မြေလတ်အသံ၊ အောက်တိုဘာ ၁၂၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
မကွေး၊ အောက်တိုဘာ ၁၂၊ ၂၀၂၅ ။
မကွေးမြို့မှာ တိုက်ပွဲအတွင်းသေဆုံးခဲ့တဲ့ စစ်ကော်မရှင်တပ်ဖွဲ့ဝင်တွေရဲ့ မိသားစုတွေကိုပေးမယ့် စစ်မှုထမ်းဟောင်းအိမ်ရာအသစ် မြေနေရာတခု တိုးချဲ့ဖော်ဆောင်နေတယ်လို့ ဒေသခံတွေထံက သိရပါတယ်။
အဲ့ဒီမြေနေရာကို မကွေးမြို့မြသလွန်ဘုရားအကျော် အေးမြသာယာကျေးရွာအနီး မြေလွတ်ဧက ၂၀၀ ကျော်မှာ ဖော်ဆောင်နေတာဖြစ်ပြီး ဇူလိုင်လကစတင်ကာ လမ်းဖောက်တာ၊ လျှပ်စစ်မီးသွယ်တန်းတာနဲ့ ရေတွင်းတူးဖော်တာတွေလုပ်ဆောင်နေတယ်လို့ ဆိုပါတယ်။
” မြေကွက်တွေဖော်နေတာဟုတ်တယ်။ အဲ့မြေက ပလပ်မြေတွေ ပြည်သူမြေတော့မဟုတ်ဘူး။ အဲ့မြေပေါ်မှာ ဘာမှမရှိတာကကြာပြီ။ အရင်ကတော့ ပြည်သူကိုချပေးမယ်လို့ကြားတာ။ မြေညှိနေတာတွေတော့ ရှိတယ်။ အကွက်ဖော်တာတွေတော့ မရှိသေးဘူး”လို့ မကွေးမြို့ခံတဦးက မြေလတ်အသံကို ပြောပါတယ်။
အဲ့ဒီမြေနေရာဟာ ယခင်ကသင်္ချိုင်းမြေဖြစ်ခဲ့ပြီး မြေကွက်တွေစတင်ဖော်ဆောင်ချိန်မှာ ပြည်သူတွေကိုနေရာချပေးမယ်လို့ သတင်းတွေထွက်ခဲ့ကာ ပရဟိတရုံး၊ ကြက်ခြေနီရုံးတွေဆောက်လုပ်ဖို့ မြေနေရာတင်ပြခဲ့တာတွေလည်းရှိခဲ့တယ်လို့ သူက ဆိုပါတယ်။
စစ်ခေါင်းဆောင်တွေက စစ်မှုထမ်းဟောင်းအိမ်ရာတွေကို မြို့ကြီးအများစုမှာ ဆောက်လုပ်နေပြီး သေဆုံးစစ်ကော်မရှင်တပ်ဖွဲ့ဝင်မိသားစုတွေအများစုနေထိုင်လို့ စစ်မှုထမ်းဟောင်းအိမ်ရာတွေကို မုဆိုးမအိမ်ရာလို့ စစ်ကော်မရှင်အသိုင်းအဝိုင်းက ခေါ်ဆိုကြတာပါ။
မကွေးတိုင်းစစ်ကော်မရှင်အဖွဲ့ကတော့ အထက်ပါမြေနေရာတွေမှာ စစ်ကော်မရှင်တပ်သားတွေနဲ့မိသားစုဝင်တွေအတွက် နေရာချထားပေးမှာဖြစ်ပြီး တိုင်းဝန်ကြီးချုပ် ဦးတင့်လွင် ယမန်နေ့အောက်တိုဘာ ၁၁ ရက်မှာ မြေကွက်ဖော်နေမှုအခြေအနေတွေကို သွားရောက်ကြည့်ရှုတယ်လို့ မနေ့ကသတင်းထုတ်ပြန်ပါတယ်။
