နတ်တလင်း၊ နိုဝင်ဘာ ၃၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ ဝဲကြီးဆည်ကျေးရွာက စစ်ကော်မရှင်တပ်ဖမ်းဆီးခဲ့တဲ့ မိသားစုထဲက အမျိုးသားဖြစ်သူကို သေဆုံးလျက်ပြန်တွေ့ခဲ့ပြီး သေဆုံးသူရဲ့ဇနီးနဲ့ ကလေးကိုတော့ ဆက်လက် ဖမ်းဆီးထားတယ်လို့ ဒေသခံတွေဆီက သိရပါတယ်။

သေဆုံးသူဟာ ဝဲကြီးဆည်ကျေးရွာသား အသက် ၃၀ အရွယ် ကိုတိုး ဖြစ်ပြီး အလောင်းကို နိုဝင်ဘာ ၂ ရက် မနက််ပိုင်းမှာ ဝဲကြီးဆည်အနီးလယ်ကွင်းထဲမှာ ဒေသခံတွေက တွေ့ရှိခဲ့တာလို့ ဆိုပါတယ်။

“သူက ဖမ်းခံရပြီး (အောက်တိုဘာ) ၂၉ ရက်မှာ ထွက်ပြေးသွားတယ်။ သူမိန်းမနဲ့ကလေးကို နေအိမ်ကနေ နောက်တရက် လာဖမ်းသွားတယ်။ သူကလွတ်ရာလွတ်ကြောင်း သွားရင်းလာရင်း ပြေးရင်းနဲ့ ဝေဒနာတွေခံစားရင်း သေတာလို့ယူဆတယ်။ ဒီကြားထဲအစာအာဟာရ စားရချင်မှလည်း စားရမယ်။ “လို့ ဒေသခံတဦးကပြောပါတယ်။

သူအလောင်းကိုတွေ့ချိန်မှာ ရင်ဘတ်ကျောနဲ့ဦးခေါင်းတွေမှာ ရိုက်နှက်ခံထားရတဲ့ဒဏ်ရာ အညိုအမဲစွဲနေတာတွေရှိပြီး သေနတ်ဒဏ်ရာ၊ ဓားဒဏ်ရာတွေမတွေ့ရဘဲ သေတာလည်း ၂ ရက်ခန့်သာရှိနိုင်သေးတယ်လို့ သူကဆက်ပြောပါတယ်။

အလောင်းကိုတော့ ကျေးရွာထဲကို ပြန်မသယ်ရဲကြတာကြောင့် ဒေသခံတွေက တောထဲတနေရာမှာပဲ နေ့ချင်းမြှုပ်နှံလိုက်ကြတယ်လို့ ဆိုပါတယ်။

ကိုတိုးဟာ ကျပန်းလုပ်ကိုင်စားသောက်သူဖြစ်ပြီး အောက်တိုဘာ ၂၈ ရက်နေမနက် ၁၀ နာရီခန့်မှာ ဝဲကြီးဆည် စက်လှေဆိပ်ကို အလုပ်ကိစ္စနဲ့တယောက်တည်းအသွား စက်လှေဂိတ်မှာ စစ်ကော်မရှင်တပ်သားတွေက ဖမ်းဆီးခဲ့တာပါ။

အဲဒီနောက်သူကို စစ်ကော်မရှင်တပ်သားတွေအထိုင်ချတပ်စွဲထားတဲ့ ဆည်ဘောင်ပေါ်က စခန်းကို ခေါ်သွားပြီး ရိုက်နှက်စစ်ဆေးမှုတွေပြုလုပ်ခဲ့ရာ အောက်တိုဘာ ၂၉ ရက်နေ့ညပိုင်းမှာ ထွက်ပြေးသွားခဲ့တယ်လို့ ဆိုပါတယ်။

အောက်တိုဘာ ၃၀ ရက်မှာတော့ စစ်ကော်မရှင်အဖွဲ့က ကိုတိုးထွက်ပြေးသွားလို့ဆိုပြီး ၎င်းရဲ့ အမျိုးသမီးဖြစ်သူနဲ့ သမီးဖြစ်သူ အသက် ၇ နှစ်အရွယ် G 2 ကျောင်းသူတွေကို ဆည်တာဘောင်ပေါ်ရှိ အထိုင်ချထားတဲ့စခန်းကိုဖမ်းဆီးသွားကာ နိုဝင်ဘာ ၃ ရက်အထိပြန်လွှတ်ပေးတာမရှိသေးဘူးလို့ သိရပါတယ်။

