◼ တပတ်အတွင်း နတ်မောက်က ကျောင်းဆရာမ ၂ ဦးအသတ်ခံထားရ

နတ်မောက်၊ ဇွန် ၈၊ ၂၀၂၅။

မကွေးတိုင်း၊ နတ်မောက်မြို့နယ်၊ ကူနီကျေးရွာအခြေခံပညာမူလတန်းလွန်ကျောင်း ကျောင်းအုပ်ဆရာမ သေနတ်နဲ့ပစ်သတ်ခံခဲ့ရတယ်လို့ နတ်မောက်ဂဠုန် PDF အဖွဲ့တာဝန်ခံထံက သိရပါတယ်။

အသတ်ခံရသူမှာ စစ်ကောင်စီလက်အောက်ကူနီရွာမူလွန်ကျောင်းအုပ်ဆရာမ အသက် ၄၆ နှစ်အရွယ်ရှိ ဒေါ်ရီရီထွေး ဖြစ်ပြီး မူလွန်ကျောင်းဝန်းအတွင်းရှိနေစဉ် ဇွန် ၆ ရက် ညနေ ၅ နာရီခန့်မှာ သေနတ်သမားတွေက ကျောင်းဝန်းအတွင်းအထိ ဝင်ရောက်ပစ်ခတ်သွားတာလို့ ဆိုပါတယ်။

” ကျောင်းအုပ်ဆရာမကြီးက စကစနဲ့ပေါင်းပြီး ဒလန်သူလျှိုလုပ်တယ်လို့တော့ကြားထားတယ်။ ပညာရေးက အကြီးပိုင်းကျောင်းအုပ်တွေကို လုပ်ပိုင်ခွင့်တွေပေးထားတယ် ကြားတယ်။ သူကဆို စကစခိုင်းတာ လိုလိုလားလားလုပ်ပေးနေသူဖြစ်တယ်။ သူ့ကိုတော့ ကျောင်းထဲမှာပဲရှင်းခံရတယ်လို့ ကြားသိထားရတယ်” လို့ နတ်မောက်ဂဠုန် PDF အဖွဲ့တာဝန်ခံ ဗိုလ်အောင်ဒင်က မြေလတ်အသံကို ပြောပါတယ်။

အဆိုပါ ကျောင်းအုပ်ဆရာမကို ဘယ်လက်နက်ကိုင်အဖွဲ့က ဘာကြောင့်သတ်ဖြတ်ခဲ့တယ်ဆိုတာကိုတော့ သူ့အနေနဲ့ မသိရသေးဘူးလို့ ၎င်းကဆက်ပြောပါတယ်။

သေနတ်နဲ့အနီးကပ်ပစ်ခံရတာကြောင့် ကျောင်းအုပ်ဆရာမ ဒေါ်ရီရီထွေးမှာ ဦးခေါင်းကျည်ထိဒဏ်ရာနဲ့ နေရာမှာပဲသေဆုံးသွားတယ်လို့ သိရပါတယ်။

အဆိုပါ ပစ်ခတ်မှုနဲ့ပတ်သက်ပြီး ဒေသတွင်းအဖွဲ့အစည်းတွေဘက်က ဇွန် ၈ ရက် ဒီကနေ့အထိ တစုံတရာသတင်းထုတ်ပြန်တာမျိုး မတွေ့ရသေးပါဘူး။

စစ်ကောင်စီထောက်ခံတဲ့တယ်လီဂရမ်တွေမှာတော့ ကျောင်းအုပ်ဆရာမကြီးဟာ ကျောင်းဝန်းအတွင်းရှိနေချိန် PDF တွေက ဆိုင်ကယ် ၃ စီးနဲ့ရောက်လာပြီး CDM မပြုလုပ်လို့ဆိုကာ သေနတ်နဲ့ပစ်၊ ဓားနဲ့ခုတ်သတ်ခဲ့လို့ နေရာမှာပင်သေဆုံးသွားတယ်လို့ စွပ်စွဲရေးသားဖော်ပြထားကြပါတယ်။

