မန္တလေး

တောင်သာ၊ ဖေဖော်ဝါရီ ၂၁၊ ၂၀၂၆။

မန္တလေးတိုင်း၊ တောင်သာမြို့နယ်က ကျေးရွာတွေကို စစ်ကော်မရှင်စစ်ကြောင်းက စစ်ကြောင်းထိုးမီးရှို့နေတာကြောင့် နေအိမ် ၁၀ လုံးကျော်ပျက်စီးခဲ့တယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဖေဖော်ဝါရီ ၂၀ ရက် မနက် ၁၀ နာရီခန့်မှာ တောင်သာမြို့ပေါ်ကနေ အင်အား ၁၀၀ ခန့်ပါ စစ်ကြောင်းဟာ လက်သဲကျင်ရွာကို ဝင်ရောက်မီးရှို့ကာ အဲ့ဒီကတဆင့် ညနေ ၄ နာရီခန့်မှာ ညောင်ဒိုရွာကို စစ်ကြောင်းထိုးတပ်စွဲခဲ့ပြီး ဖေဖော်ဝါရီ ၂၁ ရက်မနက် ၆ နာရီလောက်မှာ ရွာထဲကနေအိမ်တွေကိုမီးရှို့ပြီး ခြုံကြီးရွာကို ဆက်သွားတယ်လို့ ဆိုပါတယ်။

“သူတို့လာတာနဲ့ ဒေသခံတွေက ရွာထဲမနေတော့ဘူး။ ရွာထဲလူမရှိတော့မှ ရှို့တာ။ ဒီမနက်တော့ ညောင်ဒိုကိုဆက်ရှို့သွားတယ်။ စစ်ကြောင်းက ခြုံကြီးထဲတော့ရောက်နေပြီး မီးမရှို့သေးဘူး”လို့ တောင်သာမြို့နယ်ပကဖတာဝန်ခံက ပြောပါတယ်။

မီးရှို့ခံရတာကြောင့် လက်သဲကျင်ကျေးရွာက အနည်းဆုံး နေအိမ် ၂ လုံး၊ ညောင်ဒိုကျေးရွာက နေအိမ် ၁၄ လုံး မီးလောင်ပျက်စီးထားတယ်လို့ ဆိုပါတယ်။

စစ်ကြောင်းဝင်မီးရှို့နေတာကြောင့် အိမ်ခြေ ၂၀၀ ကနေ ၁,၀၀၀ ကြားရှိတဲ့ လက်သဲကျင်၊ ညောင်ဒို၊ ခြုံကြီး၊ ကျွန်းရွာလေးကျေးရွာတွေက ဒေသခံ ၆,၀၀၀ ထက်မနည်း ဘေးလွတ်ရာကို တိမ်းရှောင်နေရတယ်လို့ အထက်ပါတာဝန်ခံက ပြောပါတယ်။

ဖေဖော်ဝါရီ ၁၁ ရက်ကလည်း တောင်သာမြို့နယ်၊ ပဲလင်းကျော်ကျေးရွာကို စစ်ကော်မရှင်စစ်ကြောင်းက ဝင်ရောက်မီးရှို့လို့ နေအိမ်နဲ့ဘုန်ကြီးကျောင်းအပါအဝင် အဆောက်အဦ ၅၀ ကျော် မီးလောင်ပျက်စီးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၃၁၊ ၂၀၂၆။

ရှော့တိုက်ဒုံးထိမှန်တယ်လို့ သတင်းတွေထွက်ပေါ်ခဲ့တဲ့ မန္တလေး၊ အလယ်ပိုင်းတိုင်းစစ်ဌာနချုပ် (လပခ) တိုင်းမှူး ဗိုလ်မှူးချုပ် တင်မင်းလတ် စစ်ဆေးရုံမှာလူနာကြည့်ရှုခဲ့ကြောင်း စစ်တပ်ပိုင်မြဝတီရုပ်သံက ယမန်နေ့ညပိုင်းမှာ သတင်းထုတ်ပြန်လာပါတယ်။

နန်းတွင်းအခြေစိုက် အမှတ် ၁ စစ်မြေပြင်ဆေးတပ်ရင်း (မဆရ ၁) ဆေးရုံမှာ တက်ရောက်နေတဲ့ လူနာတွေကို တိုင်းမှူး တင်မင်းလတ် က ယမန်နေ့ ဇန်နဝါရီ ၃၀ ရက်မှာ သွားရောက်ကြည့်ရှုခဲ့တယ်လို့ ညပိုင်းသတင်းရုပ်သံမှာ ထုတ်ပြန်လာတာပါ။

