သပိတ်ခေါင်းဆောင်

မြေလတ်အသံ၊ ဒီဇင်ဘာ ၁၇၊ ၂၀၂၅။

စစ်ကော်မရှင်တပ်က ဆုကြေးငွေနဲ့တကွ ဖမ်းဝရမ်းထုတ်ခံထားရတဲ့ မန္တလေးလူထုသပိတ်ခေါင်းဆောင် ကိုထက်မြက်အောင်ဟာ မန္တလေးမြို့မှာ ဖမ်းဆီးခံထားရတယ်လို့ အထွေထွေသပိတ်ပေါင်းစပ်ညှိနှိုင်းရေးအင်အားစု – GSCB က ဒီကနေ့ဒီဇင်ဘာ ၁၇ ရက်ညပိုင်းမှာ သတင်းထုတ်ပြန်ပါတယ်။

” ကိုထက်မြတ်အောင်နဲ့ (ဒီဇင်ဘာ) ၁၄ ရက်နေ့က စပြီး ကျနော်တို့ အဆက်အသွယ်ပြတ်သွားတယ်ဗျ။ အဖမ်းခံထားရတယ်ဆိုတာတော့ ကျနော်တို့ အတည်ပြုနိုင်တယ်။ ကိုထက်မြတ်အောင်သည် ကျောင်းသားသမဂ္ဂမှာလည်း ပါဝင်ခဲ့တဲ့သူတယောက် ဖြစ်သလို လက်ရှိမှာလည်း မန္တလေးရဲ့ လူထုလှုပ်ရှားမှုတွေမှာ ပါဝင်နေတဲ့ သပိတ်ခေါင်းဆောင်တယောက် ဖြစ်ပါတယ်။ စစ်အုပ်စု၊ စစ်အာဏာရှင်က ကိုထက်မြတ်အောင်တို့လို လူငယ်တွေနဲ့ ပတ်သက်ရင် တော်တော်ကို အငြိုးအတေး ရှိပါတယ်။ ဒါကြောင့်လည်း ဆုငွေတွေပါ ထုတ်ပြန်ပြီးတော့မှ တကယ့်ကို ပစ်မှတ်ထားပြီးတော့ အသဲအမဲ(သဲသဲမဲမဲ) ဒီလိုရှာဖွေ ဖမ်းဆီးမှုတွေ ဖြစ်လာတယ်လို့ မြင်ပါတယ်” လို့ GSCBအဖွဲ့ဝင် ကိုနန်းလင်းက မြေလတ်အသံကို ပြောပါတယ်။

ကိုထက်မြတ်အောင်က ရတနာပုံတက္ကသိုလ် ကျောင်းသားများသမဂ္ဂရဲ့ ဒုဥက္ကဌအဖြစ် တာဝန်ထမ်းဆောင်ခဲ့ပြီး အာဏာရှင်စနစ်ဆန့်ကျင်ရေး ပြည်သူ့အင်အားများ ချိတ်ဆက်ညှိနှိုင်းရေးကော်မတီ – AFCC (MDY) နဲ့ အထွေထွေသပိတ်ပေါင်းစပ်ညှိနှိုင်းရေးအင်အားစု – GSCB တို့ရဲ့ အဖွဲ့ဝင်တဦးလည်းဖြစ်တယ်လို့ ထုတ်ပြန်ချက်မှာ ဖော်ပြပါတယ်။

အသက် ၂၄ နှစ်အရွယ် သပိတ်ခေါင်းဆောင် ကိုထက်မြက်အောင် ဟာ ကျန်းမာရေးအထူးကောင်းမွန်သူဖြစ်ပြီး ဖမ်းဆီးစဉ်မှာ စစ်ကော်မရှင်တပ်က ရိုက်နှက် ထိုးကြိတ်မှုတွေ လုပ်ဆောင်ခဲ့တာကြောင့် လက်ရှိမှာ ၎င်းရဲ့ကျန်းမာရေးနဲ့ အသက်အန္တရာယ်ကို စိုးရိမ်ရတဲ့အခြေအနေမှာရှိနေတယ်လို့ ဆိုပါတယ်။

