သေဆုံး

ကဝ၊ ဧပြီ ၁၁၊ ၂၀၂၃။

ပဲခူးခရိုင်၊ ကဝမြို့နယ်က ရဲတပ်ဖွဲ့ဝင်တဦးကို ပိတောက်ဖူးစစ်ဆင်ရေးအဖြစ် ဧပြီလ ၁၁ ရက် ဒီနေ့မနက်က သေနတ်နဲ့အနီးကပ် ပစ်ခတ်ခဲ့တယ်လို့ ကဝပကဖ ဆီက သိရပါတယ်။

ကဝမြို့နယ်၊ ရှမ်းကန်-သပြုလမ်းက ရှမ်းကန်တာဆုံအလွန်လောက်မှာ ဒီနေ့မနက် ၁၀ နာရီခွဲလောက်က အရပ်ဝတ်နဲ့ရဲ ၂ ဦးဆိုင်ကယ်မောင်းလာတာကို ပစ္စတိုနဲ့ ၇ ချက်ပစ်ခတ်ခဲ့တာ လို့ ဆိုပါတယ်။

“ရဲတွေကရှမ်းကန်ရွာဘက်ကနေ သပြုရွာဘက်ကို မောင်းလာတာပါ။ ရဲဘော်တွေနဲ့မျက်နာချင်းဆိုင်ပေါ့၊ ရဲဘော်တွေမျက်မြင်အရ နောက်ကစီးလာတဲ့ ရဲကျည်ထိပြီး ‌ဆိုင်ကယ်ပေါ်ကနေ မြေကြီးပေါ် လန်ကျသွားတယ်။ ဗိုက်ကို ဖိပြီးအော်နေတယ်။ မြေပြင်သတင်းရင်းမြစ်‌တွေအရ ပွဲချင်းပြီးသေတယ်လို့ သိရတယ်” လို့ ကဝမြို့နယ် ပကဖတပ်ဖွဲ့ဝင်တဦးက ပြောပါတယ်။

ဆိုင်ကယ်မောင်းလာတဲ့ ရဲတပ်ဖွဲ့ဝင်တဦးကတော့ လွတ်မြောက်သွားပြီး တော်လှန်ရေးတပ်ဖွဲ့ဝင်တွေ ထိခိုက်မှုမရှိ အောင်မြင်စွာဆုတ်ခွာနိုင်ခဲ့ကာ သေဆုံးသူရဲ့ အမည်ရာထူးနဲ့အဆင့်ကိုစုံစမ်းနေတယ်လို့ ဆိုပါတယ်။

မတ်လ ၂၆ ရက် ည ၁၀ နာရီလောက်ကလည်း ကဝမြို့နယ်၊ အုန်းနှဲကျေးရွာ ဘီယာဆိုင်မှာထိုင်နေတဲ့ ရဲတပ်ဖွဲ့ဝင်တွေကို ကဝမြို့နယ် ပကဖကတိုက်ခိုက်ခဲ့လို့ ရဲတဦးသေဆုံးခဲ့ပြီး ၄ ဦးဒဏ်ရာရခဲ့ပါသေးတယ်။

စာတည်း-007

ရေစကြို၊ ဧပြီ ၁၁၊ ၂၀၂၃။

မကွေးတိုင်း၊ ရေစကြိုမြို့နယ်၊ စစ်ကောင်စီ ရုံးပေါင်းစုံ အရှေ့ဘက် ရွှေတန်ဆာဈေးထဲမှာ ဈေးကောက်ငွေလာတောင်းတဲ့အချိန်မှာ ဒေသခံကာကွယ်ရေးတပ်ဖွဲ့တွေရဲ့ ပစ်ခတ်တိုက်ခိုက်ခံခဲ့ရတယ်လို့ Southern Yesagyo PDF အဖွဲ့ထံက သိရပါတယ်။

ယမန်နေ့ ဧပြီလ ၁၀ ရက် နံနက် ၇ နာရီခွဲဝန်းကျင်ခန့်က ဈေးကောက်ငွေတောင်းနေတဲ့ စစ်သား ၄ ဦးကို မဟာမိတ်ပူးပေါင်းတပ်ဖွဲ့တွေက တိုက်ခိုက်ခဲ့တာလို့ Southern Yesagyo PDF ဗိုလ်အောင်မောင်းက ပြောပါတယ်။

