ဗုံးကြဲ

အောင်လံ၊ ဇန်နဝါရီ ၂၃၊ ၂၀၂၅။

မကွေးတိုင်း၊ အောင်လံမြို့နယ်၊ တပ်ကုန်းကျေးရွာမှာ စစ်ကော်မရှင်ဘက်က ဗုံးကြဲခဲ့တာကြောင့် ၂ နှစ်အရွယ်ကလေးငယ် အပါအဝင် ၅ ဦးသေဆုံးခဲ့တယ်လို့ အောင်လံမြို့နယ်ပြည်သူ့ကာကွယ်ရေးအဖွဲ့ ဆီက သိရပါတယ်။

အိမ်ခြေ ၂၀၀ ကျော်နဲ့ လူဦးရေ ၈၀၀ ကျော်နေထိုင်တဲ့ တပ်ကုန်းရွာကို ဇန်နဝါရီ ၂၂ ရက်နေ့လယ် ၁ နာရီကျော်မှာ စစ်ကော်မရှင်ရဲ့ ဂျက်ဖိုက်တာက ရွာထဲကိုပေါင် ၃၀၀ ဗုံး ၄ လုံး ကြဲချခဲ့တာလို့ဆိုပါတယ်။

“မင်္ဂလာဆောင်နားက နေအိမ်ကိုကြဲချလိုက်တာ။ မင်္ဂလာဆောင်ကို စကြဲတာ။ ပထမ ၂ လုံး ၁ ခါ၊ ပြီးတော့ ၁ လုံး။ ၁ လုံး ၂ ခါ လာကြဲသွားတာ။ သေဆုံးတဲ့အထဲကလေးတွေရော သက်ကြီးပိုင်းတွေ ရောပါတယ်”လို့ အောင်လံမြို့နယ်ပကဖ ဒုတာဝန်ခံကပြောပါတယ်။

ဗုံးကြဲခံရလို့ ၂ နှစ်အရွယ် မိန်းကလေးငယ် ၁ ဦး၊ အသက် ၆၀ ကျော်အမျိုးသမီး ၁ ဦး၊ အသက် ၂၀ ကနေ ၄၀ ကြား အမျိုးသား ၃ ဦး စုစုပေါင်း ၅ ဦးသေဆုံးပြီး ထိခိုက်ဒဏ်ရာရသူ ၁၀ ဦး ဝန်းကျင် ရှိတယ်လို့ ဆိုပါတယ်။

ဒါ့အပြင် ဗုံးကျပေါက်ကွဲတဲ့နေအိမ်တွေအပါအဝင် မီးကူးစက်လောင်တဲ့အတွက် နေအိမ် ၁၀ လုံးလည်း မီးလောင်ပျက်စီးခဲ့ကာ ဒေသခံတွေလည်း ရွာကတိမ်းရှောင်နေကြတယ်လို့ အထက်ပါဒုတာဝန်ခံက ပြောပါတယ်။

ဇန်နဝါရီ ၁၉ ရက်နေ့ကလည်း ဆိပ်ဖြူမြို့နယ်ထဲက ဆင်နီတောင်ကျေးရွာမှာ စက်တပ်လေထီးနဲ့ဗုံးကြဲခံရလို့ အမျိုးသမီး ၁ ဦးလက်ပြတ်သွားတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၂၂၊ ၂၀၂၆။

စစ်ကိုင်းတိုင်း၊ အင်းတော်မြို့နယ်၊ မော်လူးမြို့ရှိ မြို့နယ်ပြည်သူ့ကာကွယ်ရေးအဖွဲ့(ပကဖ)ရုံး လေကြောင်းကနေဗုံးကြဲခံရလို့ ပကဖအဖွဲ့ဝင် ၄ ဦးအပါ လူ ၇ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၂၁ ရက် မနေ့ည ၁၁ နာရီကျော်မှာ မော်လူးမြို့၊ မာန်ဟဲရွာထိပ်မှာရှိတဲ့ ပကဖရုံးကို တိုက်လေယာဥ်နဲ့ ဗုံး ၂ လုံးကြဲချတိုက် ခိုက်ခဲ့တာလို့ ဆိုပါတယ်။

“ဗုံးကြဲခံရတာက ပေါင် ၂၅၀၊ ၃၀၀ (ဗုံး) လောက်တော့ရှိမယ် ၂ လုံးကြဲတာ။ ပကဖ သူတို့ရုံးပေါ့လေ။ ရုံးဘေးမှာရှိတဲ့ နေအိမ် ၂လုံးပျက်စီးတယ်။”လို့ မြေပြင်အခြေအနေသိရှိသူ ဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် ပကဖရုံးအတွင်းမှာရှိနေတဲ့ ပကဖအဖွဲ့ဝင် ၄ ဦး၊ နောက်ထပ်တော်လှန်ရေးတပ်ဖွဲ့ဝင် ၁ ဦး ရုံးအနီးနေအိမ်မှာနေထိုင်တဲ့ ရွာခံအမျိုးသား ၂ ဦး စုစုပေါင်း ၇ ဦး သေဆုံးပြီး ရွာခံအမျိုးသား၊ အမျိုးသမီး ၁၀ ဦးခန့် ထိခိုက်ဒဏ်ရာရရှိခဲ့တယ်လို့ ဆိုပါတယ်။

