ပဲခူး၊ ဇွန် ၁၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီမြို့နယ်၊ ကျောက်အိုင်ရွာမှာ မေလ ၂၅ ရက် ညနေပိုင်းက ဖဲဝိုင်းအတွင်း ပစ်ခတ်မှုဖြစ်လို့ အမျိုးသား ၁ ဦး သေဆုံးကာ ၁ ဦးဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

သုံးဆယ်ဆည်ဘောင်အနီးရှိ ကျောက်အိုင်ရွာမှာ ပြုလုပ်တဲ့ဖဲဝိုင်းကို စစ်ကောင်စီလက်အောက်ခံ ကျောက်အိုင်ရွာအုပ်ချုပ်ရေးမှူး သန်းဝင်းက လိုင်းကြေးလာတောင်းရာ မပေးဆောင်တာကြောင့် အချင်းများရာကနေ အုပ်ချုပ်ရေးမှူးက သေနတ်နဲ့ပစ်ခတ်ခဲ့တာလို့ ဆိုပါတယ်။

“အုပ်ကြီး သန်းဝင်းက သေနတ်ကိုင်ခွင့်ရထားတာ။ ဖဲဝိုင်းလုပ်ရင် လိုင်းကြေးလာလာကောက်တယ်။ အရင်ကတော့ပေးနေကျ။ ခဏခဏတောင်းတော့ လူပါးဝလို့ဆိုပြီး ခုတခေါက်မပေးဘူး ပြောတော့ ပြသနာတက်ကြပြီး အုပ်ကြီးက သေနတ်နဲ့ပစ်တာ” လို့ လုံခြုံရေးအရ အမည်မဖော်လိုတဲ့ ဒေသခံတဦးက မြေလတ်အသံကို ပြောပါတယ်။

ပစ်ခတ်မှုကြောင့် ဖဲဝိုင်းဦးဆောင်ပြုလုပ်သူ အသရော်ကျေးရွာသား ဇော်သက် ဆိုသူသေဆုံးပြီး အငယ်လေးဆိုသူမှာလည်း သေနတ်ဒဏ်ရာအများအပြား ရရှိခဲ့တယ်လို့ ဆိုပါတယ်။

အခင်းဖြစ်ပွားပြီးတဲ့နောက် သေနတ်နဲ့ပစ်ခတ်ခဲ့တဲ့ ကျောက်အိုင်ရွာအုပ်ချုပ်ရေးမှူးကို သာယာဝတီအခြေစိုက် အမှတ် ၁၀၁၀ လေကြောင်းရန်ကာကွယ်ရေးတပ်ရင်း (လကတ ၁၀၁၀) တပ်က ခေါ်ဆောင် စစ်ဆေးခဲ့ပေမယ့် ပြန်လည်လွှတ်ပေးခဲ့တယ်လို့ သိရပါတယ်။

သေဆုံး၊ဒဏ်ရာရရှိခဲ့သူတွေနဲ့ပတ်သက်လို့ နစ်နာသူမိသားစုဝင်တွေကိုတော့ ငွေကျပ် သိန်း ၇၀ နဲ့ အမှုပိတ်ကျေအေးခိုင်းခဲ့ပြီး အမှုမပိတ်ပေးရင် PDF လို့စွပ်စွဲကာ ဖမ်းဆီးအမှုပိတ်မယ်လို့ စစ်ကောင်စီတပ်နဲ့ အုပ်ချုပ်ရေးမှူးက ခြိမ်းခြောက်ခဲ့တယ်လို့ ပြောပါတယ်။

“အဲ့ဒီအုပ်ကြီးက သာယာဝတီ ခလရ ၃၅ တပ်နဲ့က လင်မယားလိုနေတာ။ လူသေတဲ့အထိဖြစ်တာတောင် သူတို့လျော်ကြေးပေးတဲ့အတိုင်းအမှုပိတ်ခိုင်းတယ်။ အမှုမပိတ်ပေးရင် PDF ဆိုပြီးဖမ်းမယ် ပြောပြီးပိတ်ခိုင်းတာ။ ဒီဖြစ်စဉ်ကိုလည်း သတင်းလိုက်အုပ်နေတယ်” လို့ ဆိုပါတယ်။

သာယာဝတီမြို့နယ်အတွင်း သုံးဆယ်ဆည်ဘောင်အနီးရှိ ကျေးရွာတွေမှာ လိုင်းကြေးပေးလုပ်ဆောင်နေတဲ့ လောင်းကစားဝိုင်းတွေအများအပြားရှိနေပြီး ဒေသကာကွယ်ရေးတပ်ဖွဲ့တွေဘက်ကလည်း အဲ့ဒီ လောင်းကစားဝိုင်းတွေကို သတိပေးတားမြစ်ထားပေမယ့် ဆက်လက်လုပ်ဆောင်နေတာတွေ ရှိတယ်လို့ သိရပါတယ်။

