မြင်းခြံထောင်

မန္တလေး၊ မေ ၃၀၊ ၂၀၂၃။

မန္တလေးတိုင်း၊ မြင်းခြံမြို့အကျဉ်းထောင်ကနေ စစ်ကောင်စီတပ်က ခေါ်ထုတ်သွားပြီး စစ်ကြောရေးလုပ်တဲ့ နိုင်ငံရေးအကျဉ်းသား ၁၀ ဦးကျော်ကို အကျဉ်းထောင်ကိုပြန်လည်ပို့ဆောင်ကာ တိုက်ပိတ်ထားတဲ့အပြင် ဆေးကုသခွင့်လည်းမပြုဘူးလို့ သိရပါတယ်။

မေလ ၂၁ ကနေ ၂၄ ရက်အထိ စစ်ကောင်စီတပ်က အကျဉ်းထောင်အပြင်ကို အင်အားသုံးခေါ်ထုတ်သွားကာ ရိုက်နှက်မေးမြန်းတာတွေလုပ်ခဲ့ပြီးနောက် စစ်ကြောရေးလုပ်ဆောင်စဉ် ဒဏ်ရာအပြင်းအထန်ရရှိသူတွေလည်းရှိနေကာ အဲ့ဒီနိုင်ကျဉ်းတွေမှာ ဆေးကုသခွင့်မရကြဘူးလို့ ဆိုပါတယ်။

“စစ်ကြောရေးမှာ နောက်ဆုံးကျန်ခဲ့တဲ့ ၆ ယောက်က စုတ်ပြတ်သတ်နေတာပဲ။ ခြေထောက်ကိုပါ ဓားတွေနဲ့မွှန်းထားတယ်လို့ သိရတယ်။ ကလေး(နိုင်ကျဉ်း)တယောက်ကတော့ ကိုယ်တိုင်လမ်းမလျှောက် နိုင်တော့လို့ တွဲကိုဝင်ရတယ်လို့ ကြားထားတယ်။ ပြန်ရောက်တဲ့ရက်တော့အတိအကျမသိရဘူး။ ထောင်ထဲရောက်ရောက်ချင်းပဲ အဆောင်ကိုပြန်မပို့ဘဲ သီးသန့်ထားပြီး တိုက်ပိတ်လိုက်တာ” လို့ ထောင်တွင်းနီးစပ်သူတဦးက မြေလတ်အသံကို ပြောပါတယ်။

မြင်းခြံထောင်က နိုင်ငံရေးအကျဉ်းသားတွေဖြစ်တဲ့ ကိုသက်မောင်မောင်၊ ကိုဇော်လှိုင်း၊ ကိုမင်းသွေး၊ ကိုစိုး ရာဇာ၊ ကိုကျော်မင်းနိုင်တို့အပါအဝင် ၁၃ ဦး ကို စစ်ကောင်စီတပ်က ခေါ်ထုတ်စစ်ဆေးခဲ့တာဖြစ်ပြီး အဲ့ဒီထဲက ကိုစိုးရာဇာနဲ့ ကိုကျော်မင်းနိုင် တို့ ၂ဦးကတော့ ဒဏ်ရာရရှိမှုအများဆုံးဖြစ်ကာ စိုးရိမ်ရတဲ့ အခြေအနေလို့ သိရပါတယ်။

ဒဏ်ရာပြင်းထန်ရရှိထားတဲ့ နိုင်ငံရေးအကျဉ်းသားတွေအတွက် ဆေးကုသခွင့်တောင်းခံပေမယ့် လက်ရှိချိန်ထိ ဆေးဝါးကုသမှုမပေးတဲ့အပြင် ရရှိဒဏ်ရာတွေကို တခြားအကျဉ်းသားတွေမြင်မှာစိုးရိမ်လို့ ထောင်အတွင်းပြန်သွင်းချိန်မှာ အကျဉ်းထောင်ကိုတန်းပိတ်ပြီးမှ နိုင်ကျဉ်းတွေကို တိုက်ပိတ်ထားတာလို့ ပြောပါတယ်။

