မြိုင်၊ သြဂုတ် ၁၀၊ ၂၀၂၅။

မကွေးတိုင်း၊ မြိုင်မြို့ပန်းခြံအနီးဂိတ်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေကို စီးနင်းတိုက်ခိုက်ရာ ရဲ ၁ ဦးအပါ ၃ ဦးကိုအရှင်ဖမ်းမိပြီး လက်နက်တွေလည်းရရှိခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

အင်အား ၂၀ ကျော်ရှိတဲ့ အဲ့ဒီစစ်ကောင်စီဂိတ်စခန်းကို သြဂုတ် ၁၀ ရက် ဒီမနက် ၅ နာရီဝန်းကျင်မှာ စတင်ပြီး ဒရုန်းနဲ့ဗုံးကြဲပြီးနောက် စခန်းထိဝင်ရောက်တိုက်ခိုက်ခဲ့တာလို့ ဆိုပါတယ်။

“မနက် ၅ နာရီလောက်မှာ စသိမ်းတာ။ ဒရုန်းနဲ့ မြို့ထဲရဲစခန်းတွေရော စစ်တပ်အထိုင်ချထားတဲ့နေရာ မှန်သမျှ အကုန်လုံးကို ဝေဟင်ကနေပြီးတော့ အရင်ဦးဆုံးတားထားပြီးတော့ အဲ့စခန်းကို ဒရုန်းနဲ့ အရင်ချေမှုန်းပြီးတော့မှ ဝင်သိမ်းတာ။ စခန်းကို ဝင်လုံးတဲ့အချိန်က ၁၀ မိနစ်လောက်ပဲကြာမယ် စတဲ့အချိန်နဲ့ဆို ၅ နာရီလောက်ကြာတယ်” လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့မှ ကိုနဂွင်း ကပြောပါတယ်။

စီးနင်းတိုက်ခိုက်ခဲ့တဲ့စခန်းဟာ မြိုင်မြို့မရဲစခန်းနဲ့ မိုင်ဝက်ခန့်ဝေးပြီး စစ်ကူလာနိုင်တဲ့လမ်းကြောင်းတွေကိုလည်း ဖြတ်တောက်ထားကြောင့် စစ်ကောင်စီတပ်တွေဘက်က စစ်ကူမလာနိုင်ဘဲ မြို့လယ်ကောင်ရှိ ဒေသခံနေအိမ် ၁ လုံးပေါ်ကနေပဲ စက်လက်နက်တွေနဲ့ပစ်ခတ်ကာ ဂျက်ဖိုက်တာ၊ ပါရာမော်တာတွေ သုံးပြီး လေကြောင်းပစ်ကူတာတွေ လုပ်ခဲ့တယ်လို့ ဆိုပါတယ်။

“မြို့ထဲက စစ်ကူမလာနိုင်ဘူး။ လာနိုင်တဲ့လမ်းကြောင်းတွေ အကုန်ဖြတ်တောက်ထားတာဆိုတော့ ရဲစခန်းနဲ့လည်း အရမ်းမဝေးတော့ဘူး။ ပန်းခြံနားက မီးသတ်ရုံးထဲမှာလည်း စကစတွေရှိတယ်။ ၂၀ မပြည့်တပြည့်။ မီးသတ်ရုံးကိုလည်း တဖွဲ့က အယောင်ပြတိုက်နေတာရှိတယ်။ အထက ၁ ကိုကျ ဝေဟင်ကဒရုန်းနဲ့” လို့ ကိုနဂွင်းက ဆက်ပြောပါတယ်။

တိုက်ခိုက်မှုအတွင်း အဲ့ဒီဂိတ်စခန်းမှာရှိနေတဲ့ ရဲ ၁ ဦးနဲ့ ဝန်ထမ်း ၂ ဦးဖမ်းမိတဲ့အပြင် မြို့မရဲစခန်းကို ထွက်ပြေးတဲ့ စစ်ကောင်စီတပ်ဖွဲ့ဝင်တွေကို မဟာမိတ်အဖွဲ့တွေက ကြားဖြတ်တိုက်ချိန်မှာလည်း G 3 ၃ လက်နဲ့ ကျည်တချို့ရရှိခဲ့တယ်လို့ ဆိုပါတယ်။

“ချေမှုန်းရေးစစ်ကြောင်း၊ အယောင်ပြစစ်ကြောင်း၊ ဖြတ်တောက်ရေးစစ်ကြောင်း အဲ့လိုခွဲတိုက်တာဆိုတော့ အထိအခိုက်ကတော့များမှာ၊ ကျနော်တို့ဝင်ပြီးလုံးတဲ့အချိန်ရောက်တော့ ထွက်ပြေးကုန်တာ ရဲစခန်းဘက်ဆီကိုပြေးတာ။ ကျတော်တို့ကြားထဲမှာရှိတဲ့ ဖြတ်တောက်ရေးသမားတွေနဲ့တွေ့ပြီး အဲ့မှာ ဖြတ်တိုက်ရင်းနဲ့ သေနတ်ကရတာ”လို့ ကိုနဂွင်းက ပြောပါတယ်။

