မြေလတ်အသံ၊ အောက်တိုဘာ ၃၊ ၂၀၂၅။

မကွေးတိုင်း၊ ငဖဲမြို့နယ်၊ ရခိုင်ရိုးမပေါ် အမ်း-ပဒါန်းလမ်းပိုင်းနံဘေးရှိ နတ်ရေကန်တောင်တိုက်ပွဲတွေကနေ ထွက်ပြေးလာတဲ့ စစ်ကော်မရှင်တပ်သား ၂၇ ဦးကို ဖမ်းဆီးရရှိထားတယ်လို့ PRA-Magway က အောက်တိုဘာ ၂ ရက် မနေ့က ထုတ်ပြန်ပါတယ်။

ဖမ်းဆီးရမိသူတွေဟာ စကခ ၁၇ လက်အောက်ခံတပ်ဖွဲ့ဝင် ၂၀ ဦးနဲ့ တပ်မ ၇၇ လက်အောက် ၇ ဦးဖြစ်ပြီး ၂၀ ဦးဟာ စက်တင်ဘာလအတွင်း နတ်ရေကန်တောင်တိုက်ပွဲတွေကထွက်ပြေးလာတဲ့ စစ်မှုထမ်းသင်တန်းဆင်းစစ်ကော်မရှင်တပ်သားတွေဖြစ်ကာ တပ်မ ၇၇ တပ်ဖွဲ့ဝင် ၇ ဦးကတော့ ဇူလိုင်လကတည်းကဖမ်းဆီးရမိထားတာလို့ ဆိုပါတယ်။

” သူတို့က ဒီအတိုင်းပဲစခန်းသိမ်းတိုက်ပွဲမှာ ကြောက်လန့်တကြားထွက်ပြေးလာကြတာ။ သုံ့ပန်းတွေကိုတော့ ကျနော်တို့က ထောင် ပုံစံမျိုးလုပ်ပြီးတော့ သေချာစီမံ ဆောင်ရွက်ကွပ်ကဲထားပါတယ်”လို့ PRA-Magway တာဝန်ရှိသူတဦးက မြေလတ်အသံကို ပြောပါတယ်။

နတ်ရေကန်တောင်ကြောတလျှောက် တိုက်ပွဲတွေပြင်းထန်နေချိန် ခြေဦးတည့်ရာထွက်ပြေးလာတဲ့ အဲ့ဒီစစ်ကော်မရှင်တပ်သားတွေကို PRA-Magwayတပ်ဖွဲ့ဝင်တွေက ကြားဖြတ်ဖမ်းဆီးနိုင်ခဲ့တာဖြစ်ပြီး စစ်သုံ့ပန်းအားလုံးဟာ စစ်မှုထမ်းသင်တန်းအပတ်စဥ် ၇ နဲ့ ၁၃ ဆင်း တပ်သားတွေဖြစ်ကြတယ်လို့ သူကဆိုပါတယ်။

ပြီးခဲ့တဲ့စက်တင်ဘာ ၂၈ ရက်မှာ နတ်ရေကန်စခန်းကုန်းနဲ့ ၂ မိုင်ခန့်အကွာရှိ အင်အား ၁၀၀ ခန့်နဲ့တပ်စွဲထားတဲ့ ဂုတ်ကြီးကျေးရွာကာကင်းစခန်းကို အာရက္ခတပ်တော် – AAနဲ့ ပူးပေါင်းတပ်ဖွဲ့တွေက တိုက်ခိုက်သိမ်းပိုက်ခဲ့ပြီး အဲ့ဒီစခန်းနဲ့တိုက်ပွဲတွေကနေ စကခ ၁၇ လက်အောက်ခံတပ်သားတွေ အများအပြားထွက်ပြေးနေကြတာပါ။

အမ်းမြို့ အနောက်ပိုင်းတိုင်းစစ်ဌာနချုပ်သိမ်းပိုက်ရရှိပြီးနောက် ယခုနှစ်ပိုင်းမှာ အမ်း-ပဒါန်းလမ်းပိုင်း ငဖဲမြို့နယ်အတွင်းအထိ တိုက်ပွဲတွေရောက်ရှိလာခဲ့ပြီး ယခင်နတ်ရေကန်တောင်တိုက်ပွဲတွေဖြစ်တဲ့ ကံမြင်းကန်၊ ဂုတ်စည်းရိုး၊ တာဝါတိုင်စခန်းသိမ်းတိုက်ပွဲတွေမှာလည်း ထွက်ပြေးစစ်ကော်မရှင်တပ်သားတွေကို ငဖဲ အခြေစိုက်ကာကွယ်ရေးတပ်ဖွဲ့တွေက အများအပြားဖမ်းမိခဲ့တာပါ။

