ငဖဲ၊ ဖေဖော်ဝါရီ ၂၃၊ ၂၀၂၅။
မကွေးတိုင်း၊ ငဖဲမြို့နယ်၊ နတ်ရေကန် လေကြောင်းရန်ကာကွယ်ရေးတပ်ကနေ လက်နက်ခဲယမ်းတွေ သယ်ဆောင်ပြီး ဆုတ်ခွာလာတဲ့ စစ်ကောင်စီယာဉ်တန်း ၄ စီးနဲ့ ခြေလျင်အင်အား ၁၀၀ ကျော်ကို ဖြတ်တောက်တိုက်ခိုက်ခဲ့ရာ ထိခိုက်သေဆုံးမှုတွေရှိခဲ့တယ်လို့ Chin Defence Force-Asho ဆီက သိရပါတယ်။
အဆိုပါစစ်ကား ၄ စီးနဲ့ အင်အား ၁၀၀ ပါစစ်ကြောင်းကို ဖေဖော်ဝါရီ ၂၂ ရက် မနေ့ နေ့လယ် ၁ နာရီခွဲက မကွေးတိုင်း ပဒါန်းမြို့ ပျဉ်းဝစစ်ဆေးရေးဂိတ်ရဲ့ အနောက်ဘက် မီတာ ၃ ထောင်ခန့်အကွာ နတ်ရေကန်လမ်းဟောင်းမှာ ဖြတ်တောက်တိုက်ခိုက်မှုခဲ့တာလို့ ဆိုပါတယ်။
“နတ်ရေကန်မှာ လေကြောင်းရန်ကာကွယ်ရေးတပ်ဆိုပြီးတော့ရှိပါတယ်၊ ငဖဲမြို့နယ်ထဲမှာပေါ့၊ ရခိုင်ပြည်နယ်သွားတဲ့ အမ်း-ပဒါန်းလမ်းဘေးတော့မဟုတ်ဘူး၊ အဲ့ဒီတောင်ကုန်းကိုလည်း အာရက္ခတပ်တော်ကလည်း ထိုးစစ်ဆင်နေတယ်။ အဲ့ဒီအရှိန်ကြောင့်ပဲလားတော့မသိဘူး၊ သူတို့ ခွာစစ်ပုံစံမျိုးနဲ့ လက်နက်ကြီးတွေ လက်နက်ခဲယမ်းတွေ သယ်ဆောင်ပြီးတော့ဆုတ်ခွာလာတာ၊”လို့ Chin Defence Force-Asho ပြောရေးဆိုခွင့်ရှိသူ ဆလိုင်းရိုးချင်းက ပြောပါတယ်။
တိုက်ခိုက်မှုနာရီဝက်ခန့်အတွင်းမှာ စစ်ကား ၄ စီးအနက် ၂ စီးကို ဖြတ်တောက်မှုလုပ်နိုင်ခဲ့ပြီး စစ်ကောင်စီဘက်က ၇ ဦးသေဆုံးခဲ့တယ်လို့ ဆိုပါတယ်။
“ကား ၄ စီးလာတာမှာ ၂ စီးကိုတော့ ဖြတ်တောက်မှုလုပ်ခဲ့ပါတယ်၊ ၁ စီးကတော့ မီးလောင်ပျက်စီးပြီးတော့ ကားထဲမှာပါတဲ့ ခဲယမ်းအချို့လည်း ပေါက်ကွဲမီးလောင်ပြီးတော့ နောက် ၁ စီးလည်း ပျက်စီးသွားပါတယ်၊ သေဆုံးမှုကတော့ တိုက်ပွဲအတွင်းမှာ ကိုယ်တိုင်မျက်မြင် အတည်ပြုနိုင်တာကတော့ ၇ ဦးပဲရှိပါတယ်”လို့ Chin Defence Force-Asho ပြောရေးဆိုခွင့်ရှိသူ ဆလိုင်းရိုးချင်းက ပြောပါတယ်။
ဒါ့အပြင် MA သေနတ် ၄ လက်နဲ့ MA ကျည်ဆံ ၅၀၀ တောင့် သိမ်းဆည်းရခဲ့ကာ CDF Asho က တပ်ဖွဲ့ဝင် ၁ ဦးသေဆုံးခဲ့သေးတယ်လို့ ဆိုပါတယ်။
“ကားယာဉ်တန်းမီးလောင်ပြီးတဲ့အချိန် ကျနော်တို့ အသာစီးရပြီလို့ ယူစပြီးတော့ ခဲယမ်းတွေ သိမ်းဆည်းဖို့နဲ့ အလောင်းတွေဘယ်လောက်လဲသိဖို့အတွက် ရှင်းလင်းရေးလုပ်ဆောင်တဲ့အချိန် ရဲဘော်တဦးတော့ ကျဆုံးသွားပါတယ်၊ ရဲဘော်တဦးကတော့ မစိုးရိမ်ရဒဏ်ရာရပါတယ်”လို့ သူက ဆက်ပြောပါတယ်။
အပြန်အလှန်ပစ်ခတ်မှုတွေဖြစ်ပွားခဲ့ပြီးနောက် နေ့လယ် ၂ နာရီမှာ ပဒါန်းစခန်းက တပ်ရင်းတွေက လူနာသယ်ဆောင်တာတွေ မီးလောင်တဲ့ကားတွေကို ကရိန်းကားတွေနဲ့သယ်ဆောင်တာတွေလုပ်တာ တွေ့ရတယ်လို့လည်း ဆိုပါတယ်။
တည်းဖြတ် – HP
