ဝေါ၊ နိုဝင်ဘာ ၂၅၊ ၂၀၂၅။

ပဲခူးတိုင်း၊ ဝေါမြို့နယ်၊ စက်စုကျေးရွာက စစ်ကော်မရှင်လက်အောက်အုပ်ချုပ်ရေးမှူးနဲ့ ပြည်သူ့စစ်တွေအပါ ၄ ဦးကို လက်နက်ကိုင်အဖွဲ့တခုက ဖမ်းဆီးသွားတယ်လို့ ကျေးရွာနဲ့နီးစပ်သူတွေထံက သိရပါတယ်။

ဖမ်းဆီးခံရသူတွေဟာ ကျေးရွာအုပ်ချုပ်ရေးမှူး အသက် ၅၃ နှစ်အရွယ် ဦးတင်စိုး၊ ရွာခံဖြစ်တဲ့ အသက် ၃၅ နှစ်အရွယ် ကိုလင်းနဲ့ အသက် ၃၀ ကျော်အရွယ် ပြည်သူ့စစ် ၂ ဦးတို့ဖြစ်ပြီး နိုဝင်ဘာ ၂၃ ရက် မနက် ၅ နာရီခန့်မှာ ကျေးရွာထဲကနေအိမ်တွေမှာ လာရောက်ဖမ်းဆီးသွားတယ်လို့ ဆိုပါတယ်။

” ရွာမှာက စစ်တပ်ကအမြဲတမ်းမရှိဘူး။ ဟိုရက်တွေကရှိတယ်။ သူတို့ထွက်သွားပြီးမှလာတာ။ ပြည်သူ့စစ်ရှိတာကို ပြည်သူ့စစ် ၂ ဦးပါ ပါသွားတာ။ ကိုလင်းကတော့ရွာသားဘဲ” လို့ ကျေးရွာနဲ့နီးစပ်သူတဦးက မြေလတ်အသံကို ပြောပါတယ်။

ဖမ်းဆီးခံရသူ ၄ ဦးကိုတော့ ရွှေကျင်မြို့နယ်ဘက်ကို ဖမ်းခေါ်သွားတယ်လို့ သိရပြီး နိုဝင်ဘာ ၂၅ ရက်အထိ မိသားစုဝင်တွေနဲ့အဆက်အသွယ်မရဘူးလို့ ဆိုပါတယ်။

အုပ်ချုပ်ရေးမှူး ဦးတင်စိုးဟာ စစ်ကောင်စီခန့်အုပ်ချုပ်ရေးမှူးတဦးဖြစ်သလို စစ်တပ်လက်အောက်ပြည်သူ့စစ်အဖွဲ့တွေနဲ့ပေါင်းပြီး စစ်မှုထမ်းကြေးကောက်တာ၊ စစ်ကောင်စီတပ်ဖွဲ့တွေ ကျေးရွာကိုရောက်လာပါက ဧည့်ခံတာ၊ စစ်ကောင်စီဘက်ကခိုင်းတာတွေကိုပြုလုပ်ပေးနေသူလို့ ဆိုပါတယ်။

အုပ်ချုပ်ရေးမှူးနဲ့ပြည်သူ့စစ်၊ ရွာခံတွေကို ဖမ်းဆီးသွားသူတွေကတော့ ဘာကြောင့်ဖမ်းဆီးတယ်ဆိုတာမျိုးသတင်းထုတ်ပြန်တာမရှိသေးပါဘူး။

စာတည်း – ဟိန်းစံ

ပစ်ခတ်မှုဖြစ်ပြီးနောက် စစ်တောင်းမြစ်တလျှောက် စစ်တပ်က စစ်ဆေးမှုတင်းကြပ်

ဝေါ၊ နိုဝင်ဘာ ၁၂၊ ၂၀၂၅။

ပဲခူးတိုင်း၊ ဝေါမြို့နယ်၊ မြစ်ကျိုးကျေးရွာစျေးအနီးမှာ သေနတ်နဲ့ပစ်ခတ်ခံခဲ့ရတဲ့ နယ်ထိန်းရဲ စစ်ဆေးရုံတင်ပို့စဥ် သေဆုံးသွားတယ်လို့ ဝေါမြို့နယ်ပကဖနဲ့ ပဲခူးရဲတပ်ဖွဲ့အသိုင်းအဝိုင်းနဲ့နီးစပ်သူတွေဆီက သိရပါတယ်။

