လျှပ်စစ်မီး

မုံရွာ၊ ဧပြီ ၂၆၊ ၂၀၂၅။

စစ်ကိုင်းတိုင်း၊ မုံရွာမြို့ပေါ်ရပ်ကွက်တွေမှာ ၁ ရက်မှာ လျှပ်စစ်မီး ၂၃ နာရီပြတ်တောက်ပြီး ၁ နာရီသာရရှိတာကြောင့် အခက်ကြုံနေရတယ်လို့ မြို့ခံတွေက ပြောပါတယ်။

မုံရွာမြို့ပေါ် ဒေါနခြံ၊ လယ်တီ၊ အောင်မင်္ဂလာ၊ ဂွေးကြီး၊ အောင်ချမ်းသာ၊ ရုံးကြီး၊ ချမ်းမြသာစည်၊ ချမ်းမြဝတီ၊ သလ္လာ၊ ဆူးလေကုန်းစတဲ့ရပ်ကွက်တွေမှာ ဧပြီ ၁၈ ရက်ကစတင်ကာ ယနေ့အထိ ၁၀ ရက်ခန့်ကြာ အထက်ပါအတိုင်းပြတ်တောက်နေတာလို့ ဆိုပါတယ်။

” ဘုန်းကြီးပျံရှိလို့တဲ့ အဲ့ဘက်ကို မီးပေးနေရလို့ မီးအားမနိုင်တာမို့ ကျန်တဲ့ရပ်ကွက်တွေကိုဖြတ်ထားရတာလို့ ပြောတယ်”လို့ မုံရွာလျှပ်စစ်ရုံးရဲ့ဖြေကြားချက်ကို ဒေါနခြံရပ်ကွက်နေ အမျိုးသမီးတဦးက ပြောပါတယ်။

မုံရွာအခြေစိုက် နမခတိုင်းမှူးအပါ စစ်တပ်အရာရှိကြီးတွေကိုးကွယ်တဲ့ ရန်ကင်းရပ်ကွက်ရှိ ရန်ကင်းကျောင်း ကျောင်းထိုင်ဘုန်းကြီးဟာ ဧပြီ ၁၈ ရက်မှာ ပျံ လွန်ခဲ့ပြီး ၎င်းဘုန်းကြီးပျံပွဲကျင်းပနေတာကြောင့် ရန်ကင်းရပ်ကွက်တခုတည်းသာမီးရရှိကာ ကျန်ရပ်ကွက်တွေမှာ အခုလို ၁၀ ရက်ခန့်ကြာ မီးပြတ်တောက်နေတာလို့ ဆိုပါတယ်။

“ ပေးတဲ့ ၁ နာရီကလည်း မီးအားမနိုင်လို့လား မသိဘူး ၊ ၅ မိနစ်ပျက် ၅ မိနစ်လာ ဘာမှလုပ်လို့ကို မရဘူး” လို့ အထက်ပါအမျိုးသမီးက ပြောပါတယ်။

လျှပ်စစ်မီးရရှိချိန် ၁ နာရီမှာလည်း အပြည့်အဝမရရှိတာကြောင့် သုံးရေရရှိဖို့အတွက် အိမ်တိုင်ရာရောက် မီးစက်အသုံးပြုရေတင်ပေးသူတွေကို ငွေကျပ် ၂၀၀၀၀ ကျော် ပေးဆောင်ကာ နေ့စဥ်အသုံးပြုနေရတယ်လို့ သိရပါတယ်။

ယခင်က လျှပ်စစ်မီးပြတ်တောက်ချိန် စည်ပင်ရေရရှိပေမယ့် လက်ရှိမှာ စည်ပင်ရေပါမလာတော့တာကြောင့် မြို့ခံတွေအနေနဲ့ သုံးရေအဓိက အခက်အခဲဖြစ်နေတယ်လို့ ဆိုကြပါတယ်။

“ ပေးတဲ့ ၁ နာရီကလည်း လူအိပ်ချိန်တွေပဲလာတော့ ရသလောက်တော့ ရေတင်ရတာ၊ အိပ်ရေးတွေလည်း ပျက်လို့” လို့ အောင်မင်္ဂလာရပ်ကွက်က အိမ်ထောင်ရှင်မတဦးက မြေလတ်အသံကို ပြောပါတယ်။

