မြေလတ်အသံ၊ မေ ၇၊ ၂၀၂၅။

မြန်မာနိုင်ငံတဝန်းရှိအကျဉ်းထောင်တွေမှာ ထောင်တွင်းဆေးဝါးလုံလောက်စွာမရရှိတာကြောင့် ၄ လအတွင်း နိုင်ငံရေးအကျဉ်းသား ၉ ဦးသေဆုံးခဲ့တယ်လို့ မြန်မာနိုင်ငံလုံးနိုင်ဆိုင်ရာနိုင်ငံရေး အကျဉ်းသားများကွန်ရက် (PPNM) ဆီက သိရပါတယ်။

အဆိုပါအရေအတွက်မှာ ၂၀၂၅ ဇန်နဝါရီ ၁၀ ရက်ကနေ ဧပြီ ၂၆ ရက်အထိ PPNM ကပြုစုထားတဲ့ အချက်အလက်မှတ်တမ်းဖြစ်ပြီး ဒိုက်ဦးထောင်မှ ၂ ဦး၊ ကသာထောင်မှ ၁ ဦး၊ သာယာဝတီထောင်မှ ၁ ဦး၊ အိုးဘိုထောင်မှ ၄ ဦးနဲ့ မြောင်းမြထောင်မှ ၁ ဦးတို့ဖြစ်ပါတယ်။

ထောင်တွင်းကိုပေးလိုက်တဲ့ဆေးဝါးတွေကို ထောင်အာဏာပိုင်တွေက နိုင်ကျဥ်းတွေဆီမပို့ဘဲ ဖြတ်ယူထားတာတွေရှိသလို ထောင်းတွင်းမှာ ရောဂါတခုခုဖြစ်ရင် ပါရာစီတမော့၊ ဘာမီတွန်နဲ့ အက်ပရာဇော စတဲ့ ဆေး ၃မျိုးကိုသာ ပေးသောက်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက် – PPNM ရဲ့ ရုံးတာဝန်ခံ မလင်းကပြောပါတယ်။

“ရောဂါဖြစ်လို့ရှိရင် ဒီဆေးတွေပဲပေးနေလို့မရဘူးလေ။ ဖျားတယ်၊ကိုက်ခဲတယ်၊ ဗိုက် အောင့်တယ်ဆိုတာကအစ ဒီပါရာတွေ၊ ဘာမီတွန်တွေပဲ ပေးတာဆိုတော့ ဆေးဝါးမလုံလောက်ဘူး။ ပေးတဲ့ဆေးဝါးတွေဆိုလို့ရှိရင်လည်း ဒီတိုင်းဘူးတွေမှာထည့်ထားတာမျိုးမဟုတ်ဘဲနဲ့ အဖုံးတွေ ဘာတွေမပါပဲနဲ့ ဒီတိုင်းထားပြီးမှပေးတာ။ သူတို့ဘာသာ ဆေးဝါးဘယ်နှစ်မျိုးရှိတယ်ပဲပြောပြော တာရှည်ခံဖို့အတွက်တော့ မဖြစ်ဘူးပေါ့နော်။”လို့ သူမကဆိုပါတယ်။

သေဆုံးသူအမျိုးသားတွေဟာ ဆီးကျောက်ရောဂါ၊ နှလုံးဖောက်တာ၊ အစာအိမ်ရောင်ရောဂါ၊ သွေးတိုး၊ ဆီးချို၊ နှလုံး၊ အသည်းရောဂါ၊ အနာကြီးရောဂါ၊ လည်ချောင်းကင်ဆာ၊ ဦးနှောက်သွေးကြောပြတ်ရောဂါ၊ အတက်ရောဂါတို့နဲ့ သေဆုံးသူခဲ့ရတာဖြစ်တယ်လို့ ထုတ်ပြန်ချက်အရသိရပါတယ်။

ဒါ့အပြင် သေဆုံးသူ ၉ ဦးထောင်ဒဏ်ချမှတ်ခံထားရတဲ့ ပုဒ်မတွေမှာ ၅၁(ဂ)၊ ၅၂(ခ)၊ ၂၃(က)၊ ၅၀၅(က)၊ ၁၉(စ)၊ ၁၂၄(က)၊ ၅၂(က)၊ ၅၀(ည)၊ ၄၉၊ ၅၂(က၊ခ)တို့နဲ့ ထောင်ဒဏ်အသီးသီးချမှတ်ခံထားရသူတွေ ဖြစ်ကြပါတယ်။

