PDF

မကွေး၊ ဇွန် ၉၊ ၂၀၂၃။

မကွေးတိုင်း၊ သရက်ခရိုင်၊ အောင်လံမြို့နယ်မှာ ကျေးရွာအုပ်ချုပ်ရေးမှူး ၁ ဦး ဇွန်လ ၈ ရက် မနေ့ ည ၈ နာရီခန့်မှာ သေနတ်နဲ့ပစ်ခံရလို့ ဒဏ်ရာပြင်းထန်ရသွားတယ်လို့ သိရပါတယ်။

ပစ်ခတ်ခံရသူဟာ အောင်လံမြို့နယ်၊ ဥယျာဥ်ကျေးရွာ အုပ်ချုပ်ရေးမှူး အသက် ၄၀ ဝန်းကျင်ရှိ သောင်းစိုးဦး ဆိုသူဖြစ်ပြီး အောင်လံကနေ ဥယျာဥ်ရွာဘက်ကို ဆိုင်ကယ်နဲ့ပြန်လာချိန် အနီးကပ်ပစ်ခတ်ခဲ့တာလို့ အောင်လံ PDF တပ်ဖွဲ့ဝင်တဦးက မြေလတ်အသံကို ပြောပါတယ်။

“သူမြို့က ပြန်လာတာကိုစောင့်ကြည့်ပြီး ရွာနားအရောက်လောက်မှာ ၄ ချက်လောက် ပစ်ခတ်ခဲ့တာ။ လက်မောင်းနဲ့ ခါးပိုင်းတွေမှာ သေနတ်ကျည်တွေထိခဲ့တယ်။ သေတော့မသေသေဘူး ဒဏ်ရာပြင်း ထန်ရသွားတယ်လို့ သိရတယ်”လို့ ပြောပါတယ်။

ဥယျာဥ်ကျေးရွာအုပ်ချုပ်ရေးမှူးဟာ ဒေသခံ PDF တွေကို စစ်ကောင်စီတပ်ကဖမ်းဆီးရာမှာ ဦးဆောင်လမ်းပြပေးတာအပြင် CDM ဝန်ထမ်းတွေနဲ့ပြည်သူ့ကာကွယ်ရေးအဖွဲ့တွေကို အားပေးထောက်ခံသူတွေကို ဖိအားပေးအခက်အခဲဖြစ်အောင် လုပ်ဆောင်မှုတွေရှိတာကြောင့် ပစ်ခတ်ရတာဖြစ်တယ်လို့ ဆိုပါတယ်။

သေနတ်နဲ့ပစ်ခံရတဲ့ အုပ်ချုပ်ရေးမှူးမှာ ပြင်းထန်ဒဏ်ရာတွေရသွားတာကြောင့် အောင်လံဆေးရုံကိုပို့ပြီး ဆေးကုသမှုခံယူနေတယ်လို့ သိရပါတယ်။

၂၀၂၂ ခုနှစ်၊ စက်တင်ဘာလ ၂၅ ရက်နေ့ ညပိုင်းကလည်း အောင်လံမြို့နယ်၊ တလပါးကျေးရွာ အုပ်ချုပ်ရေးမှူး တပည့်ဖြစ်သူ ဝင်းထွေး နေအိမ်မှာရှိနေချိန် သေနတ်သမားတွေကဝင်ပစ်လို့ သေဆုံးသွားတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ ဇွန် ၉၊ ၂၀၂၃။

စစ်ကိုင်းမြို့နယ်က ပျူစောထီးစခန်းအဖြစ် တပ်စွဲထားတဲ့ မာလဲတောရွာမှာ စစ်အုပ်စု အသုံးပြုနေတဲ့ကား ၂ စီးကို မီးရိူ့ဖျက်ဆီးခဲ့တယ်လို့ ယူနီကွန်းပြောက်ကျားတပ်ဖွဲ့ က ဇူလိူင် ၈ ရက် မနေ့ညက သတင်းထုတ်ပြန် ထားပါတယ်။

ဇွန်လ ၅ ရက် နေ့လယ် ၁ နာရီခန့်က စစ်သားနဲ့ပျူစောထီး အင်အား ၅၀ လောက်နဲ့ တပ်စွဲထားတဲ့ မာလဲတောရွာမှာ ပျူစောထီးတွေပိုင် ဖောကားနဲ့ ပုစဥ်းခေါင်းထော်လာဂျီတို့ဘုန်းကြီးကျောင်းအနီး ရွာအစွန်က အိမ်တွေအရှေ့ ရပ်ထားချိန် မီးရှို့ဖျက်ဆီးခဲ့တာလို့ ဆိုပါတယ်။

