မိုခါမုန်တိုင်း

မကွေး၊ မေ ၂၀၊ ၂၀၂၃။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့မှာ မိုခါမုန်တိုင်းကြောင့် ရေနောက်မျောပါသေဆုံးသူ အမျိုးသားတဦးရဲ့အလောင်းကို ထပ်မံတွေ့ရှိခဲ့တာကြောင့် သေဆုံးသူ ၄ ဦးအထိ ရှိလာနေတယ်လို့ ဒေသခံတဦးဆီက ရပါတယ်။

ဆင်ဖြူကျွန်းမြို့၊ စွန်းကျွန်းညိုကျေးရွာက အသက် ၃၄ နှစ်အရွယ် ကိုကျော်လင်းရွှေရဲ့အလောင်းကို မေလ ၁၇ ရက်နေ့လယ်က စွန်းကျွန်းညိုအုပ်စု၊ ဘိုတဲကုန်းရွာဟောင်းရပ်ရဲ့အရှေ့မြောက်ဘက် မဟာမြိုင်ကွင်းထဲမှာ တွေ့ရှိခဲ့တာလို့ ဆိုပါတယ်။

“အလောင်းက နေပူလိုက် မိုးရွာလိုက်နဲ့ ရက်ကလည်းကြာတော့ သယ်ဖို့ကလည်း ခက်ခဲလို့ တွေ့တဲ့နေရာမှာပဲသေချာမီးသဂြိုဟ်ပြီး ပြာကိုရေမျောပေးခဲ့ပါတယ်။ ကိုကျော်လင်းရွှေအပါအဝင် မုန်တိုင်းကြောင့် ဆင်ဖြူကျွန်းမှာရေမျောသေဆုံးတာ ၄ ဦးရှိပြီ” လို့ မြို့ခံတဦးက ပြောပါတယ်။

ကိုကျော်လင်းရွှေဟာ မေလ ၁၄ ရက်ညနေက ရေကြီးနေခိုက် မြောက်ရှားတောရွာမှာ မြက်ရိတ်နေရင်း ရေစီးထဲမျောပါပျောက်ဆုံးခဲ့တာလို့ သူကဆက်ပြောပါတယ်။

အလားတူ ဆင်ဖြူကျွန်းမြို့က အသက် ၇၀ နှစ်အရွယ် ဒေါ်အေးသန်း၊ သမီးဖြစ်သူ အသက် ၄၄ နှစ်အရွယ် မယဥ်မင်းစိုးနဲ့ နွယ်တမယ်ရွာသား အသက် ၂၂ နှစ်အရွယ် ကိုရှိန်းတို့လည်း အဲဒီ (မေလ ၁၄ ရက်) ညနေကပဲ ရေနောက်မျောပါသေဆုံးခဲ့ရာ မေလ ၁၅ ရက်မှ နေရာအသီးသီးကနေတွေ့ရှိပြီး သင်္ဂြိုဟ်ပြီးစီးခဲ့တာလို့ သိရပါတယ်။

ဒါ့အပြင် စလင်းမြို့ခံတဦးရဲ့ လူမူကွန်ယက်စာမျက်နှာမှာလည်း မိုခါမုန်တိုင်းကြောင့် စလင်းမြို့နယ်၊ ငါးသန်ခေါင်းအုပ်စု၊ ဂွေးကုန်းရွာက ကိုသာဓုနဲ့ကိုမျိုးအောင်တို့ညီအကို ၂ ဦးအပြင် ထနောင်းကုန်းရွာက အသက် ၄၅ နှစ်အရွယ် ဦးကြည်ဝင်း (လက်ရှိမြင်တင်ရပ်ကွက်နေထိုင်သူ) တို့လည်း ရေနောက်မျောပါ ပျောက်ဆုံးခဲ့ပြီး ကိုမျိုးအောင်ရဲ့အလောင်းကိုတော့ သင်္ဂြိုဟ်ပြီးစီးခဲ့တယ်လို့ ဖော်ပြထားခဲ့ပါသေးတယ်။

စာတည်း – လင်း

စစ်ကိုင်း၊ မေ ၂၀၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်မြို့နယ်အတွင်းက ရေဘေးသင့်ပြည်သူတွေကို မေလ ၁၉ ရက်မှာ အာဟာရဒါနအဖြစ် ထမင်းဟင်းလျာတွေ ချက်ပြုတ်ကူညီလှုဒါန်းခဲ့တယ်လို့ အညာပစ်တိုင်းထောင်လေးများ အဖွဲ့ဆီက သိရပါတယ်။