ဇန်နဝါရီ ၂၇ ရက်က စစ်ခေါင်းဆောင် မင်းအောင်လှိုင် တည်းခိုနေတဲ့ မန္တလေးနန်းတွင်း လပခအတွင်းကို ရှော့တိုက်ဒုံး ၅ လုံးနဲ့ ပစ်ခတ်ခဲ့ကြောင်း၊ ပစ်ခတ်မှုအတွင်း လပခတိုင်းမှူးနေအိမ်ထိမှန်ခဲ့ပြီး ဗိုလ်မှူးချုပ်အဆင့်ထက်မနိမ့်သော စစ်အရာရှိကြီး ၁ ဦးထိမှန်ကာ ပြင်ဦးလွင်စစ်ဆေးရုံကို ပို့ဆောင်ထားရကြောင်း BWM အဖွဲ့က သတင်းထုတ်ပြန်လာပြီးနောက် တိုင်းမှူး ဗိုလ်မှူးချုပ် တင်မင်းလတ် ရှော့ဒုံးထိမှန် ဒဏ်ရာစိုးရိမ်ရတယ်ဆိုကာ သတင်းတွေ ဆက်လက်ထွက်ပေါ်လာတာပါ။

စစ်ကော်မရှင်တပ်သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ် ဇော်မင်းထွန်း ကတော့ နန်းတွင်း လပခ ကို ရှော့တိုက်ဒုံးကျရောက်ပေါက်ကွဲမှုမရှိကြောင်း၊ သတင်းမှားများဖြစ်ကြောင်း ၎င်းတို့ကို ထောက်ခံရေးသားနေတဲ့ သတင်းမီဒီယာတွေကတဆင့် ငြင်းဆန်ထားပါတယ်။

လပခနဲ့ ကျုံးမြို့ရိုးအနီးနေထိုင်သူမန္တလေးမြို့ခံတဦးကတော့ အခင်းဖြစ်နေ့က နန်းတွင်းလပခနဲ့အနီးတဝိုက်မှာ ပေါက်ကွဲသံတစုံတရာမကြားရကြောင်း ပြောပါတယ်။

” ကျုံးတောင်ဘက်ရော မြောက်ဘက်ရော ဘာသံမှမကြားပါဘူး။ ၂၈ ရက်နေ့က မြို့ထဲနေရာ ၄ ခုလောက်ကို စစ်တပ်က ဝင်စီးတာတော့ကြားလိုက်တယ်။ ကျန်တာတော့ဘာမှမကြားဘူး” လို့ သူက ပြောပါတယ်။

မလှိုင်၊ ဒီဇင်ဘာ ၂၉၊ ၂၀၂၅။

မန္တလေးတိုင်း၊ မလှိုင်မြို့နယ်၊ ထနောင်းကိုင်းကျေးရွာမှာ စက်တပ်လေထီးနဲ့ဗုံးကြဲခံရလို့ သက်ကြီးပိုင်းအမျိုးသား ၁ ဦးဒဏ်ရာရပြီး နေအိမ် ၇ လုံးပျက်စီးသွားတယ်လို့ မလှိုင်မြို့နယ်ပကဖတာဝန်ရှိသူတွေဆီက သိရပါတယ်။

ဒီဇင်ဘာ ၂၈ ရက် မနက် ၁ နာရီခန့်မှာ မိတ္ထီလာလေတပ်ကနေ တက်လာတဲ့ စက်တပ်လေထီး ၃ စီးက ကျေးရွာထဲကို ဗုံး ၆ လုံးကြဲချခဲ့တာလို့ ဆိုပါတယ်။

“နေအိမ်ထဲအိပ်နေချိန် ထိတာ။ ရွာထဲကို ၄ လုံးကျတာ။ ရွာပြင်ကို ၂ လုံးကျတာ။ ရွာခံတွေတော့ ထွက်ပြေးတာမရှိကြဘူး။” လို့ မလှိုင်မြို့နယ်ပကဖတာဝန်ရှိသူတဦးက ပြောပါတယ်။