စစ်မှုထမ်းဟောင်းအိမ်ရာတွေကို မကွေးမြို့အခြေစိုက် တပ်မ ၈၈ ဌာနချုပ်နောက်ကျော အောင်ဘုံရပ်ကွက်မြေလွတ်တွေမှာ ယခင်ကတည်းကဆောက်လုပ်ပေးခဲ့ပြီး လက်ရှိထပ်မံဖော်ဆောင်တာဟာ သေဆုံးစစ်ကော်မရှင်တပ်သားတွေ ထပ်မံများပြားလာတာကြောင့်လို့ မကွေးတပ်နယ်သတင်းရင်းမြစ်က ပြောပါတယ်။
အဲ့ဒီမြေကွက်တွေဟာ တိုက်ပွဲမှာသေဆုံးတဲ့ စစ်ကော်မရှင်တပ်သားတွေရဲ့မိသားစုတွေကို ပေးတာဖြစ်ပြီး အများစုမှာ တပ်မ ၈၈ လက်အောက် သေဆုံးစစ်ကော်မရှင်တပ်ဖွဲ့ဝင်တွေ ရရှိကြတယ်လို့ ဆိုပါတယ်။
” ခုက ၈၈ ကထပ်ကျတာတွေ များတယ်။ တိုက်ပွဲမှာ ကျဆုံးတဲ့သူတွေရဲ့မိသားစုတွေနဲ့ EA (တိုက်ပွဲကြောင့် ခြေပြတ်၊လက်ပြတ်၊ဆေးအဆင့်နိမ့်စစ်သား)တွေ လျှောက်လို့ရတယ်။ မြေကွက်ရော၊ အိမ်ရောပေးတာ။ တချို့လည်း ရောင်းစားကြတယ်” လို့ သူကပြောပါတယ်။
စစ်ကော်မရှင်တပ်က စစ်မှုထမ်းဟောင်းတွေနဲ့မိသားစုတွေကို အရံအင်အားတွေအဖြစ်သိမ်းသွင်းကာ နယ်မြေခံပြည်သူ့စစ်တွေ အဖြစ်ဖွဲ့စည်းနေတာလည်း ဖြစ်ပါတယ်။
မြေလတ်အသံ၊ အောက်တိုဘာ ၁၁၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
ငဖဲ၊ အောက်တိုဘာ ၁၁၊ ၂၀၂၅။
မကွေးတိုင်း၊ ငဖဲမြို့နယ်၊ ရခိုင်ရိုးမ အမ်း-ပဒါန်းလမ်းပိုင်းရှိ နတ်ရေကန်တောင် ကမ္ဘာလုံးဗျူဟာကုန်း စခန်းကို အာရက္ခတပ်တော်-AA နဲ့ မဟာမိတ်ပူးပေါင်းတပ်တွေ သိမ်းပိုက်နိုင်ခဲ့ပြီလို့ ရှေ့တန်းသတင်း ရင်းမြစ်တွေထံက သိရပါတယ်။
ဗျူဟာကုန်းစခန်းရဲ့ကာကင်းစခန်းတွေကို စက်တင်ဘာလနဲ့ အောက်တိုဘာလဆန်းရက်တွေမှာ ဆက်တိုက်သိမ်းပိုက်ခဲ့ပြီးနောက် ပင်မစခန်းကြီးကို အောက်တိုဘာ ၁၀ ရက် ယမန်နေ့ ညနေ ၄ နာရီမှာ သိမ်းပိုက်နိုင်ခဲ့တာပါ။
“ အဓိကက ၉ ရက်နေ့ကဖိုက်တာကုန်းကိုသိမ်းလိုက်နိုင်တာကြောင့် ကျသွားတာ၊ ဖိုက်တာကုန်းမှာ **ဘက်က ၄၀ သေပြီး ကျန်တာကစဥ့်ကလျားထွက်ပြေးကြတာ၊ မနေ့က ကရိန်းကား ၁ စီးနဲ့ လက်နက်ကြီးဟောင်ဝစ်ဇာ ၁ လက်တင်ပြီး ပြန်ဆင်းသွားတာ၊အခြေအနေအရသူတို့မထိမ်းနိုင်တော့လို့ ၁၀ ရက် နေ့လယ်၂ နာရီမှာ အဲ့ဒါတွေသယ်ပြီးပြန်ဆင်းသွားတာ၊ လက်နက်တွေက အများကြီးစွန့်ပစ်ခဲ့ကြလို့ အာရက္ခတပ်တော်-AAဘက်က ရထားပါတယ်” လို့ ငဖဲဒေသမြေပြင်တပ်ဖွဲ့ဝင်တဦးက မြေလတ်အသံကို ပြောပါတယ်။