သေဆုံးသူတွေရဲ့ရုပ်အလောင်းတွေကို ဇန်နဝါရီ ၂၂ ရက် ဒီကနေ့မနက်ပိုင်းမှာ ဈာပနအခမ်းအနားပြုလုပ်ကာ မီးသင်္ဂြိုဟ်​ပြီးဖြစ်ကြောင်းသိရှိရပြီး သေဆုံးသူတွေရဲ့ အသေးစိတ်အချက်အလက်တွေကိုတော့ မသိရသေးပါဘူး။

မော်လူးမြို့ကို PDFအပါအဝင် တော်လှန်ရေးပူးပေါင်းတပ်တွေက ၂၀၂၃ ဒီဇင်ဘာ ၁၃ရက်မှာ သိမ်းပိုက်ရရှိခဲ့ပြီးတဲ့နောက် လက်ရှိကာလအထိ အမျိုးသားညီညွတ်ရေးအစိုးရလက်အောက်တပ်ဖွဲ့တွေက ထိန်းချုပ်ထားတာလည်း ဖြစ်ပါတယ်။

ပြီးခဲ့တဲ့ဇန်နဝါရီ ၂ ရက်ကလည်း မော်လူးမြို့နယ်၊ ပဲခူးကျေးရွာရှိ အမျိုးသားညီညွတ်ရေးအစိုးရ-NUG ဖွင့်လှစ်ထားတဲ့ စာသင်ကျောင်းကို စစ်တပ်က ဗုံးကြဲတိုက်ခိုက်ခဲ့တာကြောင့် G-12 ကျောင်းသူ ၁ ဦးသေဆုံးခဲ့တာလည်း ဖြစ်ပါတယ်။

အောင်စိုး၊ ကျော်ကြီး

မြေလတ်အသံ၊ ဇန်နဝါရီ ၂၀၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်နဲ့ မကွေးတိုင်း၊ ဆိပ်ဖြူမြို့နယ်က ကျေးရွာတွေကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ထိခိုက်ဒဏ်ရာရသူတွေရှိခဲ့တယ်လို့ ဒေသခံတွေဆီက သိရပါတယ်။

ဒီပဲယင်းမြို့နယ်က အိမ်ခြေ ၅၀၀ ကျော်ရှိပျံကျကျေးရွာကို ဇန်နဝါရီ ၁၉ ရက်ည ၁၀ နာရီကျော်မှာ တိုက်ခိုက်ရေးလေယာဥ်နဲ့ ဗုံသီး ၂ လုံးကြဲတိုက်ခိုက်ခဲ့ရာ ကွက်သစ်ရပ်ကွက်ထဲကိုကျရောက်ကာ အသက် ၆၀ အရွယ်အမျိုးသမီး ၁ ဦးသေဆုံးပြီး အသက် ၃၀ အရွယ်အမျိုးသား ၁ ဦး ဒဏ်ရာရခဲ့တယ်လို့ ဆိုပါတယ်။

“ဒီရွာ(ပျံကျရွာ)က ဖိုင်တာနဲ့ကြဲတာ ဒါပထမဆုံးပဲ။ အရင်တုန်းက မီးရှို့ခံရတာရှိခဲ့တယ်။ သေဆုံးတဲ့ အဘွားက ဗုံးခိုကျင်းထဲမသွားဘဲ အိမ်ပေါ်မှာကျန်ခဲ့တာတဲ့။ အိမ်ပေါ် ဗုံးကျတော့ ပွဲချင်းပြီး သေသွားတာလေ။ ဒဏ်ရာရတဲ့ ၁ ယောက်ကတော့ စစ်ဘေးရှောင်လို့ ပြောတယ်”လို့ ဒီပဲယင်းဒေသခံ အမျိုးသားတဦးက ပြောပါတယ်။

ပျံကျကျေးရွာအနီးဝန်းကျင်မှာ စစ်ကြောင်းထိုးတိုက်ပွဲဖြစ်နေတာမရှိသလို PDF တပ်ဖွဲ့တွေ စခန်းချနေထိုင်တာတွေလည်းမရှိဘဲ ဗုံးကြဲတိုက်ခိုက်ခဲ့တာဖြစ်ပြီး တိုက်ခိုက်မှုအတွင်း လူနေအိမ် ၂ လုံးလည်း လုံးဝပျက်စီးခဲ့တယ်လို့ သူကဆိုပါတယ်။

