မြိုင်

မြေလတ်အသံ၊ ဒီဇင်ဘာ ၂၂၊ ၂၀၂၅။

မကွေးတိုင်း၊ မြိုင်နဲ့ ပေါက်မြို့နယ်တို့မှာ စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သက်ကြီးပိုင်းအမျိုးသား ၁ ဦးထိခိုက်ပြီး နေအိမ်အဆောက်အအုံ တချို့လည်းပျက်စီးခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၂ ရက်မနက် ၁၀ နာရီခွဲမှာ မြိုင်မြို့နယ်၊ ရွာသစ်ကုန်းရွာကို မကွေးလေတပ်ဘက်က တက်လာတဲ့ MiG-29 ပေါ်ကနေ ဗုံးကြဲ၊ ပစ်ခတ်ခဲ့ပြီး မနက် ၁၀ နာရီ ၅၀ မိနစ်မှာ မုံရွာနမခ ကတက်လာတဲ့ ဂျိုင်ရိုကော်ပတာ ၂ စီးနဲ့ ပေါက်မြို့နယ်၊ လက်ပံတိုရေနံမြေစခန်းအနီးကို ဗုံးကြဲခဲ့တာလို့ ဆိုပါတယ်။

ခုလို ဗုံးကြဲပစ်ခတ်လို့ ရွာသစ်ကုန်းရွာတိုက်ခိုက်မှုမှာ အသက် ၆၀ အရွယ်အမျိုးသား ၁ ဦးထိခိုက် ဒဏ်ရာရကာ နေအိမ် ၁ လုံးပျက်စီးပြီး လက်ပံတိုရေနံမြေအနီးက မှော်မင်းသား KTV အဆောက်အအုံ ၁ ခုပျက်စီးခဲ့တယ်လို့ ဒေသခံတဦးကပြောပါတယ်။

“ဒဏ်ရာရသူ ၁ ဦးတော့ ရှိပါတယ်၊ အသက် ၆၀ အရွယ် အဘိုး ၁ ဦးပါ၊ မစိုးရိမ်ရပါဘူး၊ ပွတ်ပြီးထိသွားတာပါ၊ လောလောဆယ်တော့ နယ်ခံဆေးပေးခန်းမှာ ဆေးထည့်ပေးထားပါတယ်၊ သေဆုံးမှုတော့ မရှိပါဘူး၊ ကျတာကတော့ အိမ်ပေါ်တည့်တည့်ကျတာပါ၊ ကျတဲ့အိမ်ပေါ်မှာက လူက ၁ ဦးမှမရှိလို့ပါ၊ နေအိမ်တော့ပျက်စီးသွားပါတယ်”လို့ မြိုင်မြို့ခံတဦးက ပြောပါတယ်။

ရွာသစ်ကုန်းရွာမှာ အိမ်ခြေ ၂၀၀ နဲ့ လူဦးရေ ၄၀၀ ဝန်းကျင်ရှိပြီး လေကြောင်းတိုက်ခိုက်ခံရပြီးနောက် ဒေသခံတွေဟာ ရွာထဲကနေတိမ်းရှောင်နေကြတယ်လို့ ဆိုပါတယ်။

ဒါ့အပြင် စစ်ကော်မရှင်တပ်က လေကြောင်းတိုက်ခိုက်တာတွေကြောင့် ပေါက်နဲ့မြိုင်မြို့နယ်အတွင်း လူဦးရေ ၃,၀၀၀ ဝန်းကျင်စစ်ရှောင်နေရတယ်လို့လည်း အထက်ပါဒေသခံကဆက်ပြောပါတယ်။

ပြီးခဲ့တဲ့ ဒီဇင်ဘာ ၂၁ ရက်ကလည်း မြိုင်မြို့နယ်၊ ဘုန်းကြီးကန်ရွာကို စစ်ကော်မရှင်တပ်က ဂျိုက်‌ရိုကော်ပတာပေါ်ကနေ ပစ်ခတ်ခဲ့တာကြောင့် အမျိုးသမီး ၁ ဦးသေဆုံးခဲ့ပါသေးတယ်။

စာတည်း – လင်း

မြိုင်၊ ဒီဇင်ဘာ ၂၁၊ ၂၀၂၅။

မကွေးတိုင်း၊ မြိုင်မြို့နယ်၊ ဘုန်းကြီးကန်ရွာကို စစ်ကော်မရှင်ဘက်က ဂျိုင်ရိုကော်ပတာပေါ်ကနေ ပစ်ခတ်ခဲ့တာကြောင့် အမျိုးသမီး ၁ ဦးသေဆုံးပြီး နေအိမ်ပျက်စီးမှုတွေရှိခဲ့တယ်လို့ မြိုင်မြို့ခံတွေဆီက သိရပါတယ်။