အမ်း-ပဒါန်း လမ်းပိုင်းတလျှောက် ကမ္ဘာလုံးစခန်းအပါ စစ်ကော်မရှင်တပ်ခံစစ်စခန်းတွေမှာ တပ်မ ၉၉ နဲ့ စကခ ၁၇ လက်အောက်ခံတပ်ရင်းတွေ တိုက်ခိုက်ရေးဝင်ရောက်နေတာပါ။
ကမ္ဘာလုံးစခန်းဟာ စစ်ကော်မရှင်တပ်ရဲ့ အရေးပါတဲ့ဗျူဟာကုန်းစခန်းဖြစ်တာကြောင့် စခန်းမကျရေး တိုက်လေယာဥ်နဲ့ ပို့ဆောင်ရေးလေယာဥ်တွေနဲ့ ဆက်တိုက်လေကြောင်းပစ်ကူပေးခဲ့ပေမယ့် တော်လှန် ရေးတပ်တွေက သိမ်းပိုက်နိုင်ခဲ့တာလည်း ဖြစ်ပါတယ်။
“ နတ်ရေကန် ကမ္ဘာလုံးစခန်းကအလွယ်တကူပဲ လမ်းဟောင်း၊ လမ်းသစ်တွေကို အာရက္ခတပ်တော်-AAနဲ့ ကျနော်တို့ မဟာမိတ်တွေဘက်က ဖြတ်တောက်ထိမ်းချုပ်ထားနိုင်လိုက်လို့ အလွယ်တကူရတာပါ” လို့ သူက ပြောပါတယ်။
အောက်တိုဘာ ၉ ရက်မှာ ကမ္ဘာလုံးစခန်းရဲ့ အဓိကကာကင်းစခန်းကုန်းဖြစ်တဲ့ ဖိုက်တာကုန်းကနေ စစ်ကော်မရှင်တပ်သားတွေ စွန့်ခွာထွက်ပြေးခဲ့ပြီး ယမန်နေ့မှာလည်း ကမ္ဘာလုံးပင်မစခန်းက စစ်ကော်မရှင်တပ်ဖွဲ့တွေပါထွက်ပြေးခဲ့တာဖြစ်ကာ တော်လှန်ရေးတပ်ဖွဲ့တွေဘက်က ထွက်ပြေးသူတွေ ကို လိုက်လံဖမ်းဆီးတာနဲ့ နယ်မြေရှင်းလင်းတာတွေလုပ်ဆောင်နေတယ်လို့ သိရပါတယ်။
စခန်းကျပြီးတဲ့နောက် ဒီကနေ့ မနက်ပိုင်းမှာ စစ်ကော်မရှင်တပ်က Y 12 လေယာဥ်နဲ့ နတ်ရေကန်တောင်၊ မြောက်ဘက်ရှိ ရွှေစက်တော်ဒေသနေရာတွေကို ဗုံးကြဲချတိုက်ခိုက်ခဲ့တယ်လို့ သိရပါတယ်။
နတ်ရေကန်တိုက်ပွဲအခြေအနေတွေနဲ့ပတ်သက်ပြီး အာရက္ခတပ်တော်-AA က သတင်းထုတ်ပြန်တာမရှိသေးပါဘူး။
နတ်ရေကန်တောင် ကမ္ဘာလုံးစခန်းဟာ ပဒါန်းတပ်နယ်နဲ့ ငဖဲမြို့နယ်အခြေစိုက်လက်နက်ထုတ်လုပ်ရေး စက်ရုံ ကပစ ၁၄ ရဲ့အရေးပါတဲ့ ရခိုင်ရိုးပေါ်က အကြီးဆုံးခံစစ်စခန်းဖြစ်ကာ ကမ္ဘာလုံးစခန်းကျရှုံးခဲ့တာကြောင့် ကပစ ၁၄ ကို ထိုးစစ်ဆင်နိုင်ဖို့ ပဒါန်းအခြေအစိုက် အမှတ် ၃၇၅ နဲ့ ၄၀၉ အမြောက်တပ်ရင်း ၂ ခုသာကျန်တော့တာလည်း ဖြစ်ပါတယ်။
စာတည်း – ဟိန်းစံ
ငဖဲ၊ အောက်တိုဘာ ၁၁၊ ၂၀၂၅။
