ပုလဲ

စစ်ကိုင်း၊ မေ ၁၃၊ ၂၀၂၃။

စစ်ကိုင်းတိုင်း၊ ပုလဲမြို့နယ်ပြည်သူ့အုပ်ချုပ်ရေးအဖွဲ့၊ တိုက်နယ် ပအဖနဲ့ ပကဖ အဖွဲ့ဝင်တွေဟာ မေလ ၁၂ ရက်မနေ့မနက် ၁၀ နာရီက မီးဘေးသင့်ပြည်သူတွေကို ထောက်ပံ့လှူဒါန်းသူတွေ ကိုယ်စား အလှူငွေအပြင် သစ်နဲ့ဝါးတွေပါပေးအပ်ခဲ့တယ်လို့ ပုလဲမြို့နယ်ပြည်သူ့ကာကွယ်ရေးအဖွဲ့မှ တာဝန်ရှိသူတဦးကပြောပါတယ်။

အလှူရှင်တဦးကလှူဒါန်းတဲ့ ငွေကျပ် ၁၄ သိန်း၊ ပုလဲမြို့နယ် ပအဖ၊ ပကဖတွေက ထောက်ပံ့တဲ့ သစ်နဲ့ဝါးတွေကို နှောကန်ရွာရပ်ကျေး ပအဖနဲ့ မီးဘေးသင့်ကော်မတီထံ အပ်နှံခဲ့ပြီး၊ NUG အစိုးရရဲ့ လူသားချင်းစာနာထောက်ထားခြင်းနှင့်ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနကထောက်ပံ့တဲ့ ငွေကျပ်သိန်း ၂၀ ကိုတော့ မီးဘေးသင့် မင်းတိုင်ပင်၊ နှောရိုး၊ ကိုင်းတွင်း၊ တုံးကန်၊ နွယ်အင်းရွာတွေအတွက် ပေးအပ်ခဲ့တယ်လို့ သူက ဆိုပါတယ်။

ပြီးခဲ့တဲ့ ဧပြီလ ၂၄ ရက်ကလည်း နှောကန်ကျေးရွာက မီးဘေးသင့်ပြည်သူတွေကို အလှူရှင်တွေကိုယ်စား ပုလဲမြို့နယ်ပြည်သူ့အုပ်ချုပ်ရေးအဖွဲ့က ငွေကျပ် ၂၇ သိန်းနဲ့ စားနပ်ရိက္ခာတွေကို သွားရောက်လှူဒါန်ခဲ့ပါသေးတယ်။

စာတည်း-လင်းဇေ

စစ်ကိုင်း၊ မေ ၅၊ ၂၀၂၃။

စစ်ကိုင်းတိုင်း၊ မုံရွာခရိုင်၊ ပုလဲမြို့နယ်က မီးဘေးသင့်ပြည်သူတွေကို ပြည်ပရောက်မြန်မာတွေက မီးဖိုချောင်းသုံးပစ္စည်းနဲ့ရိက္ခာတွေ မေလ ၄ ရက်မှာ ထောက်ပံလှူဒါန်းခဲ့တယ်လို့ သိရပါတယ်။

ပုလဲနယ်မှာ ဧပြီလဒုတိယပတ်အတွင်း စစ်ကောင်စီတပ်ဖွဲ့တွေ မီးရှို့ခဲ့လို့ မီးဘေးသင့်ခဲ့တဲ့ရွာအတွက် မရှိမဖြစ်လိုအပ်တဲ့ မီးဖိုချောင်သုံးပစ္စည်းတွေဝယ်ယူလှူဒါန်းရတာလို့ အညာပစ်တိုင်းထောင်လေးများအဖွဲ့က ပြောပါတယ်။

မီးဘေးသင့်ပြည်သူတွေပြန်လည်ထူထောင်ရေးအတွက် ပြည်ပရောက်မြန်မာတွေအနေနဲ့ သင်္ကြန်ကာလတုန်းက လမ်းလျှောက်သင်္ကြန်ရံပုံငွေဖျော်ဖြေပွဲမှာ ရရှိတဲ့အလှူငွေတွေကို အညာပစ်တိုင်းထောင်အဖွဲ့ဆီ ပေးပို့လှူဒါန်းခဲ့ပါတယ်။