ဒီဇင်ဘာ ၂၁ ရက် နေ့လယ် ၂ နာရီ ၂၀ မိနစ်လောက်မှာ ဘုန်းကြီးကန်ရွာကို ဂျိုင်ရိုကော်ပတာ ၂ ပေါ်ကနေ ၁၂၀ မမ လက်နက်ကြီးနဲ့ပစ်ခတ်ခဲ့တာကြောင့် အသက် ၃၀ အရွယ်အမျိုးသမီး ၁ ဦးသေဆုံးပြီး အသက် ၇၀ အရွယ် အဘိုး၊ အဘွား ၂ ဦးဒဏ်ရာရခဲ့တယ်လို့ ဆိုပါတယ်။

“အဲ့ဒီရွာမှာက တိုက်ပွဲဖြစ်ပွားခြင်းလည်း မရှိဘူး၊ ဂျိုက်ရိုကော်ပတာ ၂ စီးနဲ့ ပစ်သွားတာ၊ ၁၂၀ မမနဲ့ ၂ လုံး ပစ်သွားတာ၊ နေအိမ် ၃ လုံး ပျက်စီးတယ်၊ နွား ၁ ကောင်သေတယ်၊ အမျိုးသမီး ၁ ဦးသေတယ်။ အဘိုး၊ အဘွား ၂ ဦးဒဏ်ရာရတယ်။ ဒေသခံတွေကတော့ ရွာထဲမှာ အိပ်ကြမယ်မထင်ဘူး၊ တောထဲမှာ အိပ်ကြလောက်တယ်။” လို့ မြိုင်မြို့ခံတဦးက ပြောပါတယ်။

ဘုန်းကြီးကန်ရွာဟာ အိမ်ခြေ ၆၀၀ နဲ့ လူဦးရေ ၁,၀၀၀ ကျော်ရှိတဲ့ကျေးရွာတရွာဖြစ်ပြီး ခုလို လေကြောင်းကနေ တိုက်ခိုက်ခံရတာကြောင့် ဒေသခံတွေလည်းကြောက်လန့်ပြီး တောထဲကိုထွက်ပြေးနေကြရတယ်လို့ သိရပါတယ်။

ပြီးခဲ့တဲ့ ဒီဇင်ဘာ ၁၉ ရက်ကလည်း မြိုင်မြို့နယ်၊ ကန်ကြီးကုန်းရွာကို မကွေးလေတပ်ဘက်ကလာတဲ့ ဂျက်ဖိုက်တာပေါ်ကနေ ၂ ကြိမ် ဗုံးကြဲချတိုက်ခိုက်ခဲ့ပါသေးတယ်။

စာတည်း – လင်း

မြိုင်၊ နိုဝင်ဘာ၂၉၊ ၂၀၂၅။

မကွေးတိုင်း၊ မြိုင်မြို့နယ်နဲ့ ပေါက်မြို့နယ်အတွင်းစစ်ကြောင်းထိုးနေတဲ့ စစ်ကော်မရှင်စစ်ကြောင်းက နိုဝင်ဘာ ၂၈ ရက် မှာ အမျိုးသား ၂ ဦးကို သတ်ဖြတ်သွားတယ်လို့ ပြည်သူ့လွတ်မြောက်ရေး တပ်ပေါင်းစု-PLC ရဲ့ တာဝန်ခံဆီက သိရပါတယ်။

နိုဝင်ဘာ ၂၇ ရက်မှာ မြိုင်မြို့နယ် စက်မှု ၂ ကနေ ထွက်လာတဲ့စစ်ကြောင်းက သရက်ကန်ရွာကို လာချိန် စက်မှု ၂ နဲ့ သရက်ကန် ကြားကတောတိုက်မှာ အသက် ၃၀ အရွယ် ကိုငသိမ်းကို ဖမ်းဆီးခဲ့ပြီးနောက် သရက်ကန်ရွာကို ဝင်ရောက်တပ်စွဲခဲ့ကာ နိုဝင်ဘာ ၂၈ ရက်မနက်ပိုင်းမှာ ရွာကပြန်ထွက်ချိန် မြေရင့်နဲ့ နှမ်းဆီကန် ကြားကတောတိုက်တွေထဲမှာ သတ်ခဲ့တာလို့ ဆိုပါတယ်။

“သူနေတဲ့ တောတိုက်က တဲမှာတွေ့လို့ ဖမ်းခေါ်သွားတာ။ သရက်ကန်ပျူရွာကနေ ညောင်ဂျစ်ပင် အပြန်လမ်းမှာ သတ်သွားတာပါ။ မနေ့ညက ညောင်ဂျစ်ပင်မှာညအိပ်ပါတယ်။ အခု ပခုက္ကူမြို့နယ် တဲကုန်းရွာကို ရောက်သွားပါပြီ။”လို့ဆိုပါတယ်။