ပြီးခဲ့တဲ့ ၂၀၂၁ ဖေဖော်ဝါရီ ၁ ရက်ကနေ ၂၀၂၅ မေ ၆ ရက်အထိစစ်အုပ်စုနဲ့ ၎င်းတို့ရဲ့ လက်ပါး စေတွေကြောင့် သေဆုံးခဲ့ရတဲ့ ဒီမိုကရေစီရေးလှုပ်ရှားသူတွေနဲ့ ပြည်သူစုစုပေါင်းမှာ ၆,၆၁၅ ဦး ရှိခဲ့တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

ဒါ့အပြင် အာဏာသိမ်းဖြစ်စဥ်နဲ့ဆက်စပ်ပြီး ဖမ်းဆီးခံခဲ့ရသူ စုစုပေါင်း ၂၉,၁၁၆ ဦးရှိပြီး အဲဒီထဲကမှ ၂၂,၁၉၉ ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူတွေအနက်မှ ၁၀,၇၉၂ ဦးမှာ ထောင်ဒဏ်ချမှတ်ခံထားရတယ်လို့ AAPP ကဆိုပါတယ်။

စာတည်း – လင်း

စစ်ကိုင်း၊ မေ ၆၊ ၂၀၂၂။

စစ်ကိုင်းတိုင်း၊ ဘုတလင်မြို့နယ် ကံသစ်ရွာကို စစ်ကောင်စီက ဒီနေ့မနက် ၄နာရီဝန်းကျင်မှာ စစ်ကြောင်းထိုးပြီး တိုက်ပွဲမဖြစ်ပဲ မီးရှို့ခဲ့လို့ အဖွားအိုတဦး မီးလောင်သေဆုံးခဲ့ပါတယ်။

မုံရွာမြို့နဲ့ ဘုတလင်မြို့ကြားမှာရှိတဲ့ ကံသစ်ရွာကို အင်အား ၇၀ကျော်ပါတဲ့ အာဏာသိမ်းစစ်ကောင်စီတပ်ဖွဲ့တွေဟာ စစ်ကြောင်းထိုးဝင်ရောက်လာပြီး အိမ်ခြေ၇၈အိမ်ရှိတဲ့ ရွာကို မီးရှို့ပြီးပြန်သွားခဲ့တာလို့ ဒေသခံတဦးက ပြောပါတယ်။

” အဲ့ရွာကို စစ်ကောင်စီက ခဏခဏဝင်တယ် တပ်လည်းစွဲတယ်၊ ခုတခါက မီးရှို့သွားတာ၊ အိမ်ခြေ ၄၀ကျော်လောက်ပါသွားတယ်၊ အဖွားကြီးတဦးကလည်း မီးထဲပါပြီးသေသွားတယ်၊ ဘုတလင်မှာ လူအခွင့်ရေးတော်တော်ချိုးဖောက်ခံနေရတယ်” လို့ ဘုတလင်မြို့နယ် ဒေသခံတဦးက ပြောပါတယ်။

စစ်ကောင်စီက မီးရှို့ထားခဲ့လို့ အသက် ၇၈နှစ်အရွယ် အဖွားတဦးသေဆုံးပြီး အိမ်ခြေ ၄၇လုံးမီးလောင်ပြာကျခဲ့ပြီး လက်ရှိမှာတော့ ကံသစ်ရွာက ဒေသခံတွေအားလုံး ဘုန်းကြီးကျောင်းမှာ စစ်ရှောင်နေရတာကြောင့် အဝတ်အစားနဲ့ အစားအသောက်လိုအပ်နေတယ်လို့ သိရပါတယ်။

ကသာ၊ မေ ၆၊ ၂၀၂၅။

စစ်ကိုင်းတိုင်း၊ ကသာမြို့အကျဉ်းထောင်မှာ ထောင်ဒဏ် ၁၅ နှစ်ချမှတ်ခံထားရတဲ့ နိုင်ငံရေးအကျဉ်းသား ကိုဟိဏ်းမင်းသူ ဧပြီ ၂၆ ရက်မှာ သေဆုံးခဲ့ရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM က မေ ၅ ရက်မှာ ထုတ်ပြန်ပါတယ်။