ပျံကျကျေးရွာကို ပြီးခဲ့တဲ့၂၀၂၂ ဒီဇင်ဘာလအတွင်းမှာလည်း အင်အား ၁၀၀ ကျော်ပါတဲ့ စစ်ကော်မရှင်တပ်သားတွေက ၃ ကြိမ်တိုင် ဝင်ရောက်မီးရှို့ခဲ့ရာ လူနေအိမ် ၃၀၀ ကျော် မီးလောင်ပြာကျခဲ့တယ်လို့ အထက်ပါအမျိုးသားက ပြောပါတယ်။

အလားတူ မကွေးတိုင်း၊ ဆိပ်ဖြူမြို့နယ်ထဲက ဆင်နီတောင်ကျေးရွာမှာ စက်တပ်လေထီးနဲ့ဗုံးကြဲခံရပြီး အမျိုးသမီး ၁ ဦးလက်ပြတ်သွားတယ်လို့ ဆိပ်ဖြုမြို့နယ်အခြေစိုက် ဒေသကာကွယ်ရေးအဖွဲ့တာဝန်ရှိသူ တဦးဆီက သိရပါတယ်။

ဇန်နဝါရီ ၁၉ ရက်ညနေ ၄ နာရီကျော်မှာ ကပစ ၂၂ ဘက်ကနေတက်လာတဲ့ စက်တပ်လေထီး ၁ စီးဟာ ကျေးရွာထဲကို ဗုံးသီး ၂ လုံးကြဲချပြီး စက်လတ်နဲ့လည်း ပစ်ခတ်သွားတယ်လို့ ဆိုပါတယ်။

“ကပစထဲ စက်တပ်လေထီးရောက်တာက တပတ်လောက်ရှိနေပြီ။ ထိတဲ့သူက အိမ်ထဲရှိနေချိန်ထိတာ။ အိမ်ပေါ်ကျတာ။ ကျန်မိသားစုဝင်တွေတော့ နေအိမ်မှာမရှိဘူး။ သူတယောက်တည်းရှိနေချိန်ထိတာ”လို့ ဆိပ်ဖြူမြို့နယ်အခြေစိုက် ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

ဗုံးထိမှန်တာကြောင့် အသက် ၄၀ ကျော်အရွယ် အမျိုးသမီးမှာ လက်မောင်းပြတ်ဒဏ်ရာနဲ့ စိုးရိမ်ရအခြေနေကြောင့် ဆေးကုနေရကာ နေအိမ် ၁ လုံးပျက်စီးခဲ့တယ်လို့ ဆိုပါတယ်။

ဆင်နီတောင်ရွာမှာ အိမ်ခြေ ၂၀၀ ကျော်ရှိပြီး ကြဲချတဲ့ဗုံးတွေထဲက ၁ လုံးက မပေါက်ကွဲသေးတာကြောင့် ရွာထဲရှိဒေသခံ ၇၀၀ ခန့်လည်း ဘေးလွတ်ရာကိုတိမ်းရှောင်နေကြတယ်ို့ အထက်ပါတာဝန်ရှိသူက ပြောပါတယ်။

ပြီးခဲ့တဲ့နှစ် ဩဂုတ် ၁၉ ရက်ကလည်း ဆိပ်ဖြူမြို့နယ်၊ ဝန်ကြီး၊ ရှားလှ၊ ကျွန်းတောရွာတွေကို Y 12 နဲ့ဗုံးကြဲခဲ့လို့ ပြည်သူ ၁၀ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၁၉၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်၊ စိုင်းပြင်ကျေးရွာကို စစ်ကော်မရှင်တပ်က ဇန်နဝါရီ ၁၉ ရက်မနက် ၁၁ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့ရာ အမျိုးသား ၁ ဦး သေဆုံးခဲ့တယ်လို့ ဒေသခံတွေကပြောပါတယ်။

စိုင်ပြင်ကျေးရွာတောက်ဘက်အထွက်ရှိ မူးသစ်ရေလွှတ်ဆည်မြောင်းအနီးကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ အသက် ၄၀ နှစ်အရွယ်အမျိုးသား ၁ ဦး သေဆုံးပြီး ၃၀ နှစ်အရွယ်အမျိုးသား ၁ ဦး ဒဏ်ရာရရှိခဲ့တာလို့ ဆိုပါတယ်။

“စိုင်းပြင် မြို့တောင်ဘက်အထွက် မူးသစ်ရဲ့တောင်ဘက်ပါ။ ပစ်သွားတာကတော့ ရော့ကတ်နဲ့ စက်လတ်လို့ ခန့်မှန်းရပါတယ်။ ပစ်ခတ်အပြီး နေအိမ်တချို့မီးလောင်တယ်။ ၁ ယောက် ပွဲချင်းပြီးသေတယ်။ နောက် ၁ ယောက်က်ကတော့ ဒဏ်ရာရတာ မစိုးရိမ်ရ။” လို့ ဒီပဲယင်းဒေသခံ အမျိုးသားတဦးက ပြောပါတယ်။

