မြေလတ်အသံ

ရွှေဘို၊ နိုဝင်ဘာ ၁၄၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ကင်းဗျားကျေးရွာအနီးမှာ ဖမ်းဆီးခံရတဲ့ ဆရာတော် ၁ ပါးအပါ ၃ ဦး ၁၀ ရက်ကြာတဲ့အထိ ပြန်မလွတ်သေးဘူးလို့ ဖမ်းဆီးခံဆရာတော်နဲ့ နီးစပ်သူတွေဆီက သိရပါတယ်။

နိုဝင်ဘာ ၅ ရက်မှာ ရွှေဘိုမြို့၊ မြတောင်ရပ်ကွက်ရှိ မဟာဝိသုတာရာမ ဗုဒ္ဓဂယာကျောင်းတိုက်တည်ထောင်သူ ဆရာတော်ဒေါက်တာဝိသုတနဲ့အတူ ကိုရင်ကြီး ၁ ပါး၊ အမျိုးသမီး ၁ ဦးတို့ဟာ ရွှေဘိုကနေ ရန်ကုန်ကို ကားနဲ့အသွားမှာ ဖမ်းဆီးခံခဲ့ရတာလို့ ဆိုပါတယ်။

“ဆရာတော်နဲ့အဆက်အသွယ်မရပါ၊ ဖုန်းလည်း ပြောလို့မရပါ။ လူဝတ်လဲလိုက်ပြီလို့တော့ သိရတယ်။ စစ်ဆေးမေးမြန်းဆဲလို့ သိရပါတယ်။ ဘယ်မှာဖမ်းထားတယ်လို့တော့ တိတိကျကျ မပြောပါဘူး။ သူတို့ ဖမ်းရမယ့် list ထဲ ဆရာတော်ပါတယ်လို့ ပြောပါတယ်။ တပ်နဲ့ပတ်သက်တာ အဲ့လိုမျိုးတော့ မရှိပါဘူး။ ဆရာတော် ရွှေဘိုက သူ့ကျောင်းမှာ ဘုရားထီးတင်ရှိလို့ အိန္ဒိယကနေ ခဏပြန်ကြွလာတာ၊ အဲ့မှာ ဖမ်းခံရတာပါပဲ”လို့ ဖမ်းဆီးခံဆရာတော်နဲ့နီးစပ်သူ သံဃာတပါးကမိန့်ပါတယ်။

ဒီဖမ်ဆီးမှုကို ရွှေဘိုမြို့နယ်ပကဖ ကလုပ်ဆောင်တာလို့ အထက်ပါသံဃာကမိန့်ထားပြီး ဒီအခြေအနေနဲ့ ပတ်သက်လို့ မြို့နယ်ပကဖကို မြေလတ်အသံကဆက်သွယ်မေးမြန်းခဲ့ပေမယ့် အသေးစိတ်ပြန်လည် ဖြေကြားတာမရှိပါဘူး။

ဖမ်းဆီးခံဆရာတော်ကို ရွှေဘိုပကဖ က ပျူစောထီးဘုန်းကြီးဟုသတ်မှတ်ကာ ဖမ်းဝရမ်းထုတ်တားတာလည်းရှိတယ်လို့ အထက်ပါသံဃာက မိန့်ပါတယ်။

ဆရာတော်ဟာ အိန္ဒိယနိုင်ငံ၊ ဗုဒ္ဓဂါယာရှိ ဝင်းဝင်းနို့ဆီကျောင်းတိုက်တည်ထောင်သူလည်းဖြစ်ကာ ၎င်းထူထောင်ထားတဲ့ ရွှေဘိုမြို့၊ မြတောင်ရပ်ကွက်ရှိ မဟာဝိသုတာရာမ ဗုဒ္ဓဂယာကျောင်းတိုက်မှာလည်း ပညာရေးစင်တာတခုကို အခမဲ့ဖွင့်လှစ်ပေးကာ ရွှေဘိုဒေသတဝိုက်က ကလေးငယ်တွေကို ကိုယ်ထူကိုယ်ထ ပညာသင်ကြားပေးနေတာလို့ ဆိုပါတယ်။