အခုလို လှူဒါန်းမှုကို Lights of The Future-Group (အနာဂါတ်အလင်းတန်း)အဖွဲ့ရဲ့ ကူညီမှုနဲ့လှူဒါန်းတာဖြစ်သလို၊ အသားဟင်းတမျိုး အရန်ဟင်း ၃ မျိုးပါပြီး ကုန်ကျစရိတ်အနေနဲ့ သိန်း၂၀ ကျော်ကုန်ကျတယ်လို့သိရပါတယ်။

မိုခါမုန်တိုင်းကြောင့် ရေဘေးဒုက္ခရောက်နေတဲ့ ယင်းမာပင်မြို့နယ်က အိမ်ခြေ ၃၂၀ ကျော်မှာရှိတဲ့ လူဦးရေ ၁၆၀၀ ကျော်ကို ကျွေးမွေးခဲ့တာဖြစ်တယ်လို့ အညာပစ်တိုင်းထောင်လေးများအဖွဲ့ရဲ့ ဦးဆောင်သူတဦးဖြစ်တဲ့ မဖူးပွင့်ဝေ က မြေလတ်အသံကိုပြောပါတယ်။

“ရေဘေးသင့်ပြည်သူတွေမှာ အခက်အခဲတွေအများကြီးရှိနေပါတယ်။ ထမင်းတနပ် ကောင်းကောင်းစားရလို့ စိတ်ချမ်းသာစေချင်တယ်။ သူတို့ပတ်ဝန်းကျင်ရှင်းလင်းဖို့က တပတ်လောက်ပြင်ဆင်ရအုံးမယ်” လို့ သူက ပြောပါတယ်။

စာတည်း-လင်းဇေ

စစ်ကိုင်း၊ မေ ၁၈၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ မြောက်ယမားတံတားပေါ်နဲ့ ကျေးရွာဈေးတခုမှာ ရေဘေးဒဏ်ခံနေရတဲ့ကြားက သပိတ်စစ်ကြောင်းထွက်ခဲ့ကြတယ်လို့ သိရပါတယ်။

မေလ ၁၈ ရက် ဒီကနေ့မနက် ၈ နာရီဝန်းကျင်က ယင်းမာပင်-ဆားလင်းကြီး ရွာပေါင်းစုံသပိတ်ရဲ့ ၇၉၂ ရက်မြောက်နေ့အဖြစ် “ကြောက်ခေတ်ကို မှောက်ပစ်”စာသားပါ ဘန်နာတွေကိုင်စွဲပြီး အဖွဲ့ဝင်တွေက ဆန္ဒပြကြွေးကြော်ခဲ့ကြတယ်လို့ ဆိုပါတယ်။

ပြီးခဲ့တဲ့ မေလ ၁၄ ရက်၊ ၁၅ ရက်နေ့အတွင်း တိုက်ခတ်ခဲ့တဲ့ မုန်တိုင်းဒဏ်ကြောင့် ယင်းမာပင်မြို့နယ်ရှိ ကျေးရွာအများစုမှာ ရေလွှမ်းမိုးခဲ့ပြီး သပိတ်အဖွဲ့ဝင်တချို့လည်း ရေကြီးမှုဒဏ်ကို ခံစားနေရတာဖြစ်ပါတယ်။

မကွေး၊ မေ ၁၇၊ ၂၀၂၃။

မိုခါဆိုင်ကလုန်းမုန်တိုင်းကြောင့် ရေကြီးရေလျှံပြီး ပျက်စီးမှုရှိခဲ့တဲ့ မကွေးတိုင်း၊ ပခုက္ကူမြို့နယ်အတွင်းက ကျေးရွာတရွာမှာ ကူညီပြုပြင်မှုတွေလုပ်ပေးခဲ့တယ်လို့ ပခုက္ကူခရိုင်တပ်ရင်း – ၁၃ ဆီက သိရပါတယ်။

မေလ ၁၅ ရက်နေ့မှာ ပြုလုပ်ပေးခဲ့တာဖြစ်ပြီး၊ ရဲဘော် အင်အား၂၀ ဦးနဲ့ လုပ်ပေးခဲ့တာလို့ ပခုက္ကူခရိုင်တပ်ရင်း – ၁၃ မှ သတင်းတာဝန်ခံက မြေလတ်အသံကိုပြောပါတယ်။