“ရွှေတန်ဆာ မနက်ခင်းဈေးမှာ ပစ်ခတ်မှုဖြစ်ပွားခဲ့တာ၊ ၄ ယောက်ထဲ ထွက်လာတာ။ ဘယ်တပ်က စစ်သားတွေဆိုတာတော့ မသိဘူး။ ကျနော်တို့က နောက်ကနေ လိုက်ပစ်ရတာကြောင့် ရှင်းရှင်းလင်းလင်း မြင်ရပြီး ၁ ယောက်က အဲ့ဒီနားမှာ လဲကျသွားတယ်။ ၁ ယောက်က ပေါင်ထိမှန်တယ်။ ၁ ယောက်က ခြေသလုံး မှန်တယ်။ ဒါကတော့ ကိုယ့်မျက်စိရှေ့တွင်မြင်တွေ့လိုက်ရတာ” လို့ သူကဆက်ပြောပါတယ်။

အပြန်အလှန်ပစ်ခတ်မှုအပြီး ပြည်သူတွေရဲ့ပြောပြချက်အရ MA 3 လက်နက်ကိုင်တဲ့ တပ်ကြပ်အဆင့် ကျသွားပြီး ပွဲခြင်းပြီးသေဆုံးပြီး အခြား ၂ ဦး ဒဏ်ရာရတယ်လို့ ဆိုပါတယ်။

“ကျနော်တို့က လိုက်ပစ်တယ်။ ဈေးထဲမှာ ပစ်ခတ်ရတာဆိုတော့ ပြည်သူကို ငဲ့ညာလိုက်ရတာနဲ့ လက်နက်မကောက်နိုင်ခဲ့ဘူး။ ပြည်သူ‌တွေရှိနေတာကြောင့် ၄ ယောက်လုံးကို မပစ်လိုက်နိုင်တာ” လို့ ဗိုလ်အောင်မောင်းက ပြောပါတယ်။

ဒီတိုက်ခိုက်မှုကို Southern Yesagyo PDF ၊ Urban Underground Revolution Force (UURF-YSO) နှင့် Myingyan Black Tiger(MBT) တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

တိုက်ခိုက်မှုမှာ တပ်ကြပ်သေဆုံးခဲ့တာဆိုတာကို ကာကွယ်ရေးတပ်ဖွဲ့နဲ့ ဒေသခံ‌တွေက ပြောဆိုပေမယ့် မြေလတ်အသံအနေနဲ့ သီးခြား အတည်မပြုနိုင်ပါဘူး။

ပြီးခဲ့တဲ့ မတ်လ ၂၃ ရက်ညပိုင်းမှာလည်း ရေစကြို့မြို့၊ ထင်းတန်းရပ်ကွက် စာသင်ကျောင်းထဲမှာ အထိုင်ချတပ်စွဲထားတဲ့ စစ်အုပ်စုကို Southern Yesagyo PDF အဖွဲ့က လက်ပစ်ဗုံး ပစ်ပြီးတိုက်ခိုက်ခဲ့ရာ စစ်သား ၁ ဦး သေဆုံးပြီး ၃ ဦး ဒဏ်ရာရခဲ့တယ်လို့ သိရပါတယ်။

စာတည်း – 007

သရက်၊ ဧပြီ ၁၀၊ ၂၀၂၃။

မကွေးတိုင်း၊ သရက်ခရိုင်၊ မင်းတုန်းမြို့နယ်၊ ကျောက်တိုင်ကျေးရွာမှာရှိတဲ့ စစ်ကောင်စီလက်‌အောက် နယ်မြေရဲစခန်းကို ကာကွယ်ရေးအဖွဲ့တွေ ပူးပေါင်းတိုက်ခိုက်ခဲ့ပြီး ရဲ ၂ ဦးသေဆုံးကာ ၄ ဦး ဒဏ်ရာပြင်းထန်ခဲ့တယ်လို့ သိရပါတယ်။

