PDF

စစ်ကိုင်း၊ ဇွန် ၃၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ကျောက်ဆည်ကျေးရွာကို စစ်ကောင်စီတပ်နဲ့ပျူစောထီးတွေက ဇွန်လ ၂ ရက် မနေ့မနက် ၅ နာရီဝန်းကျင်အချိန်မှာ ဝင်ရောက်စီးနင်းပြီး လူငယ်တွေအပါအဝင် အမျိုးသား ၇ ဦး ကိုဖမ်းဆီးသွားတယ်လို့ သိရပါတယ်။

အရပ်ဝတ်အိမ်စီးကားတွေနဲ့ စစ်အုပ်စုတပ်ဖွဲ့ဝင် ၅၀ ကျော်ဟာ ကျေးရွာအတွင်းဝင်ရောက်စီးနင်းပြီး သတင်းအတိအကျနဲ့ နေအိမ်တွေကိုဝင်ရောက်ရှာဖွေဖမ်းဆီးသွားတာလို့ ဒေသတွင်းကာကွယ်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

“ခုဟာက သတင်းအတိအကျရလို့ ဝင်ဖမ်းသွားတာမျိုး။ အဲ့ဒီရွာက အုန်းတောရွာနဲ့နီးတယ်။ အုန်းတောမှာက စကစ ၅၀၀၅ သံချပ်ကာတပ်လည်းရှိတယ်။ ပြီးတော့ ပျူရွာတွေလဲရှိတယ်” လို့ ပြောပါတယ်။

ဖမ်းဆီးခံရသူတွေဟာ PDF တွေဖြစ်ပြီး ဘယ် PDF အဖွဲ့ဝင်တွေဖြစ်တယ်ဆိုတာမသိရသေးကြောင်း၊ ဝင်ရောက်ဖမ်းဆီးစဉ် လက်နက်အင်အားမမျှတဲ့အတွက် အသာတကြည်အဖမ်းခံလိုက်ရတာဖြစ်နိုင်တယ်လို့ ဒေသတွင်းကာကွယ်ရေးတပ်ဖွဲ့ဝင်တွေဘက်ကပြောဆိုပေမယ့် မြေလတ်အသံက သီးခြားအတည်မပြုနိုင်ပါဘူး။

စစ်ကောင်စီထောက်ခံတဲ့တယ်လီဂရမ်တွေမှာတော့ စစ်ကိုင်း၊ ကျောက်ဆည်ရွာမှာ PDF အဖွဲ့ဝင်တွေ ဖြစ်တဲ့ နေပိုင်စိုး ၄၃ နှစ်၊ တင်လင်းအောင် ၃၅ နှစ်၊ ပိုင်ဇေ ၂၄ နှစ်၊ မင်းမင်းစိုး ၂၀ နှစ်၊ ဖြိုးဝေ ၁၇ နှစ်၊ ညီညီလတ် ၁၆ နှစ်နဲ့ ဟိန်းမင်းစိုး ၁၆ နှစ်တို့ကို ဖမ်းဆီးရမိပြီး လက်လုပ်ပစ္စတိုသေနတ် ၄ လက်၊ ကော်ပိုက်နဲ့ပြုလုပ်ထားတဲ့ လက်လုပ်သေနတ် ၂ လက်၊ ကျည်မျိုးစုံ ၁၀ တောင့်၊ ပြောက်ကျားယူနီဖောင်း ၆ စုံ၊ ပြောက်ကျားဦးထုပ် ၁ လုံး၊ ဖုန်း ၈ လုံးနဲ့ အခြားဆက်စပ်ပစ္စည်းတွေကို သိမ်းဆည်းရမိတယ်လို့ ဖော်ပြထားပါတယ်။

