ယာဥ်တိုက်မှု

ပဲခူး၊ ဇွန် ၄၊ ၂၀၂၃။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်၊ ရန်ကုန် – ပြည်လမ်းမှာ ဇွန်လ ၄ ရက် ဒီမနက်အစောပိုင်းက ရပ်ထားတဲ့ကားကိုဝင်တိုက်တဲ့ ဆိုင်ကယ်သမား ၂ ဦး နေရာမှာပဲ သေဆုံးခဲ့တယ်လို့ မြို့ခံတဦးက ပြောပါတယ်။

ကြို့ပင်ကောက်မြို့နယ်၊ ကျွဲဘိကျေးရွာအနီး ရန်ကုန်ဘက်ကိုမျက်နာမူကာ စက်ပျက်လို့ ရပ်ထားတဲ့တွဲကားကို ဒီမနက်အစောပိုင်း ၁ နာရီလောက်မှာ ဝင်တိုက်ခဲ့တာလို့ ဆိုပါတယ်။

“သူတို့က အလှပြင်လုပ်ငန်းလုပ်ကြတာ၊ ဇီးကုန်းကပြန်လာကြတာမှာ ရပ်ထားတဲ့ကားကို နောက်ဝင်တိုက်မိတာပါ။ နေရာမှာပဲ ပွဲချင်းပြီးဆုံးသွားပါတယ်၊ သူတို့က အရက်နည်းနည်းတော့ သောက်တတ်တယ်”လို့ သေဆုံးသူတွေနဲ့ နီးစပ်သူတဦးကပြောပါတယ်။

သေဆုံးသူတွေဟာ ကြို့ပင်ကောက်မြို့၊ ပြည်တန်းလမ်းက အသက် ၂၃ နှစ်အရွယ် ကိုဆန်းရိူင်းထွဋ်နဲ့ ဦးလူကလေးလမ်းက အသက်၂၆ နှစ်အရွယ် ကိုရိူင်းလင်းထက်တို့ဖြစ်ပြီး၊ သူတို့အလောင်းတွေကို ကြို့ပင်ကောက် ပြည်သူ့ဆေးရုံရင်ခွဲရုံကို ပရဟိတအသင်းကား ၁ စီးနဲ့ ပို့ဆောင်ခဲ့တယ်လို့ပြောပါတယ်။

ဓါတ်ပုံပါ ဖြစ်စဥ်မှာရပ်ထားတဲ့ကားဟာ လမ်းမအလယ်နီးပါးအထိရောက်နေတာကိုတွေ့ရသလို ကားရဲ့နောက်မှာ သစ်ကိုင်းတချို့ချထားတာကိုတွေ့ရပြီး ဘာကြောင့်ဆိုင်ကယ်က ဝင်တိုက်တယ်၊ ဘယ်လိုအရေးယူမယ်ဆိုတာကိုတော့ မသိရှိရသေးပါဘူး။

ပြီးခဲ့တဲ့ဖေဖေါ်ဝါရီလ ၁၅ ရက် နေ့လယ်ကလည်း ကြို့ပင်ကောက်မြို့နယ်၊ ရန်ကုန် – ပြည်လမ်း ကျွဲဘိရွာအနီးမှာပဲ ပြည်မြို့ဘက်ကနေ ရန်ကုန်ဘက်ကိုမောင်းနှင်လာတဲ့Toyota Succed အမျိုးအစား မော်တော်ယာဥ်တစီး အရှိန်လွန်ကာတိမ်းမှောက်ခဲ့လို့ ယာဥ်ပေါ်ပါ အမျိုးသား ၂ ဦး ထိခိုက်ဒဏ်ရာ ရခဲ့ပါသေးတယ်။

စာတည်း – လင်း

ပဲခူး။ မေ ၁၁၊ ၂၀၂၃။

ပဲခူးတိုင်းဒေသကြီး၊ သာယာဝတီမြို့နယ်၊ ရန်ကုန်-ပြည်ကားလမ်းမှာ အိမ်စီးကားနဲ့ ဆိုင်ကယ်တိုက်မှုဖြစ်ပွားပြီး ဆိုင်ကယ်နဲ့လာတဲ့ သက်ကြီးပိုင်း အမျိုးသားနဲ့ အမျိုးသမီးတို့ သေဆုံးသွားတယ်လို့ သိရပါတယ်။