အာရက္ခတပ်တော်-AA နဲ့ စစ်ကော်မရှင်တပ်ဖွဲ့တွေအကြား တိုက်ပွဲတွေဖြစ်ပွားနေတဲ့ မကွေးတိုင်း၊ ငဖဲမြို့နယ်၊ နတ်ရေကန်တောင်ပေါ်ရှိ ဖိုက်တာစခန်းကုန်းက စစ်ကော်မရှင်တပ်ဖွဲ့ဝင်အင်အား ၁၀၀ ကျော် စခန်းစွန့်ထွက်ပြေးသွားတယ်လို့ တော်လှန်ရေးတပ်ဖွဲ့တွေနဲ့ နီးစပ်သူဆီက သိရပါတယ်။
ဖိုက်တာစခန်းကုန်းကို အောက်တိုဘာ ၄ ရက်ကစတင်ကာ တော်လှန်ရေးတပ်ဖွဲ့တွေ ထိုးစစ်ဆင် တိုက်ခိုက်နေတာဖြစ်ပြီး အောက်တိုဘာ ၉ ရက်မနေ့က မနက် ၉ နာရီခွဲ အချိန်မှာ စခန်းကုန်းရှိ စစ်ကော်မရှင်တပ်ဖွဲ့ဝင်တွေက စပ်စီရွာဘက်ကို ထွက်ပြေးသွားကြတာလို့ ဆိုပါတယ်။
“နတ်ရေကန်စခန်းအနီးက ဖိုက်တာစခန်းကုန်းကို လက်နက်စွန့်ပြီးအကုန်လုံးထွက်ပြေးတာ၊ ဗိုလ်မှူး အဆင့်ပါ အင်အား ၁၀၀ ခန့် စခန်းစွန့်ခွာထွက်ပြေးကြတာ၊ နာမည်ကြီးစခန်းကုန်းပါ၊ မနေ့ကမနက်က အထိနာပြီးကစဥ့်ကလျား ထွက်ပြေးတာ၊ နတ်ရေကန်ကမ္ဘာလုံးစခန်းရဲ့ ကာကင်း စခန်းကုန်းပါ၊” လို့ တော်လှန်ရေးတပ်တွေနဲ့နီးစပ်သူတဦးက ပြောပါတယ်။
အဲ့ဒီဖိုက်တာစခန်းကုန်းဟာ နတ်ရေကန်တောင်ရှိ လေကြောင်းရန်ကာကွယ်ရေးဗျူဟာကုန်းရဲ့ အားထားရတဲ့စခန်းကုန်းဖြစ်ပြီး စပ်စီနဲ့ ဇင်ပြွန်းကျေးရွာတွေအနီး နတ်ရေကန်တောင်ကြောပေါ်တက်တဲ့ လမ်းဟောင်းမှာတည်ရှိကာ တိုက်ခိုက်ရခက်ခဲတာကြောင့် တော်လှန်ရေးတပ်တွေက ဖိုက်တာကုန်းလို့ အမည်ပေးထားတာလို့ ဆိုပါတယ်။
“အခုက စစ်ကော်မရှင်ကလမ်းဟောင်း စပ်စီကနေ နတ်ရေကန်ကိုတက်နိုင်တဲ့ လမ်းကြောင်းပဲ ရှိပါတယ်၊ အခုလေကြောင်းနဲ့ ဆုံကုန်းအမြောက်တပ် မစခ ၉၀၅ က လက်နက်ကြီး ပစ်ကူတာပဲ ရှိတယ်၊ အခုက စစ်ကော်မရှင်ဘက်က အမ်းကိုဝင်ချင်တာ၊ အင်အားမကြာခဏစုပြီး တက်တက်လာတာ၊ စပ်စီရွာကို မကျော်နိုင်ဘူး၊” လို့ တော်လှန်ရေးတပ်နဲ့နီးစပ်သူတဦးက ပြောပါတယ်။
ဖိုက်တာစခန်းကုန်းကိုသိမ်းပိုက်ပြီး လက်နက်ခဲယမ်းတွေကိုလည်း သိမ်းဆည်းမိတယ်လို့ သိရပေမယ့် အသေးစိတ်အခြေအနေတွေကိုတော့ အာရက္ခတပ်တော် – AA က ထုတ်ပြန်ကြေညာတာမရှိသေးပါဘူး။