စာတည်း- ရင်ငြိမ်း

မကွေး၊ ဇွန် ၂၊ ၂၀၂၃။

မကွေးတိုင်း၊ ဆိပ်ဖြူမြို့နယ်၊ ကဇွန်းမတိုက်နယ်၊ ရှောက်ပင်အင်းကျေးရွာအခြေစိုက် ကာကွယ်ရေးပစ္စည်း စက်ရုံ – ကပစ ၂၁ မှ တပ်ကြပ်ကြီး ၁ ဦးကို ဇွန်လ ၂ ရက် ဒီမနက်ပိုင်း ၉ နာရီခွဲလောက်မှာ သေနတ်နဲ့ ပစ်ခတ်ရှင်းလင်းခဲ့တယ်လို့ Chauk Guerrilla Force (CGF) ဒုခေါင်းဆောင် ဗိုလ်ပေတက ပြောပါတယ်။

ပစ်ခတ်ခံရသူမှာ အသက် ၃၀ ကျော်အရွယ် တပ်ကြပ်ကြီး အောင်သူတင့် (ခ) တိုက်ကြက်ဖြစ်ပြီး ဆိပ်ဖြူမြို့ကနေ ချောက်မြို့ဘက်ကို ဆိုင်ကယ်နဲ့ထွက်လာချိန် ချောက်မြို့၊ အမှတ် ၁၀ ဗဟိုကွက်သစ်ကျောင်းအနီးမှာ ဦးခေါင်းကို ပစ်ခတ်ခဲ့တာလို့ ဆိုပါတယ်။

“သူက ဆိပ်ဖြူမှာနေပြီး ကပစ ၂၁ ကလာတဲ့ ကားတွေကို ဈေးဝယ်ပြီး တင်ပေးရတဲ့တာဝန်နဲ့ နေပြည်တော်ကို လျှို့ဝှက်အရေးကြီးစာရွက်စာတမ်းတွေ ပို့ဆောင်ရတဲ့ တာဝန်ယူပေးရတယ်လို့ သိရတယ်၊ ဦးခေါင်းကို ၂ ချက်ပစ်ခတ်ရှင်းလင်းခဲ့တာ” လို့ ပြောပါတယ်။

ဆိပ်ဖြူနယ်အတွင်း ကားနဲ့ စျေးလာဝယ်ချိန်မှာ ရှင်းလင်းဖို့ပြင်ဆင်ထားပေမယ့် ကားပေါ်မှာ ပြည်သူတွေပါတာကြောင့် အဲ့ဒီအစီစဥ်ကိုဖျက်ခဲ့ပြီး ဆိုင်ကယ်နဲ့ချောက်မြို့ဘက်ကို ထွက်လာချိန်ကျမှ ပစ်ခတ်ရှင်းလင်းခဲ့တာလည်း ဖြစ်ပါတယ်။

ရှင်းလင်းပြီးနောက် သူ့ဆီကနေ ငွေသား သိန်း ၄၀၊ ဖုန်း ၁ လုံး ထိပ်တန်းလျှို့ဝှက် အရေးကြီးစာရွက်စာတမ်း၊ ဗိုလ်ကြီးရန်နိုင်ရဲ့ ချက်လက်မှတ်၊ ဘဏ်စာအုပ်၊ ATM ကပ်တွေ သိမ်းဆည်းရမိခဲ့တယ်လို့လည်း ဆိုပါတယ်။

ဒီပစ်ခတ်တိုက်ခိုက်မှုကို Chauk Guerrilla Force (CGF) ၊ People Defense Force Chauk (ချောက် ပကဖ)၊ K.F People Defence Force၊ ဖေကံကောင်း ရေနံချောင်းအဖွဲ့ နဲ့ MVP Revolution Force တို့က ပူးပေါင်းလုပ်ဆောင်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီလ ၅ ရက်ကလည်း ချောက်မြို့နယ်ရှိ စစ်ကောင်စီလက်အောက်ခံ စည်ပင်သာယာရေးရုံးနဲ့ မြို့နယ်လျှပ်စစ်အင်ဂျင်နီယာရုံးကို CGF နဲ့ မဟာမိတ်အဖွဲ့တွေက ပစ်ခတ်တိုက်ခိုက်ခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၂၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ ရွာသာရွာအနီးတဝိုက်မှာ တိုက်ပွဲတွေ ဖြစ်ပွားနေပြီး ပြည်သူတွေချန်ထားရစ်ခဲ့တဲ့ ကျွဲနွားတိရစ္ဆာန်တွေကို PDFတွေက စောင့်ရှောက်ပေးထားကြတယ်လို့ သိရပါတယ်။