ကိုငသိမ်းရဲ့အလောင်းကို ဒီကနေ့ မနက် ၈ နာရီ က တွေ့ခဲ့ရပြီး အဲ့ဒီနေရာနဲ့ ၁ မိုင်ဝန်းကျင်အကွာ နှမ်းဆီကန်ရဲ့တောင်ဘက်ကတောထဲမှာလည်း အောင်သာကျေးရွာဘက်က ပျူစောထီးဟု ယူဆရသူရဲ့ အလောင်းကိုလည်း ဒီကနေ့မနက် ၈နာရီ အချိန်မှာတွေ့ခဲ့တယ်လို့ ဆိုပါတယ်။

“မှတ်ပုံတင်က ဘဲကြီး၊ အောင်သာလို့ တွေ့တာ ပြည်သူဆိုတာ ကျတော်တို့ဘက်က ဒီနားဝန်းကျင်က ဖမ်းခံထားရတာမျိုး သတင်းကြားထားတာမျိုးမရှိဘူးဆိုတော့ အခြားနေရာက ရှိမလားပေါ့။ စုံစမ်းနေတာ။ အတည်ပြုလို့မရသေးလို့ပါ။ ပြည်သူအလောင်းနဲ့ မီတာ ၁,၇၀၀ ကျော်လောက် အကွာမှာတွေ့တာပါ။” လို့ သူကဆက်ပြောပါတယ်။

ပျူစောထီးဟုယူဆရသူကို စစ်ကော်မရှင်တပ်တွေက သတ်တယ်လို့ ယူဆရပြီး ၂ ဦးစလုံးရဲ့ ရုပ်အလောင်းတွေကို ဒီကနေ့နေ့လည်မှာပဲ သဂြိုဟ်ခဲ့တယ်လို့ သိရပါတယ်။

အထက်ပါစစ်ကြောင်းဟာ စက်တင်ဘာလကုန်ပိုင်းကစတင်ပြီး မြိုင်မြို့နယ်နဲ့ ပေါက်မြိုင်နယ်အစပ်က ကျေးရွာတွေကို စစ်ကြောင်းထိုးမီးရှို့တာတွေ ပြုလုပ်နေခဲ့တဲ့ စစ်ကြောင်းလည်း ဖြစ်ပါတယ်။

စာတည်း – လင်း

မကွေး၊ နိုဝင်ဘာ ၂၅၊ ၂၀၂၅။

မကွေးတိုင်း၊ ပေါက်မြို့နယ်နဲ့ မြိုင်မြို့နယ်ထဲက ကျေးရွာ ၅ ရွာကို စစ်ကော်မရှင်စစ်ကြောင်းတွေက နိုဝင်ဘာ ၁၈ ကနေ ၂၄ ရက်အတွင်းမီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

ကပစ ၂၄ ကထွက်လာတဲ့ အင်အား ၂၀၀ ကျော်ပါစစ်ကော်မရှင်စစ်ကြောင်းက နိုဝင်ဘာ ၁၈ ရက်မှာ ပေါက်မြို့နယ်၊ တယ်ပင်ရွာနဲ့ နိုဝင်ဘာ ၂၃ ရက်မှာ ကျောက်မဲတောင်ရွာတို့ကို မီးရှို့ ဖျက်ဆီးခဲ့တယ်လို့ ဆိုပါတယ်။

“ကပစ ၂၄ အနီးတဝိုက်မှာပဲ ရှိနေသေးတယ်။ ကျောက်မဲတောင်ကို မီးရှို့ပြီးမှ ပြန်ဆုတ်သွားတာပါ။”လို့ ဒေသခံတဦးက ဆိုပါတယ်။

အခုလိုမီးရှို့ဖျက်ဆီးခဲ့တာကြောင့် အိမ်ခြေ ၁၀၀ ဝန်းကျင်ရှိ ကျောက်မဲတောင်ရွာက နေအိမ် ၁၅ လုံး၊ အိမ်ခြေ ၈၀ ရှိ တယ်ပင်ရွာက နေအိမ် ၇ လုံးမီးလောင်ပျက်စီးခဲ့တယ်လို့ ဆိုပါတယ်။

လက်ရှိမှာတော့ စစ်ကြောင်းက ကပစ ၂၄ အနီးရှိ မျှားပိုင်းကျေးရွာအနီးမှာရှိနေပြီး စစ်ကြောင်းကြောင့် သီးခြောက်၊ သရဖီ၊ လယ်လန်း၊ မြေခြား၊ သရက်လေးပင်၊ သပွတ်စု၊ တောင်ချို၊ ဒေါင်းသာ၊ ကျောက်ကား၊ ကျားသိုက်၊ ခင်တန်းရှည်၊ ဆင်ဇာ၊ ပလောင်း၊ ကျောက်မဲတောင်၊ ကျောက်တံခါး၊ ခင်အေး၊ မျှားပိုင်း၊ အုန်းမှင်၊ တယ်ပင်၊ မကျီးကုန်း၊ ယောကုန်း၊ ထန်းပင်ချောင်းစတဲ့ ကျေးရွာက ဒေသခံတွေလည်း တိမ်းရှောင်နေရတယ်လို့ သိရပါတယ်။

