PDF

စစ်ကိုင်း၊ ဇွန် ၁၄၊ ၂၀၂၃။

စစ်ကိုင်းမြို့နယ်၊ ဆားတောင်မြို့ထဲက သာဇင်ကျေးရွာကို စစ်ကောင်စီတပ်သားတွေက ဇွန်လ ၁၃ ရက် မနက် ၉ နာရီကျော်မှာ ဝင်ရောက်မီးရှို့ပြီး ဒေသခံ အမျိုးသားတွေကို ဖမ်းဆီးသွားခဲ့တယ်လို့ PDF ရဲဘော်တဦး က ပြောပါတယ်။

အင်အား ၁၀၀ ကျော်ပါတဲ့ စစ်ကြောင်းက တိုက်ပွဲဖြစ်ပွားတာမရှိဘဲ သာဇင်ကျေးရွာက လူနေအိမ်တွေကို မီးရှို့ပြီးနောက် ဘောက်သောက်က ၃ ဦး၊ လင်းယဥ်ကုန်းက ၄ ဦး စုစုပေါင်းအမျိုးသား ၇ ဦးကို ဖမ်းဆီးခေါ်ဆောင်သွားတာ ဖြစ်တယ်လို့ စစ်ကိုင်း PDFမှ ရဲဘော်တဦးက ပြောပါတယ်။

“သာဇင်က အမျိုးသားတွေကိုလည်း ဖမ်းသွားတယ်။ ဘယ်နှစ်ယောက်ဆိုတာကို မသိရသေးဘူး။ ဘောက်သောက်နဲ့ လင်းယဥ်ကုန်းရွာ က ခုနှစ်ယောက်ကတော့ အတိကျပဲ။ သူတို့က ဒီနေ့အထိ ပြန်မလွတ်လာကြသေးဘူး” လို့ သူကဆိုပါတယ်။

သာဇင်ကျေးရွာမှာ ဆားတောင်မြို့နဲ့ ၁ မိုင်ခန့်ဝေးပြီး အိမ်ခြေ ၁၀၀၀ ခန့် ရှိကာ စစ်ကောင်စီတပ်သားတွေက ရွာရဲ့ အနောက်တောင်ဘက်ကနေ စတင်မီးရှို့တာဖြစ်သလို လူနေအိမ် ဘယ်နှစ်လုံး မီးလောင်ပျက်စီးသွားသလဲ ဆိုတာကိုတော့ မသိရှိရသေးဘူးလို့ အထက်ပါရဲဘော် က ပြောပါတယ်။

အဲဒီကျေးရွာကို မီးရှို့ဖျက်ဆီးပြီး ဒေသခံတွေကို ဖမ်းဆီးသွားတဲ့စစ်ကြောင်းဟာ ဇွန်လ ၁၄ ရက်ဒီနေ့မှာတော့ အိုင်းတမကျေးရွာမှာ ဝင်ရောက်တပ်စွဲထားတယ်လို့ သူက ဆက်ပြောပါတယ်။

ဇွန်လ ၁၂ ရက်ကလည်း ပဒူရွာ၊ ရေတွင်းကောင်း၊ မုံညို့၊ အောင်မြေ၊ ကြခတ်၊ စမွန်း၊ ရုံးပင်၊ ဘောက်သောက်၊ လင်းယဉ်ကုန်း စတဲ့ကျေးရွာတွေကို စစ်ကြောင်းထိုး ဝင်ရောက် မွှေနှောက်ရှာဖွေခဲ့ပြီးနောက် ဇွန်လ ၁၃ ရက်မှာ သာဇင်ကျေးရွာကို အခုလို ဝင်ရောက်မီးရှို့သွားတာ ဖြစ်တယ်လို့ သိရပါတယ်။

စာတည်း – 007

စစ်ကိုင်း၊ ဇွန် ၁၃၊ ၂၀၂၃။

စစ်ကိုင်းတိုင်း၊ မြောင်မြို့နယ်မှာ စစ်ကောင်စီတပ်တွေ အထိုင်ချထားတဲ့ ကျောက်ရစ်ရဲစခန်းနဲ့ ဆေးပေးခန်းကို ဒေသကာကွယ်ရေးတပ်ဖွဲ့တွေက ဇွန်လ ၁၂ ရက်မှာ ဒရုန်းနဲ့ သွားရောက်ပစ်ခတ်ခဲ့တယ်လို့ Myaung Special Drone Force တပ်ဖွဲ့မှ တာဝန်ခံတဦးက ပြောပါတယ်။