ဒါ့အပြင် ဆားပေါက်ရွာ၊ ရွာသစ် တောင်ယာဘက်အခြမ်း နေရာတွေကို ဂျိုင်ရိုကော်ပတာ၊ Y12၊ MiG 29၊ SU 30 တွေနဲ့ နေ့စဥ်နီးပါး ဗုံးကြဲ တိုက်ခိုက်နေတယ်လို့လည်း သိရပါတယ်။
ဖဲမြို့နယ်အခြေစိုက် အမှတ် ၁၄ ကာကွယ်ရေးပစ္စည်းစက်ရုံ (ကပစ ၁၄) ရဲ့ အဓိကခံစစ်စခန်းဖြစ်တဲ့ နတ်ရေကန်တောင်ကမ္ဘာလုံးစခန်းမှာလည်း အောက်တိုဘာ ၁ ရက်နဲ့ ၂ ရက်မှာ တိုက်ပွဲပြင်းထန်ခဲ့ပါသေးတယ်။
စက်တင်ဘာလကုန်ပိုင်းမှာသိမ်းပိုက်နိုင်ခဲ့တဲ့ နတ်ရေကန်တောင်ကာကင်း ဂုတ်ကြီးရွာစခန်းတိုက်ပွဲမှာလည်း စကခ ၁၇ လက်အောက် စစ်ကော်မရှင်တပ်သားတွေ အစုလိုက်ထွက်ပြေးနေကြတယ်လို့ မြေပြင်တော်လှန်ရေးသတင်းရင်းမြစ်တွေက ပြောပါတယ်။
စာတည်း – လင်း
မြေလတ်အသံ၊ အောက်တိုဘာ ၁၀၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ အောက်တိုဘာ ၉၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
မကွေး၊ အောက်တိုဘာ ၉၊ ၂၀၂၅။
မကွေးတိုင်း၊ ပေါက်မြို့နယ်မြောက်ပိုင်းရှိ သပြေညိုရေနံမှော်ကို စစ်ကော်မရှင်တပ်က ဗုံးကြဲတိုက်ခိုက်တာကြောင့် အလုပ်သမားလင်မယား ၂ ဦးသေဆုံးပြီး ကလေးဖြစ်သူဒဏ်ရာရခဲ့တယ်လို့ ပေါက်မြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။
အောက်တိုဘာ ၈ ရက်မနက် ၁၀ နာရီဝန်းကျင်မှာ ဂျိုင်ရိုကော်ပတာ ၃ စီးနဲ့ဗုံးကြဲတိုက်ခိုက်ခဲ့ရာ ရေနံမှော်ရှိ ရေနံလုပ်သားတွေရဲ့ ယာယီနေအိမ်တွေပေါ်ကျရောက်ပေါက်ကွဲပြီး အသက် ၃၀ အရွယ် ရေနံလုပ်သား လင်မယား ၂ ဦးသေဆုံးပြီး ၇ နှစ်အရွယ်ကလေး ၁ ဦးထိခိုက်ဒဏ်ရာရခဲ့တယ်လို့ ဆိုပါတယ်။
“ရေနံမှော်ဆိုတော့ အလုပ်သမားတွေက နေအိမ်ပုံစံမျိုးနဲ့ အဆောက်အအုံတွေဆောက်နေတာမျိုးတွေ ရှိတယ်။ အဲ့လိုနားကိုကျသွားတာ။ နေအိမ်ပဲဆိုပါတော့ အဲ့အိမ်မှာ မိသားစု ၃ ယောက်ရှိတယ်။ အမျိုးသားနဲ့ အမျိုးသမီး တောက်လျောက်ဆုံးတယ်၊ ကလေးလေးကထိခိုက်မှုရှိတယ် အသက်ရှင်နိုင်ပါ့မယ်လို့မသိရဘူး၊ ထိခိုက်ပြင်းထန်တယ်” လို့ ပေါက်မြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူက ပြောပါတယ်။
