ပဲခူး၊ ဇူလိုင် ၁၂၊ ၂၀၂၄။

ပဲခူးတိုင်းအနောက်ခြမ်း၊ ပေါက်ခေါင်းမြို့နယ်၊ ကြို့ပင်ဝိုင်းအုပ်စု အုပ်ချုပ်ရေးမှူး ၂ ဦး အသတ်ခံရပြီးနောက် ထပ်မံတာဝန်ယူခဲ့သူ အုပ်ချုပ်ရေးမှူးကို ဇူလိုင် ၁၀ ရက် မနက်ပိုင်းမှာ သေနတ်နဲ့ပစ်သတ်ခဲ့တယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ ၃၆၀၁ PPDF တပ်ရင်းဆီက သိရပါတယ်။

ဇူလိုင် ၁၀ ရက် မနက် ၉ နာရီခွဲလောက်မှာ ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ PPDf တပ်ရင်း၊ တပ်ခွဲ ၁ နဲ့ တပ်ရင်း ၄ ရဲဘော်တွေက အုပ်ချုပ်ရေးမှူး အသက် ၅၀ အရွယ် ဦးဝင်နိုင်ကို သူနေထိုင်တဲ့ ရွှေကူရွာအနီးမှာ ပစ်ခတ်ခဲ့တာလို့ ဆိုပါတယ်။

“သူ(ကိုဝင်းနိုင်)တို့အဖွဲ့က (အပေါင်းအသင်း) ၆ ဦးရှိတယ်။ ခု ၃ ဦးသေပြီ။ သူတို့အားလုံးက သတင်းပေး ဒလန်တွေ လုပ်နေတာ။ ခုလည်း (သူတို့က)အုပ်ကြီးတဦးသေရင် တဦးတက်ပြီးလုပ်နေတာ။ ခုသေတဲ့ ဝင်းနိုင်ကလည်း ဘယ်သူ့ဂရုစိုက်ရမလဲဆိုပြီး အုပ်ချုပ်ရေးမှူးလုပ်လာလို့ ရှင်းခဲ့တာ။” လို့ ပေါင်းတည်မြို့နယ် ပြည်သူ့ ကာကွယ်ရေးတပ်ဖွဲ့ ၃၆၀၁ PPDF တပ်ရင်း ပြန်ကြားရေး တာဝန်ခံက ပြောပါတယ်။

ပြီးခဲ့တဲ့ မေ ၃၁ ရက်နဲ့ ဇွန် ၁၃ ရက်ကလည်း လက်ရှိ ဦးဝင်းနိုင်တာဝန်ယူထားတဲ့နေရာမှာ လုပ်ဆောင်ခဲ့တဲ့ အုပ်ချုပ်ရေးမှူး ကိုညွန့်စိန်နဲ့ ကိုပွားသီးတို့ကို ပြည်ခရိုင်ပြည်သူ့ကာကွယ်ရေးတပ်ဖွဲ့ ဝင်တွေကပဲ ပစ်ခတ်ရှင်းလင်းခဲ့ပါသေးတယ်။

ကျေးရွာအုပ်စုအုပ်ချုပ်ရေးမှူး ၃ ဦး ရက်ခြားပြီး အသတ်ခံရတာကြောင့် ဇူလိုင် ၁၁ ရက် ဒီမနက်မှာတော့ ပေါက်ခေါင်းမြို့နယ်၊ ငါးဘတ်ကုန်း၊ ချင်းလည်ရွာတွေဘက်မှာ စစ်အုပ်စုဝင်တွေက ခရီးသွား ပြည်သူတွေကို စစ်ဆေးမှုတွေ ပြုလုပ်ခဲ့တယ်လို့ သိရပါတယ်။

ပြီးခဲ့တဲ့ ဇွန် ၁၅ ရက်ကလည်း ပေါက်ခေါင်းမြို့နယ်၊ တောင်လယ်ရွာက စစ်ကောင်စီသတင်းပေးလို့ သတင်းထွက်နေသူ ကိုဗိုလ်ဝင်းကိုလည်း သူရဲ့နေအိမ်မှာ သေနတ်နဲ့ ပစ်သတ်ခံခဲ့ရပါသေးတယ်။

စာတည်း – လင်း

စစ်ကိုင်း၊ မေ ၂၉၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ မြို့နယ်သစ်တောဦးစီးဌာနမှ ဦးစီးအရာရှိဖြစ်သူကို မေလ ၂၈ ရက် မနက် ၁၀ နာရီလောက်မှာ ဦးခေါင်းပြတ်သေဆုံးနေတာကို တွေ့ခဲ့ရတယ်လို့ ဒေသခံတွေက ပြောပါတယ်။

သေဆုံးသူမှာ ဦးစီးအရာရှိ ဦးမျိုးသန့်ဇင်ထွန်း ၄၂ နှစ်ဖြစ်ပြီး၊ သူ့ရဲ့ရုပ်အလောင်းကို ဒေသခံတွေက ချီပါကျေးရွာအနီး မြစ်ကမ်းစပ်မှာ တွေ့ရှိခဲ့တာလို့ ရွှေဘိုမြို့ခံအမျိုးသားတဦးက မြေလတ်အသံကို ပြောပါတယ်။