အသက် ၃၃ နှစ်အရွယ်ရှိ ကိုဟိဏ်းမင်းသူ ဟာ အတက်ရောဂါကြောင့် အကျဉ်းထောင်အတွင်းမှာသတိမေ့မြောသွားချိန် ထောင်ပြင်ပဆေးရုံကိုသွားရောက်ကုသခဲ့ပေမယ့် သတိပြန်မရလာဘဲ အသက်ဆုံးရှုံးခဲ့တာလို့ ဆိုပါတယ်။

“အကျဉ်းထောင်မှာ သတိမေ့မြောတဲ့အခြေအနေမှာမှ ပြင်ပဆေးရုံတွေကို ပို့ဆောင်ခဲ့တယ်။ ထောင်ပြင်ပဆေးရုံမှာလည်း သတိပြန်မလည်လာဘဲနဲ့ ဆုံးသွားတာဖြစ်ပါတယ်။” လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM မှ ဦးဆောင်ကော်မတီဝင် ကိုသိုက်ထွန်းဦး က ပြောပါတယ်။

ကိုဟိဏ်းမင်းသူမှာ အတက်ရောဂါကြောင့်ဆေးရုံပို့ချိန်နဲ့ သေဆုံးသွားတဲ့အချိန်အထိ မိသားစုတွေနဲ့အဆက်အသွယ် လုံးဝမရရှိခဲ့ဘူးလို့ ကိုသိုက်ထွန်းဦးက ဆက်ပြောပါတယ်။

အကျဉ်းထောင်တွေမှာ အရေးပေါ်ဖြစ်နေတဲ့အခြေအနေမျိုးမှာတောင် ဆရာဝန်မရှိတာ၊ အိုးဘိုအကျဉ်းထောင်လိုမျိုးကြီးမားတဲ့ထောင်တွေမှာတောင်မှ ဆရာဝန် ၃ ဦးကနေ ၅ ဦးဝန်းကျင်လောက်ပဲရှိတာ၊ ထောင်အာဏာပိုင်တွေနဲ့ ဆရာဝန်တွေစီမံခန့်ခွဲမှု ညံ့ဖျင်းတာ၊ ထောင်တွင်းဆေးဝါးလုံလောက်စွာမရရှိတာ၊ အဟာရလျော့နည်းတဲ့ အစားအသောက်တွေကို စားရတာတွေကြောင့် နိုင်ငံရေးအကျဉ်းသားတွေသေဆုံးမှု ပိုပြီးမှဖြစ်ပေါ်စေတယ်လို့ ဆိုပါတယ်။

“ထောင်ငယ်တွေမှာ ဆရာဝန်လုံးဝမရှိတဲ့အခြေအနေမျိုးဖြစ်တဲ့အတွက် နိုင်ငံရေးအကျဉ်းသားသေဆုံးမှုတွေ၊ ထောင်ဆရာဝန် ထောင်အာဏာပိုင်တွေရဲ့ စီမံခန့်ခွဲမှုညံ့ဖျင်းတဲ့အတွက် နိုင်ငံရေးအကျဉ်းသားသေဆုံးရတဲ့ကိစ္စတွေ များနေတာ”လို့ ကိုသိုက်ထွန်းဦး က ပြောဆိုလိုက်ပါတယ်။

ကိုဟိဏ်းမင်းသူဟာ CDM ကျောင်းဆရာတဦးဖြစ်ပြီး ပြီးခဲ့တဲ့ ၂၀၂၃ ဇွန် ၅ ရက်မှာ စစ်ကောင်စီတပ်ရဲ့ဖမ်းဆီးတာခံခဲ့ရပြီး ၂၀၂၄ မတ် ၂၈ ရက်မှာ စွဲဆိုထားတဲ့ ပုဒ်မ ၅၀ (ည)၊ ၅၂ (က)၊ ၅၂ (ခ) စတဲ့ပုဒ်မ ၃ ခုနဲ့ ထောင်ဒဏ် ၁၅ နှစ်ချမှတ်ခံထားရသူဖြစ်တယ်လို့ သိရပါတယ်။

စာတည်း – လင်း

ကောလင်း၊ မေ ၅၊ ၂၀၂၅။

စစ်ကိုင်းတိုင်း၊ ကောလင်းမြို့နယ်၊ တာကျေးရွာအနီးမှာ မေ ၄ ရက်မနက် ၇ နာရီကျော်မှာ စစ်ကောင်စီတပ်ဖွဲ့ဝင်တွေပစ်ခတ်လိုက်တဲ့ သေနတ်ကျည်ထိမှန်ပြီး အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