စက်တင်ဘာလကုန်ပိုင်း ဂုတ်ကြီးစခန်းသိမ်းတိုက်ပွဲအတွင်း ထွက်ပြေးသူတွေများတာကြောင့် စစ်ကော်မရှင်တပ်က လိုက်လံရှာဖွေခဲ့ပေမယ့် ရှာတဲ့တပ်ဖွဲ့တွေပါ အဆက်အသွယ်ပြတ်တောက်နေကြောင်း ဖမ်းဆီးရမိစစ်သုံ့ပန်းတွေရဲ့ ပြောဆိုချက်ကို ကိုးကားပြီး မြေပြင်တော်လှန်ရေးတပ်ဖွဲ့တွေက ပြောပါတယ်။

ဂုတ်ကြီးစခန်းကို သိမ်းပိုက်ခံရပြီးနောက် အောက်တိုဘာ ၁ ရက်နဲ့ ၂ ရက်မှာ အဓိကပင်မစခန်းကြီးဖြစ်တဲ့ ကမ္ဘာလုံးစခန်းအနီး တိုက်ပွဲတွေပြင်းထန်နေတာကြောင့် စစ်ကော်မရှင်တပ်က စခန်းနဲ့အနီးတဝိုက်ကို တိုက်လေယာဥ်တွေနဲ့ ပစ်ကူပေး ဗုံးကြဲတိုက်ခိုက်ခဲ့တယ်လို့ သိရပါတယ်။

ပြီးခဲ့တဲ့စက်တင်ဘာ ၄ ရက်ကလည်း ငဖဲမြို့အခြေစိုက် အမှတ် ၁၄ ကာကွယ်ရေးပစ္စည်းစက်ရုံ (ကပစ ၁၄) က ထွက်ပြေးလာတဲ့ စစ်ကော်မရှင်တပ်ဖွဲ့ဝင် ၄ ဦး မင်းဘူးခရိုင်အမှတ် ၆ တပ်ရင်းဆီ ဘက်ပြောင်းခိုလှုံလာခဲ့တယ်လို့ သိရပါတယ်။

စာတည်း – ဟိန်းစံ

ငဖဲ၊ အောက်တိုဘာ ၂၊ ၂၀၂၅။

မကွေးတိုင်း၊ ငဖဲမြို့နယ်အခြေစိုက် အမှတ် ၁၄ ကာကွယ်ရေးပစ္စည်းစက်ရုံ (ကပစ ၁၄) ရဲ့ အဓိကခံစစ်စခန်းဖြစ်တဲ့ နတ်ရေကန်တောင်ကမ္ဘာလုံးစခန်းမှာ တိုက်ပွဲတွေပြင်းထန်နေပြီး စစ်ကော်မရှင်တပ်က စခန်းနဲ့အနီးတဝိုက်နေရာတွေကို တိုက်လေယာဥ်တွေနဲ့ ဆက်တိုက်ဗုံးကြဲပစ်ကူပေးနေတယ်လို့ မြေပြင်တော်လှန်ရေးတပ်ဖွဲ့တွေထံက သိရပါတယ်။

နတ်ရေကန်ဗျူဟာကုန်း (ခေါ် )ကမ္ဘာလုံးစခန်းအနီးမှာ စစ်ကော်မရှင်တပ် အမှတ် ၁၇ စစ်ဆင်ရေးကွပ်ကဲမှုဌာနချုပ် စကခ ၁၇ လက်အောက်တပ်တွေနဲ့ အာရက္ခတပ်တော် – AAနဲ့ မဟာမိတ်ပူးပေါင်းတပ်တွေအကြား အောက်တိုဘာ ၁ ရက် ယမန်နေ့ညနေပိုင်းကစတင်ကာ တိုက်ပွဲတွေပြင်းထန်နေတာဖြစ်ပြီး ဒီကနေ့ အောက်တိုဘာ ၂ ရက်မနက်ပိုင်းမှာ ပိုမိုပြင်းထန်လာတာလို့ ဆိုပါတယ်။

” ဒီနေ့ဆိုရင် SU 30 ဂျက်ဖိုက်တာနဲ့ အရင်မသုံးဖူးတဲ့ စက်သေနတ်တွေနဲ့ အဆက်မပြတ်ပစ်တာ။ အသံတွေက အရင်မကြားဖူးတဲ့အသံတွေကြားရတယ်”လို့ မြေပြင်တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

တိုက်ပွဲတွေပြင်းထန်နေချိန် ဒီကနေ့မနက် ၆ နာရီခန့်မှာ စစ်ကော်မရှင်တပ်က စခန်းနဲ့အနီးတဝိုက်နေရာတွေကို Y 12 လေယာဥ်နဲ့ ဗုံးအလုံး ၃၀ ကျော် ကြဲချခဲ့တဲ့အပြင် မနက် ၁၁ နာရီလောက်မှာ SU 30 အမျိုးအစား တိုက်လေယာဥ်သုံးပြီး ဗုံးကြဲပစ်ခတ်တိုက်ခိုက်ခဲ့တယ်လို့ သိရပါတယ်။

