မြေလတ်အသံ၊ အောက်တိုဘာ ၂၉၊ ၂၀၂၅။

မန္တလေးတိုင်း၊ စဥ့်ကူးမြို့နယ်နဲ့ စစ်ကိုင်းတိုင်း၊ ရွှေဘိုမြို့နယ်ကို ဆက်သွယ်ထားတဲ့ ဧရာဝတီမြစ်ကူးတံတား(ရတနာသိင်္ခ) အောက်တိုဘာ ၂၈ ရက်နေ့ည ၁၁ နာရီခန့်မှာ မိုင်းခွဲခံရပြီး ကျိုးကျသွားခဲ့တယ်လို့ ဒေသခံတွေဆီက သိရပါတယ်။

မိုင်းခွဲခံရတာကြောင့် ဧရာဝတီမြစ်ကူးတံတားရဲ့ စဥ့်ကူးမြို့နယ်ဘက်အခြမ်း ချဥ်းကပ်တံတားနဲ့ တံတားတိုင် ၃ ခုမြောက် နေရာမှာကျိုးကျခဲ့တာဖြစ်ပြီး ခရီးသွားတွေထိခိုက်မှုမရှိခဲ့ဘူးလို့ ဆိုပါတယ်။

“တံတားနှစ်ဘက်မှာ တစ်ဖက်တစ်ချက်စီ နေရာယူထားတဲ့တံတားပါ။ ခရီးသွားထိခိုက်တာမရှိဘူး” လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

အဲ့ဒီတံတားရဲ့တဖက်တချက်စီ စဥ့်ကူးနဲ့ ကျောက်မြောင်းမြို့တွေမှာ စစ်ကော်မရှင်တပ်နဲ့ ဒေသကာကွယ်ရေးတပ်တွေ အသီးသီးစိုးမိုးတပ်စွဲနေကြတာလည်း ဖြစ်ပါတယ်။

“နံပါတ် 4 နဲ့ 5 နဲ့ကြားကျိုးတယ်။ 7 နဲ့ 6 နဲ့ကြားကျိုးတယ်။ ကြားမှာကျန်ခဲ့တာလည်းရှိတယ်။ စဥ့်ကူးကလာရင်တော့ 7/6 ကြားနဲ့ 5/4 ကြားပေါ့။ ဒီတံတားက တကယ်မိန်းတံတားကြီး။ မန္တလေးနဲ့စစ်ကိုင်းဆက်ထားတာကိုး”လို့ ကျောက်မြောင်းမြို့ခံတဦးကပြောပါတယ်။

တံတားမိုင်းခွဲခံရလို့ အများပြည်သူ လူမှုရေး၊ စီးပွားရေး၊ ကျန်းမာရေးကိစ္စတွေအပါအဝင် အခက်ခဲပေါင်းစွာရှိလာမှာဖြစ်တယ်လို့ အဲ့ဒီမြို့ခံက ဆိုပါတယ်။

အဆိုပါ တံတားဟာ၂,၄၈၀ ပေရှိတဲ့ သံကူကွန်ကရစ်တံတားအမျိုးအစားဖြစ်ပြီး တည်ဆောက်ဆဲကာလ ၂၀၁၂ နိုဝင်ဘာလမှာ ငလျင်ကြောင့် ပြိုကျပျက်စီးမှုဖြစ်ခဲ့သေးပြီး ၂၀၁၃ ဇူလိုင်လမှာ စတင်ဖွင့်လှစ်နိုင်ခဲ့တာလည်း ဖြစ်ပါတယ်။

မကွေး၊ ဧပြီ ၂၊ ၂၀၂၃။

မကွေးတိုင်း၊ ပခုက္ကူခရိုင်၊ ရေစကြိုမြို့နယ်၊ အမှတ် ၈ သုခဝတီရပ်ကွက်၊ ကပ်ကျော်ဘုန်းကြီးကျောင်းအတွင်း တပ်စွဲထားတဲ့စစ်အုပ်စုကို ဧပြီလ ၁ ရက် မနေ့ကနေ့လယ် ၂ နာရီခန့်မှာ မိုင်းခွဲတိုက်ခိုက်ခဲ့တယ်လို့ သိရပါတယ်။

