ရွှေဘို၊ နိုဝင်ဘာ ၁၉၊ ၂၀၂၅။

စစ်ကိုင်းတိုင်း၊ ရွေဘိုမြို့ပေါ်ရပ်ကွက်တွေမှာ စစ်ကော်မရှင်တပ်က ပေါ်တာဆွဲဖမ်းဆီးမှုတွေ ဆက်တိုက်လုပ်နေပြီး မင်္ဂလာဆောင်ပွဲတွေထဲအထိ လူငယ်တွေကို ဝင်ရောက်ဖမ်းဆီးနေတယ်လို့ မြို့ခံတွေက ပြောပါတယ်။

နိုဝင်ဘာ ၁၂ ရက်ကစတင်ပြီး စစ်ကော်မရှင်တပ်နဲ့ရဲပူးပေါင်းအင်အား ၃၀ ခန့်ဟာ ရွှေဘိုစျေးထိပ်၊ ကားဝန်းထိပ်၊ စစ်ကိုင်းမြို့ဘက်အထွက်မန္တလေး-ရွှေဘိုလမ်းပိုင်း၊ အထက ၁ ကျောင်းရှေ့၊ တောင်ငူနဂါးလမ်း၊ ရေဦးလမ်းပိုင်းတွေမှာ နေ့ရောညပါနေ့စဥ်စောင့်ဆိုင်းဖမ်းဆီးတာအပြင် ညပိုင်းတွေမှာ နေအိမ်ထဲထိ ဝင်ရောက်ဖမ်းဆီးတာတွေပြုလုပ်နေကာ တပတ်အတွင်း လူငယ် ၅၀ ခန့်ဖမ်းဆီးခံထားရတယ်လို့ ဆိုပါတယ်။

” လှည့်ပတ်ပြီးတော့ မသင်္ကာရင်ဆွဲသွားတာပဲ။ လက်ဖက်ရည်ဆိုင်မှာ၊ ညဘက်အိမ်ထဲဧည့်စာရင်းစစ်ရင်း လူငယ်တွေ့ရင်ခေါ်သွားတယ်။ ဒီရက်ပိုင်းအတွင်းမှာကိုလုပ်နေတာ” လို့ ရွှေဘိုမြို့ခံတဦးက မြေလတ်အသံကို ပြောပါတယ်။

ဒါ့အပြင် စစ်ကော်မရှင်ပူးပေါင်းတပ်တွေဟာ မြို့တွင်းရှိလူငယ်တွေထိုင်လေ့ရှိတဲ့ လက်ဖက်ရည်ဆိုင်တွေနဲ့ မင်္ဂလာဆောင်ပွဲတွေအထိပါ လိုက်လံဖမ်းဆီးနေပြီး နိုဝင်ဘာ ၁၉ ရက် ဒီကနေ့မနက်ပိုင်းမှာ အမှတ် ၁ ဘူတာရပ်ကွက် အပိုင်း(က)မှာပြုလုပ်နေတဲ့ မင်္ဂလာဆောင်ပွဲတခုကို ဝင်ရောက်ဖမ်းဆီးခဲ့ရာ လူငယ် ၅ ဦးခန့် ဖမ်းဆီးခံခဲ့ရတယ်လို့ ဆိုပါတယ်။

စစ်ကော်မရှင်တပ်ရဲ့ စစ်မှုထမ်းပေါ်တာဆွဲဖမ်းဆီးမှုတွေကြောင့် ရွှေဘိုမြို့တွင်းမှာ လူငယ်နဲ့လူလတ်ပိုင်းအမျိုးသားတွေ အသွားအလာနည်းနေပြီး ကျေးရွာဘက်က လူငယ်အမျိုးသားတွေလည်း မြို့ပေါ် ကိုမလာရဲကြတော့ဘူးလို့ သိရပါတယ်။

ပေါ်တာဆွဲဖမ်းဆီးခံရသူတွေဟာ စစ်မှုထမ်းအသက်ကန့်သတ်ချက်အကျုံးဝင်တဲ့ အသက် ၁၈ ကနေ ၄၀ နှစ်ကြား အရွယ်တွေဖြစ်ပြီး ဖမ်းမိသူတွေကို ရွှေဘိုအခြေစိုက် အမှတ် ၈ စစ်အခြေခံလေ့ကျင့်ရေးတပ်မှာ ထိန်းသိမ်းထားရှိကာ အဲ့ဒီကတဆင့် ရဟတ်ယာဥ်တွေနဲ့ မုံရွာ နမခနဲ့ စစ်ကိုင်း တပ်မ ၃၃ ကို ပို့ဆောင်ဆေးစစ်တာတွေပြုလုပ်ပြီး စစ်သင်တန်းကျောင်းတွေကို ဆက်လက်ပို့ဆောင်နေတယ်လို့ သိရပါတယ်။

