မန္တလေး

တံတားဦး၊ ဖေဖော်ဝါရီ ၂၀၊ ၂၀၂၃။

မန္တလေးတိုင်း၊ တံတားဦးမြို့နယ်၊ မြေငူကျေးရွာက စစ်ကောင်စီခန့်အုပ်ချုပ်ရေးမှူး ညီအကို ၂ ဦး ဖေဖော်ဝါရီလ ၁၉ ရက် ည ၈ နာရီကျော်လောက်မှာ ပစ်သတ်ခံခဲ့ရတယ်လို့ သိရပါတယ်။

ပစ်သတ်ခံရသူတွေဟာ မြေငူကျေးရွာအုပ်ချုပ်ရေးမှူး ဦးအောင်ဆန်းဝင်း ၅၀ နှစ်နဲ့အကိုဖြစ်သူ ဦးဘပြုံး ၅၄ နှစ်တို့ဖြစ်ပြီး သူတို့နေအိမ်မှာရှိနေချိန် အမည်မသိလူ ၂ ဦး ရောက်လာပြီး လမ်းပြပေးဖို့ ခေါ်တာကြောင့် လိုက်သွားရာက ပစ်သတ်ခံလိုက်ရတာလို့ ဒေသခံတဦးက မြေလတ်အသံကို ပြောပါတယ်။

“သူတို့အိမ်ကို လူ ၂ ယောက်ရောက်လာပြီး အဘလွှတ်လိုက်တာ၊ လမ်းပြပေးဖို့ လိုက်ပို့ဆိုလို့ သူတို့ ညီအကို ၂ ဦးလိုက်သွားတာ။ အချိန်အတော်ကြာ ပြန်ရောက်မလာမှလိုက်ရှာကြတာ။ ည အတော်နက်မှ ပစ်သတ်ခံထားရတဲ့ သူတို့အလောင်းကိုတွေ့ရတာ”လို့ ပြောပါတယ်။

အုပ်ချုပ်ရေးမှူးနဲ့အကိုဖြစ်သူတို့ဟာ မြေငူကျေးရွာအထွက်လမ်းပေါ်မှာ ဦးခေါင်းကျည်ထိမှန်ဒဏ်ရာတွေနဲ့ သေဆုံးခဲ့တာဖြစ်ပြီး၊ ပစ်ခတ်မှုဖြစ်ပွားပြီးတဲ့နောက် စစ်ကောင်စီတပ်ဖွဲ့၀င်တွေရောက်ရှိလာပြီး လိုက်လံရှာဖွေတာတွေလုပ်ခဲ့တယ်လို့လည်း ဆိုပါတယ်။

ဒီပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးအင်အားစုတွေဘက်က ထုတ်ပြန်ထားတာမျိုး မရှိသေးသလို ဘာကြောင့်ပစ်ခတ်ခံရတယ်ဆိုတာကိုလည်း သီးခြားအတည်မပြုနိုင်သေးပါဘူး။

ဖေဖော်ဝါရီလ ၁၇ ရက်မနက်ပိုင်းကလည်း မန္တလေးမြို့၊ ချမ်းမြသာစည်မြို့နယ်၊ ရွှေဘုန်းရှိန်ရပ်ကွက်က စစ်ကောင်စီခန့်အုပ်ချုပ်ရေးမှူး သေနတ်နဲ့ အနီးကပ်ပစ်ခတ်ခံခဲ့ရပြီး သေဆုံးသွားတယ်လို့ ဒေသခံတွေဆီက သိရပါတယ်။

မန္တလေး၊ ဖေဖော်ဝါရီ ၁၉၊ ၂၀၂၃။

မန္တလေးတိုင်း၊ မန္တလေးမြို့၊ ချမ်းမြသာစည်မြို့နယ်၊ ကျွန်းလုံးဥသျှောင်ရပ်ကွက်၊ အကွက် (၅၀၁)၊ ၈၄လမ်း၊ ၁၀၄ လမ်းနဲ့ ၁၀၄(A)လမ်းကြားရှိ ဒဏ္ဍာရီတည်းခိုခန်း ဗုံးပစ်ခံရတာကြောင့် ၉ လအရွယ်ကလေးငယ်နဲ့ မိခင်ဖြစ်သူ ဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၁၈ ရက်မနေ့ည ၇ နာရီ ၅၀ မိနစ်ခန့်မှာ ဆိုင်ကယ်နဲ့လာတဲ့ အမျိုးသား ၂ ဦးက ဒဏ္ဍာရီတည်းခိုခန်းထဲကို လက်ပစ်ဗုံး ၁ လုံးနဲ့ ပစ်ခတ်ခဲ့ရာမှ ပေါက်ကွဲမှုဖြစ်ခဲ့တာလို့ ဒေသခံတဦးက ပြောပါတယ်။