ဝဲကြီးဆည်တာဘောင်ပေါ်မှာ စစ်ကော်မရှင်တပ်အင်အား ၃၀ ခန့်က ၂၀၂၁ စစ်အာဏာသိမ်းပြီး ကတည်းက တပ်စွဲနေကာ ဒေသခံတွေကို မကြာခဏ ဖမ်းဆီးစစ်ဆေးတာတွေပြုလုပ်နေတာလို့ သိရပါတယ်။

စာတည်း – လင်း

နတ်တလင်း၊ အောက်တိုဘာ ၁၈၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ အမှတ် ၆ ရပ်ကွက်နဲ့ နတ်တလင်းမြို့နယ်ထဲက ကျေးရွာ ၄ ရွာကို စက်တပ်လေထီးနဲ့ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် စုစုပေါင်း ၃ ဦးသေဆုံးကာ ၇ ဦးဒဏ်ရာရခဲ့တယ်လို့ ဒေသခံတွေဆီကသိရပါတယ်။

အောက်တိုဘာ ၁၈ ရက် မနက် ၅ နာရီကျော်မှာ စစ်ကော်မရှင်တပ်က စက်တပ်လေထီး ၂ စီးနဲ့ အမှတ် ၆ ရပ်ကွက် အစွန်ပိုင်းကို ဗုံးသီး ၆ လုံးထက်မနည်းကြဲချခဲ့တယ်လို့ ဆိုပါတယ်။

“ကလေးကသူ့အိမ်မှာ အိပ်နေချိန်ထိတာ။ ထိတဲ့ကလေးက ကျောင်းသား G-11။ ဒဏ်ရာရတာတော့များတယ်။ အောက်ပိုင်းကော လက်မောင်းတွေကော။ ခုထိ Y 12 နဲ့လည်း လာကြဲနေသေးတယ်။ သတင်းပေးတဲ့ကောင်တွေရှိလို့ လာကြဲတာ”လို့ ဒေသခံတဦးက ပြောပါတယ်။

ဗုံးကြဲခံရပြီး အသက် ၁၈ နှစ်အရွယ် မောင်ရှိုင်းဝဏ္ဏရဲ့ခြေထောက်နဲ့လက်မှာ ထိခိုက်ဒဏ်ရာပြင်းထန်ရရှိပြီး နီးစပ်ရာဆေးရုံကို ပို့ထားရတယ်လို့ ဆိုပါတယ်။

ဒါ့အပြင်အောက်တိုဘာ ၁၇ ရက် နေ့လယ် ၁ နာရီကျော်မှာလည်း ရွှေတောင်မြို့ဘက်ကတက်လာတဲ့ စက်တပ်လေထီး ၂ စီးဟာ နတ်တလင်းမြို့နယ်၊ တောင်ညိုဆည်တဝိုက်ရှိ သင်ဘောချည်တိုင်၊ မယင်း၊ ကြာညို၊ အောင်သုခကျေးရွာတွေကို ဗုံး ၉ လုံးကြဲချခဲ့တယ်လို့ သိရပါတယ်။

“တောင်ညိုဆည် သင်ဘောချည်တိုင်ရွာရဲ့ ဘုန်းကြီးကျောင်းကိုကြဲတာ။ အောင်သုခလှေဆိပ်မှာကျတော့ သစ်စက်ထဲကျလို့ ဒဏ်ရာရကြတယ်။ မယင်းက အပြန်မှာစာသင်ကျောင်းပေါ်ကျတယ်။ ဘုန်းကြီးကျောင်းပေါ်တလုံး၊ စာသင်ကျောင်းပေါ် တလုံး၊ ရွာထိပ်တွေကို ချတယ်။ မထိတဲ့နေရာတွေမထိဘူး။ ထိတဲ့နေရာထိကြတယ်”လို့ ဒေသခံတဦးကပြောပါတယ်။

ဗုံးကြဲခဲ့တာကြောင့် သင်ဘော်ချည်တိုင် ဘုန်းကြီးကျောင်းအတွင်းက သံဃာ ၁ ပါး၊ ကိုရင် ၁ ပါး၊ ကျောင်းသား ၂ ဦး ဒဏ်ရာရကာ၊ ကြာညိုကျေးရွာရှိ ဒေသအခေါ် ကိုမင်းကျော်ကုန်းအနီးနေအိမ်က အသက် ၁၀ နှစ်အရွယ်မိန်းကလေးငယ် ၁ ဦးနဲ့ အမေဖြစ်သူ အသက် ၄၀ ကျော်အရွယ်အမျိုးသမီး ၁ ဦးတို့သေဆုံးခဲ့ပါတယ်။

