ရေတာရှည်၊ ဒီဇင်ဘာ ၇၊ ၂၀၂၅။

ပဲခူးတိုင်း၊ ရေတာရှည်မြို့နယ်မှာ ဒီဇင်ဘာ ၆ ရက်မနက် ၁၀ နာရီခန့်က စစ်ကော်မရှင်တပ်ကဦးစီးကျင်းပမယ့်ရွေးကောက်ပွဲကို ဒေသခံရာနဲ့ချီ ဆန့်ကျင်ဆန္ဒပြခဲ့ကြတယ်လို့ ဆန္ဒပြပွဲဦးဆောင်လှုပ်ရှားသူတဦးဆီက သိရပါတယ်။

လူဦးရေ ၃၀၀ ကျော်ပါဝင်တဲ့ ဒီဆန္ဒပြပွဲကို ရေတာရှည်မြို့နယ်မြောက်ပိုင်းတနေရာမှာ ပြုလုပ်ခဲ့တာဖြစ်ပြီး ဒေသတွင်းကျေးရွာတွေကိုလှည့်လည်ကာ တော်လှန်ရေး ကြွေးကြော်သံ၊ ဆောင်ပုဒ်တွေကို ကြွေးကြော်ဆန္ဒပြခဲ့ကြတာလို့ သိရပါတယ်။

“စစ်အာဏာရှင်လုပ်နေတဲ့ ရွေးကောက်ပွဲကာလဟာ ပြည်တွင်းစစ်မငြိမ်းချမ်းသေးဘဲ ပြည်ပနိုင်ငံတွေကပါ လှည့်လည်ပြီး လိမ်ညာဟန်ပြပြီးတော့မှ လုပ်နေတဲ့အတုအယောင်ရွေးကောက်ပွဲ ဖြစ်တာကြောင့်မို့လို့ နိုင်ငံတကာအနေနဲ့ ဒီရွေးကောက်ပွဲမှာပြည်သူတွေ ပူးပေါင်းပါဝင်မှုမရှိဘူးဆိုတာ နိုင်ငံတကာကိုသိစေချင်လို့ဆန္ဒပြရတာ”လို့ ဆန္ဒပြပွဲဦးဆောင်ပါဝင်သူတဦးက ပြောပါတယ်။

ဖမ်းဆီးခံထားရတဲ့ သမ္မတဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂျိလ်ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံး အမြန်ဆုံးပြန်လွတ်ပြီး ဖက်ဒရယ်နိုင်ငံတော်ပေါ်ပေါက်လာဖို့ ဆက်လက် ဆန္ဒပြသွားမယ်လို့လည်း ဆိုပါတယ်။

မန္တလေး၊ ဒီဇင်ဘာ ၃၊ ၂၀၂၅။

မန္တလေးမြို့မှာ ဒီဇင်ဘာ ၃ ရက် ဒီကနေ့မနက်ပိုင်းက စစ်ကော်မရှင်ပြုလုပ်မယ့် ရွေးကောက်ပွဲကို ဆန့်ကျင်ဆန္ဒပြမှုတွေပြုလုပ်သွားသူတွေကို စစ်ကော်မရှင်တပ်က ပိတ်ဆို့ရှာဖွေနေတယ်လို့ မြို့ခံတွေထံက သိရပါတယ်။

မန္တလေးမြို့၊ ချမ်းအေးသာစံမြို့နယ်၊ စျေးချိုအနီး ဒီကနေ့မနက် ၅ နာရီလောက်မှာ လူငယ်တချို့က စစ်ကော်မရှင်ကပြုလုပ်မယ့်ရွေးကောက်ပွဲကို ပြည်သူတွေမပါဝင်ကြဖို့ လှုံဆော်ဆန္ဒပြမှုတွေ ပြုလုပ်ခဲ့တာကြောင့် ဆန္ဒပြမှုတွေလုပ်ခဲ့တဲ့ စျေးချိုအနီးတဝိုက်အပါ မန္တလေးမြို့တွင်းအနှံ့ ပိတ်ဆို့စစ်ဆေးရှာဖွေနေတာလို့ ဆိုပါတယ်။