ဒါ့အပြင် ပဲခူးတိုင်း၊ ကျိုက်စကောအကျဉ်းထောင်မှာလည်း ပြစ်ဒဏ်ချမှတ်ခံရပြီးသား နိုင်ငံရေးအကျဉ်း သား ၃ ဦးကို မေလ ၂၅ ရက်နေ့မှာ စစ်ကောင်စီတပ်က ခေါ်ထုတ်သွားပြီးနောက် ၃ ရက်အကြာမှာ ပဲခူး ပကဖလေ့ကျင့်စုဆောင်းရေးတာဝန်ခံ ကိုသန့်ဇင်ဝင်း သေဆုံးခဲ့တာလည်း ဖြစ်ပါတယ်။

စာတည်း – ရင်ငြိမ်း

မန္တလေး၊ မေ ၂၂၊ ၂၀၂၃။

မန္တလေးတိုင်း၊ မြင်းခြံမြို့အကျဉ်းထောင်မှာ နိုင်ငံရေးပုဒ်မတွေနဲ့အကျဉ်းကျနေသူအမျိုးသား ၃ ဦးကို မေလ ၂၁ ရက်‌ မနေ့ညနေပိုင်းမှာ စစ်တပ်နဲ့ထောင်ဝန်ထမ်းတွေက အဓမ္မအင်အားသုံး ခေါ်ထုတ်သွားပြီး ပြန်လည်ရောက်ရှိမလာသေးဘူးလို့ အကျဉ်းထောင်နဲ့နီးစပ်သူတွေဆီက သိရပါတယ်။

မနေ့ညနေပိုင်းမှာ မြင်းခြံထောင်က တောင်သာနယ်ဇာတိ နိုင်ငံရေးအကျဉ်းသားတွေဖြစ်တဲ့ ကိုကျော်မင်းနိုင်၊ ကိုသက်မောင်မောင်တို့ကို စစ်တပ်နဲ့ရဲတပ်ဖွဲ့တွေအင်အားအလုံးရင်းနဲ့ဝင်ရောက်လာကာ စတင်ခေါ်ဆောင်သွားပြီး ည ၉ နာရီခန့်မှာတော့ ငါးဇွန်နယ်ဇာတိ ကိုစိုင်းဆိုသူကို ထောင်အာဏာပိုင်တွေနဲ့ဝန်ထမ်းတွေက ဝိုင်းချုပ်ကာ ထပ်မံခေါ်ထုတ်သွားတာလို့ ဆိုပါတယ်။

“ကိုကျော်မင်းနိုင်နဲ့ကိုသက်မောင်မောင်က ဖောက်ခွဲ ၅ နဲ့ ထောင်ကျနေတာ။ ကိုစိုင်းလည်းနိုင်ငံရေးပုဒ်မပဲ။ ခုလိုအဖြစ်က အရင်ကမရှိဖူးဘူး၊ တော်တော်များများကတော့ လန့်နေကြတယ်” လို့ ထောင်တွင်းနီးစပ်သူတဦးက မြေလတ်အသံကို ပြောပါတယ်။

‌စစ်တပ်နဲ့ထောင်အာဏာပိုင်တွေ အင်အားသုံးခေါ်ထုတ်သွားတဲ့ နိုင်ကျဉ်း ၃ ဦးဟာ ပြီးခဲ့တဲ့ ၂၀၂၁ ခုနှစ်အတွင်းက ဖောက်ခွဲရေးဆိုင်ရာပုဒ်မ ၅ အပါအဝင် နိုင်ငံရေးပုဒ်မတွေနဲ့ထောင်ဒဏ် ၁၀ နှစ်ကနေ နှစ် ၂၀ ကျော်အထိ ပြစ်ဒဏ်ချမှတ်ခံထားရသူတွေဖြစ်ပြီး အကျဉ်းကျကာလ ၂ နှစ်ကျော်ရှိပြီလို့ သိရပါတယ်။

လက်ရှိမှာ နိုင်ကျဉ်း ၃ ဦးဟာ မြင်းခြံထောင်ကိုပြန်လည်မရောက်ရှိသေးတဲ့အပြင် အဆက်အသွယ်လည်း ပြတ်တောက်နေလို့ သူတို့ရဲ့အသက်အန္တရာယ်စိုးရိမ်ရတယ်လို့ သူကဆက်ပြောပါတယ်။

