ဗုံးကြဲ

မြိုင်၊ ဇွန် ၁၆၊ ၂၀၂၅။

မကွေးတိုင်း၊ မြိုင်မြို့နယ်တောင်ပိုင်း ဇီးတောကျေးရွာ ဘုန်းကြီးကျောင်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ၇ ဦး ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၁၆ ရက် နေ့လယ် ၁ နာရီခွဲမှာဂျက်ဖိုက်တာ ၁ စီးက ပေါင် ၅၀၀ ဗုံး ၁ လုံးကြဲချတာကြောင့် အိမ်ခြေ ၁၅၀ ကျော်ရှိ ဇီးတောကျေးရွာကဘုန်းကြီးကျောင်းပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ဇီးတောကျေးရွာ ဘုန်းကြီးကျောင်းကိုတိုက်ခိုက်တာပါ၊ ဘုန်းကြီးကျောင်းထဲမှာက ကမ္မနဲ့ပေါက်လမ်း အနီးတဝိုက်ကပြည်သူတွေနေတာပါ၊ ပေါင် ၅၀၀လို့ ယူဆရပါတယ်၊ ဘုန်းကြီးကျောင်း နဲ့ စေတီပုထိုးများပျက်စီးသွားခဲ့ရပါတယ်၊” လို့ ဇီးတောရွာခံတဦးကပြောပါတယ်။

ဒီဗုံးကြဲတိုက်ခိုက်မှုကြောင့် အမျိုးသမီး ၁ ဦးသေဆုံးပြီး နောက်ထပ်ဒေသခံ ၇ ဦးဒဏ်ရာရကာ ကလေးငယ်တွေလည်းသတိလစ်မေ့မျောတာတွေဖြစ်ခဲ့တယ်လို့ ဆိုပါတယ်။

ပြီးခဲ့တဲ့ ဇွန် ၁၅ ရက်ကလည်း မြိုင်မြို့နယ်၊ တွင်းမကျေးရွာက စစ်ဘေးရှောင်တောတိုက်တွေကို စစ်ကောင်စီတပ်က ဂျက်ဖိုက်တာ ၁ စီးနဲ့ ဗုံး ၂ လုံးကြဲချသွားပါသေးတယ်။

စာတည်း – လင်း

မြိုင်၊ ဇွန် ၁၅၊ ၂၀၂၅။

မကွေးတိုင်း၊ မြိုင်မြို့နယ်အနောက်မြောက်ရှိ သန်းနုတောရွာကို စစ်ကောင်စီတပ်က စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် ၆ ဦးထိခိုက်ဒဏ်ရာရပြီး အိမ် ၂ လုံးပျက်စီးခဲ့တယ်လို့ ဒေသတွင်းအခြေအနေတွေကိုသိရှိထားသူတွေဆီက သိရပါတယ်။

ဇွန် ၁၅ ရက်နေ့လယ် ၂ နာရီဝန်းကျင်မှာ စစ်ကောင်စီရဲ့စက်တပ်လေထီး ၂ စီးနဲ့ဗုံး ၂ လုံးကြဲချတိုက်ခိုက်ခဲ့တာကြောင့် သန်းနုတောရွာနေ အမျိုးသား ၂ ဦးနဲ့ အမျိုးသမီး ၄ ဦးသေဆုံးခဲ့တာလို့ ဆိုပါတယ်။

“အမျိုးသား ၂ ဦး အမျိုးသမီး ၄ ဦးဒဏ်ရာရတယ်၊ အမျိုးသမီး ၂ စိုးရိမ်ရ။ အိမ် ၂ လုံးပျက်တယ်။ စပါးကျီ ၁ လုံးပျက်တယ်။ ခိုင်းနွား ၂ ကောင်သေတယ်။”လို့ မြိုင်မြို့နယ်အတွင်းကအခြေအနေတွေကို တင်ပြပေးနေတဲ့ We Love Myaing အဖွဲ့မှ တာဝန်ရှိသူက ပြောပါတယ်။

သန်းနုတောကျေးရွာဟာ မြိုင်မြို့နဲ့ ၅ မိုင်ခန့်အကွာမှာရှိပြီး ခုလိုလေကြောင်းကနေဗုံးကြဲတိုက်ခိုက်ခံရတာ ပထမဆုံးအကြိမ်ဖြစ်တယ်လို့ သိရပါတယ်။