” ကိုထက်မြတ်အောင်ရဲ့ အသက်အန္တရာယ်နဲ့ ပတ်သက်ရင်တော့ စိုးရိမ်တယ်၊ ရှေ့မှာလည်း စစ်အုပ်စု စစ်ကောင်စီသည် သပိတ်လူငယ်တွေကို ဖမ်းဆီးပြီးတော့ အသက်အန္တရာယ်ဖြစ်တဲ့အထိ မတရားပေါ့ဗျာ၊ ကျနော်တို့ ရာဇဝတ်မှုတွေ ကျူးလွန်တာကို တွေ့ရတယ်၊ လက်ရှိလည်း ကိုထက်မြတ်အောင်နဲ့က လုံးဝပေါ့နော် အဆက်အသွယ်မရတဲ့ အခြေအနေ ဖြစ်နေတယ်၊ တကယ်တော့ ဒါက ကျနော်တို့ ဥပဒေကြောင်းအရလည်း ဘာအခွင့်အရေးမှ အခု စစ်ကောင်စီ၊ စစ်အုပ်စု လက်အောက်မှာ မရနိုင်ဘူး ဖြစ်နေတယ်ပေါ့နော်၊ အဲ့ဒီတော့ ကိုထက်မြတ်အောင်ရဲ့ အသက်အန္တရာယ်နဲ့ ပတ်သက်ရင်တော့ ကျနော်တို့ အလွန်အမင်းစိုးရိမ်တယ်၊ ဖြစ်လာသမျှ ကိစ္စတိုင်းကို စစ်ကောင်စီ၊ စစ်အုပ်စုက တာဝန်ယူရလိမ့်မယ်လို့ ကျနော်ကတော့ ပြောချင်တယ်။” လို့ ကိုနန်းလင်းက ပြောပါတယ်။

မန္တလေး၊ ဒီဇင်ဘာ ၅၊ ၂၀၂၅။

သပိတ်ခေါင်းဆောင်‌‌တွေဆန္ဒပြခဲ့တဲ့ မန္တလေးဈေးချိုက သစ်သီးတန်းကို ဒီဇင်ဘာ ၄ ရက် ည ၁၂ နာရီမှာ စစ်ကော်မရှင်လက်အောက်ခံတပ်ဖွဲ့တွေက ဝင်ရောက်ဖျက်ဆီးခဲ့ပြီး ပြန်ဖွင့်ရင်အရေးယူမယ်ဆိုပြီး ခြိမ်းခြောက်ခဲ့တယ်လို့ မြို့ခံတွေဆီက သိရပါတယ်။

အဲ့ဒီစျေးတန်းမှာ ဒီဇင်ဘာ ၃ ရက်မနက်ပိုင်းမှာ ‌‌‌‌‌‌‌‌‌‌‌‌‌‌‌‌‌‌‌‌‌‌‌မန္တလေး သပိတ်ခေါင်းဆောင် ဒေါက်တာ တေဇာဆန်း၊ ရန်ကုန်သပိတ်ခေါင်းဆောင် ကိုနန်းလင်း၊ စစ်ကိုင်းသပိတ်ခေါင်းဆောင် ကိုခန့်ဝေဖြိုးတို့ ဦးဆောင်ပြီး စစ်အာ‌‌ဏာရှင်တိုက်ဖျက်ရေးနဲ့ ရွေးကောက်ပွဲအတွက် ဆန့်ကျင်ဆန္ဒပြခဲ့ကြတာပါ။

အဆိုပါဆန္ဒပြတဲ့ ရုပ်သံဖိုင်ကို ဒေါက်တာတေဇာဆန်းက ထုတ်ပြန်ပြီးတဲ့နောက် မနေ့ကညပိုင်းမှာ သစ်သီးတန်းကို မြို့နယ်ရဲတပ်ဖွဲ့၊ ပြည်သူ့လုံခြုံရေးအဖွဲ့ (ရပ်ကွက်အလိုက်ဖွဲ့ထားတဲ့ယူနီ ဖောင်းအပြာဝတ်ပျူစောထီး၊ ပျူစောထီးအဖွဲ့နဲ့ စည်ပင်ဝန်ထမ်းတို့ ပူးပေါင်းပြီး ဆဲဆို ဖျက်ဆီးခဲ့တာလို့ မြို့ခံတွေက ပြောပါတယ်။

” ‘အကြမ်းဖက်အားပေးတွေ၊ နင်တို့ အားပေးတဲ့အကြမ်းဖက်တွေကိုလာကယ်ခိုင်း၊ ဒီအချိန်အထိ ဘာဖြစ်လို့ ဖွင့်ထားတာလဲ’ဆိုပြီး ဆဲတာ။ မအေနှမကိုင်ဆဲတာပေါ့။ အသီးခြင်းတွေအကုန်ဆွဲမှောက်။ ရောင်းမရတော့အောင်ဖျက်ဆီးမှုတွေလုပ်သွားတယ်”လို့ မြို့ခံတဦး ကပြောပါတယ်။

အဲဒီအသီးစျေးတန်းဟာ မန္တလေး ဈေးချိုရဲ့ တောင်ဘက် ၂၉ လမ်း၊ ၈၄ လမ်းနဲ့ ၈၅ လမ်းကြားမှာတည်ရှိတာပါ။