မေလ ၁၀ ရက်နေ့ မနက် ၁၀ နာရီကျော်ခန့်မှာ ရန်ကုန်ဘက်ကမောင်းလာတဲ့ ဆိုင်ကယ်နဲ့ ပြည်ဘက်ကနေမောင်းလာတဲ့ အိမ်စီးကားတို့ဟာ တံတားကြီးကွင်းကျေးရွာအနီး တိုက်မှုဖြစ်ပွားပြီး ကားကတော့မောင်းပြေးသွားတယ်လို့ ဒေသခံတဦးက ပြောပါတယ်။

“အိမ်စီးကားက မျက်နှာချင်းဆိုင်လာပြီး တိုက်ပြေးသွားတာ။ တိုက်ပြေးတဲ့ကားကိုတော့ သဲဖြူကျေးရွာအလွန်နားမှာ ကားကိုတွေ့ရပြီး ယာဥ်မောင်းကတော့ ထွက်ပြေးသွားတယ်။ ဆိုင်ကယ်မောင်း အမျိုးသားက နေရာမှာဆုံးတယ်။ အမျိုးသမီးကတော့ ဆေးရုံမှာဆုံးတယ်။ ဆုံးသွားတဲ့ နှစ်ယောက်စလုံးက သက်ကြီးပိုင်းတွေပါ” လို့ ပြောပါတယ်။

မောင်းနှင်ထွက်ပြေးသွားတဲ့ ကားကတော့ အခင်းဖြစ်ပွားရာနေရာကနေ တရွာကျော်ဝေးတဲ့ သဲဖြူကျေးရွာအရောက်မှာ ရပ်တန့်ထားပြီး ယာဉ်မောင်းဖြစ်သူက ထွက်ပြေးသွားတယ်လို့ ဒေသခံဆီက သိရပါတယ်။

သေဆုံးသူ ၂ ဦးစလုံးဟာ အသက် ၆၀ ဝန်းကျင်အရွယ်ရှိသူတွေဖြစ်ပြီး မင်းလှမြို့နယ်၊ ဂန့်ဂေါ်ပင်ကျေးရွာအုပ်စု၊ ဖားကလေးကွင်းကျေးရွာ အနီးအနားရွာမှာ နေသူတွေဖြစ်တယ်လို့ ဆိုပါတယ်။

သေဆုံးသွားသူ ၂ ဦးစလုံးရဲ့ အလောင်းတွေကိုတော့ သာယာဝတီဆေးရုံကြီးမှာ ထားခဲ့ပြီး မိသားစုက လာရောက်သယ်ယူတာရှိမရှိကိုတော့ မသိရဘူးလို့ ပို့ဆောင်ပေးခဲ့တဲ့ လူမှုကူညီရေးအသင်းထံက သိရပါတယ်။

စာတည်း – 007

ဝက်လက်၊ ဧပြီ ၂၉၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ လှတောကျေးရွာအနီး မန္တလေး-ရွှေဘိုလမ်းပိုင်းမှာ ဧပြီလ ၂၈ ရက် မနေ့ ညနေ ၅ နာရီခွဲလောက်က ယာဉ်တိုက်မှုဖြစ်ပွားပြီး လူ ၂ ဦးသေဆုံးခဲ့တယ်လို့ မြို့ခံတွေဆီက သိရပါတယ်။

မန္တလေးဘက်ကနေ ရွှေဘိုဘက်ကို မောင်းနှင်လာတဲ့ ခရီးသည်တင် အံစာတုန်းယာဉ်ဟာ စစ်အုပ်ချုပ်ရေး(မာရှယ်လော)ထုတ်ပြန်ထားတဲ့ ရွှေဘိုမြို့ကို ညမထွက်ရအချိန်မီဝင်ရောက်ဖို့ အမြန်မောင်းနှင်ရာကနေ အရှိန်လွန်ပြီး စပါးခွံတင်ယာဉ်နဲ့ ခေါင်းချင်းဆိုင် တိုက်မိကာ ယာဉ်ပေါ်ပါခရီးသည်အမျိုးသား ၂ ဦး သေဆုံးခဲ့တာလို့ မြို့ခံတဦးက မြေလတ်အသံကို ပြောပါတယ်။