သေဆုံးသူမှာ တာကျေးရွာနေအသက် ၅၀ အရွယ်ဒေါ်ဥဖြစ်ပြီး ရွာထဲမှာသွားလာနေချိန် စစ်ကောင်စီတပ်ဖွဲ့ဝင်တွေကပစ်ခတ်လိုက်တာလို့ ဆိုပါတယ်။

“သူမက ရင်ဘတ်ကိုကျည်ဖောက်ထွက်သွားပြီးတော့ ပွဲချင်းပြီးသေသွားတာ”လို့ Kawlininfo မှတာဝန်ရှိသူအမျိုးသားတဦး ကပြောပါတယ်။

တာကျေးရွာမှာ ကောလင်းမြို့ရဲ့ တောင်ဘက်ကပ်ရပ်မှာတည်ရှိပြီး မြို့အတွင်းရှိ စစ်ကောင်စီတပ်က အဲဒီကျေးရွာကိုစစ်ကြောင်းထိုးလာချိန် ကောလင်းခရိုင် တပ်ရင်း (၁)၊ ပကဖပူးပေါင်းအဖွဲ့တွေ ၁ နာရီခန့်ကြာ ထိတွေ့တိုက်ပွဲဖြစ်ပွားခဲ့တယ်လို့ သူကဆက်ပြောပါတယ်။

“တိုက်ပွဲဖြစ်ပြီးတော့ စကစတွေပြန်ဆုတ်တဲ့အခါမှာ အမျိုးသမီးက လမ်းသွားနေတာ။ အဲ့တာကိုမြင်လို့ လှမ်းပစ်လိုက်တာ”လို့ အထက်ပါအမျိုးသားကဆိုပါတယ်။

တိုက်ပွဲဖြစ်ပွားပြီးနောက် စစ်ကောင်စီတပ်သားတွေဟာ ကောလင်းမြို့ပေါ်ကိုပြန်လည် ဆုတ်ခွာသွားခဲ့တယ်လို့ သိရပါတယ်။

ပြီးခဲ့တဲ့ ၂၀၂၂ ဒီဇင်ဘာ ၁၂ ရက်ကလည်း ကောလင်းမြို့နယ်၊ ပေပင်ချောင်ကျေးရွာကို စစ်ကြောင်းထိုးဝင်ရောက်လာတဲ့ စစ်ကောင်စီတပ်သားတွေက ရွာခံအမျိုးသား ၄ ဦးကို ဖမ်းဆီးပြီး သေနတ်နဲ့ ပစ်သတ်ခဲ့တယ်လို့ သိရပါတယ်။

စာတည်း – လင်း

မင်းလှ၊ မေ ၅၊၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့ နယ်၊ ရွေးကုန်းအုပ်စု၊ ဘန့်ဘွေးကုန်းကျေးရွာက စစ်ကောင်စီ သတင်းပေး ပျူစောထီးဆိုသူ ၂ ဦးကို မေ ၄ ရက်မွန်းလွဲ ၁၂ နာရီမှာ ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ ကပြောပါတယ်။

ပျူစောထီးဆိုသူ အသက် ၅၀ အရွယ် ဒေါ်ယူပီ နဲ့ ဦးမြဇော်ဦးတို့ကို စိန်ကန့်လန့်-မြို့ချောင်း ရိုးမဖြတ်ကျော်လမ်းဘေးရှိ ပျဉ်းကတိုးခင်းရွာအနီးမှာ ပစ်ခတ်ခဲ့တာလို့ဆိုပါတယ်။

“သူတို့နှစ်ယောက်က ဖောကားတစီးနဲ့ ရိုးပေါ်ကိုတက်လာတုန်းဖမ်းမိတာ။ အဲ့မှာထွက်ပြေးတော့ ပစ်ခတ်လိုက်ရတာ။ အလောင်းတွေကိုတော့ မြေမြှုပ်ပေးခဲ့တယ်။ သူတို့က ဟိုင်းယုလမ်းဆုံ၊ ဗိုလ်ရုံနဲ့ ပျဥ်းကတိုးခင်းရွာက ပြည်သူအိမ်တွေကို ဖျက်ယူတယ်။ အဲ့ရွာတွေကလူတွေ စိုက်ထားတဲ့ သီးနှံတွေလည်းသူတို့ပဲယူတာ”လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ သတင်းနဲ့ပြန်ကြားရေးတာဝန်ခံ ရဲဘော်ရိုးမမြေက ပြောပါတယ်။

