မြေလတ်အသံ၊ သြဂုတ် ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ တိမ်မြုပ်ရွာ အခြေစိုက် ခမရ ၆ မှ အရာခံဗိုလ်နဲ့ တပ်ကြပ်ကြီးတို့ သြဂုတ် ၇ ရက်မနက် ၉ နာရီကျော်မှာ ပစ်ခတ်ခံရပြီးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၄ က ပြောပါတယ်။

ပစ်ခတ်ခံရသူ ၂ ဦးဟာ အရာခံဗိုလ်လှကျော်နဲ့ တပ်ကြပ်ကြီး ညီညီမိုးတို့ဖြစ်ပြီး ၎င်းတို့ဟာ ခမရ ၆ ကနေ အရပ်ဝတ်နဲ့ဆိုင်ကယ်စီးပြီ ထွက်ခွာလာချိန် သဖန်းပင်ဆိပ်ရွာအနီးမှာ တော်လှန်ရေးတပ်ဖွဲ့ဝင်တွေကပစ်ခတ်ခဲ့တာလို့ ဆိုပါတယ်။

“သူတို့က ရဲဘော် ၂ ယောက်စီးလာတဲ့ ဆိုင်ကယ်ကိုရပ်ခိုင်းတာဗျ။ ရပ်ခိုင်းပြီး မင်းတို့ စစ်ထဲ၀င်မလား၊ တိုင်းပြည်အတွက် ဘာညာပြောနေတာ။ အဲ့အချိန် နောက်က ရဲဘော်က သေနတ်ထုတ်ပြီး ပစ်လိုက်တာဗျ။”လို့ သာယာဝတီ ခရိုင်တပ်ရင်း ၃၈၀၂ တပ်ခွဲ ၄ မှ ပြန်ကြားရေး တာဝန်ခံကပြောပါတယ်။

ပစ်ခတ်ပြီးနောက် လက်ပစ်ဗုံး ၁ လုံး၊ ငွေသားကျပ် ၂ သိန်း၊ စစ်မှုထမ်းကဒ် ၁ ခု၊ စစ်မှုထမ်း စိစစ်ရေးစာအုပ် ၁ အုပ်၊ မှတ်ပုံတင်ကဒ် ၁ ခု၊ လိုင်စင်ဓာတ်ပုံ ၆ ပုံ၊ မိုလ်ဘိုင်းဖုန်း ၂ လုံးတို့ကိုလည်း သိမ်းဆည်းရရှိခဲ့တယ်လို့ အထက်ပါပြန်ကြားရေးတာဝန်ခံကပြောပါတယ်။

အရာခံဗိုလ်လှကျော်နဲ့ တပ်ကြပ်ကြီး ညီညီမိုးတို့ ပစ်ခတ်သေဆုံးပြီးနောက် နာရီဝက်အကြာမှာ ရုပ်အလောင်းတွေကို ခမရ ၆ မှ စစ်ကောင်စီတပ်သားတွေက ကား ၁ စီးနဲ့ လာယူသွားခဲ့တယ်လို့ အထက်ပါတာဝန်ခံကဆက်ပြောပါတယ်။

ပြီးခဲ့တဲ့ဇူလိုင် ၂၁ ရက်ကလည်း အုတ်ဖိုမြို့၊ ကွေ့ချောင်းရပ်ကွက်လမ်းထိပ်မှာ စစ်ကောင်စီတပ်ကဖွဲ့စည်းထားတဲ့ ပြည်သူ့လုံခြုံရေးနှင့်အကြမ်းဖက်နှိမ်နင်းရေးအဖွဲ့ဝင်ဖြစ်တဲ့ အုပ်ချုပ်ရေးမှူး ရဲအောင်နဲ့ ဇနီးခင်မာရီတို့ကို သာယာဝတီခရိုင်တပ်ရင်း ၃၈၀၂၊ တပ်ခွဲ ၄က ပစ်ခတ်ရာသေဆုံးခဲ့တယ် လို့ သိရပါတယ်။

