မြိုင်၊ ဧပြီ ၂၅၊ ၂၀၂၅။

မကွေးတိုင်း၊ မြိုင်မြို့နယ်အရှေ့ပိုင်းရှိ တောတိုက်ထဲကို စစ်ကောင်စီကလေကြောင်းကနေ ဗုံးကြဲတိုက်ခိုက်လို့ အမျိုးသား ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ ဒေသခံတွေဆီကသိရပါတယ်။

ဧပြီ ၂၄ ရက်ည ၇ နာရီဝန်းကျင်မှာ စစ်ကောင်စီရဲ့ဂျက်ဖိုက်တာ ၁ စီးပေါ်ကနေ ဗုံး ၃ လုံးကြဲချခဲ့ရာ တောတိုက်အတွင်းစစ်ရှောင်နေတဲ့ မိသားစုကိုထိမှန်ခဲ့တာပါ။

“ ဒီတိုင်းပဲ ဘာအကြောင်းမှမရှိဘဲ လာပြီး ၃ ကြိမ်ပစ်သွားတာ ပေါင် ၅၀၀ တွေ၊ မီးလောင်ဗုံးတွေနဲ့။ အမျိုးသားက နေရာမှာတင်ဆုံးသွားတာ။ အမျိုးသမီးနဲ့ကလေးငယ်လေးကတော့ မီးလောင်ဒဏ်ရာတွေနဲ့ ဆေးကုသမှုခံနေရတယ်” လို့ ဒေသခံတဦးကပြောပါတယ်။

တောတိုက်အတွင်းစစ်ရှောင်ရင်း လျှော်ဖြူခြံစောင့်နေတဲ့ မိသားစု ၄ ဦးနေထိုင်ရာ တဲပေါ်ကို ဗုံးကျရောက်ပေါက်ကွဲခဲ့တာဖြစ်ပြီး အသက် ၅၀ အရွယ်အမျိုးသား သေဆုံးပြီး ဇနီးဖြစ်သူ၊ ၁၃ နှစ်နဲ့ ၁၀ နှစ်အရွယ် သမီး ၂ ဦးတို့ ထိခိုက်ဒဏ်ရာရခဲ့တယ်လို့ ဆိုပါတယ်။

အဆိုပါနေရာတဝိုက်ကို လေကြောင်းတိုက်ခိုက်ခံရတာဟာ ဒီတကြိမ်က ပထမဆုံးအကြိမ်ဖြစ်တယ်လို့ ဆိုပါတယ်။

ဧပြီ ၂၃ ရက် ညနေ ၄ နာရီ ၁၀ မိနစ်ဝန်းကျင်မှာ စစ်ကောင်စီရဲ့ဂျက်ဖိုက်တာ ၂ စီးပေါ်ကနေ Rocket ၃ လုံး ပခုက္ကူမြို့နယ်ထဲက ဆယ်ပင်စု၊ ရွာသစ်၊ အောက်ကျင်းနဲ့ ဖလံအိုးကျေးရွာအနီးကို ပစ်ခတ်တိုက်ခိုက်ရာမှာ အမျိုးသမီး ၁ ဦးသေဆုံးပြီး အမျိုးသား ၃ ဦးထိခိုက်ဒဏ်ရာရရှိခဲ့ပါသေးတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဧပြီ ၂၅ ရက်အထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့အရပ်သားပြည်သူစုစုပေါင်း ၆,၅၆၅ ဦးရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေး အသင်း – AAPP က ထုတ်ပြန်ပါတယ်။

ပုံစာ – ဗုံးထိမှန်သေဆုံးခဲ့သည့် အသက် ၅၀ အရွယ် အမျိုးသား။

သတင်း – ဟယ်သာ၊ စာတည်း – လင်း

ရေစကြို၊ ဧပြီ ၁၈၊ ၂၀၂၅။

မကွေးတိုင်း၊ ရေစကြိုမြို့နယ်မှာ စစ်ကောင်စီတပ်က အကြောင်းမဲ့ လေကြောင်းတိုက်ခိုက်လို့ ခြေပြတ်ခဲ့တဲ့ အသက် ၈၀ နှစ်အရွယ်အဖိုး ၁ ဦး သွေးထွက်လွန်ပြီး သေဆုံးခဲ့တယ်လို့ Yesagyo Township Info Committee က တာဝန်ရှိသူတဦးက ပြောပါတယ်။

ရေစကြိုမြို့နယ်၊ ဗလဘအုပ်စု ဗလဘကျေးရွာကို ဧပြီ ၁၇ ရက် မနေ့ ညနေ ၄ နာရီခွဲလောက်မှာ လေကြောင်းကနေ ၃ ကြိမ် ဗုံးကြဲပစ်ခတ်တိုက်ခိုက်ခဲ့တဲ့အတွက် အဖိုးဦးအောင်သန်းနဲ့ နောက်ထပ် ဒေသခံတချို့ထိခိုက်ခဲ့ပြီး ဦးအောင်သန်းကတော့ ဒီနေ့မနက်ပိုင်းမှာ သေဆုံးခဲ့တာလို့ ဆိုပါတယ်။

