PDF

မန္တလေး၊ မေ ၂၉၊ ၂၀၂၃။

မန္တလေးတိုင်း၊ ငါန်းဇွန်မြို့နယ်က စစ်ကောင်စီခန့် ရပ်/ကျေးအုပ်ချုပ်ရေးမှူးတဦးကို ရှင်းလင်းပြီး အပြန်လမ်းမှာ စစ်အုပ်စုနဲ့ထိပ်တိုက် ပစ်ခတ်မှုဖြစ်ပွားခဲ့ရာ PDF တဦး သေဆုံးခဲ့တယ်လို့ TGYR- Youth Guerrilla Counter Revolution အဖွဲ့ဆီက သိရပါတယ်။

သေဆုံးခဲ့သူမှာ TGYR-PDF မှ ရဲဘော် အိုဝမ် ၂၀ နှစ်ဖြစ်ပြီး၊ မေလ ၂၄ ရက်နေ့လယ် ၂ နာရီလောက်မှာ သူအပါဝင် ရဲဘော် ၅ ဦးက သရက်ချိုပင်ကျေးရွာရဲ့အုပ်ချုပ်ရေးမှူးကို ရှင်းလင်းပြီး ပြန်လာချိန် အင်အား ၃၀ ကျော်ပါ စစ်ကောင်စီတပ်သားတွေနဲ့ ထိတွေ့တိုက်ပွဲဖြစ်ခဲ့တာလို့ TGYR-PDF မှ ပြန်ကြားရေးတာဝန်ခံက ပြောပါတယ်။

“ရဲဘော်တွေအပြန်မှာ စကစတွေက ကား ၂ စီးနဲ့ စောင့်ဆိုင်းပစ်ခတ်တာကိုခံရတာ။ အဲ့မှာ ပြေးရင်း လွှားရင်း အိုဝမ်ကကျသွားတာ။ ကျနော်တို့မှာက စခန်းလည်းမီးရှို့ခံလိုက်ရတယ်။ ရဲဘော်သေတာကို မနေ့ (မေလ ၂၈ )ကမှ သိရတာ။ အလောင်းကတော့ အခုချိန်ထိမရသေးဘူး။ စကစတွေက အဲနားက ရွာထဲမှာ ရှိနေသေးလို့”လို့ ဆိုပါတယ်။

သရက်ချိုနဲ့ ဖောင်ကတောကျေးရွာ အကြားမှာ ထိတွေ့မှုဖြစ်ခဲ့ရာ ရဲဘော်အိုဝမ်ကို စစ်ကောင်စီ တပ်သားတွေက ပစ်ခတ်ဖမ်းဆီးပြီးနောက် သရက်ချိုကျေးရွာထဲကို ခေါ်ဆောင်သွားပြီး “PDF ရုပ်အလောင်းကို မြင်ဖူးချင်ရင် လာကြည့်ကြ”ဆိုပြီး အော်ဟစ်ပြောဆိုကာ ပစ်သတ်ခဲ့တာလို့ သူက ဆက်ပြောပါတယ်။

လက်ရှိ စစ်ကောင်စီတပ်တွေက သရက်ချိုနဲ့ ဖောင်ကတောကျေးရွာ အနီးမှာပဲ ရှိနေတဲ့အတွက် ရဲဘော်ရဲ့အလောင်းကိုလည်း ပြန်ယူလို့မရသေးဘူးလို့ သိရပါတယ်။

အဆိုပါ ရဲဘော် ၅ ဦးဟာ မေလ ၂၄ ရက် မနက် ၇ နာရီလောက်မှာလည်း အသက် ၃၅ နှစ်အရွယ် သန့်ဇင်ကုန်းရွာအုပ်ချုပ်ရေးမှူး ဦးသန်းဇာ်လင်းနဲ့ ဇလှပ်မရွာ အုပ်ချုပ်ရေးမှူးတို့ကို ပစ်ခတ် ရှင်းလင်းခဲ့ပြီးနောက် နေ့လယ် ၂ နာရီအချိန်မှာ သရက်ချိုကျေးရွာရဲ့ အုပ်ချုပ်ရေးမှူးကို ပစ်ခတ် ရှင်းလင်းခဲ့ကြတာလည်း ဖြစ်ပါတယ်။

