူ ၇ ဦးထက်မနည်းရှိခဲ့ပြီး ရွေဘိုခရိုင် အမှတ် ၂၃ တပ်ရင်းက တပ်ဖွဲ့ဝင် ၄ ဦးဖြစ်တဲ့ ပိုင်ဇေ၊ သူရိန်၊ ရောင်နီ၊ အေစီတို့ တိုက်ပွဲကျသေဆုံးခဲ့တယ်လို့ သိရပါတယ်။

ဒီဗျူဟာကုန်းတွေဟာ စကျောက်မြောင်းအခြေစိုက် ခမရ ၁၂ တပ် စစ်ကောင်စီတပ်နဲ့ ပျူစောထီးတွေရှိတဲ့ မခေါက်ကျေးရွာတွေအနီးမှာရှိပြီး စစ်တပ်အားထားရတဲ့ ပျူစောထီးကျေးရွာနဲ့ ဗျူဟာကုန်းတွေဖြစ်ပါတယ်။

တိုက်ခိုက်မှုကိုတော့ ရွှေဘိုခရိုင်တပ်ရင်း ၁၅၊ ၁၈၊ ၂၃၊ ၂၆၊ ၁၇၀၁၊ ၉၇၀၆ တပ်ရင်းတွေနဲ့ Brave Brothers (Local PDF)၊ တိုက်နယ်(၄) ရွှေဘိုကျားကြီး(ပကဖ)တို့ စုပေါင်းတိုက်ခိုက်ခဲ့တယ်လို့ သိရပါတယ်။

စာတည်း – မြတ်

တိုက်ပွဲတွင်းပျူစောထီး ၁ ဦးသေဆုံးကာ ၁၈ ဦးဖမ်းမိ

ရွှေဘို၊ ဇွန် ၁၄၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ဆည်ပင်ကျွန်းရွာက ပျူစောထီးစခန်းကို တိုက်ခိုက်သိမ်းပိုက်ပြီး လက်နက်ခဲယမ်းတွေသိမ်းဆည်းခဲ့တယ်လို့ အမှတ်-၉၇၀၆ တပ်ရင်းရဲ့ တပ်ရင်းမှူး ကိုလကျ်ာ ကပြောပါတယ်။

ပျူစောထီးအင်အား ၂၀ ၀န်းကျင်ခန့်ရှိတဲ့ ဆည်ပင်ကျွန်းရွာက ပျူစောထီးအထိုင်စခန်းနဲ့ ကာကင်းတွေကို ဇွန် ၉ ရက် မနက် ၅ နာရီခွဲမှာ စတင်တိုက်ခိုက်ခဲ့ပြီး မနက် ၆ နာရီ ၁၅ မိနစ်မှာ အပြီးသတ်သိမ်းပိုက်နိုင်ခဲ့တာလို့ ဆိုပါတယ်။

အဆိုပါတိုက်ပွဲအတွင်းမှာ ပျူစောထီး ၁ ဦးသေဆုံးကာ ၁၈ ဦးအရှင်ဖမ်းမိခဲ့ပြီး G3 ၂ လက်၊ ကာဘိုင် ၆ လက်၊ ၁၂ ဗို့ ၂ လက် နဲ့ ဆက်စပ်ပစ္စည်းတွေကိုသိမ်းပိုက်ရရှိခဲ့တယ်လို့ အမှတ်-၉၇၀၆ တပ်ရင်း ရဲ့ တပ်ရင်းမှူး ကိုလကျ်ာ ကပြောပါတယ်။

“အဓိက သူတို့ကာကင်းစခန်းတွေ သေချာအခိုင်အမာလုပ်ထားတဲ့ ဘန်ကာတွေ၊ ဆက်သွယ်ရေးတူး မြောင်းတွေ၊ ခြံတွေ၊အဲ့မှာဆူးငြောင့်ခလုတ်တွေလုပ်ထားတဲ့ဟာတွေ၊ နောက်ပြီး ဒီမှာက Jammer တွေပါရှိတယ်၊ သူတို့ကတော့ ခိုင်ခိုင်မာမာတည်ဆောက်ထားတာ၊ အရင်ကတော့ စကစ ကလည်း ကူထိုင်ပေးတယ် သူတို့ဆီမှာ၊ အခုဟာကတော့ပျူတွေချည်းပဲ၊” လို့ အမှတ်-၉၇၀၆ တပ်ရင်း ရဲ့ တပ်ရင်းမှူး ကိုလကျ်ာ ကပြောပါတယ်။