“အဘိုးအိုက ခြေတဖက်ပြတ်ဒဏ်ရာနဲ့ သွေးထွက်လွန်ပြီး ဆုံးသွားတာ” လို့ Yesagyo Township Info Committee က တာဝန်ရှိသူတဦးက ပြောပါတယ်။

စစ်ကောင်စီတပ်ဟာ ဂျက်ဖိုက်တာနဲ့ဗုံးကြဲတဲ့အပြင် ရော့ကတ်နဲ့ပါပစ်တဲ့အတွက် ကျေးရွာ ဘုန်းတော်ကြီးကျောင်းနဲ့ ကျောင်းအနီးက အိမ်တွေကိုထိသွားတာလို့ သူကဆက်ပြောပါတယ်။

ဒီတိုက်ခိုက်မှုကို မိတ္ထီလာလေတပ်ဘက်ကလာတဲ့ ဂျက်ဖိုက်တာ ၁ စီးကလုပ်ဆောင်ခဲ့တာဖြစ်ပြီး ပေါင် ၃၀၀ ဗုံးသီး ၃ လုံး ကြဲချခဲ့တာလို့ ရေစကြိုမြို့နယ်ပြည်သူ့ကာကွယ်ရေးအဖွဲ့ ရဲ့ သတင်းနဲ့ ပြန်ကြားရေး တာဝန်ခံကပြောပါတယ်။

ဒါ့အပြင်ကျေးရွာဘုန်းကြီးကျောင်းနဲ့ နေအိမ်အဆောက်အအုံအချို့လည်း ပျက်စီးခဲ့တယ်လို့ ရေစကြိုဒေသခံတဦးက အတည်ပြုပြောပါတယ်။

“ပေါင် ၃၀၀ ဗုံးတွေ ကြဲသွားတာ၊ ဘုန်းကြီးကျောင်းနဲ့ အနီးအနားမှာရှိတဲ့ အိမ်တချို့ပျက်စီးသွားတယ်၊ အသက် ၈၀ အရွယ် လူကြီးပိုင်းတဦးခြေထောက်ပြတ်သွားတယ်၊ဘုန်းကြီးကျောင်းဝိုင်းထဲက အဆောက်အဦတချို့ ပျက်စီးသွားတယ်၊ မီးစက်ထားတဲ့အဆောက်အဦလည်း ပျက်စီးတယ်”လို့ ရေစကြိုမြို့ခံတဦးက ပြောပါတယ်။

မတ် ၂၈ မှာလှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပျက်စီးခဲ့တာတွေကို ပြန်လည်ထူထောင်ရေးလုပ်ငန်းတွေ အရှိန်မြှင့်လုပ်ဆောင်ဖို့ဆိုကာ ဧပြီ ၂ ရက်မှ ၂၂ ရက်အထိ ယာယီအပစ်ရပ်ထားကြောင်း ကြေညာခဲ့ပြီးနောက် နေ့စဉ်ဆိုသလို အရပ်သားနေအိမ်တွေကို လေကြောင်းကနေ ဗုံးကြဲတာ၊ လက်နက်ကြီးနဲ့ ပစ်ခတ်တာတွေကို ပြုလုပ်နေတာလည်းဖြစ်ပါတယ်။

ပုံစာ – ဗုံးကြဲတိုက်ခိုက်ခံရသည့် ဗလဘကျေးရွာက နေအိမ်အဆောက်အဦတချို့။

သတင်း – မောင်ဆွေအင်း၊ ဒိန်းဂျား၊ စာတည်း – လင်း

ချောက်၊ ဧပြီ ၁၇၊ ၂၀၂၅။

မြန်မာနှစ်ဆန်း ၁ ရက်နေ့ ဧပြီ ၁၇ ရက် ဒီကနေ့မှာ စစ်ကောင်စီရဲ့လွတ်ငြိမ်းအဖြစ် မကွေးမြို့ ဒေါင်းနေထောင်က အကျဥ်းသား ၁၁၅ ဦးလွတ်မြောက်ခဲ့တယ်လို့ အကျဥ်းထောင်နဲ့နီးစပ်သူ ဆီကသိရပါတယ်။

လွတ်မြောက်လာသူတွေမှာ အမျိုးသား ၇၃ ဦးနဲ့ အမျိုးသမီး ၄၂ ဦးဖြစ်ပြီး အဲ့ဒီထဲမှာနိုင်ငံရေး အကျဥ်းသား ၂ ဦးနဲ့ နိုင်ငံရေးအကျဥ်းသူ ၉ ဦး စုစုပေါင်း နိုင်ငံရေးအကျဉ်းသား ၁၁ ဦးသာပါဝင်တယ်လို့ ဆိုပါတယ်။