ဖမ်းဆီးခံထားရတာ ရက်ကြာလာတဲ့အပြင် သတင်းထပ်မရတာကြောင့် အသက်ရှင်လျက်မရှိမှာကို ဆရာတော်နဲ့နီးစပ်သူတွေက စိုးရိမ်နေကြကာ ဒီဖမ်းဆီးထားမှုနဲ့ပတ်သက်ပြီးလည်း သက်ဆိုင်ရာအဖွဲ့တွေဘက်က ဒီကနေ့အထိ သတင်းထုတ်ပြန်ထားတာမရှိသေးပါဘူး။

စာတည်း – လင်း

ပွင့်ဖြူ၊ နိုဝင်ဘာ ၁၄၊ ၂၀၂၅။

မကွေးတိုင်း၊ မင်းဘူးခရိုင်၊ ပွင့်ဖြူနဲ့စကုမြို့နယ်တွေမှာ စစ်ကော်မရှင်တပ်ဖွဲ့ဝင်တွေက ပေါ်တာဆွဲဖမ်းဆီးတာတွေ ဆက်တိုက်လုပ်ဆောင်နေပြီး လူငယ် ၂၀ ကျော်ဖမ်းဆီးခံထားရတယ်လို့ ဒေသခံတွေဆီက သိရပါတယ်။

စကုမြို့နယ် လယ်ကိုင်းကျေးရွာလမ်းဆုံနဲ့ လယ်ကိုင်း-ကျောင်းတော်ရာအကြားလမ်းပိုင်းမှာ စစ်ကော်မရှင်ပူးပေါင်းတပ်တွေက ခရီးသွားကားတွေနဲ့ အနီးဝန်းကျင်ကျေးရွာတွေက လူငယ်တွေကို နိုဝင်ဘာလဒုတိယပတ်အတွင်း နေ့စဥ်ပေါ်တာဆွဲဖမ်းဆီးနေတာလို့ ဆိုပါတယ်။

” မနေ့ကလယ်ကိုင်းကနေ ကျောင်းတော်ရာသွားတဲ့နေရာမှာ (ခရီးသွားကားကို) ဆွဲတယ်။ ပါသွားတာက လူငယ် ၂ ဦးပါသွားတယ်။ ကားအမည်တော့ မသိလိုက်ဘူး ရိုးရိုးအရပ်ကားပါ။ အသက်အရွယ် ၁၈ နှစ်နဲ့ ၂၁ နှစ် အရွယ်တွေပါ၊ မနေ့ကမနက် ၁၀ နာရီလောက်မှာဆွဲတာ၊ နေ့တိုင်းလိုလိုဆွဲနေတာ” လို့ ပွင့်ဖြူမြို့ခံတဦးက မြေလတ်အသံကို ပြောပါတယ်။

အလားတူ ပွင့်ဖြူနဲ့ စလင်းမြို့အကြားက ရှောက်တောရွာအနီး မင်းဘူး – ပွင့်ဖြူ – စလင်းလမ်းပိုင်းမှာရှိတဲ့ မုန်းချောင်းတံတားထိပ်က စစ်ကော်မရှင်တပ်၊ ရဲနဲ့ ပျူစောထီးပူးပေါင်းတပ်ဖွဲ့တွေကလည်း ခရီးသွားကားတွေမှာပါလာတဲ့ လူငယ်တွေနဲ့ ဒေသခံလူငယ်တွေကို ပေါ်တာဆွဲဖမ်းဆီးနေတယ်လို့ သိရပါတယ်။