ဒါ့အပြင် မယင်းကျေးရွာစာသင်ကျောင်းထဲက အမျိုးသား ၁ ဦးလည်းသေဆုံးပြီး အောင်သုခလှေဆိပ်နားက အမျိုးသား ၂ ဦးဒဏ်ရာရခဲ့တယ်လို့ ဆိုပါတယ်။

ခုလိုစက်တပ်လေထီးနဲ့ဗုံးလိုက်ကြဲနေလို့ သင်ဘောချည်တိုင်၊ မယင်း၊ ကြာညို၊ အောင်သုခကျေးရွာတွေက ဒေသခံအများစုကဘေးလွတ်ရာကို တိမ်းရှောင်နေကြရတယ်လို့ သိရပါတယ်။

အောက်တိုဘာ ၁၆ ရက်ကလည်း နတ်တလင်းမြို့နယ်၊ တောင်ညိုဆည်အနီး မကျီးပင်ကျေးရွာမှာ စက်တပ်လေထီးနဲ့ဗုံးကြဲခံရပြီး အမျိုးသား ၁ ဦးသေဆုံးကာ ၂ ဦးဒဏ်ရာရရှိခဲ့ပါသေးတယ်။

စာတည်း – လင်း

နတ်တလင်း၊ အောက်တိုဘာ ၁၇၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ တောင်ညိုဆည်အနီး မကျီးပင်ကျေးရွာမှာ စက်တပ်လေထီးနဲ့ဗုံးကြဲခဲ့တာကြောင့် အမျိုးသား ၁ ဦးသေဆုံးပြီး ၂ ဦးဒဏ်ရာရတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

အောက်တိုဘာ ၁၆ ရက်ညနေ ၆ နာရီခွဲမှာ ရွှေတောင်မြို့ဘက်ကတက်လာတဲ့ စက်တပ်လေထီး ၂ စီးဟာ မကျီးပင်ကျေးရွာထဲကို ဗုံး ၄ လုံးကြဲချခဲ့ရာ ၁ လုံးဟာ ပြည်သူနေအိမ်ပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

“ဘုန်းကြီးကျောင်းရှင်းလင်းဆောင်နားက ရွာသားတွေနေတဲ့ နေအိမ်ပေါ်ကျတာ။ ကျားချည်ပဲ။ ၁ ဦးကနေရာမှာ ပွဲချင်းပြီးပဲ”လို့ ဒေသကာကွယ်ရေးအဖွဲ့ဝင်တဦးကပြောပါတယ်။

တိုက်ပွဲဖြစ်တာမရှိဘဲ ခုလို ဗုံးကြဲခဲ့တာကြောင့် အသက် ၆၀ အရွယ် အမျိုးသား ၁ ဦးသေဆုံးပြီး အသက် ၃၀ ကျော်နဲ့ ၁၄ နှစ်အရွယ် အမျိုးသား ၂ ဦးတို့ဒဏ်ရာရသွားတယ်လို့ ဆိုပါတယ်။

စက်တင်ဘာ ၇ ရက်ကလည်း အုတ်ဖိုမြို့နယ်၊ ချင်းစုကျေးရွာနဲ့ကိုင်းကြီးကျေးရွာကို စစ်ကော်မရှင်တပ်သားတွေက ဂျိုင်ရိုကော်ပတာနဲ့ဗုံးကြဲချလို့ ပြည်သူ ၃ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

နတ်တလင်း၊ အောက်တိုဘာ ၁၄၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ ဖလံပင်ကျေးရွာမှာ ဘိလိယက်ထိုးနေတဲ့ လူငယ်တွေဖမ်းဆီးခံရပြီး ၁ ဦးကို ကျပ်သိန်း ၂၀ စီနဲ့ ငွေပေးကာ ပြန်လည်ရွေးယူခဲ့ရတယ်လို့ ဒေသခံတွေဆီက သိရပါတယ်။

အောက်တိုဘာ ၁၃ ရက် ယမန်နေ့ ညနေ ၃ နာရီခန့်မှာ စစ်ကော်မရှင်တပ်နဲ့ပျူစောထီးပူးပေါင်းအင်အား ၃၀ ခန့်ဟာ နတ်တလင်းမြို့ပေါ်ကနေ နတ်တလင်း-ငုတ်တို-သရက်ပင်ကန်လမ်းအတိုင်း ဆိုင်ကယ်တွေနဲ့ ဖလံပင်ရွာကိုရောက်လာပြီး ရွာထိပ်ဘိလိယက်ခုံမှာ ဘိလိယက်ထိုးနေတဲ့ လူငယ် ၃ ဦးကို ဖမ်းဆီးခဲ့တာလို့ ဆိုပါတယ်။