နိုဝင်ဘာ ၁၇ ရက်က နိုင်ငံတဝှမ်းစစ်ကော်မရှင်တပ် စစ်သင်တန်းကျောင်းတွေမှာ စစ်မှုထမ်းသင်တန်းအပတ်စဥ် ၁၉ ကို ဖွင့်လှစ်ခဲ့တယ်လို့ စစ်တပ်ထိန်းချုပ်မီဒီယာတွေမှာ ထုတ်ပြန်ပါတယ်။

လစဥ်ဖွင့်လှစ်နေတဲ့ စစ်မှုထမ်းသင်တန်းအပတ်စဥ်အသစ်တွေအတွက် လူလိုအပ်ချက်ပြည့်မှီနိုင်ရေး စစ်ကော်မရှင်တပ်က လမ်းသွားလမ်းလာလူငယ်တွေကို ဖမ်းဆီးတာအပြင် နေအိမ်တွေထဲအထိဝင်ရောက်ဖမ်းဆီးတာတွေလုပ်ဆောင်နေတယ်လို့ တော်လှန်ရေးတပ်တွေဆီဘက်ပြောင်းခိုလှုံလာတဲ့ စစ်မှုထမ်းစစ်သားအများစုက ပြောဆိုကြပါတယ်။

စစ်ကော်မရှင်တပ်က လူငယ်တွေကို ပေါ်တာဆွဲတာမှာ မကွေးတိုင်း၊ စစ်ကိုင်းတိုင်း၊ ပဲခူးတိုင်း၊ ဧရာဝတီတိုင်းတွေက မြို့နယ်တွေကို အဓိကပစ်မှတ်ထားဖမ်းဆီးနေတာလည်း ဖြစ်ပါတယ်။

စာတည်း – ဟိန်းစံ

ပွင့်ဖြူ၊ နိုဝင်ဘာ ၁၄၊ ၂၀၂၅။

မကွေးတိုင်း၊ မင်းဘူးခရိုင်၊ ပွင့်ဖြူနဲ့စကုမြို့နယ်တွေမှာ စစ်ကော်မရှင်တပ်ဖွဲ့ဝင်တွေက ပေါ်တာဆွဲဖမ်းဆီးတာတွေ ဆက်တိုက်လုပ်ဆောင်နေပြီး လူငယ် ၂၀ ကျော်ဖမ်းဆီးခံထားရတယ်လို့ ဒေသခံတွေဆီက သိရပါတယ်။

စကုမြို့နယ် လယ်ကိုင်းကျေးရွာလမ်းဆုံနဲ့ လယ်ကိုင်း-ကျောင်းတော်ရာအကြားလမ်းပိုင်းမှာ စစ်ကော်မရှင်ပူးပေါင်းတပ်တွေက ခရီးသွားကားတွေနဲ့ အနီးဝန်းကျင်ကျေးရွာတွေက လူငယ်တွေကို နိုဝင်ဘာလဒုတိယပတ်အတွင်း နေ့စဥ်ပေါ်တာဆွဲဖမ်းဆီးနေတာလို့ ဆိုပါတယ်။

” မနေ့ကလယ်ကိုင်းကနေ ကျောင်းတော်ရာသွားတဲ့နေရာမှာ (ခရီးသွားကားကို) ဆွဲတယ်။ ပါသွားတာက လူငယ် ၂ ဦးပါသွားတယ်။ ကားအမည်တော့ မသိလိုက်ဘူး ရိုးရိုးအရပ်ကားပါ။ အသက်အရွယ် ၁၈ နှစ်နဲ့ ၂၁ နှစ် အရွယ်တွေပါ၊ မနေ့ကမနက် ၁၀ နာရီလောက်မှာဆွဲတာ၊ နေ့တိုင်းလိုလိုဆွဲနေတာ” လို့ ပွင့်ဖြူမြို့ခံတဦးက မြေလတ်အသံကို ပြောပါတယ်။

အလားတူ ပွင့်ဖြူနဲ့ စလင်းမြို့အကြားက ရှောက်တောရွာအနီး မင်းဘူး – ပွင့်ဖြူ – စလင်းလမ်းပိုင်းမှာရှိတဲ့ မုန်းချောင်းတံတားထိပ်က စစ်ကော်မရှင်တပ်၊ ရဲနဲ့ ပျူစောထီးပူးပေါင်းတပ်ဖွဲ့တွေကလည်း ခရီးသွားကားတွေမှာပါလာတဲ့ လူငယ်တွေနဲ့ ဒေသခံလူငယ်တွေကို ပေါ်တာဆွဲဖမ်းဆီးနေတယ်လို့ သိရပါတယ်။

