ဘုတလင်၊ မေ ၂၃၊ ၂၀၂၆။

စစ်ကိုင်းတိုင်း၊ ဘုတလင်မြို့နယ်၊ ကံသစ်ကျေးရွာမှာ မိုင်းနင်းမိပြီး မိသားစု ၃ ဦး သေဆုံးခဲ့တယ်လို့ မုံရွာမြို့နယ်ပကဖ တာဝန်ရှိသူတွေဆီက သိရပါတယ်။

မေ ၂၂ ရက်မနက် ၇ နာရီခန့်မှာ စစ်ရှောင်ရာကနေ ရွာထဲပြန်ဝင်လာကြတဲ့ ရွာခံမိသားစု ၃ ဦးဟာ ရွာလမ်းပေါ်မှာ မိုင်းနင်းမိခဲ့တာလို့ ဆိုပါတယ်။

“စစ်ကြောင်းဝင်တော့ ရွာကလူတွေ ရှောင်နေကြတာ။ မနေ့ကမနက် စစ်ကြောင်းပြန်ထွက်သွားတော့ ပြန်ဝင်ကြတာမှာ ရွာထဲမှာထောင်ထားတာကိုမသိဘဲ နင်းမိတာ”လို့ မုံရွာမြို့နယ်ပကဖ တာဝန်ရှိသူတဦးက ပြောပါတယ်။

မိုင်းနင်းမိတာကြောင့် အသက် ၅ နှစ်အရွယ် သမီးဖြစ်သူနဲ့အသက် ၃၀ ကျော်ဝန်းကျင်အရွယ် မိဘ ၂ ဦးတို့နေရာမှာတင်သေဆုံးခဲ့ပြီး အလောင်းတွေကိုတော့ ရွာခံတွေကပင်ကျေးရွာသုဿာန်မှာ သင်္ဂြိုဟ်လိုက်ကြတယ်လို့ ဆိုပါတယ်။

မေလ ၂၁ ရက်မှာ အင်အား ၂၀၀ ခန့်ပါတဲ့ စစ်ကော်မရှင်စစ်ကြောင်းဟာ ကံသစ်ရွာကိုရောက်လာပြီး တပ်စွဲနေထိုင်နေတာကြောင့် ကျေးရွာနေပြည်သူအားလုံးဘေးလွတ်ရာကို တိမ်းရှောင်ခဲ့ကြရပြီး စစ်ကြောင်းပြန်ထွက်သွားပြီးနောက် ရွာထဲပြန်ဝင်နေကြပြီလို့ သိရပါတယ်။

မေလ ၉ ရက်ကလည်း မုံရွာမြို့နယ်၊ ဘူးတောင်းကန်ကျေးရွာမှာ စစ်ကော်မရှင်ပစ်တဲ့ လက်နက်ကြီးထိမှန်ပြီး ကလေးငယ်အပါအဝင် ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

မုန်း၊ မေ ၇၊ ၂၀၂၆။

ပဲခူးတိုင်း၊ ကျောက်ကြီးမြို့နယ်၊ မုန်းမြို့မှာ မြေမြှုပ်မိုင်းထိလို့ ဆယ်ကျော်သက်မိန်းကလေး ၁ ဦး မျက်လုံးနဲ့ခြေထောက် ၁ ဖက်စီ ဆုံးရှုံးခဲ့ရတယ်လို့ မိသားစုနဲ့နီးစပ်သူတွေထံက သိရပါတယ်။

မိုင်းထိသူဟာ မုန်းမြို့၊ အမှတ် ၄ ရပ်ကွက်နေထိုင်တဲ့ အသက် ၁၅ နှစ်အရွယ် မချယ်ရီလင်း ဖြစ်ပြီး မေလ ၂ ရက် မနက် ၉ နာရီခန့်မှာ ၆ ရပ်ကွက်အနောက်ကြောရှိ ဥယျာဥ်ခြံအတွင်း သီးနှံတွေဝယ်ဖို့သွားရောက်စဥ် မြေမြှုပ်မိုင်းနင်းမိခဲ့တာလို့ ဆိုပါတယ်။

“အမေနဲ့လိုက်သွားတာ။ ခြံထဲကို ၃ ယောက်သွားတာ။ ခြံရှင်ရယ်၊ အမေရယ်၊ သူရယ်။ ခြံ ၂ ခြံကြားမှာ (မိုင်း)ပေါက်တာ။ သူကအလယ်က၊ အမေကျော်သွားပြီးမှ မိုင်းကပေါက်တာ” လို့ မိသားစုနဲ့နီးစပ်သူက မြေလတ်အသံကို ပြောပါတယ်။