” ဘိလိယက်ထိုးနေတာကိုဝင်ဖမ်းတယ်။ ဖမ်းပြီးတော့ သေနတ်ပစ်ဖောက်သွားသေးတယ်။ ခုံမှာက သူတို့တွေပဲရှိတာ။ ဖမ်းတော့ ဘေးကလူတွေက အဲ့မှာပါတဲ့ သက်ဝေအောင်က ကျောင်းသားဘဲရှိသေးတယ်လို့ဝိုင်းပြောကြတယ်။ သူက တက္ကသိုလ်ကျောင်းသား။ သူ့ကိုတော့ပြန်လွှတ်ပေးခဲ့တယ်” လို့ ဖလံပင်ရွာဒေသခံတဦးက မြေလတ်အသံကို ပြောပါတယ်။

ကျေးရွာဒေသခံတွေက ဝိုင်းဝန်းပြောဆိုတာကြောင့် တက္ကသိုလ်ကျောင်းသားလူငယ် ၁ ဦးကို လွှတ်ပေးခဲ့ပြီး အသက် ၃၀ အရွယ် အောင်မျိုးကျော်နဲ့ အသက် ၂၅ နှစ်အရွယ် ကိုဝိုင်းမင်းထွန်းတို့ ၂ ဦးကို စစ်ကော်မရှင်တပ်သားတွေက နတ်တလင်းရဲစခန်းဆီ ဖမ်းဆီးခေါ်ဆောင်သွားခဲ့တယ်လို့ ဆိုပါတယ်။

ဖမ်းဆီးခံရသူလူငယ်အမျိုးသား ၂ ဦးကို ၎င်းတို့ရဲ့မိသားစုဝင်တွေက ယမန်နေ့ညနေပိုင်းမှာပဲ နတ်တလင်းရဲစခန်းကနေ ၁ ဦးကို ကျပ်သိန်း ၂၀ ပေးပြီး ပြန်ရွေးထုတ်ခဲ့ရတယ်လို့ မိသားစုနဲ့နီးစပ်သူဒေသခံတွေထံက သိရပါတယ်။

ဖလံပင်ကျေးရွာစစ်ကော်မရှင်အုပ်ချုပ်ရေးမှူး မင်းသူဟာ နတ္တလင်းမြို့ပေါ်ကိုပြောင်းရွှေ့ပြီးရှောင်တိမ်းနေထိုင်တာ ၅ လခန့်ရှိနေပြီဖြစ်တာကြောင့် အဲ့ဒီရွာကနေ စစ်မှုထမ်းအတွက် လစဥ်ကောက်ငွေမရရှိတာ၊ စစ်မှုထမ်းဖို့လူမပေးတာတွေကြောင့် အခုလိုအင်အားသုံးလာရောက်ပေါ်တာဆွဲဖမ်းဆီးတာဖြစ်နိုင်တယ်လို့ အထက်ပါရွာခံက ဆက်ပြောပါတယ်။

စစ်ကော်မရှင်တပ်သားတွေဟာ လစဥ်ဖွင့်လှစ်နေတဲ့ စစ်မှုထမ်းသင်တန်းတွေအတွက် အုပ်ချုပ်ရေးမှူးတွေကတဆင့် ရပ်ကွက်၊ ကျေးရွာတွေကနေ ဆင့်ခေါ်စုဆောင်းတာတွေအပြင် လမ်းသွားလမ်းလာလူငယ်တွေကို ပေါ်တာဆွဲဖမ်းဆီးတာတွေ လုပ်ဆောင်နေကာ ပဲခူးတိုင်း၊ စစ်ကိုင်းတိုင်း၊ မန္တလေးတိုင်း၊ ဧရာဝတီတိုင်းတွေက လူငယ်တွေကို ပစ်မှတ်ထားဖမ်းဆီးနေတာပါ။

ဇန်နဝါရီလ ၁၆ ရက်ကလည်း နတ်တလင်းမြို့နယ်၊ ဆီဆုံကုန်းကျေးရွာကို စစ်ကော်မရှင်တပ်တွေ စစ်ကြောင်းထိုးဝင်ရောက်လာပြီးနောက် ရွာခံအမျိုးသား ၃ ဦးကိုဖမ်းဆီးပစ်သတ်ခဲ့သေးတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ စက်တင်ဘာ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်မှာ စစ်မှုထမ်းဖို့ ဖမ်းဆီးခံထားရသူလူငယ်က အစောင့်ရဲတပ်ဖွဲ့ဝင်တဦးကိုသတ်ပြီး လက်နက်ခဲယမ်းတွေယူဆောင်ထွက်ပြေးလာတယ်လို့ သာယာဝတီခရိုင် အမှတ် ၁ တပ်ရင်း ၃၈၀၁ ဆီက သိရပါတယ်။