စစ်ကော်မရှင်တပ်ရဲ့ပေါ်တာဆွဲဖမ်းဆီးမှုတွေကြောင့် စကုမြို့နယ်ကျောင်းတော်ရာနဲ့ဝဲဒေါင့်ကျေးရွာတွေက အသက် ၁၈ ကနေ ၂၂ နှစ်ကြား လူငယ်အမျိုးသား ၁၅ ဦး၊ ပွင့်ဖြူမြို့နယ်မှာ အသက် ၂၅ ကနေ ၃၀ နှစ်အကြားရှိ လူငယ်မျိုးသားတွေဖြစ်တဲ့ အင်းနက်ရွာခံ ၁ ဦး၊ မုန်းဇလဲရွာခံ ၁ ဦး၊ တောင်အင်းရွာခံ ၁ ဦး၊ ရွာသစ်ရွာ ခံ ၁ ဦး၊ ခင်တဲရွာခံ ၁ ဦး၊ သူဌေးကုန်းရွာခံ ၃ ဦး စုစုပေါင်း ၈ ဦးအထိ ဖမ်းဆီးခံထားရတယ်လို့ သိရပါတယ်။

ဒါ့အပြင် ခရီးသွားကားတွေပေါ်ကလူငယ်တွေလည်း ဖမ်းဆီးခံထားရကာ အဲ့ဒီဖမ်းဆီးခံရမှုတွေကတော့ ခရီးသွားတွေဖြစ်တာကြောင့် ဖမ်းဆီးခံရသူတွေရဲ့ အခြေအနေတွေကို မသိရဘူးလို့ ဆိုပါတယ်။

နောက်ထပ် စကုမြို့ခံတဦးကတော့ ” စကုမြို့ နဲ့ ပွင့်ဖြူဘက်တွေမှာ အခု ၃ ရက်အတွင်း အဓမ္မစစ်မှုထမ်း တော်တော်ဆွဲခံရပါတယ်။ Honda Fit အနက်ရောင် YGN 1K/1815 နဲ့ ပတ်ဆွဲနေတာပါ” လို့ ပြောပါတယ်။

လက်ရှိမှာ ပေါ်တာဆွဲဖမ်းဆီးသွားသူတွေကို မင်းဘူးမြို့အခြေစိုက်စစ်ကော်မရှင်တပ်ရင်းတွေဆီ ပို့ဆောင်ထားပြီး အဲ့ဒီကတဆင့် မကွေးမြို့ အမှတ် ၃ စစ်သားစုဆောင်းရေးတပ်ကို ပို့ဆောင်လေ့ရှိတယ်လို့ သိရပါတယ်။

နိုဝင်ဘာလပထမပတ်အတွင်း မကွေးတိုင်းအပါမြို့ကြီးအများအပြားမှာ စစ်ကော်မရှင်ဦးဆောင်ပြီး တန်ဆောင်တိုင်ပွဲတွေပြုလုပ်ခဲ့ရာ အဲ့ဒီကာလတွေမှာ ပေါ် တာဆွဲဖမ်းဆီးတာတွေ ယာယီရပ်နားခဲ့ပြီးတဲ့နောက် ဒုတိယအပတ်ကစတင်ကာ မကွေးတိုင်းက မြို့နယ်တွေမှာ အခုလို ဖမ်းဆီးမှုတွေပြန်လည်မြင့်တက်လာတာလည်း ဖြစ်ပါတယ်။

စာတည်း – ဟိန်းစံ

နတ်တလင်း၊ အောက်တိုဘာ ၁၄၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ ဖလံပင်ကျေးရွာမှာ ဘိလိယက်ထိုးနေတဲ့ လူငယ်တွေဖမ်းဆီးခံရပြီး ၁ ဦးကို ကျပ်သိန်း ၂၀ စီနဲ့ ငွေပေးကာ ပြန်လည်ရွေးယူခဲ့ရတယ်လို့ ဒေသခံတွေဆီက သိရပါတယ်။

အောက်တိုဘာ ၁၃ ရက် ယမန်နေ့ ညနေ ၃ နာရီခန့်မှာ စစ်ကော်မရှင်တပ်နဲ့ပျူစောထီးပူးပေါင်းအင်အား ၃၀ ခန့်ဟာ နတ်တလင်းမြို့ပေါ်ကနေ နတ်တလင်း-ငုတ်တို-သရက်ပင်ကန်လမ်းအတိုင်း ဆိုင်ကယ်တွေနဲ့ ဖလံပင်ရွာကိုရောက်လာပြီး ရွာထိပ်ဘိလိယက်ခုံမှာ ဘိလိယက်ထိုးနေတဲ့ လူငယ် ၃ ဦးကို ဖမ်းဆီးခဲ့တာလို့ ဆိုပါတယ်။

” ဘိလိယက်ထိုးနေတာကိုဝင်ဖမ်းတယ်။ ဖမ်းပြီးတော့ သေနတ်ပစ်ဖောက်သွားသေးတယ်။ ခုံမှာက သူတို့တွေပဲရှိတာ။ ဖမ်းတော့ ဘေးကလူတွေက အဲ့မှာပါတဲ့ သက်ဝေအောင်က ကျောင်းသားဘဲရှိသေးတယ်လို့ဝိုင်းပြောကြတယ်။ သူက တက္ကသိုလ်ကျောင်းသား။ သူ့ကိုတော့ပြန်လွှတ်ပေးခဲ့တယ်” လို့ ဖလံပင်ရွာဒေသခံတဦးက မြေလတ်အသံကို ပြောပါတယ်။