ဒီဇင်ဘာ ၃ ရက်နေ့ကလည်း စစ်ခေါင်းဆောင်မင်းအောင်လှိုင် မန္တလေးမြို့ကနေ ပြင်ဦးလွင်မြို့ကိုသွားချိန် ဆန္ဒပြမှုဖြစ်ခဲ့ပြီး အဲဒီနေ့ကတည်းက စစ်ကော်မရှင်တပ်တွေဟာ မြို့အဝင်အထွက်ပိတ်ကာ ရှာဖွေတာတွေ ပြုလုပ်ခဲ့ပါ‌‌သေးတယ်။

သတင်း – မြတ်

စစ်ကိုင်း၊ မေ ၁၉၊ ၂၀၂၃။

စစ်ကိုင်းတိုင်းဒေသကြီး၊ မုံရွာမြို့က မုံရွာသပိတ်ခေါင်းဆောင် ကိုဝေမိုးနိုင်ကို စစ်ကောင်စီဘက်က ထောင်အနှစ် ၂၀ ထပ်မံချခဲ့လို့ စုစုပေါင်း ထောင်ဒဏ် ၅၂ ထိရှိလာပြီလို့ သိရပါတယ်။

မေလ ၁၉ ရက် ဒီနေ့မှာ မုံရွာအကျဥ်းထောင် အထူးတရားရုံးကနေ ကိုဝေမိုးနိုင်ကို နိုင်ငံတော် သစ္စာဖောက်ဖျက်ပုန်ကန်မှု ပုဒ်မ ၁၂၂ အရ ထောင်ဒဏ် အနှစ် ၂၀ ကျခံဖို့ ထပ်မံအမိန့်ချခဲ့တယ်လို့ မုံရွာလူထုသပိတ်တိုက်ပွဲဦးဆောင်ကော်မတီဝင် ကိုခန့်ဝေဖြိုးက ပြောပါတယ်။

“ဒီနေ့ အမိန့်ထပ်ချတာဖြစ်တယ်။ စကစ လက်အောက်ခံ တရားရုံးတွေက အမိန့်ချတာကို အသိအမှတ်မပြုသလို လက်ခံသွားမှာလည်း မဟုတ်ပါဘူးဗျ။ စစ်တပ်အလိုကျ လုပ်ဆောင်နေတဲ့ တရားရုံးတွေရဲ့ အခုလို မတရားအမိန့်ချတာတွေကိုလည်း ပြင်းပြင်းထန်ထန် ကန့်ကွက်ရှုံ့ချပါတယ်။ လက်ရှိမှာ သူကထောင်ထဲမှာ ကျန်းမာရေးကောင်းတယ်။ သူအမေနဲ့ တခါတခါတွေ့ခွင့်ရတယ်လို့ သိရတယ်” လို့ ပြောပါတယ်။

ကိုဝေမိုးနိုင်ကို စစ်ကောင်စီဘက်က ​ပုဒ်မ ၅၀၅(က)နဲ့ ၆ မှု၊ ပုဒ်မ ၂၅၊ ရာဇသတ်ကြီးပုဒ်မ ၁၄၈၊ ပုဒ်မ ၃၉၅၊ ပုဒ်မ ၃၉၇၊ ပုဒ်မ ၃၂၃၊ ပုဒ်မ ၁၂၂၊ ပုဒ်မ ၃၀၂တို့နဲ့ တမှုစီ စုစုပေါင်း ပုဒ်မ ၁၃ ခုနဲ့ တရားစွဲဆိုထားတယ်လို့ သိရပါတယ်။

စွဲဆိုထားတဲ့ ပုဒ်မ ၁၃ ခုအနက် ယခင် အမှုပေါင်း ၁၁ ခုအတွက် ထောင်ဒဏ် ၃၂ နှစ် ချမှတ်ခံထားရပြီး ယခု ပုဒ်မ ၁၂၂ အတွက် ထောင်ဒဏ် အနှစ် ၂၀ ထပ်မံချခံရလို့ စုစုပေါင်း ထောင်ဒဏ် ၅၂ နှစ်ထိရှိလာပြီး ၃၀၂ လူသတ်မှုနဲ့ ထပ်မံ အမှုရင်ဆိုင်ရဖို့ ရှိသေးတယ်လို့ သိရပါတယ်။

၂၀၂၁ ခုနှစ်၊ ဧပြီလ ၁၅ ရက်နေ့မှာ မုံရွာလူထုသပိတ်တိုက်ပွဲဦးဆောင်ကော်မတီက မုံရွာမြို့​ပေါ်မှာ သပိတ်ပြုလုပ်နေချိန် စစ်ကောင်စီတပ်သားတွေက ကိုဝေမိုးနိုင်ကို ကားနဲ့တိုက်ပြီး ရိုက်နှက်ဖမ်းဆီးခဲ့တာဖြစ်ပါတယ်။

စာတည်း- ဇို