ထွက်ပြေးလွတ်မြောက်လာသူဟာ တောင်ညိုကွက်သစ်ရဲစခန်းမှာ စစ်မှုထမ်းအဖြစ်ပို့ဆောင်ဖို့ဖမ်းဆီးခံထားရသူ အသက် ၁၈ နှစ်အရွယ် စိုင်းမြတ်ကို ဖြစ်ပြီး စက်တင်ဘာ ၂၁ ရက် ညပိုင်းမှာ အစောင့်ရဲတပ်သားကို ဓားနဲ့ထိုးသတ်ပြီး လက်နက်ခဲယမ်းတွေယူဆောင်ထွက်ပြေးလာပြီးနောက် PDF တွေဆီ ရောက်ရှိလာတာလို့ ဆိုပါတယ်။

” သူကလည်း စစ်မှုထမ်းအဖြစ် ဆွဲခံရတာ ၁၀ ရက်လောက်ပဲ ရှိသေးတယ်။ သူက သူတို့(ရဲတပ်ဖွဲ့) ယုံကြည်မှုကို ရအောင်ယူတယ်။ သူ့ကို တောင်ညိုရဲစခန်းမှာ လွတ်လပ်စွာထားတယ်၊ သူနဲ့အတူရှိနေတဲ့ ရဲတဦးကို အဲ့ဒီရဲရဲ့ဓါးနဲ့လည်ပင်းကို ထိုးဖောက်ပြီး လက်နက်ခဲယမ်းတွေကို တိတ်ဆိတ်စွာယူဆောင်နိုင်ခဲ့တယ်။ တိတ်ဆိတ်စွာယူဆောင်နိုင်ခဲ့တာလည်း သူတို့တန်းစီနေတဲ့အချိန် ဖြစ်ပါတယ်။ သူ့မှာထွက်ပေါက်ရာ လမ်းတခုရသွားတာပေါ့။ ဘန်ကာကင်းထဲမှာ သူနဲ့အတူရှိနေတဲ့ ရဲ** ၁ ကောင်ကို သူသုတ်သင်ရှင်းခဲ့ပြီးတော့ သူထွက်ပြေးတိမ်းရှောင်လာခဲ့တာ” လို့ သာယာဝတီခရိုင်အမှတ် ၁ တပ်ရင်း ၃၈၀၁ တပ်ရင်းမှူး ဗိုလ်မိုးကြိုး က မြေလတ်အသံကို ပြောပါတယ်။

စိုင်းမြတ်ကိုဟာ ပြီးခဲ့တဲ့ စက်တင်ဘာဒုတိယပတ်အတွင်းက တောင်ညိုကွက်သစ်ဈေးတန်းမှာ စစ်ကော်မရှင်တပ်နဲ့ ရဲတပ်ဖွဲ့ဝင်တွေရဲ့ လူ၊ ဆိုင်ကယ်တွေကို စစ်ဆေးဖမ်းဆီးချိန် စစ်မှုထမ်းဖို့ ဖမ်းဆီးခံခဲ့ရတာဖြစ်ပြီး စစ်သင်တန်းပို့ဆောင်ဖို့ တောင်ညိုရဲစခန်းထဲ ထိန်းသိမ်းထားစဥ် အခုလိုထွက်ပြေးလွတ်မြောက်လာခဲ့တာလို့ သိရပါတယ်။

ကိုစိုင်းမြတ်ကိုနဲ့ အတူ သေဆုံးရဲတပ်သားရဲ့ G-3 သေနက် ၁ လက်၊ ၇.၆၂ မမ ကျည် ၁၀ တောင့်၊ ကျည်ဘောက် ၁ ခု ယူဆောင်လာနိုင်လို့ ၎င်းကို သိန်း ၂၀ ဆုချီးမြှင့်ထားတယ်လို့ တပ်ရင်းမှူးက ပြောပါတယ်။

စာတည်း – ဟိန်းစံ

မြေလတ်အသံ၊ စက်တင်ဘာ ၂၃၊ ၂၀၂၅။

ပဲခူးတိုင်းအနောက်ခြမ်း၊ နတ်တလင်းမြို့နယ်၊ ချောင်းကမ်းကြီးကျေးရွာက ပျူစောထီးသင်တန်းဆင်း ကြံ့ခိုင်ရေးပါတီဝင်တဦး နေအိမ်မှာ ပစ်သတ်ခံရတယ်လို့ Bamar Revolution Army-B.R.A ထံကသိရပါတယ်။