ဒီတိုက်ခိုက်မှုကို မြိုင်မြို့နယ်ပြည်သူကာကွယ်ရေးတပ်ဖွဲ့ နဲ့ မဟာမိတ်တပ်ဖွဲ့တွေက ပူးပေါင်းလုပ်ဆောင်ခဲ့တာဖြစ်ပြီး တိုက်ပွဲအတွင်းစစ်ကောင်စီဘက်က ၁ ဦးထက်မနည်း သေဆုံးနိုင်တယ်လို့လည်း ဆိုပါတယ်။

တိုက်ခိုက်ပြီးနောက် မြို့ပေါ်မှာ စစ်ကောင်စီတပ်တွေက လေကြောင်းနဲ့ ဗုံးကြဲတာတွေလုပ်နေတယ်လို့ မြို့ခံတွေဆီက သိရပါတယ်။

ပြီးခဲ့တဲ့ဇူလိုင် ၉ ရက်ကလည်း မြိုင်မြို့၊ စီမံကိန်းဦးစီးဌာနရုံးမှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေကို တိုက်ခိုက်ခဲ့ရာ ရဲအုပ် ၁ ဦးအပါ ၁၂ ဦးအရှင်ဖမ်းမိခဲ့ပြီး လက်နက်ခဲယမ်းအများအပြားသိမ်းဆည်းရမိခဲ့ပါသေးတယ်။

စာတည်း – လင်း၊ တည်းဖြတ် – M

မြိုင်၊ ဇူလိုင် ၁၁၊ ၂၀၂၅။

ဒါက မကွေးတိုင်း၊ မြိုင်မြို့ စီမံကိန်းဦးစီးဌာနရုံးမှာ အထိုင်ချတပ်စွဲထားတဲ့ ရဲတွေကို တိုက်ခိုက်ချိန် အဆောက်အဦအတွင်း နောက်ဆုံးကျန်နေတဲ့ရဲတွေကို လက်နက်ချဖို့ ကာကွယ်ရေးတပ်ဖွဲ့တွေက ဖိတ်ခေါ်နေတာပါ။

စီမံကိန်းဦးစီးဌာနရုံးမှာ အင်အား ၃၀ ခန့်နဲ့အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေကို မြိုင်ပကဖနဲ့မဟာမိတ်တွေက ဇူလိုင် ၉ ရက်နေ့မနက် ၄ နာရီမှာ တိုက်ခိုက်ခဲ့ပါတယ်။

တိုက်ပွဲတနေကုန်နီးပါးဖြစ်ပွားခဲ့ပြီး ကာကွယ်ရေးတပ်ဖွဲ့တွေက စီမံကိန်းဦးစီးဌာနရုံးအဆောက်အဦကို ဝိုင်းထားချိန် လက်နက်ချအညံ့ခံဖို့ ဖိတ်ခေါ်ခဲ့တာပါ။

အဲဒီနောက် ရဲအုပ်အဆင့်ရှိသူ ၁ ဦးအပါ ရဲ ၁၂ ဦးဟာ ကာကွယ်ရေးတပ်ဖွဲ့တွေထံ လက်နက်ချခဲ့ပြီး ည ၇ နာရီမှာ တိုက်ပွဲပြီးဆုံးခဲ့ပါတယ်။

တိုက်ပွဲအတွင်း လက်နက်ငယ် ၁၃ လက်အပါအဝင် စစ်သုံးပစ္စည်းတွေ သိမ်းဆည်းနိုင်ခဲ့ပါတယ်။

တည်းဖြတ် – HP⁩

မြိုင်၊ ဇူလိုင် ၁၁၊ ၂၀၂၅။

မကွေးတိုင်း၊ မြိုင်မြို့နယ်၊ စီမံကိန်းဦးစီးဌာနရုံးမှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေကို တိုက်ခိုက်ခဲ့ရာ ရဲအုပ် ၁ ဦးအပါ ၁၂ ဦးအရှင်ဖမ်းမိခဲ့ပြီး လက်နက်ခဲယမ်းအများအပြားသိမ်းဆည်းနိုင်ခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့(မြိုင်ပကဖ) တာဝန်ခံ ဗိုလ်လက်ယာက ပြောပါတယ်။

ဇူလိုင် ၉ ရက် မနက်အစောပိုင်း ၄ နာရီခွဲမှာ စစ်ကောင်စီတပ်သား ၃၀ ဝန်းကျင်ရှိတဲ့ အဆိုပါစီမံကိန်းရုံးကို စတင်ဝင်ရောက်စီးနင်းတိုက်ခိုက်ခဲ့ပြီး တနေကုန်တိုက်ပွဲကြာမြင့်ခဲ့ကာ ည ၇ နာရီမှာ တိုက်ပွဲပြီးဆုံးခဲ့တယ်လို့ ဆိုပါတယ်။