ပြီးခဲ့တဲ့ ဇွန် ၁ ရက်ကလည်း နတ်မောက်မြို့နယ်၊ ဝက်ချုပ်ကျေးရွာအထက်တန်းကျောင်း(ခွဲ)က စစ်ကောင်စီလက်အောက် အလယ်တန်းပြကျောင်းဆရာမနဲ့ ၎င်း ရဲ့ခင်ပွန်းဖြစ်သူအမျိုးသားတို့ သေနတ်နဲ့ပစ်ခတ်ခံခဲ့ရပြီး သေဆုံးခဲ့လို့ ဇွန်လပထမအပတ်အတွင်းမှာ နတ်မောက်က စစ်ကောင်စီပညာရေးဝန်ထမ်း ၂ ဦး အ သတ်ခံခဲ့ရတာပါ။

ဝက်ချုပ်ရွာက အလယ်တန်းပြကျောင်းဆရာမနဲ့ခင်ပွန်းဖြစ်သူကိုတော့ ဇွန်လ ၁ ရက်မှာ ၎င်းတို့နေအိမ်မှာရှိနေချိန် သေနတ်သမားတွေက လာရောက်ဖမ်းဆီးသွားပြီးနောက် နတ်မောက်-ရေနံချောင်းကားလမ်းဘေးမှာ သေနတ်ပစ်သတ်ခဲ့လို့ ၂ ဦးစလုံးသေဆုံးသွားသေးတယ်လို့ သိရပါတယ်။

စာတည်း – ဟိန်းစံ

နတ်မောက်၊ ဧပြီ ၁၀၊ ၂၀၂၅။

မကွေးတိုင်း၊ နတ်မောက်မြို့အနီးက စစ်ကောင်စီဂိတ်ကို ဧပြီ ၁၀ ရက်မနက်ပိုင်းမှာ တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ၈ ဦးဒဏ်ရာရခဲ့တယ်လို့ နဂါးနီပြောက်ကျားတပ်ဖွဲ့-မြင်းခြံဆီက သိရပါတယ်။

နတ်မောက်မြို့တောင်ဘက်အထွက်က အင်အား ၁၀ ဦးဝန်းကျင်ရှိတဲ့ စစ်ကောင်စီဂိတ်ကို မနက် ၃ နာရီ ၁၅ မိနစ်လောက်မှာတော်လှန်ရေးတပ်ဖွဲ့ဝင်တွေတိုက်ခိုက်ခဲ့ကြတာလို့ ဆိုပါတယ်။

“ကျနော်တို့ မီတာ ၅၀ ဝန်းကျင်လောက်အထိသွားကပ်ပြီးတော့ တိုက်ခိုက်ခဲ့တာ၊ နယ်မြေခံပြည်သူတွေက လှမ်းပြီးသတင်းပို့တာကတော့ ၅ ဦးသေပြီး ၈ ဦးလောက်ဒဏ်ရာရတယ်၊ ကျနော်တို့ မြို့အခြေထိသွားပြီး တိုက်ခိုက်ခဲ့တာ”လို့ People’s Defense Organization – Natmauk တာဝန်ခံ အဆိပ်သီးက ပြောပါတယ်။

အဲ့ဒီဂိတ်ဟာ စစ်အာဏာသိမ်းပြီးနောက် ဖွင့်ထားတဲ့ဂိတ်ဖြစ်ပြီး စစ်သား၊ ရဲနဲ့ ပျူစောထီးတွေပေါင်းကာ အလှည့်ကျဂိတ်ကြေးကောက်နေကြတာလို့ ဆိုပါတယ်။

ဒီတိုက်ခိုက်မှုအတွက် ထိခိုက်သေဆုံးမှုအခြေအနေတွေကိုတော့ မြေလတ်အသံကသီးခြားအတည် မပြုနိုင်သေးပါဘူး။

ဒီတိုက်ခိုက်မှုကိုတော့ People’s Defense Organization – Natmauk၊ နတ်မောက် ပကဖနဲ့ မဟာမိတ်တပ်ပေါင်းစုတို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ မတ် ၂၉ ရက်ကလည်း နတ်မောက်မြို့နယ်၊ ရွာတော်ကျေးရွာက ထွက်လာသော စစ်ကောင်စီကား ၁ စီးကို People’s Defense Organization – Natmauk က မိုင်းဆွဲတိုက်ခိုက်ခဲ့ပါသေးတယ်။