“ကျနော်တို့အိမ်ကို မီးရှို့ခံရရင် ဘာတွလိုအပ်မလဲဆိုတာ စဥ်းစားမိလို့ ဒီပစ္စည်းတွေလှူဖြစ်တာဗျ။ မီးရှို့ခံရလို့ နေစရာမရှိတာက ဖြစ်သလိုနေလို့ရတယ်။ လူတွေက အသက်ရှင်ဖို့ နေ့တိုင်းစားနေရတာဗျ။ စားဖို့အတွက် ချက်ပြုတ်ရမဲ့အိုးခွက်တွေကအစ လိုအပ်နေတာကြောင့် လှူဖြစ်တာ”လို့ အညာပစ်တိုင်းထောင်လေးများအဖွဲ့မှာ ပါဝင်လုပ်ကိုင်နေသူ မဖူးပွင့်ဝေ ကပြောပါတယ်။

အခုလှူဒါန်းတဲ့ပစ္စည်းတွေက ဒန်အိုး၊ ဒယ်အိုး၊ ဇလုံ၊ ဇွန်းအကြီး၊ ဇွန်းအသေး၊ သောက်ရေခွက်၊ ငါးသေတ္တာ၊ ဆီနဲ့ အဝတ်အထည်အပါ ပစ္စည်း ၉ မျိုးကို အိမ်ထောင်စု ၁၀၄ အိမ်ထောင်အတွက် တန်ဖိုး ၂၅ သိန်းကျော်လှူဒါန်းခဲ့ပြီး၊ အတော်ကျပ်တည်းခက်ခဲနေတဲ့ မိသားစု ၇ စုကိုလည်း သီးခြားအနေနဲ့တတ်နိုင်တဲ့ဘက်က ကူညီထောက်ပံ့ခဲ့တယ်လို့ သိရပါတယ်။

အညာပစ်တိုင်းထောင်လေးများအဖွဲ့အနေနဲ့ တခြားသောအဖွဲ့အစည်းတွေရဲ့လက်အောက်ခံအဖွဲ့မဟုတ်ဘဲ အညာဒေသမှာရှိတဲ့လူငယ်တွေက စုပေါင်းတည်ထောင်ထားတဲ့ လွတ်လပ်တဲ့အဖွဲ့တခုဖြစ်ပြီး ပြည်တွင်းပြည်ပအလှူရှင်တွေရဲ့ ဆန္ဒကိုလုပ်ကိုင်ပေးနေသလို အဖွဲ့အနေနဲ့လည်းတတ်နိုင်သလောက် ကူညီထောက်ပံ့နေတယ်လို့ မဖူးပွင့်ဝေက ဆိုပါတယ်။

စာတည်း-လင်းဇေ

ပုလဲ၊ ဧပြီ ၂၄၊ ၂၀၂၃။

စစ်ကိုင်တိုင်း၊ ပုလဲမြို့နယ်က စစ်ကောင်စီတပ်တွေ မီးရှို့သွားတဲ့ နှောကန်ကျေးရွာကို ဧပြီလ ၂၄ ရက် ဒီကနေ့မနက်ပိုင်းမှာ ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်တွေက ငွေကျပ် ၂၇ သိန်းနဲ့ စားနပ်ရိက္ခာတွေ လှူဒါန်းထောက်ပံ့ပေးခဲ့တယ်လို့ သိရပါတယ်။

ပုလဲမြို့နယ်၊ နှောကန်ကျေးရွာက မီးဘေးသင့်နေတဲ့ အိမ်ထောင်စု ၁၀၄ စုအတွက် သံဃသမဂ္ဂအဖွဲ့ နဲ့ တခြားအလှူရှင်အချို့တို့ ပူးပေါင်းပြီး လှူဒါန်းခဲ့တာလို့ ပုလဲမြို့နယ် ပြည့်သူ့အုပ်ချုပ်ရေးအဖွဲ့ခေါင်းဆောင် ကိုဇော်ထက်က ပြောပါတယ်။