မေလ ၂၂ ရက် ကစပြီး တိုက်ပွဲတွေ ဖြစ်ပွားခဲ့တာကြောင့် ကျေးရွာ ၅ ရွာထက်မနည်း အရေးပေါ်စစ်ရှောင်နေရပြီး အိမ်မွေးတိရစ္ဆာန်တွေကို ခေါ်သွားချိန်မရဘဲ ရွာထဲမှာပဲ ထားခဲ့ရတာဖြစ်တဲ့အတွက် ရဲဘော်တွေက ကျွေးမွေးစောင့်ရှောက်ပေးနေတာဖြစ်တယ်လို့ ဆိုပါတယ်။

“အရေအတွက်ကတော့များတယ် တအိမ်ဆို ဝက်ချည်းပဲ အကောင် ၂၀လောက်ရှိတယ်။ ရဲဘော်လေးတွေ ဒီလိုပဲ မျှပြီးစောင့်ရှောက်ပေးနေရတယ်။ ကျွဲနွားအရမ်းများတဲ့သူတွေကတော့ လာယူသွားကြပြီ။ တချို့တဝက်ကတော့ စောင့်ရှောက်ပေးနေရဆဲပဲ” လို့ ABSDFရဲ့ ထောက်လှမ်းရေးတာဝန်ခံ ကိုစောက ပြောပါတယ်။

တိုက်ပွဲတွေကြောင့် ရွာသာယာ၊ မော်တိတ်၊ နံ့သာ၊ အောင်းကုန်း၊ ကျွန်းတောစတဲ့ကျေးရွာတွေက ပြည်သူ ၁၅၀၀ ကျော် စစ်ရှောင်နေရပြီး အဲ့ဒီရွာတွေမှာရှိတဲ့ အိမ်မွေးတိရစ္ဆာန်တွေကို ရဲဘော်တွေ အလှည့်ကျ ကျွေးမွေးစောင့်ရှောက်နေကြတာလည်း ဖြစ်ပါတယ်။

ပြည်သူတချို့ကတော့ ကျေးရွာထဲပြန်ဝင်နေကြတာတွေရှိပေမယ့် စစ်ကောင်စီဘက်က လက်နက်ကြီးနဲ့ပစ်ခတ်တာတွေ လေကြောင်းရန်တွေလည်း ရှိနေတဲ့အတွက် စိတ်ချရတဲ့အနေထားတော့ မရှိသေးဘူးလို့ ဆိုပါတယ်။

အင်းတော်မှာ မေလ ၂၂ရက်ကနေ ၂၇ရက်ထိ ၅ ရက်ဆက်တိုက် တိုက်ပွဲဖြစ်ပွားခဲ့ပြီး စစ်ကောင်စီဘက်က အရာရှိနဲ့ တပ်ကြပ်ကြီးအဆင့် ၅ဦးအပါ ၁၃ဦး သေဆုံးခဲ့သလို ၃ ရက် လေကြောင်းနဲ့ပစ်ခတ်လို့ ပြည်သူ ၃ဦး သေဆုံးကာ ဘုန်းကြီးကျောင်းနဲ့ နေအိမ်တချို့ ပျက်စီးခဲ့ပါသေးတယ်။

စာတည်း – ဇို

ပဲခူး၊ ဇွန် ၁၊ ၂၀၂၃။

ပဲခူးတိုင်း၊ တောင်ငူမြို့အခြေစိုက် အမှတ် ၁၀၁၅ လေကြောင်းရန်ကာကွယ်ရေးတပ်(လကတ ၁၀၁၅) မှ ဗိုလ်မှူး ၁ ဦးကို မေလ ၃၁ ရက် မနေ့ ညနေ ၅ နာရီခွဲက သေနတ်နဲ့ပစ်ခတ်ရှင်းလင်းခဲ့တယ်လို့ တောင်ငူခရိုင်တပ်ရင်း ၃၅၀၁၊ တပ်ခွဲ ၆ တပ်ခွဲမှူး ဗိုလ်ကြက်သွန်က ပြောပါတယ်။