စာတည်း – လင်း

ပဲခူး၊ ဩဂုတ် ၈၊ ၂၀၂၅ ။

ပဲခူးမြို့လယ်က ဗိုလ်ချုပ်အောင်ဆန်း မြင်းစီးရုပ်ထုကို စစ်ကောင်စီတပ်ဖွဲ့ဝင်တွေက ယမန်နေ့ညပိုင်းမှာ ဖြိုချဖယ်ရှားခဲ့တယ်လို့ မြို့ခံတွေဆီက သိရပါတယ်။

ရွှေမော်ဓောဘုရားလမ်းနဲ့တောင်ငူလမ်းဆုံ ၊ ရန်ကုန်-မန္တလေးကားလမ်းမဘေး၊ ပဲခူးတိုင်းအစိုးရအဖွဲ့ရုံး မျက်နှာချင်းဆိုင်မှာရှိတဲ့ ဗိုလ်ချုပ်မြင်းစီးရုပ်ထုကို ဩဂုတ်လ၇ ရက် ယမန်နေ့ည ၉ နာရီလောက်ကစတင်ကာ စစ်ကောင်စီတပ်ဖွဲ့ဝင်တွေက ဖြိုချဖျက်ဆီးခဲ့တာဖြစ်ပြီး အောက်ခံအုတ်ခုံသာကျန်ရှိတော့တယ်လို့ ဆိုပါတယ်။

” အပြောင်ပဲ။ အဲဒီနေရာက နိုင်ငံတော်အခမ်းအနားလုပ်နေတဲ့ နေရာပဲ။ ညဘက်ကြီး လုပ်သွားတာ။ အပြောင်ပဲ ဘာမှမရှိတော့ဘူး။ ဘာရည်ရွယ်ချက်နဲ့လုပ်မှန်း မသိတော့ပါဘူး”လို့ ပဲခူးမြို့ခံအမျိုးသမီးတဦးက မြေလတ်အသံကို ပြောပါတယ်။

ဗိုလ်ချုပ်ရုပ်ထုကို ဖြိုချမှုတွေလုပ်ဆောင်ချိန်မှာ လျှပ်စစ်မီးဖြတ်တောက်ထားခဲ့ပြီး ယမန်နေ့ညတွင်းချင်းမှာပဲ အပြီးသတ်ဖယ်ရှားခဲ့တာဖြစ်တယ်လို့ ဆိုပါတယ်။

ပဲခူးမြို့လယ်ရှိ ဗိုလ်ချုပ်အောင်ဆန်းမြင်းစီရုပ်ထုကို ၁၉၈၈ အရေးအခင်းပြီးနောက်ပိုင်းမှာ စတင်တည်ဆောက်ထားခဲ့တာဖြစ်လို့ နှစ်ပေါင်း ၃၀ ကျော်ကြာမြင့်ပြီဖြစ်ပြီး ၂၀၁၉ NLD အစိုးရလက်ထက်မှာ အများပြည်သူပိုင်နေရာအဖြစ်သတ်မှတ်ကာ အဆင့်မြှင့်တင်တည်ဆောက်ပေးခဲ့တယ်လို့ သိရပါတယ်။

ဗိုလ်ချုပ်မြင်းစီးရုပ်ထုနေရာမှာ နှစ်စဥ် အာဇာနည်နေ့၊ ဗိုလ်ချုပ်မွေးနေ့တွေအပါအဝင် အောက်မေ့ဖွယ်အခမ်းအနားတွေကို ပဲခူးမြို့ခံတွေက ပြုလုပ်လေ့ရှိတယ်လို့ သိရပါတယ်။

ပြီးခဲ့တဲ့ ဇူလိုင်လအတွင်းမှာလည်း နေပြည်တော်၊ ပုဗ္ဗသီရိမြို့နယ်၊ ညစျေးအနီး ပန်းခြံအတွင်းရှိ ဗိုလ်ချုပ်အောင်ဆန်းရုပ်ထုကို စစ်ကောင်စီတပ်ဖွဲ့ဝင်တွေ ဖယ်ရှားခဲ့ပါသေးတယ်။