“ချောင်းအစပ်ကအိမ်တွေကို ရေတက်နေတဲ့အချိန် ကူညီကယ်ထုတ်ရပါတယ်၊ ရေတွေဝင်တာများလို့ ထုတ်ပေးတာ။ လမ်းတွေအိမ်တွေ ခြံစည်းရိုးပျက်စီးတာတွေ ပြင်ပေးခဲ့တယ်”လို့ ပြောပါတယ်။

အဓိက ဆုံးရှုံးမှုကတော့ ပြည်သူတွေအသက်မွေးဝမ်းကျောင်းပြု စိုက်ပျိုးနေတဲ့ နှမ်း၊ ကြက်သွန်၊ ကွမ်းခြံတွေ ပျက်စီးပြီး၊ နေအိပ်ပျက်စီးမှု၊ တိရစ္ဆာန်သေဆုံးမှုတွေလည်းရှိကာ အခြားရွာနဲ့ဆက်သွယ်ထားတဲ့ တံတားလည်း ပျက်စီးခဲ့တယ်လို့ ဆိုပါတယ်။

မိုခါမုန်တိုင်းကြောင့် ပခုက္ကူမြို့နယ်အတွင်းမှာ စပါး၊ နှမ်း၊ ကွမ်း စိုက်ပျိုးခြံ ၃၄ ခြံ၊ ကြက်သွန်ကုန်ချိန် ၂ သောင်း၊ နွား ၇ ကောင်နဲ့ ဆိတ် ၁၆ ကောင်ထက်မနည်း သေဆုံးပျက်စီးခဲ့တယ်လို့ ပခုက္ကူခရိုင်တပ်ရင်း – ၁၃ရဲ့ စုံစမ်းထားမှုအရ သိရပြီး၊ ဒီအရေအတွက်တွေထက်လည်း ပိုများနိုင်တယ်လို့ ဆိုပါတယ်။

စာတည်း – လင်း

မကွေး၊ မေ ၁၆၊ ၂၀၂၃။

မကွေးတိုင်း၊ ထီးလင်းမြို့နယ်အတွင်းမှာ မိုခါဆိုင်ကလုန်းမုန်တိုင်းကြောင့် မောချောင်းနဲ့ သံသေချောင်းက ရေတွေကျပြီး ချောင်းကမ်းနားစပ်ရှိ ရွာပေါင်း ၂၀ ကျော်မှာ ပျက်ဆီးဆုံးရှုံးမှုတွေနဲ့ တိရိစ္ဆာန်သေဆုံးမှုတွေ ရှိခဲ့ပါတယ်။

မေလ ၁၅ ရက် မနေ့ကစပြီးကျလာတဲ့ ချောင်းရေတွေကြောင့် လက်တလောမှာ ဆန်၊ စပါး၊ မြေပဲ တင်း ၁၀၀၀ ကျော် ရေနဲ့မျောပါခဲ့ပြီး၊ ကျွဲ၊ နွား ၂၇ ကောင် သေဆုံးခဲ့တယ်လို့ Yaw Revolution Army – ထီးလင်း တာဝန်ခံက မြေလတ်အသံကို ပြောပါတယ်။

ဒီအရေအတွက်ဟာ လက်တလော စာရင်းပြုစုထားတဲ့ ပမာဏဖြစ်ပြီး ဒီထက်ပိုပြီးများနိုင်တယ်လို့လည်း ခန့်မှန်းထားပါတယ်။

မောချောင်းနဘေးက ကျေးရွာတွေဖြစ်တဲ့ အောင်မြင်၊ သရခါအနောက်ဘက်၊ ထလင်း၊ ထန်းပင်ကုန်း၊ တောရောင်း၊ ၀က်သက်၊ ၀ါးဘင်း၊ ညောင်ကန်၊ ဟင်းခွပ်ကုန်း၊ ကင်းဘန်း၊ အင်းနား၊ ကန်ဇွန်းထောင့်နဲ့ သံသေချောင်းဘေးရှိ ဆွဲလည်း၊ ယုန်ဆင်း၊ မင်းလည်၊ လုံးပေါင်၊ လက်ပံ၊ အုံးတွဲ၊ ကွမ်းဇဲ၊ ၀ါးရင်းချိုင်၊ ပုဏ္ဏားရွာတွေမှာ ပျက်စီးမှုရှိခဲ့တာလည်း ဖြစ်ပါတယ်။

