ခင်ဦးမြို့နယ်

ခင်ဦး၊ ဩဂုတ် ၁၀၊ ၂၀၂၆

စစ်ကိုင်းတိုင်း၊ ခင်ဦးမြို့၊ ပြည်သူ့ဆေးရုံအရှေ့ရှိ စစ်ဆေးရေးဂိတ်က စစ်ကောင်စီ တပ်သားတွေက အမျိုးသားတဦးကို အကြောင်းမဲ့ ဖမ်းဆီးကာ နှိပ်စက်သတ်ဖြတ်ခဲ့တယ်လို့ ခင်ဦးမြို့နယ် ပကဖတာဝန်ရှိသူတွေထံက သိရပါတယ်။

ရိုက်နှက်သတ်ဖြတ်ခံကသူမှာ မြကန်သာအနောက်ပိုင်းနေ အသက် ၅၀ အရွယ် ဦးကောင်းညွန့်ဆိုသူဖြစ်ပြီး၊ ဩဂုတ်လ ၉ ရက်နေ့ မနေ့ညနေ ၄ နာရီခန့်က စစ်ဆေးရေးဂိတ်အရှေ့ကနေဖြတ်ပြီး နေအိမ်သို့ပြန်စဉ် စစ်ကောင်စီတပ်သားတွေက ခေါ်ယူဖမ်းဆီးစစ်ဆေးကာ နှိပ်စက်သတ်ဖြတ်ခဲ့တာလို့ ဆိုပါတယ်။

“လမ်းသွားနေတဲ့ဟာ ခေါ်ပြီးတော့ စစ်မေးတယ်။ သူတို့လိုချင်တာ မရတော့ နှိပ်စက်တယ်။ နှိပ်စက်တဲ့ အချိန်မှာလည်း ဓားတွေနဲ့ ထိုးထားတယ်။ နောက်မှ ပစ်သတ်ပြီး အလောင်းကို လမ်းပေါ်ပစ်ထားလိုက်တယ်”လို့ ခင်ဦးမြို့နယ်ပကဖ တာဝန်ခံက ပြောပါတယ်။

စစ်ကော်မရှင်အဖွဲ့သားတွေ နှိပ်စက်သတ်ဖြတ်ခံရတဲ့ ဦးကောင်းညွန့်အလောင်းကို လမ်းသွားလမ်းလာတွေကတွေ့လို့ မိသားစုကို အကြောင်းကြားရာမှ မိသားစုဝင်တွေကအလောင်းကို လာသယ်သွားတာလို့ ဆိုပါတယ်။

စစ်ကော်မရှင်တပ်သားတွေက ဦးကောင်းညွန့်ရဲ့ နထင်အပါအဝင် ခန္ဓာကိုယ်အနှံ့ ဓားနဲ့လှီး နှိပ်စက်ထားကာ၊ လည်ပင်းနဲ့ ပေါင်မှာလည်း ကျည်ဆံထိမှန်ထားတဲ့ ဒဏ်ရာတွေတွေ့ရပြီး၊ မျက်နှာ ဖူးယောင်ဒဏ်ရာတွေနဲ့ သေဆုံးနေတာလို့ သိရပါတယ်။

အဆိုပါ ခင်ဦးမြို့ ပြည်သူဆေးရုံအရှေ့က စစ်ဆေးရေးဂိတ်မှာ စစ်ကောင်စီတပ်သားအင်အား ၃၀ ခန့် အမြဲတမ်းတပ်စွဲထားပြီး၊ ဖြတ်သန်းသွားလာတဲ့ဒေသခံတွေကို မကြာခဏ ခေါ်ယူစစ်ဆေးတာတွေ ပြုလုပ်လေ့ရှိတယ်လို့ သိရပါတယ်။

ဝက်လက်၊ ဇူလိုင် ၃၁၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ခင်ဦးမြို့နယ်တွေမှာ စစ်ကောင်စီတပ်ရဲ့ လေကြောင်းကနေ တိုက်ခိုက်ခံခဲ့လို့ ပြည်သူ ၁ ဦးသေ ၂ ဦးဒဏ်ရာရသွားတယ်လို့ သက်ဆိုင်ရာမြို့နယ် ပကဖတာဝန်ရှိသူတွေထံက သိရပါတယ်။

ဇူလိုင်လ ၃၀ ရက်နေ့ နေ့လည် ၂ နာရီကျော်ခန့်က တံတားဦးကနေ တက်လာတဲ့ ဂျက်ဖိုက်တာဟာ ခင်ဦးမြို့နယ်၊ ထနောင်းကုန်းကျေးရွာအနောက်ဘက် လယ်ကွင်းထဲကို ဗုံး ၃ လုံးကြဲချခဲ့တယ်လို့ ဆိုပါတယ်။

“နွားကျောင်းတဲ့ အမျိုးသားက နွားလှန်ပြီး စောင့်နေချိန် မှန်သွားတာ။ အမျိုးသမီးတယောက်လည်း ထိသေးတယ်။ သူက လမ်းသွားရင်း ထိတာ။ ဗုံးလာကြဲတာက ရှောင်ရ၊ ဝပ်ရမယ်ဆိုတာ မလုပ်လိုက်မိလို့ ထိမှန်ကုန်တာ”လို့ ခင်ဦးမြို့နယ် ပကဖတာဝန်ခံက ပြောပါတယ်။

ဗုံးထိမှန်တာကြောင့် အသက် ၅၀ ကျော်အရွယ် ဦးမောင်မောင်ဆိုသူ နေရာမှာပင်သေဆုံးပြီး၊ အသက် ၆၀ ကျော်အရွယ် အမျိူးသမီးတဦးလည်း ဒဏ်ရာရကာ နွားနှစ်ကောင်လည်း သေပြီး၊ နေအိမ် ၂ လုံးလည်း ပျက်စီးခဲ့ပါတယ်။