“သူတို့က ပုဒ်မ ၅ ခုနဲ့ထောင်ချခံရတာ၊ ၅၀၅ လည်းပါတယ်၊ မီးရှို့ဖျက်ဆီးမှု၊ အကြမ်းဖက်မှု စတဲ့ ပုဒ်မ ၅ ခုနဲ့ ထောင်ချခံရတာ၊ သူတို့ကို ထောင် ၈ နှစ်ချတာ၊ ရက်လျှော့ပြီးလွတ်လာတာ၊ ချုပ်ခံရတာက ၁ နှစ်ကျော်လောက်ရှိတယ်၊ ချောက်ကနေ နိုင်ငံရေးပုဒ်မနဲ့ ထောင်ချခံရပြီး မလွတ်တဲ့သူ ကျန်သေးတယ်” လို့ အကျဥ်းထောင်နဲ့နီးစပ်သူကပြောပါတယ်။

အဆိုပါ နိုင်ငံရေးအကျဥ်းသားတွေထဲက အမျိုးသား ၂ ဦးနဲ့ အမျိုးသမီး ၆ ဦးက ချောက်မြို့ကဖြစ်ပြီး ကျန်တဲ့ ၃ ဦးနဲ့ပတ်သက်တာကိုတော့ မသိရဘူးလို့ဆိုပါတယ်။

နိုင်ငံတဝန်းအကျဉ်းထောင်တွေကနေ အကျဉ်းသား ၅ ထောင်နီးပါးကို ပြန်လွှတ်ပေးမယ်လို့ ဧပြီ ၁၇ ရက် ဒီနေ့မှာ စစ်ကောင်စီကထုတ်ပြန်ပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဧပြီ ၁၁ ရက်အထိ ဖမ်းဆီးခံထားရသူစုစုပေါင်း ၂၉,၀၃၀ ဦးရှိပြီး အဲ့ဒီထဲက ၂၂,၁၉၇ ဦး ထိန်းသိမ်းခံနေရဆဲဖြစ်တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

နတ်မောက်၊ ဧပြီ ၁၀၊ ၂၀၂၅။

မကွေးတိုင်း၊ နတ်မောက်မြို့အနီးက စစ်ကောင်စီဂိတ်ကို ဧပြီ ၁၀ ရက်မနက်ပိုင်းမှာ တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ၈ ဦးဒဏ်ရာရခဲ့တယ်လို့ နဂါးနီပြောက်ကျားတပ်ဖွဲ့-မြင်းခြံဆီက သိရပါတယ်။

နတ်မောက်မြို့တောင်ဘက်အထွက်က အင်အား ၁၀ ဦးဝန်းကျင်ရှိတဲ့ စစ်ကောင်စီဂိတ်ကို မနက် ၃ နာရီ ၁၅ မိနစ်လောက်မှာတော်လှန်ရေးတပ်ဖွဲ့ဝင်တွေတိုက်ခိုက်ခဲ့ကြတာလို့ ဆိုပါတယ်။

“ကျနော်တို့ မီတာ ၅၀ ဝန်းကျင်လောက်အထိသွားကပ်ပြီးတော့ တိုက်ခိုက်ခဲ့တာ၊ နယ်မြေခံပြည်သူတွေက လှမ်းပြီးသတင်းပို့တာကတော့ ၅ ဦးသေပြီး ၈ ဦးလောက်ဒဏ်ရာရတယ်၊ ကျနော်တို့ မြို့အခြေထိသွားပြီး တိုက်ခိုက်ခဲ့တာ”လို့ People’s Defense Organization – Natmauk တာဝန်ခံ အဆိပ်သီးက ပြောပါတယ်။

အဲ့ဒီဂိတ်ဟာ စစ်အာဏာသိမ်းပြီးနောက် ဖွင့်ထားတဲ့ဂိတ်ဖြစ်ပြီး စစ်သား၊ ရဲနဲ့ ပျူစောထီးတွေပေါင်းကာ အလှည့်ကျဂိတ်ကြေးကောက်နေကြတာလို့ ဆိုပါတယ်။

ဒီတိုက်ခိုက်မှုအတွက် ထိခိုက်သေဆုံးမှုအခြေအနေတွေကိုတော့ မြေလတ်အသံကသီးခြားအတည် မပြုနိုင်သေးပါဘူး။

ဒီတိုက်ခိုက်မှုကိုတော့ People’s Defense Organization – Natmauk၊ နတ်မောက် ပကဖနဲ့ မဟာမိတ်တပ်ပေါင်းစုတို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ မတ် ၂၉ ရက်ကလည်း နတ်မောက်မြို့နယ်၊ ရွာတော်ကျေးရွာက ထွက်လာသော စစ်ကောင်စီကား ၁ စီးကို People’s Defense Organization – Natmauk က မိုင်းဆွဲတိုက်ခိုက်ခဲ့ပါသေးတယ်။

သတင်း – ဒိန်းဂျား၊ စာတည်း – လင်း