ဖမ်းဆီးရမိထားတဲ့ ပျူစောထီး ၁၈ ဦးဟာ တရွာထဲနေအမျိုးသမီးငယ်တွေကို အလိုမတူဘဲအဓ္ဓမပြုကျင့်တာ၊ တရွာထဲနေပြည်သူတွေနဲ့ အခြားရွာက ပြည်သူတွေကို ပစ်ခတ်သတ်ဖြတ်ခဲ့သူတွေ ပါဝင်တာကြောင့် လက်ရှိမှာစစ်ဆေးမေးမြန်းနေပြီး တိုက်ပွဲအတွင်းထွက်ပြေးသွားတဲ့ ပျူစောထီးတွေကိုလည်း လိုက်လံရှာဖွေနေတယ်လို့ သူကဆက်ပြောပါတယ်။

တိုက်ပွဲအတွင်းမှာ ဆည်ပင်ကျွန်းရွာအတွင်း ပိတ်မိနေတဲ့ ပြည်သူတွေကိုဘေးလွတ်ရာကို ကယ်ထုတ်နိုင်ခဲ့ပြီး စားနပ်ရိက္ခာတွေထောက်ပံ့ပေးထားတယ်လို့လည်း သူကဆက်ပြောပါတယ်။

ဒါ့အပြင်တိုက်ပွဲအတွင်း စစ်ကောင်စီဘက်က Y12 လေယာဥ်နဲ့ ဗုံး ၁၉ လုံးကြဲချပြီး တိုက်ခိုက်တဲ့အပြင် ကျန်ပျူစောထီးကျေးရွာတွေဘက်ကလည်း လက်နက်ကြီးပစ်ကူပေးခဲ့ပေမယ့် တော်လှန်ရေး ပူးပေါင်းတပ်တွေဘက်က အထိအခိုက်မရှိခဲ့ဘူးလို့ဆိုပါတယ်။

ဒီတိုက်ခိုက်မှုကို ရွှေဘိုခရိုင် အမှတ် ၂၃၊ ၁၈၊ ၁၅၊ ၂၆၊ ၉၇ဝ၆၊ ၁၇၀၁ တပ်ရင်း နဲ့နယ်မြေ (ပကဖ) အဖွဲ့တွေ ပူးပေါင်းတိုက်ခိုက်ခဲ့တာလို့သိရပါတယ်။

စာတည်း – လင်း

အင်းတော်၊ ဧပြီ၈၊ ၂၀၂၅။

စစ်ကိုင်းတိုင်း၊ ကသာခရိုင်၊ အင်းတော်မြို့ရှိ စစ်ကောင်စီရဲ့ နောက်ဆုံးလက်ကျန်စခန်းဖြစ်တဲ့ ဂျပန်လိုဏ်ဂူစခန်းကုန်းကို ဧပြီ ၇ ရက်ည ၈ နာရီကျော်မှာ သိမ်းပိုက်ရရှိခဲ့တယ်လို့ မြေပြင်ရှိ ဒေသခံကာကွယ်ရေးတပ်ဖွဲ့ဝင်တွေဆီက သိရပါတယ်။

ဒါ့အပြင်တိုက်ခိုက်မှုတွေအတွင်း လေကြောင်းကနေတိုက်ခိုက်မှုတွေရှိခဲ့ပြီး ထိခိုက်သေဆုံးမှု အခြေအနေတွေကိုတော့ အတည်မပြုနိုင်သေးဘူးလို့ မြေပြင်စစ်ရေးအခြေအနေတွေနဲ့ နီးစပ်သူတဦးကပြောပါတယ်။

“စခန်းက ည ၈ နာရီလောက်မှာရတာ၊ သူတို့(စစ်ကောင်စီ)ဘက်က လေယာဥ်လာပစ်တယ်၊ ဘယ်နှစ်ကြိမ်မှန်းတောင် မသိတော့ဘူး။ နှစ်ဘက်လုံးအထိအခိုက်ရှိတယ်၊ အတိအကျတော့ မပြောနိုင်သေးဘူး”လို့ သူကပြောပါတယ်။

ဂျပန်လှိုဏ်ဂူစခန်းကုန်းဟာ အင်းတော်မြို့အပြင်ဘက် ရွှေဘို-မြစ်ကြီးနားကားလမ်းဘေးမှာရှိပြီး အင်းတော်မြို့ကို တော်လှန်ရေးတပ်တွေက သြဂုတ် ၂၄ ရက်ကတိုက်ခိုက်သိမ်းပိုက်ချိန် စစ်ကောင်စီတပ်တွေဟာ အဆိုပါစခန်းကုန်းကိုဆုတ်ခွာပြီး နောက်ဆုံးစခန်းအဖြစ် အခိုင်အမာတပ်စွဲထားခဲ့တာ ဖြစ်ပါတယ်။

