စစ်ကိုင်း၊ ဧပြီ ၄၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်နဲ့ ကနီမြို့နယ်ထဲကို ဧပြီ ၃ ရက် နေ့လယ်ပိုင်းကစပြီး စစ်ကောင်စီ တပ်ဖွဲ့ဝင်တွေက စက်တပ်လေထီး (Paramotar) နဲ့ဆက်တိုက်ဗုံးကြဲတိုက်ခိုက်ခဲ့တယ်လို့ ချင်းတွင်းရိုးမ မဟာမိတ်တပ်ပေါင်းစုဆီက သိရပါတယ်။

နေ့လယ် ၁၂ နာရီခွဲကနေ ည ၁၀ နာရီအတွင်း ကနီမြို့နယ်အရှေ့ခြမ်း၊ နတ်ကြီးရွာ၊ မုဌောရွာ၊ တောင်ပျောက်ရွာနဲ့ ယင်းမာပင်မြို့နယ်အရှေ့ခြမ်း၊ နှောပင်ရွာ၊ ကျောက်မှော်ရွာ၊ အင်းဘတ်ရွာတို့ကို စက်တပ်လေထီးတို့နဲ့ ဗုံးကြဲခဲ့တာလို့ ဆိုပါတယ်။

“မုံရွာ နမခက တက်လာတဲ့ စက်တပ်လေထီး (Paramotar) ၁ စီးက နေ့လယ် ၁၂ နာရီခွဲမှာ ကနီမြို့နယ် အရှေ့ခြမ်း နတ်ကြီးရွာ၊ မုဌောရွာ၊ တောင်ပျောက်ရွာ တို့ကိုဗုံးကြဲသွားတာ၊ ပြည်သူတော့အထိအခိုက်မရှိဘူး၊ မုဌောရွာက ဘုရားစေတီပုထိုးတွေဗုံးမှန်တယ်၊ ဓမ္မာရုံက သွပ်တွေလည်း ပေါက်သွားတယ်”လို့ ချင်းတွင်းရိုးမ မဟာမိတ်တပ်ပေါင်းစုမှ ရဲဘော်မြတ်ကိုက ပြောပါတယ်။

ဒါ့အပြင် ည ၉ နာရီခွဲလောက်မှာလည်း မုံရွာ နမခဘက်ကတက်လာတဲ့ စက်တပ်လေထီး ၁ စီးက ယင်းမာပင်မြို့နယ်အရှေ့ခြမ်းရှိ နှောပင်ရွာ၊ ကျောက်မှော်ရွာ၊ အင်းဘတ်ရွာတို့ကို ဗုံး ၄ လုံးကြဲချခဲ့ပါ တယ်။

ဒီဗုံးကြဲမှုမှာတော့ ကျွန်းမှော်ရွာက အသက် ၆၉ နှစ်အရွယ် ဒေါ်တင်မြိုင်ရဲ့ခြေထောက်မှာ ဒဏ်ရာပြင်းထန်ရရှိခဲ့တယ်လို့ပဲကနဦးသိထားရတယ်လို့ ရဲဘော်မြတ်ကိုက ပြောပါတယ်။

ဗုံးကြဲပြီး ၁၀ မိနစ်လောက်အကြာမှာ မုံရွာ နမခ နဲ့ ချင်းတွင်းတံတားထိပ်ရှိ အောင်ဇေယျ တပ်ကုန်းကနေ ဟောင်ဝစ်စာတွေနဲ့ပစ်ခတ်ခဲ့တယ်လို့ သူကဆက်ပြောပါတယ်။

ဒီဗုံးကြဲပစ်ခတ်မှုတွေအတွင်းရရှိခဲ့တဲ့ ထိခိုက်ပျက်စီးမှုအသေးစိတ်ကိုတော့ မြေလတ်အသံက ဆက်လက် စုံစမ်းနေပါတယ်။

ဧပြီ ၂ ရက်ကလည်း စစ်ကိုင်းတိုင်း၊ ဆားလင်းကြီးမြို့နယ်နဲ့ ယင်းမာပင်မြို့နယ်အတွင်းရှိ တရုတ်ကြေးနီ စီမံကိန်းအနီးက ကျေးရွာတွေကို စစ်ကောင်စီဘက်က စစ်ကြောင်းထိုးခဲ့တဲ့အတွက် ဒေသခံ ၁ သောင်းကျော် ထွက်ပြေးတိမ်းရှောင်နေရပါတယ်။