သတင်း – ဒိန်းဂျား၊ စာတည်း – လင်း

ပဲခူး၊ ဇူလိုင် ၁၁၊ ၂၀၂၄။

မိုးခေါင်နေတာကြောင့် မကွေးတိုင်း၊ နတ်မောက်မြို့နယ်ထဲက ကျေးရွာတွေမှာ မိုးနှမ်းစိုက်ခင်းတွေ ပျက်စီးမှုတွေနဲ့ ရင်ဆိုင်နေရတယ်လို့ ဒေသခံတွေထံက သိရပါတယ်။

နတ်မောက်မြို့နယ်အတွင်းရှိ ညောင်ကျပ်ပင်၊ တမလန်းပင်၊ ပိတောက်ငုတ်၊ ကြာကန်၊ ကြူချောင်း စတဲ့ကျေးရွာတွေမှာ မိုးခေါင်နေတာကြောင့် မိုးနှမ်းစိုက်ခင်းတွေ ပျက်စီးနေတယ်လို့ နှမ်းစိုက်တောင်သူတွေက ပြောပါတယ်။

“မကွေးအရှေ့ဘက်ခြမ်းက အကုန်နီးပါးပဲ။ ခန့်မှန်ဧက သောင်းကျော်မယ်။ ပထမပိုင်းတော့ မိုးကရွာတယ်လေ။ နှမ်းတွေ အပွင့်ကပ်၊ အပင်လုပ်မဲ့အချိန်ရောက်မှ မိုးက ပြတ်တာ၊ လေမိုးခေါင်တာပေါ့။ အခုတော့ နှမ်းစိုက်တောင်သူတွေ အကုန်အခက်အခဲတွေ့ကုန်ပြီပေါ့။” လို့ နတ်မောက်ဒေသခံ နှမ်းစိုက်တောင်သူတဦးက ပြောပါတယ်။

မိုးရေမရတာကြောင့် နှမ်းပင်တွေဟာ ရေငတ်ပြီး တဖြည်းဖြည်းသေကုန်တယ်လို့ ဆိုပါတယ်။ ငွေကြေးတတ်နိုင်သူတွေကတော့ လုပ်သားငှားပြီး ဆေးဖြန်းပုံးတွေနဲ့ ရေဖြန်းတာတွေ လုပ်ဆောင်ကြတယ်ဆိုပါတယ်။

နှမ်းတဧကစိုက်ပျိုးစရိတ်ဟာ မြေဩဇာ၊ လုပ်သားခအပါအဝင် ကျပ် ၆ သိန်းမှ ၇ သိန်းအထက်မှာရှိတယ်လို့ နှမ်းစိုက်တောင်သူတဦးက ပြောပါတယ်။

နတ်မောက်မြို့နယ်ထဲက တောင်သူအများစုဟာ နှမ်း၊ မြေပဲကို အဓိက စိုက်ပျိုးပြီ သီးညှပ်အဖြစ် ပဲစဉ်းငုံကိုလည်း စိုက်ပျိုးလုပ်ကိုင်လေ့ရှိကြပါတယ်။

နှမ်းတွေကို အခုလိုမိုးရာသီနဲ့ ဆောင်းကာလတွေမှာ မကွေး၊ စစ်ကိုင်း၊ ပဲခူးနဲ့ ဧရာတီမြောက်ပိုင်းဒေသတွေမှာ အများဆုံးစိုက်ပျိုးကြပြီး ဆီအဖြစ်ထုတ်လုပ်တာ၊ နှမ်းကြော်အဖြစ် ထုတ်လုပ်တာအပြင် သွားရည်စာမျိုးစုံအတွက်လည်း ထုတ်လုပ်ကြပါတယ်။

နှမ်းစေ့ကို ပြည်တွင်းစျေးကွက်တွေအပြင် နိုင်ငံခြားကိုလည်းတင်ပို့ရောင်းချကြပြီး ၂၀၂၄ ခုနှစ်အတွင်း နှမ်းအမျိုးအစားပေါ်မူတည်ပြီး နှမ်းတတင်းကို ၉၀,၀၀၀ ကျပ်နဲ့ ၁၅၀,၀၀၀ ကျပ်ကြား အရောင်းအဝယ်ဖြစ်ခဲ့ကြတယ်လို့ သိရပါတယ်။