“ပါရာမော်တာ ၂ စီးနဲ့ ၂ လုံးကြဲတာ၊ အကြောင်းမဲ့ကြဲတာ။ မြိုင်အနောက်မြောက်ဘက် တအား မဝေးဘူး။ အဲ့ဒီရွာကိုတော့ ပထမဆုံးပေါ့။ အဲ့ဒီဘက်အပိုင်းကတော့ ပထမဆုံးမဟုတ်ဘူးဗျ။ မြိုင်နယ်က တနယ်လုံး ပတ်ကြဲခံနေရတာဆိုတော့။”လို့ အထက်ပါတာဝန်ရှိသူက ဆိုပါတယ်။

ပြီးခဲ့တဲ့ မေ ၂၄ ရက်ကလည်း မြိုင်မြို့နယ်၊ အိုရင်းကျေးရွာကို တိုက်ပွဲဖြစ်ဖြစ်တာမရှိဘဲ ဂျက်ဖိုက်တာနဲ့ ဗုံးကြဲတိုက်ခိုက်ခဲ့ရာ ဒေသခံ ၁ ဦး ဒဏ်ရာရရှိပြီးနေအိမ် ၃ လုံးပျက်စီးခဲ့ပါတယ်။

စာတည်း – လင်း

ကမ္မ၊ ဇွန် ၁၁၊ ၂၀၂၅။

မကွေးတိုင်း၊ ပခုက္ကူမြို့နယ်၊ ကမ္မမြို့အနီး ဆုံကုန်းကျေးရွာမှာ စစ်ကောင်စီတပ်ကလေကြောင်းကနေ ဗုံးကြဲခဲ့တာကြောင့် ဒေသခံအမျိုးသား ၁ ဦးဗုံးစထိမှန်သေဆုံးခဲ့တယ်လို့ အညာမြေအရပ်ဖက် အဖွဲ့အစည်းမှ တာဝန်ရှိသူတဦးကပြောပါတယ်။

ဇွန် ၁၀ ရက်မနေ့ကမနက် ၈ နာရီလောက်ကစပြီး ၁၀ ကြိမ်ထက်မနည်းဗုံးကြဲခဲ့တာကြောင့် ဆုံကုန်းရွာလည်ရှိ ဓမ္မာရုံအနီးတဝိုက်ကိုကျရောက်ပြီး အသက် ၃၀ အရွယ်အမျိုးသားကို ထိမှန်သေဆုံးခဲ့တာလို့ ဆိုပါတယ်။

“၈ နာရီဝန်းကျင်လောက် အိမ်သာတက်နေရင်း လေကြောင်းတိုက်ခိုက်ခံရတာ၊ ရွာလယ်ဓမ္မာရုံနား ကျတာကနေ အစမှန်တာထင်တယ်။ မရှောင်ပဲရွာမှာကျန်ခဲ့တဲ့လူ (ထိတာ)။ အခြားပျက်စီးမှု အသေးစိတ်မသိရသေးဘူး”လို့ အညာမြေအရပ်ဖက်အဖွဲ့အစည်းမှ တာဝန်ရှိသူတဦးကဆိုပါတယ်။

ကမ္မမြို့ပေါ်ကို စစ်ကောင်စီတပ်ဘက်က ကားအစီးရေ ၁၁၈ စီး၊ စစ်အင်အား ၄၀၀ ခန့်ရောက်တဲ့ ဇွန် ၆ ရက်ကစတင်ပြီး ကမ္မမြို့အနီးတဝိုက်ကိုလေကြောင်းကနေ နေ့စဉ်နီးပါးဗုံးကြဲချနေတာဖြစ်ပြီး မနေ့ကဗုံးအလုံးရေ ၃၀ ကျော်ကြဲချခဲ့တယ်လို့ သိရပါတယ်။

“နေ့တိုင်းလာနေတာပါ။ ပါရာမော်တာလာတယ်၊ Y 12 လာတယ်၊ ဒရုန်းနဲ့လာတယ်၊ (မနေ့က) ၃၆ လုံးချပြီး အကြိမ်ရေအနေနဲ့ Y 12 ၁၅ ကြိမ်၊ ပါရာမော်တာ ၂ ကြိမ်ဗျ”လို့ အညာမြေအရပ်ဖက် အဖွဲ့အစည်းမှတာဝန်ရှိသူတဦးကဆိုပါတယ်။

