ဒုတိယအကြိမ်

အရာတော်၊ မေ ၅၊ ၂၀၂၃။

စစ်ကိုင်းတိုင်း၊ အရာတော်မြို့နယ်၊ ကြွေပုဂံကျေးရွာကနေအိမ်တွေကို မေလ ၅ ရက်ဒီမနက် ၉ နာရီလောက်မှာ စစ်ကောင်စီတပ်သားတွေက ဒုတိယအကြိမ် ဝင်ရောက်မီးရှို့ဖျက်ဆီးခဲ့ပါတယ်။

အရာတော်မြို့နယ် စစ်အခြေခံလေ့ကျင့်ရေးတပ် စ.ခ.တ (၁၀)မှ တပ်သားအင်အား ၆၀ လောက်ဟာ ဝက်ခဲကျေးရွာကနေ ၂ မိုင်ကျော်ဝေးတဲ့ ကြွေပုဂံကျေးရွာထဲကို ဒီမနက် ၈ နာရီလောက်မှာ ပစ်ခတ်ဝင်ရောက်လာပြီးနောက် နေအိမ်တွေကို မီးရှို့ခဲ့တာလို့ အရာတော်ပိုစ့်မှ တာဝန်ရှိသူတဦးက ပြောပါတယ်။

“တိုက်ပွဲမဖြစ်ပဲနဲ့ ရွာထဲကိုဝင်လာတယ်။ ပြီတော့ ရွာကိုမီးရှို့တယ်။ ဒီနေ့မနက်နေအိမ်တွေ မီးထဲဘယ်လောက်ပါသွားလဲ မသိရသေးပါဘူး။ ရွာသားတွေလည်း ထွက်ပြေးနေကြတယ်။ ရွာထဲကို မဝင်ကြသေးဘူး။ အခုချိန်ထိတော့ ဖမ်းဆီးခံရတဲ့ပြည်သူတွေ ရှိတယ်လို့မကြားမိသေးပါဘူး” လို့ အရာတော်ပို့စ် မှ တာဝန်ရှိသူတဦးက ပြောပါတယ်။

ကြွေပုဂံရွာကို မီးရှို့ပြီး မနက် ၁၀ နာရီလောက်မှာတော့ အဆိုပါစစ်ကောင်စီတပ်ဖွဲ့ဟာ ကြွေပုဂံရွာ အနောက်ဘက်ကို ပြန်လည်ဝင်ရောက်သွားခဲ့ပေမယ့် ကြွေပုဂံရွာနဲ့ ရွာနီးချင်း ဒုံဒစ်ရွာက ပြည်သူတွေကတော့ လက်ရှိအချိန်ထိ ရွာကနေ ထွက်ပြေးတိမ်းရှောင်နေရတယ်လို့ သိရပါတယ်။

ပြီးခဲ့တဲ့မတ်လ ၂၉ ရက်မှာလည်း ကြွေပုဂံကျေးရွာကို စစ်ကောင်စီတပ်က ပထမအကြိမ် စစ်ကြောင်းထိုး ဝင်ရောက်ကာ နေအိမ် ၂၉ လုံးကို မီးရှို့ဖျက်ဆီးခဲ့ပါသေးတယ်။

စာတည်း – လင်း

ကန့်ဘလူ၊ ဧပြီ ၄၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်၊ အင်းလယ်ကြီးရွာက နေအိမ်တွေကို စစ်ကောင်စီတပ်တွေက ဒုတိယအကြိမ် မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

အင်အား ၁၀၀ ကျော်ရှိတဲ့ စစ်ကောင်စီတပ်ဖွဲ့တွေဟာ ဧပြီလ ၃ ရက်မနေ့က ညနေ ၄ နာရီလောက်မှာ ရွာထဲကို လက်နက်တွေ ပစ်ခတ်ဝင်ရောက်လာပြီးနောက် နေအိမ်တွေကို မီးရှို့ခဲ့တာလို့ အင်းလယ်ကြီးရွာသားတဦးက ပြောပါတယ်။

“ထိတွေ့တိုက်ပွဲတွေ မရှိပါဘူး။ သူတို့က ကန့်ဘလူ ၆၀၀၆ တင့်ကားတပ်ကနေ လက်နက်ကြီးတွေနဲ့ ပစ်ပြီးမှ ရွာထဲကိုဝင်တာ။ ပျူတွေနဲ့ရောပြီး လာတာ။ ရွာထဲကိုဝင်ပြီးတော့ ရွာသားတွေရဲ့အိမ်တွေမွှေတယ်။ ပြီးမှ ရွာထဲက အိမ်တွေ မီးရှို့ပြီးတယ်။ ရွာထဲမှာလည်း တညအိပ်သွားတယ်” လို့ ဆိုပါတယ်။