“စစ်ကောင်စီက နှောကန်ကျေးရွာကို ၄ လ ပိုင်း ၂ ရက်နေ့က မီးရှို့သွားတာကို သွားလှူဒါန်းတာ ၊မီးရှို့ခံရတာက ၁၀၄ အိမ်ပေါ့၊ ရွာမှာရှိတာက စုစုပေါင်း အိမ်ထောင်စု ၁၃၆ စုရှိတာ၊ ရွာလုံးကျွတ်လို့‌ ပြောလို့ရတာပေါ့။ သံဃသမဂ္ဂအဖွဲ့ နဲ့ တခြားအလှူရှင်အချို့တို့လှူဒါန်းတဲ့ ငွေ ၂၇ သိန်းကို မြို့နယ်အုပ်ချုပ်ရေးကျနော်တို့အဖွဲ့က ကြားကနေ သွားလှူပေးရတာ၊ စားနပ်ရိက္ခာကတော့ ဆန်တို့ ဆီတို့လည်း ပါတယ်” လို့ ပြောပါတယ်။

လက်ရှိအချိန်ထိ ပုလဲမြို့နယ်အတွင်းမှာ မီးရှို့ခံရတဲ့ ရွာပေါင်း ၃၀ ကျော်ရှိပြီး အိမ်ထောင်စု ၂၃၀၀ ကျော်ရှိကာ ဒေသခံတွေအနေနဲ့ နီးစပ်ရာတောတွေ၊ ကျေးရွာစာသင်ကျောင်းတွေနဲ့ ဘုန်းကြီးကျောင်းတွေမှာ ဖြစ်သလို စုပေါင်းပြီး နေထိုင်ရတယ်လို့ ဆိုပါတယ်။

စာတည်း – လင်း

ပုလဲ၊ ဧပြီ ၈၊ ၂၀၂၃။

စစ်ကိုင်းတိုင်း၊ ပုလဲမြို့နယ်ထဲက ချောင်းနားတောတိုက်က စစ်ရှောင်စခန်းနဲ့ နောကန်ရွာကို စစ်ကောင်စီတပ်ဖွဲ့တွေက ဧပြီလ ပထမပတ်အတွင်းမှာ မီးရှို့ခဲ့တာကြောင့် လူနေအိမ်ခြေ ၁၀၀ ကျော် မီးလောင်ပြီး အသက်ကြီး အမျိုးသမီးတစ်ဦး မီးလောင်သေဆုံးခဲ့ပါတယ်။

မှော်ဘီမြို့နယ်၊ ဖူးကြီးအခြေစိုက် ခမရ ၇၀၄ က စစ်သားတွေဟာ ပုလဲမြို့နယ်၊ ကန်ဒေါင့်ရွာမှာ တပ်စွဲထားပြီး ဧပြီလ ၂ ရက်မှာ ပုလဲမြို့နယ်၊ နှောကန်ကျေးရွာက အိမ်ခြေ ၁၁၄ လုံးကို မီးရှို့ခဲ့သလို ဧပြီလ ၆ ရက်မှာလည်း ပုလဲမြို့နယ်ထဲက ချောင်းနားတောတိုက်မှာရှိတဲ့ စစ်ရှောင်တဲ ၅ လုံးကိုလည်း မီးရှို့ခဲ့တယ်လို့ ပုလဲမြို့နယ် (ပကဖ) မှ သတင်းနဲ့ထောက်လှမ်းရေးတပ်တာဝန်ခံ ကိုလွင်ကြီးက ဆိုပါတယ်။

နှောကန်ကျေးရွာကို စစ်ကောင်စီတပ်ဖွဲ့တွေ ဝင်ရောက်မီးရှို့တဲ့အချိန် လေဖြတ်လို့ ထွက်မပြေးနိုင်ဘဲ အိမ်ထဲမှာကျန်ခဲ့တဲ့ အသက် ၆၀ အရွယ်အမျိုးသမီးတဦးကတော့ မီးလောင်သေဆုံးခဲ့ပါတယ်။