အသတ်ခံရသူဟာ ချောင်းကမ်းကြီးရွာနေ အသက် ၄၅ နှစ်အရွယ် မြင့်ဇော်ဆိုသူဖြစ်ပြီး စက်တင်ဘာ ၂၂ ရက် ညနေ ၆ နာရီ မိနစ် ၃၀ ကျော်မှာ ကျေးရွာရှိသူ့ရဲ့နေအိမ်အတွင်း ဝင်ရောက်ပစ်ခတ်ခဲ့တာလို့ Bamar Revolution Army-B.R.A တပ်ခွဲမှူး ကိုလကျာ်က မြေလတ်အသံကို ပြောပါတယ်။

ထွက်ပြေးဖို့ကြိုးစားတာကြောင့် သေနတ်နဲ့ ၅ ချက်ပစ်ခတ်ခဲ့ပြီး ကိုမြင့်ဇော်မှာ ဝမ်းဗိုက်အပါအဝင် ခန္ဓာကိုယ်မှာ ကျည်ထိဒဏ်ရာတွေနဲ့နေရာမှာပဲ သေဆုံးသွားတယ်လို့ သိရပါတယ်။

ကိုမြင့်ဇော်ဟာ ချောင်းကမ်းကြီးကျေးရွာ ကြံ့ခိုင်ရေးပါတီရပ်ကျေးအဖွဲ့ဝင်တဦးဖြစ်သလို အင်းမအခြေစိုက်တပ်မ ၆၆ မှာ ဖွင့်လှစ်တဲ့ ပျူစောထီးသင်တန်းကို တက်ရောက်ထားသူဖြစ်ပြီး ဒေသတွင်း စစ်ကော်မရှင်တပ်ဖွဲ့တွေစစ်ကြောင်းထိုးချိန်တိုင်း လမ်းပြအဖြစ် လိုက်ပါဆောင်ရွက်လေ့ရှိတာကြောင့် ပစ်ခတ်ရှင်းလင်းခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက်ပိုင်း စက်တင်ဘာ ၂၃ ရက် ဒီကနေ့မနက်ပိုင်းထိ စစ်ကော်မရှင်တပ်သားတွေ ကျေးရွာကိုလာရောက်စစ်ဆေးတာမျိုးမတွေ့ရသေးဘူးလို့ သိရပါတယ်။

စက်တင်ဘာ ၁၉ ရက် ညပိုင်းမှာ နတ်တလင်းမြို့နယ်၊ စံကြီးလောင်ကျေးရွာနေ စစ်ကောင်စီလက်အောက်ရာအိမ်မှူး သေနတ်ပစ်ခံရလို့ သေဆုံးခဲ့သေးပြီး ၃ ရက်အကြာမှာ နောက်ထပ် ပျူစောထီးသင်တန်းတက်ရောက်ထားသူတဦး ထပ်မံ အသတ်ခံခဲ့ရတာလည်း ဖြစ်ပါတယ်။

စာတည်း – ဟိန်းစံ

နတ်တလင်း၊ စက်တင်ဘာ ၂၀၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ စံကြီးလောင့်ကျေးရွာက ရာအိမ်မှူး ၁ ဦးနေအိမ်မှာပစ်ခတ်ခံရပြီး သေဆုံးခဲ့တယ်လို့ Bamar Revolution Army – B.R.A ဆီကသိရပါတယ်။

ပစ်သတ်ခံရသူဟာ စံကြီးလောင့်ကျေးရွာ ရာအိမ်မှူး အသက် ၄၀ အရွယ် ဇော်မင်းနိုင်ဆိုသူဖြစ်ပြီး စက်တင်ဘာ ၁၉ ရက် ည ၉ နာရီခန့်က သူ့နေအိမ်မှာရှိနေချိန်ပစ်ခတ်ခဲ့တာလို့ဆိုပါတယ်။

“ရွာလယ်ပိုင်းက သူ့အမေကြီးနေအိမ်မှာရှင်းခဲ့တာ။ ထွက်ပြေးဖို့လုပ်လို့ သေနတ်အရှည်နဲ့ ၇ ချက် ပစ်ခတ်ခဲ့တယ်။ သူ့အမေကြီးအိမ်မှာဆိုတော့ ဘာမှသိမ်းဆည်းရမိတာမရှိဘူး။ သူတို့အိမ်သားတွေ ရှိပေမယ့် ထိခိုက်မှုမရှိအောင်ဂရုစိုက်လုပ်ခဲ့ပါတယ်”လို့ Bamar Revolution Army- B.R.A တပ်ခွဲမှူး လကျာ်ကပြောပါတယ်။