“မာလဲတောပျူရွာကကား ၂ စီး ဘုန်းကြီးကျောင်းအနီးမှာ ရပ်ထားတယ် သတင်းရလို့ သွားရောက်မီးရှို့ခဲ့တာပါ။ ကားပေါ်မှာဘယ်က ခိုးလားမှန်းမသိတဲ့ ဆိုင်ကယ်တွေရေခဲသေတ္တာတွေ ပန်ကာတွေပါတယ်။ အကုန်ရှင်းလင်းခဲ့ပါတယ်။ ဘာတခုမှမယူခဲ့ဘူး ပျူတွေ စစ်သားတွေ အသုံးပြုနေတဲ့ကားမို့ ဖျက်ဆီးခဲ့တာပါ။ “လို့ ယူနီကွန်းပြောက်ကျားတပ်ဖွဲ့တာဝန်ခံက ပြောပါတယ်။

မီးရှို့နေချိန် မာလဲတောရွာထဲက စစ်ကောင်စီက လက်နက်ငယ်တွေနဲ့ အဆက်မပြတ် ခြောက်လှန့်ပစ်ခတ်နေလို့ ရွာအတွင်းကို ဒရုန်းနဲ့ဗုံးသီး ၂ လုံးချခဲ့ရပြီး စစ်အုပ်စုဘက်က မီးရှို့တဲ့နေရာကို လာရောက်နှောက်ယှက် နိုင်တာမျိုးမရှိဘူးလို့ သူကဆက်ပြောပါတယ်။

စစ်အုပ်စုက ပြီးခဲ့တဲ့နှစ်ကတည်းက မာလဲတောရွာမှာ တပ်စွဲထားတာဖြစ်ပြီး ကားမီးရှို့ခံရပြီးချိန်မှာတော့ အင်အားတိုးထားတယ်လို့ သတင်းရပြီး စစ်သားနဲ့ ပျူစောထီး အင်အားဘယ်လောက် တိုးတယ်ဆိုတာကိုတော့ မသိရဘူးလို့ ဆိုပါတယ်။

အဲဒီစစ်ဆင်မှုမှာ ယူနီကွန်းပြောက်ကျားတပ်ဖွဲ့၊ Phoenix SGG အဖွဲ့၊ Fight for Fedreal အဖွဲ့တို့ ပူးပေါင်းခဲ့တယ်လို့ သိရပါတယ်။

ယူနီကွန်းပြောက်ကျားတပ်ဖွဲ့နဲ့ ဒေသခံ PDF မဟာမိတ်အဖွဲ့တွေဟာ ပြီးခဲ့တဲ့ မေလ ၂၂၊ ၂၃ နဲ့ ၂၄ ရက်တွေကလည်း မန္တလေးတိုင်း၊ မတ္တရာမြို့နယ် ဝန်စုကျေးရွာက စစ်ကောင်စီတပ်ဖွဲ့ဝင်တွေကို ဒရုန်းနဲ့ ဗုံးသီးချ တိုက်ခိုက်ခဲ့ ကြပါသေးတယ်။

စာတည်း – 007

စစ်ကိုင်း၊ ဇွန် ၈၊ ၂၀၂၃။

စစ်ကိုင်းတိုင်း၊ မုံရွာခရိုင်တပ်ရင်း – ၇ ရဲ့ မွမ်းမံသင်တန်း အပတ်စဥ် – ၁၀ သင်တန်းဆင်းပွဲကို ဇွန်လ ၇ ရက်နေ့ မနက်ပိုင်းက ပြုလုပ်ခဲ့တယ်လို့ မုံရွာခရိုင်တပ်ရင်း – ၇ ထံက သိရပါတယ်။

မွမ်းမံသင်တန်းမှာ မုံရွာခရိုင်တပ်ရင်း – ၇ မှာ ရှိတဲ့ တပ်ခွဲ – ၄ ဖွဲ့က ရဲဘော် ၃၁ ဦးကို ၁၅ ရက်ကြာ ရက်တို သင်တန်းပေးခဲ့တာလို့၊ Monywa Lightning PDF သတင်းတာဝန်ခံက မြေလတ်အသံကိုပြောပါတယ်။