လက်ရှိမုံရွာမြို့မှာ နေ့အပူချိန် ၄၁ ဒီဂရီဆဲလ်ဆီးယပ်စ်ထိ ရောက်ရှိနေပြီး လျှပ်စစ်မီးမလာတာကြောင့် သက်ကြီးရွယ်အိုတွေနဲ့ ကလေးငယ်တွေဟာ အပူဒဏ်ကို အပြင်းအထန် ခံစားနေရတယ်လို့လည်း သူကဆက်ပြောပါတယ်။

ဧပြီ ၂၆ ရက် ယမန်နေ့ ညနေ ၂ နာရီခွဲမှာ ရန်ကင်းကျောင်းထိုင်ဘုန်းကြီးရဲ့ ရုပ်ကလာပ်ကို စျာပနသင်္ဂြိုဟ်ပွဲပြုလုပ်ပြီးစီးပြီဖြစ်ပေမယ့် ဒီကနေ့ ဧပြီ ၂၇ ရက်အထိ လျှပ်စစ်မီးဆက်လက်ပြတ်တောက်နေဆဲဖြစ်ပြီး မြို့ခံတွေအနေနဲ့ ယခင်ကလို ၂၄ နာရီမှာ ၈ နာရီခန့် လျှပ်စစ်မီး ပုံမှန်ပြန်ရဖို့ မျှော်လင့်နေကြတယ်ပါတယ်။

ပုံစာ – မုံရွာမြို့ ရန်ကင်းဘုန်းကြီးကျောင်းတိုက် ကျောင်းထိုင်ဆရာတော်ပျံလွန်တော်မူချိန် ကျောင်းအဝင်ပေါက်ကို တွေ့ရစဉ်။

စာတည်း – ဟိန်းစံ

မကွေး၊ မေ ၁၆၊ ၂၀၂၃။

မကွေးတိုင်း၊ပခုက္ကူမြို့နယ်မှာ မုန်တိုင်းတိုက်ခတ်ပြီးနောက် မြို့နယ်တခုလုံး လျှပ်စစ်မီးပြတ်တောက်နေပြီး ၃ ရက်ထက်မနည်းပျက်မှာဖြစ်တဲ့အတွက် သောက်သုံးရေခက်ခဲနေကြကာ အချိန်အတိုင်းတာနဲ့ အလှည်ကျဖုန်းအားသွင်းနေရတယ်လို့ ဒေသခံတွေဆီကတဆင့် သိရပါတယ်။

မေလ ၁၄ ရက် ညပိုင်းက မိုခါမုန်တိုင်းတိုက်ခတ်မှုကြောင့် ပခုက္ကူပင်မဓာတ်အားခွဲရုံကို ဓာတ်အားပို့လွှတ်နေတဲ့ ညောင်ပင်ကြီး-ဗုဒ္ဓကုန်းဓာတ်အားလိုင်းနဲ့ ကျွန်းချောင်း-ဗုဒ္ဓကုန်းဓာတ်အားလိုင်း 132 kV ၂ တိုင်ကျိုးကျသွားတဲ့အတွက် အခုလို တမြို့နယ်လုံးအတိုင်းအတာနဲ့ မီးမရတော့တာ ဖြစ်တယ်လို့ ဆိုပါတယ်။

“မီးက ၃ ရက်ထက် ပိုကြာနိင်တယ်၊ ရေတွင်းရှိတဲ့သူတွေကတော့ ရေတွင်းကရေကို ကြိုးနဲ့ဆွဲပြီးသုံးရတယ်။ ရေကတော့ အဆင်မပြေဘူး၊ ဒီထပ်ပိုကြာရင် ပိုဆိုးမှာ။ ချိုးရေထက် သောက်ရေနဲ့ ထမင်း၊ဟင်းချက်ဖို့က လိုတယ်” လို့ ပခုက္ကူဒေသခံတဦးက မြေလတ်အသံကို ပြောပါတယ်။

လက်ရှိမှာ မြို့ပေါ်ပရဟိတအဖွဲ့တွေက မီးစက်နဲ့ရေလိုက်မောင်းပေးတာတွေ၊ ရေတွင်းရှိတဲ့အိမ်က ရေပြန်လည်ဝေမျှတာတွေ လုပ်ဆောင်ပေးနေပြီး တမြို့လုံးအတိုင်းအတာနဲ့တော့ ရေလုံလောက်မှု မရှိဘဲ ရေရရှိရေးအတွက် ငွေကြေးတတ်နိုင်တဲ့သူတွေက မီးစက်ငှားပြီး ရေတင်တာတွေလုပ်ဆောင်နိုင်ပေမယ့် ငွေကြေးမတတ်နိုင်တဲ့သူတွေအတွက် လက်ရှိစက်သုံးဆီဈေးနှုန်းနဲ့ မီးစက်အသုံးပြုဖို့ အဆင်မပြေဘူးလို့ ဆိုပါတယ်။