စျေးချိုအနီးကိုလာရောက်ရှာဖွေတဲ့ စစ်ကော်မရှင်တပ်ဖွဲ့ဝင်တွေက ” မနက်အစောကြီး ဒုက္ခပေးတဲ့ကောင်တွေ မိရင်တော့ နေအောင်ပြောသလို လုပ်ပစ်မယ်”ဆိုကာ ဆဲဆိုရှာဖွေမှုတွေပြုလုပ်ခဲ့ကြောင်း အခင်းဖြစ်နေရာအနီးမှာရှိခဲ့တဲ့ မြို့ခံတဦးက မြေလတ်အသံကို ပြောပါတယ်။

စစ်ကော်မရှင်တပ်ကို ထောက်ခံပြောဆိုနေတဲ့ သရုပ်ဆောင် နေအောင် က ပြီးခဲ့တဲ့နိုဝင်ဘာလက ရန်ကုန်တိုင်းအတွင်းကြံ့ဖွံ့ပါတီအတွက် ရွေးကောက်ပွဲမဲဆွယ်ချိန်မှာ ” တိုင်းပြည်‌ကို မငြိမ်အောင်လုပ်တဲ့သူမှန်သမျှအကုန်သတ်” ဆိုကာ ပြောဆိုခဲ့တာလည်း ဖြစ်ပါတယ်။

လက်ရှိမှာ ပြင်ဦးလွင်မြို့မှာ အာဏာသိမ်းစစ်ခေါင်းဆောင်ရောက်ရှိနေတာကြောင့် မန္တလေးမြို့မှာပါ လုံခြုံရေးတင်းကြပ်ထားချိန် အခုလို ဆန္ဒပြခံခဲ့ရတာဖြစ်ကာ ယနေ့မနက် ဆန္ဒပြမှုမှာပါဝင်သူတချို့ရဲ့ဓာတ်ပုံကို စစ်ကော်မရှင်တပ်ဖွဲ့တွေက ရရှိသွားပြီး မြို့အတွင်းအပြင်နေရာအနှံ့ပိတ်ဆို့ရှာဖွေနေတာလို့ မြို့ခံတွေက ပြောပါတယ်။

ဒီနေ့မနက်ပိုင်းက ပြင်ဦးလွင်မြို့ စစ်တက္ကသိုလ် DSA ဗိုလ်လောင်းသင်တန်းဆင်းပွဲကို တက်ရောက်ခဲ့တဲ့ အာဏာသိမ်းစစ်ခေါင်းဆောင်ဟာ ယမန်နေ့ညပိုင်းမှာ မန္တလေးမြို့မှာရှိနေခဲ့လို့ မြို့တွင်းမှာ အင်အားအများအပြားနဲ့ လုံခြုံရေးတိုးမြှင့်ချထားခဲ့တာလို့ မြို့ခံတွေနဲ့ မန္တလေးစစ်ကော်မရှင်တပ် အသိုင်းအဝိုင်းထံက သိရပါတယ်။

သတင်း – မြတ်

အုတ်ဖို၊ အောက်တိုဘာ ၂၆၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ဘလားကျေးရွာအုပ်စု၊ ငွေဖလားကျေးရွာမှာ စစ်မှုထမ်းကြေးကောက်၊ စစ်မှုထမ်းစုဆောင်းပေးနေတဲ့ အုပ်ချုပ်ရေးမှူး ၁ ဦး နေအိမ်မှာပစ်သတ်ခံရပြီး သေဆုံးခဲ့တယ်လို့ မြေအောက်ပြောက်ကျားတပ်ဖွဲ့(အုတ်ဖို) တာဝန်ရှိသူတွေဆီက သိရပါတယ်။

ပစ်သတ်ခံရသူဟာ ငွေဖလားကျေးရွာနေ ဘလားကျေးရွာအုပ်စုအုပ်ချုပ်ရေးမှူးဖြစ်တဲ့ အသက် ၅၄ နှစ်အရွယ် ဦးအေးသောင်း ဆိုသူဖြစ်ပြီး အောက်တိုဘာ ၂၅ ရက်မနက် ၇ နာရီခန့်မှာ သူနေထိုင်ရာ နေအိမ်မှာတင် ပစ်ခတ်ခဲ့တာလို့ဆိုပါတယ်။