“ကျနော်တို့ PDF ဆိုတာ ပြည်သူကမွေးဖွားလာတဲ့ ပြည်သူ့ရဲဘော်တွေပါ။ လက်နက်ခဲယမ်းကအစ ပြည်သူက ဝယ်ပေးထားတာ။ ပြည်သူကို မျက်နှာမမူဘဲ ပြန်နှိပ်စက်တဲ့လုပ်ရပ်မျိုးကတော့ လက်မခံနိုင်ပါဘူး။ ဒါကလည်း အဖွဲ့ငယ်လေးတွေမှာ ဖြစ်နေတာတွေ့ရပါတယ်။” လို့ သူကပြောပါတယ်။

ရဲဘော်တွေအနေနဲ့ လက်လုပ်လက်နက်နဲ့ကိုင်ပြီး မောင်းပြန်လက်နက်ကိုင်ထားတဲ့ စစ်ကောင်စီကို တိုက်ခိုက်ရတာဖြစ်လို့ ရဲဘော်တွေ အတွေ့အကြုံရှိဖို့ စိတ်ဓာတ်ခိုင်မာဖို့ သင်တန်းထဲမှာ ထည့်သွင်းသင်ကြားပေးတယ်လို့ ဆိုပါတယ်။

“ကျနော်တို့ စစ်ရေးလှုပ်ရှားတဲ့ နေရာတွေမှာ ရဲဘော်တွေက စစ်ရေးလိုအပ်ချက် ရှိနေလို့မွမ်းမံသင်တန်းပေးရတာ ဖြစ်တယ်။ အဓိက လက်နက်အင်အား အပြည်အစုံမရှိသေးပါဘူး။ ဘဏ္ဍာရေး အခက်အခဲလည်းရှိနေပါတယ်” လို့ သတင်းတာဝန်ခံက ပြောပါတယ်။

လက်တွေ့ပိုင်းမှာတော့ စစ်ရေးပြတာ၊ စစ်မြေပြင်ကျွမ်းကျင်ရေးနဲ့ စာတွေ့အပိုင်းမှာတော့ လက်နက်စည်းကမ်းနဲ့ ပြည်သူ့အပေါ်ထားရမယ့် ကျင့်ဝတ်တွေကို သင်တန်းဆရာ ၄ ဦးနဲ့ သင်ကြားပေးတာလို့ ဆိုပါတယ်။

မုံရွာခရိုင်တပ်ရင်း – ၇၊ တပ်ဖွဲ့ဝင်တွေအနေနဲ့ စစ်ကောင်စီ လက်အောက်ခံတပ်ဖွဲ့တွေကိုတိုက်ခိုက်တဲ့အခါ မုံရွာခရိုင်အတွင်း နယ်မြေတွေမှာ တိုက်ခိုက်တာများပြီး၊ ရံဖန်ရံခါ ယင်းမာပင်ခရိုင်ထဲမှာလည်း သွားရောက် တိုက်ခိုက်ခဲ့တာတွေရှိကာ တိုက်ပွဲအကြိမ်ရေ ၁၀၀ ကျော် တိုက်ခိုက်ခဲ့တယ်လို့ သိရပါတယ်။

စာတည်း – 007

စစ်ကိုင်း၊ ဇွန် ၈၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်က စစ်ကောင်စီတပ်စွဲထားတဲ့ နေရာ ၂ ခုကို ဇွန်လ ၅ ရက် ည ၈နာရီဝန်းကျင်မှာ ဒရုန်းနဲ့ဗုံးချတိုက်ခိုက်ခဲ့လို့ စစ်ကောင်စီတပ်ဖွဲ့ဝင်တချို့သေဆုံးမှုရှိခဲ့တယ်လို့ ကျောက်ဆည်နဂါးနီပြည်သူ့ကာကွယ်ရေးတပ်ဖွဲ့ဆီက သိရပါတယ်။

စစ်ကိုင်းမြို့အထွက်က ကံတလူတိုးလ်ဂိတ်နဲ့ အမှတ် ၃ ရဲလေ့ကျင့်ရေးသင်တန်းကျောင်းဂိတ်ကို တပြိုင်တည်း ဒရုန်းဗုံးချတိုက်ခိုက်ခဲ့တာဖြစ်ပြီး တိုက်ခိုက်မှုအတွင်း တိုးလ်ဂိတ်မှာတပ်စွဲထားတဲ့ စစ်ကိုင်း တပ်မ ၃၃ က အရာခံဗိုလ် ၁ ဦး နဲ့ တပ်သား ၁ ဦးသေဆုံးသွားတယ်လို့ အဖွဲ့တာဝန်ရှိသူက မြေလတ်အသံကို ပြောပါတယ်။