စာတည်း – လင်း

စစ်ကိုင်း၊ ဧပြီ ၃၊ ၂၀၂၅ ။

စစ်ကိုင်းတိုင်း၊ ဆားလင်းကြီးနဲ့ ယင်းမာပင်မြို့နယ်အတွင်းရှိ တရုတ်ကြေးနီစီမံကိန်းအနီးက ကျေးရွာတွေကို စစ်‌ကြောင်း ၂ ကြောင်းခွဲပြီး ထိုးနေလို့ ဒေသခံ ၁၀,၀၀၀ ကျော် ထွက်ပြေးတိမ်းရှောင်နေရတယ်လို့ ချင်းတွင်းရိုးမ မဟာမိတ်တပ်ပေါင်းစုဆီက သိရပါတယ်။

ဧပြီ ၂ ရက် မနေ့ညပိုင်းကစတင်ကာ ဝမ်ပေါင်ကုမ္ပဏီကတပ်ဖွဲ့နဲ့ မုံရွာ နမခ ကလာတဲ့ စစ်ကောင်စီတပ်ပူးပေါင်းအင်အား ၁၃၀ ခန့်ဟာ စစ်ကြောင်း ၂ ကြောင်းခွဲပြီး ရွာတွေကို ဝင်ရောက်လာတာလို့ ဆိုပါတယ်။

“ ဝမ်ပေါင်ကုမ္ပဏီထဲကလည်း အင်အားတွေထွက်တယ်၊ ‌နမခ ဘက်ကလည်း အောင်ဇေယျတပ်ကုန်းကို တက်လာပြီး စစ်ကြောင်းကညှပ်ထိုးလာတာ၊ စစ်ကြောင်းက ၂ ကြောင်း ညှပ်ထိုးလာတာ။” လို့ ချင်းတွင်းရိုးမ မဟာမိတ်တပ်ပေါင်းစု ရဲဘော် မြတ်ကို က ပြောပါတယ်။

စစ်ကြောင်းထိုးလာလို့ ဆားလင်းကြီးမြို့နယ် ယမားတံတားတောင်ဘက်က ဒုံးတောရွာ၊ ဂုံတောရွာ၊ ရွာသာရွာ၊ ယင်းမာပင်မြို့နယ် ယမားမြောက်ဘက်က ကျေးစာကျရွာ၊ ဘိန်းနွယ်ချောင်ရွာ၊ ပေကုန်းရွာတွေနဲ့ အနီးတဝိုက်ကျေးရွာတွေက ဒေသခံ ၁၀,၀၀၀ကျော် ဘေးလွတ်ရာကို ထွက်ပြေးတိမ်းရှောင်နေရတယ်လို့ ဆိုပါတယ်။

မတ် ၂၈ ရက်မှာ လှုပ်ခတ်ခဲ့တဲ့အင်အားပြင်းငလျင်ကြောင့် စစ်ကိုင်း၊ မန္တလေးနဲ့နေပြည်တော် ဒေသတွေမှာ လူသေဆုံးမှုများပြားခဲ့တာကြောင့် ကယ်ဆယ်ရေးလုပ်ငန်းတွေကို လုပ်ဆောင်နိုင်ဖို့ NUG အစိုးရဘက်က ခုခံကာကွယ်စစ်ကလွဲရင် ထိုးစစ် ၂ ပတ်ရပ်နားမယ်လို့ ထုတ်ပြန်ထားပါတယ်။

စစ်ကောင်စီဘက်ကလည်း ၃ ပတ်ကြာ အပစ်ရပ်မယ်လို့ ယမန်နေ့ညပိုင်းမှာ ထုတ်ပြန်ခဲ့ပေမယ့် မနေ့ညပိုင်းမှာပဲ ဆားလင်းကြီးဒေသကို စစ်ကြောင်းထိုးနေသလို မန္တလေးတိုင်း၊ ညောင်ဦးမြို့နယ်အတွင်းကိုလည်း ဧပြီ ၁ ရက်ကစတင်ကာ စစ်အင်အားအလုံးအရင်းနဲ့ စစ်ကြောင်းထိုးနေတာပါ။

“ စစ်ဘေးရှောင်စခန်းရှိပြီး လူစုစုဝေးဝေးရှိရင်လည်း စက်တပ်လေထီး Paramotar နဲ့လာပြီးတော့ ဗုံးခဏခဏ ကြဲချတယ်။ အကြမ်းဖက်စစ်ကောင်စီက ပြည်သူတွေကို ရည်ရွယ်ချက်ရှိရှိနဲ့ လိုက်သတ်နေတာ။” လို့ ရဲဘော် မြတ်ကို က ပြောပါတယ်။

သတင်း – ဒိန်းဂျား၊ စာတည်း – ဟိန်းစံ

ပုံစာ – စစ်ကောင်စီစစ်ကြောင်းထိုးလာတာကြောင့် ညတွင်းချင်းထွက်ပြေးနေသည့် ယင်းမာပင်ဒေသခံများ