ကျေးရွာဒေသခံတွေက ဝိုင်းဝန်းပြောဆိုတာကြောင့် တက္ကသိုလ်ကျောင်းသားလူငယ် ၁ ဦးကို လွှတ်ပေးခဲ့ပြီး အသက် ၃၀ အရွယ် အောင်မျိုးကျော်နဲ့ အသက် ၂၅ နှစ်အရွယ် ကိုဝိုင်းမင်းထွန်းတို့ ၂ ဦးကို စစ်ကော်မရှင်တပ်သားတွေက နတ်တလင်းရဲစခန်းဆီ ဖမ်းဆီးခေါ်ဆောင်သွားခဲ့တယ်လို့ ဆိုပါတယ်။

ဖမ်းဆီးခံရသူလူငယ်အမျိုးသား ၂ ဦးကို ၎င်းတို့ရဲ့မိသားစုဝင်တွေက ယမန်နေ့ညနေပိုင်းမှာပဲ နတ်တလင်းရဲစခန်းကနေ ၁ ဦးကို ကျပ်သိန်း ၂၀ ပေးပြီး ပြန်ရွေးထုတ်ခဲ့ရတယ်လို့ မိသားစုနဲ့နီးစပ်သူဒေသခံတွေထံက သိရပါတယ်။

ဖလံပင်ကျေးရွာစစ်ကော်မရှင်အုပ်ချုပ်ရေးမှူး မင်းသူဟာ နတ္တလင်းမြို့ပေါ်ကိုပြောင်းရွှေ့ပြီးရှောင်တိမ်းနေထိုင်တာ ၅ လခန့်ရှိနေပြီဖြစ်တာကြောင့် အဲ့ဒီရွာကနေ စစ်မှုထမ်းအတွက် လစဥ်ကောက်ငွေမရရှိတာ၊ စစ်မှုထမ်းဖို့လူမပေးတာတွေကြောင့် အခုလိုအင်အားသုံးလာရောက်ပေါ်တာဆွဲဖမ်းဆီးတာဖြစ်နိုင်တယ်လို့ အထက်ပါရွာခံက ဆက်ပြောပါတယ်။

စစ်ကော်မရှင်တပ်သားတွေဟာ လစဥ်ဖွင့်လှစ်နေတဲ့ စစ်မှုထမ်းသင်တန်းတွေအတွက် အုပ်ချုပ်ရေးမှူးတွေကတဆင့် ရပ်ကွက်၊ ကျေးရွာတွေကနေ ဆင့်ခေါ်စုဆောင်းတာတွေအပြင် လမ်းသွားလမ်းလာလူငယ်တွေကို ပေါ်တာဆွဲဖမ်းဆီးတာတွေ လုပ်ဆောင်နေကာ ပဲခူးတိုင်း၊ စစ်ကိုင်းတိုင်း၊ မန္တလေးတိုင်း၊ ဧရာဝတီတိုင်းတွေက လူငယ်တွေကို ပစ်မှတ်ထားဖမ်းဆီးနေတာပါ။

ဇန်နဝါရီလ ၁၆ ရက်ကလည်း နတ်တလင်းမြို့နယ်၊ ဆီဆုံကုန်းကျေးရွာကို စစ်ကော်မရှင်တပ်တွေ စစ်ကြောင်းထိုးဝင်ရောက်လာပြီးနောက် ရွာခံအမျိုးသား ၃ ဦးကိုဖမ်းဆီးပစ်သတ်ခဲ့သေးတယ်လို့ သိရပါတယ်။

စာတည်း – ဟိန်းစံ

တန့်ဆည်၊ စက်တင်ဘာ ၂၆၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာကို စစ်ကော်မရှင်တပ်က လေကြောင်းကနေ ဗုံးကြဲ တိုက်ခဲ့တာကြောင့် အသက် ၂၀ ဝန်းကျင်လူငယ်တွေအပါအဝင် ၈ ဦးသေဆုံးပြီး ၁၂ ဦး ထိခိုက်ဒဏ်ရာ ရခဲ့တယ်လို့ ဒေသခံတွေဆီကသိရပါတယ်။

ကံထူးမရွာက ‘နိုဘယ်ဝမ်း’ ဆီဆိုင်နဲ့ ‘ဇွဲထက်’ အအေးဆိုင်အနီး လူစည်းကားတဲ့နေရာကို စက်တင်ဘာ ၂၆ ရက်ဒီနေ့လယ် ၁၁ နာရီခွဲမှာ ဗုံးကြဲတိုက်ခိုက်ခဲ့တာလို့ ဆိုပါတယ်။