ပေါက်ခေါင်း၊ သြဂုတ် ၅၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ကင်မွန်းခြုံကျေးရွာအုပ်စု၊ နတ္တလင်းစုရွာကို စစ်ကောင်စီတပ်က စစ်ကြောင်းထိုးဝင်ရောက်ပြီး အမျိုးသား ၂ ဦးကို ဖမ်းဆီးသတ်ဖြတ်ခဲ့တယ်လို့ ဒေသခံတွေဆီက သိရပါတယ်။

အသတ်ခံရသူတွေဟာ နတ္တလင်းစုကျေးရွာနေ အသက် ၂၀ နဲ့ ၁၆ နှစ်ရှိ လူငယ်အမျိုးသား ၂ ဦးဖြစ်ပြီး သြဂုတ် ၂ ရက် ည ၇ နာရီကျော်မှာ ကျေးရွာပြင်ပကိုခေါ်ဆောင်ကာ သတ်ဖြတ်ခံခဲ့ရတာလို့ ဆိုပါတယ်။

” သေနတ်သံ သုံး၊ လေးချက် ကြားလိုက်ရတယ်။ သေနတ်သံကြားပြီး မကြာဘူး မီးရှို့တဲ့ မီးခိုးလုံးတွေ တက်လာတယ်။ ဘုန်းကြီးကျောင်းထဲကနေ ခေါ်ထုတ်ပြီး ရွာအပြင်မှာ သွားသတ်တာ။ သတ်တဲ့နားမှာရှိတဲ့ လှည်းတစီး၊ ဆိုင်ကယ်တစီးနဲ့အိမ်က ထရံတွေ၊ သက်ကယ်တွေရယ်ကို ဖျက်ဆီးပြီး လောင်စာအဖြစ်လုပ်တယ်။ အဲ့နားက ကားတစီးထဲက ဓာတ်ဆီတွေကို ထုတ်ပြီး အစဖျောက် မီးရှို့ခဲ့တာပါ” လို့ ဖြစ်စဥ်ကိုသိရှိထားတဲ့ ပေါက်ခေါင်းဒေသခံတဦးက မြေလတ်အသံကို ပြောပါတယ်။

နတ္တလင်းစုရွာကို အင်အား ၂၀၀ ခန့်ပါ စစ်ကောင်စီတပ်ဖွဲ့က ဇူလိုင် ၃၁ ရက်မှာ စတင် စစ်ကြောင်းထိုးဝင်ရောက်ခဲ့တာဖြစ်ပြီး ဩဂုတ် ၁ ရက် မနက်ပိုင်းမှာ ရွာခံ ၆၀ ကျော်ကို ကျေးရွာဘုန်းကြီးကျောင်းအတွင်း ဖမ်းဆီးခဲ့တယ်လို့ သိရပါတယ်။

” အဲ့ဖမ်းခံထားတဲ့သူတွေကို ကောင်လေး ၃ ယောက်က အခြေအနေသွားကြည့်ကြတာ။ ၃ ယောက်ထဲက ၂ ယောက်ကိုတော့ကင်းချထားတဲ့ စစ်သားတွေက ဖမ်းမိလိုက်တယ်။ ၁ ယောက်ကတော့ထွက်ပြေးလွတ်သွားတယ်။ ဖမ်းခံရတဲ့ ၂ ယောက်ကို သတ်ဖြတ်သွားတာ”လို့ အထက်ပါဒေသခံက ပြောပါတယ်။

ဒါ့အပြင် စစ်ကြောင်းဝင်ရောက်ခဲ့စဥ်က လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့လို့ နတ္တလင်းစုရွာခံ အသက် ၅၀ ကျော်အရွယ် ကိုမိုးဝင်းဆိုသူမှာလည်း လက်နက်ကြီးပစ်ခတ်သံတွေကြောင့် နှလုံးရပ်အမောဖောက်ကာ သေဆုံးခဲ့သေးတယ်လို့လည်း သိရပါတယ်။