သေနတ်နဲ့အနီးကပ်ပစ်ခံရလို့ ရာအိမ်မှူး ဇော်မင်းနိုင်မှာ ဦးခေါင်း၊ ရင်ဘတ်မှာ ကျည်ထိဒဏ်ရာရပြီး ပစ်ခတ်ခံရတဲ့နေရာမှာတင်သေဆုံးခဲ့တယ်လို့ ဆိုပါတယ်။

ဇော်မင်းနိုင်ဟာ စစ်ကော်မရှင်တပ်သားတွေဆီ ဆက်ကြေးပေးပြီး ကျေးရွာမှာ လောင်းကစားဝိုင်းတွေပြုလုပ်တာ၊ စစ်မှုထမ်းကြေးကောက်ပေးတာ၊ စစ်ကော်မရှင်တပ်သားတွေ ကင်းထွက်ချိန်တွေမှာ လမ်းပြအဖြစ်လိုက်ပါလုပ်ဆောင်တာတွေရှိတာကြောင့် ခုလိုပစ်ခတ်ခဲ့တာလို့ ဆိုပါတယ်။

ရာအိမ်မှူးကိုပစ်ခတ်ပြီးနောက် BRA အဖွဲ့ဝင်တွေပြန်ဆုတ်လာချိန် စံကြီးလောင့်ရွာရဲ့ တမိုင်ခန့်အကွာရှိ ဒမငယ်ရဲစခန်းဘက်ကနေ လက်နက်ငယ်ပစ်သံတွေကြားရပြီး ဒီပစ်ခတ်မှုဟာ တော်လှန်ရေးတပ်တွေကို ခြိမ်းခြောက်ပစ်ခတ်တာဖြစ်နိုင်တယ်လို့ တပ်ခွဲမှူး လကျာ်ကခန့်မှန်းပါတယ်။

စက်တင်ဘာ ၁၇ ရက်ကလည်း နတ်တလင်းမြို့နယ်၊ ရှားစီးဘိုးရွာအောက်စုနေ ရာအိမ်မှူး ဦးဖိုးကျော်ဆိုသူလည်း သူရဲ့နေအိမ်အနီးမှာ ပစ်သတ်ခံရပြီးသေဆုံးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၁၈၊ ၂၀၂၅။

ပဲခူးတိုင်း၊ နတ်တလင်းမြို့နယ်က စစ်ကော်မရှင်ခန့် ရာအိမ်မှူး ၁ ဦးကို စက်တင်ဘာ ၁၇ ရက်မနက် ၉ နာရီကျော်မှာ ပစ်ခတ်ရာသေဆုံးခဲ့တယ်လို့ သာယာဝတီခရိုင် ၃၈၀၁၊ တပ်ခွဲ ၇ ဆီကသိရပါတယ်။

အသတ်ခံရသူဟာ ရှားစီးဘိုရွာအောက်စု အသက် ၅၀ ကျော်အရွယ် ရာအိမ်မှူးဖိုးကျော်ဖြစ်ပြီး သူ့ရဲ့နေအိမ်အနီးမှာ တော်လှန်ရေးတပ်ဖွဲ့ဝင်တွေကပစ်ခတ်ရာမှာ သေဆုံးခဲ့တာလို့ ဆိုပါတယ်။

“ကျနော်တို့ရဲဘော်တွေ သူ့အိမ်ရှေ့ရောက် ထွက်ပြေးတော့ သူ့အိမ်နဲ့ဆိုအရမ်းတော့မဝေးဘူး။ သုံး၊ လေး အိမ်လောက်ပဲကျော်မယ်။ အဲ့ သုံး၊ လေးအိမ်အရောက်မှာ လှမ်းပြီးပစ်လိုက်တော့ မှန်သွားတော့လဲသွားတာ။ အဲ့နေရာမှာဘဲ ရှင်းလင်းခဲ့တယ်ပေါ့ “လို့ ၃၈၀၁၊ တပ်ခွဲ ၇ မှ တပ်ခွဲမှူးလှော်ကြီးက ပြောပါတယ်။

ရာအိမ်မှူးလုပ်သက် ၃ နှစ်ရှိပြီဖြစ်တဲ့ ဖိုးကျော်ဆီကနေ ဆိုင်ကယ် ၁ စီး၊ လက်ကိုင်ဖုန်း ၁ လုံးတို့ကို သိမ်းဆည်းရရှိခဲ့ကာ သူနေထိုင်တဲ့ ရှားစီးဘိုရွာဟာ စစ်ကောင်စီတပ်စခန်းရှိတဲ့ ဒမင်ငယ်ကျေးရွာနဲ့ ၁ မိုင်ကျော်ကွာတာကြောင့် ပစ်ခတ်ပြီးပြန်လည်ဆုတ်ခွာခဲ့တယ်လို့ တပ်ခွဲမှူးလှော်ကြီးက ဆိုပါတယ်။