“အခုဆောက်နေတဲ့ နှစ်ထပ်တိုက်အရှေ့တည့်တည့်ကိုကျတာ။ အဲ့ဒီက ပန်းရံလုပ်နေတဲ့ အလုပ်သမား ၅ ဦး သေတာပါ။ တိုက်ပွဲလည်းမရှိဘူး။ လူစည်းကားတဲ့နေရာကို ရည်ရွယ်ချက်ရှိရှိလုပ်တာပါ”လို့ ဒေသခံ အမျိုးသားတဦးက ပြောပါတယ်။

လေကြောင်းတိုက်ခိုက်ခံရမှုကြောင့် အသက်၂၀ အရွယ် ဆီပန့်ဆိုင်ပိုင်ရှင်ရဲ့ သမီး၊ ၂၁ နှစ်အရွယ် ကုန်စိမ်းသည် အမျိုးသမီး ၁ ဦး၊ ၂၇ အရွယ် အမျိုးသား ၁ ဦး၊ ပန်းရံလုပ်နေတဲ့ ၄၃ နှစ်အရွယ် အမျိုးသား ၁ ဦးနဲ့ အသက် ၂၀ ကျော်အရွယ် အမျိုးသား ၄ ဦး စုစုပေါင်း ၈ ဦး သေဆုံးပြီး ၁၂ ဦး ဒဏ်ရာရကာ ၃ ဦးက ဒဏ်ရာပြင်းထန်ခဲ့တယ်လို့ ဆိုပါတယ်။

ဒီဗုံးကြဲမှုမှာ စစ်ကော်မရှင်တပ်က ပေါင် ၅၀၀ ဗုံး ၂ လုံးကိုသုံးခဲ့ပြီး လူ ၅ ဦးရဲ့ ရုပ်အလောင်းကို ပကတိအတိုင်းပြန်ရပြီး ၃ ဦးကိုတော့ အပိုင်းပိုင်းပြတ်နေတဲ့ ခန္ဓာကိုယ်အပိုင်းအစတွေကို ပြန်ကောက်ထားရတာလို့ ဆိုပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ စက်တင်ဘာ ၂၅ ထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ ဒေသခံစုစုပေါင်း ၇,၂၈၄ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

သတင်း – မြတ်

ချောက်၊ စက်တင်ဘာ ၆၊ ၂၀၂၅။

မကွေးတိုင်း၊ ချောက်မြို့၊ အမှတ် ၁၅ တိုးချဲ့ရပ်ကွက် ကိုရီးယားသင်တန်းကျောင်းက ပေါ်တာဆွဲဖမ်းဆီး ခံထားရတဲ့သင်တန်းသား ၁၃ ဦး ပြန်လွတ်လာတယ်လို့ ပြည်သူ့ညီနောင် – စလင်းအဖွဲ့ဆီက သိရပါတယ်။

စက်တင်ဘာ ၄ ရက် ညနေပိုင်းမှာ ၉ ဦး၊ စက်တင်ဘာလ ၅ ရက် နေ့လယ်ပိုင်းမှာ ၄ ဦး ပြန်လွတ်လာတာဖြစ်ပြီး ချောက်မြို့နယ်အထွေထွေအုပ်ချုပ်ရေးရုံးမှာ ခံဝန်ကတိထိုးကာ ငွေကျပ်သိန်း ၅၀ မှ သိန်း ၇၀ အတွင်း ငွေပမာဏနဲ့ မိသားစုဝင်တွေက ပြန်ရွေးခဲ့ကြရတာလို့ ဆိုပါတယ်။

“ခံဝန်ကတိက ဘယ်လိုမျိုးတွေ ထိုးရသလဲတော့ ကျနော်လည်း မပြောတတ်ဘူး၊ သူတို့ခံဝန်ကတိတွေနဲ့ လက်မှတ်ထိုးပြီးမှ သိန်း ၅၀၊ သိန်း ၆၀၊ သိန်း ၇၀ ပေးပြီးရွေးရတယ်၊ ကျောင်းသားမိဘတွေက သွားရွေးကြတာ၊ ၁၃ ဦးလုံးကတော့ သူတို့နေအိမ်တွေမှာ ပြန်ရောက်ပါပြီ၊” လို့ ပြည်သူ့ညီနောင် – စလင်းအဖွဲ့ တာဝန်ခံ ကိုပြည်သူက ပြောပါတယ်။

အဆိုပါသင်တန်းသား ၁၃ ဦးဟာ စလင်းမြို့နယ် ကျေးရွာတွေကနေ သင်တန်းလာတက်နေသူတွေဖြစ်ပြီး လက်ရှိမှာ စစ်ကော်မရှင်လက်ကနေပြန်လွတ်လာပြီးနောက် နေထိုင်ရာကျေးရွာတွေကို ပြန်လည်ရောက်ရှိသွားပြီလို့ သိရပါတယ်။

