ဖွင့်လှစ်

ရေစကြို၊ မတ် ၄၊ ၂၀၂၃။

မကွေးတိုင်း၊ ရေစကြိုမြို့နယ်ထဲက ကာကွယ်ရေးတပ်တွေ ထိန်းချုပ်ထားနိုင်တဲ့ ကျေးရွာတရွာမှာ ကျောင်းမတက်ရတဲ့ တက္ကသိုလ်ဝင်တန်း ကျောင်းသားတွေနဲ့ ကျေးရွာထဲက ကလေးတွေအတွက် အခမဲ့ကွန်ပျူတာ သင်တန်းတွေ ဖွင့်လှစ်ပေးနေတယ်လို့ သိရပါတယ်။

ကျေးရွာအတွင်းရှိ ပရဟိတလုပ်ငန်း လုပ်ဆောင်ပေးနေသူတွေက ဦးဆောင်ဖွင့်လှစ်နေတာဖြစ်ပြီး၊ သင်တန်းတွေကနေတဆင့် သင်ယူလေ့လာမှု အခွင့်လမ်းတွေ မဆုံးရှုံးဖို့ ရည်ရွယ်ပြီး ၂၀၂၂ ခုနှစ် အောက်တိုဘာလပိုင်းမှာ ပထမအကြိမ် ဖွင့်လှစ်ခဲ့ကာ အခုနှစ်ဖေဖော်ဝါရီလထဲမှာတော့ ဒုတိယအကြိမ်မြောက် သင်တန်းကို ဖွင့်လှစ်နိုင်ခဲ့တယ်လို့ ဆိုပါတယ်။

“ကျောင်းတွေမှာ စာသင်လို့ စာမေးပွဲပြီးလည်း ပြီးတာပဲရှိတာ။ သူတို့မှာ မျှော်လင့်ချက် ပြတ်သလို ဖြစ်တာ၊ အဲ့တာကြောင့် သင်တန်းလေးတွေရှိရင် ကောင်းမယ်ဆိုပြီး လောလောဆယ် ကွန်ပျူတာ ၁၈ လုံးနဲ့ သင်ပေးနေတယ်။ ဆရာ၊ ဆရာမတွေလည်း လာသင်ကြတယ်။ တခြားရွာတွေကလည်း သင်ချင်ကြတယ်။ ကွန်ပျူတာရှာလို့ရရင် ဒီကိုလာခဲ့လို့ ပြောထားတယ်” လို့ သင်တန်းကို ဦးဆောင်ဖွင့်လှစ်ခဲ့တဲ့ ဆရာတဦးက ပြောပါတယ်။

လက်ရှိအချိန်ထိ လူဦးရေ ၁၀၀ ကျော် သင်ကြားပေးနိုင်နေပြီဖြစ်ကာ ရွာမှာရှိတဲ့ ဆရာ၊ ဆရာမတွေနဲ့ အတန်းကြီးသမားတွေကို ဦးစားပေးသင်ကြားနေပြီး၊ ကွန်ပျူတာက မလုံလောက်တဲ့အတွက် အလှည့်ကျစနစ်နဲ့ သင်ကြားနေရတယ်လို့ ဆိုပါတယ်။

တခြားရွာတွေကလည်း လာရောက်ဖွင့်လှစ်ပေးဖို့ ကမ်းလှမ်းတာတွေရှိပေမယ့် ကွန်ပျူတာမရှိတဲ့အတွက် ကြန့်ကြာနေကာ၊ အင်္ဂလိပ်စာသင်တန်းတွေလည်း ဖွင့်လှစ်ပေးဖို့ ပြင်ဆင်နေတယ်လို့ သိရပါတယ်။

မကွေး၊ ဇန်နဝါရီ ၂၀၊၂၀၂၂။

မကွေးတိုင်း၊ မင်းဘူးမြို့နယ်မှာရှိတဲ့ မန်းရွှေစက်တော်ဘုရားပွဲကို လာမယ့်တပိုတွဲလဆန်း ၅ ရက်နေ့မှာ (ဖေဖေါ်ဝါရီ ၅) စစ်ကောင်စီက ပြန်ပြီးဖွင့်လှစ်သွားမယ်လို့ ဒေသခံတွေဆီက သိရပါတယ်။

အရင်နှစ်တွေကလို အကြီးအကျယ်မဟုတ်ပဲ အကျဥ်းချုံးသဘောမျိုးနဲ့သာ ဖွင့်လှစ်သွားမှာဖြစ်သလို စျေးဆိုင်ခန်းတွေနဲ့ တဲကျောင်းတွေဆောက်ဖြစ်၊ မဖြစ်ကတော့ ခုချိန်ထိ အတိအကျမသိရသေးဘူးလို့ ဒေသခံတဦးက ပြောပါတယ်။

“ကျနော်ကြားသိရသ‌လောက်တော့ ခါတိုင်းနှစ်လိုမဟုတ်ပဲ အကျဥ်းချုံးပြီးလုပ်သွားမယ်။ အောက်ခြေ ပင်မခြေ‌တော်ရာ တံခါးတွေကိုလည်း ဖွင့်လှစ်သွားမယ်။ နှစ်စဥ်ထုံးတန်းစဥ်လာ အစီအစဥ်တိုင်း လုပ်ဆောင်သွားမယ်။ ရပ်ဝေးကလာတဲ့ သူတွေအတွက်တော့ အခမဲ့ဓမ္မာရုံကြီးတွေမှာ တည်းခိုလို့ရမယ်လို့ ကျနော်တို့သိရတယ်။” လို့ သူကပြောပါတယ်။