မိုင်းထိတာကြောင့် မချယ်ရီလင်းမှာ ခြေထောက်နဲ့မျက်လုံးတွေမှာ မိုင်းစထိမှန်ဒဏ်ရာတွေအများအပြားရရှိခဲ့ပြီး တောင်ငူဆေးရုံမှာဆေးကုသမှုခံယူခဲ့ရကာ ရရှိဒဏ်ရာပြင်းထန်တာကြောင့် ညာဘက်ခြေထောက်ဖြတ်တောက်လိုက်ရသလို မျက်စိ ၁ လုံးကိုလည်း ထုတ်လိုက်ရတယ်လို့ သိရပါတယ်။

ဒါ့အပြင်ကျန်ရှိနေတဲ့ မျက်လုံး ၁ လုံးကိုလည်း ခွဲစိတ်ထားရပြီး ပြန်ကောင်းလာဖို့မျှော်လင့်နေရသလို ဘယ်ခြေထောက် ၁ ချောင်းမှာလည်း မိုင်းအစဝင်ဒဏ်ရာအများအပြားရရှိထားပါတယ်။

မိုင်းထိပြီး ဆေးကုသနေရတဲ့ ကလေးငယ်အတွက် ဆေးဖိုးဝါခအချို့ကို အလှူရှင်အချို့ကလှူဒါန်းမှုတွေလည်းရှိနေပြီး ဆေးကုသစရိတ်ကြီးမာတာကြောင့် မိသားစုဝင်တွေအနေနဲ့ ငွေကြေးလိုအပ်မှုတွေတော့ရှိနေတယ်လို့ သိရပါတယ်။

မိုင်းထိတဲ့ မိန်းကလေးငယ်ရဲ့ ဖခင်ဖြစ်သူကလည်း ၂၀၀၇ ခုနှစ်က မုန်းမြို့အနီး တောင်ပေါ်မှာ ဟင်းရွက်ခူးသွားချိန်မိုင်းထိလို့ မျက်စိ ၂ ဖက်ကွယ်ထားသလို ခြေထောက် ၁ ဖက်လည်း ဆုံးရှုံးထားတယ်လို့ ဆိုပါတယ်။

မုန်းမြို့အနီးဝန်းကျင်မှာ ၂ ဖက်လက်နက်ကိုင်တပ်ဖွဲ့တွေထောင်ထားတဲ့ မိုင်းတွေကြောင့် ဒေသခံတွေအနေနဲ့ မြေမြှုပ်မိုင်းနင်းမိတဲ့ဖြစ်စဥ်တွေ မကြာခဏဆိုသလိုဖြစ်ပွားနေပြီး သေဆုံး၊ ဒဏ်ရာရတာတွေ ဖြစ်ပေါ်နေတာပါ။

ပြီးခဲ့တဲ့နှစ် စက်တင်ဘာ ၂၈ ရက်ကလည်း ကျောက်ကြီးမြို့နယ်၊ မုန်းမြို့၊ ရေအိုးစင်ကျေးရွာအနီးမှာ ထင်းခုတ်သွားတဲ့အမျိုးသား မိုင်းထိလို့သေဆုံးသွားခဲ့တယ်လို့ သိရပါတယ်။

ကျောက်ကြီး၊ စက်တင်ဘာ ၂၉၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ မုန်းမြို့၊ ရေအိုးစင်ကျေးရွာအနီးမှာ ထင်းခုတ်သွားတဲ့အမျိုးသား မြေမြှုပ်မိုင်းထိပြီး သေဆုံးသွားတယ်လို့ ကူညီလုပ်ဆောင်ပေးခဲ့သူတွေဆီက သိရပါတယ်။

မိုင်းထိသေဆုံးသူဟာ မုန်းမြို့၊ အမှတ် ၄ ရပ်ကွက်နေ အသက် ၅၀ အရွယ် ဦးအောင်ဘုဆိုသူဖြစ်ပြီး စက်တင်ဘာ ၂၈ ရက် ညနေ ၃ နာရီခန့်မှာ နေအိမ်ကနေ ရေအိုးစင်ကျေးရွာဘက် ထင်းကောက် အသွား မြေမြှုပ်မိုင်းနင်းမိခဲ့တာလို့ ဆိုပါတယ်။