ဧပြီလ ၁၀ ရက် ဒီကနေ့ မနက် ၄ နာရီခွဲလောက်မှာ စခန်းကို အနီးကပ်ဝင်ရောက်တိုက်ခိုက်ခဲ့ရာ အပြန်လှန်ပစ်ခတ်မှုဖြစ်ခဲ့ပြီး လက်နက်၊ ခဲယမ်း မလုံလောက်တာကြောင့် စခန်းသိမ်းနိုင်တဲ့ထိတော့ မရောက်ခဲ့ဘူးလို့ သရက်ခရိုင်တပ်ရင်း-၄ သတင်းနှင့်ပြန်ကြားရေးတာဝန်ရှိသူ တဦးက မြေလတ်အသံကို ပြောပါတယ်။

“ကျနော်တို့ အစီအစဉ်က အခြေအနေပေးရင် တခါထဲဝင်သိမ်းဖို့ပါ။ တိုက်ပွဲက နာရီဝက်လောက် ဖြစ်တယ်။ အပြန်အလှန်ပစ်တာဆိုပေမယ့် ကျနော်တို့ပစ်အားကို မမီဘူးပေါ့။ အဲ့အချိန်မှာ ပြည်သူတွေရဲ့ ကားတချို့က တိုက်ပွဲနားကပ်လာလို့ တိုက်ပွဲအရှိန်အနည်းငယ်လျော့သွားပြီး ကျည်လည်းနည်းလာလို့ ပြန်ဆုတ်ခဲ့တာပါ” လို့ ပြောပါတယ်။

တိုက်ပွဲအတွင်း ကျောက်တိုင်ရွာရဲစခန်းက အသက် ၃၁ နှစ်အရွယ် ရဲတပ်သား ဇင်ဘိုကို သေဆုံးတာကို အတည်ပြုထားနိုင်ပြီး တခြားသေဆုံးရဲတပ်သား ၁ ဦးနဲ့ ဒဏ်ရာရ ရဲ ၄ ဦးရဲ့ အချက်လက်တွေကတော့ စုံစမ်းနေဆဲဖြစ်ကာ ရဲစခန်းအဆောက်အဦး အမိုးတွေလည်းထိခိုက်ပျက်စီးခဲ့တယ်လို့ PDF တာဝန်ရှိသူက ပြောပါတယ်။

တိုက်ခိုက်မှုကို သရက်ခရိုင်တပ်ရင်း-၄ Eagle Force၊ ကျောင်းသားလက်ရုံးတပ်တော် S.A.F၊ လွတ်မြောက်ရေးတပ်တော် W.O.L.F တို့ ပူးပေါင်းလုပ်ဆောင်ခဲ့ကြတာလည်း ဖြစ်ပါတယ်။

ပြီးခဲ့တဲ့ မတ်လ ၁၄ ရက်နေ့ကလည်း ပုသိမ်-မုံရွာ ကားလမ်းမဘေးက ၅ မိုင် စစ်ဆေးရေးဂိတ်နဲ့ မင်းတုန်းမြို့နယ်၊ စပါးတန်းကျေးရွာနားက ဂိတ်စခန်းတွေကို တိုက်ခိုက်ခဲ့ပြီး စစ်ကောင်စီဘက်က ထိခိုက်မှုတွေ ရှိခဲ့ပါသေးတယ်။

စာတည်း – ရင်ငြိမ်း

ရွှေဘို၊ ဧပြီ ၉၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ မြင်းစီးကျေးရွာက ထွက်လာတဲ့ ပျူစောထီးယာဥ်တန်း ဧပြီလ ၈ ရက်မနေ့ကမနက်ပိုင်းမှာ မိုင်းခွဲတိုက်ခိုက်ခံရတာကြောင့် ပျူစောထီး ၃ ဦးသေဆုံးခဲ့တယ်လို့ သိရပါတယ်။

ပျူစောထီးအင်အား ၃၀ ဝန်းကျင်လိုက်ပါလာတဲ့ သုံးဘီဆိုင်ကယ် ၈ စီးပါ ယာဥ်တန်းကို မနေ့ကမနက် ၁၀ နာရီလောက်က မြို့လှရွာအနီးမှာ တိုက်ခိုက်ခဲ့ရာ ၁ စီးကိုသာ မိုင်းထိမှန်ခဲ့တာကြောင့် အဲ့ဒီသုံးဘီးပေါ်မှာ လိုက်ပါလာတဲ့ ပျူစောထီး ၃ ဦး ပွဲချင်းပြီးသေဆုံးခဲ့တာလို့ ဗိုလ်ကျားရိုင်း – ရွှေဘို (LPDF) တာဝန်ခံရဲဘော်ဗလကြီးက ပြောပါတယ်။