အဲ့ဒီစစ်ကြောင်းဟာ သြဂုတ် ၄ ရက် ယမန်နေ့ နေ့လယ်ပိုင်းမှာ နတ္တလင်းစုရွာကနေ ထွက်ခွာပြီးကင်မွန်းခြုံရွာဘက်ကို ဆက်လက်စစ်ကြောင်းထိုးဝင်ရောက်နေကြောင်းသိရကာ စစ်ကြောင်းထွက်ခွာချိန်မှာ နတ္တလင်းစုကျေးရွာဘုန်းကြီးကျောင်းအတွင်း ဖမ်းဆီးထားတဲ့ဒေသခံတွေကို ပြန်လွှတ်ပေးခဲ့တယ်လို့ သိရပါတယ်။

အထက်ပါစစ်ကောင်စီစစ်ကြောင်းကြောင့် နတ္တလင်းစုရွာနဲ့အနီးတဝိုက်ရွာတွေဖြစ်တဲ့ ဒွရွာ၊ ယောင်းပြန်ရွာ၊ ကြို့ပင်ရွာနဲ့ ကင်မွန်းခြုံရွာက သက်ကြီးရွယ်အို၊ ကလေးငယ်နဲ့ အမျိုးသမီးတွေအပါအဝင် ဒေသခံ ၂,၀၀၀ ကျော်ဘေးလွတ်ရာ ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – ဟိန်းစံ

၁ ဦးပြန်ဖမ်းခံထားရပြီး စစ်ကောင်စီတပ်ကစစ်ဆေးမှုတင်းကျပ်ရှာဖွေနေ

မြေလတ်အသံ၊ သြဂုတ် ၄၊ ၂၀၂၅။

ပဲခူးတိုင်း၊ မင်းလှမြို့နယ်က ပေါ်တာဆွဲဖမ်းဆီးခံထားရတဲ့ အမျိုးသား ၁၉ ဦးထွက်ပြေးခဲ့တာကြောင့် စစ်ကောင်စီဘက်က မင်းလှမြို့ပေါ်နဲ့အနီးဝန်းကျင်ကိုစစ်ဆေးမှုတွလုပ်နေတယ်လို့ ဒေသခံတွေဆီက သိရပါတယ်။

သြဂုတ် ၂ ရက်ည ၈ နာရီကျော်မှာ မင်းလှမြို့၊ ထွေအုပ်ရုံး ထိန်းသိမ်းခန်းမှာ ဖမ်းဆီးခံထားရတဲ့ အမျိုးသား ၁၉ ဦးစလုံးထွက်ပြေးခဲ့ကြတာဖြစ်ပြီး အဲ့ဒီက ၁၈ ဦးသာလွတ်မြောက်ခဲ့ကာ ၁ ဦးကတော့ မြို့ပေါ်မှာပြန်အဖမ်းခံလိုက်ရတယ်လို့ ဆိုပါတယ်။

“မနေ့(သြဂုတ် ၂)က မြို့ထဲမှာပတ်ရှာနေတာ။ အစစ်အဆေးလည်းကြမ်းတယ်။ ပုံတွေနဲ့တိုက်စစ်နေတာ။ ၂ ရက်နေ့ညက ပြန်မိတာ ၁ ယောက်က။ ဘယ်နေရာမိလည်းတော့အတိအကျမသိရဘူး။ မြို့ထဲမှာပဲ မိတယ်လို့ ပြောတယ်”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးကပြောပါတယ်။

ထွေအုပ်ရုံးရှိ စစ်ကောင်စီတပ်ဖွဲ့ဝင်တွေ မင်းလှမြို့၊ အနောက်ခြမ်းရှိကျေးရွာတွေကို ပေါ်တာသွားဆွဲနေတုန်း အလစ်အငိုက်မှာထွက်ပြေးခဲ့ကြတာဖြစ်ပြီး သူတို့နဲ့ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံကအတည်မပြုနိုင်သေးပါဘူး။