ကျေးရွာထဲ ဗုံးကျပေါက်ကွဲလို့ အသက် ၇၀ အရွယ် ဦးကံသောင်း ဆိုသူ လက်နဲ့ခြေထောက်မှာ မစိုးရိမ်ရဒဏ်ရာရခဲ့ကာ လက်ရှိမှာတော့ နီးစပ်ရာမှာ ဆေးကုသမှုခံယူနေပြီး ရွာခံတွေ ကျေးရွာကနေ ထွက်ပြေးတိမ်းရှောင်တာမျိုးမရှိပေမယ့် စိုးရိမ်နေကြတယ်လို့ ဆိုပါတယ်။

ဒါ့အပြင် နေအိမ် ၃ လုံးပြိုကျ ၄ လုံး အမိုးလန်ပျက်စီးခဲ့ကာ နွားတင်းကုပ် ၃ လုံးပျက်စီးပြီး နွား ၃ ကောင်သေဆုံးသွားတယ်လို့ ဆိုပါတယ်။

ဒီဇင်ဘာ ၂၆ ရက်ကလည်း မြင်းခြံမြို့နယ်၊ ကျောင်းဖြူကန်ကျေးရွာကို စစ်ကော်မရှင်ဘက်က လေကြောင်းကနေ ဗုံးကြဲခဲ့လို့ အမျိုးသမီး ၁ ဦးသေ ၁ ဦးဒဏ်ရာရခဲ့သေးတယ်လို့ သိရပါတယ်။

သတင်း – ကျော်ကြီး

မလှိုင်၊ ဒီဇင်ဘာ ၂၈၊ ၂၀၂၅။

မန္တလေးတိုင်း၊ မလှိုင်မြို့နယ်၊ ဆည်တိုကျေးရွာအုပ်စု၊ ညောင်ကုန်းကျေးရွာမှာ စစ်ကော်မရှင် သတင်းပေးဆိုသူ ၂ ဦးကို ပစ်ခတ်ခဲ့တယ်လို့ မလှိုင်မြို့နယ်ပကဖ တာဝန်ရှိသူတွေဆီက သိရပါတယ်။

ပစ်ခတ်ခံရသူတွေဟာ ညောင်ကုန်းကျေးရွာနေ အသက် ၆၀ အရွယ် ဦးမော်နဲ့ အသက် ၅၀ အရွယ် ကိုမောင်မောင်ကြီး (ခ) ငသက်တို့ကို ဒီဇင်ဘာ ၂၇ ရက်မနက် ၆ နာရီခန့်မှာ ကျေးရွာချင်းဆက်လမ်းပေါ်မှာ ပစ်ခတ်ခဲ့တာလို့ ဆိုပါတယ်။

“သူတို့အိမ်ထဲမှာ ဝင်ဆွဲတယ်။ ရွာအပြင်ဘက် ညောင်ကုန်းနဲ့ရွာသစ်ကြားမှာ ပစ်ခတ်ခဲ့တာ။ သေနတ်နဲ့ပစ်ခဲ့တာ။ ၄ ချက် ၁ ယောက် ၂ ချက်စီပစ်ခဲ့တာ။”လို့ မလှိုင်မြို့နယ်ပကဖ တာဝန်ရှိသူတဦးက ပြောပါတယ်။

ပစ်ခတ်ခံရသူ ၂ ဦးကနေရာမှာတင်သေဆုံးသွားပြီး စစ်ကော်မရှင်ဘက်က လာကောက်တာမျိုး၊ လာစစ်ဆေးတာမျိုးမရှိတာကြောင့် မိသားစုဝင်တွေက အလောင်းကိုကောက်ယူပြီး သင်္ဂြိုဟ်ခဲ့ရတယ်လို့ ဆိုပါတယ်။

ဦးမော်နဲ့ ကိုမောင်မောင်ကြီး (ခ) ငသက်တို့ ၂ ဦးဟာ စစ်ကော်မရှင်တပ်ဆီ သတင်းပေးတာ၊ စစ်ကြောင်းထိုးဖို့ လမ်းပြလုပ်ဆောင်ပေးတာတွေကြောင့်ပစ်ခတ်ခဲ့တာလို့ သိရပါတယ်။