အသတ်ခံရသူမှာ စစ်ကောင်စီတပ် လကတ ၁၀၁၅ မှ ဗိုလ်မှူး ရဲနိုင် ဖြစ်ပြီး ရန်ကုန်-မန္တလေး အမြန်လမ်း တောင်ငူလမ်းခွဲ ၁၅၄ မိုင် နဲ့ ၁၅၅ မိုင်အကြား အရပ်ဝတ်နဲ့ဆိုင်ကယ်စီးလာချိန် လည်ပင်းနဲ့နားထင်ကို အနီးကပ်ပစ်ခတ်ရှင်းလင်းခဲ့တာလို့ ဆိုပါတယ်။

“သူက ဒုဗိုလ်မှူးကြီးလို့သိရတယ် နာမည်ကရဲနိုင်။ သူ့ကိုရှင်းလင်းဖို့ကျနော်တို့ဘက်က ၇ ရက်လောက်အချိန်ယူရတယ်။ အရပ်ဝတ်နဲ့ဆိုင်ကယ်နဲ့ လျှောက်သွားနေတာ။ ကျနော်တို့ထင်တာတော့ ထောက်လှမ်ရေးလုပ်နေတယ်လို့ ထင်တယ်။ အမြန်လှုပ်ရှားပြီး ချက်ချင်းပစ်၊ ချက်ချင်းပြန်ဆုတ်ခဲ့ရတယ်” လို့ တပ်ခွဲမှူး ဗိုလ်ကြက်သွန်က မြေလတ်အသံကို ပြောပါတယ်။

ဗိုလ်မှူး ရဲနိုင် ကို ပစ်ခတ်ရှင်းလင်းပြီးနောက် သူစီးနင်းလာတဲ့ ဆိုင်ကယ်နဲ့ဖုန်းကို သိမ်းခဲ့နိုင်တယ်လို့ ဆိုပါတယ်။

သေဆုံးသူ ဗိုလ်မှူး ရဲနိုင် ဟာ စစ်တက္ကသိုလ် DSA အမှတ်စဉ် ၄၈ ဆင်း အရာရှိဖြစ်ပြီး ရန်ကုန်တိုင်း၊ မှော်ဘီအခြေစိုက် အမှတ် ၅ လေကြောင်းရန်ကာကွယ်​ရေးစစ်ဆင်ရေးကွပ်ကဲမှုဌာနချုပ် (လစခ ၅) ကနေ စစ်အာ ဏာမသိမ်းမီက တောင်ငူ လကတ ၁၀၁၅ တပ်ကို ပြောင်းရွှေ့သွားသူဖြစ်တယ်လို့ သူနဲ့နီးစပ်သူတဦးက ပြောပါတယ်။

“သူအသတ်ခံရတာ မှန်ပါတယ်။ သူက DSA ၄၈ ဆင်း ဗိုလ်မှူးပဲရှိပါသေးတယ်။ မှော်ဘီ လစခ တပ်မ က အာဏာမသိမ်းခင်ကမှ ပြောင်းသွားတာ။ အရက်အရမ်းသောက်တဲ့သူ” လို့ သူနဲ့နီးစပ်တဲ့ တပ်သတင်းရင်းမြစ်တဦးက ပြောပါတယ်။

တောင်ငူခရိုင် ၃၅၀၁၊ တပ်ခွဲ ၆ ဗိုလ်ကြက်သွန်အဖွဲ့ဟာ ပြီးခဲ့တဲ့ ဇန်နဝါရီလ ၂၂ ရက်နေ့က ရန်ကုန်တိုင်း စစ်ကြောရေးတာဝန်ခံ ဒုဗိုလ်မှူးကြီး သန်းထွဋ် စီးလာတဲ့ကားကို အမြန်လမ်း ၁၆၁ မိုင် စောင့်ကြိုရှင်းလင်းခဲ့ပါသေးတယ်။