“အလောင်းက ဖူးရောင်ပြီးတော့ အနံ့တွေထွက်လို့၊ ဒေသခံတွေက မူးမြစ်ဘေးမှာတွေ့ခဲ့တာ။ အလောင်းမှာ နောက်ပြန်ကကြိုးချည်ထားတယ်။ ဦးခေါင်းကတော့ မပါတော့ဘူး။ အဲ့အလောင်းကို တွေ့ချင်းမှာဘဲ စကစတွေနဲ့ နာရေးကားတွေရောက်လာပြီး ရေထဲကဆယ်ယူပြီးတော့ ကားနဲ့ဆေးရုံကို တင်သွားကြတယ်။ ကျနော်တို့ နောက်မှသိရတာကတော့ သစ်တောဌာနက တောအုပ်ကြီးတဲ့” လို့ ဆိုပါတယ်။

ဦးစီးအရာရှိ ဦးမျိုးသန့်ဇင်ထွန်း အသတ်ခံရတာနဲ့ပတ်သက်လို့ ရွှေဘိုမြို့ပေါ်က UG အဖွဲ့တချို့နဲ့ ရွှေဘိုမြို့နယ် LPDF အဖွဲ့တချို့ကို မြေလတ်အသံက ဆက်သွယ်မေးမြန်းခဲ့ရာ အဆိုပါကိစ္စကို သူတို့ (UG/PDF) အနေနဲ့ လုပ်တာမဟုတ်ကြောင်း ပြောဆိုခဲ့ပါတယ်။

“ကျနော်တို့လည်း တောအုပ်ကြီးအသတ်ခံရတာကို ကြားရတယ်ဗျ။ သူ့ကို ကျနော်တို့ သတ်တာမဟုတ်သလို ဘယ်အဖွဲ့ကသတ်သွားတယ် ဆိုတာကိုလည်း မသိဘူးဗျ”လို့ ရွှေဘိုဒေါင်းမာန်အဖွဲ့နဲ့ Shwebo Local PDFမှ တာဝန်ရှိသူတွေက ပြောပါတယ်။

စစ်ကောင်စီဝါဒဖြန့် ချန်နယ်တွေမှာတော့ ဦးမျိုးသန့်ဇင်ထွန်းမှာ မေလ ၂၇ ရက်ည ၅ နာရီကျော်က တူမဖြစ်သူကို ရွှေဘို-ရေဦးကားလမ်းမြို့ဘေးရှိ ငါးသားဖောက်စခန်းမှာ နေထိုင်တဲ့ အစ်မဖြစ်သူဆီလာပို့ချိန် သူ့ယောက်ဖဖြစ်သူ ငါးဦးစီးမှူးကို ဖမ်းဆီးဖို့ရောက်နေတဲ့ ချီပါကျေးရွာ PDF အဖွဲ့က အဆိုပါငါးဦးစီးမှူးကို မတွေ့တာကြောင့် ဦးမျိုးသန့်ဇင်ထွန်းကို ဖမ်းခေါ်သွားပြီး သတ်ခဲ့တာဖြစ်တယ်လို့ ဖော်ပြထားပါတယ်။

ဦးမျိုးသန့်ဇင်ထွန်းကို ဘယ်အဖွဲ့အစည်းက သတ်ခဲ့တယ်ဆိုတာကို သီးခြားအတည်မပြုနိုင်သေးသလို ဒီဖြစ်စဥ်နဲ့ ပက်သက်ပြီး ချီပါကျေးရွာ PDF ကို မေးမြန်နိုင်ဖို့ကိုလည်း မြေလတ်အသံက ကြိုးစားနေပါတယ်။

စာတည်း – လင်း

စစ်ကိုင်း၊ မေ ၂၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ရွာမကျေးရွာကို စစ်ကောင်စီတပ်သားတွေက ဧပြီလ ၃၀ ရက် မနက် ၈ နာရီလောက်မှာ ပစ်ခတ်ဝင်ရာက်စီးနင်းခဲ့ပြီး ကျေးရွာ ပကဖ ရဲဘော်တဦးကိုလည်း သတ်ခဲ့တယ်လို့ သိရပါတယ်။

စစ်သားအင်အား ၈၀ ကျော်လောက်က ရွာထဲကို ပစ်ခတ်ဝင်ရောက်လာချိန် အသက် ၂၇ နှစ်အရွယ် ရဲဘော်ကိုထုရှည်မှာ ဖမ်းဆီးခံခဲ့ရပြီး၊ အဲ့ဒီနောက်မှ အသတ်ခံခဲ့ရတာလည်း ဖြစ်ပါတယ်။