သြဂုတ် ၃ ရက်နဲ့ ၄ ရက်ဒီကနေ့မနက်အချိန်ထိ မင်းလှမြို့ပေါ်မှာ စစ်ကောင်စီတပ်က လွတ်မြောက်သွားသူ ၁၈ ဦးရဲ့ဓာတ်ပုံတွေကိုကိုင်ဆောင်ပြီး စစ်ဆေးမှုတွေလုပ်နေသလို မြို့အနီးရှိကျေးရွာတွေကိုပါ စစ်ကြောင်းထိုးပြီး လိုက်လံရှာဖွေနေတယ်လို့ သိရပါတယ်။

ပြီးခဲ့တဲ့ဇူလိုင် ၈ ရက်နဲ့ ၁၂ ရက်ကလည်း မင်းလှမြို့နယ်၊ ညောင်ပင်သာနဲ့ ငလှစမ်းကျေးရွာတို့ကို စစ်ကြောင်းထိုးဝင်ရောက်ပြီး ရွာခံတွေဖြစ်ကြတဲ့ ကိုမိုးဒီ၊ ကိုညီညီမိုးခန့်၊ ကိုဖိုးကုလား၊ ကိုဝင်းထွဋ်နောင်၊ ကိုမင်းဇော်၊ ကိုစန်းမင်းအောင်တို့ကို ဖမ်းဆီးခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

တောင်ငူ၊ ဩဂုတ် ၁၊ ၂၀၂၅။

ပဲခူးတိုင်း၊ တောင်ငူမြို့၊ ၁၈ ရပ်ကွက်၊ မီးရထားဝန်းအတွင်းမှာ ပြတ်ကျတဲ့ဓါတ်ကြိုးက လည်ပင်းကိုထိပြီး အမျိုးသား ၁ ဦးသေဆုံးသွားတယ်လို့ ရပ်ကွက်နေသူတွေဆီက သိရပါတယ်။

သေဆုံးသူဟာ အသက် ၅၃ နှစ်အရွယ် ဦးကျော်သောင်းဆိုသူဖြစ်ပြီး ဩဂုတ် ၁ ရက်မနက် ၆ နာရီခန့်မှာ ဖြစ်ပွားခဲ့တာလို့ ဆိုပါတယ်။

“ဓာတ်လိုက်ပြီး သေတာ။ ကုက္ကိုင်ပင်က လဲသွားတာ ဓာတ်ကြိုးပေါ်လဲကျတယ်။ သူက လမ်းလျှောက်နေတာ။ ဓာတ်ကြိုးက လည်ပင်းကိုထိတာ။ မိုးရွာနေတဲ့ အချိန်မဟုတ်ဘူး။ ကုက္ကိုင်ပင်က အခြောက်ကြီး။ “လို့ ရပ်ကွက်နေသူတဦးက ပြောပါတယ်။

ဓာတ်ကြိုးပြတ်ကျချိန်မှာ မီးလာနေတဲ့အတွက် လျှပ်စီးဓါတ်ဝင်ပြီး ဦးကျောင်သောင်းရဲ့ လည်ပင်းနဲ့ ရင်ဘတ်တို့မှာ ဓါတ်လိုက်ကာမီးလောင်ကျွမ်းဒဏ်ရာရခဲ့တယ်လို့ သူကဆက်ပြောပါတယ်။

သေဆုံးသူရဲ့အလောင်းကိုတော့ ဒေသလူမှုကူညီရေးအသင်းက ကောက်ယူပြီး တောင်ငူ ပြည်သူ့ဆေးရုံကြီးဆီ ပို့ဆောင်ပေးခဲ့ရတယ်လို့ သိရပါတယ်။

ဇူလိုင် ၁၅ ရက်ကလည်း တောင်ငူမြို့၊ အမှတ် ၁၈ ရပ်ကွက်မှာ ငွေလှိုင်အပိုင်းရှိ သရက်ပင်တက်ခုတ်တဲ့ အမျိုးသား ၁ ဦး ပြုတ်ကျသေဆုံးခဲ့သေးတယ်လို့ သိရပါတယ်။

စာတည်း – လင်း