သေဆုံး

ကျောက်ကြီး၊ ဒီဇင်ဘာ ၃၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ ညောင်ပင်သာကျေးရွာမှာ စစ်ကော်မရှင်တပ်က စက်တပ်လေထီး၊ လက်နက်ကြီးတွေနဲ့ဗုံးကြဲပစ်ခတ်တာကြောင့်လို့ CDM ဆရာဝန်အပါ ၅ ဦးသေဆုံးခဲ့တယ်လို့ ဒေသခံတွေထံက သိရပါတယ်။

ဒီဇင်ဘာ ၃ ရက် ဒီကနေ့ နေ့လယ် ၁၂ နာရီခန့်မှာ တောင်ငူလေတပ်ကလာတဲ့ ဂျိုင်ရိုကော်ပတာ(စက်တပ်လေထီး) ၁ စီးနဲ့ ကျေးရွာဆေးပေးခန်းပေါ်ကို ဗုံး ၂ လုံးကြဲချခဲ့တာကြောင့် ဆေးခန်းအတွင်းရှိနေတဲ့ အသက် ၃၀ ကျော်အရွယ် CDM ဆရာဝန်နဲ့ အသက် ၃၅ ဝန်းကျင်ရှိ ဆေးခန်းအကူ အမျိုးသား ၂ ဦးသေဆုံးခဲ့တယ်လို့ ဆိုပါတယ်။

” ရွာကလည်းကြီးတော့ ရည်ရွယ်ချက်ရှိရှိနဲ့ပစ်ထည့်တာ။ ဆေးခန်းဘက်ကျတာမှာတော့ ဆေးဝန်ထမ်း ၃ ဦးသေတယ်။ ကျေးရွာလမ်းပိုင်းပေါ်ကျတာမှာတော့ ရွာသား ၂ ဦးသေပြီးထိခိုက်တာရှိတယ်။ ဆေးခန်းပေါ်ကျတာက ဂျိုင်ရိုကော်ပတာကကြဲတဲ့ဗုံး၊ လမ်းဆုံမှာကျတာက လက်နက်ကြီးတွေ” လို့ ကျောက်ကြီးဒေသခံတဦးက မြေလတ်အသံကို ပြောပါတယ်။

ဒါ့အပြင် ဒီကနေ့မနက်ပိုင်းမှာပဲ ထန်းတပင်အခြေစိုက် ခလရ ၇၃ နဲ့ မုန်းအခြေစိုက် စစ်ကော်မရှင်တပ်ရင်းကနေ လက်နက်ကြီးတွေနဲ့ပစ်ခတ်ခဲ့တာကြောင့် ကျေးရွာအတွင်းဒိုက်ပုံလမ်းဆုံကို ကျရောက်ပေါက်ကွဲခဲ့ကာ ရွာခံတွေဖြစ်တဲ့ အသက် ၃၃ နှစ် ကိုသူရိန်စိုး၊ အသက် ၇၀ ဦးစိုးကြီးတို့သေဆုံးပြီး အသက် ၄၂ နှစ် မခိုင်ဇင်ဦး၊ အသက် ၆၅ နှစ် ဒေါ်ခလေးမ၊ အသက် ၂၀ ကျော် မောင်ဟိန်းသူအောင် အပါ ၇ ဦးဒဏ်ရာရခဲ့တယ်လို့ သိရပါတယ်။

ဗုံးကြဲခံရပြီး လက်နက်ကြီးကျရောက်ပေါက်ကွဲတာကြောင့် ကျေးရွာဆေးပေးခန်းတလုံးအပါအဝင် နေအိမ်အချို့လည်းပျက်စီးမှုရှိပြီး ပျက်စီးမှုစာရင်းကိုတောစိစစ်နေဆဲဖြစ်တယ်လို့ ဆိုပါတယ်။

အောက်တိုဘာ ၂၀ ရက်ကလည်း ကျောက်ကြီးမြို့နယ်၊ ရေလဲကျေးရွာထဲကို စစ်ကော်မရှင်ဘက်က ဒရုန်းနဲ့ဗုံးချလို့ ရွာသား ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – ဟိန်းစံ