ကပ်ကျော်ဘုန်းကြီးကျောင်းဝန်းအတွင်း ကင်းဘန်ကာတွေတည်ဆောက်ပြီးတပ်စွဲနေတဲ့ အင်အား ၄၀ ဝန်းကျင်ပါ စစ်အုပ်စုကို မိုင်းခွဲတိုက်ခိုက်ခဲ့တာဖြစ်ပြီး တိုက်ခိုက်မှုကြောင့် ၂ ဦးသေဆုံးတယ်လို့ ပြည်သူ့ကာ ကွယ်ရေးတပ်ဖွဲ့-ရေစကြိုမြို့နယ် သတင်းပြန်ကြားရေးတာဝန်ခံက မြေလတ်အသံကိုပြောပါတယ်။

“ရေစကြိုမြို့ပေါ်က စစ်တပ် ၃ တပ်က အင်အားဖြန့်ထားတာ၊ မိုင်း ၆ လုံးနဲ့ ဆွဲလိုက်တာ၊ ၂ ယောက်က တော့စုတ်ပြတ်သပ်ပြီး သေတယ်၊၊ ၃ ယောက်ဒဏ်ရာရတယ်၊ အဲ့ဒီထဲက ၁ ယောက်ကတော့ ဒဏ်ရာပြင်းတယ်” လို့ ပြောပါတယ်။

မိုင်းဆွဲခံရပြီးနောက် စစ်ကောင်စီတပ်တွေက လက်နက်ငယ်တွေ ပစ်ဖောက်ခဲ့ပေမယ့် ထိခိုက်တာမျိုး မရှိဘူးလို့သိရပါတယ်။

မတ်လ ၁၉ ရက်ကလည်း ရေစကြိုမြို့နယ်၊ စုပေါင်းရုံးမှာတပ်စွဲနေတဲ့ စစ်ကောင်စီတပ်သားတွေ RPG နဲ့ ပစ်ခတ်တိုက်ခိုက်ခံခဲ့ရသေးတယ်လို့ သိရပါတယ်။

ရေနံချောင်း၊ မတ် ၆၊ ၂၀၂၃။

မကွေးတိုင်း၊ ရေနံချောင်းမြို့မ ရဲစခန်းကို မတ်လ ၅ ရက် မနေ့ ညပိုင်းက အဝေးထိန်းစနစ်နဲ့ မိုင်းခွဲတိုက်ခိုက်ခဲ့တယ်လို့ မကွေးခရိုင် အမှတ် ၂ တပ်ရင်း တပ်ခွဲ ၁ People’s Defence Force Yenangyaung အဖွဲ့ဆီက သိရပါတယ်။

မတ်လ ၅ ရက်က အဝေးထိန်းစနစ်နဲ့ မိုင်း ၂ လုံးခွဲ တိုက်ခိုက်ခဲ့လို့ ဘန်ကာအဆောက်အဦးတွေ ပျက်ဆီးသွားတယ်လို့ မကွေးခရိုင် ဗိုလ်စံသျှားက မြေလတ်အသံကို ပြောပါတယ်။

“ည ၈ နာရီဝန်းကျင်မှာ မိုင်းဆွဲတိုက်ခိုက်ခဲ့တာ၊ မိုင်း ၂ လုံးခွဲတိုက်ခိုက်ခဲ့တာ၊ အဲဒီရေနံချောင်းမြို့မရဲစခန်းမှာ အင်အား ၃၀ လောက်ရှိမယ်။ ကျနော်တို့ ပြန်လည်ဆုတ်ခွာတဲ့အချိန်မှာ သူတို့က နောက်လိုက်ပစ်တာတော့ ရှိတယ်။ ထိခိုက်သေဆုံးမှုကိုတော့ စုံစမ်းဆဲပါ။ ပျက်စီးဆုံးရှုံးတာကတော့ ရဲစခန်းဘန်ကာအပိုင်းကို မိုင်းခွဲခဲ့တာဆိုတော့ ပျက်စီးဆုံးရှုံးမှုတော့ရှိမယ်” လို့ ဗိုလ်စံသျှားက ပြောပါတယ်။