“အဲ့ဒီနေရာ ၂ ခုကို တပွိုင့်ကို ဗုံးသီး ၄ လုံးနဲ့ ကြဲချတိုက်ခိုက်ခဲ့တယ်။ တိုးလ်ဂိတ်ကိုဗုံးချတာမှာ တပ်မ ၃၃ စစ်သားတွေရှိတဲ့ ဂိတ်ဘန်ကာပေါ်ကိုကျလို့ ၂ ယောက်သေတယ်” လို့ ကျောက်ဆည်နဂါးနီ ပြည်သူ့ ကာကွယ်ရေးတပ် ဒုတပ်ရင်းမှူး ဆရာလေးက ပြောပါတယ်။

ကံတလူတိုးလ်ဂိတ်မှာ စစ်ကောင်စီတပ်အင်အား ၁၇ ဦးခန့် တပ်စွဲထားတာဖြစ်ပြီး တိုးလ်ဂိတ် ကင်းဘန်ကာမှာ ၂ ဦးတည်းရှိနေချိန် ဒရုန်းနဲ့ဗုံးကြဲချတိုက်ခိုက်ခဲ့တာဖြစ်ပြီး ရဲသင်တန်းကျောင်းဂိတ်ကို ဗုံးကြဲတိုက်ခိုက်မှုရဲ့ ထိခိုက်မှုကိုတော့ မသိရဘူးလို့ ဆိုပါတယ်။

တိုက်ခိုက်မှုကို ကျောက်ဆည်ခရိုင်တပ်ရင်း – ၁(နဂါးနီတပ်ရင်း)၊ ကျောက်ဆည်ခရိုင်ဒရုန်းတပ်ဖွဲ့၊ မြင်းခြံ ခရိုင် တပ်ရင်း-၇ (Zero ပြောက်ကျားတပ်ဖွဲ့)၊ ရွှေဘိုခရိုင်တပ်ရင်း၁၅ နှင့် ဆားတောင်းမိုးကြိုးအဖွဲ့တို့က ပူးပေါင်းလုပ်ဆောင်ခဲ့တာဖြစ်ပါတယ်။

ဇွန်လ ၄ ရက်နေ့ကလည်း မြင်းမူမြို့နယ်၊ ထီးဆောင်းရွာမှာ တပ်စွဲထားတဲ့ တပ်မ ၃၃ က စစ်သားတွေကို ကျောက်ဆည်နဂါးနီပြည်သူ့ကာကွယ်ရေးတပ်က ဒရုန်းနဲ့အကြိမ် ၂၀ ကျော် တိုက်ခိုက်ခဲ့တာ‌ကြောင့် စစ်ကောင်စီတပ်ထိခိုက်သေဆုံးမှုတွေရှိခဲ့တယ်လို့ သိရပါတယ်။

စာတည်း – ရင်ငြိမ်း

ပဲခူး၊ ဇွန် ၇၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ ဒိုးတန်းရွာအုပ်စု၊ တခွဲကျဲကျေးရွာမှာ စစ်ကောင်စီခန့် ရာအိမ်မှူးတဦး နေအိမ်မှာ ပစ်သတ်ခံရတယ်လို့ သိရပါတယ်။

ဇွန်လ ၇ ရက် မနက် ၁၀ နာရီကျော်မှာ တခွဲကျဲကျေးရွာနေ ရာအိမ်မှူး ဦးကိုလေး အသက် ၆၀ နှစ်ကျော်၊ နေအိမ်မှာရှိနေချိန် သွားရောက်ရှင်းလင်းခဲ့တယ်လို့ ရေတာရှည်မြို့နယ် ပကဖ တာဝန်ရှိသူကပြောပါတယ်။