“ကျနော့် တပည့်တယောက်ကတော့ အဖမ်းခံရပြီး ရက်ရက်စက်စက် သတ်ဖြတ်သွားတဲ့ ရုပ်အလောင်းကို ရွာသုဿန်မှာ တွေ့ရတယ်။ လက်နက်စတွေ မှန်သွားတဲ့ နောက်ထပ် တပည့် ၂ ယောက်ကိုတော့ ဆေးကုသပေးထားတယ်” လို့ ဆိုပါတယ်။

မေလ ၁ ရက်နေ့ မနက် ၈ နာရီလောက်မှာမှ လက်နှစ်ဖက်ကိုကြိုးတုပ် နှိပ်စက်ပြီး၊ ပစ်သတ်ခံထားရတဲ့ ကိုထုရှည်ရဲ့ ရုပ်အလောင်းကို ကျေးရွာသုဿန်အနီးမှာ တွေ့ရှိခဲ့တာလို့ ရွာမရွာရဲ့ ကျေးရွာကာကွယ်ရေးအဖွဲ့ ခေါင်းဆောင်က ပြောပါတယ်။

ဒါ့အပြင် ရွာမကျေးရွာက ဒေသခံ ၁၀၀ လောက်ကိုလည်း စစ်ကြောင်းဝင်တဲ့နေ့မှာတင် ဖမ်းဆီးခဲ့ပြီး ကျေးရွာဘုန်းကြီးကျောင်းမှာ စစ်ဆေးမေးမြန်းတာတွေ လုပ်ခဲ့ပါတယ်။

အဲ့ဒီနောက် မေလ ၁ ရက်နေ့ စစ်ကြောင်းပြန်ထွက်ချိန်မှာတော့ ဓါးစာခံအဖြစ် ရွာသားအချို့ကို ဖမ်းဆီးသွားပြီး ရွာမရွာနဲ့ ၄ မိုင်ကျော်ဝေးတဲ့ ရထောင်ရွာကို ခေါ်သွားခဲ့တယ်လို့ အထက်ပါ တာဝန်ရှိသူက ဆက်ပြောပါတယ်။

“ရွာခံ ၁၀၀ ကျော်လောက်ကို ဖမ်းစစ်ပြီးတော့ ရွာကအထွက်မှာ ၁၅ ယောက်ကို ခေါ်သွားတယ်။ အဲ့အထဲက ၁၁ ယောက်ကို ပြန်လွှတ်တယ်။ ၄ ယောက်ကို ဆက်ခေါ်သွားတယ်။ ဒီနေ့ (မေ ၂) မှာတော့ ၄ ယောက်ထဲက ၃ ယောက် ပြန်လွတ်လာပြီး ၁ ယောက်ကတော့ ပြန်မလွတ်လာဘူး” လို့ ဆိုပါတယ်။

အဲ့ဒီစစ်ကြောင်းဟာ ဧပြီလ ၂၉ ရက်ကလည်း မောင်းထောင်၊ မြိုင်လယ်၊ သဖန်းသာ၊ တအိမ်တဲ စတဲ့ ကျေးရွာတွေကို ဝင်ရောက်မွှေနှောက်ခဲ့ပါတယ်။

အလားတူ မတ်လ ၁ ရက်ကလည်း စစ်ကိုင်းမြို့နယ်၊ တအိမ်တဲရွာက လူနေအိမ် ၈ လုံးကို စစ်အုပ်စုက မီးရှို့ကာ အမည်မသိရသေးတဲ့ အမျိုးသားတဦးလည်း ခေါင်းဖြတ်သတ်ခံခဲ့ရသေးတယ်လို့ သိရပါတယ်။

စာတည်း – လင်း

ကောလင်း၊ ဧပြီ ၂၉၊ ၂၀၂၃။

စစ်ကိုင်းတိုင်း၊ ကောလင်းမြို့နယ်၊ သဲကောရွာမှာ ကောလင်းခရိုင် တပ်ရင်း ၁ တပ်ရင်းမှူး ဒူဂျွန်ခလန်ဇော်ဆိုင်း (၃၁ နှစ်)နဲ့ ဘော်ဒီဂတ်ရဲဘော် နှစ်ဦးဟာ ဧပြီလ ၂၆ ရက် ညနေပိုင်းမှာ စစ်ကောင်စီစစ်ကြောင်းနဲ့ ထိပ်တိုက်တိုးပြီး ဖမ်းဆီးသတ်ဖြတ်ခံခဲ့ရတာလို့ ဆိုပါတယ်။

စစ်ကောင်စီရဲ့ ဖမ်းဆီးသတ်ဖြတ်ခြင်းခံရတဲ့ တပ်ရင်းမှူး ဒူဂျွန်ခလန်ဇော်ဆိုင်းဟာ အမျိုးသားညီညွတ်ရေးအစိုးရ သယံဇာတနဲ့ ပတ်ဝန်းကျင်ထိန်းသိမ်းရေးဝန်ကြီး ဒေါက်တာတူးခေါင် ဇနီးရဲ့ တူဖြစ်တယ်လို့ သူတို့နဲ့ နီးစပ်တဲ့အသိုင်းအဝန်းက ဆိုပါတယ်။