ဒီဇင်ဘာ ၁၉ ရက်ကလည်း မလှိုင်မြို့နယ်၊ လယ်ကြီး၊ မျက်သီးကျင်း၊ ရုံးတောကျေးရွာတွေမှာ ၁ ရက်တည်း အုပ်ချုပ်ရေးမှူးအပါအဝင် ၆ ဦးကို မလှိုင်ပကဖအဖွဲ့ဝင်တွေက ပစ်သတ်ခဲ့သေးတယ်လို့ သိရပါတယ်။

စာတည်း – လင်း

မန္တလေး၊ ဒီဇင်ဘာ ၂၈၊ ၂၀၂၅။

ရွေးကောက်ပွဲစတင်တဲ့ ဒီဇင်ဘာ ၂၈ ရက် ဒီနေ့မနက်ပိုင်းမှာ အလယ်ပိုင်းတိုင်းစစ်ဌာနချုပ်တည်ရှိရာ မန္တလေးနန်းတွင်းထဲကို ရှော့တိုက်ဒုံးပစ်ခတ်ခံရပြီး ၃ လုံးက ကျုံးထဲကျကာ ၁ လုံးက ရပ်ကွက်ထဲကျရောက်ပေါက်ကွဲခဲ့တာကြောင့် ပြည်သူ ၂ ဦး ထိခိုက်ဒဏ်ရာရခဲ့တယ်လို့ ‌‌‌‌‌‌‌‌‌‌‌‌‌‌‌‌မြို့ခံတွေဆီက သိရပါတယ်။

ရှော့တိုက်ဒုံး ၁ လုံးကျရောက်ခဲ့တဲ့ အောင်မြေသာစံမြို့နယ်၊ အမကဌာနီအရှေ့ရပ်ကွက်၊ ၈၀ လမ်း၊ ၅ လမ်းမှာ မောင်ဖြိုးကိုကို အသက် ၃၂ နှစ်နဲ့ မထားထားဦး အသက် ၃၈ နှစ်တို့ ထိခိုက်ဒဏ်ရာရခဲ့ပြီး မထားထားဦးကတော့ ဘယ်ခြေကျင်းဝတ်ပြတ်ဒဏ်ရာရခဲ့ကာ နန်းတွင်းထဲကထိခိုက်မှုကိုတော့ အတည်မပြုနိုင်သေးပါဘူး။

ဒီမနက် ၁ နာရီဝန်းကျင်မှာ မြို့တွင်းမှာ ပေါက်ကွဲသံတွေဆက်တိုက်ကြားပြီးနောက်မှာ လက်နက်ကြီးပစ်ခတ်သံတွေပါ ဆက်ကြားခဲ့ရတာလို့ ဆိုပါတယ်။

စစ်ကော်မရှင်ရဲ့ မန္တလေးတိုင်းဝန်ကြီးချုပ် ဦးမျိုးအောင်ကတော့ ဒီမနက်စစ်ကော်မရှင်ထောက်ခံ မီဒီယာတွေနဲ့တွေ့ဆုံစဉ်မှာ “စစ်ကိုင်းဘက်က လုပ်တာပေါ့နော်။ ရှော့တိုက်ဒုံး ၄ လုံးမှာ ၃ လုံးက ကျုံးထဲကျတော့ အထိခိုက်မရှိဘူး။ ၁ လုံးကတော့အထဲမှာ ကျတဲ့အတွက် ၂ ယောက်ထိတယ်”လို့ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌အတည်ပြုထားပါတယ်။

ရွေးကောက်ပွဲကာလမှာ တိုက်ခိုက်ခံရမှုတွေမဖြစ်စေဖို့ ကချင်ပြည်နယ်ခွင်ကိုထိုးနေတဲ့ တပ်မ ၃၃ တခုလုံးကို နိုဝင်ဘာလက နောက်တန်းပြန် ခေါ်ခဲ့ပါတယ်။

အဲဒီနောက်စစ်ကိုင်းတိုင်းကို တာဝန်ပြန်ချထားပြီး စစ်ကြောင်းတွေပြန်ထိုးချိန် ယခုလို မင်းကွန်းရွာဘက်ကနေ ထပ်မံတိုက်ခိုက်ခံရတာပါ။

ဒီပစ်ခတ်မှုကို ဘယ်လက်နက်ကိုင်အဖွဲ့အစည်းက လုပ်ခဲ့တယ်ဆိုတာကိုတော့ ထုတ်ပြန်ကြေညာတာ မရှိသေးပါဘူး။