ဒါ့အပြင် ပေါက်မြို့နယ်နဲ့ မြိုင်မြို့နယ်အတွင်းကို စစ်ကော်မရှင်တပ်က လေကြောင်းကနေ မကြာခဏဗုံးကြဲတိုက်ခိုက်နေပြီး မေလကနေ အောက်တိုဘာ ၉ ရက်အတွင်း အဲ့ဒီမြို့နယ်တွေထဲကို အကြိမ်ရေ ၂၀၀ နီးပါးကြဲခံရပြီး ဒေသခံ ၂၀ ကျော်လည်းသေဆုံးခဲ့တယ်လို့ ပေါက်မြို့နယ်ပြည်သူ့ကာကွယ်ရေးတပ်ဖွဲ့ မှ စုစည်းထားတဲ့စာရင်းကိုးကားပြီး အထက်ပါတာဝန်ရှိသူက ပြောပါတယ်။
အောက်တိုဘာ ၉ ရက်ဒီမနက်ပိုင်းမှာလည်း ပေါက်နဲ့ မြိုင်အစပ်တနေရာကို ဗုံးကြဲတိုက်ခိုက်ခဲ့သေးတယ်လို့ သိရပြီး ဒီအခြေအနေကိုတော့ မြေလတ်အသံကဆက်လက်စုံစမ်းနေပါတယ်။
ဗုံးကြဲရာမှာ Y12၊ Y8၊ ပါရာမော်တာအပြင် အခုနောက်ပိုင်း ဂျိုင်ရိုကော်ပတာတွေကိုပါ အသုံးပြုလာကာ လေကြောင်းအပြင် မြေပြင်ကနေလည်းစစ်ကြောင်းထိုးတာတွေရှိတဲ့အတွက် ဒေသခံတွေလည်း စိုးရိမ်မှုမြင့်တက်နေတယ်လို့ ဆိုပါတယ်။
“မြေပြင်စစ်ကြောင်းကလဲ ၅ လပိုင်းကတည်း ပေါက်နယ်အတွင်းမှာရှိနေတာ အခုချိန်ထိပဲဆိုပါတော့။ တနေရာမဟုတ် တနေရာမှာစစ်ကြောင်းလုပ်နေလို့ ပြည်သူရှောင်တိမ်းနေရတာမျိုးတွေရှိတယ်။ ဒုက္ခရောက်နေတာမျိုးတွေရှိတယ် စိုးရိမ်မှုအမျိုးမျိုးနဲ့ပေါ့ ပြည်သူကတော့”လို့ အထက်ပါတာဝန်ရှိသူက ပြောပါတယ်။
ပြီးခဲ့တဲ့ အောက်တိုဘာ ၇ ရက်မှာလည်း မြိုင်မြို့နယ်၊ ကျောက်ခွက်ရေနံမှော်အနီးကို ပါရာမှော်တာ ၂ စီး နဲ့ ဗုံးကြဲချတိုက်ခိုက်ခဲ့တာကြောင့် အမျိုးသား ၃ ဦးသေဆုံးခဲ့ပါသေးတယ်။
၂၀၂၁၊ စစ်အာဏာသိမ်းချိန်ကနေ ၂၀၂၅၊ အောက်တိုဘာ ၈ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၃၃၉ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ပါတယ်။
စာတည်း – လင်း
မြေလတ်အသံ၊ အောက်တိုဘာ ၈၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
ပွင့်ဖြူ၊ အောက်တိုဘာ ၈၊ ၂၀၂၅။
မကွေးတိုင်း၊ မင်းဘူးခရိုင်၊ ပွင့်ဖြူမြို့နယ်၊ ပုသိမ်-မုံရွာလမ်းပိုင်းက မဲဇလီဆည်တော်ကြိုးတံတားရှိ စစ်ကော်မရှင်စစ်ဆေးရေးဂိတ်ကို ဝင်ရောက်တိုက်ခိုက်ရာ ၄ ဦးသေဆုံးပြီး လက်နက်ခဲယမ်းတွေလည်း သိမ်းဆည်းနိုင်ခဲ့တယ်လို့ မင်းဘူးခရိုင် အမှတ် ၇ တပ်ရင်းဆီက သိရပါတယ်။