မေလ ၂၆ ရက်မှာလည်း ဒီအဖွဲ့ (TGYR) ဖွဲ့စခန်းကို အင်အား ၂၀ ကျော်ပါတဲ့ စစ်ကြောင်းတခုက ရဲဘော်တွေရှေ့တန်းထွက်နေချိန် ဝင်ရောက်စီးနင်းကာ မီးရှို့ဖျက်စီးခဲ့တာကြောင့် သိန်း ၁၅၀ ခန့် ဆုံးရှုံးခံရတယ်လို့ သိရပါတယ်။

စာတည်း – လင်း

စစ်ကိုင်း၊ မေ ၂၇၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်မှာ စစ်ကောင်စီတပ်ဖွဲ့နဲ့ တော်လှန်ရေးပူးပေါင်းအဖွဲ့တွေ တိုက်ပွဲဖြစ်ပွားပြီး သေဆုံးဒဏ်ရာရသူတွေရှိတယ်လို့ ဝက်လက် – ပြည်သူ့အစေခံတော်လှန်ရေးတပ်ဖွဲ့ ၊ တပ်ခွဲ ၁ ထံကသိရပါတယ်။

မေလ ၂၆ ရက်နေ့က စစ်ကြောင်းထိုးဖို့ထွက်လာတဲ့ စစ်ကောင်စီတပ်ဖွဲ့ဝင် အင်အား ၇၀ ခန့်ကို ပင်းဇင်းကျေးရွာနဲ့ မကျီးတုံ ကျေးရွာကြားအရောက် မနက် ၈ နာရီ အချိန်မှာတော်လှန်ရေးတပ်သားတွေက စောင့်ကြိုပစ်ခတ်ခဲ့တယ်လို့ ဝက်လက် – ပြည်သူ့အစေခံတော်လှန်ရေးတပ်ဖွဲ့၊ တပ်ခွဲ ၁ သတင်းတာဝန်ခံက မြေလတ်အသံကို ပြောပါတယ်။

“ကျနော်တို့ကသတင်းရလို့ ကြိုစောင့်နေတာ။ ဝက်လက်နဲ့သုံးမိုင်ကျော်လောက်ဝေးမယ်။ ရွာနှစ်ရွာကြားမှာ ကျနော်တို့စတိုက်တယ်။ မိနစ် ၂၀ လောက် အပြန်အလှန်ပစ်ခဲ့ကြတယ်။ ပစ်တဲ့အချိန်မှာပဲ ၃ ယောက်လဲကျသွားတာ မြင်လိုက်ရတယ်” လို့ ပြောပါတယ်။

တိုက်ပွဲဖြစ်ပွားချိန် လဲကျသေဆုံးသူ စစ်သား ၃ ယောက်ရှိပြီး ဒဏ်ရာရတဲ့သူတွေကိုတော့ အတည်မပြုနိုင်ဘူးလို့ သတင်းတာဝန်ခံကဆိုပေမယ့် မြေလတ်အသံအနေနဲ့ သီးခြားအတည်မပြနိုင်သေးပါဘူး။

အဲ့ဒီတိုက်ပွဲကို ဝက်လက် – ပြည်သူ့အစေခံတော်လှန်ရေးတပ်ဖွဲ့ တပ်ခွဲ ၁ ၊ နွေဦးအောင်ပွဲတော်လှန်ရေးအဖွဲ့နဲ့ ဝက်လက်မြို့နယ် ပြည်သူ့ကာကွယ်ရေးတပ်တွေ ပူးပေါင်းတိုက်ခိုက်ခဲ့တာဖြစ်ပြီး၊ ထိခိုက်သေဆုံးတာမရှိဘဲ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။

ပြီးခဲ့တဲ့ မေလ ၂၅ ရက်နေ့ မနက်ပိုင်းကလည်း ဝက်လက်မြို့ကို ရောက်နေတဲ့ ခမရ ၃၆၄ တပ်က စစ်သား ၇၀ ကျော် စစ်ကြောင်းထိုးလာစဉ် လိန်ပင်ကျေးရွာအနီးမှာ ပြည်သူ့အစေခံတော်လှန်ရေးတပ်သားတွေ ကြိုထောင်ထားတဲ့တိုက်မိုင်းတွေထိပြီး သေဆုံးဒဏ်ရာရခဲ့တာတွေရှိခဲ့တယ်လို့ သိရပါတယ်။

စာတည်း – 007

စစ်ကိုင်း၊ မေ ၂၄၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊​ ကံပေါက်ကျေးက နေအိမ်တွေကို မွှေနှောက်ရှာဖွေဖျက်ဆီးခဲ့တဲ့ စစ်ကောင်စီစစ်ကြောင်းဟာ မေလ ၂၃ ရက်နေ့က မိုင်း ၂ ကြိမ်ဆွဲတိုက်ခိုက်ခံရလို့ ထိခိုက်သေဆုံးမှုရှိခဲ့တယ်လို့ PDF တာဝန်ရှိသူက ပြောပါတယ်။