ဒေါက်တာတူးခေါင်အနေနဲ့လည်း သူရဲ့လှုမှုကွန်ရက်ပေ့ချ်မှာ “ငါ့တူ စစ်ကိုင်းမှာ အသက်ပေးသွားတယ်။ လေးလေးနက်နက် အလေးပြုပါတယ်” လို့ ရေးသားထားပါတယ်။

တပ်ရင်းမှူး ဒူဂျွန်ခလန်ဇော်ဆိုင်းနဲ့ ရဲဘော်နှစ်ဦး ဖမ်းဆီးသတ်ဖြတ်ခံခဲ့ရပြီးနောက်ရက် ဧပြီလ ၂၇ ရက် မနက် ၃ နာရီဝန်းကျင်မှာ သဲကောရွာနဲ့ တရွာအကျော်က ဘုမ္မရာဇာကုန်းပေါ် မှာ မြို့နယ် ပအဖ၊ ပကဖ နဲ့ ပလဖ အသီးသီးက ရဲဘော် ၇ ဦး ထပ်မံသတ်ဖြတ်ခံခဲ့ရပါသေးတယ်။

“ရင်းမှူးက ဘော်ဒီဂတ်ကလေးနဲ့ စစ်ကြောင်းသွားထောက်တာ။ စစ်မရောက်သေးဘူး ထင်ပြီး သဲကောရွာကို ဖြတ်တာ။ စစ်တွေက ရွာထဲမှာ အရင်ရောက်နှင့်နေပြီး အဖမ်းခံလိုက်ရတာ။ နယ်မြေမကျွမ်းတာလည်း ပါမှာပေါ့။ ရင်းမှူးက ပြောင်းလာတာ မကြာသေးဘူး။ သူတို့ နှစ်ယောက်ကိုက ရွာထဲမှာ ကြိုးတုတ်ပြီး ရက်ရက်စက်စက် မီးရှို့သတ်သွားတယ်။ ရဲဘော်တွေက ရင်းမှူးအဖမ်းခံလိုက်ရတယ်ကြားလို့ စစ်ကူလာဖြည့်ရင်း မိပြီး ပစ်သတ်ခံရတာ” လို့ ဒေသခံတဦးက ပြောပါတယ်။

သေဆုံးရဲဘော်တွေရဲ့ အလောင်းတွေကိုတော့ ဧပြီ ၂၇ ရက်ကပဲ ကောက်ယူကာ သဂြိုလ်ပြီးသွားပြီလို့လည်း သိရပါတယ်။

စစ်ကောင်စီရဲ့ ခလရ ၃၆၉ စစ်ကြောင်းဟာ ဧပြီလ ၂၃ ရက်ကတည်းက ဝန်းသိုဘက်ကနေ ကောလင်းမြို့နယ်ထဲ ဝင်လာတာဖြစ်ပြီး သဲကော၊ တုံးတင်တပ်၊ နှောကုန်း၊ ကုက္ကိုကုန်းရွာတို့ကိုလည်း မီးရှို့ဖျက်ဆီးသွားပြီး အခုလက်ရှိ ဇီးကုန်းရွာဘက်မှာ ရောက်နေတယ်လို့ သိရပါတယ်။

အဲဒီ့ ခလရ ၃၆၉ စစ်ကြောင်းထိုးနေလို့ ကျောက်ပြင်သာ၊ အင်ပင်လှ၊ မင်းကုန်း၊ သဲချောင်း၊ ချောင်းကွေ့၊ အလယ်ကုန်း၊ တုံးတင်တပ်၊ နှောကုန်း၊ သဲကော၊ ဝါးရုံခုံ၊ ပွဲခံ၊ ကပ်ဖလူး၊ ဇီးကုန်း၊ အင်ပင်သာ၊ စစ်တော၊ လက်ပံရှို၊ ကသစ်ကုန်း စတဲ့ရွာတွေ ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – 007

ကြို့ပင်ကောက်၊ ဧပြီ ၂၆၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ ကြို့ပင်ကောက်မြို့နယ်က စစ်ကောင်စီသတင်းပေးတဦးကို ဧပြီလ ၂၅ ရက် မနေ့ ညနေပိုင်းက သေနတ်နဲ့ပစ်ခတ်ရှင်းလင်းခဲ့တယ်လို့ Black Dragon ,GBKPDF က သတင်းထုတ်ပြန်ပါတယ်။

အသတ်ခံရသူဟာ ကြို့ပင်ကောက်မြို့နယ်၊ ဘော်ပင်ဆည်အမှတ် ၁၊ ရုံးချောင်းအုပ်စု၊ ဆည်တော်ဦးရွာက အသက် ၅၀ အရွယ် ကိုမောင်မျိုးဖြစ်ပြီး၊ သူရဲ့နေအိမ်မှာ သေနတ်နဲ့ပစ်ခတ် ရှင်းလင်းခဲ့ကာ သက်သေခံဖုန်းကို သိမ်းဆည်းခဲ့တယ်လို့ ဆိုပါတယ်။

