AA

မြေလတ်အသံ၊ စက်တင်ဘာ ၁၊ ၂၀၂၅။

ပဲခူးတိုင်း၊ ဥသျှစ်ပင်မြို့နယ်ရှိ အမှတ် ၆ ကာကွယ်ရေးပစ္စည်းထုတ်စက်ရုံ ကပစ ၆ အနီးက ဆင်လန်ကျေးရွာရှိ စစ်ကော်မရှင်တပ်ရဲ့ကာကင်းစခန်းကို အာရက္ခတပ်တော် – AA နဲ့ ပူးပေါင်းအဖွဲ့တွေက ထိုးစစ်ဆင်တိုက်ခိုက်ခဲ့တယ်လို့ မြေပြင်အခြေအနေကိုသိရှိတဲ့ ဒေသခံတွေဆီက သိရပါတယ်။

ဆင်လန်ကျေးရွာစခန်းကို သြဂုတ် ၃၁ ရက် မနေ့ကမနက်ပိုင်းကနေ ညနေ ၅ နာရီအထိ ထိုးစစ်ဆင်တိုက်ခိုက်ခဲ့တာဖြစ်ပြီး တိုက်ပွဲအတွင်း စစ်ကော်မရှင်တပ်ဘက်က လေကြောင်းပစ်ကူတွေပါ အသုံးပြုခဲ့တယ်လို့ ဆိုပါတယ်။

“AA ကရှေ့ကို တဖြည်းဖြည်းတိုးနေတယ်လို့သိရတယ်။ မနေ့ကတိုက်ပွဲမှာတော့ လေယာဉ်ပျံသံတွေ ကြားရတယ်။ ဗုံးကြဲချသံတွေကိုလည်း ကြားရတယ်။ လက်နက်ကြီး၊ လက်နက်ငယ်ပစ်ခတ်သံတွေကိုတော့ တောက်လျှောက်ကြားခဲ့ရတယ်။ ဒီနေ့ကတော့ ဘာအသံမှကိုမကြားရတော့ဘူး။ ငြိမ်နေတယ်”လို့ မြေပြင်အခြေအနေကိုသိရှိသူ ဥသျှစ်ပင်ဒေသခံအမျိုးသားတဦးက ပြောပါတယ်။

တိုက်ပွဲဖြစ်ပွားနေချိန်အတွင်း လူနာတင်ယာဥ် ၁ စီးနဲ့ ဥသျှစ်ပင်မြို့ပေါ်ကနေ နေ့လယ် ၁ နာရီမှာ ၁ ကြိမ်၊ ညနေ ၃ နာရီမှာ ၁ ကြိမ်၊ ညနေ ၆ နာရီမှာ ၂ ကြိမ် စုစုပေါင်း ၄ ကြိမ်အထိ ရွှေတောင်မြို့ရှိ ကုတင် ၁၀၀ ဆေးရုံကို ဒဏ်ရာရတဲ့ စစ်ကော်မရှင်တပ်သားတွေကိုပို့ဆောင်ခဲ့ရတယ်လို့ နောက်ထပ် မျက်မြင် ဥသျှစ်ပင်မြို့ခံ အမျိုးသားတဦးကပြောပါတယ်။

တိုက်ပွဲအတွင်း ၂ ဖက်ထိခိုက်သေဆုံးမှုအခြေအနေတွေကိုတော့ မြေလတ်အသံက သီးခြားအတည် မပြုနိုင်သေးပါဘူး။

ဆင်လန်ကျေးရွာဟာ ညောင်ကျိုးနဲ့ ညောင်ခြေထောက်ကျေးရွာ ၂ ရွာကြားမှာတည်ရှိပြီး ညောင်ကျိုးကျေးရွာနဲ့ ၄ မိုင်ခန့်၊ ကပစ ၆ တည်ရှိတဲ့ ညောင်ခြေထောက်ကျေးရွာနဲ့ ၇ မိုင်ခန့်ကွာဝေးပါတယ်။

ညောင်ကျိုးကျေးရွာရှိစခန်းဗျူဟာစခန်းကုန်းကို အာရက္ခတပ်တော် – AA က ပြီးခဲ့တဲ့ ဧပြီ ၅ ရက်မှာ အပြီးသတ်သိမ်းပိုက်ရရှိခဲ့ပြီးနောက် စစ်ကော်မရှင်တပ်က အဲဒီစခန်းနဲ့ ၄ မိုင်ခန့်ဝေးတဲ့ ဆင်လန်ကျေးရွာမှာ ကာကင်းစခန်းကို အခိုင်အမာတည်ဆောက်ခဲ့တာလို့သိရပါတယ်။