“လာပို့သူတွေအပြောအရတော့ ထင်းသွားခွေတယ်ပြောတယ်။ သူ့ရပ်ကွက်ကနေ ရေအိုးစင် ကျေးရွာနား သင်္ချိုင်းကုန်းနားမှာ သွားရင်းထိတာ။ “လို့ ကူညီပေးခဲ့သူတဦးကပြောပါတယ်။

မိုင်းထိလူနာကို မုန်းကနေ တောင်ငူမြို့အထိ ဘေးတွဲဆိုင်ကယ်နဲ့မောင်းလာရတာ၊ လမ်းခရီးကြမ်းတာ ကြောင့် သွေးထွက်လွန်ပြီးသေဆုံးသွားတာဖြစ်နိုင်တယ်လို့ သူကဆက်ပြောပါတယ်။

မိုင်းထိလို့ ကိုအောင်ဘုရဲ့ ခြေထောက်နှစ်ဖက်စလုံးမှာ ပြတ်ထွက်ပြီး အသားစတွေဖွာလန်ကြဲ ဒဏ်ရာရခဲ့ကာ ဒေသခံတွေက ဘေးတွဲဆိုင်ကယ်နဲ့ တောင်ငူဆေးရုံပို့ခဲ့ရာ ဆေးရုံအရောက်မှာ သေဆုံးသွားခဲ့တာပါ။

မုန်းမြို့နဲ့အနီး ကျေးရွာတွေတဝိုက်မှာ စစ်ကော်မရှင်တပ်ရော KNLA ပူးပေါင်းတပ်တွေဘက်ကလည်း လှုပ်ရှားသွားလာနေတာဖြစ်လို့ ခုနင်းမိတဲ့ မြေမြှုပ်မိုင်းဟာ ဘယ်အဖွဲ့အစည်းဘက်ကထောင်ထားတဲ့ မိုင်းဆိုတာ အတည်မပြုနိုင်သေးဘူးလို့ ဆိုပါတယ်။

ကိုအောင်ဘုရဲ့အလောင်းကိုတော့ မိသားစုဝင်တွေက နေအိမ်ပြန်မသယ်တော့ဘဲ စက်တင်ဘာ ၂၉ ရက်ညနေမှာပဲ တောင်ငူမြို့မှာ သဂြိုလ်သွားမယ်လို့သိရပါတယ်။

ဇွန် ၅ ရက်ကလည်း ထန်းတပင်မြို့နယ်၊ ရွှေအင်းမကျေးရွာမှာ မိသားစုဝမ်းရေးအတွက် အင်ဥထွက်ကောက်တဲ့ အမျိုးသား မိုင်းထိလို့ ခြေထောက်ပြတ်သွားတယ်လို့ သိရပါတယ်။

စာတည်း – လင်း

ကနီ၊ စက်တင်ဘာ ၁၆၊ ၂၀၂၅။

စစ်ကိုင်းတိုင်း၊ ကနီမြို့နယ်၊ ချောင်းမအရှေ့ရွာကအမျိုးသားတဦး စစ်ကော်မရှင်တပ်တွေထောင်ထားခဲ့တဲ့ မြေမြုပ်မိုင်းနင်းမိပြီး ခြေကျင်းဝတ်ပြတ်သွားတယ်လို့ တော်လှန်ရေးတပ်ဖွဲ့ဝင်တဦးဆီက သိရပါတယ်။

စက်တင်ဘာ ၁၅ ရက်မှာ ဘက်ထရီအိုးပြန်ယူဖို့ ရွာထဲဝင်သွားတဲ့ ၃၈ နှစ်အရွယ် အမျိုးသား ၁ ဦး နေအိမ်ခြံဝင်းထဲမှာပဲ နင်းမိုင်းမိပြီး ခြေကျင်းဝတ်ပြတ်တောက်ခဲ့တာလို့ တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

“မရှင်းလင်းသေဘူး၊ ရှင်းလင်းရေးက မပြီးသေးဘူး၊ အဲ့တော့မဝင်ဖို့ တားထားသေးတယ်၊ သူက ခိုးဝင်တာ၊ မသိမသာ ခိုးဝင်ပြီးတော့ ဘက်ထရီအိုးယူတာ၊ ဘက်ထရီအိုးဝင်ယူတော့ကျ အဲ့မှာ နင်းမိုင်းမိတယ်၊ နင်းမိုင်းက ခြေကျင်းဝတ်ပေါ့၊ ခြေကျင်းဝတ်ကနေ ဖြတ်လိုက်ရတာ၊ ပြီးတော့ ပေါင်ရိုးလည်းကျိုးတယ်။” လို့ အထက်ပါ တော်လှန်ရေးတပ်ဖွဲ့ဝင်တဦးက ပြောပါတယ်။