“သေနတ်နဲ့ခေါင်းကို ၁ ချက်၊ ဗိုက်ကို ၂ ချက်၊ တင်ပါးကို ၁ ချက်ပစ်လို့ ပွဲချင်းပြီးသေသွားပါတယ်။ ပစ်ခတ်နေတဲ့အချိန် အိမ်ထဲမှာ သူ့ဇနီးနဲ့မြေးတဦးလည်းရှိနေတယ်။ သူတို့ကိုအန္တရာယ်မပြုခဲ့ဘူး”လို့ Black Dragon အဖွဲ့တာဝန်ခံက မြေလတ်အသံကို ပြောပါတယ်။

ကိုမောင်မျိုးဟာ ပျူစောထီးခေါင်းဆောင်တဦးဖြစ်တဲ့အပြင် သိမ်းဆည်းခဲ့တဲ့သူ့ရဲ့ဖုန်းကို စစ်ဆေးရာမှာ ဖုန်း Call Recoder မှတ်တမ်းမှာလည်း ကျေးရွာအုပ်ချုပ်ချုပ်ရေးမှူးက PDFသတင်းမေးမြန်းမှုကို “တောင်ပေါ်မှာ အခြေအနေမကောင်းကြောင်း၊ သတိဝိရီယနဲ့ နေထိုင်နေရပြီး ထူးခြားသတင်းရှိပါက ပေးပို့သွားမှာဖြစ်တယ်” လို့ ပြောဆိုထားတာတွေကို တွေ့ရှိခဲ့ရတယ်လို့ ဆိုပါတယ်။

စစ်ကောင်စီတပ်ကို သတင်းပေးလုပ်မယ့်သူတွေနဲ့ လုပ်နေတဲ့သူတွေကို သတိပေးအဆင့် ပြီးဆုံးသွားပြီ ဖြစ်တဲ့အတွက် ကိုယ့်အသိနဲ့ကိုယ် နုတ်ထွက်ကြဖို့နဲ့ Black dragon က လုံးဝနယ်မြေရှင်းလင်းရေး လုပ်သွားမှာ ဖြစ်တယ်လို့ဆိုပါတယ်။

အဲဒီတိုက်ခိုက်မှုကို တပ်ရင်းအမှတ် ၃၈၀၁ တပ်ခွဲ ၃ နတ်စစ်သည်လက်အောက်ခံ BLA K Dragon (GBK PDF)နဲ့ Black Wolf – UG ပြောက်ကျားတပ်ဖွဲ့တို့က ရှင်းလင်းခဲ့တာလို့ သိရပါတယ်။

ဧပြီလ ၂၁ ရက်ညနေကလည်း ကြို့ပင်ကောက်မြို့နယ်၊ ပဲခူးရိုးမတောင်ခြေမှာရှိတဲ့ တောင်နှစ်လုံးပေါက်ရွာက စစ်တပ်သတင်းပေးဆိုသူ ကိုတင်ကြိုင်ကို သာယာဝတီခရိုင် တပ်ရင်း ၃၈၀၁ တပ်ခွဲ ၃ လက်အောက်ခံ Black Dragon, GBK PDFက ရှင်းလင်းခဲ့ပါသေးတယ်။

စာတည်း- ရင်ငြိမ်း

ကြို့ပင်ကောက်၊ ဧပြီ ၂၂၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့နယ်၊ ပဲခူးရိုးမတောင်ခြေမှာရှိတဲ့ တောင်နှစ်လုံးပေါက်ရွာက စစ်တပ်သတင်းပေးဆိုသူကို ဧပြီ လ ၂၁ ရက် မနေ့ ည ၆ နာရီခွဲခန့်မှာ ပစ်ခတ်ရှင်းလင်းခဲ့တယ်လို့ သာယာဝတီခရိုင် တပ်ရင်း ၃၈၀၁ တပ်ခွဲ ၃ လက်အောက်ခံ Black Dragon, GBK PDFက ထုတ်ပြန်ပါတယ်။

သေဆုံးသွားသူဟာ တောင်နှစ်လုံးပေါက်ရွာ ပျူစောထီးအဖွဲ့ဝင်ဆိုသူ အသက် ၅၀ နှစ်အရွယ် ကိုတင်ကြိုင်ဖြစ်ပြီး သူ့ရဲ့နေအိမ်ရှေ့မှာ သေနတ်နဲ့ပစ်ကာ ဓါးနဲ့ထိုးခဲ့တာလို့ Black Dragon, GBK PDFရဲ့တပ်ခွဲမှူး ရိုးမနဂါးက မြေလတ်အသံကို ပြောပါတယ်။

“သေနတ်နဲ့ရင်ဘတ်ကို ၂ ချက် ပစ်တယ်။ လဲကျသွားမှ ဓါးမြှောင်နဲ့ တချက် ထပ်ထိုးခဲ့တာ ပွဲချင်းပြီးသွားတယ်” လို့ ပြောပါတယ်။