ဒါ့အပြင် စစ်ကောင်စီတပ်ကို မမှန်သတင်းပေးကာပြည်သူတွေကို ဖမ်းဆီးခိုင်းတာ၊ စစ်ရှောင်ပြည်သူတွေရဲ့ တဲဆောင်တွေကိုဖျက်ဆီးရယူတာ၊ စစ်ကောင်စီတပ်ဖွဲ့ဝင်တွေကို ရိက္ခာထောက်ပံ့ပေးတာ၊ ရိုးမပေါ် သွားလာရေးအတွတ်ဖောကားနဲ့ အကြိုအပို့ လုပ်ဆောင်ပေးတာ၊ တော်လှန်ရေးတပ်ဖွဲ့တွေရဲ့ အချက်အလက်တွေနဲ့ စခန်းတည်နေရာတွေကို သတင်းပေးပို့တာတွေလုပ်ဆောင်ခဲ့တယ်လို့ သူကပြောပါတယ်။

အဆိုပါကိစ္စတွေကိုမလုပ်ဆောင်ဖို့ သာယာဝတီခရိုင် တပ်ရင်း ၃၈ဝ၂ တပ်ခွဲ ၅ အနေနဲ့ ဖုန်းဆက် သတိပေးပေမယ့် မလိုက်နာခဲ့ဘူးလို့ ရဲဘော်ရိုးမမြေ ကဆက်ပြောပါတယ်။

၎င်းတို့ဟာ ပြီးခဲ့တဲ့ ၂၀၂၃ ကတည်းကနေ စစ်ကောင်စီတပ်ကို သတင်းပေးလုပ်နေတာဖြစ်ပြီး သူတို့ဆီကနေ ဖောကား ၁ စီး၊ စစ်ကောင်စီတပ်သားတွေနဲ့ ဆက်သွယ်ပြောဆိုထားတဲ့ မိုလ်ဘိုင်းဖုန်း ၁ လုံး၊ လက်စွပ် ၁ ကွင်း၊ နားကပ် ၁ ရံတို့ကို သိမ်းဆည်းရရှိခဲ့တယ်လို့ ရဲဘော်ရိုးမမြေက ဆိုပါတယ်။

ပြီးခဲ့တဲ့ ၂၀၂၄ ဖေဖော်ဝါရီ ၅ ရက်ကလည်း မင်းလှမြို့နယ်၊ မုက္ခာကျေးရွာနေ ဒေါ်ယူပီရဲ့သားဖြစ်သူ စစ်ကောင်စီတပ်သတင်းပေးဆိုသူ ရှိုင်းလင်းအောင်ကို သာယာဝတီခရိုင် တပ်ရင်း ၃၈ဝ၂ တပ်ခွဲ ၅ က ပစ်ခတ်ပြီး သူ့ဆီက ဆိုင်ကယ် ၁ စီး၊ မိုလ်ဘိုင်းဖုန်း ၁ လုံး၊ ငွေသား ၁,၀၀၀ ကျပ်နဲ့မှတ်ပုံတင် ၁ ခု သိမ်းဆည်းရရှိခဲ့တယ်လို့သိရပါတယ်။

စာတည်း – လင်း

ပခုက္ကူ၊ မေ ၄၊ ၂၀၂၅။

မကွေးတိုင်း၊ ပခုက္ကုမြိူ့နယ်၊ မီးသွေးကန်ကျေးရွာမှာ တပ်မ ၁၀၁ ကပစ်တဲ့ လက်နက်ကြီးမှန်လို့ ၂ နှစ်ခွဲအရွယ် ကလေးငယ်သေဆုံးပြီး ၃ ဦးဒဏ်ရာရကာ ရွာခံ ၇ ဦးကိုလည်း စစ်ကောင်စီတပ်သားတွေ ဖမ်းသွားတယ်လို့ ရွာခံတွေဆီက သိရပါတယ်။

မေ ၂ ရက်ညနေ ၄ နာရီခွဲမှာ ပခုက္ကူ အခြေစိုက် တပ်မ ၁၀၁ ကနေ မီးသွေးကန်ကျေးရွာကို လက်နက်ကြီး ၄ လုံးပစ်ခတ်ခဲ့ရာ ကျေးရွာထဲရှိ ဒေါ်မြင့်မြင့်ကြိုင်ရဲ့ နေအိမ်ခြံဝင်းအတွင်းကို ကျရောက်ပေါက်ကွဲခဲ့တယ်လို့ဆိုပါတယ်။