မြင်းခြံထောင်က တခြားနိုင်ငံရေးအကျဉ်းသားတွေကိုလည်း စာရင်းကောက်ယူတာတွေလုပ်ဆောင်နေပြီး ထောင်ပြောင်း၊ ရဲဘက်ပို့တာတွေနဲ့ နောက်အမှုတွဲကပ်မယ့် သတင်းတွေထွက်ပေါ်နေကာ အခုလို ဖမ်းဆီးခေါ်ထုတ်မှုမဖြစ်ခင် မေလ ၂၀ ရက်နေ့က ထောင်တွင်းကင်းပတ်တာတွေကို ထောင်ဝန်ထမ်းတွေက မလုပ်ဆောင်တော့ဘဲ ရဲနဲ့ စစ်သားတွေက လာရောက်ကင်းပတ်ခဲ့တယ်လို့ သိရပါတယ်။

ပြီးခဲ့တဲ့ မေလ ၃ ရက်နေ့က နိုင်ငံရေးအကျဉ်းသားတွေလွတ်ငြိမ်းပေးရာမှာ မြင်းခြံထောင်ကနေ နိုင်ငံရေးအကျဉ်းသား ၂၁၇ ဦး လွတ်မြောက်ခဲ့ပြီး ၆ ဦးကို စစ်ကောင်စီတပ်က ပြန်လည်ဖမ်းဆီးသွားတယ် လို့ သိရပါတယ်။

စာတည်း-ရင်ငြိမ်း

မြင်းခြံ၊ မေ ၃၊ ၂၀၂၃။

မန္တလေးတိုင်း၊ မြင်းခြံအကျဉ်းထောင်ကနေ နိုင်ငံရေးအကျဉ်းသား ၂၁၇ ဦး ပြန်လည် လွတ်မြောက်လာခဲ့ပြီး အဲ့ဒီထဲမှာ ပခုက္ကူနဲ့ မုံရွာက နိုင်ငံရေးအကျဉ်းသားတွေအပြင် တခြားတိုင်းဒေသကသူတွေလည်း ပါဝင်တယ်လို့ သိရပါတယ်။

မေလ ၃ ရက် ဒီကနေ့နေလယ် ၁၂ နာရီကစတင်ကာ အမျိုးသမီးနိုင်ငံရေးအကျဉ်းသားတွေကို လွှတ်ပေးခဲ့တာဖြစ်ပြီး၊ အမျိုးသားတွေကတော့ နေ့လည် ၁ နာရီလောက်မှ စတင်လွတ်ခဲ့တာလို့ လွတ်မြောက်လာတဲ့ နိုင်ငံရေးအကျဉ်းသားတဦးက ပြောပါတယ်။

“၅၀၅ သီးသန့်အကုန်လွှတ်မပေးဘူး၊ ကျန်ကာလ တနှစ်အောက်တွေကိုပဲ လွှတ်ပေးတာ၊ ထွက်လာသူတွေက ကျန်းမာရေးကောင်းကြပေမယ့် အထဲမှာက ဆေးဝါးလိုအပ်ချက်တွေ အများကြီးရှိနေတယ်၊ ဘာရောဂါဖြစ်ဖြစ် ဆေးတမျိုးပဲပေးတယ်”လို့ ပြောပါတယ်။

အမျိုးသား ၁၅၄ ဦးနဲ့ အမျိုးသမီး ၆၃ ဦးတို့ လွတ်လာခဲ့ကာ အဲ့ဒီထဲမှာ ပခုက္က္ကူ၊ မုံရွာ၊ မြင်းခြံ၊ ငါန်းဇွန်၊ မန္တလေး၊ မိတ္ထီလာက နိုင်ကျဉ်းတွေ ပါဝင်နေတယ်လို့ သိရပြီး လွတ်မြောက်လာတဲ့ မြို့နယ်အလိုက် အရေတွက်ကတော့ မြေလတ်အသံအနေနဲ့ စုံစမ်းနေဆဲ ဖြစ်ပါတယ်။

စစ်ကောင်စီက ကဆုန်လပြည့်နေ့အထိမ်းအမှတ်အနေနဲ့ နိုင်ငံတဝန်းက နိုင်ငံရေးအကျဉ်းသား ၂၀၀၀ ကျော်ကို ပြစ်ဒဏ်ကလွတ်ငြိမ်းခွင့်ပေးမယ်လို့ ထုတ်ပြန်ထားတာလည်း ဖြစ်ပါတယ်။

စာတည်း – လင်း