မြို့ခံတွေကတော့ ပေါက်ကွဲမှု နောက်ဆက်တွဲ လမ်းသွားလမ်းလာစစ်ဆေးမှုတွေကို စိုးရိမ်နေကြတယ်လို့ ဆိုပါတယ်။

စစ်ကော်မရှင်ဘက်ကတော့ ရပ်ကွက်ရုံးနဲ့ မဲရုံတွေမှာ ရပ်ကွက်လုံခြုံရေးအဖွဲ့တွေနဲ့ ရဲအင်အား ပူးပေါင်းချထားပြီး လမ်းတွေမှာလည်း အစစ်ဆေး တင်းကျပ်ထားတယ်လို့ သိရပါတယ်။

ဒီကနေ့ ရွေးကောက်ပွဲအပိုင်း ၁ အဖြစ်ကျင်းပမယ့် နိုင်ငံတဝှမ်း မြို့နယ် ၁၀၂ မြို့နယ်ထဲမှာ မန္တလေးတိုင်းအတွင်းက အောင်မြေသာစံမြို့နယ်အပါ စုစုပေါင်း ၈ မြို့နယ်ပါဝင်တယ်လို့ စစ်ကော်မရှင်က ကြေညာထားပါတယ်။

သတင်း – မြတ်

ကျော်ကြီး၊ အောင်စိုး

မြေလတ်အသံ၊ ဒီဇင်ဘာ ၂၆၊ ၂၀၂၅။

စစ်ကိုင်းတိုင်း၊ ဗန်းမောက်မြို့၊ ဘုတလင်မြို့နယ်နဲ့ မန္တလေးတိုင်း၊ မြင်းခြံမြို့နယ်မှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဒေသခံအမျိုးသမီး ၂ ဦးသေဆုံးပြီး စျေးလည်းမီးလောင်ပျက်စီးခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၆ ရက်မနက် ၅ နာရီကျော်မှာ ဗန်းမောက်မြို့ပေါ်ကို တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံးကြဲချခဲ့ရာ မြို့မစျေးကိုကျရောက်ပေါက်ကွဲခဲ့တာလို့ ဆိုပါတယ်။

“အန္တရာယ်များလို့ အရပ်သားပြည်သူက မဝင်ရဲဘူး။ ရှေ့တန်းရဲဘော်တွေပြောတာ စျေး တခုလုံး (အပြင်တန်း၊ အတွင်းတန်း) အကုန်လောင်တာ ဟုတ်တယ်။ စျေးဆိုင်တွေက နီးနီးလေး ကပ်နေတော့ အကုန်လောင်တာ။ ပေ ၂၀ လောက်ခြားတဲ့ ဆောက်လုပ်ရေးဝန်းပါ အကုန်လောင်တယ် ကြားတယ်ဗျာ” လို့ ဗန်းမောက်မြို့ခံအမျိုးသားတဦးကပြောပါတယ်။

NUG တပ်တွေထိန်းချုပ်ထားတဲ့ ဗန်းမောက်မြို့ကို စစ်ကော်မရှင်တပ်နဲ့ရှမ်းနီအမျိုးသား တပ်မတော် – SNA တို့က မြို့ကိုသိမ်းပိုက်နိုင်ရေး စစ်အင်အား ၆၀၀ ခန့်နဲ့ နေ့စဥ် ထိုးစစ်ဆင်တိုက်ခိုက်နေရာ ထိခိုက်၊ သေဆုံးမှုတွေ များလာနေတာကြောင့် အခုလို ဗုံးကြဲတိုက်ခိုက်နေတာဖြစ်နိုင်တယ်လို့ အထက်ပါ အမျိုးသားက ဆိုပါတယ်။

ပြီးခဲ့တဲ့ ဒီဇင်ဘာ ၂၁ ရက်ကလည်း ဗန်းမောက်မြို့နယ်၊ အနောက်ခြမ်းရှိ နားပင်ကျေးရွာ ဘုန်းတော်ကြီးကျောင်းကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ သံဃာတော် ၁ ပါးအပါအဝင် အမျိုးသား၊ အမျိုးသမီး ၆ ဦးဒဏ်ရာရရှိခဲ့ပါသေးတယ်။