ဇွန် ၆ ရက် နေ့လယ် ၂ နာရီခန့်မှာ ကမ္မမြို့အနောက်ဘက်ကို စက်တပ်လေထီးနဲ့ ပစ်ခတ်တိုက်ခိုက်ခဲ့ပြီး ကမ္မမြို့အနောက်ဘက်ရှိ ဂျိုးပျံရပ်ကွက်၊ မကျီးသုံးပင်ရွာ၊ သံဘိုရွာအနီးတို့ကိုလည်း ဇွန် ၇ ရက် ညနေ ၅ နာရီဝန်းကျင်မှာလေကြောင်းကနေ ၁၁ ကြိမ်၊ ဗုံးအလုံးရေ ၃၀ ကျော်ကြဲချခဲ့တယ်လို့ ဆိုပါတယ်။

ဒေသခံတွေလည်းနေရပ်ကထွက်ပြေးတိမ်းရှောင်နေကြတာကြောင့် ထိခိုက်ပျက်စီးမှုအခြေအနေတွေကိုတော့ အတည်မပြုနိုင်သေးပါဘူး။

ကမ္မမြို့ပေါ်ရောက်ရှိနေတဲ့စစ်ကောင်စီအဖွဲ့ဟာ မေ ၂၉ ရက်မှစတင်ကာ ပခုက္ကူအခြေစိုက် တပ်မ ၁၀၁ ကနေထွက်ခွာလာတဲ့စစ်ကြောင်းဖြစ်ပြီး လက်ရှိမှာ မြို့ပေါ်စျေးကိုလည်း ဖွင့်ခိုင်းထားတယ်လို့ သိရပါတယ်။

“ကမ္မထဲက ၁ အိမ်မီးရှို့တယ်လို့တော့ ကြားတယ်။ ပြည်သူအချို့ရှိတယ်လို့ ပြောတယ်။ စျေးကိုလည်းဖွင့်ခိုင်းတယ်။ ဘယ်သူမှတော့သွားမဝယ်ရဲဘူး။ အသက်ကြီးတဲ့စျေးသည်အများစုတော့ ဖွင့်ရတယ်ပြောတယ်။ ဒီနေ့ကတော့စစ်ကြောင်း‌ရွှေ့ဖို့လှုပ်နေတာပြင်ဆင်တဲ့သဘောပါ”လို့ အညာမြေအရပ်ဖက်အဖွဲ့အစည်းမှ တာဝန်ရှိသူတဦးကဆိုပါတယ်။

ဒါ့အပြင် ပေါက်မြို့နယ်၊ ရေပြာဘက်မှာလည်း တပ်မ ၁၀၁ က နောက်ထပ်စစ်အင်အား ၂၅၀ ရောက်ရှိနေတယ်လို့ သိရပြီး စစ်ကြောင်း ၂ ခုပေါင်းမယ်အခြေအနေရှိတယ်လို့လည်းသူက ခန့်မှန်းပါတယ်။

စာတည်း – လင်း

မြေလတ်အသံ၊ ဇွန် ၁၁၊ ၂၀၂၅။

စစ်ကိုင်းတိုင်း၊ ဝန်းသိုနဲ့ ကောလင်းမြို့နယ်တို့ကို စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ၅ ဦးဒဏ်ရာရရှိခဲ့တယ်လို့ ဒေသခံတွေက ပြောပါတယ်။

ဇွန် ၁၀ ရက်ည ၉ နာရီကျော်မှာ ဝန်းသိုမြို့နယ်၊ ကံကုန်းကျေးရွာကို တိုက်ခိုက်ရေးလေယာဉ် ၁ စီးနဲ့ ရော့ကတ် ၁၀ လုံးပစ်ခတ်ခဲ့ရာ အသက် ၁၅ နှစ်အရွယ် မကြယ်ဇင်လင်း သေဆုံးပြီး ၁၀ နှစ်အရွယ်ယောက်ျားလေးနဲ့ ၄၀ အရွယ်အမျိုးသားတို့ ဒဏ်ရာရရှိခဲ့တာလို့ဆိုပါတယ်။