ကိုတင်ကြိုင်ဟာ စစ်ကောင်စီတပ်က ချပေးတဲ့ လက်နက်ကိုင်ဆောင်သူဖြစ်ကြောင်းသတင်းရလို့ သူရဲ့နေအိမ်ကို ဝင်ရောက်ရှာဖွေပေမယ့် မတွေ့ခဲ့ဘူးလို့ ဆက်ပြောပါတယ်။

ကိုတင်ကြိုင် သေဆုံးမှုကို မိသားစုဝင်တွေက ရဲတပ်ဖွဲ့ကို ဆက်သွယ်အကြောင်းကြားပေမယ့် အခုအချိန် အထိလာရောက်စစ်ဆေးတာတွေ မလုပ်သေးဘူးလို့လည်း ဒေသခံတွေဆီက သိရပါတယ်။

ကိုတင်ကြိုင်ဟာ စစ်ကောင်စီနဲ့ပေါင်းပြီး သစ်တွေခိုးထုတ်တာ၊ တောင်ပေါ်တက်တဲ့ အလုပ်သမားတွေအပေါ် အနိုင်ကျင့်တာတွေလည်း ရှိပြီး PDF တွေရဲ့သတင်းကို ထောက်လှမ်းကာ စစ်တပ်ကို သတင်းပို့ယူ လုပ်နေတဲ့ ပျူစောထီး ဖြစ်တယ်လို့ ဆိုပါတယ်။

ပြီးခဲ့တဲ့ မတ်လ ၁၃ ရက်ကလည်း ကြို့ပင်ကောက်မြို့နယ်၊ ရုံးချောင်းအုပ်ချုပ်ရေးမှူး ကိုအေးထွန်းနဲ့အဖွဲ့ကို PDF မဟာမိတ်တွေ ပေါင်းပြီး ရှင်းလင်းခဲ့လို့ ကိုအေးထွန်းအပါ ၂ ဦးသေဆုံးပြီး ဒဏ်ရာရရှိသူတွေ ရှိခဲ့ပါသေးတယ်။

စာတည်း – ရင်ငြိမ်း

မန္တလေး၊ ဧပြီ ၂၊ ၂၀၂၃။

မန္တလေးတိုင်း၊ မတ္တရာမြို့နယ်၊ ကြားရွာထိပ်မှာ အမျိုးသား ၁ ဦး အသတ်ခံရပြီး လည်ပင်းမှာ “အစွန်းရောက်တို့ သွားရာလမ်း” စာသားပါ လည်ဆွဲကိုလည်း ချိတ်ဆွဲခံထားရတယ်လို့ သိရပါတယ်။

ဧပြီလ ၁ ရက်မနေ့ကမနက် ၅ နာရီလောက်က ကြားရွာထိပ်လမ်းဘေးမှာ လက်ပြန်ကြိုးတုပ်ပြီး ဦးခေါင်းကို သေနတ်နဲ့ပစ်သတ်ခံထားရတဲ့ အသက် ၃၀ နှစ်အရွယ် အမျိုးသားတဦးကို တွေ့ခဲ့ရတာလို့ ဒေသခံတဦးကပြောပါတယ်။

“ဖမ်းဆီးသတ်ဖြတ်ခံရတဲ့ သဘောရှိတယ်။ ပြီးတော့ အလောင်းပေါ်မှာ လည်ဆွဲတခုဆွဲထားပေးတာ တွေ့ရတယ်။ လူသတ်ပြီး လည်ဆွဲ ဆွဲပေးတတ်တာက ပျူတွေနဲ့ သွေးသောက်အဖွဲ့တွေရဲ့ လုပ်ရပ်ပဲ။ အလောင်းတွေ့တယ်ဆိုပြီး စကစ ဘက်က အလောင်းလာကောက်သွားကြတာတော့ သိရတယ်”လို့ ပြောပါတယ်။

ဒီလုပ်ရပ်ကို စစ်ကောင်စီလက်အောက်ခံ ပျူစောထီးတွေနဲ့ စစ်တပ်ထောက်ခံတဲ့ လက်နက်ကိုင်အဖွဲ့အစည်းတွေက လုပ်တာဖြစ်နိုင်တယ်လို့လည်း ဒေသခံတွေက ခန့်မှန်းပြောဆိုနေကြပါတယ်။

အသတ်ခံရသူဟာ ကြားရွာက ဒေသခံမဟုတ်သလို သူနဲ့ပက်သက်တဲ့အသေးစိတ်အချက်အလက်နဲ့ ဘယ်အဖွဲ့အစည်းက ခုလိုဖမ်းဆီးသတ်ဖြတ်ခဲ့လဲ ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

မတ်လ ၂၂ ရက်မနက် ၁၁ နာရီခန့်မှာလည်း မတ္တရာမြို့နယ်၊ တံတားဖြူကျေးရွာနဲ့ ကျောက်တံတားကျေးရွာတွေမှာ အမျိုးသား ၃ ဦးပစ်သတ်ခံထားရပြီး အလောင်းတွေပေါ်မှာ “သွေးသောက်အဖွဲ့၊ အနီရောင်စစ်ဆင်ရေး မတ္တရာ” စာသားပါ တံဆိပ်ဝိုင်းတွေကိုလည်း တွေ့ရှိခဲ့ပါသေးတယ်။