မီးရှို့ခံလိုက်ရတဲ့ နှောကန်ကျေးရွာမှာ ဒေသခံ ၅၇၆ ဦး အိုးအိမ်မဲ့ဖြစ်ပြီး၊ လျှပ်စစ်မီတာဘောက် ၅၂ လုံး ဆုံးရှုံးကာ၊ ဓာတ်မီးတိုင် ၃ တိုင်လည်း ပျက်စီးခဲ့တယ်လို့ ပုလဲမြို့နယ်ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။

“စစ်ကြောင်းမှာ စစ်ယူနီဖောင်းဝတ် အမျိုးသမီးစစ်သည် ၂ ဦးလောက်ပါလာတာ သေချာမြင်လိုက်ရတယ်။ နှောကန်ရွာကို မီးရှို့တာလည်း သူတို့စစ်ကြောင်းပဲ။ ချောင်းနားတောတိုက်ထဲက စစ်ရှောင်တဲကိုလည်း သူတို့ပဲ မီးရှို့ရင်း ရမ်းသမ်းပစ်လို့ အမျိုးသမီး ၃ ဦးဒဏ်ရာရခဲ့သေးတယ်” လို့ ကိုလွင်ကြီးက ဆက်ပြောပါတယ်။

ချောင်းနားတောတိုက်ထဲက စစ်ရှောင်တဲ ၅ လုံးကို မီးဝင်ရှို့ခဲ့တဲ့အချိန်မှာလည်း စစ်ကောင်စီတပ်ဖွဲ့တွေ ရမ်းသမ်းပစ်ခတ်တာကြောင့် အသက် ၄၀ အရွယ် အမျိုးသမီးတဦး၊ အသက် ၂၀ အရွယ် အမျိုးသားတဦးနဲ့ အသက် ၈ နှစ်အရွယ် ကလေးငယ်တဦး ကျည်ထိမှန်ကာ ဒဏ်ရာရခဲ့တယ်လို့ သူကဆက်ပြောပါတယ်။

လက်ရှိမှာ မီးရှို့ခံလိုက်ရတဲ့ နှောကန်ကျေးရွာနဲ့ ချောင်းနားတောတိုက်မှ စစ်ကောင်စီတပ်တွေ ပြန်လည် ထွက်ခွာသွားပြီးဖြစ်တာကြောင့် ဒေသခံတွေအနေနဲ့ ကျေးရွာထဲသို့ ပြန်လာကြပြီး မီးလောင်ခံထားရတာတွေကို ရှင်းလင်းရေးတွေ လုပ်နေကြရတယ်လို့ သိရပါတယ်။

ပုလဲ၊ ဧပြီ ၇၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ ပန်းရွာကျေးရွာအနီးက M7 PDF စခန်း လေကြောင်းနဲ့ ပစ်ခတ်စီးနင်းခံရချိန် ပျောက်ဆုံးခဲ့တဲ့ ရဲဘော် ၇ ဦးကို ရုပ်အလောင်းတွေ မီးရှို့ခံထားရတဲ့ ပြာပုံအနေအထားနဲ့ ပြန်တွေ့ခဲ့ရတယ်လို့ သိရပါတယ်။

ဧပြီလ ၆ ရက် မနေ့ ညနေ ၅ နာရီဝန်းကျင်မှာ စခန်းအနီးကလျှိုအတွင်း ရဲဘော်တွေရဲ့ရုပ်အလောင်းတချို့ကို ဆိုင်ကယ်တွေနဲ့အတူ မီးပုံရှို့ထားခဲ့တာကို စတင်တွေ့ရှိခဲ့တာဖြစ်ပြီး ဒီကနေ့ နေ့လည်ပိုင်းအထိ ဆက်လက်ရှာဖွေခဲ့ပေမယ့် မတွေ့ရှိတဲ့အတွက် ၇ ဦးစလုံး ကျဆုံးသွားပြီလို့ပဲ သတ်မှတ်လိုက်တာလို့ M 7 People’s Defense Army အဖွဲ့တာဝန်ခံက မြေလတ်အသံကို ပြောပါတယ်။