စစ်ကိုင်း၊ ဇန်နဝါရီ ၂၀၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်မှာ ၄ နှစ်နီးပါး စစ်ရှောင်နေကြရတဲ့ ဘန့်ဘွေးရွာက စစ်ရှောင်တွေဟာ စားနပ်ရိက္ခာခက်ခဲနေသလို သောက်သုံးရေရှားပါးမှုပါ ကြုံတွေ့လာရတယ်လို့ စစ်ရှောင်တွေထံက သိရပါတယ်။

ယင်းမာပင်မြို့နယ်၊ ဘန့်ဘွေးရွာဟာ ၂၀၂၂ ဖေဖော်ဝါရီလကတည်းက စစ်ကောင်စီက တပ်စွဲထားတဲ့အတွက် ယာထဲ၊ တောထဲမှာ ယာယီထန်းလက်တဲတွေထိုးပြီး နေလာကြတာဟာ ၃ နှစ်နီးပါးရှိနေပြီလို့ ဒေသခံတွေက ပြောပါတယ်။

စစ်ရှောင်တွေဟာ စားသောက်ရေးအတွက် နေ့စားအလုပ်၊ မွေးမြူရေးအလုပ်တွေကို လုပ်ကိုင်ကြသလို ဆိုင်ကယ်၊ စက်ဘီးပြင်တာ၊ ဈေးရောင်းတာစတဲ့အလုပ်တွေကိုလည်း လုပ်ကိုင်ပြီးနေကြရတယ်လို့ ဆိုပါတယ်။

ဘန့်ဘွေးရွာက စစ်ရှောင်တွေထဲမှာ ကိုယ်ပိုင်ယာခင်းရှိသူတွေက ယာခင်းထဲမှာ အိမ်ဆောက်ပြီး မွေးမြူရေး၊ စိုက်ပျိုးရေးတွေလုပ်နိုင်ကြသော်လည်း ယာခင်းအပိုင်မရှိသူတွေကတော့ သူများယာမြေပေါ်မှာ တဲထိုးနေရတာကြောင့် မွေးမြူရေး၊ စိုက်ပျိုးရေးအလုပ်တွေကို မလုပ်နိုင်ကြဘူးလို့ ဆိုပါတယ်။

အခုလို နွေရာသီရောက်လာတဲ့အခါ စစ်ရှောင်တွေဟာ သောက်သုံးရေရှိဖို့ အခက်အခဲနဲ့ရင်ဆိုင်လာရတယ်လို့ စစ်ရှောင်အမျိုးသမီးတဦးက မြေလတ်အသံကို ပြောပါတယ်။

“သောက်သုံးရေ ခက်ခဲတယ်။ သွားခပ်ရတာလည်း တအားဝေးတယ်။” လို့ သူက ပြောပါတယ်။

လက်ရှိမှာ စစ်ရှောင်စခန်းအတွက် သောက်သုံးရေတွင်းဟာ ၁ တွင်းတည်းသာရှိပြီး အဲဒီရေကိုခပ်ဖို့ ဆိုင်ကယ်နဲ့ မိနစ် ၂၀ ခန့်သွားရကာ နွားလှည်းနဲ့သွားမယ်ဆိုပါက ၁ နာရီကျော်ကြာအချိန်ပေးရတယ်လို့ ဆိုပါတယ်။

ယင်းမာပင်မြို့နယ်၊ ဘန့်ဘွေးရွာက စစ်ရှောင်တွေကို တချို့က ပျူစောထီးကျေးရွာက လူတွေလို့အမြင်ရှိကြသော်လည်း စစ်ကောင်စီနဲ့ပေါင်းပြီး ရွာထဲမှာ နေထိုင်တာဟာ အိမ်ခြေ ၂၀ ခန့်သာရှိပြီး အိမ်ခြေ ၈၀၀ နီးပါးက ရွာမှာမနေဘဲ စစ်ရှောင်နေရတာဖြစ်တယ်လို့ ဘန့်ဘွေးစစ်ရှောင်တွေက ဆိုပါတယ်။

ယင်းမာပင်မြို့နယ် ထန်းဇင်၊ ဘန့်ဘွေးရွာမ၊ ဘန့်ဘွေးမြောက်ရွာက ပြည်သူ ၅,၀၀၀ နီးပါးဟာ သောက်သုံးရေ အပြင် ကျန်းမာရေး၊ ပညာရေးနဲ့ စားဝတ်နေရေးအတွက် အကူအညီအထောက်အပံ့တွေ လိုအပ်နေတာဖြစ်တယ်လို့ ဒေသခံတွေက ပြောပါတယ်။

စာတည်း – လင်းဇေ