သေဆုံးသူဟာ မြစ်ကျိုးနယ်မြေရဲစခန်း နယ်ထိန်းဒုတပ်ကြပ် ဇင်မင်းသူ ဖြစ်ပြီး နိုဝင်ဘာ ၁၁ ရက် ယမန်နေ့ မနက် ၇ နာရီခန့်မှာ သူ့ရဲ့နေအိမ်ကနေ ရဲစခန်းကို ဆိုင်ကယ်မောင်းနှင်ထွက်လာစဥ် စျေးအနီးမှာ ဝေါ PDF တပ်ဖွဲ့ဝင်တွေက သေနတ်နဲ့အနီးကပ် ပစ်ခတ်ခဲ့တာလို့ ဆိုပါတယ်။

” ဒဏ်ရာပြင်းတော့မြစ်ကျိုးပို့တယ်။ အဲ့ကနေမနိုင်တော့ ညနေ ၅ နာရီလောက်မှာ မင်္ဂလာဒုံ(ဆေးရုံ)ပို့တာ လမ်းမှာတင်သေတယ်လို့ သတင်းပြန်ရထားတယ်။ သူပစ်ခံရပြီးတော့ စကစစစ်ကြောင်းထိုးမွှေနေတယ်”လို့ ဝေါမြို့နယ်ပကဖတာဝန်ခံက မြေလတ်အသံကို ပြောပါတယ်။

ဝမ်းဗိုက်နဲ့ ဦးခေါင်းတွေမှာ သေနတ်ဒဏ်ရာပြင်းထန်ရထားတဲ့ အဲ့ဒီနယ်ထိန်းရဲကို မြစ်ကျိုးဆေးရုံကနေတဆင့် မင်္ဂလာဒုံကုတင် ၁,၀၀၀ စစ်ဆေးရုံကို ပို့ဆောင်ကုသချိန် သေဆုံးသွားခဲ့ကြောင်း ပဲခူးရဲတပ်ဖွဲ့အသိုင်းအဝိုင်းကလည်း အတည်ပြုပါတယ်။

နယ်ထိန်းသေနတ်ပစ်ခတ်ခံရပြီးတဲ့နောက် ယမန်နေ့ညနေပိုင်းမှာ ဝေါမြို့ကထွက်ခွာလာတဲ့ စစ်ကော်မရှင်တပ်အင်အား ၇၀ ခန့်ဟာ မြစ်ကျိုးရွာကိုရောက်လာပြီး ကျေးရွာအဝင်အထွက်တွေမှာပိတ်ဆို့ရှာဖွေမှုတွေပြုလုပ်ကာ စစ်ဆေးမှုတင်းကြပ်နေတယ်လို့ ဆိုပါတယ်။

ဒါ့အပြင် စစ်ကော်မရှင်အဖွဲ့တွေဟာ မြစ်ကျိုးကျေးရွာအနီးက ဆင်ရွာကျေးရွာမှာ နိုဝင်ဘာ ၁၂ ရက် ဒီကနေ့အထိ တပ်စွဲထားပြီး စက်လှေဆိပ်၊ စစ်တောင်းမြစ်အနီးဝန်းကျင်ကို စစ်ဆေးမှုတွေ ပြုလုပ်နေတယ်လို့ သိရပါတယ်။

စာတည်း – ဟိန်းစံ

ဝေါ၊ နိုဝင်ဘာ ၁၁၊ ၂၀၂၅။

ပဲခူးတိုင်း၊ မြစ်ကျိုးကျေးရွာ၊ စျေးအနီးမှာ နယ်ထိန်းရဲ ပစ်ခတ်ခံရပြီး သေဆုံးနိုင်တယ်လို့ ဝေါမြို့နယ်ပကဖဆီက သိရပါတယ်။