မန္တလေး၊ မေ ၂၆၊ ၂၀၂၅။

မန္တလေးမြို့၊ အောင်မြေသာစံမြို့နယ်ရှိ အင်းဝဘဏ်မှာ လုံခြုံရေးတာဝန်ကျတဲ့ စစ်ကောင်စီတပ်ဖွဲ့ဝင် အချင်းချင်း ပစ်ခတ်မှုဖြစ်ခဲ့ပြီး တပ်ကြပ်ကြီး ၁ ဦးသေဆုံးကာ ၁ ဦးဒဏ်ရာရခဲ့တယ်လို့ စစ်ကောင်စီရဲ့ အလယ်ပိုင်းတိုင်းစစ်ဌာနချုပ်နဲ့ နီးစပ်သူဆီက သိရပါတယ်။

မေ ၂၅ ရက်မနေ့ကနေ့လယ် ၁၂ နာရီဝန်းကျင်မှာ မန္တလေးမြို့၊ ဈေးချိုနာရီစင်အနီး ၂၆ လမ်းနဲ့ ၈၄ လမ်းထောင့်ရှိ အင်းဝဘဏ်မှာလုံခြုံရေးစောင့်နေကြချိန် ပစ်ခတ်မှုဖြစ်ခဲ့ကြတာလို့ ဆိုပါတယ်။

“ပြင်ဦးလွင်ကလာတဲ့ လုံခြုံရေးကားလို့ပြောတာပဲ။ တပ်ကြပ်ကြီးကိုတပ်သားကပစ်တာ။ တပ်မှာ ကိုယ့်ထပ်ရာထူးကြီးတဲ့ သူကိုအဲဒီလိုအာခံလို့မှမရတာ။ ဒုတပ်ကြပ်ကလည်း တပ်ကြပ်ကြီးဘက်က ဝင်ပြောပုံပဲ။ ဒုတပ်ကြပ်ကဒဏ်ရာရတယ်။ တပ်ကြပ်ကြီးကတော့သေတယ်”လို့ အလယ်ပိုင်းတိုင်း စစ်ဌာနချုပ်နဲ့ နီးစပ်သူတဦးကပြောပါတယ်။

သေဆုံးသူတွေဟာ ဘယ်တပ်တွေကလဲဆိုတာကိုတော့ သီးခြားအတည်မပြုနိုင်သေးပါဘူး။

ဒီပစ်ခတ်မှုကကြားရတဲ့ သေနတ်သံတွေကြောင့် မန္တလေးဈေးချိုထဲကဆိုင်တချို့လည်း ကြောက်လန့်ပြီး ပိတ်ခဲ့ကြတယ်လို့ မန္တလေးမြို့ခံတဦးက ပြောပါတယ်။

“ဘ‌‌ဏ်ပိတ်ရက်ဖြစ်တာ။ သေနတ်သံကတော့အချက်ရေတော်တော်များတယ်။ အဲ့တာကြောင့် ဆိုင်တချို့ကပိတ်သွားကြတာ။ ဒီနေ့တော့ပုံမှန်ပါပဲ”လို့ မြို့ခံတဦးက ပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီဘက်က ရှာဖွေစစ်ဆေးမှုတွေလုပ်ခဲ့ပြီး ပစ်ခတ်ခဲ့တဲ့ စစ်ကောင်စီတပ်သားက လက်ရှိအချိန်ထိထွက်ပြေးလွတ်မြောက်နေဆဲဖြစ်တယ်လို့ သိရပါတယ်။

စာတည်း – လင်း

စစ်ကိုင်း၊ မေ ၁၉၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မြေနဲကျေးရွာရှိ စွမ်းရည်ထက်ဆီဆိုင်မှာတပ်စွဲထားတဲ့ စစ်ကောင်စီတပ်က တိုက်ပွဲဖြစ်ပွားတာမရှိဘဲ လက်နက်ကြီးတွေနဲ့ပစ်ခတ်ခဲ့လို့ ဘာသာရေးအဆောက်အဦးတွေ ထိမှန်ပျက်စီးခဲ့တယ်လို့ သိရပါတယ်။

တပ်စွဲထားတဲ့ဆီဆိုင်ကနေ မုံရွာတောင်နယ်ကျေးရွာဘက်ကို မေလ ၁၇ ရက် ည ၈ နာရီဝန်းကျင်မှာ ၆၀ မမ ဗုံးသီးတွေနဲ့ ပစ်ခတ်ခဲ့တာကြောင့် အဲ့ဒီရွာဘုန်းကြီးကျောင်းမှာရှိတဲ့ ကျောင်းဆောင်နဲ့ ဘုရားစေတီတချို့ထိမှန် ပျက်စီးသွားတာလို့ မုံရွာဒေသခံတဦးက ပြောပါတယ်။

“သူတို့(စကစ)နေရာနဲ့ မုံရွာတောင်နယ်ရွာက ၁ မိုင်ကျော်လောက်ပဲရှိတယ်။ အရင်ကလည်း အခုလို လက်နက်ကြီးတွေနဲ့ရမ်းသမ်းပစ်တယ် ထိခိုက်တာတွေတော့မရှိခဲ့ဘူး။ ဒီတခါမှ ၂ လုံးပစ်တာ ဘုန်းကြီး ကျောင်းကိုထိသွားတယ်။ လူတော့မထိဘူး။ သူတို့က စိတ်မကြည်ရင်မကြည်သလိုပစ်တာ” လို့ မြေလတ်အသံကို ပြောပါတယ်။