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ မင်းကင်းမြို့နယ်ထဲက ချင်းတွင်းမြစ်ကြောင်းမှာရှိတဲ့ တရားမဝင် ရွှေမျှောဖောင်တွေကို စစ်ကောင်စီဘက်က မီးရှို့ဖျက်ဆီးပြီး အလုပ်သမား ၇ ဦးကိုလည်း သတ်သွားခဲ့တယ်လို့ သိရပါတယ်။

မတ်လ ၉ ရက်နေ့က ကဗျစ်၊ ဖရုံကာ၊ ရှမ်းတော့ စတဲ့ကျေးရွာတွေနားမှာရှိတဲ့ ရွှေမျှောဖောင်တွေနဲ့ လူနေတဲတွေကို မီးရှို့ခဲ့ပြီး ရွှေမျှောဖောင် ၅၃ ဖောင်နဲ့ ဆက်စပ်ပစ္စည်းတွေ ဖျက်ဆီးခံလိုက်ရကာ သိန်းထောင်ချီ မီးထဲပါသွားခဲ့တယ်လို့ ဆိုပါတယ်။

“ရွှေတွေနဲ့ တန်ဖိုးကြီးပစ္စည်းတွေတော့ စစ်ကောင်စီဘက်က ယူသွားတယ်။ ပြီးတော့ မျှောထဲမှာ ကျန်ခဲ့တဲ့ အလုပ်သမား ၅ ယောက် ရွာသား ၂ ယောက် အသတ်ခံရတယ်။ ပစ်သတ်ပြီး သဲသောင်ပြင်မှာ မြှုပ်ခဲ့တာ။ ခုပြန်ဖော်ပြီး ဘယ်သူတွေဆိုတာ စစ်ဆေးနေကြတယ်” လို့ မင်းကင်းမြို့နယ် ပကဖတာဝန်ခံက ပြောပါတယ်။

စစ်ကောင်စီတပ်ရဲ့ သတ်ဖြတ်ခြင်းခံထားရတဲ့ ပြည်သူ ၇ ဦးမှာ ၂ ဦးကတော့ ကဗျစ်ရွာသားတွေဖြစ်တယ်လို့ သိထားရပြီး ရွှေမျှောလုပ်ကွက်မှာ နယ်ပေါင်းစုံကလူတွေ လာရောက်လုပ်ကိုင်တဲ့အတွက် ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့ ဆိုပါတယ်။

စစ်ကောင်စီဘက်က ချန်နယ်တွေမှာတော့ ရွှေမျှောလုပ်ကွက်တွေမှာ PDF တွေဝင်ရောက်လုပ်ကိုင်တာတွေရှိတဲ့အတွက် ခုလိုဖျက်ဆီးတာဖြစ်တယ်လို့ ထုတ်ပြန်ထားပေမယ့် ကာကွယ်ရေးအဖွဲ့တွေကတော့ သူတို့နဲ့ဆက်နွယ်မှုမရှိဘဲ တပ်ရင်းတပ်ဖွဲ့ ထိန်းချုပ်နယ်မြေထဲမှာရှိလို့ ခုလို ဖျက်ဆီးခံရတာဖြစ်တယ်လို့ ဆိုပါတယ်။

စစ်ကောင်စီဝါဒဖြန့် တယ်လီဂရမ်တွေမှာတော့ ရွှေမျှောဖောင်တွေနဲ့ ဆက်စပ်ပစ္စည်းတွေကာလတန်ဖိုး ၁၁,၀၅၃,၄၄၀,၀၀၀ ကျပ် (သိန်းပေါင်း တစ်သိန်းတစ်သောင်းကျော်) သိမ်းဆည်းရမိခဲ့တယ်လို့ ဖော်ပြထားပါတယ်။

အဆိုပါ စစ်ကောင်စီစစ်ကြောင်းဟာ အင်အား ၁၀၀ ဝန်းကျင်နဲ့ ဖေဖော်ဝါရီလကတည်းက မင်းကင်းမြို့နယ်ထဲကို စစ်ကြောင်းထိုးနေတာဖြစ်ပြီး မတ်လ ၂၄ ရက်ကမှ မင်းကင်းကနေ ကလေးမြို့ ဒကစထဲကို ပြန်ဆုတ်ခွာသွားတာ ဖြစ်တယ်လို့ သိရပါတယ်။

မတ်လ ၁၄ ရက်နေ့ကလည်း ရွှေမျှောတွေကို ဖျက်ဆီးနေလို့ နယ်မြေခံကာကွယ်ရေးတပ်ရင်းတွေနဲ့ မြို့နယ်ပကဖအဖွဲ့ ပူးပေါင်းကာ သွားရောက်တိုက်ခိုက်ခဲ့ပြီး စစ်ကောင်စီဘက်က ၃ ဦးသေဆုံးခဲ့တယ်လို့ သိရပါတယ်။