“ပြာပုံမှာက လူအယောက်ရယ် မသိရဘူး။ အရိုးကို ပြာကျအောင် ရှို့ထားတာဆိုတော့ ခန့်မှန်း ၄၊ ၅ ယောက် လောက်ပေါ့။ ၂ယောက်လောက်ကတော့ လွတ်နိုင်တဲ့အနေထား ရှိသေးတယ်ဆိုပြီး စခန်းနဲ့ တော်တော်ဝေးတဲ့ နေရာတွေအထိ လိုက်ရှာပြီးပြီ။ မတွေ့တော့လို့ ၇ ယောက်လုံး အသက်ပေးလိုက်ရပြီလို့ သတ်မှတ်လိုက်ပါပြီ” လို့ ပြောပါတယ်။

ဧပြီလ ၅ ရက်နေ့ မနက်ပိုင်းက စစ်ကောင်စီတပ် လေယာဉ်နဲ့စီးနင်းပစ်ခတ်ချိန် ရဲဘော် ၂ ဦးဟာ ကျည်ထိမှန် သေဆုံးခဲ့တာဖြစ်ပြီး ကျန် ရဲဘော် ၅ ဦးက ဖမ်းဆီးရိုက်နှက်ပြီးမှ သတ်ဖြတ်ကာ မီးရှို့ထားခဲ့တာလို့ သူကဆက်ပြောပါတယ်။

သေဆုံးသွားတဲ့ရဲဘော်တွေဟာ အသက် ၂၀ ဝန်းကျင် ရဲဘော် ၃ ဦး နဲ့ ၂၅ နှစ်ဝန်းကျင် ရဲဘော် ၄ ဦး ဖြစ်ပြီး၊ သက်ဆိုင်တဲ့မိသားစုတွေကိုလည်း လက်လှမ်းမီသလောက်အကြောင်းကြားထားပြီးဖြစ်ကာ သေဆုံးသွားသူတွေအတွက် အမိန့်ပြန်တမ်းဖတ်ပြီး သက်ပျောက်ဆွမ်းကပ်သဂြိုလ်ခဲ့တယ်လို့ ဆိုပါတယ်။

စခန်းစီးနင်းခံရမှုအတွင်း ရဲဘော် ၇ ဦးသေဆုံးခဲ့တဲ့အပြင် M4 ၁ လက်၊ AK ၁ လက်၊ ၉ မမ ပစ္စတို ၁ လက်၊ လက်လုပ်သေနတ် ၆ လက်၊ ၆၀ မမစိန်ပြောင်း ၁ လက်နဲ့ ဗုံးသီးတွေ၊ မီးစက်၊ ဆိုင်ကယ် ၄ စီးနဲ့ ရဲဘော်တွေ ကိုင်ဆောင်တဲ့ဖုန်းတွေ ဆုံးရှုံးသွားခဲ့တယ်လို့ သိရပါတယ်။

အခုလို စခန်းနေရာအတိကျကို လေကြောင်းကနေ စီးနင်းခံရတာဟာ စခန်းကိုရောက်ဖူးတဲ့ သတင်းပေးဒလန်တဦးကြောင့် ဖြစ်နိုင်တယ်လို့ သုံးသပ်ထားပြီး ဘယ်သူဘယ်ဝါဖြစ်တယ်ဆိုတာကိုတော့ စုံစမ်းနေဆဲဖြစ်တယ်လို့ သိရပါတယ်။