ဒါ့အပြင် ဖုန်းအားရရှိရေးအတွက် မြို့ပေါ်မှာရှိတဲ့ ဖုန်းဆိုင်၊ လက်ဖက်ရည်ဆိုင်၊ အလှပြင်ဆိုင်၊ ဘီယာဆိုင်တွေကလည်း ဖုန်းအားအခမဲ့သွင်းဖို့နေရာတွေ လုပ်ဆောင်ပေးထားပြီး စစ်ကောင်စီ EPC ရုံးက တော့ မနက် ၁၀ နာရီကနေ ၁၂ အထိတကြိမ်၊ နေ့လည် ၁ နာရီကနေ ၄ နာရီ ထိတကြိမ် မီးစက်နှိုးကာ အလှည့်ကျ ဖုန်းအားအခမဲ့သွင်းနိုင်ရေး စီစဉ်ထား‌ပေးတယ်လို့သိရပါတယ်။

မြို့ပေါ်ရပ်ကွက်တချို့တွေမှာတော့ ဖုန်းအားသွင်းဖို့ အခကြေးငွေပေးကာ သွင်းနေရပြီး ဖုန်းတလုံးကို ၃၀၀ ကျပ်နဲ့ ပေးသွင်းနေရတယ်လို့ ဒေသခံတွေကပြောဆိုပေမယ့် မြေလတ်အသံအနေနဲ့တော့ အတည်ပြုနိုင်ခြင်း မရှိသေးပါဘူး။

ပခုက္ကူ EPCရုံးကတော့ ဓာတ်အားလိုင်းပြင်ဆင်ချိန် ၃ရက် ကြာနိုင်တယ်လို့ ကနဦးပြောဆိုထားပေမယ့် ဒီကနေ့ မနက်ပိုင်းမှာတော့ ပြုပြင်ရေးပိုင်း အခက်ခဲတွေရှိနေတဲ့အတွက် ခန့်မှန်းရက်ထက် ပိုကြာနိုင်တယ်လို့ ပြန်လည်ပြောဆိုထားပါတယ်။

ပခုက္ကူမှာမိုခါမုန်တိုင်းကြောင့် ပခုက္ကူမြို့ပေါ် ရွှေချောင်း ချောင်းဘေးမှာရှိတဲ့ အမှတ် ၁ ရပ်ကွက်၊ အမှတ် ၃ ရပ်ကွက်နဲ့ အောင်ချမ်းသာရပ်ကွက်က အိမ်ထောင်စု ၃၀ နဲ့ တဲအိမ် ၃၀ ရေမျောပါ ပျက်စီးမှုရှိခဲ့ပြီး လေပြင်းတိုက်ခတ်တာကြောင့် ဓာတ်အားပေးလိုင်းတွေကျိုးကျကာ လျှပ်စစ်မီးရက်ရှည်ပြတ်တောက်မယ့် အခြေအနေနဲ့ရင်ဆိုင်နေရတာဖြစ်ပါတယ်။

စာတည်း- ရင်ငြိမ်း

ပဲခူး၊ မတ် ၁၁၊ ၂၀၂၂။

ပဲခူးတိုင်း ပြည်မြို့မှာ လျှပ်စစ်မီးပုံမှန်မလာသလို စည်ပင်ကပေးတဲ့ ရေကိုလည်း လိုအပ်တဲ့ အချိန်တင်မရလို့ ဒေသခံတွေ ရေဝယ်သုံးနေရပါတယ်။

လျှပ်စစ်မီးက အချိန်အတိုင်းအတာနဲ့ ရရှိပြီး မီးရရှိတဲ့ အချိန်မှာရေတင်ရင်လည်း တင်မရတာ ရေအားနည်းတာမျိုးတွေ ဖြစ်နေလို့ ရေစည်နဲ့ ဝယ်သုံးနေရတယ်လို့ ပြည်မြို့ဒေသခံတဦးက ပြောပါတယ်။