“ညက ပေါက်ကွဲသံကြားရပြီး တည်းခိုခန်းရှေ့နေတဲ့ သားအမိ ဒဏ်ရာရသွားတာတော့ သိရတယ်။ ဆိုင်ကယ်နဲ့လာပစ်သွားတာ။ ထိခိုက်သွားတဲ့သူတွေက တည်းခိုခန်းရှေ့က မျက်နှာချင်းဆိုင် အိမ်ရှေ့မှာ ထိုင်နေတဲ့ သားအမိထိသွားတာ” လို့ ပြောပါတယ်။

ဗုံးပေါက်ကွဲတာကြောင့် တည်းခိုခန်းအတွင်း ကောင်တာရှိ ထိုင်ခုံ ၁ ခုံပျက်စီး၊ Toyota BELTA အမျိုးအစားအနက်ရောင်မော်တော်ယာဉ် ညာဘက်နောက်ခန်း လေကာမှန်ကွဲကာပျက်စီးခဲ့တယ်လို့လည်း ဆိုပါတယ်။

ဗုံးပေါက်ကွဲမှုကြောင့် အသက် ၃၂ နှစ်အရွယ်အမျိုးသမီးနဲ့ သမီးဖြစ်သူ အသက် ၉ လအရွယ် ကလေးငယ်တို့ ဗုံးစထိမှန်ဒဏ်ရာရခဲ့ကာ သူတို့ကို ဒေသလူမှုကူညီရေးအသင်းတွေက မန္တလေးပြည်သူ့ဆေးရုံကို ပို့ဆောင်ခဲ့ပြီး စိုးရိမ်ရတဲ့အခြေအနေမရှိဘူးလို့ သိရပါတယ်။

ပေါက်ကွဲပြီးနောက်မှာတော့ စစ်ကောင်စီတပ်ဖွဲ့ဝင်တွေရောက်လာပြီး ပတ်ဝန်းကျင်နဲ့ တည်းခိုခန်းတာဝန်ရှိသူတွေကို မေးမြန်းစစ်ဆေးတာတွေလုပ်သွားတယ်လို့ သိရပါတယ်။

ဒီဖောက်ခွဲမှုကို ဘယ်အဖွဲ့အစည်းက ဘာကြောင့်လုပ်တယ်ဆိုတာ ထုတ်ပြန်ထားတာမရှိသေးပါဘူး။
၂၀၂၂ ခုနှစ်၊ နိုဝင်ဘာလ ၂၈ ရက်ညနေပိုင်းကလည်း ချမ်းမြသာစည်မြို့နယ်၊ ကျွန်းလုံးဥသျှောင်ရပ်ကွက် အုပ်ချုပ်ရေးမှူးရုံး ဗုံးပစ်ခံရပြီး ထိခိုက်ပျက်စီးမှုတွေရှိခဲ့ပါသေးတယ်။

မန္တလေး၊ ဖေဖော်ဝါရီ ၁၈၊ ၂၀၂၃။

မန္တလေးတိုင်း၊ မန္တလေးမြို့ပေါ်မှာ ပြည်သူတွေ သွေးမအေးဖို့အရေး ဝက်လက်မြို့နယ်အခြေစိုက် ကျောင်းသားများသမဂ္ဂ (ဗ.က.သများ အဖွဲ့ချုပ်)က တော်လှန်ရေးစာတွေ ရေးသားထားတဲ့ စာရွက်တွေကို ဖေဖော်ဝါရီလ ၁၈ ရက် ဒီမနက်ပိုင်းက ရပ်ကွက် ၁၀ ခုမှာ လိုက်ကပ်ခဲ့ပါတယ်။

“မြို့ပေါ်ပြည်သူလူထုက သွေးအေးနေတဲ့အတွက် ဒီနေ့မနက် ၅ နာရီလောက်က ရပ်ကွက် ၁၀ ခုမှာ စာကပ်တဲ့ လှုပ်ရှားမှုလုပ်ခဲ့တာ” လို့ ဝက်လက်မြို့နယ်အခြေစိုက် ကျောင်းသားသမဂ္ဂများ (ဗ.က.သများ အဖွဲ့ချုပ်) ဥက္ကဌ ကိုဟန်မင်းစိုးက ပြောပါတယ်။