ပစ်ခတ်ခံရသူဟာ မြစ်ကျိူးရဲစခန်းမှ ဒုတပ်ကြပ် နယ်ထိန်းရဲ ဇင်မင်းသူဖြစ်ပြီး နိုဝင်ဘာ ၁၁ ရက် ဒီမနက် ၇ နာရီခန့်က သူ့နေအိမ်အနီး စျေးနားမှာ ပစ်ခတ်ခဲ့တာလို့ ဆိုပါတယ်။

“သူ့အိမ်က စျေးနားမှာ။ စခန်းသွားဖို့ ယူနီဖောင်းဝတ်ပြီး ဆိုင်ကယ်နဲ့ထွက်လာချိန်မှာ ဦးခေါင်း ၁ ချက်၊ ဝမ်းဗိုက် ၃ ချက်ပစ်ခဲ့တယ်။ မသေရင်တောင်ဒဏ်ရာပြင်းထန်ဘဲ သေဖို့များတယ်”လို့ ဝေါမြို့နယ်ပကဖတာဝန်ခံက ပြောပါတယ်။

ပစ်ခတ်ပြီးနောက်မှာတော့ နယ်ထိန်းဇင်မင်းသူရဲ့ ဖုန်း ၁ လုံးကို သိမ်းဆည်းနိုင်ခဲ့ပြီး တပ်ဖွဲ့ဝင်တွေကတော့ လုံခြုံတဲ့နေရာကိုပြန်ရောက်နေပြီလို့ ဆိုပါတယ်။

နယ်ထိန်းပစ်ခံရပြီးနောက် စစ်ကော်မရှင်နဲ့ရဲတွေလာရောက်စစ်ဆေးခဲ့ပြီး လူနာတင်ယာဥ်နဲ့မြစ်ကျိုးဆေးရုံကိုသယ်ဆောင်သွားကာ စျေးအနီး၊ ရွာဝင်အထွက်လမ်းတွေနဲ့လှေဆိပ်တွေမကျန် စစ်ဆေးမှုတွေပြုလုပ်ခဲ့တယ်လို့ သိရပါတယ်။

နယ်ထိန် ဇင်မင်းသူဟာ ပြည်သူကို မထင်ရင်မထင်သလိုရိုက်နှက်စစ်ဆေး၊ ဒုက္ခပေးငွေညစ်၊ ဆိုင်ကယ်ဖမ်း၊ ရွာမှာလောင်းကစားဖွင့်ပြီး ရွာသားတွေ အကျင့်စာရိတ္တပျက်အောင်လုပ်ဆောင်နေကာ စစ် ကော်မရှင်နဲ့ပူးပေါင်းကာ တက်ကြွလှုပ်ရှားသူတွေနဲ့ PDF တွေကိုလိုက်လံစုံစမ်းနေတာကြောင့် ပစ်ခတ်ခဲ့တာလို့ ဆိုပါတယ်။

မတ်လ ၁၈ ရက်ကလည်း ဝေါမြို့နယ်၊ လက်ပန်ရွာမှာ စစ်ကော်မရှင်တပ်စွဲထားတဲ့ ပျူစောထီးခေါင်းဆောင် အောင်ကြီးနေအိမ် ဒရုန်းနဲ့ဗုံးချတိုက်ခိုက်ခံရပြီး ၂ ဦးသေဆုံးကာ ၇ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ဝေါ၊ ဩဂုတ် ၂၃၊ ၂၀၂၅။

ပဲခူးတိုင်း၊ ဝေါမြို့နယ်ပြည်သူ့ကာကွယ်ရေးအဖွဲ့ဝင် ၁ ဦးဖြစ်တဲ့ ရန်နိုင်စိုး(ခ)နှစ်ဆယ် ဟာ တပ်ဖွဲ့ပိုင်ငွေကျပ် ၁၀ သိန်းကိုယူဆောင်ပြီး ထွက်ပြေးသွားတယ်လို့ ပကဖတာဝန်ခံဆီက သိရပါတယ်။