စစ်ကော်မရှင်တပ်ရဲ့ပေါ်တာဆွဲဖမ်းဆီးမှုတွေကြောင့် စကုမြို့နယ်ကျောင်းတော်ရာနဲ့ဝဲဒေါင့်ကျေးရွာတွေက အသက် ၁၈ ကနေ ၂၂ နှစ်ကြား လူငယ်အမျိုးသား ၁၅ ဦး၊ ပွင့်ဖြူမြို့နယ်မှာ အသက် ၂၅ ကနေ ၃၀ နှစ်အကြားရှိ လူငယ်မျိုးသားတွေဖြစ်တဲ့ အင်းနက်ရွာခံ ၁ ဦး၊ မုန်းဇလဲရွာခံ ၁ ဦး၊ တောင်အင်းရွာခံ ၁ ဦး၊ ရွာသစ်ရွာ ခံ ၁ ဦး၊ ခင်တဲရွာခံ ၁ ဦး၊ သူဌေးကုန်းရွာခံ ၃ ဦး စုစုပေါင်း ၈ ဦးအထိ ဖမ်းဆီးခံထားရတယ်လို့ သိရပါတယ်။

ဒါ့အပြင် ခရီးသွားကားတွေပေါ်ကလူငယ်တွေလည်း ဖမ်းဆီးခံထားရကာ အဲ့ဒီဖမ်းဆီးခံရမှုတွေကတော့ ခရီးသွားတွေဖြစ်တာကြောင့် ဖမ်းဆီးခံရသူတွေရဲ့ အခြေအနေတွေကို မသိရဘူးလို့ ဆိုပါတယ်။

နောက်ထပ် စကုမြို့ခံတဦးကတော့ ” စကုမြို့ နဲ့ ပွင့်ဖြူဘက်တွေမှာ အခု ၃ ရက်အတွင်း အဓမ္မစစ်မှုထမ်း တော်တော်ဆွဲခံရပါတယ်။ Honda Fit အနက်ရောင် YGN 1K/1815 နဲ့ ပတ်ဆွဲနေတာပါ” လို့ ပြောပါတယ်။

လက်ရှိမှာ ပေါ်တာဆွဲဖမ်းဆီးသွားသူတွေကို မင်းဘူးမြို့အခြေစိုက်စစ်ကော်မရှင်တပ်ရင်းတွေဆီ ပို့ဆောင်ထားပြီး အဲ့ဒီကတဆင့် မကွေးမြို့ အမှတ် ၃ စစ်သားစုဆောင်းရေးတပ်ကို ပို့ဆောင်လေ့ရှိတယ်လို့ သိရပါတယ်။

နိုဝင်ဘာလပထမပတ်အတွင်း မကွေးတိုင်းအပါမြို့ကြီးအများအပြားမှာ စစ်ကော်မရှင်ဦးဆောင်ပြီး တန်ဆောင်တိုင်ပွဲတွေပြုလုပ်ခဲ့ရာ အဲ့ဒီကာလတွေမှာ ပေါ် တာဆွဲဖမ်းဆီးတာတွေ ယာယီရပ်နားခဲ့ပြီးတဲ့နောက် ဒုတိယအပတ်ကစတင်ကာ မကွေးတိုင်းက မြို့နယ်တွေမှာ အခုလို ဖမ်းဆီးမှုတွေပြန်လည်မြင့်တက်လာတာလည်း ဖြစ်ပါတယ်။

စာတည်း – ဟိန်းစံ

ဝက်လက်၊ နိုဝင်ဘာ ၁၄၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ပင်းဇင်းကျေးရွာ၊ ကျီးကန်မြောက်ရွာနဲ့ ကျီးရစ်ကန်ရွာတို့ကို စစ်ကော်မရှင်စစ်ကြောင်းက မီးထပ်ရှို့တာကြောင့် အိမ်ခြေ ၁၀၀ နီးပါး မီးလောင် ပျက်စီးခဲ့တယ်လို့ ဒေသခံတွေဆီက သိရပါတယ်။

နိုဝင်ဘာ ၁၃ ရက်မနက် ၈ နာရီကျော်မှာ ရွာသာကြီးရွာကထွက်လာတဲ့ တပ်မ ၃၃၊ ရွှေဘို လေ့ကျင့်ရေး ၈ စစ်ကော်မရှင်တပ်တွေအပါအင်အား ၄၅၀ ကျော်က ပင်းဇင်းကျေးရွာကိုမီးရှို့ပြီး နေ့လယ် ၁၂ နာရီကျော်ခန့်မှာ ကျီးကန်မြောက်ရွာက နေအိမ်တွေကိုမီးထပ်ရှို့ခဲ့တယ်လို့ ဆိုပါတယ်။