စာတည်း – လင်းဇေ

မကွေး၊ စက်တင်ဘာ ၅၊ ၂၀၂၂။

မကွေးတိုင်း၊ နတ်မောက်မြို့နယ် ကျောက်အိုးကျေးရွာက အိမ်တအိမ်အတွင်းက ရှိသမျှ အိမ်အသုံးအဆောင် အကုန်ယူပြီးမှ စစ်တပ်က အကြောင်းမဲ့ မီးရှို့သွားခဲ့ပါတယ်။

စက်တင်ဘာ၄ရက် မနေ့က မနက်ပိုင်းမှာ စစ်ကောင်စီတပ်သား ၈ယောက်က အရပ်သားပြည်သူတွေရဲ့ ဆိုင်ကယ် ၄စီးကို ချောဆွဲလာပြီး ပစ္စည်းတွေသယ်အပြီးမှာ မီးရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” တရွာလုံးက ပြည်သူတွေ ရွာလုံးကျွတ်လောင်မှာကို စိုးရိမ်ခဲ့ရပါတယ်၊ တချို့ဆို ရှော့ခ်ရပြီး ဆေးကုလိုက်ရတာတွေတောင်ရှိတယ်” လို့ ပြောပါတယ်။

မီးမရှို့ခင်မှာ ပြည်သူတွေဆီက ဖုန်းအားလုံးသိမ်းထားပြီး မီးရှို့ပြီးမှ ပြန်ပေးခဲ့တာလို့ ဆိုပါတယ်၊ မီးမရှို့ခင် တရက်အလိုမှာလည်း ကျောက်အိုးရွာတကျော ပြည်သူတွေဆီက ကြက်နဲ့ အစားအသောက်တွေ အတင်းတောင်းယူတာမျိုးတွေလည်း ရှိခဲ့ပါသေးတယ်။

” စစ်ကြောင်းလာတိုင်း သယ်နိုင်တဲ့ ပစ္စည်းတွေ ဝင်ယူတာမျိုးတွေ ရှိပါတယ်၊ လက်ရှိလည်း စက်တင်ဘာ ၄ရက် ညပိုင်းမှာ ဒီနေ့မီးရှိခံရတဲ့နေအိမ်က ပစ္စည်းတွေ ကားပေါ်မှာတင်ထားပြီး စစ်ဘက်သုံးကားအကြီးတစ်စီးအင်အား ၁၅ ယောက်ဝန်းကျင်လောက်နဲ့ သပွတ်ပင်ကျေးရွာမှာ တပ်စွဲနေထိုင်နေတာပါ” လို့ ပြောပါတယ်။

အဲ့ဒီအိမ်ကို စစ်တပ်က PDF နဲ့ ဆက်စက်တယ်ဆိုကာ အကြောင်းမဲ့ မီးရှို့သွားခဲ့တာဖြစ်ပြီး အဲ့ဒီအိမ်ရှင်တွေက အိမ်မှာမနေတာ ၃နှစ်ဝန်းကျင်လောက်ရှိပြီလို့ ဒေသခံတဦးက ပြောပါတယ်။

အဲ့ဒီနေအိမ်ကို မီးမရှို့ခင်မှာလည်း ကျောက်အိုးရွာမှာ တပတ်လောက်တပ်စွဲနေထိုင်ပြီး ပြည်သူတွေကို ဖမ်းဆီးနှိပ်စက်တာတွေ လုပ်တဲ့အပြင် အတင်းအကြပ်ငွေကြေးတောင်းတာတွေလည်း လုပ်ခဲ့သေးတယ်လို့ ဒေသခံတဦးကပြောပါတယ်။