ဇွန်လ ၁၂ ရက် မနက် ၆ နာရီခွဲခန့်မှာ ကျောက်ရစ်ရဲစခန်းမှာ အထိုင်ချထားတဲ့ စစ်ကောင်စီတပ်ဖွဲ့တွေကို ဒရုန်းဗုံးသီး ၂ လုံးနဲ့ သွားရောက်ပစ်ခတ်ခဲ့သလို ကျောက်ရစ်ကျေးရွာရှိ ဆေးပေးခန်းမှာ အထိုင်ချထားတဲ့ စစ်ကောင်စီတပ်ဖွဲ့တွေကိုလည်း ဒရုန်းဗုံးသီးတလုံးနဲ့ သွားရောက်ပစ်ခတ်ခဲ့တယ်လို့ သူက ဆိုပါတယ်။

ကျောက်ရစ်ဆေးပေးခန်းဟာ ကျန်းမာရေးစောင့်ရှောက်မှုတွေ လုပ်ကိုင်ခြင်းမရှိတော့ဘဲ စစ်ကောင်စီတပ်တွေက အထိုင်ချတပ်စွဲထားတာဟာ ၈ လကျော် ရှိနေပြီလို့ သိရပါတယ်။

“ပစ်ခတ်လိုက်တဲ့အချိန်မှာ သူတို့ဘက်က ထိခိုက်သေဆုံးမှုတွေတော့ ရှိနိုင်တယ်။ ဘယ်နှစ်ယောက် ထိခိုက်သွားလဲဆိုတာတော့ စုံစမ်းနေတုန်းပါ ” လို့ Myaung Special Drone Force တပ်ဖွဲ့မှ တာဝန်ခံတဦးက ပြောပါတယ်။

Drone နဲ့ပစ်ခတ်ပြီးတဲ့နောက်မှာတော့ စစ်ကောင်စီစစ်ကြောင်းဟာ ကျောက်ရစ်ရဲစခန်းနဲ့ ဆေးပေးခန်းကနေ ထွက်လာပြီးနောက် လက်နက်ကြီးလက်နက်ငယ်တွေနဲ့ ပြန်လည်ပစ်ခတ်ခဲ့တယ်လို့လည်း ဆိုပါတယ်။

ကျောက်ရစ်ရဲစခန်းနဲ့ ကျောက်ရစ်ဆေးပေးခန်းမှာ စစ်ကောင်စီတပ်ဖွဲ့တွေဟာ အင်အား ၁၅၀ နီးပါးနဲ့ တပ်စွဲထားတာပါ။ အဲဒီ ရဲစခန်း နဲ့ ဆေးပေးခန်းဟာ မီတာ ၁၅၀ (ပေ ၅၀၀) လောက်သာ ကွာဝေးပြီး ဒီနေ့မနက်မှာတော့ စစ်ကောင်စီတပ်ဖွဲ့တွေဟာ လူအင်အားထပ်မံဖြည့်တင်းနေတယ်လို့လည်း သိရပါတယ်။

အဆိုပါပစ်ခတ်မှုကို Myaung Special Drone Force၊ ချင်းတွင်းတပ်ပေါင်းစု၊ CHU – PDF နဲ့ မိတ္ထီလာခရိုင် တပ်ရင်း (၃) တို့က ပူးပေါင်းတိုက်ခိုက်ခဲ့ကြပါတယ်။ ဇွန် ၉ ရက်ကလည်း MSPDF တပ်ဖွဲ့ဟာ ပရိမ္မရွာကနေထွက်လာတဲ့ စစ်ကောင်စီစစ်ကြောင်းကို လက်နက်ကြီး လက်နက်ငယ်တွေနဲ့ ခြုံခိုတိုက်ခိုက်ခဲ့ကြပါသေးတယ်။

စာတည်း − လင်းဇေ

စစ်ကိုင်း၊ ဇွန် ၁၂၊ ၂၀၂၃။

စစ်ကိုင်းတိုင်း၊ မုံရွာမြို့၊ မုံရွာ-အမြင့်လမ်းမှာရှိတဲ့ လဝက(မှတ်ပုံတင်)ရုံးဟောင်းက စစ်ကောင်စီတပ်သားတွေကို ဇွန်လ ၁၂ ရက် ဒီမနက် ၁၀ နာရီလောက်မှာ တိုက်ခိုက်ခဲ့လို့ စစ်သား ၂ ဦးသေဆုံးခဲ့တယ်လို့ မုံရွာမြို့ ပြောက်ကျားတပ်ပေါင်းစု ခေါင်းဆောင်ဆီက သိရပါတယ်။