ပဲခူးတိုင်းအနောက်ခြမ်း၊ ရခိုင်ပြည်နယ်အစပ်၊ ပန်းတောင်း-တောင်ကုတ်လမ်းပိုင်း၊ ရခိုင်ရိုးပေါ်ရှိ ညောင်ကျိုးစခန်းအပါအဝင် မိုးထိစခန်း၊ တောင်ပုံကြီးစခန်း၊ ပန်းကန်ကွဲစခန်းတို့ကို အာရက္ခတပ်တော် – AAက သိမ်းပိုက်ထားပါတယ်။

စာတည်း – လင်း

ပန်းတောင်း၊ မတ် ၁၄၊ ၂၀၂၅။

ပဲခူးတိုင်း၊ ပန်းတောင်းမြို့နယ်၊ ရခိုင်ရိုးမပေါ်ရှိ စစ်ကောင်စီတပ်ရဲ့ ညောင်ကျိုး ပင်မစခန်းကုန်းကို အာရက္ခတပ်တော် AA နဲ့ ပူးပေါင်းတပ်တွေက သိမ်းပိုက်ရရှိထားပြီလို့ AA နဲ့နီးစပ်သူတွေနဲ့ ဒေသခံစစ်ရေးသတင်းရင်းမြစ်တွေဆီက သိရပါတယ်။

ညောင်ကျိုးကျေးရွာရှိ ပင်မစခန်းကုန်းကို AA နဲ့ပူးပေါင်းတပ်ဖွဲ့တွေက ဖေဖော်ဝါရီ ဒုတိယပတ်က စတင်ထိုးစစ်ဆင်တိုက်ခိုက်ခဲ့ပြီး မတ် ၁၁ ရက်မှာ သိမ်းပိုက်ရရှိခဲ့ကာ အဲ့ဒီပင်မစခန်းကုန်းက စစ်ကောင်စီတပ်သားတွေ စခန်းကိုစွန့်ခွာဆုတ်ပြေးပြီး လက်ရှိမှာ ကပစ ၆ အခြေစိုက်တဲ့ ညောင်ခြေထောက်ကျေးရွာအုပ်စု၊ ဆင်လန်ကျေးရွာမှာ ခံစစ်ပြင်ဆင်ထားတယ်လို့ ဆိုပါတယ်။

“၁၁ ရက်နေ့က ညောင်ကျိုးစခန်းကို သိမ်းပိုက်ရရှိတယ်လို့ သတင်းရတယ်။ တချို့ကလည်း ဝိုင်းဝန်းပိတ်ဆို့ပြီးမှ ညောင်ကျိုးကိုသိမ်းလိုက်တာမျိုးမဟုတ်ဘဲနဲ့ ပိတ်ပြီးတော့ အောက်ကနေဝိုက်လိုက်လို့ စခန်းကလုံးလုံးပိတ်သွားလို့ စခတွေပြေးသွားတယ်လို့ပြောတယ်။”လို့ ဒေသခံတော်လှန်ရေးတပ်ဖွဲ့ဝင်တဦးက ပြောပါတယ်။

စစ်ကောင်စီတပ်ဘက်က ဒဏ်ရာရထွက်ပြေးသူတွေရှိပြီး စစ်ကောင်စီတပ်ရဲ့ရာထူးကြီးပိုင်း ၁ ဦးလည်း မျက်နှာမှာထိမှန်ဒဏ်ရာရထားတယ်လို့ ကြားသိရကာ ညောင်ကျိုးရွာပင်မစခန်းကုန်း သိမ်းပိုက်ခံရတဲ့ညပိုင်းက ဥသျှစ်ပင်မြို့ပေါ်မှာ စက်တပ်လေထီးတွေ တညလုံးဝဲပျံနေတယ်လို့ အထက်ပါတော်လှန်ရေးတပ်ဖွဲ့ဝင်တဦးက ပြောပါတယ်။

အလားတူ အာရက္ခတပ်တော် AA နဲ့နီးစပ်သူ တော်လှန်ရေးရဲဘော်တဦးကလည်း ညောင်ကျိုးစခန်းကို သိမ်းပိုက်ရရှိတာ မှန်ကန်ကြောင်း တိကျတဲ့အချက်အလက်တွေကိုတော့ မသိရှိရသေးကြောင်း ဆိုပါတယ်။

ညောင်ကျိုးပင်မစခန်းကုန်းကို သိမ်းပိုက်ရရှိထားတာနဲ့ပတ်သက်ပြီး အာရက္ခတပ်တော် AA က သတင်းထုတ်ပြန်ထားတာ မရှိသေးသလို AAရဲ့ပြောရေးဆိုခွင့်ရှိသူ ခိုင်သုခကို မြေလတ်အသံက ဆက်သွယ်မေးမြန်းခဲ့ပေမယ့် တစုံတရာပြောဆိုတာမရှိပါဘူး။

စစ်ကောင်စီတပ်ရဲ့ညောင်ကျိုးကျေးရွာ ပင်မစခန်းကုန်းမှာ ရခိုင်ရိုးမပေါ်ရှိ ပန်းတောင်း-တောင်ကုတ်ကားလမ်းမပေါ်မှာတည်ရှိပြီး ညောင်ခြေထောက်ကျေးရွာအခြေစိုက် ကပစ ၆ နဲ့ ၁၀ မိုင်ခန့် ကွာဝေးပါတယ်။