စာတည်း – ဇို

မတ္တရာ၊ မတ် ၂၃၊ ၂၀၂၃။

မကွေးတိုင်း၊ ပခုက္ကူမြို့နယ်၊ မြစ်ခြေမြို့မှာ စစ်ကောင်စီခန့် အုပ်ချုပ်ရေးမှူးအပါ အမျိုးသား ၂ ဦး မတ်လ၂၁ ရက် ညနေ ၄ နာရီကျော်က သေနတ်နဲ့ပစ်ခတ်ခံရလို့ သေဆုံးသွားတယ်လို့ ဒေသခံတွေဆီက သိရပါတယ်။

ပစ်သတ်ခံရသူတွေဟာ အသက် ၄၆ နှစ်အရွယ် မြစ်ခြေ၊ အမှတ် ၁ ရပ်ကွက် စစ်ကောင်စီခန့်အုပ်ချုပ်ရေးမှူး ပျူစောထီးခေါင်းဆောင် နိုင်လင်းအောင်နဲ့ ကမ္ဘာအေးရပ်ကွက်နေ အသက် ၅၁ နှစ်အရွယ် ဝေဖြိုးအောင်ခရီးသည်တင်ယာဥ်လိုင်းဂိတ်မှူး ဦးယုဟန် တို့ဖြစ်ပြီး၊ သူတို့ ၂ ဦးဟာ နိုင်လင်းအောင်ရဲ့နေအိမ်မှာ ရှိနေချိန် သေနတ်ကိုင်ဆောင်ထားသူ အမျိုးသား ၄ ဦးက ဝင်ရောက်ပစ်ခတ်ခဲ့တာလို့ အမည်မဖော်လိုတဲ့ မြို့ခံအမျိုးသားတဦးက မြေလတ်အသံကို ပြောပါတယ်။

“နိုင်လင်းအောင်က အုပ်ကြီးတာဝန်လည်း ယူထားတယ်။ ပြီးတော့ မြစ်ခြေမြို့ရဲ့ပျူစောထီးခေါင်းဆောင် ဖြစ်တယ်။ သူက ရင်ဘတ်မှာ သေနတ်ဒဏ်ရာ ၃ ချက်ရပြီးတော့ နေအိမ်ထဲမှာတင် ပွဲချင်းပြီး သေတယ်။ ပြီးတော့ သူ့အိမ်ကိုရောက်နေတဲ့ ကားဂိတ်မှူးမှာလည်း ရင်ဘတ်နဲ့လက်မှာ ဒဏ်ရာနဲ့ ပွဲချင်းပြီးသေတယ်” လို့ ပြောပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးတပ်ဖွဲ့တွေဘက်က တစုံတရာသတင်းထုတ်ပြန်တာမျိုး မရှိသေးသလို ဘယ်အဖွဲ့က လုပ်ဆောင်တယ်ဆိုတာ အတည်မပြုနိုင်သေးပါဘူး။

စစ်ကောင်စီအုပ်ချုပ်ရေးမှူးနဲ့ ကားဂိတ်မှူးတို့ ပစ်သတ်ခံရပြီးတဲ့နောက် မတ်လ ၂၂ ရက် မနေ့ကမနက် ၈ နာရီကျော်မှာ အိုင်ရှည်ရပ်ကွက်မှာ လက်ဖက်ရည်ဆိုင်ထိုင်နေတဲ့ ဦးဝင်းမြင့် ၅၂ နှစ်နဲ့ သားဖြစ်သူ ကိုကျော်မိုး ၂၃ နှစ်တို့ကို စစ်ကောင်စီတပ်သားတွေက ဖမ်းဆီးခေါ်ဆောင်သွားတယ်လို့ ဆိုပါတယ်။

“အဲ့ဒီသားဖကို ဖမ်းပြီးတော့ မြစ်ခြေရဲစခန်းကို ဖမ်းခေါ်သွားတယ်။ ဘာဖြစ်လို့ဖမ်းတာလည်းတော့ မသိရဘူး။ အုပ်ကြီးနဲ့ဂိတ်မှူးပစ်ခတ်ခံရတာနဲ့ ပတ်သက်ပြီး ဖမ်းတာလို့ ထင်တယ်” လို့ သူကဆက်ပြောပါတယ်။

မတ်လ ၈ ရက်နေ့ကလည်း ပခုက္ကူ၊ ကျွန်းအိုကျေးရွာ ပျူစောထီးခေါင်းဆောင်ဆိုသူကို တော်လှန်ရေးတပ်ဖွဲ့တွေက ပစ်ခတ်ရှင်းလင်းခဲ့ပြီး ကျည်ဆံ၊ လက်ပစ်ဗုံးတွေ သိမ်းဆည်းရရှိခဲ့တယ်လို့ သိရပါတယ်။

စာတည်း – ရင်ငြိမ်း