လွန်ခဲ့တဲ့ ၆ လလောက်ကတည်း အင်အား ၆ ဦးလောက်နဲ့ကင်းစခန်းချထားတဲ့ စစ်သားတွေကို ဒီမနက် ၁၀ နာရီ လောက်မှာ ဒဿ Monywa PDF ခေါင်းဆောင် ဗိုလ်ဒဿသေဆုံးခဲ့မှုအတွက် လက်တုံ့ပြန်တိုက်ခိုက်ခဲ့တာလို့ UG တပ်ပေါင်းစုခေါင်ဆောင် ဗိုလ်တိုက်ဂါးကပြောပါတယ်။

“တပည့်ဖြစ်တဲ့ ဗိုလ်ဒဿကျဆုံးတာကို ဒီနေ့လက်တုံ့ပြန်ခဲ့တာပါ။ လဝကရုံးဟောင်းထဲကနေ စစ်သား ၂ ယောက်ထွက်လာတာကို လက်ဦးမှုယူပြီး ပစ်ခတ်ခဲ့တယ်။ နေရာမှာပဲ ၂ ယောက်စလုံး ပွဲချင်းပြီးသေတယ်။ ရုံးထဲကနေပြီးတော့လည်း ပြန်လည်ပစ်ခတ်တာတွေရှိပေမယ့် ကျနော့်ရဲဘော်တွေအန္တရာယ်ကင်းပါတယ်” လို့ သူက ပြောပါတယ်။

ရဲဘော် ၃ ဦးကို ကင်းထောက်ရှေ့ကလွှတ်ကာ လိုက်ပါလာတဲ့ ရဲဘော် ၅ ဦးက လက်နက်ငယ် ၃ လက်နဲ့ တိုက်ခိုက်ခဲ့တာဖြစ်ပြီး သေဆုံးတဲ့စစ်သား ၂ ဦးကို စစ်ကောင်စီဘက်က မုံရွာမြို့ထဲကို ကားနဲ့သယ်သွားခဲ့တယ်လို့ လည်း ဗိုလ်တိုက်ဂါကဆက်ပြောပါတယ်။

ဒဿ MonYwa PDF ကို တည်ထောင်သူ ဗိုလ်ဒဿဟာ ဇွန်လ ၃ ရက်၊ မုံရွာမြို့နယ်နဂါးတွင်းရွာအတွင်းမှာ စစ်တပ်က ပစ်သတ်လို့ ကျဆုံးခဲ့တာဖြစ်ပါတယ်။

တိုက်ခိုက်မှုအပြီး နေ့လယ်ပိုင်းမှာ စစ်တပ်က မုံရွာမြို့နယ် လဝကရုံးဟောင်းအနီးက ညောင်ပင်သာရွာကို စစ်ကြောင်းထိုးကာ နေအိမ် ၄ လုံးကိုမီးရှို့ခဲ့တယ်လို့ သိရပါတယ်။

မုံရွာမြို့ကို စစ်ကောင်စီက ဖေဖေါ်ဝါရီလ ၂ ရက်က စစ်အုပ်ချုပ်ရေးကြေညာထားတာဖြစ်ပြီး လုံခြုံရေးတင်း ကြပ်ထားသလို ဒေသခံကာကွယ်ရေးတပ်ကလည်း မြို့ပေါ်တိုက်ခိုက်မှုတွေ မကြာခဏဆိုသလိုပြုလုပ်နေတာ လည်းဖြစ်ပါတယ်။

ပြီးခဲ့တဲ့ဇွန်လ ၂ ရက် ည ၉ နာရီခွဲလောက်ကလည်း စစ်သားအင်အား ၂၀၀ လောက် တပ်စွဲထားတဲ့မုံရွာစီးပွားရေးတက္ကသိုလ်ထဲကို ဒေသခံကာကွယ်ရေးတပ်ဖွဲ့ Snipe Rangers Force (LPDF)အဖွဲ့က လက်နက်ကြီးနဲ့ပစ်ခတ်ခဲ့ပါသေးတယ်။