“ဒဏ်ရာရသူ ၂ ယောက်က မကြယ်ဇင်လင်းရဲ့ အဖေနဲ့မောင်ပါ။ ရော့ကတ်ကျည်က သူတို့အိမ်ကို ကျသွားတာ။ အဖေဖြစ်သူကတော့ ဒဏ်ရာပြင်းတယ်။”လို့ ဝန်းသိုဒေသခံ အမျိုးသားတဦးက ပြောပါတယ်။

ကံကုန်းကျေးရွာဟာ အိမ်ခြေ ၅၀ ခန့်ရှိတဲ့ ကျေးရွာ ၁ ရွာဖြစ်ပြီး ဝန်းသို၊ ကောလင်း၊ ထီးချိုင့် စတဲ့မြို့နယ် ၃ မြို့နယ်ရဲ့နယ်စပ်မှာတည်ရှိတာပါ။

အလားတူ ဇွန် ၉ ရက်ည ၉ နာရီကျော်မှာလည်း ကောလင်းမြို့နယ်၊ ဖလဲကျေးရွာကို စစ်ကောင်စီရဲ့ တိုက်ခိုက်ရေးလေယာဉ် ၁ စီးနဲ့ ပေါင် ၃၀၀ ဗုံး ၂ လုံးကြဲချခဲ့ရာ အသက် ၃၀ နဲ့ ၄၀ အရွယ်အမျိုးသမီး ၂ ဦး၊ အမျိုးသား ၁ ဦးတို့ ဒဏ်ရာရရှိခဲ့တယ်လို့ သူကဆက်ပြောပါတယ်။

ဗုံးကြဲခံရမှုကြောင့် အိမ်ခြေ ၁၀၀ ကျော်ရှိတဲ့ ဖလဲကျေးရွာမှာ လူနေအိမ် ၆ လုံးပျက်စီးခဲ့ပြီး အဲဒီထဲက ၃ လုံးမှာ လုံးဝပြိုကျပျက်စီးခဲ့တယ်လို့ သိရပါတယ်။

စစ်ကောင်စီတပ်က ကံကုန်းနဲ့ ဖလဲကျေးရွာတို့ကို လေကြောင်းကနေဗုံးကြဲတိုက်ခိုက်တဲ့နေ့တွေမှာ တိုက်ပွဲဖြစ်ပွားတာမရှိခဲ့ဘူးလို့လည်း ဒေသခံတွေကပြောပါတယ်။

ပြီးခဲ့တဲ့ဇွန် ၇ ရက်ကလည်း NUG ထိန်းချုပ်နယ်မြေ ထီးချိုင့်မြို့နယ်က ပေါက်ကုန်းကျေးရွာကို တိုက်ခိုက်ရေးလေယာဉ် ၁ စီးနဲ့ ပေါင် ၅၀၀ ဗုံး ၁ လုံးကြဲချခဲ့တာကြောင့် အသက် ၄၀ အရွယ်အမျိုးသမီး သေဆုံးခဲ့ပါသေးတယ်။

၂၀၂၁ စစ်အာဏသိမ်းချိန်ကနေ ၂၀၂၅ ဇွန် ၁၀ ရက်အထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့ပြည်သူစုစုပေါင်း ၆၇,၉၃ ဦးရှိခဲ့တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း – AAPP ရဲ့အစီရင်ခံစာအရ သိရပါတယ်။

စာတည်း – လင်း

ဒိန်းဂျား ၊ ခေတ်သဒ္ဒါ

မြေလတ်အသံ၊ ဇွန် ၉၊ ၂၀၂၅။

စစ်ကိုင်းတိုင်း၊ ထီးချိုင့်မြို့နယ်နဲ့ ကန့်ဘလူမြို့နယ်အတွင်းမှာ စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံထိခိုက်သေဆုံးမှုတွေရှိခဲ့တယ်လို့ ဒေသခံတွေဆီကသိရပါတယ်။

ထီးချိုင့်မြို့နယ်၊ ပေါက်ကုံးရွာကို ဇွန် ၇ ရက် ည ၇ နာရီဝန်းကျင်လောက်မှာ စစ်ကောင်စီတပ်က ဗုံးကြဲခဲ့တာကြောင့် ရွာခံအမျိုးသမီး ၁ ဦးသေဆုံးပြီး အမျိုးသား ၁ ဦး ထိခိုက်ဒဏ်ရာရရှိခဲ့တယ်လို့ ထီးချိုင့်မြို့နယ်အတွင်း မြေပြင်ကင်းထောက်နေတဲ့ တော်လှန်ရေးတပ်ဖွဲ့ဝင်က ပြောပါတယ်။