စဥ့်ကူး၊ ဒီဇင်ဘာ ၂၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ ညောင်ဝန်းကျေးရွာကို လေယာဥ်နဲ့ ဗုံးကြဲခံရလို့ အမျိုးသား ၁ ဦး သေဆုံးပြီး ၄ ဦးဒဏ်ရာရတယ်လို့ စဥ့်ကူးမြို့နယ်ပကဖဆီက သိရပါတယ်။

ဒီဇင်ဘာ ၂ ရက်မနက် ၁၀ နာရီ မိနစ် ၅၀ ခန့်မှာ တံတားဦးလေဆိပ်ကတက်လာတဲ့ ဂျက်ဖိုက်တာ ၁ စီးဟာ ညောင်ဝန်းကျေးရွာထဲကို ဗုံး ၁ လုံးကြဲချခဲ့ရာ ရွာအလယ်ပိုင်း နေအိမ်အနီး ကျရောက်ပေါက်ကွဲခဲ့တာလို့ ဆိုပါတယ်။

“ညောင်ဝန်းရွာနားမှာတော့ တိုက်ပွဲမရှိဘူး။ တော်လှန်ရေးအင်အားစုတွေ နေတာထိုင်တာလည်းမရှိဘူး။ ပြည်သူနေအိမ်ကို သက်သက်ကိုလာကြဲသွားတာ။ နေအိမ်ဘေးကိုကျတာ။ ပေါင် ၂၅၀ ဗုံးဖြစ်နိုင်တယ်”လို့ စဥ့်ကူးမြို့နယ် သတင်းနဲ့ပြန်ကြားရေးတာဝန်ခံ ကိုသံမဏိကပြောပါတယ်။

ဗုံးကျပေါက်ကွဲလို့ နေအိမ်အတွင်းရှိ အသက် ၃၅ နှစ်အရွယ် အမျိုးသား ၁ ဦးနေရာမှာတင်သေဆုံးခဲ့ပြီး အသက် ၁၀ နှစ်အရွယ် မိန်းကလေးငယ် ၁ ဦး၊ အသက် ၅၀ အရွယ် အမျိုးသမီး၊ အသက် ၄၀ နဲ့ ၂၀ အရွယ် အမျိုးသား ၂ ဦးတို့ ထိခိုက်ဒဏ်ရာရခဲ့ကာ နေအိမ် ၂ လုံးပျက်စီးခဲ့တယ်လို့ ဆိုပါတယ်။

စစ်ကောာ်မရှင်ဘက်က ဗုံးလာကြဲတာကြောင့်ရွာခံတွေမှာ စိုးရိမ်ထိတ်လန့်နေကြပြီး အခြေအနေကိုစောင့်ကြည့်နေကြရတယ်လို့ သိရပါတယ်။

အောက်တိုဘာ ၃၀ ရက်ကလည်း စဥ့်ကူးမြို့နယ်၊ လက်ပန်လှကျေးရွာ၊ အေးချမ်းသာရပ်ကွက်မှာ ဗုံးကြဲခံရပြီး မိန်းကလေးငယ် ၁ ဦးအပါအဝင် ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဒီဇင်ဘာ ၂၊ ၂၀၂၅။

မကွေးတိုင်း၊ မြိုင်မြို့နယ်၊ ဗဟင်းရွာပြည်သူ့အုပ်ချုပ်ရေးအဖွဲ့တာဝန်ခံ(အုပ်ချုပ်ရေးမှူး) ဖမ်းဆီးခံရပြီးနောက် အသတ်ခံလိုက်ရကြောင်း ဒေသခံတွေထံက သိရပါတယ်။

အသတ်ခံရသူမှာ ဗဟင်းရွာပအဖတာဝန်ခံ အသက် ၄၃ နှစ် ဝန်းကျင်ရှိ ဦးလှအောင် ဖြစ်ပြီး ၎င်းနဲ့အတူရပ်ကျေးပအဖအဖွဲ့ဝင် ၂ ဦးကို နိုဝင်ဘာ ၂၃ ရက် ည ၁၂ နာရီခန့်က နေအိမ်မှာ ရှိနေချိန် လက်နက်ကိုင်လူတစုက ဖမ်းခေါ်သွားခဲ့တာလို့ ဆိုပါတယ်။