စာတည်း – လင်းဇေ

မကွေး၊ ဇွန် ၁၂၊ ၂၀၂၃။

မကွေးတိုင်း၊ ထီးလင်းမြို့နယ်၊ ကျင်းကျေးရွာကို လုံခြုံရေးယူပေးနေတဲ့ PDF တွေနေထိုင်ရာ အဆောက်အဦးတခု၊ ကင်းဂိတ်တခုနဲ့ ဒေသခံတွေရဲ့ ဆိုင်ကယ် ၆ စီးကို ဇွန်လ ၁၀ ရက် မနက် ၁၀ နာရီလောက်မှာ မီးရှို့ဖျက်ဆီးခံလိုက်ရတယ်လို့ PDF တာဝန်ရှိသူက ပြောပါတယ်။

ကျေးရွာကို လုံခြုံရေးယူချိန် PDF တွေနေထိုင်ကြတဲ့ ရွာအရှေ့ပိုင်းက ဘော်ဒါဆောင်(အဟောင်း)တခု၊ ကားလမ်းမဘေးမှာ ပြုလုပ်ထားတဲ့ လုံခြုံရေးဂိတ်တခုနဲ့ ဒေသခံနေအိမ်အတွင်းရှိ ဆိုင်ကယ် ၆ စီးတို့ကို အင်အား ၁၀၀ ကျော်ပါတဲ့ စစ်သားနဲ့ပျူပူပေါင်းအဖွဲ့က မီးရှို့ဖျက်ဆီးခဲ့တာလို့ ထီးလင်းမြို့နယ် ပြည်သူ့ကာကွယ်ရေးအဖွဲ့မှ တာဝန်ခံ ဆရာကျော်က ပြောပါတယ်။

“စကစနဲ့ပျူတွေက ရွာကိုဖောကား ၃ စီးအပြည့်နဲ့ ဝင်လာတာ။ ရွာထဲကိုမဝင်မီ ကားလမ်းမထက်ကနေ လက်နက်ကြီး၊ လက်နက်ငယ်တွေ တရစပ်ပစ်ခတ်ခဲ့တယ်။ လူတွေက အချိန်မီရှောင်လိုက်နိုင်လို့ ထိခိုက်မှု မရှိခဲ့ဘူး။ အိမ်တွေကိုတော့ မီးမရှို့ခဲ့ကြဘူး။ PDF တွေ လုံခြုံရေးယူထားတဲ့ နေရာတွေကို ရွေးပြီးတော့မီးရှို့ ဖျက်ဆီးသွားကြတာ။ စကစတွေ ရွာကအထွက်မှာ လမ်းမှာတွေ့တဲ့အမျိုးသားနှစ်ယောက်ကိုလည်း လမ်းပြခေါ်သွားတယ်”လို့ ဆိုပါတယ်။

အခုလို မီးရှို့ဖျက်ဆီးပြီးနောက် နေ့လယ် ၃ နာရီကျော်မှာတော့ အဲ့ဒီစစ်သားတွေဟာ ကျေးရွာထဲကနေ ကားလမ်းမအတိုင်း ပေါက်မြို့နယ်ဘက်ကိုထွက်ခွာသွားကာ လမ်းခုလတ်တနေရာအရောက်မှာတော့ လမ်းပြအဖြစ်ဖမ်းခေါ်ခဲ့တဲ့ ကျင်းရွာသားနဲ့ ကျောက်ထုရွာသားတို့ ၂ ဦးကို ပြန်လွတ်ပေးခဲ့တယ်လို့ ဆရာကျော်က ပြောပါတယ်။

စစ်ကြောင်းဝင်လာချိန် ကျင်းကျေးရွာက ထွက်ပြေးခဲ့ရတဲ့ ဒေသခံပြည်သူတွေအနေနဲ့ ကျေးရွာထဲကို ဇွန်လ ၁၂ ရက် ဒီနေ့အထိ ဝင်ရောက်မနေထိုင်ရဲကြဘဲ ဘေးလွတ်ရာနေရာတွေမှာ ခိုလှုံနေကြဆဲဖြစ်တယ်လို့ သိရပါတယ်။

ကျင်းကျေးရွာကို ဝင်ရောက်လာခဲ့တဲ့ စစ်အုပ်စုဟာ ပေါက်မြို့နယ်ရှိ အမှတ် ၂၄ ကာကွယ်ရေးပစ္စည်းစက်ရုံ (ကပစ ၂၄)က ဖြစ်ပြီး ဒီကနေ့အထိ ထီးလင်းမြို့နယ်ထဲမှာ စစ်ကြောင်းထိုးနေကြဆဲ ဖြစ်တယ်လို့ ဒေသခံကာကွယ်ရေးအဖွဲ့တွေက ပြောပါတယ်။