ပြီးခဲ့တဲ့စက်တင်ဘာလပထမအပတ်နဲ့ဒုတိယအပတ်တွေမှာ နတ်ရေကန်ဗျူဟာစခန်းတောင်ဘက် စွန်တက်ရွာအနီးမှာ စစ်ကော်မရှင်တပ်ဖွဲ့တွေနဲ့ မဟာမိတ်ပူး ပေါင်းတပ်ဖွဲ့တွေအကြား တိုက်ပွဲတွေဖြစ်ခဲ့ပြီး စက်တင်ဘာလနောက်ဆုံးပတ်မှာ နတ်ရေကန်စခန်းရဲ့ ၂ မိုင်အကွာရှိ ဂုတ်ကြီးရွာကာကင်းစခန်းကို သိမ်းပိုက်နိုင်ခဲ့တယ်လို့ အာရက္ခတပ်တော် – AA ထုတ်ပြန်ချက်တွေနဲ့ မြေပြင်တော်လှန်ရေးသတင်းရင်းမြစ်တွေထံက သိရပါတယ်။

အဲ့ဒီနောက် ယမန်နေ့ကစတင်ကာ နတ်ရေကန်ဗျူဟာကုန်းမှာ တိုက်ပွဲတွေဆက်လက်ပြင်းထန်လာတာပါ။

နတ်ရေကန်တောင်ကမ္ဘာလုံးစခန်းဟာ ရခိုင်ရိုးမပေါ်က အကြီးဆုံးခံစစ်စခန်း၊ ငဖဲမြို့နယ်အခြေစိုက် စစ်ကော်မရှင်တပ်ရဲ့လက်နက်ထုတ်လုပ်ရေးစက်ရုံ ကပစ ၁၄ ရဲ့ အဓိကခံစစ်စခန်းလည်းဖြစ်ပြီး ကမ္ဘာလုံးစခန်းကျရှုံးပါက ကပစ ၁၄ ကိုဝန်းရံထားတဲ့ ပဒါန်းအခြေအစိုက် အမှတ် ၃၇၅ နဲ့ ၄၀၉ အမြောက်တပ်ရင်းတွေ ဆက်လက်တိုက်ခိုက်ခံလာရနိုင်တာပါ။

အာရက္ခတပ်တော်အနေနဲ့ ကမ္ဘာလုံးစခန်းကို သိမ်းပိုက်ရရှိရင် ကပစ ၁၄ လက်နက်ထုတ်လုပ်ရေးတပ်နဲ့ ငဖဲတပ်နယ်တခုလုံးကို ခြိမ်းခြောက်ထားနိုင်ပြီဖြစ်တယ်လို့ မြန်မာ့စစ်ဖက်ရေးရာကာကွယ်ရေးနဲ့လုံခြုံရေးအဖွဲ့ – MDSI အဖွဲ့ဝင် CDM တပ်မတော်သား ဗိုလ်ကြီး ဇင်ယော်က ပြောပါတယ်။

” အဓိက ကတော့ ဒီ အမ်း-ပဒါန်းလမ်းဟောင်းမှာဆိုရင် နတ်ရေကန်ကမ္ဘာလုံးစခန်းနဲ့ လိုင်ရွာအခြေပြုစခန်းရယ် စခန်းအကြီး ၂ ခုပဲ ကျန်တော့တယ်။ အဲ့ဒီနတ်ရေကန်တောင်ကိုရသွားပြီဆိုရင် ငဖဲတပ်နယ်က ရွှေ့ပြေးရမယ့်သဘောမျိုးကို ဖြစ်သွားပြီ ” လို့ သူကပြောပါတယ်။

လက်ရှိမှာ နတ်ရေကန်တောင်ကမ္ဘာလုံးစခန်းမှာ တိုက်ပွဲတွေပြင်းထန်နေပြီး တိုက်ပွဲအခြေအနေအသေးစိတ်တွေကိုမသိရှိရသေးသလို အာရက္ခတပ်တော်-AA ကလည်း မထုတ်ပြန်သေးပါဘူး။

စက်တင်ဘာလကုန်ပိုင်းမှာ သိမ်းပိုက်နိုင်ခဲ့တဲ့ နတ်ရေကန်တောင်ကာကင်း ဂုတ်ကြီးရွာစခန်းတိုက်ပွဲမှာလည်း စကခ ၁၇ လက်အောက် စစ်ကော်မရှင်တပ်သားတွေ အစုလိုက်ထွက်ပြေးနေကြတယ်လို့ မြေပြင်တော်လှန်ရေးသတင်းရင်းမြစ်တွေက ပြောပါတယ်။

စာတည်း – ဟိန်းစံ