“ကားပေါ်မှာက သရက်သီးအိတ်တွေနဲ့ ခရီးသည် ၇ ဦးပါတယ်။ ရွှေဘိုကို ၆ နာရီအဝင်မောင်းပြီး ညအိပ်ဖို့အစီအစဥ်နဲ့အမြန်မောင်းလာရင်း အရှိန်မထိန်းနိုင်ဘဲနဲ့ လှတောတောင်ဘက်ကွေ့နားမှာ မျက်နှာချင်းဆိုင်လာတဲ့ ဖွဲကားကို တိုက်မိပြီး ခရီးသည်အမျိုးသား၂ ဦးသေသွားတာ” လို့ ပြောပါတယ်။

သေဆုံးသူ ၂ ဦးဟာ ပခုက္ကူနယ်ဘက်ကလို့သိရပြီး ခရီးသည်တင်ယာဥ်ပေါ်က အမျိုးသား ၂ ဦးနဲ့ အမျိုးသမီး ၃ ဦးလည်း ဒဏ်ရာရခဲ့ကာ အဲ့ဒီခရီးသည်တင်ယာဉ်ဟာ ဖားကန့်မြို့ကိုသွားရောက်မယ့်ကားဖြစ်တယ်လို့လည်း သူကဆက်ပြောပါတယ်။

စစ်ကောင်စီက ရွှေဘိုမြို့နယ်ကို ဖေဖော်ဝါရီလ ၂၂ ရက်ကစတင်ကာ စစ်အုပ်ချုပ်ရေး (မာရှယ်လော) ထုတ်ပြန်ခဲ့ပြီး ည ၆ နာရီကနေ မနက် ၆ နာရီအထိ ညမထွက်ရအချိန် သတ်မှတ်ထားတာဖြစ်ပါတယ်။

ရွှေဘိုမြို့နယ်တဝှမ်းမှာ မကြာခဏဆိုသလို ယာဥ်တိုက်မှုဖြစ်ပွားနေပြီး ဧပြီလ ၂ ရက်နေ့ကလည်း ရွှေဘို-မြစ်ကြီးနားလမ်း အထွက် လျှပ်စစ်ပင်မခွဲရုံအနီးမှာ ဆီတွဲဘောက်ဆာကားနဲ့ဆိုင်ကယ်တို့ ယာဥ်တိုက်မှုဖြစ်ပြီး ဆိုင်ကယ်စီးသူမှာ ခြေ ၂ ဖက် ပြင်းထန်ဒဏ်ရာ ရရှိသွားတယ်လို့ သိရပါတယ်။

စာတည်း – ရင်ငြိမ်း

မိတ္ထီလာ၊ ဧပြီ ၁၂၊ ၂၀၂၃။

မန္တလေးတိုင်း၊ မိတ္ထီလာမြို့နယ်၊ ရန်ကုန်-မန္တလေးအမြန်လမ်းမှာ ကားတစီးတိမ်းမှောက်ခဲ့တာကြောင့် ၂ ဦးသေပြီး၊ ၁ ဦးဒဏ်ရာရသွားတယ်လို့ သိရပါတယ်။

ဧပြီလ ၁၂ ရက်ဒီမနက် ၇ နာရီခန့်မှာ နေပြည်တော်ကနေ မန္တလေးဘက်ကို မောင်းနှင်လာတဲ့ Honda Airwave ကားဟာ မိုင်တိုင်အမှတ် ၃၀၅/၁ အနီးအရောက် အရှိန်မထိန်းနိုင်ဘဲ လမ်းလယ်ကျွန်းကိုဝင်တိုက်ပြီး တိမ်းမှောက်သွားတာလို့ ဒေသခံတဦးက ပြောပါတယ်။

“ကားက ရန်ကုန်က။ နေပြည်တော်ကနေ မန္တလေးသွားတာ။ ကားပေါ်မှာ မိသားစုဝင် ၃ ဦးပါလာတာ။အသက်ကြီးပိုင်းအမျိုးသမီး ၁ ဦးပါတယ်။ ယာဥ်မောင်းအိပ်ငိုက်တာ မဟုတ်ဘူး။ အရှိန်လွန်ပြီးတိုက်တာ။ ယာဥ်မောင်းကတော့ နေရာမှာဘဲသေသွားတာ။ ဆေးရုံရောက်မှ နောက်အမျိုးသမီး ၁ ယောက်ထပ်ဆုံးတယ်”လို့ ပြောပါတယ်။