ဒါ့အပြင် အဆိုပါစစ်ကြောင်းဟာ အောက်တိုဘာလနောက်ဆုံးပတ်ကစလို့ ပေါက်မြို့နယ်တောင်ပိုင်း လယ်လန်းက နေအိမ် ၃ လုံး၊ သရဖီကျေးရွာက နေအိမ် ၃၇ လုံး၊ သီးခြောက်ကျေးရွာက နေအိမ် ၁၀ လုံး၊ ဆင်ဇာရွာက နေအိမ် ၆ လုံး၊ ကျောက်ကာစစ်ရှောင်စခန်းက နေအိမ် ၃၀ ကိုမီးရှို့ပြီး ပြည်သူ ၅ ဦးကိုသတ်ကာ ၅ ဦးကိုဖမ်းဆီးခဲ့သေးတယ်လို့ ဒေသခံတဦးက ပြောပါတယ်။

အလားတူ နိုဝင်ဘာ ၂၄ ရက် မနေ့ကညနေဘက်မှာ မြိုင်မြို့နယ်၊ တဲကြီးကျေးရွာကို ရောက်နေတဲ့ စစ်ကြောင်းက ရွာထဲကနေအိမ်တွေကိုမီးရှို့ခဲ့တယ်လို့ ဆိုပါတယ်။

တဲကြီးကျေးရွာကို ရောက်ရှိနေတဲ့စစ်ကြောင်းဟာ နိုဝင်ဘာ ၂၃ ရက်မှာ တဲကြီးကျေးရွာနဲ့ ၂ မိုင်ခန့်အကွာရှိ ပေါက်မြို့နယ် နယ်သတ်ရွာက နေအိမ် ၂ လုံးကို မီးရှို့ ဖျက်ဆီးခဲ့ပြီး မနေ့ကညနေပိုင်းမှာ ဒေသတော်လှန်ရေးတပ်တွေနဲ့ တိုက်ပွဲဖြစ်ပြီးနောက် တဲကြီးရွာကိုမီးရှို့ခဲ့တာလို့ သိရပါတယ်။

“ထပ်ရှို့တယ် သိရတာ။ စစ်ကြောင်းက အဲ့ရွာထဲမှာရှိနေတာဆိုတော့ ဘယ်လောက်လောင်တယ် ဘယ်လောက်ကုန်သွားတယ်ဆိုတာကို ကျနော်တို့ကသေသေချာချာ သိလို့မရဘူး။ မနေ့ကလည်း ရှို့တယ် “လို့ ဒေသခံတဦးက ဆိုပါတယ်။

နိုဝင်ဘာ ၂၅ ရက်ဒီမနက်ပိုင်းမှာတော့ တဲကြီးရွာကိုရောက်နေတဲ့စစ်ကြောင်းက ရွာရဲ့ တောင်ဘက်ပိုင်း ဆီကို အထွက်ပြနေတယ်လို့ ဒေသခံတွေဆီက သိရပါတယ်။

တမခ ၁၀၁၊ ခလရ ၄၁၈ နဲ့ ခလရ ၄၁၉ ကစစ်ကော်မရှင်တပ်သားတွေပါဝင်ပြီး မြိုင်နဲ့ ပေါက်မြို့နယ်အစပ်ရှိ တဲကြီး၊ နသတ်၊ ကံသတ်၊ ကမ္ဘားဖြူ၊ ကျောက်ခွက် စတဲ့ကျေးရွာတွေကို နို၀င်ဘာ ၁၉ ရက်ကစလို့ စစ်ကြောင်းထိုးကာ ကျေးရွာတွေကိုမီးရှို့နေပြီး ဒေသခံကာကွယ်ရေးတပ်တွေနဲ့လည်း မကြာခဏထိတွေ့ ပစ်ခတ်မှုတွေဖြစ်နေတာပါ။

စစ်အာဏာသိမ်းချိန်ကနေ ၂၀၂၅၊ မေလကုန်ပိုင်းအထိ မကွေးတိုင်းအတွင်းက အရပ်သားနေအိမ်ပေါင်း ၁၆,၄၇၀ လုံး မီးရှို့ဖျက်ဆီးခံထားရတယ်လို့ သုသေသနအဖွဲ့တခုဖြစ်တဲ့ Data for Myanmar ရဲ့ နိုဝင်ဘာ ၂၂ ရက်ထုတ်အစီရင်ခံစာမှာ ဖော်ပြထားပါတယ်။

စာတည်း – လင်း