ဩဂုတ် ၁၈ ရက်မှာ ရှေ့တန်းတနေရာကနေ ဘဏ္ဍာရေးအဖွဲ့ရှိတဲ့ နောက်တန်းတနေရာကို ပြန်ပို့ခိုင်းလိုက်တဲ့ ပြည်သူလှူဒါန်းငွေကျပ် ၁၀ သိန်းကိုယူဆောင်ပြီး ထွက်ပြေးသွားတာလို့ ဆိုပါတယ်။

“သူမိသားစုအရေး အဆင်မပြေတာတွေပါတယ်။ နောက်ပိုင်း သူ့မိဘတွေက ကျန်းမာရေးမကောင်း အဆင်မပြေတော့ စိတ်ဓာတ်တွေကျလာတာလည်းပါတယ်။ သူ့မှာ ကိုယ်ရေးကိုယ်တာ အခက်အခဲတွေပါလာတယ်။ သူ့အမေလည်းကျန်းမာရေးမကောင်းလို့ ဆေးရုံတင်ထားရတယ်။ အဲ့လိုတွေကြောင့် လုပ်သွားတယ်လို့ မြင်တယ်”လို့ ဝေါပကဖ တာဝန်ခံက ပြောပါတယ်။

တော်လှန်ရေးကာလ ကြာမြင့်လာတာနဲ့အမျှ တပ်ဖွဲ့ဝင်တွေရဲ့ ကိုယ်ရေးကိုယ်တာအခက်အခဲလည်းရှိလာကြချိန် စိတ်ဓာတ်ကျလာသူတွေရှိသလို စိတ်ဓာတ်မကျဘဲ ဆက်လက်တိုက်ပွဲဝင်သူတွေလည်း ရှိနေတယ်လို့ သူကဆက်ပြောပါတယ်။

ရန်နိုင်စိုး (ခ) နှစ်ဆယ်ရဲ့မိခင်ဟာ ဆေးရုံတက်နေရတာကို တပ်ဖွဲ့ကိုတင်ပြလာတာကြောင့် မိခင် ဆေးကုသဖို့ တပ်ဖွဲ့အနေနဲ့ ငွေကျပ် ၁ သိန်း ကူညီထောက်ပံပေးခဲ့သေးတယ်လို့ ဆိုပါတယ်။

ရန်နိုင်စိုး (ခ) နှစ်ဆယ်ဟာ လက်ရှိမှာတခြားနေရာတခုကိုထွက်ပြေးပြီး အလုပ်လုပ်မယ်လို့သိထားရကာ စစ်ကောင်စီဘက်ကို ကူးပြောင်းသွားတာမျိုးတော့မဟုတ်ဘူးလို့ အထက်ပါတာဝန်ခံက ပြောပါတယ်။

ရန်နိုင်စိုး (ခ) နှစ်ဆယ်ဟာ စစ်ကော်မရှင်တပ်မှာစစ်မှုထမ်းရမှာကြောက်ပြီး ၂၀၂၃ မှာ ဝေါမြို့နယ်ပကဖ ဆီဝင်ရောက်လာသူဖြစ်ကာ တပ်ဖွဲ့မှာ တာဝန်ထမ်းဆောင်ချိန် အမိန့်နာခံပြီး အလုပ်ကို ကြိုးစားလုပ်ကိုင်သူ တဦးဖြစ်တယ်လို့ သိရပါတယ်။

ယခုလို တပ်ဖွဲ့ပိုင်ငွေတွေကို ယူဆောင်ပြီးထွက်ပြေးသွားမှုဟာ ပထမဆုံးအကြိမ်ဖြစ်ပြီး သူနဲ့အတူ တပ်ဖွဲ့ပိုင်လက်နက်တွေပါသွားတာမျိုးမရှိဘူးလို့ ဆိုပါတယ်။

ဝေါမြို့နယ်ပကဖ အဖွဲ့ဟာ စစ်အာဏာရှင်စနစ်ကို လက်မခံတဲ့လူငယ်တွေနဲ့ဖွဲ့စည်းထားပြီး စစ်အာဏာသိမ်းပြီးနောက် ၂၀၂၂ ကစတင်ကာ လက်နက်ကိုင်တိုက်ပွဲဝင်နေကြတာလို့ သိရပါတယ်။