” စည်ပင်ရေ မလာတာ အတော်ကြာပြီ တချို့ရပ်ကွက်တွေမှာ ရေလာပြန်တော့လည်း မီးမလာလို့ ရေတင်လို့မရတဲ့ဖြစ်ရပ်တွေ ဖြစ်နေပါတယ်” လို့ ရေဝယ်သုံးနေရတဲ့ ဒေသခံတဦးက ပြောပါတယ်။

ရေစည် ၁စည် ကို ၃၀၀၀ ကျပ်ပေးရပြီး မိသားစုများတဲ့ ‌အိမ်တွေက တစည်ကို ၁ရက်ပဲ အသုံးခံတယ်လို့ ပြောပါတယ်။

ရေစည်လှည်းတွန်းပြီးရောင်းတဲ့ သူတွေရှိသလို သုံးဘီးဆိုင်ကယ်တဲ့ ရေလိုက်ရောင်းတဲ့ လုပ်ငန်းတွေ လုပ်ကိုင်လာတာကိုလည်းတွေ့ရတယ်လို့ အဲ့ဒီဒေသခံကပဲ ပြောပါတယ်။

” ရေ ဝယ်သုံးနေရတာ ၅ရက် ရှိပါပြီမိသားစုများတဲ့အိမ်ဆိုလျှင် ရေတစည်ကို ၁ရက် ဘဲ အသုံးခံတယ်။ဒါတောင် တော်တော်လေး ခြိုးခြံချွေတာပြီး သုံးစွဲရတယ်၊ ကိုယ်ပိုင်အဝိစိတွင်းမရှိတဲ့အိမ်တွေကတော့ ရေဝယ်သုံးနေရပါတယ်” လို့ ပြောပါတယ်။

ဆံတော်ရပ်ကွက်၊ကျောင်းကြီးအိုးတန်းရပ်ကွက်၊နဝင်းရပ်ကွက်၊ရွှေကူရပ်ကွက်၊ဆင်စုရပ်ကွက် စတဲ့ရပ်ကွက်အများစုမှာ စည်ပင်ရေ မလာတာ၊လာတာ နည်းတာတွေ တွေ့နေရပြီး တချို့ရပ်ကွက်တွေမှာ အလှူရှင်တွေက ရေလှူဒါန်းတာမျိုးတွေလည်း ရှိခဲ့တယ်လို့ သိရပါတယ်။

“မီးကတော့အချိန်နဲ့လာပါတယ် အိမ်ကအဝီစိတွင်းဆို‌တော့ မီးလာရင်ရေတင်လို့ရပေမဲ့ကျန်တဲ့အိမ်လေးတွေက စည်ပင်ရေလာမှ အဆင်ပြေတာ၊ အဲဒါကြောင့် မီးသတ်ကား အလှူငွေထည့်ပြီး မြစ်ထဲကရေစုပ်ပြီး လာလှူပေးတာ” လို့ ရေအလှူရှင် တဦးက ပြောပါတယ်။

ပြည်မြို့မှာ လျှပ်စစ်မီးက တရက်ကို အများဆုံး ၈နာရီနီးပါးပဲ ရရှိပြီး အဲ့ဒီထက်နည်းဖို့ပဲရှိတယ်လို့ သိရပါတယ်။

” ညဘက် မီးလာရင် မနက် ၃နာရီဝန်းကျင်ဆိုရင် မီးပျက်ပြီ။ နေ့လည် ၁နာရီဝန်းကျင်ဆိုရင် မီးပြန်လာတတ်တယ်။၃နာရီဆိုလျှင် မီးကပြန်ပြတ်တယ်။မီးကလာလိုက် ပျက်လိုက်ဘဲ” လို့ ပြည်မြို့မှာ မီးရရှိတဲ့ အခြေအနေကို ရေဝယ်သုံးနေရတဲ့ ဒေသခံကပဲ ပြောပါတယ်။

နွေရာသီဖြစ်တဲ့ အပြင် ဓါတ်ဆီစျေးတွေ စံချိန်တင် မြင့်တက်နေတာကြောင့် မီးစက်မောင်းဖို့လည်း မတတ်နိုင်သလို့ စီးပွားလုပ်ငန်းတွေလည်း ရပ်နားထားရသူတွေ ရှိသလို မီး ၆ရက် ပြတ်မယ်ဆိုတဲ့ သတင်းတွေကြောင့် ပြည်သူတွေဒုက္ခ‌ရောက်နေကြတယ်လို့ သိရပါတယ်။