အမြန်လမ်း

ကျောက်တံခါး၊ ဧပြီ ၁၁၊ ၂၀၂၃။

ရန်ကုန်-မန္တလေးအမြန်လမ်း၊ ပဲခူးတိုင်း၊ ကျောက်တံခါးမြို့နယ်အတွင်းမှာ လင်မယား ၂ ဦးလိုက်ပါလာတဲ့ကား အရှိန်လွန်ပြီး လမ်းလယ်ကျွန်းကို တိုက်မိတာကြောင့် အမျိုးသမီးဖြစ်သူ သေဆုံးသွားတယ်လို့ သိရပါတယ်။

ဧပြီလ ၁၁ ရက်နေ့ ဒီကနေ့မနက် ၁၁ နာရီ ၁၅ မိနစ်ခန့်မှာ ရန်ကုန်ဘက်ကနေ နေပြည်တော်ဘက်ကို မောင်းနှင်လာတဲ့ wish အိမ်စီးကားဟာ အမြန်လမ်းမိုင်တိုင်အမှတ် (၈၉/၀) နဲ့ (၈၉/၁)ကြားအရောက်မှာ အရှိန်မထိန်းနိုင်ဘဲ လမ်းလယ်ကျွန်းကို ဝင်တိုက်ခဲ့တာလို့ ဒေသခံတဦးက ပြောပါတယ်။

“ကားပေါ်မှာက လင်မယား၂ယောက်ပဲ ပါတယ်။ လမ်းလယ်ကျွန်းတိုက်ပြီး နေရာမှာပဲ အမျိုးသမီးက သေဆုံးသွားတယ်။ ကျနော်တို့သိရသလောက် ခါးပတ်မပတ်တာလည်း ပါမယ်ထင်တယ်။ တိုက်တဲ့အရှိန်ကလည်း များတယ်။ ကားခေါင်းနဲ့တည့်တိုက်တဲ့ ပုံစံပဲ” လို့ ပြောပါတယ်။

ယာဥ်တိုက်မှုကြောင့် ယာဥ်ပေါ်ပါ အသက် ၃၀ နှစ်ခန့်ရှိ အမျိုးသမီးဖြစ်သူမှာ နေရာမှာသေဆုံးပြီး အမျိုးသားမှာ ဒဏ်ရာပြင်းထန်လို့ မြို့ချောင်းတိုက်နယ်ဆေးရုံကို တင်ပို့ထားရတယ်လို့ ဆိုပါတယ်။

ယာဥ်တိုက်မှုဖြစ်ပွားခဲ့တဲ့ကားနဲ့ မောင်းနှင်လာတဲ့ လင်မယားဟာ ရန်ကုန်မြို့၊ တောင်ဥက္ကလာပ၊ ၁၁ ရပ်ကွက်နေသူတွေ ဖြစ်တယ်လို့လည်း သိရပါတယ်။

ဧပြီလ ၁၀ ရက် မနေ့ မနက်ပိုင်းမှာလည်း မန္တလေးဘက်ကနေ နေပြည်တော်ဘက်ကို မောင်းနှင်လာတဲ့ Honda Civic အမျိုးအစား အိမ်စီးကားဟာ အမြန်လမ်းမကြီး၊ မိုင်တိုင်အမှတ်(၃၂၅/၆)နဲ့(၃၂၅/၇)ကြားမှာ လမ်းလယ်ကျွန်း ဝင်တိုက်မိလို့ ကားမီးလောင်ပြီး အမျိုးသား ၃ ဦး သေဆုံးသွားတယ်လို့ သိရပါတယ်။

စာတည်း – ရင်ငြိမ်း

ရေတာရှည်၊ မတ် ၄၊ ၂၀၂၃။

ပဲခူးတိုင်း၊ ရေတာရှည်မြို့နယ်၊ ရန်ကုန်-မန္တလေးအမြန်လမ်းပေါ် ဒို့ညီနောင်ခရီးသည်တင်ကား တိမ်းမှောက်လို့ သေဆုံးခဲ့သူတွေထဲမှာ မြန်မာ့လက်ဝှေ့လောကမှာ နာမည်ကြီးထင်ရှားခဲ့တဲ့ ရွှေခါးပတ်ချန်ပီယံဟောင်း ရွှေဓူဝံ ပါ ပါဝင်ခဲ့တယ်လို့ သိရပါတယ်။

မတ်လ ၄ ရက်နေ့ ဒီကနေ့ မနက် ၅ နာရီခန့်မှာ နေပြည်တော်ဘက်နေ ရန်ကုန်ဘက်ကို မောင်းနှင်လာတဲ့ တောင်ကြီး-မြဝတီ ဒို့ညီနောင်ခရီးသည်တင်ကားဟာ အမြန်လမ်း မိုင်တိုင်အမှတ် ၁၆၇ အနီးမှ အရှိန်မထိန်းနိုင်ဘဲ တိမ်းမှောက်ခဲ့တာမှာ ခရီးသည် ၅ ဦး သေဆုံးပြီး ၂၅ ဦးကျော် ဒဏ်ရာရရှိခဲ့တာလို့ သိရပါတယ်။

“သူပါတာ ဟုတ်တယ်။ သူက သေဆုံးသူတွေ အားလုံးထဲမှာ အဆိုးဆုံးထိခိုက်ပြီး သေဆုံးသွားတာပါ။ လက်ပါ ပြတ်သွားတယ်။ ညှပ်ရိုးနဲ့ဦးခေါင်းတွေလည်း တော်တော်လေးထိခိုက်သွားတယ်။ ခုတော့ သူတို့မိသားစုတွေလည်း ဆေးရုံရောက်နေကြပြီ။ လိုအပ်တာလုပ်ပြီးရင်တော့ သူ့မိသားစုတွေက အလောင်းကို ပြန်သယ်သွားဖို့ လုပ်နေကြတယ်” လို့ ကူညီဆောင်ရွက်ပေးခဲ့တဲ့ လူမှုကူညီရေးအဖွဲ့ဝင်တဦးက မြေလတ်အသံကို ပြောပါတယ်။