စက်တင်ဘာ ၄ ရက် နေ့လယ် ၃ နာရီဝန်းကျင်မှာ အထက်ပါ ဘာသာစကားသင်တန်းကျောင်းက သင်တန်းသား ၁၃ နဲ့ တရပ်ကွက်တည်းရှိ ‘ကော်နာ’ စားသောက်ဆိုင်က စားပွဲထိုးလူငယ်အမျိုးသား ၃ ဦးတို့ကို စစ်ကော်မရှင် တပ်ဖွဲ့ဝင်တွေနဲ့ ပျူစောထီးတွေကဖမ်းဆီးခဲ့တာလို့ ဒေသခံတွေကပြောပါတယ်။

ဒီဖမ်းဆီးမှုကို ထွေအုပ်ရုံးမှာထိုင်တဲ့ ချောက်မြို့နယ်စစ်ကော်မရှင်အဖွဲ့ဝင် ၁ DSA အပတ်စဥ် ၄၇ ဆင်း ဝါဇီတပ်က ဗိုလ်မှူး တင်ထွန်းဦးအမိန့်နဲ့ ဖမ်းဆီးခဲ့တာလို့ သိရပါတယ်။

သင်တန်းသား ၁၃ ဦးပြန်လွတ်လာပေမယ့် စက်တင်ဘာ ၆ ရက်ထိ ချောက်မြို့ခံ စားပွဲထိုးလူငယ် ၃ ဦးကတော့ ငွေမပေးနိုင်တာကြောင့် ချောက်မြို့မရဲစခန်းမှာ ဆက်လက်ချုပ်နှောင်ထားတယ်လို့ ပြည်သူ့ညီနောင် – စလင်းအဖွဲ့တာဝန်ခံ ကိုပြည်သူက ပြောပါတယ်။

ခုလိုစစ်ကော်မရှင်တပ်တွေရဲ့ စီးနင်းဖမ်းဆီးမှုတွေရှိနေတာကြောင့် ဒေသခံတွေအနေနဲ့လည်း ည ၈ နာရီထိုးတာနဲ့ နေအိမ်ပြင်မထွက်ရဲဘဲ အသွားအလာနည်းသွားကြတယ်လို့ သိရပါတယ်။

ချောက်မြို့ပေါ်မှာ စစ်ကော်မရှင်တပ်နဲ့ ပျူစောထီးတွေက မကြာခဏပေါ်တာဆွဲဖမ်းဆီးတာတွေ လုပ်နေပြီး ဩဂုတ် ၂၇ ရက်ကလည်း ချောက်မြို့ပေါ်ရှိ ဖုန်းဆိုင်တွေက ဝန်ထမ်းလူငယ်တွေကို စစ်ကော်မရှင်အဖွဲ့တွေ က ပေါ်တာဆွဲဖမ်းဆီးမှုတွေပြုလုပ်ခဲ့သေးတယ်လို့ သိရပါတယ်။

စာတည်း – လင်း

ချောက်၊ ဇွန် ၁၆၊ ၂၀၂၅။

စစ်ကောင်စီတပ်ရဲ့ပူးပေါင်းစစ်ကြောင်းက မကွေးတိုင်း၊ ချောက်မြို့နယ်၊ ကိုင်းထောက်ကန်ရွာက လူငယ် ၁ ဦးကို သတ်ပြီးနေအိမ်တွေကိုလည်းမီးရှို့ခဲ့တယ်လို့ အာဠာဝကမြို့ပြပြောက်ကျားတပ်ဖွဲ့ ဆီက သိရပါတယ်။

ကျောက်ပန်းတောင်း၊ ချောက်နဲ့ စလေမြို့တို့က ထွက်လာတဲ့ အင်အား ၆၀ ပါစစ်ကောင်စီရဲ့ ပူးပေါင်းစစ်ကြောင်းဟာ ဇွန် ၁၄ ရက်မနက်ပိုင်းမှာ ကိုင်းထောက်ကန်ရွာကိုဝင်ရောက်လာခဲ့တာလို့ ဆိုပါတယ်။

“ကိုင်းထောက်ကန်ရွာထဲကိုဝင်ပြီးတော့ အိမ် ၃ လုံးကို မီးရှို့သွားတယ်၊ ဖောကား ၁ စီးမီးရှို့သွားတယ်၊ ကိုင်းထောက်ကန်ရွာက လူငယ် ၂ ဦးကို လမ်းပြခေါ်သွားပြီး ၁ ဦးကိုပြန်လွှတ်ကာ ၁ ဦးကိုတော့ စစ်ကြောင်းက ပစ်သတ်ခဲ့တယ်၊” လို့ အာဠာဝက မြို့ပြပြောက်ကျားတပ်ဖွဲ့ရဲ့ ဒုတာဝန်ခံက ပြောပါတယ်။