” ဖမ်းသွားပြီးတော့ အသက်မရှိတော့ဘူး။ ကွယ်လွန်သွားပြီဆိုပြီး ဖမ်းသွားတဲ့အဖွဲ့က (ပအဖတာဝန်ခံ)မိသားစုဝင်တွေကို အကြောင်းကြားလာတာ” လို့ ဖြစ်စဥ်ကိုသိရှိထားတဲ့ ဗဟင်းရွာခံတဦးက မြေလတ်အသံကို ပြောပါတယ်။

ဖမ်းဆီးခေါ်ဆောင်သွားပြီးတဲ့နောက် ၄ ရက်အကြာ နိုဝင်ဘာ ၂၇ ရက်မှာ ပအဖတာဝန်ခံ ဦးလှအောင် သေဆုံးသွားပြီဖြစ်ကြောင်း အကြောင်းကြားလာခဲ့တာဖြစ်ပြီး ရုပ်အလောင်းကို မိသားစုထံပြန်မပေးဘူးလို့ သိရပါတယ်။

ဗဟင်းပအဖတာဝန်ခံအပါ ၃ ဦး ဘာကြောင့်ဖမ်းဆီးအသတ်ခံရတယ်ဆိုတာ မသိရပေမယ့် ဖမ်းဆီးမခံရမီ နိုဝင်ဘာ ၂၃ ရက် ညဦးပိုင်းမှာ ဗဟင်းမြို့အတွင်း ဆိုင်ကယ်အိတ်ဇောသံကျယ်လောင်စွာစီးနင်းတဲ့လူငယ်တချို့ကို ပအဖတာဝန်ခံ ဦးလှအောင်နဲ့အဖွဲ့က ဖမ်းဆီးရိုက်နှက်ခဲ့ပြီးနောက် အဲ့ဒီညပိုင်းမှာပဲ အခုလိုဖြစ်ပွားခဲ့တာလို့ အထက်ပါမြို့ခံက ပြောပါတယ်။

” ဖမ်းတဲ့ချိန်မှာ(ဆိုင်ကယ်စီးတဲ့သူတွေကို)ရိုက်တဲ့သူတွေ ဘယ်သူတွေပါလည်းဆိုပြီး ပအဖတာဝန်ခံရယ်၊ ရိုက်တဲ့သူရယ်၊ စာရေးတယောက်ရယ် သုံးယောက်ကို ခေါ်သွားတာ” လို့ ပြောပါတယ်။

ပအဖက ဖမ်းဆီးရိုက်နှက်တဲ့လူငယ်တွေအနက် ဒေသတွင်းလက်နက်ကိုင်တပ်ဖွဲ့ဝင်တဦးပါဝင်ပြီး ပအဖလက်ကနေပြန်လွတ်လာပြီးနောက် အဲ့ဒီရိုက်နှက်မှုအပေါ်မကျေနပ်တာကြောင့် ပအဖတာဝန်ခံအပါ ၃ ဦးကို ပြန်လည်ဖမ်းဆီးသွားတာဖြစ်နိုင်တယ်လို့ ဒေသခံတွေက သုံးသပ်ထားပါတယ်။

ဆက်လက်ဖမ်းဆီးခံထားရတဲ့ ပအဖအဖွဲ့ ဝင် ၂ ဦးမှာလည်း ၈ ရက်ကြာ ဒီဇင်ဘာ ၁ ရက်အထိပြန်လွတ်မလာသေးဘူးလို့ သိရပါတယ်။

မြေလတ်အသံ၊ ဒီဇင်ဘာ ၂၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ချောင်းဦးမြို့နယ်နဲ့ မန္တလေးတိုင်း၊ တကောင်းမြို့တို့ကို စစ်ကော်မရှင်တပ်က နိုဝင်ဘာ ၃၀ ရက်ကနေ ဒီဇင်ဘာ ၂ ရက်အတွင်း လေကြောင်းကနေ ဗုံးကြဲတိုက်ခိုက်တာအပြင် လက်နက်ကြီးတွေနဲ့ပါပစ်ခတ်လို့ ကလေးငယ်အပါ ဒေသခံ ၁၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဝက်လက်မြို့နယ်၊ နတ်မှော်ဦးရွာကို စစ်ကော်မရှင်တပ်က ဒီဇင်ဘာ ၂ ရက် မနက်အစောပိုင်းမှာ လေယာဥ်နဲ့ဗုံးကြဲတိုက်ခိုက်ခဲ့တာကြောင့် မိသားစုဝင် ၅ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ ဒေသခံတွေကပြောပါတယ်။