“သေသွားတဲ့ အမကတော့ လက်နဲ့ခြေတဖက် အသားစတွေထွက်သွားတယ်။ မျက်နှာတခြမ်းရော ထိသွားတယ်။ ဒဏ်ရာရတဲ့ အကိုကတော့ လက်မောင်းကို လာမှန်ပြီး အပေါက်လိုမျိုးဖြစ်သွားတယ်။ အဲ့နေ့ညကဆို ရဟတ်ယာဥ်က ဝဲလိုက် အပေါ်ပြန်တက်လိုက်နဲ့ နှစ်ခါလောက်လုပ်ပြီးမှ ကြဲချသွားတာ။”လို့ သူကပြောပါတယ်။

ဂျက်ဖိုက်တာ ၁ စီးပေါ်ကနေ ပေါင် ၅၀၀ အားရှိဗုံး ၁ လုံး ကြဲချခဲ့တာကြောင့် ပေါက်ကုံးရွာခံ အသက် ၄၀ အရွယ် အထက်ပါအမျိုးသမီးသေဆုံးပြီး သူနဲ့အိမ်နီးချင်းအမျိုးသား ၁ ဦးကတော့ ဒဏ်ရာရခဲ့တာ ဖြစ်ပါတယ်။

ဗုံးကျရောက်ပေါက်ကွဲခဲ့တဲ့ နေအိမ်နဲ့ အနီးဝန်းကျင်ကနေအိမ် ၁ လုံးလည်း ထိခိုက်ပျက်စီးခဲ့ပြီး နွား ၁ ကောင်ပါ သေဆုံးခဲ့တယ်လို့ သိရပါတယ်။

ရုပ်အလောင်းကိုတော့ ဇွန် ၈ ရက်မှာ သင်္ဂြိုဟ်ပေးခဲ့ပြီး ထိခိုက်ဒဏ်ရာရရှိခဲ့တဲ့အမျိုးသားကိုတော့ နီးစပ်ရာဆေးရုံမှာ ဆေးကုသမှုပေးနေတယ်လို့ ဆိုပါတယ်။

ဒါ့အပြင် ကန့်ဘလူမြို့နယ်၊ ရင်ဂတ်ကုန်းရွာကိုလည်း ဇွန် ၇ ရက်မှာ စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၃ ဦးထိခိုက်ဒဏ်ရာရခဲ့တယ်လို့ ကန့်ဘလူဒေသခံတွေက ပြောပါတယ်။

နေ့လယ် ၁၁ နာရီ ၁၀မိနစ်လောက်မှာ တံတားဦးလေတပ်က တက်လာတဲ့ ဂျက်ဖိုက်တာနဲ့ ပေါင် ၅၀၀ ဗုံး ၂ လုံးချတိုက်ခိုက်ခဲ့ရာ ကျေးရွာဘုန်းကြီးကျောင်းထဲနဲ့ နေအိမ်တွေပေါ် ကျရောက်ပေါက်ကွဲခဲ့တာလို့ ဆိုပါတယ်။

“ဘာမှ PDF ရဲဘော်တွေလည်းမရှိဘူး၊ ပြည်သူတွေနေအိမ်တွေနဲ့ ဘာသာရေးကျောင်းအဆောက်အဦကို ကြဲသွားတာ၊ ကျတဲ့နေရာက ဘုန်းကြီးကျောင်းထဲ ၁ လုံး၊ ဘုန်းကြီးကျောင်းရဲ့အနီးအနားက နေအိမ်ပေါ် ၁ လုံးကျတယ်၊ ပျက်စီးတာကတော့ လူနေအိမ်ပျက်စီးတယ်၊ ဘုန်းကြီးကျောင်းအဆောက်အဦ တချို့ပျက်စီးတယ်၊” လို့ တော်လှန်ရေးတပ်ဖွဲ့တွေနဲ့နီးစပ်သူကပြောပါတယ်။

ဗုံးစထိမှန်လို့ အမျိုးသား ၂ ဦး၊ အမျိုးသမီး ၁ ဦးထိခိုက်ဒဏ်ရာရကာ နွား ၁ ကောင် သေဆုံးခဲ့တယ်လို့ ဆိုပါတယ်။