ဗ.က.သ များအဖွဲ့ချုပ်အနေနဲ့ မြို့ပေါ်မှာ လုံခြုံ‌ရေးအခြေအနေအရ စာကပ်လှုပ်ရှားမှုတွေနဲ့ ပြောက်ကျားနည်းနဲ့ စစ်အာဏာရှင်ဆန့်ကျင်ဆန္ဒပြပွဲတွေသာ လုပ်ဖြစ်တယ်လို့ သိရပါတယ်။

မန္တလေး၊ ဖေဖော်ဝါရီ ၁၈၊ ၂၀၂၃။

မန္တလေးတိုင်းဒေသကြီး၊ ချမ်းမြသာစည်မြို့နယ်၊ ချမ်းတောင်ရပ်ကွက် ၇၈ လမ်းနဲ့ ရန်မန်းသံလမ်းကြား ပညာပျိုးခင်းလမ်း အကွက် ၉၀၂ သီတာအေးရပ်ကွက်၊ ပညာပျိုးခင်းလမ်းပေါ်မှာ အုပ်ချုပ်ရေးမှူး ၁ ဦး သေနတ်နဲ့ပစ်ခတ်ရပြီး သေဆုံးခဲ့တယ်လို့ သိရပါတယ်။

ဖေဖော်ဝါရီလ ၁၇ ရက် မနေ့ကမနက် ၇ နာရီခန့်မှာ လမ်းအတိုင်း ဆိုင်ကယ်စီးလာတဲ့ မဟာအောင်မြေမြို့နယ်၊ ရွှေဘုန်းရှိန်ရပ်ကွက် အုပ်ချုပ်ရေးမှူး ဦးဇော်ဝင်းထွန်း ၅၆ နှစ်ကို သေနတ်သမားတွေက အနားကပ်ပြီး ပစ်သတ်ခဲ့တာလို့ ဒေသခံတဦးက ပြောပါတယ်။

“သူက စူပါကပ်ဆိုင်ကယ်လေးစီးပြီး လာနေတာ။ လမ်းပိတ်နေတဲ့အချိန် သူအနားကို ဆိုင်ကယ် ၁ စီးက ကပ်လာပြီး အနီးကပ် တေ့ပစ်သွားတာ။ အဲနေရာမှာပဲ လဲကျသေဆုံးသွားတယ်။ လမ်းမထက် လူစည်ကားနေတဲ့အချိန်မှာ ပစ်သွားတာပါ” လို့ ပြောပါတယ်။

သေနတ်နဲ့ ပစ်ခံရလို့ ဦးဇော်ဝင်းထွန်းဟာ ယာဘက်နာထင်အောက် ကျည်ဖောက်ဝင်ဒဏ်ရာရပြီး သေဆုံးသွားတာကြောင့် လူမှုကူညီရေးအသင်းတွေက မန္တလေး ပြည်သူ့ဆေးရုံကြီးကို ပို့ဆောင်ပေးခဲ့ရတယ်လို့ သိရပါတယ်။

ပြည်သူတွေကို နှိပ်စက်ဒုက္ခပေးနေတဲ့ စစ်ကောင်စီလက်ပါးစေဖြစ်နေတဲ့ ဦးဇော်ဝင်းထွန်းကို မိမိတို့က ပစ်ခတ်ရှင်းလင်းခဲ့တာဖြစ်ပြီး စစ်ကောင်စီ၊ ရဲတွေနဲ့ပူးပေါင်းနေတဲ့ သူတွေကို ဆက်လက်ရှင်းလင်းသွားမယ်လို့ အောင်စည်တော်ဆင်စစ်ရေးအဖွဲ့က ထုတ်ပြန်ထားပါတယ်။

ဒါ့အပြင် မနေ့ကတရက်တည်းမှာတင် အောင်စည်တော်စစ်ဆင်ရေးတပ်ဖွဲ့ဝင်တွေက ချမ်းအေးသာဇံမြို့နယ်၊ ၆၂ လမ်း၊ ၃၁×၃၂ လမ်းရှိ ပြည်ကြီးမျက်ရှင်ရပ်ကွက် အုပ်ချုပ်ရေးမှူးရုံး လက်ပစ်ဗုံးပစ်ခံရပြီး မပေါက်ကွဲတဲ့အတွက် သေနတ်နဲ့ ၂ ချက်ပစ်ခတ်ခဲ့ပါသေးတယ်။