” ကျောက်အိုးကျေးရွာရဲ့ မီးရှိပြာချ ခံရတဲ့ နေအိမ်မှာ တပ်စွဲတုန်းကလည်း ကျေးရွာတွင်းမှ ပြည်သူများထံမှ အိမ်ထောင်ပရိဘောဂသုံးဖို့ အရံထားတဲ့ ပျဥ်ချပ်သစ်များသိုလှောင်ထားသည်ဟု ဆိုကာ ငွေကျပ် ရှစ်သိန်းလောက် အတင်းအဓမ္မ တောင်းယူသွားကြပါသေးတယ်” လို့ ဆိုပါတယ်။

အိမ်ခြေ၃၀၀ ဝန်းကျင်ရှိတဲ့ နတ်မောက်မြို့ အ‌ရှေ့ခြမ်းက ကျောက်အိုးရွာကို PDF မလာနိုင်အောင် နယ်မြေရှင်းလင်းရေးပုံစံနဲ့ ခဏခဏ စစ်ကြောင်းထိုးခံနေရတဲ့ ရွာတခုဖြစ်ပြီး အဲ့ရွာက ပြည်သူတွေအနေနဲ့ စိုးရိမ်ထိတ်လန့်နေကြရတယ်လို့ သိရပါတယ်။

မကွေး၊ ဧပြီ ၁၂၊ ၂၀၂၂။

မကွေးတိုင်း၊ နတ်မောက်မြို့နယ်၊ သမှုန်းကုန်းကြီးကျေးရွာရှိနေအိမ် ၁ လုံးကို ဧပြီလ ၁၁ ရက်နေ့ ညက မီးရှို့သွားပြီး၊ အိမ်ထောင်ဦးစီးကို ဖမ်းဆီးသွားတယ်လို့ နတ်မောက်မြို့နယ် ပြည်သူ့ကာကွယ်ရေးတပ်က ဗိုလ်ရာကျော်က မြေလတ်အသံကို ပြောပါတယ်။

မနေ့က ည ၉ နာရီခွဲခန့်က စစ်ကောင်စီအင်အား ၂၀ ခန့်နဲ့အတူ မီးသတ်ကားတစီးနဲ့ သမှုန်းကုန်းကြီးကျေးရွာက ဦးအောင်ထူးနေအိမ်ကို ရောက်ရှိလာပြီး၊ ယူဆောင်လို့မရတဲ့ ပစ္စည်းတွေကိုဖျက်စ္စည်းကာ ပစ္စည်းတွေနဲ့ ငွေတွေကိုလည်း ယူဆောင်သွားပြီး၊ နေအိမ်ကို မီးရှို့လိုက်တယ်လို့ သိရပါတယ်။

“စစ်ကား ၁ စီးနဲ့ တခါတည်း မီးသတ်ကားပါလာတယ်။ ကြိုပြီးကြံစီထားတဲ့သဘောမျိုးပေါ့၊ ဆိုင်ကယ်တွေလည်းနောက်ကနေ ရောက်လာတယ်ပေါ့၊ စိုင်ကောင်းရဲစခန်းက ရဲတွေလည်းပါတယ်၊ အဲဒီအိမ်ကိုဝင်ပြီးတော့ အိမ်ထဲကရှိတဲ့ပစ္စည်းတွေကို ထုခွဲရိုက်ပြီးတော့ အကုန်လုံး မီးရှို့ဖျက်ဆီးသွားတာပေါ့။ ဖုန်း ၅ လုံးနဲ့ ပိုက်ဆံ ၃ သိန်းကျော် ယူသွားတယ်။ အိမ်ထောင်ဦးစီး ဦးအောင်ထူးကိုလည်း ဖမ်းသွားတယ်၊ ဘာအကြောင်းပြချက်နဲ့ဖမ်းသွားတယ်ဆိုတာ ဘယ်သူမှမသိရသေးဘူး” လို့ ဗိုလ်ရာကျော်ကပြောပါတယ်။

စစ်ကောင်စီတပ်ဖွဲ့တွေဟာ နတ်မောက်မြို့နယ်၊ သမှုန်းကုန်းကျေးရွာအတွင်း အခုလို မကြာခဏ ပြုလုပ်လေ့ရှိပြီး၊ ကျေးရွာက ပြည်သူတချို့လည်း ထွက်ပြေးတိမ်းရှောင်နေရတယ်လို့ သိရပါတယ်။