အိမ်ခြေ ၂၀၀ ခန့်ရှိတဲ့ နတ်မှော်ဦးရွာ ဘုန်းကြီးကျောင်းနဲ့လူနေအိမ်တွေကို တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံးကြဲချခဲ့တာကြောင့် ကျောင်းမှာခိုလှုံနေထိုင်ကြတဲ့သူတွေ သေဆုံးခဲ့ကြတာလို့ ဆိုပါတယ်။

“ပစ်တာက သီလရှင်ကျောင်းကြီးရဲ့ ဘေးကဘုန်းကြီးကျောင်းထဲပစ်တာ။ ဘုန်းကြီးကျောင်းထဲက မိသားစု ၅ ဦးသေတာ။ သူတို့က စစ်ရှောင်မဟုတ်ဘူးဗျ။ ဟိုးတုန်းကတည်းက အိမ်မီးရှို့ခံရပြီး ဘုန်းကြီးကျောင်း အမှီပြုနေတဲ့သူတွေပေါ့”လို့ ဒေသခံအမျိုးသားတဦးက ပြောပါတယ်။

ဗုံးစထိမှန်ပြီး အသက် ၂၅ နှစ် ကိုရှိုင်းကိုနဲ့ ဇနီး ၂၄ နှစ်အရွယ် မစုမြတ်လင်း၊ သမီးဖြစ်သူ ၂ နှစ်အရွယ် ရွှေပုံစံ၊ ၂၁ အရွယ် မောင်မာင်ဝင်း၊ ၄၀ အရွယ် ဦးရန်နိုင်ဝင်းတို့ သေဆုံးခဲ့တာပါ။

ဒါ့အပြင် လူနေအိမ် ၅ လုံးပျက်စီးပြီး နောက်ထပ် အမျိုးသား၊ အမျိုးသမီး ၅ ဦးမှာလည်းဒဏ်ရာရခဲ့ပြီး အဲဒီထဲက ၂ ဦးကတော့ ဒဏ်ရာပြင်းထန်တယ်လို့လည်း အထက်ပါအမျိုးသားက ဆိုပါတယ်။

ဒီဇင်ဘာလ ၁ ရက်နေ့ည ၁၁ နာရီကျော်မှာလည်း ရွေဘိုမြို့တောင်ဘက်အထွက်ဂိတ်ကနေ လက်နက်ကြီးပစ်ခတ်လို့ ဝက်လက်မြို့နယ်၊ ယင်းမာကျေးရွာကို ပစ်ခတ်ခဲ့ရာ ကျေးရွာအတွင်း ကျရောက်ပေါက်ကွဲပြီး နေအိမ်မှာအိပ်နေတဲ့ အသက် ၂၀ ကျော်အရွယ် လူငယ် ၁ ဦးလက်နက်ကြီး ထိမှန်သေဆုံးခဲ့ပါသေးတယ်။

ဒီဇင်ဘာ ၁ ရက်နေ့လယ်ပိုင်းမှာလည်း ချောင်းဦးမြို့နယ်၊ ညောင်ဖြူပင်ကျေးရွာကို Gyrocopter ၁ စီးနဲ့ဗုံးကြဲချခဲ့ရာ အသက် ၄၀ ခန့်ရှိတဲ့အမျိုးသား ၁ ဦး ဒဏ်ရာရရှိခဲ့တယ်လို့ ချောင်းဦးဒေသခံ အမျိုးသားတဦးက ပြောပါတယ်။