စာတည်း – ရင်ငြိမ်း

မကွေး၊ မေ ၃၁၊ ၂၀၂၃။

မကွေးတိုင်းဒေသကြီး၊ NLD ပါတီက အမျိုးသားလွှတ်တော်ကိုယ်စားလှယ် ဦးမြတ်ကို ပျောက်ဆုံးနေတယ်လို့ မကွေးတိုင်း၊ သရက်ခရိုင်အတွင်းက ပြည်သူ့ကာကွယ်ရေးတပ်ဖွဲ့တွေက ပြောပါတယ်။

မေလ ၁၅ ရက်ခန့်က အမျိုးသားလွှတ်တော်ကိုယ်စားလှယ်(သရက်ခရိုင် ပကဖ တာဝန်ခံ)ဦးမြတ်ကိုဟာ အောင်လံ ပကဖ စခန်းကနေ ထွက်သွားပြီးနောက် ဒီနေ့အထိ သတင်းအစအန မရဘဲ ပျောက်ဆုံးနေတယ်လို့ မကွေးတိုင်းဒေသကြီးပကဖ တာဝန်ရှိသူတဦးကပြောပါတယ်။

“သူထွက်သွားမယ့်နေ့မှာ ရဲဘော်တွေကို တန်းစီခိုင်းပြီးတော့ သေနတ်အတိုတလက်ခါးကြားထိုးပြီး ဘယ်သူမှ လိုက်မလာနဲ့ဆိုပြီး ပြောပြီး ထွက်သွားတယ်။ ခုထိ သူနဲ့ပတ်သက်ပြီး သတင်းအတိအကျ မရသေးသလို သတင်းတွေကလည်း အမျိုးမျိုးထွက်နေတယ်”လို့ အောင်လံမြို့နယ် PDF အဖွဲ့ဝင်တဦးကပြောပါတယ်။

သရက်ခရိုင်ပကဖတာဝန်ခံ ဦးမြတ်ကို စခန်းကနေ ထွက်သွားပြီးနောက်မှာတော့ စစ်ကောင်စီဘက်က ဖမ်းမိသွားတယ်၊ စစ်ကောင်စီနဲ့ပေါင်းသွားတယ်ဆိုတဲ့ သတင်းတွေ ထွက်ပေါ်နေတာကြောင့် မြေလတ်အသံက အတည်ပြုနိုင်ဖို့ ဒေသခံပြည်သူ့ကာကွယ်ရေးအဖွဲ့တွေကို ဆက်သွယ်စုံစမ်းခဲ့ပေမယ့် တိကျတဲ့သတင်းအချက်အလက်တွေတော့ မရရှိသေးပါဘူး။

“ကျနော်တို့ သိရသလောက်တော့ သူထွက်သွားတဲ့နေ့က သူတပ်ဖွဲ့က ကလေးတွေနဲ့စကားများပြီး ထွက်သွားတယ်။ ဒီနေ့ထိ အဆက်သွယ်မရဘူး။ ခုကသူနဲ့ ပတ်သက်ပြီး ကောလာဟလတွေ ထွက်နေတာကိုတော့ အတည်မပြုနိုင်ဘူး။ သူ့စိတ်အရတော့ စကစနဲ့ပူးပေါင်းမယ့် ပုံစံမရှိဘူး။ သူကအရင်ကတည်းက နိုင်ငံရေးအကျဥ်းသားဟောင်းတဦးဖြစ်လို့ စကစနဲ့တော့ ပေါင်းမှာ မဟုတ်ဘူး။ ယနေ့ထိ သူကို ရှာနေတုန်းပဲ။ သတင်းတော့မရသေးဘူး”လို့ အမည်မဖော်လိုတဲ့ မကွေးအခြေစိုက် PDF အဖွဲ့မှ တာဝန်ရှိသူတဦးက ပြောပါ တယ်။