မဲဇလီဆည်တော်ဂိတ်မှာ ပွင့်ဖြူအခြေစိုက် ဝါစိုက်ပျိုးရေးတပ်မှ စစ်ကော်မရှင်တပ်ဖွဲ့ဝင် ၁၀ ဦးဝန်းကျင်ရှိနေချိန် အောက်တိုဘာ ၄ ရက် ညနေ ၅ နာရီ ၈ မိနစ်ကနေ ၆ နာရီ ၃၈ မိနစ်အထိ ၁ နာရီခွဲအကြာ ဝင်ရောက်တိုက်ခိုက်ခဲ့ကြတာလို့ ဆိုပါတယ်။
“မဲဇလီဆည်တော်ကြိုးတံတားရဲ့ တောင်ဘက်မှာရှိတဲ့ မဲဇလီဆည်တော်ဂိတ်ကို တိုက်ခိုက်သိမ်းပိုက်ခဲ့တာပါ၊ ဂိတ်တဂိတ်လုံးကို ကျနော်တို့ သိမ်းပိုက်နိုင်ခဲ့တယ်လို့ ပြောလို့ရပါတယ်၊ တိုက်ပွဲဖြစ်ပွားနေတဲ့အချိန် စစ်ကော်မရှင်ဘက်က စစ်ကူတာတွေ၊ လေကြောင်းပစ်ကူတာတွေ မရှိပါဘူး၊ ရန်သူဘက်က အလောင်း ၄ လောင်း လက်နက်ခဲယမ်းနဲ့ဆက်စပ်ပစ္စည်းတွေ သိမ်းဆည်းရမိတယ်၊” လို့ မင်းဘူးခရိုင် အမှတ် ၇ တပ်ရင်း သတင်းနဲ့ပြန်ကြားရေးတာဝန်ခံ ကိုအောင်ဘက ပြောပါတယ်။
အဲ့ဒီဂိတ်မှာရှိတဲ့ စစ်ကော်မရှင်တပ်ဖွဲ့ဝင်တွေဟာ သစ်၊ ဝါးသမားတွေဆီက ပိုက်ဆံကောက်ပြီး ခရီးသွားနဲ့ ဈေးသည်တွေဆီကလည်း ပိုက်ဆံကောက်တာတွေလုပ်တယ်လို့ သိရပါတယ်။
ဒီတိုက်ခိုက်မှုကို မင်းဘူးခရိုင် အမှတ် ၇ တပ်ရင်း၊ မင်းဘူးခရိုင် ပကဖ ပွင့်ဖြူမြို့နယ် ပကဖ တို့က ပူးပေါင်းတိုက်ခိုက်ခဲ့တာဖြစ်ပြီး မင်းဘူးခရိုင် အမှတ် ၄ တပ်ရင်းက လက်နက်ကြီးပစ်ကူပေးခဲ့တာဖြစ်ပြီး တိုက်ပွဲတွင်းသေဆုံးတဲ့ စစ်ကော်မရှင်တပ်ဖွဲ့ဝင် ၄ ဦးကို အဲ့ဒီနေရာမှာပဲ သင်္ဂြိုဟ်ပေးခဲ့တယ်လို့ ကိုအောင်ဘ က ပြောပါတယ်။
ဒါ့အပြင် တိုက်ပွဲတွင်း G3 ၃ လက်၊ အူစီ ၃ လက်၊ ကျည်ဆံ ၁,၈၀၀ တောင့်၊ လက်ပစ်ဗုံးနဲ့ ကျည်ဘောက်တွေအပါအ၀င် လက်နက်နဲ့ ဆက်စပ်ပစ္စည်းတွေကို သိမ်းဆည်းနိုင်ခဲ့တယ်လို့ သိရပါတယ်။
တိုက်ခိုက်ခံရပြီးနောက် စစ်ကော်မရှင်ဘက်က အောက်တိုဘာ ၇ ရက် နေ့လယ် ၁၁ နာရီဝန်းကျင်မှာ အဆိုပါဂိတ်စခန်းအနီးကို မကွေးလေတပ်ကလာတဲ့ ဂျက်ဖိုက်တာပေါ်က ဗုံး ၅ လုံးနဲ့ ၁ ကြိမ်၊ နေ့လယ် ၁ နာရီဝန်းကျင်မှာ ဗုံး ၃ လုံးနဲ့ ၁ ကြိမ်ကြဲချတိုက်ခိုက်ခဲ့တယ်လို့ သိရပါတယ်။
စာတည်း – လင်း