ဒီတိမ်းမှောက်မှုကြောင့် ယာဥ်မောင်း ကိုဝင်းထိုက် ၄၃ နှစ်ဟာ နေရာမှာသေဆုံးခဲ့ပြီး၊ မဟောက်လွန်းကျိန် ၃၅ နှစ်က ဆေးရုံရောက်မှ သေဆုံးခဲ့ကာ၊ ဒေါ်ကျိန်ခန် ၆၉ နှစ်ကတော့ ဒဏ်ရာရသွားတယ်လို့ ဆိုပါတယ်။

သေဆုံးဒဏ်ရာရသူတွေကို ပြင်စည်အမြန်လမ်း မီးသတ်တပ်ဖွဲ့နဲ့ လူမှုကူညီရေးအသင်းတွေကကူညီပြီး မိတ္တီလာဆေးရုံကို ပို့ဆောင် ပေးထားရတယ်လို့ သိရပါတယ်။

အလားတူ ဧပြီလ ၁၁ ရက်မနေ့ကမနက် ၁၁ နာရီ ၁၅ မိနစ်ခန့်မှာ ရန်ကုန်ဘက်ကနေ နေပြည်တော်ဘက်ကို မောင်းနှင်လာတဲ့ wish အိမ်စီးကားတစီးလည်း အမြန်လမ်းမိုင်တိုင်အမှတ် ၈၉/၀ နဲ့ ၈၉/၁ ကြားအရောက်မှာ အရှိန်မထိန်းနိုင်ဘဲ လမ်းလယ်ကျွန်းကို ဝင်တိုက်ခဲ့ရာက ကားပေါ်ပါ လင်မယားနှစ်ဦးမှ အမျိုးသမီးဖြစ်သူ သေဆုံးခဲ့ပါတယ်။

ဒါ့အပြင် ဧပြီလ ၁၀ ရက်မနက် ၁၁ နာရီ ၃၀ မိနစ်ခန့်မှာလည်း မန္တလေးဘက်ကနေ နေပြည်တော်ဘက်ကို မောင်းနှင်လာတဲ့ Honda Civic အမျိုးအစားယာဥ်ဟာ မြင်းခြံမြို့နယ်၊ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် ၃၂၅/၆ နဲ့ ၃၂၅/၇ ကြားမှာ လမ်းလယ်ကျွန်းကို ဝင်တိုက်မိလို့ ကားမီးလောင်ပြီး ကားပေါ်ပါ အမျိုးသား ၃ ဦး သေဆုံးခဲ့ပါသေးတယ်။

စာတည်း – လင်း

မိတ္တီလာ၊ မတ် ၂၃၊ ၂၀၂၃။

မန္တလေးတိုင်း၊ မိတ္တီလာမြို့နယ်၊ ရန်ကုန်-မန္တလေးအမြန်လမ်းမကြီးမှာ လမ်းပေါ်ရပ်ထားတဲ့ ကားကို ဝင်တိုက်မိလို့ ၂ ဦး သေဆုံးပြီး ၁၆ ဦး ဒဏ်ရာရခဲ့တယ်လို့ သိရပါတယ်။

မတ်လ ၂၃ ရက် ဒီမနက် ၅ နာရီ ၅၀ ခန့်မှာ နေပြည်တော်ဘက်ကနေ လားရှိုးဘက်ကို ရော်ဘာခြစ်ဖို့ လုပ်သားတွေတင်လာတဲ့ လိုက်ထရပ်ယာဥ်ဟာ မိုင်တိုင်အမှတ် ၂၈၄/၁ နဲ့ ၂၈၄/၂ ကြားအရောက်မှာ လမ်းပေါ်ရပ်ထားတဲ့ ကုန်ကားကို ဝင်တိုက်မိခဲ့တာလို့ လူမှုကူညီရေးအသင်း တာဝန်ရှိသူတဦးက ပြောပါတယ်။

“ကုန်ကားက ရပ်ထားတာ။ ရပ်ထားတဲ့ကားကလည်း လမ်းပေါ်ရောက်နေတယ်။ အဲ့ဒါကို ရော်ဘာခြစ်ဖို့သွားတဲ့ အလုပ်သမားတွေ တင်လာတဲ့ကားကလည်း မရှောင်နိုင်ဘဲဝင်တိုက်တယ်။ ကားပေါ်မှာက ယာဥ်မောင်းအပြင် အယောက် ၂၀ ကျော်လောက် ပါတယ်” လို့ ပြောပါတယ်။