အလားတူ အဆိုပါည ၉ နာရီကျော်ခန့်မှာ ဝက်လက်မြို့နယ်၊ ငါးပတ်ချောင်းကျေးရွာကို တံတားဦးလေတပ်ကနေ တက်လာတဲ့ ဂျက်ဖိုက်တာ ၂ စီးဟာ ကျေးရွာထဲကို လေကြောင်းတိုက်ခိုက်မှုပြုလုပ်ခဲ့တယ်လို့ ဆိုပါတယ်။

“ကြဲတာက ရွာထဲကို ကြဲချတာ။ ဗုံးက ၄ လုံး ကြဲသွားတာ။ ဆူဆိုက်နဲ့က သုံးကြိမ် ချသွားသေးတယ်။ တိုက်ပွဲတွေရှိလို့ ကြဲတာမဟုတ်ဘူး။ ဒီအတိုင်းလာကြဲသွားတာ”လို့ ဝက်လက်မြို့နယ် ပကဖ ပြန်ကြားရေးတာဝန်ရှိသူက ပြောပါတယ်။

လေကြောင်းတိုက်ခိုက်မှုအတွင်း အသက် ၇၆ နှစ်အရွယ် ဦးသန်းလွင်မှာ ဦးခေါင်းထိခိုက်ဒဏ်ရာရခဲ့ပြီး နေအိမ် ၃ လုံးထက်မနည်းလည်း ပျက်စီးခဲ့တယ်လို့ ဆိုပါတယ်။

အဆိုပါ လေကြောင်းတိုက်ခိုက်ခံရပြီးနောက် ဒေသခံတွေက ကျေးရွာတွေကနေ ထွက်ပြေးတိမ်းရှောင်ကြတာမျိုးမရှိပဲ ဗုံးခိုကျင်းတွေမှာသာ ပုန်းခိုနေနေရတယ်လို့ သိရပါတယ်။

ပြီးခဲ့တဲ့ ဇူလိုင်လ ၂၈ ရက်နေ့ကလည်း ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းကနေ ကြဲချတဲ့ ဗုံးသီးထိမှန်လို့ သက်ကြီးအမျိုးသား ၁ ဦးသေဆုံးသွားတယ်လို့ သိရပါတယ်။

ခင်ဦး၊ ဇူလိုင် ၁၄၊ ၂၀၂၆။

စစ်ကိုင်းတိုင်း၊ ခင်ဦးမြို့နယ်၊ ငါးတင်းကြီးကျေးရွာကို လေကြောင်းကနေ ဗုံးကြဲခံရလို့ ပြည်သူ ၂ ဦးဒဏ်ရာရပြီး နေအိမ် ၂၀ ခန့်ပျက်စီးခဲ့တယ်လို့ ခင်ဦးမြို့နယ် ပကဖတာဝန်ရှိသူတွေဆီက သိရပါတယ်။

ဇူလိုင်လ ၁၃ ရက်နေ့ ညနေ ၃ နာရီခန့်မှာ တံတားဦးလေတပ်ကနေ တက်လာတဲ့ ဂျက်ဖိုက်တာ ၂ စီးနဲ့ ငါးတင်ကြီးကျေးရွာရွာလယ်ပိုင်းကို ၂ ကြိမ်ဗုံးကြဲခံတာလို့ ဆိုပါတယ်။

“ပထမအစီးနဲ့လာကြဲတဲ့ ၂ လုံးကမကွဲလိုက်လို့။ မဟုတ်ရင် လူတွေအများကြီးသေမယ်။ ပထမအလုံးတွေမကွဲတော့ လူတွေကနီးစပ်ရာ ဗုံးခိုကျင်းတွေထဲရောက်ပြီးမှ လာထပ်ကြဲတော့ ထိခိုက်နည်းသွားတယ်။ အိမ်တွေတော့ ပျက်စီးမှုများတယ်”လို့ ခင်ဦးမြို့နယ် ပကဖတာဝန်ရှိသူတဦးက ပြောပါတယ်။

ဗုံးကြဲခံရမှုကြောင့် အသက် ၃၀ ကျော်အရွယ်အမျိုးသမီးတဦးနဲ့ အသက် ၆၀ ကျော် အမျိုးသားတဦးတို့ ဒဏ်ရာအနည်းငယ်(မစိုးရိမ်ရ) ရရှိသွားပါတယ်။

ဒါ့အပြင် နေအိမ် ၂၀ လုံးခန့်၊ ကားနဲ့ဆိုင်ကယ် ၅ စီးထက်မနည်းနဲ့ ဆီပေပါတွေလည်း မီးလောင်ပျက်စီး ခဲ့တယ်လို့ ဆိုပါတယ်။

ဗုံးကြဲခံရပြီး ရွာခံပြည်သူတွေကတော့ ထွက်ပြေးတိမ်းရှောင်ကြရတာမျိုး မရှိပေမယ့် နောက်ထပ် ဗုံးလာကြဲမှာကို စိုးရိမ်နေကြပါတယ်။

ဇူလိုင်လ ၉ ရက်နေ့ကလည်း ခင်ဦးမြို့နယ်၊ သာဝတ္တိကျေးရွာကို စစ်ကော်မရှင်ဘက်က အသေခံဒရုန်းတွေနဲ့ ဗုံးကြဲခဲ့ရာပြည်သူ ၄ ဦးဒဏ်ရာရခဲ့သေးတယ်လို့ သိရပါတယ်။