တိုက်ပွဲဖြစ်တာမရှိဘဲ စိုင်းပြင်ကျေးရွာကို အခုလိုလေကြောင်းကနေ ဗုံးကြဲခဲ့တာကြောင့် လူနေအိမ် ၃ လုံးလည်း မီးလောင်ပျက်စီးခဲ့တယ်လို့ သူကဆိုပါတယ်။

ပြီးခဲ့တဲ့ ဇန်နဝါရီ ၁ ရက်ကလည်း ဒီပဲယင်းမြို့နယ်၊ မူးကမ်းကြီးကျေးရွာရှိ စစ်ဘေးရှောင်တွေ ခိုလှုံနေကြတဲ့ စာသင်ကျောင်းဆောင်ကို စစ်ကော်မရှင်တပ်ကလေကြောင်းကနေ ဗုံးကြဲခဲ့တာကြောင့် စစ်ရှောင်အမျိုးသား ၁ ဦးဒဏ်ရာရရှိခဲ့တယ်လို့ သိရပါတယ်။

လက်ရှိအချိန်မှာ ဒီပဲယင်းမြို့နယ်ကို စစ်ကော်မရှင်တပ်က လေကြောင်းကနေ မကြာခဏ ဗုံးကြဲတိုက်ခိုက်နေတာကြောင့် ဒေသအတွင်းရှိပြည်သူတွေအနေနဲ့ လေကြောင်းသတိအမြဲရှိပြီး လေကြောင်းသတင်းကြားရင် ဘေးလွတ်ရာနေရာတွေမှာ အထူးဂရုစိုက်နေထိုင်ကြဖို့ ဒီပဲယင်းမြို့နယ်ရှိတော်လှန်ရေးတပ်ဖွဲ့တွေက တိုက်တွန်းထားပါတယ်။

စာတည်း – လင်း

မြေလတ်အသံ၊ ဇန်နဝါရီ ၁၇၊ ၂၀၂၆။

စစ်ကိုင်းတိုင်း၊ အရာတော်နဲ့ ပေါက်မြို့နယ်က ကလေးငယ်တွေစာသင်ကြားတဲ့နေရာနဲ့ ဆေးပေးခန်းတို့ကို စစ်ကော်မရှင်တပ်က ဇန်နဝါရီ ၁၇ ရက်နေ့လယ် ၁ နာရီကျော်မှာ ဗုံးကြဲတိုက်ခိုက်ခဲ့တာကြောင့် ၂ ဦးသေဆုံးခဲ့တယ်လို့ Northwest Plains Revolutionary Force – NPRF ဆီက သိရပါတယ်။

တိုက်ခိုက်ရေးလေယာဥ် ၁ စီးအပါအဝင် အသေခံဒရုန်း ၃ စီးတို့နဲ့ ကန်ရင်းကျေးရွာရှိ KG ကလေးငယ် တွေစာသင်နေတဲ့ အဆောက်အဦးနဲ့ အနီးရှိနေအိမ်တွေကို ဗုံးကြဲတိုက်ခိုက်ခဲ့တာလို့ဆိုပါတယ်။

“စာသင်ကျောင်းတော့ မဟုတ်ဘူးဗျ။ ကလေးတွေကိုစုပြီး မူကြိုသင်တာ။ အဲ့အဆောင်က ရွာလယ်မှာ ရှိတာ။ ဗုံးသီးက ပေါင် ၅၀၀ လို့ယူဆရတယ်။ တော်တော်ပြင်းထန်တာ။ စာသင်ဆောင်လည်း ပျက်စီးသွားတယ်။ အိမ်တွေရောပဲ”လို့ Northwest Plains Revolutionary Force-NPRFမှ တပ်ခွဲမှူး ကိုဝေလင်းက ပြောပါတယ်။

ဗုံးကြဲတိုက်ခိုက်ချိန်ဟာ ကလေးတွေကို မုန့်စားနားနေချိန်ဖြစ်တာကြောင့် စာသင်ဆောင်ထဲကို ရောက်ရှိနေတဲ့ ၉ နှစ်အရွယ်မိန်းကလေးငယ် ၁ ဦးနဲ့ နေအိမ်မှာရှိနေတဲ့ အမျိုးသား ၁ ဦးတို့သေဆုံးခဲ့ပြီး နောက်ထပ်အမျိုးသား၊ အမျိုးသမီး ၄ ဦး ဒဏ်ရာရရှိခဲ့တယ်လို့ ကိုဝေလင်းက ဆိုပါတယ်။

ကန်ရင်းကျေးရွာဟာ လူနေအိမ် ၁,၀၀၀ ခန့်ရှိကာ ရွာအနီးပတ်ဝန်းကျင်းမှာ စစ်ကြောင်းထိုးနေပြီး တိုက်ပွဲဖြစ်တာတွေမရှိဘဲ လေကြောင်းကနေဗုံးကြဲခဲ့တာကြောင့် ကား ၁ စီး၊ ဆိုင်ကယ် ၃ စီး၊ လူနေအိမ် ၃ လုံးတို့လည်း မီးလောင်ပြာကျပျက်စီးပြီး နွား ၁ ကောင်ပါသေဆုံးခဲ့တယ်လို့ သူကဆိုပါတယ်။