“ခေါင်း ၁ ချက်က သေနတ်ဝင်လုလို့ ပစ်လိုက်တာ။ နားထင်ဘက်ကို ပစ်ချလိုက်တာ။ မသေချာမှာစိုးလို့ ထပ်ပစ်ခဲ့တယ်။ သူအပေါင်းအပါတွေလည်း ကပ်လာမှာစိုးတာနဲ့ သေနတ်သံတွေထပ်ပေးခဲ့တာရှိတယ်။”လို့ မြေအောက်ပြောက်ကျားတပ်ဖွဲ့(အုတ်ဖို) တပ်ဖွဲ့မှူး ဒေဝ ကပြောပါတယ်။

သေနတ်နဲ့ပစ်ခံရတာကြောင့် အုပ်ချုပ်ရေးမှူးမှာ ရင်ဘတ်ကျည်ထိဒဏ်ရာ ၂ ချက်၊ နှာခေါင်းနဲ့ဝဲဘက်ပါး ကျည်ဖောက်ဝင်ဒဏ်ရာ ၂ ချက်ရပြီး နေရာမှာတင်သေဆုံးခဲ့ကာ ပစ်ခတ်မှုဖြစ်ပြီးနောက် စစ်ကော်မရှင်အဖွဲ့တွေ လာရောက်စစ်ဆေးမှုတွေပြုလုပ်ခဲ့တယ်လို့ ဆိုပါတယ်။

သေဆုံးသူ အုပ်ချုပ်ရေးမှူးဟာ သေနတ်ကိုင်ဆောင်ထားတယ်လို့ သတင်းရထားပေမယ့် အချိန်မရတာကြောင့် နေအိမ်အတွင်းမရှာဖွေခဲ့ရလို့ သိမ်းဆည်းရမိတာမရှိခဲ့ဘူးလို့ တပ်ဖွဲ့မှူးဒေဝက ပြောပါတယ်။

သေဆုံးသူအုပ်ချုပ်ရေးမှူးဟာ စစ်ကော်မရှင်ပြုလုပ်မယ့် ရွေးကောက်ပွဲကိုပြည်သူတွေမဲထည့်ဖို့ ဖိအားပေးတာ၊ စစ်မှုထမ်းကြေးဟုဆိုကာ ခြိမ်းခြောက်ပြီး ငွေကောက်ခံတာ၊ လူငယ်တွေကို စစ်မှုထမ်းဖို့ အတင်းအကြပ်စုဆောင်းတာတွေ ပြုလုပ်နေတာကြောင့် ပစ်ခတ်ခဲ့တာလို့ ဆိုပါတယ်။

စက်တင်ဘာ ၂၇ ရက်ကလည်း အုတ်ဖိုမြို့နယ်၊ ရှမ်းကုန်းအုပ်စု၊ ရှမ်းကုန်းရွာမှာ PDF တွေလာတာကို စစ်ကော်မရှင်တပ်သားတွေလာတယ်အထင်နဲ့ ဧည့်ခံတဲ့ ရာအိမ်မှူး မြင့်အောင်ဆိုသူပစ်သတ်ခံရပြီး သေဆုံးသွားတယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၂၇၊၂၀၂၅။

ပဲခူးတိုင်း(အနောက်ခြမ်း)၊ သာယာဝတီခရိုင်မှာ စစ်ကော်မရှင်ကပြုလုပ်မယ့် ရွေးကောက်ပွဲနဲ့ပတ်သက်ပြီး ပြည်သူလူထုကို ဖိအားပေးခြိမ်းခြောက်မှုတွေ လုပ်ဆောင်နေတယ်လို့ ဒေသတော်လှန်ရေးတပ်ဖွဲ့တွေက ပြောပါတယ်။

သြဂုတ်လပထမအပတ်ကစတင်ပြီး သာယာဝတီခရိုင်မြို့နယ်တွေဖြစ်တဲ့ သာယာဝတီ၊ သုံးဆယ်၊ လက်ပံတန်း၊ မင်းလှ၊ အုတ်ဖို၊ မိုးညို၊ ကြို့ပင်ကောက် မြို့ပေါ်ရပ်ကွက်နဲ့ ကျေးရွာတွေမှာ စစ်ကော်မရှင်လက်အောက်ခံ ရပ်/ကျေးအုပ်ချုပ်ရေးအဖွဲ့ဝင်တွေက ပြည်သူတွေရွေးကောက်ပွဲမှာပါဝင်ဖို့ ဖိအားပေးနေတာလို့ ပြည်သူတွေရဲ့သတင်းပေးပို့ချက်ကို ကိုးကားပြီး သာယာဝတီခရိုင်တပ်ရင်း ၃၈၀၂ တပ်ခွဲ၂မှတာဝန်ရှိသူက မြေလတ်အသံကို ပြောပါတယ်။