ဒါ့အပြင် ဒီဇင်ဘာ ၂၄ ရက်နေ့လယ် ၂ နာရီကျော်မှာလည်း ဘုတလင်မြို့နယ်၊ ကင်းစမ်းကျေးရွာအနီးရှိ ဘုတလင်-ရေဦး လမ်းပိုင်းကို မုံရွာအခြေစိုက်၊ အနောက်မြောက်တိုင်းစစ်ဌာနချုပ်က တက်လာတဲ့ Gyrocopter ၃ စီးနဲ့ ဗုံးကြဲတိုက်ခိုက်ခဲ့ရာ အမျိုးသမီး ၁ ဦးသေဆုံးတယ်လို့ ဆိုပါတယ်။

“(ကုန်စုံဆိုင်)က ဘုတလင် စိုင်ပြင်လမ်းဘေး၊ ကင်းစမ်းလမ်းခွဲမှာရှိတာ။ အိမ်ဆိုင် ပေါ့။ ဗုံးသီးက ၂ လုံးချတာ။ သေဆုံးသူနဲ့ဒဏ်ရာရသူက လင်မယား ဆိုင်ရှင်တွေ”လို့ ဘုတလင်ဒေသခံ အမျိုးသားတဦးက ပြောပါတယ်။

သေဆုံးသူမှာ ကုန်စုံဆိုင်ပိုင်ရှင် ဒေါ် မိချစ်ဖြစ်ပြီး သူ့ရဲ့ အမျိုးသားမှာ ထိခိုက်ဒဏ်ရာရပြီး ဆေးကုသမှုခံယူထားတာကြောင့် အသက်အန္တရာယ်မစိုးရိမ်ရတော့ဘူးလို့ သူကဆိုပါတယ်။

ဒါ့အပြင် ကင်းစမ်းကျေးရွာလမ်းခွဲမှာရှိတဲ့ အများပြည်သူနားနေဆောင် ဇရပ်နဲ့ ရေအိုးစဥ်လည်း ပျက်စီးသွားခဲ့တယ်လို့ အထက်ပါ အမျိုးသားက ဆိုပါတယ်။

အလားတူ ဒီဇင်ဘာ ၂၄ ရက်ညနေ ၄ နာရီကျော်မှာ ဝက်လက်မြို့နယ်၊ ငါးပတ်ချောင်းကျေးရွာကို တိုက်ခိုက်ရေးလေယာဥ်နဲ့ဗုံးကြဲ တိုက်ခိုက်ခဲ့တာကြောင့် ၇ နှစ်ကလေးငယ် ၁ ဦးအပါအဝင် ၇ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

မန္တလေးတိုင်း၊ မြင်းခြံမြို့နယ်၊ ကျောင်းဖြူကန်ကျေးရွာကိုလည်း ဒီဇင်ဘာ ၂၆ ရက် ဒီမနက် ၉ နာရီ မိနစ် ၄၀ ခန့်မှာ စစ်ကော်မရှင်ဘက်က ဂျက်ဖိုက်တာနဲ့ ကျေးရွာထဲကို ဗုံး ၂ လုံးကြဲချခဲ့တာကြောင့် အမျိုးသမီး ၁ ဦးသေ ၁ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီကသိရပါတယ်။

“သေတဲ့အမျိုးသမီးက နေအိမ်ထဲထမင်းချက်နေချိန်ထိတာ။ ဗုံးတွေက ရွာမြောက်ဖျားကိုကျတာ။ ကျောင်းဖြူကန်ရွာခံအချို့က ရှောင်နေကြတယ်။ ၂၁ ရက်နေ့စစ်ကြောင်းထိုးကတည်းက။ ခုထိတဲ့သူတွေက ရွာမှာအနည်းငယ်ကျန်နေသူတွေထဲက ထိတာ”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးပေါက်ကွဲစထိမှန်လို အသက် ၄၀ ကျော်အရွယ် အမျိုးသမီး ၁ ဦးသေဆုံးပြီး အသက် ၃၀ ကျော်အရွယ်အမျိုးသား ၁ ဦးဒဏ်ရာရကာ နေအိမ် ၃ လုံးထက်မနည်း ပျက်စီးမှုရှိတယ်လို့ ဆိုပါတယ်။