“မိုင်းခွဲလိုက်တာ နေရာမှာတင် ၃ ကောင်ပွဲချင်းပြီးသေတယ်၊ သေသွားတဲ့အလောင်း ၃ လောင်းကို သုံးဘီးပေါ်တင်ပြီးမောင်းပြေးတာမှာ အလောင်း ၁ လောင်းနဲ့ သေနတ်တွေ ကျနေခဲ့တယ်” လို့ ပြောပါတယ်။

ကျကျန်ခဲ့တဲ့ ပျူစောထီးအလောင်းနဲ့ လက်နက်ကိုကောက်ယူဖို့ ကာကွယ်ရေးရဲဘော်တွေဘက်က ကြိုးစားပေမယ့် တိုက်ခိုက်တဲ့နေရာနဲ့ ၁ မိုင်သာသာဝေးတဲ့ ဇီးဖြူကုန်းရွာနဲ့ တလုံးရွာဘက်ကနေ စစ်သားတွေ ထွက်လာတယ်လို့ သတင်းရတာကြောင့် အလောင်းကိုမကောက်ပဲ ပြန်ဆုတ်ခွာခဲ့ရတယ်လို့ ရဲဘော်ဗလကြီးကဆက်ပြောပါတယ်။

ဒီတိုက်ခိုက်မှုကို ဗိုလ်ကျားရိုင်း-ရွှေဘို (LPDF)အဖွဲ့ ၊ မင်းဂေါင် – SHWEBO (LDF)အဖွဲ့ ၊ ဗိုလ်ဂျပန်ကြီး (TT.T) – SHWEBO (LPDF)အဖွဲ့၊ တောင်သူကြီးများအဖွဲ့ -LDF၊ ဖား‌ရွှေ‌ကျော် – ဒီပဲယင်း ပြည်သူ့ကာကွယ်ရေးတပ်ဖွဲ့ ၊ DOG KILLER- SHWEBO PEOPLE DEFENCE FORCE ၊ မတစ်ထောင်( တစ်ကောင်ဘွား ) – ဒီပဲယင်းအဖွဲ့နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ပြီးခဲ့တဲ့ ဧပြီလ ၅ ရက်ကလည်း မိုင်းရှင်းဖို့ထွက်လာတဲ့ တည်တီးတောရွာ နဲ့ ဇီးဖြူကုန်းရွာက ပျူစောထီးတွေကို ဗိုလ်ကျားရိုင်း – ရွှေဘို(LPDF) အဖွဲ့က ဂျိုးမြေဇင်း လမ်းပိုင်းတ‌နေရာမှာ မိုင်းဆွဲတိုက်ခိုက်ခဲ့ရာ ပျူစောထီး ၄ ဦး သေဆုံးခဲ့ပါ သေးတယ်။

ကလေး၊ ဧပြီ ၇၊ ၂၀၂၃။

စစ်ကိုင်းတိုင်း၊ ကလေးမြို့နယ်မှာ မတ်လ ၃၀ ရက်ကနေ ဧပြီလ ၅ ရက်အတွင်း တိုက်ပွဲ ၅ ကြိမ်ဖြစ်ခဲ့တာကြောင့် စစ်ကောင်စီတပ်သား ၂၀ ဦးနဲ့ PDF ၁ ဦး သေဆုံးခဲ့တယ်လို့ PDF တာဝန်ရှိသူတွေက ပြောပါတယ်။

မတ်လ ၃၀ ရက်မှာ ချမ်းသာကြီးနဲ့ လက်ပံချောင်းရွာအကြားမှာ တကြိမ်၊ ၃၁ ရက်က ပျဥ်းတောဦးကျေးရွာအနီးမှာ တကြိမ်နဲ့ ဧပြီလ ၂ ရက်က နန်းစောင်းပုကျေးရွာအနီးမှာ တကြိမ်၊ ၃ ရက်မှာ ပျဥ်းတောဦးရွာအနီး တကြိမ်၊ ၅ ရက်မှာတကြိမ် ထိတွေ့တိုက်ခိုက်မှုတွေ ရှိခဲ့တာလို့ ချင်းအမျိုးသားအဖွဲ့ချုပ် CNO – UCR (အထက်ချင်းတွင်းဒေသ)မှ ပြောရေးဆိုခွင့်ရှိသူက ပြောပါတယ်။