ဂျပန်လှိုင်ဂူစခန်းကုန်းကိုသိမ်းပိုက်ချိန်မှာ စစ်သုံ့ပန်းတွေအရှင် ၄၀ ကျော်ဖမ်းဆီးရမိခဲ့ပြီး ဟောင်ဝစ်ဇာအပါအဝင် လက်နက်ကြီးတွေလည်း သိမ်းပိုက်ရရှိခဲ့တယ်လို့ တိုက်ခိုက်ရာမှာ ပါဝင်တဲ့တပ်ဖွဲ့ဝင်တဦးက အတည်ပြုပါတယ်။

ဒီတိုက်ပွဲကို ကချင်လွတ်လပ်ရေးတပ်မတော် – KIA၊ ကျောင်းသားတပ်မတော် – ABSDF၊ ပြည်သူ့ကာကွယ်ရေးတပ်မတော် – PDF ပူးပေါင်းတပ်တွေက တိုက်ခိုက်ခဲ့ကြတာပါ။

အင်းတော်မြို့က ရဲစခန်း၊ ထွေအုပ်ရုံးနဲ့ မြို့တွင်းရှိစစ်ကောင်စီကင်းစခန်းတွေကို တော်လှန်ရေး တပ်ဖွဲ့တွေက ၂၀၂၄ သြဂုတ် ၂၄ ရက်မှာသိမ်းပိုက်နိုင်ခဲ့တာဖြစ်ပြီး ၇ လအကြာမှာ မြို့ရဲ့နောက်ဆုံးလက်ကျန်စခန်းဖြစ်တဲ့ ဂျပန်လှိုဏ်ဂူစခန်းကုန်းကို သိမ်းပိုက်နိုင်ခဲ့တာပါ။

စာတည်း – လင်း

■ ရခိုင်ပြည်နဲ့ ပဲခူးတိုင်းအစပ်က နတ်တောင်ကာကင်းစခန်းကို AA သိမ်းပိုက်ထား

ပန်းတောင်း၊ ဖေဖော်ဝါရီ ၂၅၊ ၂၀၂၅။

ပဲခူးတိုင်း၊ ပန်းတောင်းမြို့နယ်၊ ရခိုင်ရိုးမပေါ်က ညောင်ကျိုး ပင်မစခန်းကုန်းကို အာရက္ခတပ်တော်(AA)နဲ့ ပူးပေါင်းတပ်တွေက ထိုးစစ်ဆင်တိုက်ခိုက်နေပြီး တိုက်ပွဲပြင်းထန်နေတယ်လို့ ​ဒေသခံစစ်ရေးသတင်းရင်းမြစ်က ပြောပါတယ်။

ပြီးခဲ့တဲ့ဖေဖော်ဝါရီ ၂၂ရက်မှာ ညောင်ကျိုးကျေးရွာနဲ့ တမိုင်ခန့်ကွာဝေးတဲ့ နတ်တောင်ကာကင်းစခန်းကို အာရက္ခတပ်တော် (AA)နဲ့ ပူးပေါင်းတပ်တွေက သိမ်းပိုက်နိုင်ခဲ့ပြီးနောက် ညောင်ကျိုးကျေးရွာရှိ ပင်မစခန်းကုန်းကို ဆက်ပြီးတိုက်ခိုက်နေတာဖြစ်တယ်လို့ ဆိုပါတယ်။

“ကျနော်တို့ပန်းတောင်းတပ်နယ်ထဲမှာရှိတဲ့ ညောင်ကျိုးပင်မကုန်းကို တိုက်နေပြီ။ ရှေ့ကကာကင်းကုန်းဖြစ်တဲ့ နတ်တောင်ကုန်းကို စကစလက်လွှတ်လိုက်ရပြီလို့သိထားရတယ်။ အခုပင်မကုန်းစခန်းပွဲလည်း တော်တော်ကြမ်းနေတယ်”လို့ မြေပြင်အခြေအနေကိုသိရှိတဲ့ ဒေသခံစစ်ရေးသတင်းရင်းမြစ်က ပြောပါတယ်။