အသတ်ခံရသူဟာ ရေတာရှည်မြို့နယ်ထဲက ဒလန်ရှင်းရမယ့်စာရင်းထဲမှာ နံပါတ် ၅ အဆင့်ရှိပြီး သူ့ကို ရာအိမ်မှူး ဆက်မလုပ်ဖို့ အကြိမ်ကြိမ်း သတိပေးခဲ့ပေမယ့် မလိုက်နာတဲ့အတွက် အခုရှင်းလင်းခဲ့တာဖြစ်တယ်လို့ ဆိုပါ တယ်။

“သူ့ကိုရှင်းချိန် သူ့မိသားစုဝင်တွေ ရှိနေပေမယ့် ဘာမှ မလုပ်ခဲ့ဘူး။ ထွက်ပြေးလို့ ကျည် ၂ ချက်ပစ်ခဲ့တာ။ အိမ်နောက်ဖေးနားမှာ ဦးခေါင်းကျည်ထိပြီး သေသွားတယ်” လို့ ရေတာရှည်မြို့နယ် ပကဖ တာဝန်ရှိသူတဦးက ပြောပါတယ်။

ဦးကိုလေးဟာ စစ်ကောင်စီနဲ့ပေါင်းပြီး PDF တွေရဲ့ သတင်းပေးတာ၊ စိုက်ဘဏ်ချေးငွေတွေကို အတင်းအကြပ် ကောက်ခံတာတွေရှိသလို ပျူစောထီးအဖွဲ့ဝင်တဦးဖြစ်ပြီး သေနတ်အတုပြကာ ရွာသားတွေကို ခြိမ်းခြောက်မှုတွေရှိနေလို့ ရှင်းပစ်လိုက်တာဖြစ်တယ်လို့ ဆိုပါတယ်။

ရာအိမ်မှူး ဦးကိုလေး ပစ်သတ်ခံရပြီး ၃ နာရီလောက်ကြာမှာ စစ်ကောင်စီတပ်နဲ့ရဲတပ်ဖွဲ့ဝင် ၂၀ ဦးလောက်က တခွဲကျဲကျေးရွာကို ရောက်လာပြီး စစ်ဆေးမှုလုပ်ကာ ပြန်သွားတယ်လို့ သိရပါတယ်။

မေလ ၁၅ ရက်က ရေတာရှည်မြို့နယ်၊ စည်ပိုင်းအုပ်စု၊ ရှမ်းစုရွာနေပြည်သူစစ်ခေါင်းဆောင် ဦးကျော်ဆွေဦး ၄၀ နှစ်ဟာ နေအိမ်ကနေ ဖမ်းဆီးခံရပြီး လမ်းတနေရာမှာ ရှင်းလင်းခံခဲ့ရသေးတယ်လို့ သိရပါတယ်။

စာတည်း – လင်းဇေ

ခန့်အောင်၊ စောကျော်ငြိမ်း

မန္တလေး၊ ဇွန် ၇၊ ၂၀၂၃။

မန္တလေးတိုင်း၊ မြင်းခြံမြို့နယ်နဲ့ မလှိုင်မြို့နယ်တို့မှာ စစ်ကောင်စီတပ်ဖွဲ့ဝင်တွေကို ဒရုန်းနဲ့ဗုံးကြဲတိုက်ခိုက်တာ၊ မိုင်းဆွဲတိုက်ခိုက်တာတွေကြောင့် ထိခိုက်သေဆုံးမှုတွေရှိခဲ့တယ်လို့ တိုက်ခိုက်မှုကို လုပ်ဆောင်ခဲ့ကြတဲ့ တော်လှန်ရေးတပ်ဖွဲ့တွေဆီက သိရပါတယ်။

မြင်းခြံမြို့နယ်၊ တလုပ်မြို့ကနေ ဆိုင်ကယ် ၃ စီးနဲ့ပြန်လာတဲ့ စစ်သား ၆ ဦးကို ဆင်းဂွတ်ရွာနဲ့ တောပုရွာကြားမှာ ဇွန်လ ၆ ရက် မနေ့ကမနက် ၉ နာရီခွဲလောက်မှာ ပဒေသာမိုင်း ၆ လုံးတွဲနဲ့ တိုက်ခိုက်ခဲ့တာလို့ ဆိုပါတယ်။

“စစ်သားတွေက ကတောရွာကနေ လတလုပ်မြို့ဘက်ကိုပြန်လာတာ တစီးနဲ့တစီးက သိပ်မကွာဘဲ မိုင်ကွင်းထဲဝင်လာတာမှာဆွဲလိုက်တာ တစီးကလမ်းဘေးထိုးကျပြီးလဲသွားတယ် ၂ စီးကတော့ထိတယ်မလဲဘူး ” လို့ မြင်းခြံခရိုင်တပ်ရင်း -၆ နောင်ရိုးအထူးပြောက်ကျားတပ်ရဲ့ ပြန်ကြားရေးတာဝန်ခံက ပြောပါတယ်။