အသတ်ခံရသူဟာ အသက် ၁၈ နှစ်အရွယ်ရှိပြီး အလောင်းကိုတော့ အိုင်းကြီးရွာနဲ့ ကိုင်းထောက်ကန်ကျေးရွာ ကြားမှာတွေ့ခဲ့ကာ သူ့ရဲ့စျာပနကို ဇွန် ၁၄ ရက်မှာပဲ ‌ကိုင်းထောက်ကန်ကျေးရွာမှာ ပြုလုပ်ခဲ့တယ်လို့ ဆိုပါတယ်။

ဒါ့အပြင်စစ်ကြောင်းဝင်ရောက်လာချိန်မှာ ဒေသခံကာကွယ်ရေးတပ်ဖွဲ့ဝင်တွေနဲ့ ပစ်ခတ်မှုဖြစ်ခဲ့သေးတယ်လို့ ဒုတာဝန်ခံကဆက်ပြောပါတယ်။

“ကိုင်းထောက်ကန်ကျေးရွာမှာ တိုက်ပွဲဖြစ်ခဲ့တာ၊ ခုခံတိုက်ခိုက်တာမှာ ၄ ဦး‌ပွဲချင်း‌ပြီးသေပြီး ၁၁ ဦးဒဏ်ရာရတယ်” လို့ ဆိုပါတယ်။

ဒီတိုက်ခိုက်မှုကို မကွေးခရိုင် ပကဖ အထူးတိုက်ခိုက်ရေး တပ်ဖွဲ့ တပ်ခွဲ ၁၊ အာဠာဝက မြို့ပြပြောက်ကျားတပ်ဖွဲ့၊ မကွေးတိုင်း ရင်း ၁၊ ချောက်မြို့နယ် ပကဖ နဲ့ ချောက်မြို့နယ် တော်လှန်ရေးတပ်ပေါင်းစု တို့က ပူးပေါင်းတိုက်ခိုက်ခဲ့တာလို့ သိရပါတယ်။

ချောက်မြို့နဲ့ ၁၇ မိုင်အကွာ၊ အိမ်ခြေ ၁၂၀ ရှိတဲ့ကိုင်းထောက်ကန်ကျေးရွာကဒေသခံတွေဟာ စစ်ကြောင်းဝင်ပြီးနောက် ထွက်ပြေးတိမ်းရှောင်နေရတယ်လို့ သိရပါတယ်။

အဲ့ဒီစစ်ကြောင်းကတော့ ကိုင်းထောက်ကန်ကျေးရွာကနေကျွဲတက်ရွာဘက်ကို ဆက်လက်စစ်ကြောင်းထိုးနေပြီး ဇွန် ၁၆ ရက်ဒီနေ့အထိ အဲ့ဒီနေရာမှာရှိနေသေးတယ်လို့ ဒုတာဝန်ခံက ပြောပါတယ်။

စာတည်း – လင်း

ချောက်၊ မေ ၁၆၊ ၂၀၂၅။

ရှမ်းပြည်နယ်တောင်ပိုင်း၊ ဟဲဟိုးမြို့အခြေစိုက် ခမရ ၁၈ တပ်ရင်းက စစ်မှုထမ်းစစ်ကောင်စီတပ်သား ၁ ဦး မေ ၁၅ ရက်မှာ လက်ပစ်ဗုံး ၂ လုံးနဲ့ ဘက်ပြောင်းခိုလှုံလာတယ်လို့ People Defence Force Chauk သခင်ဖိုးလှကြီးတပ်ဖွဲ့ တာဝန်ရှိသူတဦးက ပြောပါတယ်။

ဘက်ပြောင်းခိုလှုံလာသူမှာ အသက် ၂၂ နှစ်အရွယ် တပ်သား ကျော်ထူး ဖြစ်ပြီး ခမရ ၁၈ ကနေ ရတခနယ်မြေ မွန်နဲ့ကရင်ပြည်နယ်အတွင်း ရှေ့တန်းနယ်မြေကို ပို့ဆောင်ခံရစဥ် ရန်ကုန်တိုင်း၊ သန်လျင်မြို့အခြေစိုက် ခလရ ၁၃၉ တပ်ရင်းမှာ ယာယီတည်းခိုရချိန် ၎င်းတို့တပ်ဖွဲ့ထံ ရောက်ရှိခိုလှုံလာခဲ့တာလို့ ဆိုပါတယ်။

၎င်းဟာ ချောက်မြို့နယ်ဇာတိဖြစ်ကာ ပြီးခဲ့တဲ့ ၂၀၂၄ နိုဝင်ဘာလအတွင်း ချောက်မြို့ကို စျေး ဝယ်လာရောက်စဥ် စစ်ကောင်စီတပ်ရဲ့ပေါ်တာဆွဲဖမ်းဆီးခံခဲ့ရပြီးနောက် ရှမ်းပြည်တောင်ပိုင်း၊ ကျိုင်းတောင်းမြို့အခြေစိုက် အမှတ် ၃ တန်းမြင့်လေ့ကျင့်ရေးကျောင်းကို ပို့ဆောင်ခံရပြီး စစ်မှုထမ်းသင်တန်းအပတ်စဥ် (၁၀) မှာ ၂ လခွဲတက်ရောက်ခဲ့ရတာပါ။