ညောင်ကျိုးကျေးရွာရှိ ပင်မကုန်းစခန်းတိုက်ပွဲအတွင်း စစ်ကောင်စီတပ်ဘက်မှ တိုက်ခိုက်ရေးလေယာဥ်အပြင် စက်တပ်လေထီးတွေနဲ့ပါ လူနေကျေးရွာတွေကို ဗုံးကြဲတိုက်ခိုက်နေတယ်လို့ ဆိုပါတယ်။

“ဒီဖက်မှာက ထိတွေ့မှုတွေရော၊ တိုက်ပွဲတွေရော တောက်လျောက်ဖြစ်နေတာ။ စစ်တပ်က ပါရာမိုတာတွေနဲ့ အရပ်သားပစ်မှတ်တွေကို ဗုံးကြဲနေတယ်။အများကြီးထိခိုက်မှုတွေရှိတယ်။ ပပွေး၊လင်းတဲ ရွာတွေကို ကြဲတာ။ ပြည်သူတွေပဲရှိကြတာ။ အဲဘက်မှာ တော်လှန်ရေးအဖွဲ့ဆိုတာ တောထဲမှာပဲနေကြတာဗျ”လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒါ့အပြင် ညောင်ကျိုးတိုက်ပွဲအတွင်းမှာ စစ်ကောင်စီတပ်သားတွေဟာ ကစဉ့်ကလျားထွက်ပြေးနေကြတာရှိပြီး အရပ်သားတွေကိုပါ လမ်းပြအဖြစ် ဖမ်းခေါ်နေတာတွေလည်း ရှိနေတယ်လို့ အထက်ပါတော်လှန်ရေးတပ်ဖွဲ့ဝင်က ပြောပါတယ်။

ညောင်ကျိုးပင်မစခန်းမှာ ညောင်ခြေထောက်ကျေးရွာအခြေစိုက် ကပစ ၆ နဲ့ ၁၀ မိုင်ခန့် သာဝေးပါတယ်။

ပန်းတောင်း-တောင်ကုတ်လမ်းမပေါ်မှာရှိတဲ့ စစ်ကောင်စီတပ်ရဲ့ကာကင်စခန်းတွေနဲ့ ပင်မကုန်းစခန်းတွေ ထိုးစစ်ဆင်တိုက် ခိုက်ခံနေရတာနဲ့ပတ်သက်ပြီး CDMဗိုလ်ကြီး ဇင်ယော်က အခုလိုသုံးသပ်ပြောဆိုပါတယ်။

“ညောင်ကျိုးပြီးသွားရင်တော့ စကစရဲ့ခံစစ် စခန်းတွေဟာ ကြီးကြီးမားမားမရှိတော့ဘူး။ ကပစ ၆ အထိကို နောက်ကနေလိုက်ပြီးတော့ တိုက်နိုင်တဲ့အနေအထားမျိုးဖြစ်သွားမယ်။ ညောင်ကျိုးအဖွဲ့တွေ ဆုတ်ပြေးရင်လည်း ကပစ ၆ ဖက်ကိုပဲ လမ်းကြောင်းရှိတယ်။ ကပစ ၆ ဟာ သံရည်ကျိုစက်ရုံဖြစ်တဲ့အတွက် တိုက်နေပြီဆိုရင်တောင်မှ ထုတ်လုပ်ရေးလုပ်ငန်းလုပ်နိုင်တော့မှာမဟုတ်ဘူး။ ခံစစ်ဆင်ရမယ်၊ ပြင်ရမယ်ဖြစ်တော့ သံမဏိထုတ်လုပ်ရေးရပ်ဆိုင်းသွားမှာဖြစ်တဲ့အတွက် ကျန်တဲ့စက်ရုံတွေကိုပါ အကြပ်အတည်းဖြစ်စေပါတယ်”လို့ ဆိုပါတယ်။

ပဲခူးတိုင်းနဲ့ ရခိုင်ပြည်နယ်အစပ်၊ ပန်းတောင်း-တောင်ကုတ်ကားလမ်းမရှိ ရခိုင်ရိုးမပေါ်က စစ်ကောင်စီတပ်စခန်းတွေဖြစ်တဲ့ မိုးထိတောင်၊ ပန်းကန်ကွဲ၊ တောင်ပုံကြီး၊ နတ်တောင်ကုန်းတို့ကို အာရက္ခတပ်တော် (AA)နဲ့ တော်လှန်ရေးပူးပေါင်းတပ်တွေက တိုက်ခိုက်သိမ်းပိုက်ထားပါတယ်။

စာတည်း – ဈာန်မြင့်