ဒါ့အပြင် နိုဝင်ဘာ ၃၀ ရက်နေ့လယ် ၂ နာရီကျော်မှာ ချောင်းဦးမြို့နယ်၊ ချောင်းမနားကျေးရွာနဲ့ ချောင်းဆုံရွာတို့ကို မုံရွာအခြေစိုက် နမခ ဘက်ကတက်လာတဲ့ Gyrocopter ၂ စီးနဲ့ ဗုံးသီးတွေကြဲချလုံးတိုက်ခိုက်ခဲ့ရာ ချောင်းမနားရွာဒေသခံ ဦးတင်မောင်ဝင်းနဲ့ ချောင်းဆုံရွာက အမျိုးသား ၁ ဦးတို့ သေဆုံးခဲ့ပါသေးတယ်။

“ဗုံးကြဲတာက ချောင်းဦး-မုံရွာအစပ်က ချောင်းဆုံကြဲတာ။ ၁ ယောက်သေတယ်။ ၁ ယောက် ဒဏ်ရာရတယ်။ ပြီးတော့ ချောင်းဦးနယ်မြောက်ခြမ်းက ချောင်းမနား ထပ်ကြဲတာ။ အဲ့မှာ ၁ ယောက်သေပြီးတော့ ၉ ယောက်ဒဏ်ရာရသွားတာ”လို့ ချောင်းဦးဒေသခံအမျိုးသားတဦးက ပြောပါတယ်။

ချောင်းမနားရွာမှ ဒဏ်ရာရသူ ၉ ဦးမှာ ဦးကော၊ ဦးကျော်မိုး၊ ကိုဘဂျမ်း၊ ကိုဆွေဝင်း၊ မောင်သိန်း၊ ဦးမြညွန့်၊ မငယ်၊ အမည်မသိရတဲ့ အမျိုးသမီး ၁ ဦးနဲ့ အမျိုးသား ၁ ဦးတို့ဖြစ်ပါတယ်။

အလားတူနိုဝင်ဘာ ၃၀ ရက်ည ၈ နာရီကျော်မှာ သပိတ်ကျင်းမြို့နယ်၊ တကောင်းမြို့ကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ အမျိုးသား ၃ ဦးသေဆုံးခဲ့တယ်လို့ ဒေသခံတွေက ပြောပါတယ်။

“သေဆုံးသူတွေကတော့ ယောကျာ်းတွေပါ။ လက်ဖက်ရည်သောက်နေတဲ့သူ။ ပြေးချိန်မရလိုက်ရဘူးတဲ့ဗျာ။ ဒဏ်ရာရသူတွေလည်း တော်တော်များတယ်လို့သိရတယ်။ အသေးစိတ်အခြေအနေကတော့မသိရဘူး”လို့ တကောင်းဒေသခံအမျိုးသားတဦးက ပြောပါတယ်။

အဆိုပါတိုက်လေယာဥ် ၁ စီးဟာ တကောင်းမြို့လမ်းဆုံအနီး နဲ့ မြို့ထဲရှိလဖက်ရည်ဆိုင် ကို ဗုံးသီး ၁ လုံးစီးအသီးသီးကြဲချခဲ့တာဖြစ်ပြီး သေဆုံးသူ ၃ ဦးနဲ့ ဒဏ်ရာရရှိသူတွေရဲ့ ကိုယ်ရေးအချက်အလက် အသေးစိတ်တို့ကိုတော့ မသိရှိရပါဘူး။

တကောင်းမြို့ကို အမျိုသားညီညွတ်ရေးအစိုးရ – NUG ပူးပေါင်းတပ်တွေက ပြီးခဲ့တဲ့ ၂၀၂၄၊ သြဂုတ် ၁၂ ရက်မှာ တိုက်ခိုက်သိမ်းပိုက်ခဲ့တာဖြစ်ပြီး တိုက်ပွဲအတွင်း စစ်ကော်မရှင်တပ်ဖက်မှ ၆၄ ဦးသေဆုံးကာ ၂၀ ဦးအရှင်ဖမ်းမိခဲ့တယ်လို့ အမှတ်-၁ စစ်ဒေသ ရဲ့ ထုတ်ပြန်ချက်အရသိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဒီဇင်ဘာ ၁ ရက်ထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၅၀၃ ဦးရှိပြီလို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP ရဲ့ အစီခံစာမှာ ဖော်ပြပါတယ်။

စာတည်း – လင်း