အင်အား ၇၀ ကျော်ပါတဲ့ အဲဒီစစ်ကြောင်းကို ရေဦးမြို့နယ် ပကဖ တပ်ခွဲ၊ နယ်မြေဒေသခံ ပြည်သူ့ကာကွယ်ရေးတပ်စိပ်တို့ဟာ မနက် ၆ နာရီက ကံပေါက်တံတားအနီးမှာ ၁ ကြိမ်၊ နေ့လယ် ၁ နာရီက လက်လံတံတားအနီးမှာ ၁ ကြိမ် စုစုပေါင်း ၂ ကြိမ်မိုင်းဆွဲခဲ့တာဖြစ်တယ် လို့ People’s Defense Comrade မှ ပြန်ကြားရေးတာဝန်ခံ ထူးခန့်ဇော်(အမေ့သား) က ပြောပါတယ်။

“စကစတွေက မနက်ပိုင်းမှာ ကံပေါက်ရွာကိုဝင်ပြီးတော့ နေအိမ်တွေကို ရှာဖွေ၊ ဖျက်ဆီးတာတွေလုပ်တယ်။ မီးရှို့တာတော့မရှိဘူး။ နေ့ခင်းပိုင်းမှာအဲရွာကနေထွက်ပြီးတော့ မူးချောင်းဘောင်ဘေးလျှောက် စစ်ကြောင်းထိုးသွားတယ်။ ကာကွယ်ရေးတပ်ဖွဲ့တွေက ကံပေါက်ရွာကို အဝင်မှာတကြိမ်၊ အထွက်မှာတကြိမ် ၂ ကြိမ် မိုင်းဆွဲခဲ့တာ။ အပြန်အလှန်ပစ်ခတ်တာတော့ မရှိခဲ့ဘူး။ စကစတွေ ထိခိုက်‌သေဆုံးတာကို အတည်မပြုနိုင်ခဲ့ပေမယ့် အတော်လေးကိုအထိနာသွားတာတွေ့ ရှိခဲ့ရတယ်” လို့ ဆိုပါတယ်။

စစ်ကောင်စီစစ်ကြောင်းမိုင်းဆွဲခံခဲ့ရတဲ့ ကံပေါက်တံတားနဲ့ လက်လံတံတားအနီးဝန်းကျင်တွေမှာ သွေးထွက်လွန်ရင်ထိုးတဲ့ ဆေးကဒ်တွေ၊ သွေးစွန်းထားတဲ့ ဂွမ်းစတွေ၊ သွေးကွက်တွေကို တွေ့ရှိခဲ့ရတယ်လို့ သူကဆက်ပြောပါတယ်။

ဒါ့အပြင် မိုင်းဆွဲခံရပြီး အထိနာသွားတဲ့စစ်ကြောင်းဟာ နေ့လည် ၃ နာရီခွဲ အချိန်ခန့်မှာ လက်လံ၊ ဝက်ဖိုး၊ မြင်းပေါက်၊ ဇဝရွာစတဲ့ကျေးရွာတွေဘက်ကနေ သံသည်ရွာဘက်ကို နောက်ကြောင်းပြန်ခေါက်ကာ စစ်ကား ၃ စီးနဲ့ ရေဦးမြို့ထဲကို ပြန်လည်ဝင်ရောက်သွားခဲ့တယ်လို့ သိရပါတယ်။

စစ်ကြောင်းဟာ ရေဦးမြို့ပေါ်မှာ အထိုင်ချနေတဲ့ တပ်မ (၁၁) က တပ်သားတွေဖြစ်ပြီး၊ မေလ ၄ ရက်နေ့ကလည်း ချမ်းသာကျေးရွာရဲ့ စာသင်ကျောင်းကို မိုင်းခွဲတိုက်ခဲ့တဲ့ စစ်ကြာင်းဖြစ်သလို ရွှေဘိုမြို့နယ်နဲ့ ခင်ဦးမြို့နယ်တို့ကို တောက်လျှောက် စစ်ကြောင်းထိုးနေတဲ့ စစ်ကြောင်းလို့ ဒေသကာကွယ်ရေးအဖွဲ့တွေဆီက သိရပါတယ်။

စာတည်း – 007