“လက်နက်ကြီး ၄ ချက်ရမ်းသမ်းထုတာမှာ နောက်ဆုံးအလုံးက ခြံထဲကျပြီး ၂ နှစ်ခွဲကလေးငယ်ရယ်။ သူ့အမေရယ်။ တူမလေးရယ်။ လမ်းသွားတဲ့အဒေါ်ကြီးတယောက်ရယ်ထိတာ။ တော်တော်လေး ဆိုးတယ်။ ကလေးကဆို ဗိုက်ထဲက အူထွက်ပြီးသေတာ။ သဂြိုဟ်ပြီးသွားပြီ” လို့ ရွာခံတဦး ကပြောပါတယ်။

လက်နက်ကြီးထိမှန်လို့ အသက် ၂၇ နှစ်အရွယ် မသဇင်မြင့် ပေါင်အသားစပဲ့ထွက်၊ သမီးဖြစ်သူ အသက် ၂ နှစ်ခွဲအရွယ် မဝေဇင်ထက်မှာ ဝမ်းဗိုက်အူထွက်ဒဏ်ရာရပြီးသေဆုံး၊ တူမဖြစ်သူ အသက် ၄ နှစ်အရွယ် မအိမ့်မှူးသွယ်နဲ့ လမ်းသွားလမ်းလာစျေးသည် အသက် ၄၀ နှစ်အရွယ် ဒေါ်ဝင်းမာတို့မှာ ထိခိုက်ဒဏ်ရာရသွားပါတယ်။

သေဆုံးဒဏ်ရာရသွားသူတွေကိုတော့ လက်နက်ကြီးမပစ်ခင်ကျေးရွာထဲကို ရောက်ရှိနေတဲ့ စစ်ကောင်စီ တပ်သား ၅၀ ခန့်က ပခုက္ကူဆေးရုံကိုခေါ်သွားပြီး အလောင်းကိုတော့ မေ ၃ ရက်မှာ နေအိမ်ကို ပြန်သယ်လာပြီး နာရေးပြုလုပ်ခဲ့တယ်လို့ ဆိုပါတယ်။

“လက်နက်ကြီးမပစ်ခင်မှာ စစ်သား ၅၀ လောက်က ရွာထဲရှိနေတာ။ ပစ်ခတ်မှုလည်းပြီးကော ထိခိုက်သူတွေကို သူတို့ပဲခေါ်သွားတယ်။ ရွာသား ၇ ယောက်ကိုလည်း ဖမ်းသွားတယ်။ စကစ တပ်သားတွေရွာထဲရောက်လာချိန်မှာ သောက်စားပြီးမူးနေကြတာ”လို့ အထက်ပါရွာခံက ဆက်ပြောပါတယ်။

လက်နက်ကြီးပစ်ခတ်ပြီးနောက် အဲ့ဒီနေ့မှာပဲ ရွာခံအမျိုးသားတွေဖြစ်တဲ့ အသက် ၂၄ နှစ်အရွယ် ကိုအောင်ကျော်မိုး၊ ၄၅ နှစ်အရွယ် ကိုသိန်းမြင့်ထွန်း၊ ဦးတင်ထွန်းအောင်၊ ၁၂ နှစ်အရွယ် အာကာဘိုဘို၊ ၃၁ နှစ်အရွယ် ကိုစိုးစိုးသန့်၊ ၁၂ နှစ်အရွယ် စိုင်းထီဆိုင်၊ ၁၃ နှစ်အရွယ် ဟိန်းဝေယံထွန်း တို့ ၇ ဦးကို စစ်ကောင်စီတပ်သားတွေက ပခုက္ကူရဲစခန်းဆီ ဖမ်းဆီးသွားတယ်လို့ ဆိုပါတယ်။

ဖမ်းဆီးခံရသူတွေက မေ ၄ ရက် ဒီညနေပိုင်းထိပြန်မလွတ်လာသေးဘူးလို့ အထက်ပါရွာခံက ပြောပါတယ်။

မီးသွေးကန်ကျေးရွာက အိမ်ခြေ ၂၀၀ ဝန်းကျင် လူဦးရေ ၇၀၀ ကျော်ရှိတဲ့ကျေးရွာဖြစ်ပြီး ကျေးရွာထဲမှာ ယခုလိုလက်နက်ကြီးကျရောက်ပေါက်ကွဲပြီး လူထိခိုက်သေဆုံးတာလည်း ပထမဆုံးအကြိမ်ဖြစ်တယ်လို့ သိရပါတယ်။

စာတည်း – လင်း