အလားတူ ပေါက်မြို့နယ်၊ တောင်ကံပိုင်ကျေးရွာထဲကိုလည်း ဒီနေ့လယ်ပိုင်းမှာ တိုက်ခိုက်ရေး လေယာဥ်နဲ့ဗုံး သီး ၂ လုံးကြဲချခဲ့တာကြောင့် ကျေးရွာဆေးပေးခန်းနဲ့ လူနေအိမ် ၅ လုံးတို့ ပျက်စီးခဲ့တယ်လို့ ပေါက်ဒေသခံ အမျိုးသားတဦးက ပြောပါတယ်။

“ဆေးခန်းက သားဖွားဆရာမလောက် ရှိတဲ့နေရာပါ။ ဆေးခန်းနဲ့ အိမ် ၅ လုံးပျက်စီးသွားတယ်။ လူတွေကတော့ ဗုံးခိုကျင်းတွေရှိကြလို့ အထိခိုက်မရှိခဲ့ကြတာ”လို့ ပေါက်ဒေသခံ အမျိုးသားတဦးက ပြောပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆ ဇန်နဝါရီ ၁၆ ရက်အတွင်း စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့တဲ့ဒေသခံ ၇,၆၉၀ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

ကျော်ကြီး၊ အောင်စိုး

မြေလတ်အသံ၊ ဇန်နဝါရီ ၁၆၊ ၂၀၂၅။

စစ်ကိုင်းတိုင်း၊ ကနီနဲ့ ရေဦးမြို့နယ်တွေ လေကြောင်းကနေ ဗုံးကြဲတိုက်ခိုက်ခံရလို့ အသက် ၁၀ နှစ် ဝန်းကျင်ကလေး ၁ ဦး သေဆုံးပြီး သံဃာ ၂ ပါးဒဏ်ရာရခဲ့တယ်လို့ ဒေသခံတွေနဲ့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇန်နဝါရီ ၁၅ ရက် ယမန်နေ့ညနေ ၃ နာရီကျော်မှာ ကနီမြို့နယ်၊ ရှမ်းမြောင်ရွာဘုန်းကြီးကျောင်းပေါ်ကို စက်တပ်လေထီး ၂ စီးနဲ့ ဗုံး ၅ လုံးချခဲ့ရာ အောင်စင်္ကြာစေတီကုန်းပေါ်ရှိ ဂန္ဓကုဋီတိုက်ဓမ္မာရုံနဲ့ အောင်မင်္ဂလာဘုန်းတော်ကြီးကျောင်းတိုက်တွေပေါ် ကျရောက်ပေါက်ကွဲခဲ့ပြီး သံဃာ ၂ ပါးဒဏ်ရာရတာလို့ ဆိုပါတယ်။

” သံဃာတွေက တောင်အောက်ကျောင်းပေါ်ရှိနေချိန် ထိကြတာ။ တောင်ပေါ်၊ တောင်အောက် ၂ ကျောင်းလုံးချခံရတာ။ ဘာတိုက်ပွဲမှမရှိဘဲ ဒီအတိုင်းလာချတာ။ စစ်ရှောင်တွေလည်း ကျောင်းမှာမရှိဘူး။” လို့ ကနီဒေသခံတဦးက မြေလတ်အသံကို ပြောပါတယ်။

ဗုံးချခံရလို့ သက်တော် ၄၀ ကျော်အရွယ်ရှိ သံဃာတော် ၂ ပါး ထိခိုက်ဒဏ်ရာရရှိခဲ့ပြီး တောင်ပေါ်ရှိဓမ္မာရုံနဲ့ တောင်အောက်ရှိ ဘုန်းတော်ကြီးကျောင်းဆောင်တွေပျက်စီးခဲ့ကာ ဗုံးချခံရပြီးနောက် ကျောင်းနေသံဃာနဲ့ ကိုရင်တွေဟာ ဘေးလွတ်ရာကိုပြောင်းရွှေ့နေထိုင်နေရတယ်လို့ သိရပါတယ်။

ဒါ့အပြင် ရေဦးမြို့နယ် လေးရွာ၊ အုန်းနပေါင်းရွာစာသင်ကျောင်းတွေနဲ့ ပင်စိမ်းခင်းကျေးရွာစာသင်ကျောင်းတွေကို ဇန်နဝါရီ ၁၀ ရက်၊ ၁၁ ရက်နဲ့ ၁၃ ရက်တွေမှာ လေယာဥ်နဲ့ဗုံးကြဲတိုက်ခိုက်ခံရတာကြောင့် အသက် ၁၀ နှစ်ကလေး ၁ ဦး သေဆုံးခဲ့တယ်လို့ ရေဦးပကဖအဖွဲ့ထံက သိရပါတယ်။