ယခုနှစ်ဖေဖော်ဝါရီလအတွင်း သင်တန်းဆင်းပြီးနောက် ဟဲဟိုးမြို့အခြေစိုက် ခမရ ၁၈ ကို ပို့ဆောင်ခံခဲ့ရကာ ရတခနယ်မြေရှေ့တန်းကိုပို့ဆောင်ခံရဖို့ မေ ၉ ရက်မှာ ရန်ကုန်၊ သန်လျင်အခြေစိုက်တပ်ကို ရောက်ရှိခဲ့တာဖြစ်ပြီး အဲ့ဒီကနေတဆင့် ထွက်ပြေးလာနိုင်ခဲ့တာလို့ သိရပါတယ်။

People Defence Force Chauk သခင်ဖိုးလှကြီးတပ်ဖွဲ့ဟာ မကွေးတိုင်း၊ ချောက်မြို့နယ် အခြေပြုတပ်ဖွဲ့ဖြစ်ပြီး လက်ပစ်ဗုံး ၂ လုံး ယူဆောင်ဘက်ပြောင်းခိုလှုံလာတဲ့ တပ်သား ကျော်ထူးကို တပ်ဖွဲ့ဝင်တွေက စောင့်ရှောက်ထားကာ ၎င်းဟာ တပ်ဖွဲ့ထံပထမဆုံးဘက်ပြောင်းခိုလှုံလာသူဖြစ်တယ်လို့ သိရပါတယ်။

စာတည်း – ဟိန်းစံ

မုံရွာ၊ ဧပြီ ၁၅၊ ၂၀၂၅။

စစ်ကိုင်းတိုင်း၊ မုံရွာမြို့မှာ သင်္ကြန်လည်နေတဲ့ လူငယ်အမျိုးသား ၂ ဦးကို စစ်ကောင်စီတပ်ဖွဲ့က ဖမ်းဆီးသွားခဲ့တယ်လို့ ဒေသခံတွေဆီက သိရပါတယ်။

ဧပြီ ၁၅ ရက် ( သင်္ကြန်အကြတ်နေ့) မနက် ၉ နာရီဝန်းကျင်က မုံရွာမြို့၊ ဒေါနခြံရပ်ကွက်၊ ရေစင်ကြီးမီးပွိုင့်အနီး သင်္ကြန်အလည်အပတ်ထွက်လာတဲ့ ဆိုင်ကယ်စီးအမျိုးသား ၂ ဦးကို အိမ်စီးကား ၃ စီးနဲ့ အရပ်ဝတ်စစ်ကောင်စီတပ်ဖွဲ့ဝင် ၁၅ ဦးခန့်က ဖမ်းဆီးခေါ်ဆောင်သွားခဲ့တာလို့ ဆိုပါတယ်။

” တချို့က စစ်သားမဟုတ်ဘူး ရဲတွေကျည်ကာကတော့ စစ်အရောင်ဝတ်ထားကြတယ်။ ကောင်လေးတွေ မောင်းလာတဲ့ ဆိုင်ကယ်ရှေ့ကို ပိတ်ရပ်လိုက်တယ်၊ ပြီးမှ ကားပေါ်ကဆင်းပြီး ကောင်လေးတွေကို သေနတ်နဲ့ချိန်ကားပေါ် အတင်းဆွဲခေါ်သွားတာ” လို့ မျက်မြင်တွေ့ရှိသူ အသက် ၃၀ ကျော်အရွယ် အမျိုးသမီးတဦးက မြေလတ်အသံကို ပြောပါတယ်။

စစ်အာဏာသိမ်းပြီးနောက် စစ်ကောင်စီက မုံရွာမြို့ပေါ်မှာ အမျိုးသား ၂ ဦးတွဲ ဆိုင်ကယ်စီးနင်းတာနဲ့ အမျိုးသမီးအနောက်မှာအမျိုးသားစီးနင်းမှုတွေကို တားမြစ်ထားပြီး တွေ့ရှိပါက ဖမ်းဆီး၊ သေနတ်နဲ့ပစ်ခတ်တာတွေကို လုပ်ဆောင်တယ်လို့ ဆိုပါတယ်။

ပုံစာ – မုံရွာ၊ ရေစင်ကြီးမီးပွိုင့်အနီး သင်္ကြန်အကျနေ့ မြင်ကွင်း ( ဓာတ်ပုံ – မြေလတ်အသံ)။

သတင်း – ခေတ်သဒ္ဒါ၊ စာတည်း – ဟိန်းစံ