လက်ရှိမှာ နင်းမိုင်းမိသူကို ဒေသတွင်းဆေးရုံတခုမှာ ဆေးကုသမှုပေးထားပြီး အသက်အန္တရာယ်ကတော့ မစိုးရိမ်ရတော့ဘူးလို့ သိရပါတယ်။

ချောင်းမရွာထဲကို စစ်ကော်မရှင်တပ်တွေ ထောင်ထားခဲ့တဲ့ မိုင်းနဲ့ စစ်လက်နက်ပစ္စည်း အကြွင်းအကျန်တွေရှိနေနိုင်သေးတာကြောင့် တော်လှန်ရေးတပ်ဖွဲ့ဝင်တွေ ရှင်းလင်းပြီးမှသာ ပြည်သူတွေ ပြန်လည်ဝင်ရောက်စေချင်တယ်လို့ အထက်ပါတော်လှန်ရေးတပ်ဖွဲ့ဝင်က ပြောပါတယ်။

စစ်ကော်မရှင်တပ်တွေအထိုင်ချထားတဲ့ ချောင်းမရွာအနီးမှာ ခမရ ၁၆ က ဗိုလ်မှူး သူရိန် ဦးဆောင်တဲ့ အင်အား ၁၀၀ ခန့်ပါစစ်ကြောင်းကို စက်တင်ဘာ ၁၁ ရက် မနက် ၁၁ နာရီမှာ တော်လှန်ရေးတပ်တွေ ဝင်ရောက်တိုက်ခိုက်ခဲ့ရာ စစ်ကောင်မရှင်တပ်ဖွဲ့ဝင်တွေ ထိခိုက်သေဆုံးပြီး ဘန့်ဘွေးရွာကို ဆုတ်ခွာခဲ့တယ်လို့ သိရပါတယ်။

အဲ့ဒီနောက်မှာ ချောင်းမရွာကို တော်လှန်ရေးတပ်တွေ ပြန်လည်ရယူခဲ့ပြီး စစ်ကော်မရှင်တပ်သား အလောင်း ၃ လောင်း၊ ဂျန်ဘာ ၁ လုံး၊ သေနတ် ၄ လက်နဲ့ ဆက်စပ်ပစ္စည်းတွေကို သိမ်းဆည်းခဲ့ပြီး စစ်သုံ့ပန်း ၄ ဦးကိုလည်းဖမ်းမိခဲ့တယ်လို့ အမျိုးသားညီညွတ်ရေးအစိုးရ-NUG ရဲ့ ကာကွယ်ရေးဝန်ကြီးဌာနက စက်တင်ဘာ ၁၂ ရက်မှာ ထုတ်ပြန်ခဲ့ပါတယ်။

စာတည်း – လင်း

စေတုတ္တရာ၊ သြဂုတ် ၁၀၊ ၂၀၂၅။

မကွေးတိုင်း၊ စေတုတ္တရာမြို့နယ်၊ မကြီးစုကျေးရွာက အမျိုးသား ၁ ဦး မိုင်းနင်းမိပြီး ထိခိုက်ဒဏ်ရာရခဲ့တယ် လို့ စေတုတ္တရာမြို့နယ်ပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံဆီက သိရပါတယ်။

သြဂုတ် ၈ ရက် မနက်ပိုင်းမှာ မကြီးစုကျေးရွာအရှေ့တောင်ဘက် စေတုတ္တရာ-စလင်းလမ်းပိုင်းမှာ မကြီးစုရွာက အမျိုးသားတဦး မိုင်းနင်းမိတာလို့ ဆိုပါတယ်။

“စလင်း-စေတုတ္တရာလမ်းဘေးလို့တော့ သိရတယ်။ (မိုင်းနင်း)မိတဲ့နေရာအတိအကျ မသိရသေးပါဘူး။ ပြည်သူက တောထဲမျှစ်ချိုးသွားတာလား ဘာလဲတော့မသိဘူးဗျ။ ၈ ရက်နေ့က မိုင်းကွဲသံတော့ ကျနော်တို့ဘက်က ကြားတယ်။” လို့ စေတုတ္တရာမြို့နယ်ပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