“ဒီတခါမီးတင်တာတော့ မီးပုံးပျံဦးကျော်ရင် မှိုင်းတင်သလိုပဲ။ နှစ်ရွာလုံးကတော့ကုန်လုနီးပါး။ အကုန်တော့မကုန်သေးဘူး။ ပင်းဇင်းအရင်ရှို့တာ။ မီးရှို့တဲ့စစ်ကြောင်းကညနေပိုင်း လှတော ပြန်ဝင်တယ်။ လှတောမှာက ဟိုတုန်းကတည်းအထိုင်ရှိတာ။ အခုဆို ၇ ရွာကျော်ပြီး မီးရှို့ခံရတာ”လို့ ဒေသခံတဦးကပြောပါတယ်။

အိမ်ခြေ ၁၇၀ ခန့်ရှိတဲ့ ပင်းဇင်းရွာက နေအိမ် ၅၀ ကျော်မီးလောင်ပျက်စီးပြီး အိမ်ခြေ ၁၅၀ ခန့်ရှိတဲ့ ကျီးကန်မြောက်ရွာက နေအိမ် ၇၀ ခန့်မီးရှို့ခံရတယ်လို့ သိရပါတယ်။

ပင်းဇင်းနဲ့ကျီးကန်မြောက်ရွာကို စစ်ကြောင်းဝင်ချိန် ဒေသကာကွယ်ရေးအဖွဲ့တွေက မိုင်းဆွဲတိုက်ခိုက်မှုတွေလောက်သာပြုလုပ်နိုင်ပြီး ထိခိုက်တော့မသိရသေးဘူးလို့ ဆိုပါတယ်။

ဒါ့အပြင် နိုဝင်ဘာ ၁၄ ရက်ဒီမနက်ပိုင်းမှာလည်း စစ်ကော်မရှင်တပ်တွေက ကျီးရစ်ကန်ရွာကို ထပ်မံမီးရှို့နေပြီး ပျက်စီးမှုကိုတော့ သီးခြားအတည်မပြုနိုင်သေးပါဘူး။

အဆိုပါ စစ်ကော်မရှင်တပ်ဖွဲ့ဝင်တွေဟာ နိုဝင်ဘာ ၅ ရက်မှာ ထုံးဘို၊ ရွာတော်ကုန်း၊ တမာကုန်း၊ တံတားဦး၊ နိုဝင်ဘာ ၆ ရက်မှာ ထုံးဘိုကုန်း၊ နိုဝင်ဘာ ၇ ရက်မှာ ကဒူ၊ မြင်တော်၊ နိုဝင်ဘာ ၈ ရက်မှာ ရွာတော်ကုန်း၊ နိုဝင်ဘာ ၉ ရက်မှာ ထုံးဘို၊ နိုဝင်ဘာ ၁၁ ရက်မှာ လှတောနဲ့ ရွှေကျင်ရွာတို့က စုစုပေါင်း နေအိမ် ၁၀၀ ဝန်းကျင်မီးလောင်ပျက်စီးထားပြီး မြေပြင်မှာပိုများနိုင်တယ်လို့ ဆိုပါတယ်။

စစ်ကော်မရှင်ဘက်က အင်အားအများအပြားနဲ့ကျေးရွာတွေကိုစစ်ကြောင်းထိုးနေတာကြောင့် ဝက်လက်မြို့နယ်ရှိ ကျေးရွာပေါင်း ၂၀ ကျော်က ဒေသခံပြည်သူ ၂၀,၀၀၀ ကျော်ဘေးလွတ်ရာမှာ ထွက်ပြေးတိမ်းရှောင်နေကြတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ ၁၄၊ ၂၀၂၅။