“လေးရွာနဲ့ အုန်းနပေါင်းမှာက လူမနေတဲ့ စာသင်ကျောင်းတွေကို ကြဲတာဖြစ်လို့ လူအထိခိုက်မရှိခဲ့။ ကျောင်းဆောင်တွေပဲ ပျက်စီးခဲ့တာ။ ပင်စိမ်းခင်းမှာတော့ လူနေအိမ်တွေကျတာ ကလေး ၁ ယောက်သေတယ်”လို့ ရေဦးမြို့နယ်ပကဖတာဝန်ခံက ပြောပါတယ်။

အိမ်ခြေ ၅၀ ခန့်သာရှိတဲ့ ပင်စိမ်းခင်းကျေးရွာကို တိုက်လေယာဥ် ၁ စီးနဲ့ ပေါင်း ၅၀၀ ဗုံးသီး၂ လုံးကြဲချခဲ့တာဖြစ်ပြီး ကျေးရွာနေအိမ်ပေါ်ကျရောက်ပေါက်ကွဲခဲ့လို့ အသက် ၁၃ နှစ် ယောက်ျားလေး ၁ ဦးသေဆုံးပြီး ၁၆ နှစ်အရွယ်ယောက်ျားလေး ၁ ဦးနဲ့ အသက် ၆၀ နှစ်အရွယ် အမျိုးသမီး ၂ ဦး ဒဏ်ရာရရှိခဲ့တယ်လို့ အထက်ပါပကဖတာဝန်ခံက ပြောပါတယ်။

■ မင်းတုန်းမှာလည်း စစ်ကော်မရှင်တပ်က စစ်ကြောင်းထိုးပြီး နေအိမ်တွေကိုမီးရှို့

ဒိန်းဂျား၊ အောင်စိုး

မြစ်ခြေ၊ ဇန်နဝါရီ ၁၄၊ ၂၀၂၆။

မကွေးတိုင်း၊ ပခုက္ကူနဲ့ မင်းတုန်းမြို့နယ်တွေမှာ စစ်ကော်မရှင်တပ်က လေကြောင်းကနေဗုံးကြဲတိုက်ခိုက်တာနဲ့ မြေပြင်စစ်ကြောင်းထိုးမီးရှို့တာတွေ လုပ်ဆောင်ခဲ့တယ်လို့ ဒေသခံတွေနဲ့ ဒေသကာကွယ်ရေးတပ်ဖွဲ့တွေထံက သိရပါတယ်။

မြစ်ခြေမြို့နယ်၊ သရက်တောရွာကို စစ်ကော်မရှင်တပ် တိုက်လေယာဥ်နဲ့ ဗုံးကြဲခဲ့တာကြောင့် အမျိုးသမီး ၁ ဦးသေဆုံးပြီး နေအိမ်ပျက်စီးမှုတွေရှိခဲ့တယ်လို့ မြစ်ခြေမြို့ခံတဦးက ပြောပါတယ်။

ဇန်နဝါရီ ၁၃ ရက် ယမန်နေ့ ညနေ ၃ နာရီခွဲဝန်းကျင်မှာ သရက်တောရွာအနီးယာခင်းတွေထဲက တဲအိမ်ပေါ်ကို ဗုံးကြဲချခဲ့တဲ့အပြင် စက်လတ်တွေနဲ့ပါပစ်ခတ်သွားခဲ့တာကြောင့် အသက် ၄၀ နှစ်အရွယ်အမျိုးသမီး ၁ ဦးသေဆုံးပြီး ၎င်းရဲ့ခင်ပွန်းဖြစ်သူ အသက် ၅၀ အရွယ် အမျိုးသား ၁ ဦးဒဏ်ရာရခဲ့တယ်လို့ ဆိုပါတယ်။

“သူ့အမျိုးသားကတော့ ထိခိုက်ဒဏ်ရာ နည်းနည်းပဲရတယ်၊ စိုးရိမ်ရတဲ့အထဲ မပါဘူး။ အခုကြဲသွားတဲ့နေရာက အိမ်ဆက်တော့ဝေးတယ်။ ယာခင်းပြင်ထဲမှာ သူတို့တဲထိုးတဲ့နေရာကိုကြဲသွားတာ” လို့ မြစ်ခြေမြို့ခံတဦးက မြေလတ်အသံကို ပြောပါတယ်။

သရက်တောရွာဟာ အိမ်ခြေ ၆၀၀၊ အိမ်ထောင်စု ၆၀၀ နဲ့ လူဦးရေ ၁,၀၀၀ ကျော်နေထိုင်တဲ့ ကျေးရွာကြီးဖြစ်ပြီး လတ်တလောမှာ ကျေးရွာတဝိုက်တိုက်ပွဲတွေဖြစ်ပွားတာမရှိဘူးလို့ ဒေသခံတွေက ပြောပါတယ်။