အဲ့ဒီရွာက ဒေသခံအများစုကတော့ မုန်တိုင်းမဖြစ်ခင်ကတည်းက ရွာကနေ တိမ်းရှောင်နေခဲ့ကြတာဖြစ်ပြီး၊ သူတို့ ယာယီနေထိုင်နေတဲ့နေရာက တဲအိမ်တွေလည်း ရေမြုပ်သွားတယ်လို့ ဆိုပါတယ်။

“ထီးလင်းမြို့နယ်အတွင်းမှာ အိုင်းမပြင်မှာ(ဒေသခံတွေ တိမ်းရှောင်နေတဲ့နေရာ) ယာယီတဲထိုးပြီး စစ်ဘေးရှောင်နေကြတဲ့ အိုင်းမပြင်ကြီးတခုလုံး ရေမြုပ်သွားတဲ့အတွက် တဲ ၁၀၀ လောက်နဲ့ ပြည်သူတွေရဲ့ စားနပ်ရိက္ခာတွေ ရေထဲမျောပါကာ ပျက်စီးဆုံးရှုံးခဲ့ရတယ်” လို့ ဆိုပါတယ်။

အဲ့ဒီဒေသမှာ လူဦးရေ ၁ သောင်းကျော်ရှိကာ၊ မေလ ၁၆ ရက် ဒီကနေ့အထိ မိုးလည်းမတိတ်သေးတာကြောင့် ဒေသခံတွေအနေနဲ့ နေထိုင်ဖို့အခက်အခဲရှိနေပြီး စာနပ်ရိက္ခာအခက်အခဲနဲ့လည်း ကြုံနေရတယ်လို့ သိရပါတယ်။

စာတည်း – လင်း

မကွေး၊ မေ ၁၆၊ ၂၀၂၃။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့မှာ ရေစီးနဲ့အတူမျောပါပျောက်ဆုံးသွားပြီးနောက် သေဆုံးလျက်တွေ့ရှိသူ ၃ ဦး အထိရှိလာတယ်လို့ ဒေသခံတွေဆီကသိရပါတယ်။

ရုပ်အလောင်းတွေကို မေလ ၁၅ ရက် မနေ့ကမနက်ပိုင်းနဲ့ညနေပိုင်းတွေမှာ နေရာအသီးသီးကနေ ပြန်လည်ဆယ်ယူရရှိခဲ့ပြီး သေဆုံးသွားသူတွေဟာ ဆင်ဖြူကျွန်းမြို့၊ ပြည်စိုးကုန်းရပ်က အသက် ၇ဝ နှစ်အရွယ်ရှိ ဒေါ်အေးသန်း၊ သူ့ရဲ့ သမီးဖြစ်သူ အသက် ၄၄ နှစ်အရွယ် မယဉ်မင်းစိုးနဲ့ နွယ်တမယ်ရွာသား အသက် ၂၂ နှစ်အရွယ် ကိုရှိန်းတို့ ဖြစ်တယ်လို့ ဆိုပါတယ်။

“အလောင်းတွေကိုတနေရာစီမှာ နာရီခြားပြီး တွေခဲ့ရတာပါ၊ အားလုံးဆယ်ယူရရှိပြီးပါပြီ။ ဆင်ဖြူကျွန်းမှာ တော့ရေလည်းကျသွားပါပြီ။ ဒီနေ့မှာသဂြိုဟ်ဖို့စီစဥ်နေပါတယ်။ လက်ရှိက မိုးရွာလေတိုက်တာမျိုးတော့ မရှိပါဘူး” လို့ ဒေသခံတဦးက မြေလတ်အသံကို ပြောပါတယ်။

မေလ ၁၄ ရက် ညနေပိုင်း စလင်းချောင်းရေတက်လာချိန် မယဉ်မင်းစိုးဟာ ပစ္စည်းတွေသိမ်းဆည်းနေစဉ် ရုတ်တရက် ရေနောက်ပါသွားတဲ့မိခင်ကို လိုက်ဆယ်ရာက ၂ ဦးစလုံး ရေနစ်တာဖြစ်ပြီး ကိုရှိန်းဟာလည်း ဆင်ဖြူကျွန်းအောက်ဈေးမှာ မိခင်ရဲ့ဈေးဆိုင်ကကုန်စိမ်းတွေကို သယ်ယူနေရင်း ရေထဲမျောပါသေဆုံးတာ ဖြစ်တယ်လို့ မြို့ခံတဦးကဆိုပါတယ်။