” မိုးညိုဖက်မှာဆိုရင် တော်တော်များများလုပ်နေတယ်။ မှတ်ပုံတင်နံပါတ်တို့၊ လူဦးရေစာရင်းတို့ကို တအိမ်တက်၊ တအိမ်ဆင်း လိုက်လံကောက်ယူတယ်။ ပြီးတော့ ရွေးကောက်ပွဲမှာ မဲထည့်ရမယ်၊ မဲမထည့်ရင် စစ်မှုထမ်းလိုက်ရမယ်။ ပိုက်ဆံတွေပေးရမယ်ဆိုလို့ ဖိအားပေးခြိမ်းခြောက်နေတာ” လို့ သူ က ပြောပါတယ်။

ရွေးကောက်ပွဲဖြစ်မြောက်ရေးအတွက် အားပေးအားမြှောက်ပြုလုပ်ပေးနေသူတွေကို ထိရောက်စွာအရေးယူသွားမှာဖြစ်ပြီး ဌာနဆိုင်ရာ Non-CDM ဝန်ထမ်းတွေ၊ ပြည်သူတွေအနေနဲ့လည်း ပါဝင်ပတ်သက်တာတွေ မလုပ်ဆောင်ကြဖို့ သာယာဝတီခရိုင်တပ်ရင်း ၃၈၀၂ တပ်ခွဲ ၂ နဲ့ ရွှေတန်းမြေပြည်သူ့ကာကွယ်ရေးအဖွဲ့တို့က သြဂုတ် ၂၇ ရက်မှာ အသီးသီးထုတ်ပြန်ထားပါတယ်။

” စစ်ကော်မရှင်ကလည်း ရွေးကောက်ပွဲအတွက် အားစိုက်နေတယ်။ ကျနော်တို့ဘက်ကလည်း အတတ်နိုင်ဆုံး တားဆီးကာကွယ်နိုင်ဖို့ စီစဥ်နေပါတယ်။ သာယာဝတီခရိုင်ကို ၃ ကြိမ်ခွဲပြီး ၃ နေရာမှာ ရွေးကောက်ပွဲကျင်းပမယ်လို့သိရတယ်”လို့ ရွှေတန်းမြေပြည်သူ့ကာကွယ်ရေးအဖွဲ့မှ တာဝန်ရှိသူက ပြောပါတယ်။

စစ်ကော်မရှင်ပြုလုပ်မယ့် ရွေးကောက်ပွဲနဲ့ပတ်သက်ပြီး ပူးပေါင်းလုပ်ဆောင်မယ့်သူတွေကို ထိရောက်စွာအရေးယူသွားမယ်လို့ မန္တလေးတိုင်းနဲ့ မကွေးတိုင်းရှိ ဒေသခံတော်လှန်ရေးတပ်ဖွဲ့တချို့ကလည်း သြဂုတ်လပထမအပတ်မှာ စာထုတ်ပြန်ပြီးသတိပေးထားသလို ချင်း၊ ကချင်၊ ကရင်နီ၊ ရခိုင်၊ မွန် စတဲ့ တိုင်းရင်းသားတပ်ဖွဲ့တွေနဲ့ အဖွဲ့အစည်းတွေဘက်ကလည်း ရွေးကောက်ပွဲကို ဆန့်ကျင်ကြောင်း ပြောဆိုထားပါတယ်။

စစ်ကော်မရှင်လက်အောက် ရွေးကောက်ပွဲကော်မရှင်ကတော့ ရွေးကောက်ပွဲကို အပိုင်းလိုက်ခွဲ ပြုလုပ်သွားမယ်လို့ကြေညာထားပြီး အပိုင်း ၁ ကို မြို့နယ် ၁၀၂ ခုမှာ လာမယ့်ဒီဇင်ဘာ ၂၈ ရက်မှာ ကျင်းပမယ်လို့ ဆိုထားပါတယ်။

စာတည်း – ဟိန်းစံ