စစ်ကောင်စီတပ်စွဲထားတဲ့ စွမ်းရည်ထက်ဆီဆိုင်နဲ့အနီးတဝိုက်က ကျေးရွာဒေသခံတွေဟာ ထွက်ပြေးတိမ်းရှောင်ရတာမျိုးမရှိသေးပေမဲ့လည်း လက်နက်ကြီးတွေနဲ့ပစ်ခတ်မှုတွေရှိနေလို့ ညဘက်တွေမှာ သတိထားအိပ်စက်နေရကာ စစ်ကြောင်းထိုးဝင်ရောက်လာနိုင်တဲ့အတွက်လည်းအသင့်အနေအထားပြင်ဆင်ထားရတယ်လို့ ဆိုပါတယ်။

ပြီးခဲ့တဲ့ မတ်လ ၁၅ ရက်နေ့ကလည်း အဲ့ဒီစစ်ကောင်စီတပ်ဖွဲ့ဟာ မုံရွာမြို့နယ်ထဲက ထနောင်းတောတောင်ရွာကို ဝင်ရောက်လာပြီး နေအိမ်အလုံး ၆၀ ကျော်ကိုမီးရှို့ဖျက်ဆီးခဲ့တာကြောင့် ထွက်မပြေးနိုင်တဲ့ အသက် ၇၀ အရွယ်အဘွားတဦးလည်း မီး လောင်သေဆုံးသွားခဲ့သေးတယ်လို့သိရပါတယ်။

စာတည်း − ရင်ငြိမ်း

စစ်ကိုင်း၊ ဖေဖော်ဝါရီ ၁၆၊ ၂၀၂၃။

စစ်ကိုင်းတိုင်း၊ ကနီမြို့ပေါ်မှာ စစ်ကောင်စီတပ်သား ၂ ဦး ကင်းလှည့်ချိန် ရန်ဖြစ်စကားများရာမှ အချင်းချင်းပစ်ခတ်မှုဖြစ်ပြီး တပ်သားတဦး သေဆုံးသွားတယ်လို့ ‌ဒေသခံတွေဆီက သိရပါတယ်။

ဖေဖော်ဝါရီလ ၁၅ ရက်ည ၇ နာရီလောက်မှာ စစ်ကောင်စီတပ်သား ၂ ဦးဟာ ကင်းလှည့်နေရင်း ကနီမြို့ အမှတ်(၃)ရပ်ကွက် မြန်မာစီးပွားရေးဘဏ်အနီးက အစိုးရသစ်စက်ဝန်းအတွင်းမှာ အချင်းချင်း ပစ်ခတ်မှု ဖြစ်ပွားခဲ့တယ်လို့ ကနီမြို့ခံ အမျိုးသမီးတဦးက မြေလတ်အသံကို ပြောပါတယ်။

“အာဏာသိမ်းချိန်ကစလို့ မြို့ကိုအစောင့်ယူထားတဲ့ သူတွေပါရှင့်၊ အချင်းချင်း ကင်းလှည့်ရင်း နောက်ကနေ ပစ်တာပါ။ သူတို့က ကနီထွေအုပ်ရုံးမှာ အထိုင်ထားပါတယ်” လို့ ဆိုပါတယ်။

ပစ်ခတ်ခံရသူ အသက် ၃၀ နှစ်အရွယ် တပ်သား ဖိုးကြယ် (ခေါ်) အောင်တိုးထွန်းဟာ ဖေဖော်ဝါရီလ ၁၆ ရက် ဒီကနေ့မနက်ပိုင်းက ကနီပြည်သူ့‌ဆေးရုံမှာ ဆေးကုသမှုခံနေရင်း သေဆုံးသွားခဲ့ပြီး၊ ကျန်တပ်သားတဦးကတော့ လက်နတ်ယူပြီး ထွက်ပြေးသွားတယ်လို့ အထက်ပါ ဒေသခံအမျိုးသမီးက ဆက်ပြောပါတယ်။

“သေဆုံးတာက ကနီဆေးရုံမှာ ဆေးကုသရင်း ဒီနေ့မနက်ခင်း ၄ နာရီက သေဆုံးသွားတယ်။ နေ့လည် ၁ နာရီလောက်သင်္ဂြိုဟ်တယ်။ သေဆုံးမှုကို မြို့ပေါ်ကနေ စုံစမ်းသိရှိရတာပါ” လို့ ဆိုပါတယ်။

စစ်ကောင်စီတပ်သား ဖိုးကြယ် (ခေါ်) အောင်တိုးထွန်း သေဆုံးမှုနဲ့ပတ်သက်ပြီး ကနီမြို့ထဲမှာ စစ်ဆေးမှုတွေ ပြုလုပ်နေကြောင်းနဲ့ ထွက်ပြေးလွတ်မြောက်နေတဲ့ တပ်သားတဦးကိုလည်း အခုချိန်ထိ ပြန်လည်ဖမ်းဆီးလို့ မရသေးဘူးလို့လည်း သိရပါတယ်။