ဒေါ်အေးသန်းရဲ့အလောင်းကို ဆင်ဖြူကျွန်းမြို့ အရှေ့ဘက်လယ်ကွင်းမှာတွေ့ရှိခဲ့ပြီး မယဉ်မင်းစိုးရဲ့ အလောင်းကို ဆင်ဖြူကျွန်းမြို့ အရှေ့တောင်ဘက်စမ်းတွင်းကျေးရွာအနီးက စမ်းတွင်းကျွန်းမှာတွေ့ရှိကာ ကိုရှိန်းရဲ့အလောင်းကိုတော့ နွယ်တမယ်ရွာရဲ့အောက်ဘက်မှာ တွေ့ခဲ့တာလို့ဆိုပါတယ်။

မိုခါမုန်တိုင်းမိုးကြောင့် စလင်းချောင်းရေမြင့်တက်လာပြီး ဆင်ဖြူကျွန်းမြို့ပေါ်ရပ်ကွက်နဲ့ကျေးရွာ နေအိမ်တွေအတွင်းဝင်ရောက်ခဲ့ကာ ရေစီးသန်တာကြောင့် နေအိမ်အတွင်းပစ္စည်းတွေနဲ့ လယ်ယာသုံး ပစ္စည်းတွေအများအပြား မျောပါဆုံးရှုံးခဲ့တဲ့အပြင် လူသေဆုံးမှုတွေပါဖြစ်ပေါခဲ့တာပါ။

လက်ရှိမှာ ဆင်ဖြူကျွန်းတမြို့လုံး ရေကျသွားပြီဖြစ်သလို ကူညီကယ်ဆယ်မှုတွေလိုအပ်နေပြီး ကူညီကယ်ဆယ်ရေးအဖွဲ့တွေကိုလည်း စစ်ကောင်စီက သတိပြုစောင့်ကြည့်နေတယ်လို့ ဒေသခံတဦးဆီက သိရပါတယ်။

စာတည်း-ရင်ငြိမ်း

မကွေး၊ မေ ၁၆၊ ၂၀၂၃။

မိုခါမုန်တိုင်းကြောင့် မကွေးတိုင်း၊ ပွင့်ဖြူမြို့နယ်အတွင်းမှာ စိုက်ပျိုးထားတဲ့ နွေနှမ်းခင်းတွေ ရေနစ်မြုပ်နေတယ်လို့ ဒေသခံတဦးက ပြောပါတယ်။

ပွင့်ဖြူမြို့နယ်၊ လယ်ကိုင်းမြို့ဟောင်း၊ အုန်းတောရွာ၊ လှည်းကြီးကျေးရွာ၊ ကန်ဆွယ်ရွာနဲ့ ချမ်းသာကြီးရွာ အပါအဝင် မြို့နယ်အတွင်း စိုက်ပျိုးထားတဲ့ နှမ်းစိုက်ခင်းအချို့မှာ မေလ ၁၄ ရက် နေ့လယ်ကစတင်ကာ ရေနစ်မြုပ်ခဲ့တာလို့ ဆိုပါတယ်။

“မနက်ခင်းပိုင်းကတော့ နှမ်းခင်းထဲက ရေက ဖောက်လို့ရသေးတယ်။ နေ့လယ်ပိုင်းရောက်တော့ မြုပ်နေပြီ၊ အခုထိလည်းမကျသေးဘူး။ နှမ်းက ရေကြိုက်တဲ့အပင်မျိုးနွယ်မဟုတ်ဘူး။ ညကတည်းက မိုးမရွာပေမယ့် ရေကတော့နစ်နေဆဲပဲ။ အပင်တွေသေဖို့ ရာခိုင်နှုန်းများတယ်” လို့ ဒေသခံလယ်သမားတဦးက ပြောပါတယ်။

ကုန်းမြင့်ပိုင်းရှိ နှမ်းစိုက်ခင်းတွေကလွဲပြီး ကျန်မြေပြန့်မှာ စိုက်ပျိုးထားတဲ့နှမ်းခင်းတွေ ရေနစ်မြုပ်တာဖြစ်တယ်လို့လည်း သူကဆက်ပြောပါတယ်။

စုစုပေါင်း နှမ်းစိုက်ခင်း ဧက ၉၀၀ ကျော် ပျက်စီးဆုံးရှုံးနိုင်တယ်လို့ ခန့်မှန်းထားပေမယ့် ပျက်စီးဆုံးရှုံးတဲ့ ဧကအရေအတွက်ကိုတော့ မြေလတ်အသံက ဆက်လက်စုံစမ်းနေဆဲပါ။