ရင်ဂတ်ကုန်းရွာမှာ အိမ်ခြေ ၁၅၀၊ လူဦးရေ ၇၅၀ ရှိကာ လေကြောင်းတိုက်ခိုက်ပြီးနောက် ရွာလုံးကျွတ် ဘေးလွတ်ရာကိုတိမ်းရှောင်နေကြတယ်လို့ အထက်ပါဒေသခံက ပြောပါတယ်။

ဉာဏ်လင်းသစ်သုသေသနအဖွဲ့ရဲ့ အစီရင်ခံစာအရ အခုနှစ် မေ ၉ ရက်ကနေ ၁၅ ရက်အတွင်း မန္တလေး၊ စစ်ကိုင်းနဲ့ ပဲခူး(အရှေ့) ဒေသများအပါအဝင် ဒေသ ၁၄ ခုမှာ အရပ်သားတွေအပေါ်ပစ်မှတ်ထားတဲ့ လေကြောင်းတိုက်ခိုက်မှု ၆၁ ခုရှိခဲ့ပြီး ဒီတိုက်ခိုက်မှုတွေကြောင့် အရပ်သား ၉၄ ဦးသေဆုံးကာ ၂၄၅ ဦးထိခိုက်ခဲ့တယ်လို့ သိရပါတယ်။

စာတည်း – လင်း

ပုလဲ၊ ဇွန် ၆၊ ၂၀၂၅။

စစ်ကိုင်းတိုင်း၊ ပုလဲမြို့နယ်မှာ ဇွန် ၆ ရက်ဒီနေ့လယ်ပိုင်းမှာ စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်ခဲ့တဲ့အတွက် အငြိမ်းစားကျောင်းဆရာ ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ပုလဲမြို့နယ်၊ မင်းတိုင်ပင်ရွာကို နေ့လယ် ၁ နာရီဝန်းကျင်မှာ ဗုံးကြဲခဲ့တာကြောင့် ရွာခံ အသက် ၇၀ အရွယ်အငြိမ်းစားကျောင်းဆရာ ဦးမြင့်လွင် သေဆုံးပြီး အဆောက်အဦတချို့လည်းပျက်စီးခဲ့တယ်လို့ ဆိုပါတယ်။

“စာသင်ကျောင်းဆောင်တွေကိုမှ အရှေ့ဖက်ဆုံးအဆောင်ရယ်၊ ဆုံးတဲ့လူကြီးနေတဲ့ အိမ်နားလေးက အဆောင်ရယ် ၂ ဆောင်၊ ၂ ဆောင်ကျတာ၊ အစစင်တာလား ဘယ်လိုဖြစ်လို့လဲတော့ မသိဘူး၊ ခေါင်းပါပြတ်သွားတာ။” လို့ မင်းတိုင်ပင်ရွာခံတဦးက မြေလတ်အသံကိုပြောပါတယ်။

ဦးမြင့်လွင်ရဲ့နေအိမ်က စာသင်ကျောင်းနဲ့ကပ်လျက်ဖြစ်ပြီး ဗုံးသီးက စာသင်ကျောင်းဝန်းထဲက ကုက္ကိုပင်ပေါ်ကို ကျတာလို့ သိရပါတယ်။

“ကလေးမလေး ၁ ယောက်လည်း အစထိသေးတယ်၊ ကလေးမလေးက ၁၁ နှစ်ပဲရှိသေးတယ်၊ သိပ်တော့ မစိုးရိမ်ရဘူးပေါ့၊ ဗုံးစမှန်တာ ကလေးကို၊ သူတို့တွေက ကျောင်းနားအိမ်မှာ နေကြတာကိုး၊ အရင်လိုပဲ ကျော်ပြီးတော့တိုက်ပွဲနေရာပဲ သွားမယ်ထင်ပြီး ဒီတိုင်းနေကြတော့ထိကြတာ။” လို့ ဒေသခံအမျိုးသမီးတဦးက ပြောပါတယ်။