ဒါ့အပြင် ဇန်နဝါရီ ၁၃ ရက် ယမန်နေ့ မနက် ၁၁ နာရီမှာ အင်အား ၂၅၀ကျော်ပါ စစ်ကော်မရှင်တပ်ဖွဲ့တွေက မင်းတုန်းမြို့နယ်၊ ပဇင်းဒါးကျေးရွာနဲ့ သဖန်းကိုင်းကျေးရွာတွေကို စစ်ကြောင်းထိုးဝင်ရောက်ပြီး လူနေအိမ်တွေကို မီးရှို့ခဲ့တယ်လို့ သရက်ခရိုင်တပ်ရင်း ၄ ထံက သိရပါတယ်။

” ရွာသားတွေက စစ်ကြောင်းဝင်လာချိန် ထွက်ပြေးချိန်မရလိုက်ကြဘူး။ လက်ရှိသိထားရတာက ပဇင်းဒါးမှာ ***တွေက ရှိနေသေးတယ်လို့ယူဆတယ်။ ရွာသူရွာသားတွေ က အဖမ်းခံထားရဆဲလားဆိုတာ မသိရသေးပေမယ့် အိမ်က ၁၆ လုံးမီးရှို့ခံရတယ်။ သဖန်းကိုင်းက ၃လုံးမီးရှို့ခံရတယ်” လို့ သရက်ခရိုင်တပ်ရင်း ၄ တာဝန်ရှိသူတဦးက ပြောပါတယ်။

အိမ်ခြေ ၂၀၀ နီးပါးစီရှိ ပဇင်းဒါးနဲ့ သဖန်းကိုင်းကျေးရွာမှာ ၁ ဖာလုံခန့်သာကွာဝေးကြပြီး ကျေးရွာတွေကို ဝင်ရောက်မီးရှို့နေတဲ့ စစ်ကြောင်းဟာ ဇန်နဝါရီ ၁၂ ရက်က သရက်-မင်းတုန်းကားလမ်းပိုင်းမှာ သရက်ခရိုင်တပ်ရင်း ၄ တိုက်ခိုက်ခဲ့တဲ့ စစ်ကြောင်းဖြစ်တယ်လို့ ဆိုပါတယ်။

အဲ့ဒီစစ်ကြောင်းဟာ ညနေ ၆ နာရီကျော်မှာ မင်းတုန်းနယ်ကတဆင့် သရက်မြို့နယ်၊ အောက်မမြင့်ရွာကို ဝင်ရောက်ခဲ့ကာ ဇန်နဝါရီ ၁၄ ရက်ဒီကနေ့ မှာတော့ ပုဏ္ဏားကျေးရွာကို စစ်ကြောင်းထိုးဝင်ရောက်နေတယ်လို့ သိရပါတယ်။

အာဏာသိမ်းစစ်တပ်ဟာ သရက်ခရိုင်ရွေးကောက်ပွဲအပိုင်း ၃ ပြုလုပ်နိုင်ဖို့ ဇန်နဝါရီ ၉ ရက်ကစတင်ပြီး သရက်-မင်းတုန်းလမ်းပိုင်းနဲ့ မင်းတုန်းမြို့နယ်တွေကို စစ်အင်အား ၂၅၀ ကျော်နဲ့ စစ်ကြောင်းထိုး လုံခြုံရေးယူတာတွေလုပ်ဆောင်နေတာဖြစ်တယ်လို့ သိရပါတယ်။

အောင်စိုး၊ ကျော်ကြီး

မြေလတ်အသံ၊ ဇန်နဝါရီ ၁၀၊ ၂၀၂၆။

စစ်ကိုင်းတိုင်း၊ ယင်းမာပင်နဲ့ ခင်ဦးမြို့နယ်ကကျေးရွာတွေကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေများခဲ့ပြီး ၄ ဦးသေဆုံးခဲ့တယ်လို့ ဒေသကာကွယ်ရေးတပ်ဖွဲ့ဝင်တွေဆီက သိရပါတယ်။

ယင်းမာပင်မြို့နယ်၊ ပြန်လှည့်ကျေးရွာရှိ စားသောက်ဆိုင်အနီးကို စစ်ကော်မရှင်တပ်က စက်တပ်လေထီး ၂ စီးနဲ့ ဇန်နဝါရီ ၉ ရက် ည ၆နာရီကျော်မှာ ဗုံးကြဲတိုက်ခိုက်ခဲ့တာကြောင့် အမျိုးသမီး ၂ ဦးအပါအဝင် ၄ ဦးသေဆုံးခဲ့တယ်လို့ ဒေသခံတွေကပြောပါတယ်။

“ဆိုင်မှာက လူစည်နေတဲ့အချိန်ပါ။ ထမင်းစားသူတွေနဲ့စည်ကားနေတာ။ ထမင်းဆိုင်လည်း ပျက်စီးသွားတယ်။ သေဆုံးသူတွေက ဆိုင်ကလူတွေဗျ။ ခရီးသွားကားသမား ၁ ယောက်ပါတယ်။ တိုက်ပွဲမရှိဘဲ ပြည်သူတွေကို အကြောင်းမဲ့သတ်ဖြတ်နေတာ”လို့ ယင်းမာပင်ဒေသခံတော်လှန်ရေး တပ်ဖွဲ့ဝင်တဦးက ပြောပါတယ်။