ဖေဖော်ဝါရီလ ၁၀ ရက်နေ့လည်ကလည်း မန္တလာသီရိအားကစားကွင်းရှေ့မှာ လုံခြုံရေးစောင့်နေတဲ့ ရဲဂိတ် ဗုံးပစ်ခံရပြီး ဒုရဲအုပ် ၁ ဦးအပါအဝင် ၃ ဦး ထိခိုက်ဒဏ်ရာရခဲ့တယ်လို့ သိရပါတယ်။

မန္တလေး၊ ဖေဖော်ဝါရီ ၁၇၊ ၂၀၂၃။

မန္တလေးတိုင်း၊ မြင်းခြံမြို့နယ်၊ တူးရွှင်းဘိုကျေးရွာနဲ့ ကန်ဆွယ်ကျေးရွာတွေမှာ တပ်ထောက်ခံသူ ၁ ဦးအပါအဝင် ၃ ဦးပစ်ခတ်ခံရပြီး ၂ ဦး သေဆုံးသွားတယ်လို့ သိရပါတယ်။

ဖေဖော်ဝါရီလ ၁၆ ရက်မနေ့က တူးရွှင်းဘိုကျေးရွာ ကျေးလက်ဆေးပေးခန်းမှာ နေထိုင်တဲ့ သားအမိ ၂ ဦးနဲ့ ညပိုင်းမှာ ကန်ဆွယ်ကျေးရွာနေ တပ်ထောက်ခံသူ ၁ ဦးကို လက်နက်ကိုင်လူတစုက လာရောက် ပစ်ခတ်သွားတာလို့ ဒေသခံတဦးက ပြောပါတယ်။

“ဆေးခန်းမှာ ပစ်သတ်ခံရတဲ့ သားအမိက အမေဖြစ်သူက သက်ကြီးပိုင်း သားဖွားဆရာမ အငြိမ်းစားပါ။ သူသားကတော့ သူနဲ့အတူနေတာ။ အဲဒါကို ဆေးခန်းမှာ လာပစ်သတ်သွားတာ။ သူတို့တွေက နောက်ကွယ်က ဘာလုပ်လဲဆိုတာတော့ မသိရဘူး။ ကန်ဆွယ်မှာကျတော့ တပ်ထောက်ခံသူကို သူခြံထဲမှာ ပစ်သတ်သွားတာ။ ဒါပေမယ့် သူက မသေဘူး။ ဒဏ်ရာပဲ ရသွားတယ်” လို့ ပြောပါတယ်။

အသက် ၆၃ နှစ်အရွယ် အငြိမ်းစားသားဖွားဆရာမ ဒေါ်ဌေးဝင်းမေ (ခ) ဒေါ်တူးတူး နဲ့ အသက် ၄၀ နှစ်အရွယ် သားဖြစ်သူဇော်ခိုင်ဦးတို့ ၂ ဦးမှာ မနေ့ကမနက် ၉ နာရီခန့်က ကျေးလက်ဆေးခန်းမှာ ရှိနေချိန် ပစ်ခတ်ခံရပြီး နေရာတင်သေဆုံးခဲ့တာလို့ ဆိုပါတယ်။

ကန်ဆွယ်ရွာနေ တပ်ထောက်ခံသူ ငစိုင်း အသက် ၂၈ နှစ်ကတော့ သူပိုင်တဲ့ကြက်ခြံမှာ ရှိနေချိန် ပစ်ခတ်ခံရတာကြောင့် ဝမ်းဗိုက်နဲ့ ပုခုံးမှာ ဒဏ်ရာရပြီး မြင်းခြံဆေးရုံကို ပို့ထားရတယ်လို့ သိရပါတယ်။

သူတို့ကို ဘယ်အဖွဲ့အစည်း ပစ်ခတ်တိုက်ခိုက်ခဲ့လဲဆိုတာကိုတော့ ထုတ်ပြန်ကြေငြာထားတာ မရှိသေးပါဘူး။