ဦးမြတ်ကို ပျောက်ဆုံးနေလို့ သရက်ခရိုင်အတွင်း ပကဖ၊ ပအဖအဖွဲဝင်တွေနဲ့ PDF တပ်ရင်းအချို့ရဲ့ လုံခြုံရေးအတွက် စိုးရိမ်ရလို့ အားလုံးသတိနဲ့စောင့်ကြည့်နေကြရတယ်လို့ ဆိုပါတယ်။

ဦးမြတ်ကိုဟာ ၂၀၂၀ အထွေထွေရွေးကောက်ပွဲမှာ အောင်လံမြို့နယ် မဲဆန္ဒနယ် အမှတ် ၁၂၊ အမျိုးသားလွှတ်တော် ကိုယ်စားလှယ်နေရာကနေ ဝင်ရောက်ယှဥ်ပြိုင်ခဲ့ရာ အနိုင်ရရှိထားသူ တဦးလည်း ဖြစ်ပါတယ်။

စာတည်း – လင်းဇေ

ပဲခူး၊ မေ ၃၀၊ ၂၀၂၃။

ပဲခူးတိုင်း၊ ဖြူးမြို့နယ်၊ ကညွတ်ကွင်းအရှေ့ဘက်ရှိ လင်ယောလင်ကျေးရွာအနီး စစ်ကောင်စီတပ် ခမရ ၄၃၉ တပ်ရင်းကို မေလ ၂၉ ရက် မနေ့ညနေ ၄ နာရီဝန်းကျင်မှာ ဒေသကာကွယ်ရေးတပ်ဖွဲ့တွေက သွားရောက်တိုက်ခိုက်ခဲ့တယ်လို့ သိရပါတယ်။

ခမရ ၄၃၉ တပ်ရင်းအတွင်းကို ၄၀ မမ ဗုံးသီး ၉ လုံး၊ ချေမှုန်းရေးရိုင်ဖယ်တွေနဲ့ ပစ်ခတ်တိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၄ ဦးသေဆုံးတယ်လို့ ပဲခူးတိုင်းဒေသကြီးပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက မြေလတ်အသံကိုပြောပါတယ်။

“ဖြူးပကဖအဖွဲ့နဲ့ ဗိုလ်ကျားကြီးအဖွဲ့ကနေပြီးတော့ သွားရောက်တိုက်ခိုက်ခဲ့တယ်။ ပစ်ခတ်မှုကတော့ မိနစ်ပိုင်းလောက်ပဲကြာမယ်။ ထိခိုက်သေဆုံးအခြေနေကတော့ မြေပြင်ကသတင်းပေးတွေရဲ့ ပေးပို့ချက်တွေအရ ပြန်သိရတာဖြစ်တယ်” လို့ ပြောပါတယ်။

ပစ်ခတ်တိုက်ခိုက်မှုအတွင်း ၄၀ မမ ဗုံးသီးတွေဟာ တပ်တွင်းအဆောက်အဦးတွေပေါ်ကျရောက်ပြီး စစ်ကောင်စီတပ်ဘက်က သေဆုံးတာလို့ပြောဆိုပေမယ့် မြေလတ်အသံအနေနဲ့သီးခြားအတည်ပြုနိုင်တာမျိုး မရှိသေးပါဘူး။

စစ်ကောင်စီတပ်ရင်းကလည်း လက်နက်ကြီးငယ်တွေနဲ့ ပြန်လည်ပစ်ခတ်ခဲ့ပေမယ့် ကာကွယ်ရေးတပ်ဖွဲ့တွေ အထိအခိုက်မရှိ ပြန်လည်ဆုတ်ခွာလာနိုင်တယ်လို့ သိရပါတယ်။