ဒါ့အပြင် အဲ့ဒီကားမှောက်သေဆုံးမှုမှာ စစ်ကောင်စီတပ်ဗိုလ်ကြီးအဆင့် အရာရှိတဦးလည်း ပါဝင်တယ်လို့ သူကဆက်ပြောပါတယ်။

“သေသွားတဲ့အထဲမှာ စစ်တပ်ဗိုလ်ကြီးအဆင့် အရာရှိတဦးလည်း ပါတယ်။ အဲ့ဒီဗိုလ်ကြီးကို သယ်တာတွေက စစ်တပ်ဘက်က သူ့ဘာသာ လာလုပ်သွားတော့ နာမည်နဲ့ တပ်ရင်းကိုတော့ မသိလိုက်ဘူး” လို့ ဆိုပါတယ်။

လတ်တလောမှာတော့ ခရီးသည်တင်ကား တိမ်းမှောက်တာကြောင့် သေဆုံး၊ ဒဏ်ရာရသူတွေကို ဆွာမြို့ဆေးရုံမှာ ထားရှိပြီး ဒဏ်ရာပြင်းထန်သူတွေကို နေပြည်တော် ကုတင် ၁၀၀၀ ဆေးရုံကို လွှဲပြောင်းပို့ဆောင်ပေးနေတယ်လို့ သိရပါတယ်။

နိုင်ငံကျော်လက်ဝှေ့သမား ရွှေဓူဝံဟာ ၁၉၉၆ ခုနှစ်၊ ၇၅ ကီလို မစ်ဒယ်ဝိတ်တန်းမှာ ရွှေခါးပတ်ချန်ပီယံ ဖြစ်ခဲ့ဖူးပြီး မြန်မာ့ရိုးရာ လက်ဝှေ့လောကမှာ နာမည်ကြီးကျော်ကြားသူ တဦး ဖြစ်ပါတယ်။

ရေတာရှည်၊ မတ် ၄၊ ၂၀၂၃။

ပဲခူးတိုင်း၊ ရေတာရှည်မြို့နယ်၊ ရန်ကုန်-မန္တလေးအမြန်လမ်းမကြီး မိုင်တိုင်အမှတ် ၁၆၇ အနီးမှာ ခရီးသည်တင်ကား ၁ စီး အရှိန်လွန် တိမ်းမှောက်လို့ ကားပေါ်လိုက်ပါလာတဲ့ခရီးသည် ၅ ဦး သေဆုံးကာ ၂၅ ဦးကျော် ဒဏ်ရာရခဲ့တယ်လို့ သိရပါတယ်။

မတ်လ ၃ ရက် မနေ့ညနေပိုင်းက တောင်ကြီးမြို့ကနေ မြ၀တီမြို့ကို ထွက်ခွာလာတဲ့ ဒို့ညီနောင် ခရီးသည်တင်ယာဉ်ဟာ မတ်လ ၄ ရက်နေ့ ဒီကနေ့ မနက်အစော ၅ နာရီခန့် အမြန်လမ်းမိုင်တိုင် ၁၆၇ အနီးအရောက်မှာ အရှိန်မထိန်းနိုင်ဘဲ တိမ်းမှောက်ခဲ့တာလို့ ဒေသအခြေစိုက် လူမှုကူညီရေးအသင်းဝင် တဦးက မြေလတ်အသံကို ပြောပါတယ်။

“ကားက အရှိန်လွန်ပြီး တိမ်းမှောက်တာ ဖြစ်နိုင်တယ်။ လေအိတ်လည်း ပေါက်နေတယ်။ ကားမှောက်တဲ့အချိန် အပြင်ထွက်ကျပြီး သေဆုံးတာတွေလည်း ရှိတယ်။ ပြီးတော့ ကားထဲညှပ်နေတဲ့သူတွေ အော်နေတဲ့သူတွေ တော်တော်များတယ်” လို့ သူက ပြောပါတယ်။

ကားတိမ်းမှောက်တာကြောင့် ကားပေါ်ပါ ခရီးသည်တွေထဲက ၅ ဦးဟာ နေရာမှာ သေဆုံးပြီး ၂၅ ဦးကျော် ထိခိုက်ဒဏ်ရာရရှိခဲ့ပြီး ထိခိုက်သေဆုံး ဒဏ်ရာရသူတွေကိုတော့ ကူညီကယ်ဆယ်ရေး လုပ်ငန်းတွေ ဆောင်ရွက်ပေးကာ ဆွာမြို့ဆေးရုံကို ပို့ဆောင်ထားတယ်လို့ သိရပါတယ်။

မတ်လ ၁ ရက်နေ့ နေ့လည်ပိုင်းကလည်း ဖြူးမြို့နယ် ရန်ကုန်-မန္တလေးအမြန်လမ်း မိုင်တိုင် ၁၀၇ အနီးမှာ ကလေးငယ် ၁ ဦး အပါအဝင် ၇ ဦး လိုက်ပါလာတဲ့ Suzuki Carry (အဖြူရောင်) အိမ်စီးကား အရှိန်မထိန်းနိုင်ဘဲ တိမ်းမှောက်သွားခဲ့ရာ ၂ ဦး ဒဏ်ရာရခဲ့သေးတယ်လို့ သိရပါတယ်။