“စကစဘက်က အယောက် ၂၀ သေပြီးတော့ ၂၀ ထက်မနည်း ဒဏ်ရာရရှိခဲ့တယ်။ စကစတွေ သေတာကို ဘယ်လို အတည်ပြုနိုင်တာလဲဆိုတော့ ပထမဆုံးတော့ ဖရဲသီးပြောလို့ သိရတယ်။ ဒုတိယကတော့ သေဆုံးတဲ့အလောင်းတွေကို မီးရှို့တဲ့ပြာတွေ့တာ၊ မြှုပ်ထားတဲ့အလောင်းတွေတွေ့တာ၊ ဒီလိုမျိုးနဲ့ အတည်ပြုနိုင်ခဲ့တာပါ။ စကစဘက်ကတော့ ၆ ရက်နေ့မှာ ပြန်ဆုတ်သွားတယ်” လို့ ဆိုပါတယ်။

ပူးပေါင်းတိုက်ခိုက်ခဲ့တဲ့ People Defence Army – PDA မှ အသက် ၂၅ နှစ်အရွယ် ရဲဘော်ခုပ်ရှန်ခွာလ် ကျဆုံးခဲ့ကာ CNDF က ရဲဘော် ၁ ဦး၊ CDF- KKG က ၁ ဦးနဲ့ CDM Siyin က ၁ ဦးတို့မှာ မစိုးရိမ်ရ ဒဏ်ရာတွေ ရရှိခဲ့တယ်လို့လည်း သူကဆက်ပြောပါတယ်။

Chinland Defence Force, Kalay-Kabaw – Gangaw(KKG)မှ ပြန်ကြားရေးတာဝန်ခံကလည်း “တိုက်ပွဲဖြစ်နေချိန်မှာ စကစဘက်က လေယာဥ်နဲ့ပစ်ကူတာပေါ့နော်။ အဲအချိန်မှာ ကျနော်တို့က ပြန်ဆုတ်ရတယ်။ အဲဒီမှာ ပျဥ်းတောဦးရွာနားမှာ သေနေတဲ့ စကစအလောင်း ၇ လောင်းကို တွေ့ခဲ့ရတယ်” လို့ ဆိုပါတယ်။

ဒီတိုက်ခိုက်မှုကို CNDF၊ TCDF၊ HNB၊ CR၊ PDF-Kalay၊ PDA၊ PDF-Zoland၊ Cangelzawl – ပကဖ၊ RKDF ၊ CDF-KKG၊ ပျဉ်းတောဦး-ပကဖ နဲ့ CDM Siyin တို့က ပူးပေါင်းတိုက်ခိုက်ခဲ့တာလည်း ဖြစ်ပါတယ်။

ဒါ့အပြင် တိုက်ပွဲကနေ နမခတပ် ဘက်တံဆိပ်ပါ စစ်ယူနီဖောင်းတချို့ကိုလည်း သိမ်းဆည်းနိုင်ခဲ့တယ်လို့ သိရပါတယ်။

ဒီတိုက်ပွဲကြောင့် ကလေးမြို့မြောက်ပိုင်းရှိ ပြည်တော်သာ၊ နန်းချောင်း၊ သာယာကုန်း၊ စမိတ်ကွင်း၊ အင်ကြင်းခုံ၊ ကြိုးကြာကွင်း၊ လက်ပံချောင်း၊ မြောက်ချောတော၊ ချင်းစု၊ ပျဉ်းတောဦး၊ ညောင်ကုန်း၊ မင်းလှ၊ အောင်ရွာ၊ ကိမ်းလိုင်၊ ရှုခင်းသာ၊ ချမ်းသားကြီး၊ ရာဇဂြိုလ်ကျေးရွာ စတဲ့ကျေးရွာတွေက ဒေသခံ ငါးသောင်းကျော်လည်း ထွက်ပြေးတိမ်းရှောင်နေကြရပါတယ်။

စာတည်း – လင်း