ပြီးခဲ့တဲ့ ဇွန်လ ၆ ရက်နေ့လယ် ၃ နာရီကျော်မှာလည်း ကျင်းရွာအုပ်စု၊ ဆင်ထိုးကျေးရွာကို စစ်ကောင်စီတပ်က တိုက်ပွဲမဖြစ်ဘဲ Mi-35 တစီးနဲ့ ရွာအနီးပတ်ဝန်းကျင်ကို နာရီဝက်အကြာ ဗုံးကြဲတိုက်ခိုက်ခဲ့တာကြောင့် လူနေအိမ် ၂ လုံးပျက်စီးသွားခဲ့တယ်လို့ သိရပါတယ်။

စာတည်း – လင်း

မကွေး၊ ဇွန် ၁၁၊ ၂၀၂၃။

မကွေးတိုင်း၊ စလင်းမြို့နယ်၊ သရက်တောစခန်းသိမ်းတိုက်ပွဲမှာ သေဆုံးခဲ့တဲ့ မကွေးခရိုင် အမှတ်-၁ တပ်ရင်း PDF Magway District မှ ရဲဘော် ၃ ဦးအတွက် သေဆုံးခြင်း ၁ လပြည့်အထိမ်းအမှတ်ကို ဇွန်လ ၁၀ ရက်မနေ့က ပြုလုပ်ခဲ့တယ်လို့ သိရပါတယ်။

မကွေးနယ်အတွင်းမှာ ညနေ ၅ နာရီလောက်က ပြုလုပ်ခဲ့တာဖြစ်ပြီး လွမ်းသူပန်းခွေချကာ အလေးပြုခဲ့ကြတယ်လို့ မကွေးခရိုင် အမှတ် – ၁ တပ်ရင်း PDF Magway District မှ တပ်ရင်းမှူး ဗိုလ်သိုက်ထွန်းက ပြောပါတယ်။

“တလပြည့်မှာ တပ်ရင်းရုံးက အရာရှိတွေအလုပ်နားပြီးတော့ ဂုဏ်ပြုတဲ့အနေနဲ့ လွမ်းသူပန်းခွေ‌တွေ ချခဲ့တယ်၊ ကျနော်တို့မရောက်ခင်မှာပဲ ဒေသခံလူထုကနေ သူတို့ဟာသူတို့အစီအစဉ်နဲ့ လုပ်သွားခဲ့တာလည်း ရှိတယ်၊ ကျနော်တို့က ညနေပိုင်းမှာ လုပ်ဖြစ်ခဲ့တာ” လို့ ပြောပါတယ်။

သေဆုံးရဲဘော် ကီပါ ၂၇ နှစ်၊ ရဲဘော် ရာဇာ ၁၇ နှစ် နဲ့ ရဲဘော် ခွန်းသာ ၁၉ နှစ်တို့အတွက် ဒီအခမ်းအနားကိုပြုလုပ်ခဲ့တာဖြစ်ပြီး ရဲဘော်တွေရဲ့ မိသားစုဝင်တွေကတော့ မလာရောက်နိုင်ခဲ့ဘူးလို့ ဆိုပါတယ်။

“ရဲဘော်မိသားစုဝင်တွေ တက်ရောက်နိုင်ခြင်းမရှိဘူး၊ မိုးရာသီဖြစ်လို့ ချောင်းတွေကျနေတာကြောင့် တခြားအဖွဲ့အစည်းတွေမခေါ်ပဲ လုပ်လိုက်တာ” လို့ ဗိုလ်သိုက်ထွန်းက ဆက်ပြောပါတယ်။

အဆိုပါရဲဘော် ၃ ဦးဟာ အခုနှစ် မေလ ၁၀ ရက်မှာ စလင်းမြို့နယ်က စစ်ကောင်စီတပ်စွဲထားတဲ့ သရက်တောစခန်းကိုသိမ်းဖို့ တိုက်ခိုက်နေချိန်အတွင်း အပြန်အလှန်ပစ်ခတ်မှုဖြစ်ပြီး သေဆုံးခဲ့ကြတာလည်း ဖြစ်ပါတယ်။

တော်လှန်ရေးကာလ ၂ နှစ်တာအတွင်းမှာ မကွေးခရိုင် အမှတ်-၁ တပ်ရင်း PDF Magway District က ရဲဘော် ၃ ဦး သေဆုံးခဲ့တယ်လို့ သိရပါတယ်။

စာတည်း – လင်း