၂၀၂၁ ခုနှစ်၊ ဇွန်လ ၂၇ ရက်ကလည်း မြင်းခြံမြို့နယ်၊ သဲဖြူဝကျေးရွာက စစ်ကောင်စီခန့် အုပ်ချုပ်ရေးမှူး ဦးမြင့်ဌေးဆိုသူလည်း ရွာစည်ရွာ စက်သုံးဆီဆိုင်နားမှာ သေနတ်နဲ့ပစ်ခတ်ခံရပြီး သေဆုံးခဲ့ပါသေးတယ်။

စဥ့်ကူး၊ ဖေဖော်ဝါရီ ၁၅၊ ၂၀၂၃။

မန္တလေးတိုင်းဒေသကြီး၊ စဥ့်ကူးမြို့နယ်၊ ရွာသစ်ကြီးကျေးရွာနဲ့ ငပြင်းအင်းကျေးရွာတွေက အမျိုးသား ၃ ဦး ပစ်သတ်ခံလိုက်ရတယ်လို့ သိရပါတယ်။

ဖေဖော်ဝါရီလ ၁၄ ရက်နေ့ မနက်ပိုင်းတွေမှာ အမျိုးသား ၃ ဦးကို လက်နက်ကိုင်အဖွဲ့တွေက နေအိမ်တွေကနေ ဖမ်းဆီးပြီး လမ်းပိုင်းမှာ ပစ်သတ်လိုက်တာဖြစ်တယ်လို့ ဒေသခံတဦးက ပြောပါတယ်။

“ဟုတ်ပါတယ်။ သူတို့တွေကို နေအိမ်တွေကနေ ဖမ်းသွားပြီး လမ်းမှာပစ်သတ်ခဲ့တာ။ ရွာသစ်ကြီးက အမျိုးသား ၁ ယောက်နဲ့ ငပြင်းအင်းက သားအဖ ၂ ဦးပါ။ ကျနော်တို့ သိရသလောက်တော့ သူတို့က ပုံမှန်ဒေသခံဘဲပေါ့။ ဒါပေမယ့် နောက်ကွယ်မှာ သူတို့ဘာလုပ်တယ်ဆိုတာကတော့ မသိရဘူး” လို့ ပြောပါတယ်။

ယမန်နေ့ မနက် ၉ နာရီခွဲ အချိန်ခန့်က ရွာသစ်ကြီးကျေးရွာနေ ဦးမင်းအောင်၊ ၄၃ နှစ်ဟာ နေအိမ်မှာရှိနေချိန်လက်နက်ကိုင်ဆောင်ထားသူ ၅ ဦးက ဆိုင်ကယ်တွေနဲ့ ရောက်လာပြီး ဦးမင်းအောင်ကို ခေါ်ဆောင်သွားကာ ကျေးရွာရဲ့အရှေ့ဘက်အရောက်မှာ ပစ်ခတ်ခဲ့ရာ ဦးမင်းအောင်မှာ ရင်ဘတ်၊ ပါးတို့မှာ ကျည်ဖောက်ဝင်ဒဏ်ရာတွေရပြီး နေရာမှာဘဲ သေဆုံးသွားတယ်လို့ သိရပါတယ်။

အဲဒီနောက် မနက် ၁၀ နာရီခွဲအချိန်မှာ စဥ့်ကူးမြို့နယ်၊ ငပြင်းအင်းကျေးရွာနေ ဦးမန်း ၅၃ နှစ်နဲ့ သားဖြစ်သူ မောင်မောင်ခင် ၂၅ နှစ် တို့ ၂ ဦးဟာ နေအိမ်မှာရှိနေချိန် သေနတ်သမားတွေ ရောက်လာပြီး ဖမ်းဆီးသွားတာလို့ ဆိုပါတယ်။

သားအဖ ၂ ဦးကိုတော့ ရှောက်ပင်ရိုးကျေးရွာနဲ့ ရွာသစ်ကြီးကျေးရွာကြား ဆည်မြောင်းဘောင်ပေါ်မှာ သေနတ်နဲ့ပစ်ခတ်ခဲ့လို့ ဦးမန်း နောက်စေ့ကျည်ဖောက်ဝင်ဒဏ်ရာ ၁ ချက်၊ မောင်မောင်ခင် နောက်စေ့ကျည်ဖောက်ဝင်ဒဏ်ရာ ၁ ချက်နဲ့ နေရာမှာဘဲ သေဆုံးသွားတယ်လို့ သိရပါတယ်။