သေဆုံးဒဏ်သူတွေကို Light Truck ကားနဲ့ တလုပ်မြို့ကို သယ်ဆောင်သွားတယ် လို့သိရပြီး နောင်ရိုးပြောက်ကျားတပ်ဖွဲ့ရဲ့ ထုတ်ပြန်ချက်မှာ စစ်သား ၃ ဦးသေပြီး ၂ ဦးထိခိုက်ဒဏ်ရာရရှိခဲ့တယ်လို့ ဖော်ပြထားပါတယ်။

အလားတူ မန္တလေးတိုင်း၊ မိတ္ထီလာခရိုင်၊ မလှိုင်မြိုနယ်၊ သရက်ကောင်းပင်ရွာမှာ အထိုင်ချတပ်စွဲထားတဲ့စစ်ကောင်စီစခန်းကို ဇွန်လ ၅ ရက်က ဒရုန်းနဲ့တိုက်ခိုက်ခဲ့တယ်လို့ နွားထိုးကြီး PDF အဖွဲ့ထံက သိရပါတယ်။

“အဲ့ရွာမှာရှိတဲ့ အုပ်ကြီးနဲ့စစ်သားတွေက ပြည်သူတွေကို ဖမ်းဆီးနှိပ်စက်တာ ဆက်ကြေးကောက်တာတွေလုပ်နေလို့တိုက်တာပါ။ နေ့လည်ပိုင်းက ထမင်းစားဆောင်ကိုတိုက်တော့ ၅ ယောက်သေတယ်။ ညနေပိုင်းမှာ စစ်ဆေးရေးဂိတ်ကို ထပ်တိုက်တယ်။ စစ်သား ၃ ယောက်သေတယ်” လို့ (NPDF)တာဝန်ခံ ဗိုလ်လင်းယုန်က မြေလတ်အသံကို ပြောပါတယ်။

ယင်းနေ့လည် ၁ နာရီမှာ စစ်ကောင်စီတပ်ရဲ့ ထမင်းစားဆောင်ကို အီနာဂါဗုံး ၂ လုံးနဲ့ကြဲချခဲ့ပြီး၊ ညနေ ၄ နာရီလောက်မှာ မလှိုင်-နွားထိုးကြီးလမ်းပေါ်က စစ်ဆေးရေးဂိတ်ကို ဗုံးတလုံးနဲ့ တရက်တည်း နှစ်ကြိမ်တိုက်ခိုက်ခဲ့ကြတာလို့ ဆိုပါတယ်။

အဲဒီလို မြင်းခြံမြို့နယ်ထဲက တိုက်ခိုက်မှုကို မြင်းခြံခရိုင်တပ်ရင်းအမှတ် ၆ တပ်ခွဲ ၁ နောင်ရိုးအထူးပြောက်ကျားတပ် – NYSGF၊ မြင်းခြံခရိုင် Taloke PDF၊ Myingyan MP 9 ၊ MS 9 Brother တို့ပူးပေါင်းတိုက်ခိုက်ခဲ့တာ ဖြစ်ပါတယ်။

မလှိုင်မြို့နယ်၊ သရက်ကောင်းပင်ရွာ၊ စစ်ကောင်စီစခန်း တိုက်ခိုက်မှုကိုတော့ Myingyan District Drone Strike Team အဖွဲ့နဲ့ မြင်းခြံခရိုင် အမှတ်-၄ တပ်ရင်း၊ Natogyi People Defence Force(NPDF) တပ်ဖွဲ့ တို့ ပူးပေါင်းတိုက်ခိုက်ခဲ့တယ်လို့ သိရပါတယ်။

တိုက်ခိုက်မှုဖြစ်စဉ်တွေအတွင်း သေဆုံးဒဏ်ရာရတဲ့ စစ်ကောင်စီတပ်သားတွေရဲ့ စာရင်းအတိအကျကိုတော့ မြေလတ်အသံအနေနဲ့ သီးခြားအတည်ပြုနိုင်တာမရှိသေးပါဘူး။

စာတည်း – 007