စစ်ကော်မရှင်တပ်ရဲ့မကွေးမြို့အခြေစိုက် အမှတ် ၈၈ ခြေမြန်တပ်မဌာနချုပ် (တမခ ၈၈)ရဲ့ တပ်မမှူး ဗိုလ်မှူးကြီး မြင့်ဟိဏ်းကို သူရဲကောင်းမှတ်တမ်းဝင်တံဆိပ်ပေးအပ်ကြောင်း ဒီကနေ့ နိုဝင်ဘာ ၁၄ ရက်ထုတ် စစ်ကော်မရှင်ထိန်းချုပ်သတင်းစာတွေမှာ ဖော်ပြပါတယ်။

ရှမ်းမြောက်ဒေသ နောင်ချိုမြို့တိုက်ပွဲကို တိုက်ခိုက်ခဲ့တဲ့ တပ်မ ၁၁ ဒုတိယတပ်မမှူး ဗိုလ်မှူးကြီး မြင့်ဟိဏ်းကို စစ်ခေါင်းဆောင်တွေက ပြီးခဲ့တဲ့ အောက်တိုဘာလနောက်ဆုံးပတ်အတွင်း တပ်မ ၈၈ တပ်မမှူးအဖြစ် ရာထူးတိုးမြှင့်ပေးခဲ့ပြီးတဲ့နောက် စွမ်းရည်တံဆိပ်ပါ ထပ်မံပေးအပ်ခဲ့တာပါ။

နောင်ချိုမြို့ကို စစ်ကော်မရှင်တပ်ဖွဲ့တွေပြန်လည်ထိန်းချုပ်နိုင်ခဲ့ချိန် ပြီးခဲ့တဲ့ဇူလိုင်လအတွင်း တပ်မ ၁၁ ဒုတိယတပ်မမှူးဖြစ်တဲ့ ဗိုလ်မှူးကြီး မြင့်ဟိဏ်းက မြို့ခံတချို့ကိုလိုက်လံတွေ့ဆုံပြီး ထမင်းဘူးတွေပေးတာနဲ့ ဝါဒဖြန့်စည်းရုံးပြောဆိုတာတွေလုပ်ဆောင်ခဲ့ကာ အဲ့ဒီရုပ်သံဖိုင်တွေလည်း လူမှုကွန်ယက်တွေမှာ ပျံ့နှံ့ခဲ့တာပါ။

နောင်ချိုမြို့ကို ပြီးခဲ့တဲ့ဧပြီလမှာ စစ်ကော်မရှင်တပ်က အင်အားအလုံးအရင်းနဲ့ထိုးစစ်အရှိန်မြှင့်တင်ခဲ့ပြီး ဇူလိုင်လအတွင်းမှာ မြို့တွင်းကနေ တော်လှန်ရေးတပ်တွေပြန်လည်ဆုတ်ခွာပေးလိုက်ရပြီးတဲ့နောက် စစ်ကော်မရှင်တပ်ဖွဲ့တွေက ပြန်လည်ထိန်းချုပ်ခဲ့တာပါ။

” ခုရောက်တဲ့ တပ်မမှူးက (နောင်ချိုမှာ) သံချပ်ကာနဲ့ကိုယ်တိုင်တိုက်ခဲ့တယ်လို့ ပြောနေကြတာပဲ။ ဟုတ်၊ မဟုတ်တော့မသိဘူး” လို့ မကွေးတပ်မ ၈၈ တပ်မိသားစုဝင်တဦးက မြေလတ်အသံကို ပြောပါတယ်။

ဗိုလ်မှူးကြီး မြင့်ဟိဏ်း ဟာ စစ်အာဏာသိမ်းပြီးတဲ့နောက် တပ်မ ၈၈ရဲ့ ၄ ဦးမြောက် တပ်မမှူးဖြစ်ပြီး ယခင်တပ်မမှူးတွေအနက် ဗိုလ်မှူးချုပ် မင်းထွဋ်ဦး မှာ ဗန်းမော်တိုက်ပွဲမှာ သေဆုံးခဲ့ကာ၊ ဗိုလ်မှူးချုပ် အောင်ဟိန်းဝင်း က ရာထူးကဖြုတ်ချခံခဲ့ရပြီး ဗိုလ်မှူးချုပ် ကျော်နိုင်ဦး ကတော့ လက်ရှိ တောင်ကြီးမြို့အခြေစိုက် အရှေ့ပိုင်းတိုင်းစစ်ဌာနချုပ် တိုင်းမှူးအဖြစ် ရာထူးတိုးမြှင့်ခံထားရတာလည်း ဖြစ်ပါတယ်။