အဲဒီပစ်ခတ်မှုတွေကိုတော့ ဘယ်အဖွဲ့က ဘာကြောင့်လုပ်သွားတယ်ဆိုတာ မြေလတ်အသံက စုံစမ်းနေပါတယ်။

ဖေဖော်ဝါရီလ ၁၃ ရက်နေ့ကလည်း မတ္တရာမြို့နယ်၊ လက်ကောင်းကြီးကျေးရွာအုပ်စု၊ ကန်ဖြူကျေးရွာအနီးမှာ စဥ့်ကူးမြို့နယ်၊ လက်ပန်းလှကျေးရွာက လူမှုကူညီရေးအသင်းကား ပစ်ခံရလို့ ယာဥ်မောင်းဒဏ်ရာရကာ ကားပျက်စီးခဲ့သေးတယ်လို့ သိရပါတယ်။

မန္တလေး၊ ဖေဖော်ဝါရီ ၁၄၊ ၂၀၂၃။

မန္တလေးတိုင်းဒေသကြီး၊ မတ္တရာမြို့နယ်၊ လက်ကောင်းကြီးကျေးရွာအုပ်စု၊ ကန်ဖြူကျေးရွာအနီးမှာ လူမှုကူညီရေးအသင်းကားပစ်ခတ်ခံရပြီး ယာဥ်မောင်းဖြစ်သူဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၁၃ ရက်မနက် ၁ နာရီခန့်မှာ စဥ့်ကူးမြို့နယ်၊ လက်ပန်လှကျေးရွာ၊ လူမှုကူညီရေးအသင်းပိုင်ယာဥ်ဟာ လက်ပန်လှကျေးရွာက မွေးလူနာအမျိုးသမီးကို မန္တလေးဆေးရုံကိုပို့ပြီးပြန်အလာ ကန်ဖြူကျေးရွာအနီး မန္တလေး-မိုးကုတ်ကားလမ်း၊ သန့်ဇင်စက်သုံးဆီဆိုင် အနီးအရောက်မှာပစ်ခတ်ခံရတာဖြစ်တယ်လို့ အသင်းတာဝန်ရှိသူကပြောပါတယ်။

“အသင်းပိုင်ယာဥ် ပစ်ခံရတာကဟုတ်ပါတယ်။ အသင်းကားက လူနာပို့ပြီးပြန်လာချိန် ပစ်ခတ်မှုဖြစ်နေတဲ့ နေရာကိုရောက်ပြီး မှားယွင်းပစ်ခံရတာဖြစ်ပါတယ်။ ဖြစ်တဲ့အချိန်က မှောင်လဲမှောင်နေတာဆိုတော့ ဘယ်သူဘယ်ဝါပစ်တယ်ဆိုတာ သေချာပြောလို့မရပါဘူး။ ကျနော်တို့ဘက်က ဒီလမ်းကြောင်းပေါ်သွားလာနေတာဖြစ်လို့ အသင်းအတွက်လဲ အန္တရာယ်ရှိပါတယ်။ ဒဏ်ရာရတာက ယာဥ်မောင်း ၁ ဦးတည်းပါ” လို့ ပြောပါတယ်။

လက်နက်ကိုင်အဖွဲ့တခုက ပစ်ခတ်လိုက်တဲ့ကျည်တွေကြောင့် ယာဥ်မောင်းဖြစ်သူ ဦးအောင်မြင့်ဆန်း၊ ၅၆ နှစ်ဟာ ယာလက်မောင်းကျည်ဖောက်ဝင်ဒဏ်ရာရရှိခဲ့တယ်လို့ ဆိုပါတယ်။

အဲဒီအပြင်ကားရဲ့ ရှေ့လေကာမှန်၊ နောက်မှန်၊ ယာဥ်နောက်ပိုင်း၊ ယာဥ်ယာဘက်ဘီး၊ ယာဥ် ယာဘက်တံခါး၊ ယာဘက်နောက်ကြည့်မှန်​တွေမှာ ကျည် ၁၆ ချက်ထိမှန်ခဲ့တယ်လို့ သိရပါတယ်။
သေနတ်ဒဏ်ရာရရှိခဲ့တဲ့ ယာဥ်မောင်းဖြစ်သူကိုတော့ မတ္တရာဆေးရုံမှာ တင်ပို့ဆေးကုသနေရပြီး အခြေနေသက်သာကောင်းမွန်တယ်လို့ သိရပါတယ်။