လေကြောင်းကနေ ဗုံးကြဲခံကလို့ ကျေးရွာအတွင်း စစ်ဘေးမရှောင်ဘဲကျန်နေသူတွေအားလုံးရွာကနေ တိမ်းရှောင်သွားကြပြီပြီး ဒီဇင်ဘာ ၂၆ ရက်အထိ တလုပ်နဲ့အိုင်းမရွာကြားမှာလည်း စစ်ကော်မရှင်တပ်က စစ်ကြောင်းထိုးကာ စစ်ရေးတင်းမာမှုတွေရှိနေသေးတယ်လို့ ဆိုပါတယ်။

ပြီးခဲ့တဲ့ အောက်တိုဘာလအတွင်း စစ်ကော်မရှင်တပ်က လေကြောင်းတိုက်ခိုက်မှုအကြိမ်ရေ ၂၅၀ ပြုလုပ်ခဲ့ပြီး အဲ့ဒီထဲက မန္တလေး၊ စစ်ကိုင်း၊ မကွေးတို့မှာ ၁၈၅ ဦးသေဆုံးပြီး ၅၂၂ ဦးထိခိုက် ဒဏ်ရာရရှိခဲ့တယ်လို့ အမျိုးသားညီညွတ်ရေးအစိုးရ – NUG ရဲ့ လူ့အခွင့်ရေးဝန် ကြီးဌာန အချက်အလက်အရ သိရပါတယ်။

ပုံစာ – ဗုံးကြဲခံရသည့် ဗန်းမောက်မြို့။

စာတည်း – လင်း

ဓါးထိုးသတ်ခံရတဲ့ အမျိုးသား ၁ ဦး ဓါးဒဏ်ရာတွေနဲ့လွတ်မြောက်လာ

မြင်းခြံ၊ ဒီဇင်ဘာ ၂၄၊ ၂၀၂၅။

မန္တလေးတိုင်း၊ မြင်းခြံမြို့နယ်၊ တလုပ်မြို့နဲ့ အိုင်းမရွာက နေအိမ် ၇၀၀ ကို စစ်ကော်မရှင်တပ်ဖွဲ့ဝင်တွေကမီးရှို့ပြီး အနည်းဆုံး ရွာခံ ၃ ဦးကိုလည်းပစ်သတ်ခဲ့တယ်လို့ မြင်းခြံအခြေစိုက် LPDF တခုရဲ့ တာဝန်ရှိသူဆီက သိရပါတယ်။

ဒီဇင်ဘာ ၂၁ ရက် မနက် ၈ နာရီခန့်မှာ တလုပ်မြို့မှာ စစ်ကော်မရှင်တပ်သားတွေက နေအိမ်တွေကို မီးရှို့ခဲ့တာကြောင့် မြို့တွင်းရှိနေအိမ် ၃၀၀ ခန့်မီးလောင်ပျက်စီးသွားတယ်လို့ ဆိုပါတယ်။

ဒါ့အပြင် ဒီဇင်ဘာ ၂၂ ရက်မှာလည်း မြင်းခြံမြို့နယ်မှာစစ်ကြောင်းထိုးနေတဲ့ အင်အား ၆၀ ကျော်ပါစစ်ကြောင်းဟာ အိုင်းမရွာထဲကိုဝင်ရောက်ကာ နေအိမ်တွေကိုမီးရှို့ပြီး ဒေသခံတွေကိုလည်းပစ်ခတ်ခဲ့တယ်လို့ မြင်းခြံအခြေစိုက် LPDF တခုရဲ့ တာဝန်ရှိသူဆီက သိရပါတယ်။

“တလုပ်မှာရှိတဲ့ စကမအဖွဲ့က တလုပ်ကိုရှို့တာက သက်သက်၊ အိုင်းမကိုဝင်လာတဲ့စစ်ကြောင်းက ရှို့တာက သက်သက်၊ အိုင်းမရွာကိုတော့ မနေ့ကထိ နေအိမ်တွေမကုန်မချင်းရှို့နေတာ”လို့ ဆိုပါတယ်။

၂၀၂၅ ဖေဖော်ဝါရီလပိုင်းမှာ တလုပ်မြို့သိမ်းဖို့အတွက် တော်လှန်ရေးတပ်တွေက သွားရောက် တိုက်ခိုက်ခဲ့ပြီးနောက်မှာ ဒေသခံတွေမြို့ပေါ်ကတိမ်းရှောင်ခဲ့ကြပြီး အဲ့ဒီအချိန်ကစလို့ မြို့ပေါ်မှာ စစ်ကော်မရှင်တပ်က တပ်စွဲထားတာလို့ ဆိုပါတယ်။