စစ်ကော်မရှင်တပ်က စွမ်းရည်ဘွဲ့တံဆိပ်ပေးတာမှာ နေပြည်တော်စစ်တိုင်းမှူး ဗိုလ်ချုပ် စိုးမင်း၊ ခိုလမ် အရှေ့အလယ်ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ် စိုးမြတ်ထွဋ် အပါ ဗိုလ်ချုပ် ၅ ဦးနဲ့ နောင်ချို၊ ကျောက်မဲနဲ့ သီပေါတိုက်ပွဲတွေမှာ ပါဝင်တဲ့ စစ်ကော်မရှင်တပ်ဖွဲ့ဝင် ၅၀ ကျော်ပါဝင်ကြောင်းထုတ်ပြန်ထားပါတယ်။

မြိုင်၊ နိုဝင်ဘာ ၁၃၊ ၂၀၂၅။

မကွေးတိုင်း၊ မြိုင်မြို့နယ်အတွင်း စစ်ကြောင်းထိုးနေတဲ့စစ်ကော်မရှင်စစ်ကြောင်းက ဖမ်းဆီးထားတဲ့ ဒေသခံ ၅ ဦးထဲက ၂ ဦးကို သတ်ဖြတ်ခဲ့ပြီး နေအိမ်တချို့ကိုလည်းမီးရှို့သွားတယ်လို့ ဒေသခံတွေဆီက သိရပါတယ်။

အဆိုပါစစ်ကြောင်းဟာ နိုဝင်ဘာ ၁၂ ရက်မနက်ပိုင်းမှာ မြိုင်အခြေစိုက် စက်မှု ၂ ကနေထွက်လာပြီးနောက် ၃ မိုင်အကွာ ဝက်ပုတ်ရွာအနီးမှာ ဖမ်းဆီးခံထားရသူတွေထဲက အသက် ၃၄ နှစ်အရွယ် မငယ်တာနဲ့ ၄၉ နှစ်အရွယ် ကိုကံစိန်တို့ကိုသတ်ကာ နေအိမ် ၂ လုံးကိုလည်း မီးရှို့ခဲ့တယ်လို့ ဒေသခံတဦးက ဆိုပါတယ်။

စစ်ကြောင်းပြန်ဆုတ်သွားချိန် နေ့လယ် ၁၁ နာရီလောက်မှာ ဒေသခံတွေနဲ့တော်လှန်ရေးတပ်ဖွဲ့တွေ နယ်မြေရှင်းလင်းရေးလုပ်ချိန်မှာ ကြိုးတုပ်၊ ဓါးနဲ့မွှန်းခံထားရတဲ့ အလောင်းတွေကိုတွေ့ခဲ့တာလို့ ကိုဘိုဘိုသန့်ဇင် က ပြောပါတယ်။

“မနေ့တုန်းက သူတို့ ၉ နာရီလောက်က ဝက်ပုတ်ထဲကိုရောက်လာပြီးတော့ နေ့လယ် ၁ နာရီလောက်မှာ ပြန်ပြီး Back (နောက်ဆုတ်) သွားပါတယ်။ ကျနော်တို့ နယ်မြေရှင်းလင်းရေးဝင်လုပ်ခါမှ သူတို့က အမျိုးသမီး ၁ ယောက်နဲ့ အမျိုးသား ၁ ယောက်ကိုသတ်ဖြတ်ခဲ့ပြီးတော့ နေအိမ် ၂ လုံးကို မီးရှို့ထားခဲ့တာပေါ့။” လို့ အညာမြေတပ်ပေါင်းစုပြန်ကြားရေးတာဝန်ခံ ကိုဘိုဘိုသန့်ဇင်က ပြောပါတယ်။