စာတည်း – လင်း

■ ယာဥ်တိုက်မှုကြောင့် စစ်ဆေးရေးဂိတ်အနီး နှစ်ဖက်သွားလာမယ့်ကားတွေ ပိတ်ဆို့နေ

ဝေါ၊ မတ် ၃၁၊ ၂၀၂၅။

ပဲခူးတိုင်း၊ ဝေါမြို့နယ်၊ ရန်ကုန်-မော်လမြိုင်ကားလမ်းရှိ ညောင်ခါးရှည်စစ်ဆေးရေးဂိတ်မှာတန်းစီကားတွေကို စစ်တပ်ကားကဝင်တိုက်ပြီး တိမ်းမှောက်လို့ ၈ ဦးဒဏ်ရာရတယ်လို့ ညောင်ခါးရှည်စစ်ဆေးရေးဂိတ်နဲ့နီးစပ်သူတွေထံက သိရပါတယ်။

မတ် ၃၁ ရက် ဒီကနေ့မနက် ၁၀ နာရီခန့်မှာ ရန်ကုန်-မော်လမြိုင်ကားလမ်းအတိုင်း ဝေါဘက်ကနေ မွန်ပြည်နယ်ဘက်ကို မောင်းနှင်လာတဲ့ စစ်တပ်ကားက ညောင်ခါးရှည်ဂိတ်မှာ တန်းစီနေတဲ့ ခရီးသည်တင် ပရိုဘောက်ကား ၁ စီး၊ ကုန်တင် ၁၂ ဘီးကား ၂ စီးတို့ကို ဝင်တိုက်ပြီးတိမ်းမှောက်သွားတာလို့ ဆိုပါတယ်။

” ကားက နေပြည်တော် တပ်မတော်နေ့အခမ်းအနားပြီးလို့ပြန်လာတဲ့ စစ်မေတွေလိုက်ပါလာတဲ့ကား။ ရပ်ထားတဲ့ကားတွေကို အရှိန်နဲ့ဝင်တိုက်ပြီး တိမ်းမှောက်သွားတာ “လို့ ညောင်ခါးရှည်စစ်ဆေးရေးဂိတ်နဲ့နီးစပ်သူတဦးက မြေလတ်အသံကို ပြောပါတယ်။

ယာဥ်တိမ်းမှောက်တာကြောင့် စစ်တပ်ကားပေါ်ပါ စစ်ကောင်စီတပ်ဖွဲ့ဝင်အမျိုးသမီး ၅ ဦးနဲ့ ယာဥ်မောင်းတပ်သား ၁ ဦး၊ ပရိုဘောက်ယာဥ်ပေါ်က မော်လမြိုင်မြို့နေ အသက် ၃၀ ကျော်အမျိုးသား ၁ ဦးနဲ့အမျိုးသမီး ၁ ဦး စုစုပေါင်း ၈ ဦး ပြင်းထန်ဒဏ်ရာရရှိသွားပြီး စစ်တပ်ကားယာဥ်မောင်းကတော့ သတင်းဖော်ပြနေတဲ့အချိန်ထိ ကားခေါင်းထဲညပ်နေပြီး ထုတ်မရသေးဘူးလို့ ဆိုပါတယ်။

ထိခိုက်ဒဏ်ရာရသူတွေကိုတော့ ကျိုက်ထိုဆေးရုံကို သယ်ဆောင်သွားပြီး ယာဥ်မောင်းကိုတော့ ဆွဲထုတ်ဖို့ ကြိုးစားနေကြတယ်လို့သိရကာ စစ်ကောင်စီတပ်ကားနဲ့ အတိုက်ခံခဲ့ရတဲ့ အရပ်ကား ၃ စီးလည်း ပျက်စီးသွားတယ်လို့ သိရပါတယ်။

ယာဥ်တိုက်မှုဖြစ်ပွားခဲ့ပြီး စစ်ကားတိမ်းမှောက်သွားတာကြောင့် လမ်းပိတ်နေလို့ နှစ်ဖက်သွားလာမယ့် ခရီးသွားကားတွေလည်း ပိတ်မိနေကာ စောင့်ဆိုင်းနေကြရတယ်လို့ သိရပါတယ်။

စာတည်း – ဟိန်းစံ