မိုင်းပေါက်ကွဲမှု

ရေစကြို၊ ဧပြီ ၁၆၊ ၂၀၂၃။

မကွေးတိုင်းဒေသကြီး၊ ရေစကြိုမြို့၊ အမှတ်(၃)ပွဲစားတန်းရပ်၊ ဝင်းသူဇာ အရောင်းဆိုင်အနီးမှာ မိုင်းပေါက်ကွဲမှုဖြစ်ပြီး လမ်းသွားလမ်းလာ လူငယ် ၃ ဦး ဒဏ်ရာရသွားတယ်လို့ သိရပါတယ်။

ဧပြီလ ၁၅ ရက်မနေ့ညနေ ၄ နာရီခန့်က မိုင်းပေါက်ကွဲမှုဖြစ်ချိန် စက်ဘီးနဲ့ဖြတ်သွားတဲ့ လူငယ် ၃ ဦးကို မိုင်းစတွေ ထိမှန်ခဲ့တာလို့ ဒေသခံတဦးက ပြောပါတယ်။

“အဲ့နားမှာက သင်္ကြန်မဏ္ဍပ်တွေ၊ ကလေးတွေ ရေကစားနေတာမရှိဘူး။ ဝင်းသူဇာအရောင်းဆိုင်ကလည်း ပိတ်ထားတာကြာပြီ။ မိုင်းပေါက်တာကလည်း ဆိုင်ရှေ့တည့်တည့်ကနေ ပေါက်တာ။ အဲ့အချိန် ကလေးတွေကလည်း သင်္ကြန်လည်ရင်း စက်ဘီးနဲ့အဲ့နားကို ဖြတ်သွားချိန်မှာ ထိသွားတာ”လို့ ပြောပါတယ်။

မိုင်းစထိလို့ အမှတ် ၃ စျေးတန်းရပ်ကွက်နေ ရဲရင့်အောင် ၁၀ နှစ်၊ ဟိန်းဇေယျာ ၁၄ နှစ်၊ ချစ်ထူးအောင် ၁၂ နှစ်တို့မှာ ဒဏ်ရာရရှိပြီး ရေစကြိုဆေးရုံကို ပို့ထားရတယ်လို့ ဆိုပါတယ်။

စစ်တပ်ထောက်ခံတဲ့ တယ်လီဂရမ်ချန်နယ်တွေမှာတော့ အမှတ် ၃ ပွဲစားတန်းရပ်ကွက်၊ ဖြူစင်လူမှုကူညီရေး အသင်းရုံးနားမှာ ကလေးတွေရေကစားနေချိန် PDF အဖွဲ့ကထောင်ထားတဲ့ မိုင်းပေါက်ကွဲပြီး ရေကစားနေတဲ့ ကလေးငယ် ကျား ၃ ဦး ထိခိုက်ဒဏ်ရာရသွားတယ်လို့ ရေးသားဖော်ပြထားပြီး၊ ကလေးတွေအနေနဲ့ မျက်လုံး၊ လက်နဲ့ ဒူးခေါင်းတို့မှာ မိုင်းစထိမှန် ဒဏ်ရာရရှိခဲ့ကြတယ်လို့ သိရပါတယ်။

ဒီပေါက်ကွဲမှုနဲ့ပတ်သက်ပြီး ရေစကြို ပကဖ ရဲ့ ပြန်ကြားရေးတာဝန်ရှိသူက “ကျနော်တို့အဖွဲ့လုပ်တာ မဟုတ်ဘူး” လို့ မြေလတ်အသံကို ဖြေဆိုထားပါတယ်။

ဒီမိုင်းကိုဘယ်အဖွဲ့အစည်းက ထောင်ခဲ့လဲဆိုတာကို မသိရှိရသေးသလို ပေါက်ကွဲမှုဖြစ်ပြီးနောက် စစ်ကောင်စီတပ်သားတွေက လာရောက်စစ်ဆေးပြီး ပြန်သွားခဲ့တယ်လို့ သိရပါတယ်။

စာတည်း – လင်း

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ မူးဘောင်တံတားပေါ်နဲ့ မြောက်ဘက်လမ်းပေါ်မှာ မိုင်းပေါက်ကွဲမှု ဖြစ်ခဲ့တာကြောင့် အမျိုးသား ၁ ဦးသေဆုံးကာ ၁၉ ဦး ဒဏ်ရာရခဲ့တယ်လို့ သိရပါတယ်။

မတ်လ ၂၈ ရက်ဒီမနက် ၁၀ နာရီခန့်က ကားကြီးကွင်းတံတားပေါ်မှာ ပထမအကြိမ်ပေါက်ကွဲပြီးနောက် ၁၀ မိနစ်ခန့်အကြာ ကားကြီးကွင်းမြောက်ဘက်ခြမ်းရှိလမ်းပေါ်မှာ ဒုတိယအကြိမ် ပေါက်ကွဲခဲ့တာလို့ ဒေသလူမှုကူညီရေးအသင်းမှ တာဝန်ရှိသူက ပြောပါတယ်။

“ပထမအကြိမ်က ရွှေဘိုမြို့အဝင် မူးဘောင်တံတားပေါ်မှာ မိုင်းကွဲတယ်။ နောက်တကြိမ်က အဲ့နားနဲ့ မလှမ်းမကမ်းမှာ နောက်တလုံး ထပ်ကွဲတယ်။ လူသွားလူလာစည်ကားနေတဲ့ အချိန်ဖြစ်နေတော့ ထိခိုက်သူတွေ တော်တော်များတယ်။ ခုတော့ အရေးပေါ်ကယ်ဆယ်ရေးလုပ်ငန်းတွေ လုပ်ဆောင်နေရတယ်။ ကျား ၁ ဦးကတော့ ဆေးရုံရောက်မှ ဆုံးသွားတယ်” လို့ ပြောပါတယ်။

မိုင်း ၂ ကြိမ်ကွဲလို့ ကားတစီးနဲ့ ဆိုင်ကယ် ၁၀ စီးခန့် ထိမှန်ခဲ့ပြီး အမျိုးသား ၁ ဦးသေဆုံးကာ၊ ကလေးငယ်ယောကျ်ားလေး ၂ ဦးအပါအဝင် အမျိုးသား ၁၁ ဦး၊ အမျိုးသမီး ၈ ဦး ထိခိုက်ဒဏ်ရာရသွားတယ်လို့ ဆိုပါတယ်။

ထိခိုက်ဒဏ်ရာရသူတွေအနက် စိုးရိမ်ရ လူနာ ၇ ဦးကို မန္တလေးဆေးရုံကို ပို့ဆောင်နေပြီး ကျန်သူတွေကိုတော့ ရွှေဘိုဆေးရုံးကို ပို့ထားတယ်လို့ သိရပါတယ်။

ဒီမိုင်းတွေကို ဘယ်အဖွဲ့အစည်းက ဘာကြောင့်ထောင်ထားတယ်ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

မတ်လ ၂၅ ရက် ညနေ ၃ နာရီခွဲခန့်မှာလည်း ရွှေဘိုမြို့နယ်၊ တဂဏန်းကျေးရွာနဲ့ ဇီးတောကျေးရွာကြားမှာ ကား ၃ စီးနဲ့ဆိုင်ကယ် ၁ စီး မိုင်းထိလို့ ရဟန်း ၁ ပါးအပါအဝင် ၇ ဦး ဒဏ်ရာရရှိခဲ့ပါသေးတယ်။

စာတည်း – လင်း