ဝက်ပုတ်ကျေးရွာဟာ အိမ်ခြေ ၁၆၀ ခန့်ရှိတဲ့ ပျူစောထီးအားကောင်းတဲ့ကျေးရွာဖြစ်ပြီး ၂၀၂၄ ဩဂုတ် ၈ ရက်မှာ အညာမြေတပ်ပေါင်းစုနဲ့ မဟာမိတ်တပ်တွေက သိမ်းပိုက်ထားပြီးနောက် ဒေသခံတွေဆီ ပြန်လည်အပ်နှင်းထားတဲ့ကျေးရွာဖြစ်တယ်လို့ အညာမြေတပ်ပေါင်းစု ပြန်ကြားရေးတာဝန်ခံက ဆက်ပြောပါတယ်။

“တော်လှန်ရေးစကတည်းကနေ ၂၀၂၄ ဩဂုတ်လအထိ ပျူစောထီးတွေနေထိုင်ခဲ့တယ်။ စစ်တပ်နဲ့ အထိုင်ချပြီး (အခုအခြေအနေက)ပြည်သူရွာပြန်ဖြစ်သွားတာ။ ပျူစောထီးတွေက စစ်တပ်ထဲ လိုက်သွားတာရှိတယ်၊ သေတဲ့လူတွေကသေကြတယ်ပေါ့ “လို့ ကိုဘိုဘိုသန့်ဇင်က ပြောပါတယ်။

အဆိုပါစစ်ကြောင်းဟာ အောက်တိုဘာ တတိယပတ်လောက်ကစတင်ပြီး ပခုက္ကူမြို့နယ်နဲ့ မြိုင်မြို့နယ်က ကျေးရွာတွေကို စစ်ကြောင်းထိုးခဲ့ပြီးနောက် နိုဝင်ဘာ ၁၁ ရက်မှာ ပျူစောထီးအားကောင်းတဲ့ သရက်ကန်ရွာကတဆင့် မြိုင်စက်မှု ၂ ကိုလာချိန် ရွာတန်းရှည်ကျေးရွာအနီးမှာ အသတ်ခံရသူ ၂ ဦးအပါအဝင် ရွာတန်းရှည်ရွာဒေသခံ ၅ ဦးကို ဖမ်းဆီးသွားခဲ့တာပါ။

ဒါ့အပြင် ဒေသကာကွယ်ရေးတပ်တွေနဲ့ ထိတွေ့မှုဖြစ်ခဲ့ကာ တိုက်ပွဲအခြေအနေကို အသေးစိတ်မသိရသေးဘဲ နိုဝင်ဘာ ၁၃ ရက်ဒီမနက်ထိတော့ စစ်ကြောင်းက စက်မှု ၂ ထဲမှာပဲရှိနေသေးတယ်လို့ ဆိုပါတယ်။

စစ်ကြောင်းထိုးနေစဥ် ပြီးခဲ့တဲ့နိုဝင်ဘာ ၆ ရက်မှာလည်း မြိုင်မြို့နယ်၊ နှမ်းဆီကန်ရွာကို မီးရှို့ဖျက်ဆီးခဲ့တာကြောင့် နေအိမ် ၂၀ ကျော်၊ နိုဝင်ဘာ ၁၁ ရက်မှာ ရွာတန်းရှည် အနီးကတောတိုက် ၂ လုံးကိုလည်း မီးရှို့ဖျက်ဆီးခဲ့ပါသေးတယ်။

စစ်ကြောင်းကြောင့် မြိုင်မြို့နယ်အတွင်းရှိ ဝက်ပုတ်၊ချောင်းနားတိုက်၊ ဆယ်ပြား၊ ရွာတန်းရှည်၊ မိတ္ထီလာ စတဲ့ကျေးရွာတွေအပါအဝင် ကျေးရွာ ၁၀ ရွာကျော်က ဒေသခံတွေ ထွက်ပြေးတိမ်းရှောင်နေကြရပါတယ်။

စာတည်း – လင်း