အိုင်းမရွာမှာ အိမ်ခြေ ၄၀၀ ခန့်ရှိပြီး စစ်ကော်မရှင်စစ်ကြောင်းက ၂ ရက်ဆက်မီးရှို့လို့ ရွာအတွင်းရှိ နေအိမ်အားလုံးနီးပါး မီးလောင်ပျက်စီးသွားပြီလို့ အထက်ပါတာဝန်ရှိသူက ပြောပါတယ်။

အိုင်းမရွာကိုဝင်ရောက်လာတဲ့ စစ်ကော်မရှင်စစ်ကြောင်းက ကျေးရွာအတွင်းတွေ့ရတဲ့ အသက် ၂၅ နှစ်အရွယ် လူငယ် ၁ ဦးရဲ့ ရင်ဘတ်ကို ဓားနဲ့ထိုးလည်ပင်းလှီးပြီး နောက်ထပ်အမျိုးသား ၃ ဦးကိုလည်း သေနတ်ကိုင်ဓာတ်ပုံရိုက်ပြီးနောက် ပစ်သတ်ခဲ့တယ်လို့ ဓားထိုးခံရပြီး ထွက်ပြေးလွတ်မြောက်လာသူရဲ့ ပြောပြချက်ကို အထက်ပါ LPDF တာဝန်ရှိသူက ပြန်ပြောပြပါတယ်။

“ရွာသား ၃ ယောက်ကို သေနတ်ကိုင်ခိုင်းပြီး ဓာတ်ပုံရိုက်ပစ်သတ်လိုက်တာကို လွတ်လာတဲ့ ကလေးပြောပြလို့သိရတယ်။ သူ့ကိုလည်း သတ်တာဘဲ။ ကလေးက သေချင်ယောင်ဆောင်ပြီး သူကံလည်းပါတော့ လွတ်လာတာ။ ဒဏ်ရာတွေနဲ့ဆိုတော့ နားလိုက် ပြေးလိုက်နဲ့ လွတ်လာတာ။ ကျနော်တို့ဆီက ပြည်သူအချို့လည်းရှိတော့ ကျနော်ဆီပို့ခိုင်းပြီး ဆေးရုံပို့ပေးခဲ့ရတာ”လို့ ပြောပါတယ်။

ထွက်ပြေးလွတ်မြောက်လာတဲ့ လူငယ်မှာ ရင်ဘတ်ကို ဓားနဲ့ ၃ ချက်ထိုးခံထားရပြီး လည်ပင်းကို ဓားနဲ့ ၁ ချက်လှီးခံထားရတယ်လို့ ဆိုပါတယ်။

ပစ်သတ်ခံရတဲ့ အမျိုးသား ၃ ဦးအပြင် နောက်ထပ်ရွာခံအချို့လည်း ဖမ်းဆီးသတ်ဖြတ်ခံထားရတယ်လို့ သတင်းရထားပေမယ့် စစ်ကော်မရှင်စစ်ကြောင်းက ကျေးရွာထဲရှိနေတာကြောင့် နယ်မြေမရှင်းလင်းနိုင်သေးတဲ့အတွက် အတည်မပြုနိုင်သေးဘူးလို့ ဆိုပါတယ်။

စစ်ကြောင်းဝင်မီးရှို့နေလို့ အိုင်းမ၊ မြို့ကြီးကုန်း၊ မြောက်ရွာ၊ ရဲတိုင်၊ ကျောက်ဖြူကန်ကျေးရွာတွေက ဒေသခံပြည်သူ ၅,၀၀၀ ကျော်ထွက်ပြေးနေရပါတယ်။

ဩဂုတ် ၈ ရက်ကလည်း မြင်းခြံမြို့နယ်၊ ဗလုံကျေးရွာကို စစ်ကော်မရှင်စစ်ကြောင်းထိုးလာပြီး လက်နက်ကြီးနဲ့ပစ် မီးရှို့လို့ စစ်ရှောင် ၃ ဦးဒဏ်ရာရပြီး နေအိမ် ၁၀၀ ကျော်မီးလောင်ပျက်စီးခဲ့တယ်လို့ သိရပါတယ်။

စာတည်း – လင်း