လက်ရှိချိန်ဟာ မြန်မာနိုင်ငံမှာ ကိုဗစ်-၁၉ ရောဂါကူစက်နှုန်း မြင့်တက်နေသလို စစ်ရေးခြေအနေလည်း တင်းမာနေတဲ့ကာလဖြစ်တာကြောင့် ခုလိုဘုရားပွဲဖွင့်လှစ်မယ့်အပေါ်မှာ ဒေသခံတွေအနေနဲ့ အမျိုးမျိုးဝေဖန်မှုတွေရှိနေပါတယ်။

“ခုကရောဂါတွေကလည်း ဖြစ်နေတာဆိုတော့ ဒါတွေကို ထည့်စဥ်းစားဖို့လိုတာပေါ့။ ကျန်းမာရေးဝန်ကြီးဌာနရဲ့ ခွင့်ပြုချက်တို့ လိုမယ်ထင်တယ်။ ဘုရားပွဲဆိုတာကတော့ အဓိက စီးပွားရေးပါပဲ၊ လူတွေစီးပွားရေးအဆင်မပြေတော့လည်း ဘုရားပွဲလည်း အဆင်မပြေဘူးလို့ထင်ပါတယ်၊” လို့ မကွေးမြို့ခံတဦးက ပြောပါတယ်။

ခုကာလမှာ ဘုရားတွေဖွင့်ပြီး ပျော်ပွဲရွှင်ပွဲတွေလုပ်တာဟာ စစ်ကောင်စီအနေနဲ့ ပြည်သူတွေရဲ့ အသက်အန္တရာယ်ကိုကာကွယ်မပေးပဲ အန္တရာယ်တောထဲကို တွန်းပို့နေတာသာဖြစ်တယ်လို့ မကွေးလူထုတိုက်ပွဲကော်မတီအဖွဲ့ဝင် ကိုချစ်ဝင်းမောင်က မြေလတ်အသံကို ပြောပါတယ်။

“အခုလို ရောဂါကပ်ဘေးကလည်း အကြီးအကျယ်ဖြစ်ပွားနေချိန်၊ စစ်‌ရေးကလည်း အင်မတင်တင်းမာနေတဲ့အချိန် မန်းရွှေစက်တော်ဘုရားပွဲကို ဖွင့်ဖို့ကြိုးစားတယ်ဆိုတာကတော့ ပြည်သူတွေရဲ့ အသက်အိုးအိမ်စည်းစိမ်တွေနဲ့ ရောဂါကူးစက်မှုကို အလေးမထားတာ၊ ပြည်သူကိုကာကွယ်မပေးချင်တာ၊ ပြည်သူကို အန္တရာယ်တောထဲကို တွန်းပို့တာလို့မြင်ပါတယ်၊”လို့ သူကပြောပါတယ်။

ဒါ့အပြင် စစ်ကောင်စီက အာဏာသိမ်းပြီးနောက်ပိုင်းမှာ တန်ခိုးကြီးဘုရားအများစုက အလှူငွေတွေကို ကိုယ်ကျိုးအတွက်အသုံးပြုခဲ့တာကြောင့် ခုလိုဖွင့်လှစ်ရင်လည်း ဘုရားအတွက်ရရှိလာမယ့် အလှူငွေတွေကို ယူပြီး အသုံးပြုနိုင်တယ်လို့ ကိုချစ်ဝင်မောင်က ဆက်ပြောပါတယ်။

“အာဏာသိမ်းပြီးစကာလမှာ ပြည်သူအားလုံးသိကြတဲ့အတိုင်းပဲ တနိုင်ငံလုံးမှာရှိတဲ့ ဘုရားတွေကအလှူငွေတွေကို သူတို့ ရဲ့ ကိုယ်ကျိုးစီးပွားအတွက် ရယူသုံးစွဲတာတွေရှိပါတယ်။ ခုကော ဘုရားပွဲမှာ ရရှိလာနိုင်တဲ့ အလှူငွေတွေကို သူတို့ရဲ့ ကိုယ်ကျိုးစီးပွားအတွက် အသုံးချနိုင်ပါတယ်။ ဒဲ့ပြောရင်တော့ ဘုရားပွဲကို ဗန်းပြလုပ်တဲ့သဘောမျိုးနဲ့ ဘုရာပွဲကရမဲ့ ငွေတွေကို ပြည်သူကိုသတ်ဖို့အတွက်အသုံးချမယ်လို့ပဲ ယူဆမိပါတယ်။” လို့ သူကပြောပါတယ်။

မန်းရွှေစက်တော်ဘုရားပွဲကို ဗဟိုကိုဗစ်ကော်မတီရဲ့ ဆုံးဖြတ်ချက်အရ NLD အစိုးရလက်ထပ် ၂၀၂၀ ခုနှစ်၊ မတ်လ ၁၃ ရက်ကစပြီး ပိတ်သိမ်းခဲ့တာလည်းဖြစ်ပါတယ်။