“ မြိုင်မြို့မရဲစခန်းနဲ့ မြန်မာ့စီးပွားရေးဘဏ်ကနေ စစ်ကောင်စီရဲ့အင်အားတွေ စစ်ကူထွက်တယ်၊ မနက် ၉ နာရီ ၁ ကြိမ်၊ နေ့လယ် ၁၂ နာရီ ၁ ကြိမ်၊ ညနေ ၄ နာရီကျော်မှာ ၁ ကြိမ်ထွက်တယ်၊ အဲ့ဒီထွက်လာတဲ့ စစ်ကူတွေကို ကျနော်တို့က အသင့်နေရာယူထားတာဆိုတော့ သူတို့စစ်ကူမထွက်နိုင်ဘူး၊ သူတို့ရမ်းသမ်းဖောက်တာပဲရှိပါတယ်” လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်တာဝန်ခံ ဗိုလ်လက်ယာက ပြောပါတယ်။

တိုက်ပွဲတွေအတွင်းမှာ စစ်ကောင်စီလက်အောက်ရဲတပ်ဖွဲ့ဝင်တွေဖြစ်တဲ့ ရဲအုပ် သောင်းထွေးစိုး၊ ရဲအရာခံ ထွန်းမင်းဇော်၊ ရဲတပ်ကြပ် ဇော်ဝင်းနိုင်၊ ရဲဒုတပ်ကြပ် တင်မျိုးထွန်း၊ ရဲဒုတပ်ကြပ် မင်းမင်းထွန်း၊ ရဲဒုတပ်ကြပ် သက်ကိုကို၊ ရဲတပ်သား ဇော်နိုင်၊ ရဲတပ်သား ရဲရင့်အောင်၊ ရဲတပ်သား သန်းတိုးအောင်၊ ရဲတပ်သား မင်းမင်းဇော်၊ တပ်ကြပ် ဦးထွန်း၊ တပ်သား မျိုးနိုင်ဝင်း တို့ ၁၂ ဦးကို အရှင်ဖမ်းဆီးရမိခဲ့ပြီး ၁ ဦးမှာ ဒဏ်ရာရရှိထားလို့ ဆေးကုသမှုပေးထားတယ်လို့ သိရပါတယ်။

ဒါ့အပြင် ၎င်းတို့ကိုင်ဆောင်တဲ့ လက်နက်ငယ် BA 63 (G3) ၁၀ လက်၊ MA 3 ၁ လက်၊ MA 4 ၁ လက်၊ M 79 ၁ လက်၊ ကျည်ဘောက် ၁၇ ခု၊ ကျည်မျိုးစုံ ၂၀၀ ကျော်၊ လက်ပစ်‌ဗုံး ၉ လုံး၊ ၄၀ မမဗုံးသီး ၆ လုံး၊ ကျည်ကာဦးထုပ် ၅ လုံး၊ ဖုန်း ၃ လုံး၊ အီကွေ့မန့် ၇ ခု၊ ငွေသား ၂၂ သိန်းတို့ကို သိမ်းဆည်း ရရှိခဲ့တာပါ။

နှစ်ဖက်တိုက်ပွဲတွေအတွင်း မြိုင်ပကဖဘက်ကလည်း တပ်ဖွဲ့ဝင် ၁ ဦး ကျဆုံး၊ ၇ ဦးဒဏ်ရာရရှိထားကာ တိုက်ပွဲဖြစ်ပွားချိန် လေကြောင်းတိုက်ခိုက်မှု ၂ ကြိမ် လုပ်ဆောင်ခဲ့ပေမယ့် တပ်ဖွဲ့ဝင်တွေထိခိုက်မှုမရှိခဲ့ဘူးလို့ ပြောပါတယ်။

တိုက်ပွဲပြီးဆုံးပြီးနောက် ည ၈ နာရီလောက်မှာတော့ မြိုင်မြို့နယ်၊ သနပ်ရင်းကျေးရွာကို ပေါင် ၃၀၀ ဗုံး ၂ လုံး ထပ်မံကြဲချသွားတာကြောင့် အမျိုးသား ၁ ဦးနဲ့ ကလေးငယ် ၁ ဦး သေဆုံးပြီး ၄ ဦးဒဏ်ရာရရှိခဲ့တယ်လို့ သိရပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ်၊ မြိုင်ညီညွတ်ရေးတပ်ပေါင်းစု (9+)၊ ဇာမဏီပြောက်ကျားတပ်ဖွဲ့၊ ညီနောင်သုံးဖော် (YSO)၊ တပ်ပေါင်းစု (Good Brother)၊ အညာဟီးရိုးလက်နက်ကြီးအဖွဲ့၊ ဂျော်ကာပြောက်ကျားတပ်ဖွဲ့(ဒရုန်း)၊ ကင်ဒို(ဒရုန်း)ပေါက်၊ အညာမြေပြောက်ကျားတပ်ဖွဲ့ (ဒရုန်း)၊ Burma Revolution Ranger (BRR)၊ NFTA၊ Scorpion People Denfece Force တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

စာတည်း – ဟိန်းစံ၊ တည်းဖြတ် – M