စစ်ကောင်စီသတင်းထုတ်ပြန်ရေးတယ်လီဂရမ် News Of Myanmar ရဲ့ထုတ်ပြန်ချက်အရ မိုင်းနင်းမိသူ မကြီးစုရွာသား အသက် ၆၀ အရွယ် ဦးကြည်စိုး ဟာ PDF တွေထောင်ထားတဲ့ မိုင်းကိုနင်းမိလို့ ဒဏ်ရာရရှိကာ စေတုတ္တရာမြို့နယ်ပြည်သူ့ဆေးရုံမှာ ဆေးကုသမှုခံယူနေကြောင်း စွပ်စွဲဖော်ပြထားပြီး ဓာတ်ပုံအရ မိုင်းနင်းမိသူဟာ ဘယ်ဘက်ခြေချင်းဝတ်ကနေ ပြတ်ထွက်ဒဏ်ရာရရှိတာကို တွေ့ရပါတယ်။

စစ်ကောင်စီတပ်တွေစိုးမိုးထားတဲ့နယ်မြေဖြစ်တဲ့ မကြီးစုကျေးရွာဟာ ကျွန်းတော စစ်ကောင်စီစခန်းနဲ့ မိုင်ဝက်လောက်ကွာဝေးကာ စေတုတ္တရာ-စလင်းလမ်းမပေါ်ကိုလည်း တော်လှန်ရေးတပ်တွေမလာနိုင်အောင် စစ်ကောင်စီဘက်က မိုင်းတွေထောင်ထားတာဖြစ်နိုင်တယ်လို့ သူကခန့်မှန်းပါတယ်။

“မကြီးစုရွာက စကစ စိုးမိုးနယ်မြေပါ။ ကျနော်တို့ မကပ်နိုင်သေးပါဘူး။ ကျနော်တို့က မကြီးစုရွာရဲ့ အရှေ့ဘက် ၁ မိုင်လောက်ဝေးတဲ့ ငါးမ၊ သံဆယ် စိုးမိုးထားတယ်ပေါ့။ အဲ့မှာ မကြီးစုနဲ့ ငမရွာကြားမှာ ကာမိုင်းတွေ ခင်းထားတယ်ပေါ့။ စကစက ကျနော်တို့ကို စေတုတ္တရာ- စလင်း လမ်းမပေါ် တက်လာမှာကို ကာတဲ့အနေနဲ့ သူတို့ဘက်ကထောင်ထားတဲ့မိုင်းလို့ ယူဆရပါတယ်”လို့ဆိုပါတယ်။

ပြီးခဲ့တဲ့ဇွန်လထဲမှာ ဒေသခံကာကွယ်ရေးတပ်ဖွဲ့ဝင် ၁ ဦး မကြီးစုကျေးရွာအနီး နယ်မြေလေ့လာရေးသွားချိန် မိုင်းနင်းမိပြီးခြေထောက်ဖြတ်ခဲ့ရသလို ငါးမကျေးရွာက ဒေသခံ ၁ ဦးလည်း အဲ့ဒီလပိုင်းမှာပဲ မိုင်းနင်းမိပြီး ဒဏ်ရာရရှိခဲ့ပါသေးတယ်။

အဲ့ဒီလိုမိုင်းနင်းမိတဲ့ဖြစ်စဥ်တွေဖြစ်နေတာကြောင့် ဇူလိုင်လပိုင်းမှာ စေတုတ္တရာမြို့နယ်ပြည်သူ့ကာကွယ်ရေးအဖွဲ့က မကြီးစုကျေးရွာအနီး ငါးမရွာလမ်းပိုင်းကို အသုံးမပြုကြဖို့ သတိပေးထုတ်ပြန်ထားခဲ့ပါတယ်။

စာတည်း – လင်း

မင်းဘူး၊ ဇူလိုင် ၁၅၊ ၂၀၂၅။

မကွေးတိုင်း၊ မင်းဘူးမြို့နယ်က ကျေးရွာပေါင်း ၂၀မှာ စစ်ကောင်စီတပ်ရဲ့လေကြောင်းအန္တရာယ်ကာကွယ်ရေး၊ မြေမြှုပ်မိုင်းနဲ့ထပ်ဆင့်ပေါက်ကွဲစေတတ်တဲ့ စစ်လက်ကျန်ပစ္စည်းအန္တရာယ်တွေနဲ့ပတ်သက်ပြီး အသိပညာပေးဟောပြောတာနဲ့ တော်လှန်ရေးရုပ်ရှင်ပြသတာတွေပြုလုပ်ခဲ့တယ်လို့ မင်းဘူးခရိုင် အမှတ် ၅ တပ် ရင်းဆီက သိရပါတယ်။