ရာအိမ်မှူး ဖိုးကျော်ဟာ စစ်ကော်မရှင်တပ်ဘက်က အမာခံရပ်တည်ပြီး ပြည်သူလူထုကို စစ်မှုထမ်းဖို့ ပေါ်တာဆွဲတာ၊ စစ်မှုထမ်းကြေး အတင်းအဓမ္မကောက်ခံတာတွေကို လုပ်ဆောင်နေသူတဦးလည်းဖြစ်တယ်လို့ သိရပါတယ်။

ပြီးခဲ့တဲ့နှစ်၊ မတ် ၁၅ ရက်ကလည်း နတ်တလင်းမြို့နယ်၊ ကျောက်ခွက်အုပ်စု၊ စစ်ကော်မရှင်ခန့် အုပ်ချုပ်ရေးမှူး အသက် ၅၅ နှစ်အရွယ်ရှိတဲ့ ကိုဝင်းသိန်း ကိုလည်း သူနေတဲ့ကျောက်စွယ်ရွာမှာဘဲ နတ်တလင်းမြို့နယ် ပြည်သူ့ကာကွယ်‌ရေးအဖွဲ့ (ပကဖ)က သေနတ်နဲ့ပစ်ခတ်ခဲ့ပါသေးတယ်။

စာတည်း – လင်း

နတ်တလင်း၊ မေ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်ကိုရောက်ရှိနေတဲ့ စစ်ကောင်စီစစ်ကြောင်းတခုက စစ်ကောင်စီတပ်သား ၂ ဦး မေ ၁၉ ရက်မနက် ၇ နာရီ ကျော်မှာ လက်နက်နဲ့အတူအလင်းဝင်ရောက်လာခဲ့တယ်လို့ သာယာဝတီခရိုင် အမှတ် (၁) တပ်ရင်း၊ ၃၈၀၁ က မေ ၂၃ ရက်ဒီကနေ့မှာသတင်းထုတ်ပြန်ပါတယ်။

ဘက်ပြောင်းလာသူတွေဟာ အသက် ၃၀ ကျော်အရွယ် နိုင်ဝေလင်းနဲ့ ရာဇာမင်းတို့ဖြစ်ပြီး သူတို့တွေဟာ မေ ၁၂ ရက်မှာ နတ်တလင်းမြို့နယ်၊ ပျဥ်ပုံကျေးရွာက ပျူစောထီးစခန်းကို စစ်ကောင်စီစစ်ကြောင်းနဲ့အတူ ရောက်ရှိလာတာလို့ ဆိုပါတယ်။

“တပ်သားနှစ်ယောက်က ကျနော်တို့ကိုတိုက်ရိုက်ချိတ်ဆက်တာမရှိဘူး။ သူတို့ဘာသာသူတို့ လက်နက်တွေယူလာပြီးတော့ ကျနော်တို့နယ်မြေထဲကိုပြေးလာတယ်။ ပြည်သူနဲ့တွေ့တယ်။ ပြည်သူက တဆင့် ကျနော်တို့နဲ့ချိတ်ဆက်ခိုင်းတယ်။ အဲ့တာကနေ ချိတ်ဆက်ဝင်ရောက်လာပါတယ်”လို့ သာယာဝတီခရိုင်အမှတ် (၁) တပ်ရင်း၊ ၃၈၀၁ မှ တာဝန်ရှိသူတဦးကပြောပါတယ်။

အဆိုပါစစ်ကောင်စီတပ်သား ၂ ဦးဟာ ဧရာဝတီတိုင်း၊ ရေကြည်မြို့နယ်နဲ့ ကျုံပျော်မြို့နယ်တွေကဖြစ်ပြီး စစ်မှုထမ်းအတွက်ဖမ်းဆီးခံခဲ့ရာနေ စစ်ကောင်စီတပ်သားဖြစ်လာသူတွေပါ။

သူတို့နဲ့အတူ MA 1 သေနတ် ၂ လက်၊ လက်ပစ်ဗုံး ၁ လုံး၊ စကားပြောစက် ၁ လုံး၊ ကျည်ဘောက် ၆ ခုတို့ပါလာပြီး သူတို့အနေနဲ့ သာယာဝတီခရိုင် အမှတ်(၁)တပ်ရင်းမှာနေပြီး စစ်အာဏာရှင်စနစ် အပြီးတိုင် ချုပ်ငြိမ်းရေးအတွက် ပြန်လည်တိုက်ပွဲဝင်မယ်လို့လည်း ပြောဆိုထားကြောင်း အထက်ပါတာဝန်ရှိသူက ဆက်ပြောပါတယ်။

စာတည်း – လင်း