စာတည်း – ရင်ငြိမ်း

ယင်းမာပင်၊ ဧပြီ ၇၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်း ကျေးရွာတရွာက မိုင်းမတော်တဆမှုကြောင့် ခြေထောက် ၂ ဖက်လုံးပြတ်သွားတဲ့ အသက် ၁၁ နှစ်အရွယ် မောင်ရှင်းသန့်မောင်ကို ဧပြီလ ၆ ရက်နေ့က ငွေကျပ် ၂၅၀၀၀၀ သွားရောက်လှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့ဆီက သိရပါတယ်။

မောင်ရှင်းသန့်မောင်ဟာ နွားကျောင်းသွားရင်း မိုင်းနင်းမိတာ‌ကြောင့် ဒူးခေါင်းအောက်ကနေခြေထောက် ၂ ဖက်လုံး ပြတ်သွားခဲ့တာဖြစ်ပြီး ကူညီသူနည်းပါးနေတာကြောင့် သွားရောက်ကူညီခဲ့တာလို့ အဖွဲ့တာဝန်ရှိသူက မြေလတ်အသံကို ပြောပါတယ်။

“ဒေသခံတွေက ဆက်သွယ်လာတာရယ်၊ ကလေးကိုလှူမဲ့သူတွေမရှိတာတွေရယ်ကြောင့် သွားလှူခဲ့တာပါ။ အခုလိုမိုင်းနင်းမိလို့ ဒဏ်ရာရသူတွေကို လှူဒါန်းတာ ၂ ကြိမ်ရှိပါပြီ။ ပထမက မိုင်းနင်းမိလို့ အရေပြားပျက်သွားတဲ့ ရဲဘော်ပါ။ အခုက မောင်ရှင်းသန့်မောင်ပါ။ နောက်ထပ်လည်း အဆင်ပြေရင် ပြေသလို လှူဒါန်းဖို့ရှိပါတယ်” လို့ ဆိုပါတယ်။

မောင်ရှင်းသန့်မောင်ရဲ့ ရေရှည်ကျန်းမာရေးအတွက် ဆေးဝါးစရိတ်တွေ လိုအပ်နေသလို Wheel Chair တစီးလည်း အရေးပေါ်လိုအပ်နေတယ်လို့ အညာပစ်တိုင်းထောင်လေးများအဖွဲ့က ထုတ်ပြန်ရေးသားထားပါတယ်။

ဧပြီလ ၄ ရက်နေ့ကလည်း အညာပစ်တိုင်းထောင်လေးများအဖွဲ့ဟာ ဆားလင်းကြီးမြို့နယ်အတွင်း မီးရှို့ခံရတဲ့ကျေးရွာက အိမ်ထောင်စု ၁၂၈ စုက လူဦးရေ ၆၀၀ အတွက် ခေါက်ဆွဲကြော်ကို သွားရောက်လှူဒါန်းခဲ့ပါသေးတယ်။

စာတည်း – ရင်ငြိမ်း

ပုလဲ၊ ဧပြီ ၄၊ ၂၀၂၃။

စစ်ကိုင်းတိုင်း၊ ပုလဲမြို့နယ်မှာ စစ်ကောင်စီနဲ့ပျူတပ်သားတွေက စစ်ကြောင်းထိုးကာ ကျေးရွာတွေကို မီးရှို့ဖျက်ဆီးနေတာကြောင့် ဒေသခံပြည်သူ ၁ သောင်းကျော် ဘေးလွတ်ရာကိုထွက်ပြေးတိမ်းရှောင်နေကြရတယ်လို့ သိရပါတယ်။

အင်အား ၁၀၀ ကျော်ရှိတဲ့ အဲ့ဒီစစ်ကြောင်းဟာ ဧပြီလ ၂ ရက်နေ့မှာ နှောကန်ကျေးရွာကို မီးရှို့ဖျက်ဆီးခဲ့တာကြောင့် လူနေအိမ် ၁၂၀ လုံး ပြာကျပျက်စီးခဲ့တဲ့အပြင် နေအိမ်ထဲပိတ်မိကျန်ခဲ့တဲ့ အသက် ၇၈ နှစ်အရွယ် အဘွားတဦးလည်းမီးလောင်သေဆုံးခဲ့တယ်လို့ ပုလဲမြို့နယ်ပြည်သူ့အုပ်ချုပ်ရေးအဖွဲ့ရဲ့ ပြောရေးဆိုခွင့်ရှိသူက မြေလတ်အသံကို ပြောပါတယ်။