အမျိုးသားညီညွတ်ရေးအစိုးရ-NUG ကာကွယ်ရေးဝန်ကြီးဌာန၊ စစ်ရုံးချုပ်ကပေးပို့တဲ့ ပြည်သူလူထုလေကြောင်းအန္တရာယ်၊ မိုင်းအန္တရာယ်အသိပညာပေး ရုပ်သံမှတ်တမ်းတွေနဲ့တကွ ဧပြီကနေ ဇူလိုင်လအထိ ကျေးရွာတွေမှာ ၁ ရွာကို ၁ ရက်ကြာ ရှင်းလင်းအသိပညာပေးဟောပြောတာတွေ လုပ်ဆောင်ခဲ့တာလို့ ဆိုပါတယ်။

” လေကြောင်းလာလို့ရှိရင် ကြိုတင်ကာကွယ်ပြုလုပ်နိုင်တဲ့အရာတွေ ကြိုတင်ပြင်ဆင်ရမဲ့အရာတွေ ပြီးရင်ဗုံးခိုကျင်းနဲ့ပတ်သက်တာတွေ အဓိကထားပြီး ရုပ်သံမှတ်တမ်းပြသတာမျိုးတွေ ကျနော်တို့ဘက်က ဟောပြောဆောင်ရွက်တာမျိုးတွေပြုလုပ်ခဲ့ပါတယ်။ မိုင်းနဲ့ပတ်သက်လို့ကတော့ စစ်ကျန်လက်နက်ပစ္စည်းတွေ ပြီးလို့ရှိရင် တိုက်ပွဲဖြစ်ပြီးသားနေရာတွေ အသွားအလာမပြုလုပ်ဖို့နဲ့ စစ်လက်နက်လက်ကျန်ပစ္စည်းတွေ တွေ့ရှိရင်လည်း သက်ဆိုင်ရာအဖွဲ့အစည်းတွေ အကြောင်းကြားဖို့ မိုင်းနဲ့ပတ်သက်ရင်လည်း ဒေသအတွင်း မိုင်းထောင်ထားတဲ့နေရာတွေ၊ သတ်မှတ်ထားတဲ့နေရာတွေကို မသွားလာဖို့ပါ၊ ကျနော်တို့ဘက်ကို မချိတ်ဆက်ပဲ တောင်ယာစိုက်ပျိုးတာမျိုး လမ်းဟောင်းတွေ အသုံးပြုသွားလာတာမျိုး မလုပ်အောင် အဓိကထားဟောပြောခဲ့တာ” လို့ မင်းဘူးခရိုင် အမှတ် ၅ တပ်ရင်းမှူး ဗိုလ်မိုးကြိုးက ပြောပါတယ်။

အသိပညာပေးဟောပြောမှုတွေအပြင် ကျေးရွာပြည်သူတွေကို နိုင်ငံတကာမှာပြသနေတဲ့ တော်လှန်ရေးရုပ်ရှင်ဇာတ်လမ်းတိုတွေကိုလည်း ပြသခဲ့တယ်လို့ ဆိုပါတယ်။

” တော်လှန်ရေးမှတ်တမ်းရုပ်ရှင်ဆိုတာ ကျနော်တို့အခုလက်ရှိ အမျိုးသားညီညွတ်ရေးအစိုးရ NUGဘက်ကနေပြီးတော့ ကိုပေါက်(ဒါရိုက်တာ)တို့ရိုက်ထားတဲ့ ဇာတ်လမ်းအတိုလေးတွေ အများအပြားပါတယ်၊ “သစ္စာ”၊ “မသောက်မိသောမိုးခါးရေ” စတဲ့ နိုင်ငံတကာမှာပြသနေတဲ့ ဇာတ်လမ်းတိုလေးတွေကို ပြသခဲ့တာပါ” လို့ ၎င်းက ဆက်ပြောပါတယ်။

စစ်ကောင်စီတပ်ဟာ ပြည်သူလူထုကိုအဓိကပစ်မှတ်ထားပြီး ဘုန်းကြီးကျောင်း၊ စာသင်ကျောင်းတွေကို လေကြောင်းကနေပစ်ခတ်တိုက်ခိုက်နေတာကြောင့် ပြည်သူတွေ ကြိုတင်ရှောင်ရှားနိုင်ရန် အခုလို ဟောပြောအသိပညာပေးတာတွေပြုလုပ်ရတာဖြစ်တယ်လို့ ၎င်းက ဆိုပါတယ်။

စာတည်း – ဟိန်းစံ