ပုလဲမြို့နယ်၊ ကန့်ဒေါင့်ရွာမှာ တိုက်ပွဲစဖြစ်တဲ့ ဇွန် ၂ ရက်ကစလို့ ယနေ့ ဇွန် ၆ ရက်အထိ ၅ ရက်ဆက် စစ်ကောင်စီဘက်က လေကြောင်းသုံးဗုံးကြဲနေတာကြောင့် ဒေသခံတွေကြောက်လန့်နေပြီး အချို့ကတော့ တိုက်ပွဲနဲ့ဝေးတဲ့နေရာတွေကို ထွက်ပြေးတိမ်ရှောင်နေကြရတယ်လို့ သိရပါတယ်။

ဒီနေ့အထိ ကန့်ဒေါင့်ရွာမှာ တိုက်ပွဲဆက်လက်တင်းမာနေဆဲဖြစ်ပြီး နှစ်ဖက်အထိအခိုက်ကိုတော့ မြေလတ်အသံက ဆက်လက်စုံစမ်းနေပါတယ်။

စစ်ကောင်စီတပ်က ပုလဲမြို့နယ်ကို ဇွန် ၅ ရက် တရက်ထဲမှာတင် ကန့်ဒေါင့်ရွာအနီးက နေရာတွေကို လေကြောင်းတိုက်ခိုက်မှု ၃၅ ကြိမ်ပြုလုပ်ခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

သပိတ်ကျင်း၊ ဇွန် ၆၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ ကျက်ရိုးပင်ကျေးရွာဘုန်းကြီးကျောင်းကို စစ်ကောင်စီတပ်က ဇွန် ၅ ရက်ညနေ ၅ နာရီကျော်မှာ ဗုံးကြဲတိုက်ခိုက်ခဲ့တာကြောင့် သံဃာတော် ၁ ပါးပျံလွန်ခဲ့တယ်လို့ သိရပါတယ်။

တိုက်ခိုက်ရေးလေယာဥ် ၁ စီးနဲ့ ဘုန်းကြီးကျောင်းဝန်းအတွင်းကို ဗုံးသီး ၁ လုံးချတိုက်ခိုက်ခဲ့တာကြောင့် ကျောင်းမှာရှိနေတဲ့ သက်တော် ၆၇ နှစ်ရှိ သံဃာတော် ဦးအရိယ ပျံလွန်ပြီး အရပ်သား ၄ ဦးဒဏ်ရာရရှိခဲ့တာလို့ဆိုပါတယ်။

“ဆရာတော်က ကျောင်းထိုင်ဟုတ်၊ မဟုတ်မသိရပါဘူး။ ဒဏ်ရာရသူတွေက ဘုန်းကြီးကျောင်းထဲ နေထိုင်တာမဖြစ်နိုင်ဘူး။ ကျောင်းထဲမှာရှိနေချိန် အကြဲရတာပုံစံဖြစ်နိုင်တယ်”လို့ ပြင်ဦးလွင်ခရိုင် ပြည်သူ့ကာကွယ်ရေးအဖွဲ့မှ တာဝန်ရှိသူတဦးက ပြောပါတယ်။

တိုက်ပွဲဖြစ်ပွားတာမရှိဘဲ စစ်ကောင်စီတပ်ကဗုံးလာကြဲခဲ့တာဖြစ်ပြီး ဗုံးကြဲမှုကြောင့် ဘုန်းကြီးကျောင်းဝန်းရှိ ကျောင်းဆောင် ၁ ခုလုံး ပြိုကျပျက်စီးခဲ့တယ်လို့ သူကဆိုပါတယ်။

အလားတူ ဇွန် ၃ ရက်မှာလည်း စဉ့်ကူးမြို့ပေါ် ရှိ မြသိန်းတန် ဘုရားနဲ့ဘုန်းကြီးကျောင်းကို တိုက်ခိုက်ရေး လေယာဥ်နဲ့ ဗုံးကြဲခဲ့တာကြောင့် ကျောင်းဆောင် ၂ ခုပျက်စီးခဲ့တယ်လို့သိရပါတယ်။

စစ်အာဏာသိမ်းချိန်ကနေ ၂၀၂၅၊ ဇွန် ၅ ရက်အထိ စစ်ကောင်စီတပ်တွေနဲ့ ၎င်းတို့ရဲ့လက်အောက်ခံတွေကြောင့် သေဆုံးခဲ့တဲ့ပြည်သူစုစုပေါင်း ၆,၇၇၅ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေး အသင်း – AAPP ရဲ့အစီရင်ခံစာအရသိရပါတယ်။

စာတည်း – လင်း

ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