ပဲခူးတိုင်းနဲ့ ရခိုင်ပြည်နယ်အစပ်၊ ပန်းတောင်း-တောင်ကုတ်ကားလမ်းမရှိ ရခိုင်ရိုးမပေါ်က စစ်ကောင်စီတပ်စခန်းတွေဖြစ်တဲ့ မိုးထိတောင်၊ ပန်းကန်ကွဲ၊ တောင်ပုံကြီး၊ နတ်တောင်ကုန်းတို့ကို အာရက္ခတပ်တော် (AA) နဲ့ တော်လှန်ရေးပူးပေါင်းတပ်တွေက တိုက်ခိုက်သိမ်းပိုက်ထားပါတယ်။

စာတည်း – ကိုချမ်း

မြေလတ်အသံ၊ ဇန်နဝါရီ ၂၈၊ ၂၀၂၅။

အမ်း နပခ အပါအဝင် ရခိုင်ပြည်နယ်တပြည်နယ်လုံးနီးပါးသိမ်းပိုက်ထားနိုင်တဲ့ အာရက္ခတပ်တော် AA ဟာ ပဲခူးတိုင်း၊ မကွေးတိုင်းနဲ့ ဧရာဝတီတိုင်း အစပ်တွေအထိ ထိုးစစ်ဆင်နေပြီး စစ်ကောင်စီနဲ့တိုက်ပွဲတွေရှိနေတယ်လို့ ထုတ်ပြန်လာပါတယ်။

ရခိုင်ရိုးမ တောင်တန်းတလျှောက်က စစ်ကောင်စီတပ်စခန်းတွေကို ထိုးစစ်ဆင်ရှင်းလင်းရင်း ပဲခူးတိုင်းနဲ့ ရခိုင်ပြည်နယ်အစပ်က နယ်မြေတွေမှာ တိုက်ပွဲတွေနေ့စဉ်ဖြစ်နေတယ်လို့ ဖော်ပြထားပါတယ်။

ရခိုင်ပြည်နယ်နဲ့ ပဲခူးတိုင်းနယ်စပ် တောင်ကုတ်မြို့နယ်အတွင်းက စစ်ကောင်စီတပ်စခန်းတခုဖြစ်တဲ့ မိုးထိတောင်စခန်းကို အခုနှစ် ဇန်နဝါရီ ၂၁ ရက်မှာ စတင်တိုက်ခိုက်ခဲ့ပြီး ၅ ရက်အကြာ တိုက်ပွဲပြင်းထန်ခဲ့ကာ ဇန်နဝါရီ ၂၆ ရက် မနက် ၆ နာရီခွဲမှာ အပြီးသတ်နိုင်ခဲ့တယ်လို့ ထုတ်ပြန်ချက်မှာပါဝင်ပါတယ်။

အလားတူ ရခိုင်ပြည်နယ်နဲ့ မကွေးတိုင်းအစပ်က ငဖဲမြို့နယ်၊ ဂုတ်စီးကျေးရွာအနီး အမ်း-ပဒါန်း ကားလမ်းပေါ်မှာ ဇန်နဝါရီ ၂၇ ရက် မနေ့က စစ်ကောင်စီရဲ့ တပ်မ ၉၉ လက်အောက်ခံ ခမရ ၄၁၉၊ ၁၄ တပ်ရင်း ပူးပေါင်းစစ်ကြောင်းနဲ့ အာရက္ခတပ် AA တို့ နာရီဝက်နီးပါးတိုက်ပွဲဖြစ်ခဲ့ကြတယ်လို့ ဆိုပါတယ်။

အဲ့ဒီတိုက်ပွဲမှာ စစ်ကောင်စီတပ်ဖွဲ့ဝင်တွေ ဂုတ်စီးကျေးရွာဘက်ကို တပ်ဆုတ်ထွက်ပြေးသွားခဲ့ပြီး AA တပ်ဖွဲ့ဝင်တွေ နောက်ကလိုက်ပြီးတိုက်ခိုက်ရှင်းလင်းချိန်မှာ စစ်ကောင်စီတပ်ဖွဲ့ဝင်အလောင်းနဲ့ လက်နက်ခဲယမ်းအချို့ကို ရရှိခဲ့တယ်လို့ ရေးသားထားပါတယ်။

မကွေးတိုင်းအတွင်းက တော်လှန်ရေးတပ်ဖွဲ့တွေကလည်း ရခိုင်ပြည်နယ်အတွင်းက ထွက်ပြေးလာတဲ့ စစ်ကောင်စီတပ်ဖွဲ့ဝင်တွေကို ငဖဲမြို့နယ်အတွင်းမှာ ပိတ်ဆို့ဖမ်းဆီးရရှိထားတာတွေရှိနေပါတယ်။