“မီးလောင်သေဆုံးတဲ့အဘွားက ဒုက္ခိတ လို့သိရတယ်။ ပြီးတော့ အဘိုးတယောက်လည်း မီးလောင်ဒဏ်ရာရခဲ့တယ်။ နှောကန်ရွာက တောင်သူလယ်သမားရွာဗျ။ ထွန်စက်တွေ၊ လယ်ယာသုံးပစ္စည်းတွေက အကုန်လုံးပြာတွေပဲ တွေ့ခဲ့ရတယ်။ စကစတွေက ရွာမီးမရှို့ခင် ရွာကလူတွေကို ထွက်မပြေးရင် လူတွေကိုပါ မီးရှို့လိုက်မယ်ပါပြောတာ” လို့ ပြောပါတယ်။

အခုလို နှောကန်ကျေးရွာ မီးရှို့ခံရတာကြောင့် အနီးအနားကရွာတွေဖြစ်ကြတဲ့ ငှက်ပျောတော၊ အင်းကန်၊ ကျေးနင်း၊ဆင်ရှင်၊ ကျောက်ဖျာကန်၊ မင်းတိုင်ပင်၊ သပြေကန် အပါအဝင် ကျေးရွာ ၁၀ ရွာက ဒေသခံ ၁၅၀၀၀ ခန့်ဟာ ဧပြီလ ၄ ရက် ဒီကနေ့အထိ အချိန်ထိ ထွက်ပြေးတိမ်းရှောင်နေကြရဆဲ ဖြစ်တယ်လို့ ဆိုပါတယ်။

“စကစတွေက မင်းတိုင်ပင်ရွာမှာ စခန်းချထားတယ်။ အဲဒီနေရာကပဲ အနီးတဝိုက်က ရွာတွေကို စစ်ကြောင်းဝင်ထိုးနေတာ။ ဒေသခံတွေကတော့ တော်တော်လည်း အကူအညီတွေ လိုအပ်နေပါတယ်။ ရွာကပြေးလာရတာက အဝတ်တထည်တည်းနဲ့ပြေးလာရတာလေ” လို့ သူကဆက်ပြောပါတယ်။

စစ်ကောင်စီတပ်က ကျေးရွာတွေကို ဝင်ရောက်မီးရှို့နေတာဟာ ဧပြီလ ၂ ရက်နေ့မှာ ဖြစ်ပွားခဲ့တဲ့ နှောကန်ကျေးရွာအနီးတိုက်ပွဲမှာ စစ်ကောင်စီတပ်ဘက်က အကျအရှုံးများခဲ့ပြီးတဲ့နောက် အခုလိုမီးတင်ရှို့နေတာလို့ ဆိုပါတယ်။

ဧပြီလ ၂ ရက်နေ့က မင်းတိုင်ပင်ရွာနဲ့ နှောကန်ရွာအကြားမှာ PDF တွေကို ဆိုင်ကယ်စီးပြီး သေနတ်နဲ့လိုက်ပစ်တဲ့ စစ်ကောင်စီတပ် ဗိုလ်ကြီးနဲ့တပ်သား ပစ်ခတ်ခံရလို့ သေဆုံးခဲ့ပြီး သေနတ် ၂ လက်လည်း PDF တွေဘက်က ရရှိခဲ့တဲ့အပြင် စစ်ကောင်စီစစ်ကြောင်း မိုင်းဆွဲတိုက်ခိုက်ခံရမှုတွေမှာလည်း ထိခိုက်သေဆုံးမှုတွေ များပြားနေတယ်လို့ သိရပါတယ်။

ပုံစာ – မီးရှို့ခံရတဲ့ နေအိမ်တွေနဲ့ စစ်ရှောင်ဒေသခံများ။

စာတည်း – ရင်ငြိမ်း