အဲဒီမိုင်းခွဲတိုက်ခိုက်မှုကို မကွေးခရိုင် အမှတ် ၂ တပ်ရင်း တပ်ခွဲ ၁ People’s Defence Force Yenangyaung ၊ နတ်မောက်မြို့နယ် ပြည်သူ့ကာကွယ်ရေးတပ်ဖွဲ့ နှင့် Yenangyaung Local People’s Defence Force ဖေကံကောင်းအဖွဲ့တို့က ပူးပေါင်းလုပ်ဆောင်ခဲ့တယ်လို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၈ ရက်ကလည်း ပေါက်မြို့နယ်၊ သဖန်းချောင်းကျေးရွာမှ နေအိမ်တွေကို ဝင်ရောက်ဖျက်ဆီးပြီး ပြန်ထွက်လာတဲ့ စစ်ကောင်စီစစ်ကြောင်းကို မကွေးခရိုင် အမှတ် ၂ တပ်ရင်း တပ်ခွဲ ၁ People’s Defence Force Yenangyaung အဖွဲ့က ခြုံခိုတိုက်ခိုက်ခဲ့ရာ စစ်သား ၅ ဦး သေဆုံးခဲ့တယ်လို့ သိရပါတယ်။

စာတည်း – 007

မကွေး၊ ဖေဖော်ဝါရီ ၁၂၊ ၂၀၂၃။

မကွေးတိုင်း၊ မြိုင်မြို့‌၊ အမှတ် ၁ ရပ်ကွက်ရှိ ပျူစောထီးခေါင်းဆောင်နေအိမ်ကို ဒေသခံကာကွယ်ရေးတပ်တွေက မိုင်းထောင်ခွဲခဲ့ပြီး အဲ့ဒီပေါက်ကွဲမှုကိုလာစစ်ဆေးတဲ့ စစ်သားနဲ့ပျူစောထီးအဖွဲ့တွေကိုပါ လက်ကျန်မိုင်းနဲ့ ထပ်မံတိုက်ခိုက်ခဲ့တယ်လို့ သိရပါတယ်။

ပျူခေါင်းဆောင် ကိုထိန်လင်းရဲ့နေအိမ်မှာ ဖေဖော်ဝါရီလ ၁၂ ရက်ဒီမနက် ၃ နာရီလောက်မှာ ဖောက်ခွဲခဲ့ပြီးနောက် ညနေ ၃ နာရီလောက်မှ စစ်ဆေးဖို့လာတဲ့ စစ်သားနဲ့ပျူ ၈ ဦးဝန်းကျင်ကို ထပ်မံတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ် ဗိုလ်လက်ယာက ပြောပါတယ်။

“ကျနော်တို့ လွန်ခဲ့တဲ့ ၂ ရက်က မြိုင်မြို့ပေါ် အမှတ် ၁ ရပ်ကွက်မှာရှိတဲ့ ပျူစောထီးခေါင်းဆောင်နေအိမ်ကို မိုင်း ၂ လုံးထောင်ထားခဲ့တာ၊ ဒီနေ့မနက် ၃ နာရီ ၄၅ မိနစ်မှာ ဟန်ပြ ၁ လုံးခွဲလိုက်တယ်၊ မိုင်းပေါက်ကွဲပြီး ဒီနေ့ညနေ ၃ နာရီ ၁၅ မိနစ်မှာ စစ်သားနဲ့ပျူတွေ လာစစ်တဲ့အချိန် ထပ်ခွဲလိုက်တယ်၊ မိုင်းပေါက်ကွဲပြီး စစ်သား ၁ ဦး သေဆုံးပြီး ၂ ဦး ဒဏ်ရာရတယ်” လို့ ပြောပါတယ်။

ဒီထိခိုက်သေဆုံးမှုတွေကို ဒေသခံတွေရဲ့ပြောပြချက်အရ အတည်ပြုနိုင်ခဲ့တယ်လို့ ကာကွယ်ရေးရဲဘော်တွေက ဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