နှမ်း ၁ ဧကကို စိုက်ပျိုးစရိတ် ကျပ် ၂ သိန်းခွဲကျော်ကုန်ကျပြီး လက်ရှိ နှမ်းနက် ၁ တင်းကို ပေါက်စျေး ကျပ် ၈ သောင်းခွဲရှိကာ နှမ်းဖြူ ၁ တင်းကို ကျပ် ၁ သိန်း စျေးပေါက်နေတယ်လို့ သူကဆက်ပြောပါတယ်။

ပွင်ဖြူမြို့နယ်မှာ နှစ်စဥ်ရေသွင်းစိုက်ပျိုးတဲ့ နွေနှမ်းစိုက်ဧက ၅ သောင်းဝန်းကျင် ရှိတယ်လို့လည်း သိရပါတယ်။

အလားတူ မကွေးတိုင်း၊ ပခုက္ကူခရိုင်၊ ပေါက်မြို့နယ်ထဲက နွေနှမ်းစိုက်ခင်းတွေလည်း ရေနစ်မြုပ် ပျက်စီးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ မေ ၁၅၊ ၂၀၂၃။

မိုခါဆိုင်ကလုန်းမုန်တိုင်း တိုက်ခတ်ခဲ့လို့ မိုးသည်းထန်စွာရွာခဲ့ပြီး လေပြင်းတိုက်ခတ်တဲ့ဒဏ်တွေကြောင့် အရှိုချင်းနောက်တန်း ဌာနချုပ်စခန်းမှာ ပျက်စီးဆုံးရှုံးခဲ့တယ်လို့ Chin Defence Force – Asho တပ်ဖွဲ့ထံက သိရပါတယ်။

မေလ ၁၄ ရက် မနေ့ကနေ့လယ် ၂ နာရီလောက်မှာ တိုက်ခတ်ခဲ့တဲ့ မုန်တိုင်းဒဏ်ကြောင့် ရဲဘော်တွေနေထိုင်ရာ တန်းလျားတွေပျက်စီးခဲ့ပြီး လူထိခိုက်တာတွေတော့ မရှိခဲ့ဘူးလို့ CDF -Asho ဒုတပ်ရင်းမှူး ဆလိုင်း RanCho က မြေလတ်အသံကို ပြောပါတယ်။

“လေရောမိုးရော ကျတာ။ သစ်ပင်တွေလဲကျတာနဲ့ လေပြင်းတိုက်တာနဲ့ဆိုတော့ မီးကြိုးတွေ သုံးမရတော့တာ။ နေတဲ့တန်းလျားတွေ ပျက်စီးတာရှိပါတယ်။ ကြိုတင်ရွှေ့ပြောင်းထားလို့ အရေးကြီးတာတွေ မဆုံးရှုံးပါဘူး။ အမိုးအတွက်ပဲ ခက်ခဲတာပါ” လို့ ပြောပါတယ်။

စခန်းတွင်းရှိ ရုံးနေရာ၊ တပ်စိပ်အဆောင်၊ စစ်မေအဆောင် စုစုပေါင်း ၇ လုံးက အမိုးအကာနဲ့ ရိက္ခာတွေလည်း ပျက်စီးဆုံးရှုံးခဲ့တယ်လို့ ဆက်ပြောပါတယ်။

လက်ရှိမှာတော့ မုန်တိုင်းအခြေအနေ ငြိမ်သွားတာကြောင့် သစ်ပင်တွေ ခုတ်ထွင်ရှင်းလင်းတာနဲ့ ပျက်စီးတဲ့အဆောက်အဦးတွေကို ပြန်လည်တည်ဆောက်ဖို့ လုပ်ဆောင်နေတယ်လို့ သိရပါတယ်။

မုန်တိုင်းကြောင့် ပျက်စီးဆုံးရှုံးတာတွေများပေမယ့် စိတ်ဓာတ်မကျဘဲ ပြည်သူတွေလိုချင်တဲ့ ပန်းတိုင်ရောက်ဖို့ လုပ်ဆောင်သွားမှာဖြစ်သလို၊ ပြည်သူတွေရဲ့ ထိခိုက်ဆုံးရှုံးမှုတွေအတွက်လည်း စိတ်မကောင်းဖြစ်ရတယ်လို့ ဒုတပ်ရင်းမှူး ဆလိုင်း RanCho က ဆိုပါတယ်။

စာတည်း – လင်း