ပြီးခဲ့တဲ့၂၀၂၂ ခုနှစ်၊ ဒီဇင်ဘာလ ၈ ရက်နေ့ကလည်း ဖြူးမြို့နယ်ပကဖ (9 Kwins Fighters Force မြို့ ပြပြောက်ကျားအဖွဲ့)က နန်းထိုက်အောင်စစ်ဆင်ရေးအဖြစ် ခမရ ၄၃၉ တပ်ရင်း လုံခြုံရေးဂိတ်ကို တိုက်ခိုက်ခဲ့လို့ စစ်ကောင်စီတပ်သား၂ ဦးသေ၊ ၁ ဦးပြင်းထန်ဒဏ်ရာရတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ မေ ၃၀၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ စစ်ကောင်စီလက်အောက်ခံ ကန်ဒေါင့်ရဲစခန်းကနေ အိမ်စီးကားနဲ့တင်ဆောင်လာတဲ့ မိုင်း၊ လက်ပစ်ဗုံး၊ ခဲယမ်းတွေကို မေလ ၂၉ ရက်နေ့ ညနေ ၃ နာရီခွဲဝန်းကျင်အချိန်မှာ ဒေသကာကွယ်ရေးတပ်ဖွဲ့တွေဘက်က ဖမ်းဆီးရမိခဲ့တယ်လို့ သိရပါတယ်။

အမျိုးသမီး ၄ ဦးနဲ့ အမျိုးသား ၁ ဦးလိုက်ပါလာတဲ့ အဲ့ဒီအိမ်စီးကားကို ပုလဲမြို့နယ်အတွင်းက မုံရွာ – ပုလဲ – ဂန့်ဂေါလမ်းပိုင်းတနေရာမှာ ဖမ်းဆီးရမိခဲ့တာဖြစ်ပြီး စစ်ကောင်စီလက်အောက်ရဲတပ်ဖွဲ့က လက်နက်ခဲယမ်းတွေကို ဖိအားပေးတင်ဆောင်ခိုင်းတာလို့ ဆိုပါတယ်။

“အိမ်စီးကားပေါ်ပါလာတာက အရပ်သားပြည်သူတွေပါ။ ကားပေါ်မှာအမျိုးသမီးလူနာ ၁ ယောက်ပါတယ်။ ဆေးရုံသွားမှာကို ကန်ဒေါင့်ကတပ်စွဲထားတဲ့ကောင်တွေက အတင်းအကြပ်တင်ပေးလိုက်တာလို့ သိရတယ်” လို့ သခင်ဒေါင်းညိုပြောက်ကျားတပ်ဖွဲ့တာဝန်ခံက မြေလတ်အသံကို ပြောပါတယ်။

ဒါ့အပြင် အိမ်စီးကားရှေ့ကနေ လမ်းရှင်းရှေ့ပြေးအဖြစ် ဆိုင်ကယ်နဲ့မောင်းနှင်လာသူ အမျိုးသားတဦးကိုလည်း ဖမ်းဆီးရာမှာ ခုခံတာကြောင့် အသေပစ်ခတ်ဖမ်းဆီးရမိပြီး သူဟာ ကန်ဒေါင့်ရဲစခန်းက စစ်ကောင်စီလက်အောက်ခံ ရဲတပ်ဖွဲ့ဝင် ကျော်နိုင်ဦး ဆိုသူ ဖြစ်တယ်ဆိုတာ အတည်ပြုနိုင်တယ်လို့ ဆိုပါတယ်။

ဖမ်းဆီးရမိ အိမ်စီးကားပေါ်ကနေ ဂစ်တာအိတ်နဲ့ထည့်သွင်းပြီး ကန်ဒေါင့်ရဲစခန်းကတင်ပေးလိုက်တဲ့ ကျည်ဆံ၊ လက်ပစ်ဗုံး၊ မိုင်းအများအပြားကို သိမ်းဆည်းရမိခဲ့ကာ ကားနဲ့ကားပေါ်ပါလာတဲ့ ပြည်သူတွေကိုတော့ အပြစ်မဲ့အရပ်သားတွေဖြစ်လို့ ပြန်လွှတ်ပေးခဲ့တယ်လို့ သိရပါတယ်။

စာတည်း – ရင်ငြိမ်း