ယာဉ်တိုက်မှုကြောင့် ကားပေါ်ပါအမျိုးသား ၂ ဦး သေဆုံးပြီး၊ အမျိုးသား ၄ ဦးနဲ့ အမျိုးသမီး ၁၂ ဦး စုစုပေါင်း ၁၆ ဦး ဒဏ်ရာရခဲ့ကာ သူတို့ကို မိတ္တိလာဆေးရုံကို ပို့ဆောင်ထားရတယ်လို့ ဆိုပါတယ်။

မတ်လ ၄ ရက် မနက်အစောပိုင်းကလည်း ပဲခူးတိုင်း၊ ရေတာရှည်မြို့နယ်၊ ရန်ကုန် – မန္တလေး အမြန်လမ်းမကြီး မိုင်တိုင်အမှတ် ၁၆၇ အနီးမှာ ခရီးသည်တင်ကား အရှိန်လွန်တိမ်းမှောက်ပြီး ၅ ဦး သေဆုံးကာ၊ ၂၅ ဦးကျော် ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ပြင်ဦးလွင်၊ ဖေဖော်ဝါရီ ၂‌၇၊ ၂၀၂၃။

မန္တလေးတိုင်း၊ ပြင်ဦးလွင်မြို့၊ ရပ်ကွက်ကြီး ၆၊ သစ်တောလမ်းနဲ့ သိင်္ဂါလမ်းထောင့် တရုတ်ဘုံကျောင်းအနီးမှာ ဖေဖော်ဝါရီလ ၂၆ ရက် မနေ့ညနေ ၄ နာရီဝန်းကျင်က ဆိုင်ကယ်နဲ့ ကားနဲ့တိုက်မိပြီး ဆိုင်ကယ်စီးအမျိုးသမီး ၂ ဦး ဒဏ်ရာပြင်းထန်ရရှိခဲ့တယ်လို့ သိရပါတယ်။

အဲ့ဒီအမျိုးသမီး ၂ ဦးဟာ သူတို့ပိုက်ဆံအိတ်ကိုလုယူသွားတဲ့ ဆိုင်ကယ်စီးအမည်မသိလူတွေနောက်ကို လိုက်ဖမ်းရင်း အဲ့ဒီနေရာအရောက်မှာ အရှိန်မထိန်းနိုင်ဘဲ လိုက်ထရပ်ကားကိုဝင်တိုက်မိခဲ့တာလို့ ကူညီဆောင်ရွက်ပေးခဲ့တဲ့ ပြင်ဦးလွင်အခြေစိုက်လူမှုကူညီရေးအသင်းတခုရဲ့ တာဝန်ရှိသူက မြေလတ်အသံကို ပြောပါတယ်။

“အချိန်ကလည်း ညနေတောင် မရှိသေးဘူးဆိုတော့။ သူတို့က စကူးဖီး အော်တိုဂီယာဘီးနဲ့။ စလုခံရတဲ့နေရာက ဘယ်နေရာကနေဖြစ်လာတာလည်းတော့မသိဘူး။ လိုက်တာဆိုတော့လည်း မီအောင်ဆိုပြီး အရှိန်နဲ့ တအားမောင်းလာပုံရတယ်။ အဲ့ဒီတရုတ်ဘုံကျောင်းနားရောက်တော့ ကားနဲ့တိုက်မိတာ” လို့ သူက ပြောပါတယ်။

ကားနဲ့တိုက်မိခဲ့တဲ့ အမျိုးသမီး ၂ ဦးထဲက ၁ ဦးဟာ ထိခိုက်ဒဏ်ရာပြင်းထန်ခဲ့လို့ ဆေးရုံပို့ ဆောင်ခဲ့ရပြီး စိုးရိမ်ရတဲ့အခြေအနေမျိုးမှာတော့မရှိဘူးလို့ သူကဆက်ပြောပါတယ်။

ဆိုင်ကယ်နဲ့ ပိုက်ဆံအိတ်လုယူသွားတဲ့ အမျိုးသားတွေကိုတော့ ဖမ်းဆီးရမိတာမျိုးမရှိသေးဘဲ လွတ်မြောက်နေဆဲဖြစ်တယ်လို့ သိရပါတယ်။