ဗုံးမှန်သေဆုံးခဲ့သူတွေဟာ အသက် ၂၀ ကျော်အရွယ် အမျိုးသမီး ၂ ဦး၊ အသက် ၂၀ နဲ့ ၃၀ အရွယ်ရှိ အမျိုးသား ၂ ဦးတို့ဖြစ်ပြီး နွာ ၉‌ ကောင်၊ မြင်း ၁ ကောင်‌လည်း သေဆုံးကာ ထွန်စက်ကား ၁ စီး၊ မြေတူးကား ၁ စီး မီးလောင်ခဲ့တယ်လို့ ဆိုပါတယ်။

ယင်းမာပင်မြို့အရှေ့ဘက် ၅ မိုင်ခန့်အကွာ အိမ်ခြေ ၈၀၀ နီးပါးရှိတဲ့ ပြန်လှည့်ရွာက ဒေသခံတွေကတော့ နောက်ထပ်ဗုံးလာကြဲမှာကြောက်ပြီး ရွာကနေထွက်ပြေးနေကြတယ်လို့ ဆိုပါတယ်။

အလားတူ ခင်ဦးမြို့နယ်၊ လယ်သစ်ရွာကို စစ်ကော်မရှင်ဘက်က ၂ ရက်ဆက်ဗုံးကြဲခံရပြီး ထိခိုက်သူတွေများခဲ့တယ်လို့ ခင်ဦးမြို့နယ်ပကဖ တာဝန်ရှိသူတွေဆီက သိရပါတယ်။

ဇန်နဝါရီ ၉ ရက် ည ၇ နာရီခွဲကျော်ခန့်မှာ တံတားဦးလေတပ်ကဘက်ကတက်လာတဲ့ ဂျက်ဖိုက်တာဟာ လယ်သစ်ကျေးရွာကို ဗုံး ၁ လုံးကြဲချခဲ့တယ်လို့ ဆိုပါတယ်။

“ရွာထဲက နာရေးအိမ်နားကိုကျတာ။ နာရေးလာတဲ့သူတွေ ထိကြတာ။ သာမန်ရောဂါနဲ့ဆုံးတဲ့သူ နာရေးပါ။ ၅ နှစ်သားကလေးပါ ထိတယ်။”လို့ ခင်ဦးမြို့နယ်ပကဖ တာဝန်ခံက ပြောပါတယ်။

ဗုံးပေါက်ကွဲစထိမှန်လို့ အသက် ၅ နှစ်အရွယ် ယောက်ျားလေး ၁ ဦး၊ အသက် ၃၀ ကနေ ၄၀ ကြား အမျိုးသား ၅ ဦးဒဏ်ရာရပြီး အဲဒီအထဲက ကလေးငယ်အပါအဝင် ၂ ဦးက စိုးရိမ်ရတယ်လို့ ဆိုပါတယ်။

ဒါ့အပြင် ဗုံးကျရောက်ပေါက်ကွဲလို့ နာရေးအိမ်အပါအဝင် အနီးအနားနေအိမ် ၃ လုံးခန့်ထိခိုက် ပျက်စီးမှုရှိတယ်လို့ သိရပါတယ်။

ဇန်နဝါရီ ၁၀ ရက် ဒီမနက် ၉ နာရီကျော်မှာလည်း စစ်ဘေးရှောင်ပြည်သူတွေအနေများတဲ့ သင်ပေါင်းကျေးရွာအနီးဝန်းကျင်ကို ဂျက်ဖိုက်တာ ၅ စီးနဲ့ဗုံးကြဲပစ်ခတ်ခဲ့တာကြောင့် စစ်ဘေးရှောင် ၄ ဦးထက်မနည်း ဒဏ်ရာရခဲ့တယ်လို့ ဆိုပါတယ်။

လေကြောင်းတိုက်ခိုက်ခံရတဲ့ လယ်သစ်၊ သင်ပေါင်းကျေးရွာတွေဟာ သပိတ်ကျင်း၊ စဉ့်ကူးမြို့နယ်တွေနဲ့ နီးစပ်တာကြောင့် အဆိုပါဒေသတွေက စစ်ဘေးရှောင်တွေဟာ ကျေးရွာအနီးဝန်းကျင်တွေမှာ နေထိုင်ကြတာတွေရှိတယ်လို့ သိရပါတယ်။

ဇန်နဝါရီ ၅ ရက်ညကလည်း ခင်ဦးမြို့နယ်၊ ကုန်းကြီးကျေးရွာမှာ စစ်ရှောင်တွေနေတဲ့နေရာ ဗုံးကြဲခံရလို့ ၃ ဦးသေပြီး ၁၀ ဦးကျော်ဒဏ်ရာရခဲ့သေးတယ်လို့ သိရပါတယ်။

စာတည်း – လင်း