လက်ရှိအချိန်ထိ ပျူခေါင်းဆောင် ကိုထိန်လင်းရဲ့နေအိမ်မှာစစ်ကောင်စီတပ်တွေရှိနေပြီး ဘေးပတ်ဝန်းကျင်က နေအိမ်အချို့ကိုလည်း မီးရှို့နေတယ်လို့ဒေသခံတွေဆီက သိရပါတယ်။

ပြီးခဲ့တဲ့ဖေဖော်ဝါရီလ ၁၁ ရက်ကလည်း ပခုက္ကူခရိုင်၊ မြစ်ခြေ စစ်ကောင်စီမွေးမြူရေးတပ်စခန်းကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့နဲ့ မဟာမိတ်အဖွဲ့တွေက ဝင်ရောက်စီးနင်းတိုက်ခိုက်ခဲ့ရာ အရာရှိ ၂ ဦးအပါအဝင် ၇ ဦးသေဆုံးပြီး ၃ ဦး အရှင်ဖမ်းမိခဲ့တယ်လို့ သိရပါတယ်။

မကွေး၊ ဖေဖော်ဝါရီ ၂၊ ၂၀၂၃။

မကွေးတိုင်း၊ ပခုက္ကူမြို့နယ်၊ ကမ္မမြို့က ရွေးကောက်ပွဲလုပ်ဖို့စီစဥ်နေတဲ့ ကမ္မမြို့ အထွေထွေအုပ်ချုပ်ရေးဦးစီးဌာနရုံး မိုင်းခွဲခံရပြီး ပျက်စီးမှုရှိခဲ့တယ်လို့ သိရပါတယ်။

အဲ့ဒီရုံးကို ဖေဖော်ဝါရီလ ၁ ရက်မနက် ၉ နာရီခွဲဝန်းကျင်မှာ စစ်တပ်က အာဏာသိမ်း ၂ နှစ်ပြည့် ဆန့်ကျင်တဲ့အနေနဲ့ မိုင်းခွဲခဲ့တာလို့ ပခုက္ကူ ပကဖ တာဝန်ရှိသူက ပြောပါတယ်။

“သူတို့ရုံးထဲထိ မိုင်းဆင်တိုက်ခိုက်ခဲ့တာပါ။ ရုံးမှာက လူတွေမရှိဘူး။ ကမ္မမြို့မှာက စကစ ဘက်က အုပ်ချုပ်ဖို့ မနိုင်နင်းဘူး။ လက်ရှိကလည်း စကစ ဘက်က ရွေးကောက်ပွဲလုပ်ဖို့ စီစဥ်နေတာလေ။ သူတို့အစီအစဥ် မဖြစ်ဖို့အတွက်တော့ ကျနော်တို့ဘက်က ရတဲ့နည်းလမ်းနဲ့ လုပ်မှာဖြစ်တယ်။ မိုင်းကြီးတလုံးဘဲ ထောင်ပြီး ဖောက်ခွဲခဲ့တာပါ” လို့ ပြောပါတယ်။

မိုင်းထောင်ဖောက်ခွဲခံရလို့ ကမ္မမြို့ အထွေထွေအုပ်ချုပ်ရေးရုံး ပင်မရုံးအဆောက်အဦး တခြမ်းပြိုကျခဲ့ပြီး ရုံးတွင်းရှိ စာရွက်စာတမ်းတွေလည်း ပျက်စီးခဲ့တယ်လို့ ဆိုပါတယ်။

စစ်ကောင်စီဘက်ကတော့ ရုံးမိုင်းထောင်ဖောက်ခွဲခံရပြီး နာရီဝက်ကျော်လောက်အကြာမှ လာရောက်စစ်ဆေးမှုတွေ လုပ်သွားတယ်လို့ သိရပါတယ်။

၂၀၂၂ ခုနှစ်၊ ဒီဇင်ဘာလ ၂၁ ရက်ကလည်း ကမ္မမြို့ရဲစခန်း တိုက်ခိုက်ခံရပြီး ရဲ ၂ ဦးသေဆုံးကာ ၃ ဦး ထိခိုက်ဒဏ်ရာရခဲ့သေးတယ်လို့ သိရပါတယ်။