လက်ရှိအချိန်ထိ မီးလောင်ပျက်စီးသွားတဲ့ နေအိမ်အရေအတွက်ကို မသိရှိရသေးသလို၊ ရွာသားတွေလည်း ရွာထဲကို ဝင်ရောက်နေထိုင်ခြင်း မရှိသေးဘူးလို့ ဆိုပါတယ်။

အိမ်ခြေ ၈၀၀ ကျော်ရှိတဲ့ အင်းလယ်ကြီးရွာဟာ အခုလိုမီးရှို့ခံရတာ ဒုတိယအကြိမ်ဖြစ်ပြီး၊ ပြီးခဲ့တဲ့ ၂၀၂၂ ခုနှစ်၊ အောက်တိုဘာလတုန်းကလည်း စစ်ကောင်စီတပ်ဖွဲ့တွေက အိမ်ခြေ ၁၃၆ လုံးကို မီးရှို့ဖျက်ဆီးခဲ့ပါသေးတယ်။

ခုလိုမီးရှို့ဖျက်ဆီးခဲ့တဲ့ စစ်သားနဲ့ ပျူစောထီးတပ်ဖွဲ့တွေဟာ ဒီနေ့မနက် ၇ နာရီလောက်မှာတော့ အင်းလယ်ကြီးရွာ နဲ့ ၉ မိုင်ကျော်ဝေးတဲ့ ၆၀၀၆ တင့်ကားတပ်ထဲကို ပြန်ဝင်သွားကြတယ်လို့ သိရပါတယ်။

ဒါ့အပြင် အင်းလယ်ကြီးရွာကို မီးရှို့ဖျက်ဆီးခဲ့တဲ့ စစ်အုပ်စုဟာ အခုနှစ် ဧပြီလ ၂ ရက်က ထန်းကုန်းတိုက်နယ်ရှိ ဉာဏ်အင်းရွာက နေအိမ် ၄၀ လောက်ကို မီးရှို့ခဲ့ပါတယ်။

အလားတူ ပြီးခဲ့တဲ့ မတ်လ ၂၃ ရက်ကလည်း ထန်းကုန်းတိုက်နယ်၊ ညောင်ဇင်ကြီးရွာက နေအိမ် ၃၀ ကျော်ကို စစ်ကောင်စီတပ်တွေက မီးရှို့ဖျက်ဆီးခဲ့တဲ့အပြင် သက်တော် ၆၀ နှစ်ရှိ ကျောင်းထိုင်ဆရာတော် ဥူးသောမလ ကို ဖမ်းဆီးခေါ်ဆောင်သွားပြီး၊ စိတ်ကျန်းမာရေးချို့တဲ့သူ အသက် ၃၅ နှစ်အရွယ် ကိုမျိူးမင်းဦး (ခ) ကိုထွန်းမင်းဦးကိုလည်း မီးရှို့သတ်ခဲ့ပါသေးတယ်။

ပုံစာ – ၂၀၂၂ ခုနှစ်၊ အောက်တိုဘာလက အင်းလယ်ကြီးရွာကို စစ်အုပ်စုမီးရှို့ခဲ့စဥ်။ (ပုံဟောင်း)

စာတည်း – လင်း

စစ်ကိုင်း၊ မေ ၁၅၊ ၂၀၂၂။

စစ်ကိုင်းတိုင်း၊ ပုလဲမြို့နယ်၊ ချောင်းဦးရွာကို မေလ ၁၄ ရက် မနေ့ကမနက်ပိုင်းမှာ စစ်ကောင်စီတပ်တွေက ဝင်ရောက်မီးရှို့သွားတယ်လို့ ဒေသခံတွေဆီက သိရပါတယ်။

အဲ့ဒီတပ်သားတွေဟာ ချောင်းဦးရွာနဲ့ တမိုင်ခန့်ဝေးတဲ့ ဇီဖြူကုန်းရွာမှာတပ်စွဲနေတာဖြစ်ပြီး၊ မနေ့ကမနက်ပိုင်း ချောင်းဦးရွာဘက်ကို အင်အား ၅၀ လောက်နဲ့ စစ်ကြောင်းထိုးလာချိန် လမ်းမှာဒေသခံကာကွယ်ရေးတပ်တွေနဲ့ ခဏတာ ထိတွေ့မှုဖြစ်ပြီးနောက် မနက် ၁၀ နာရီလောက်မှာ ရွာကိုစတင် မီးရှို့တာလို့ ဒေသခံအမျိုးသားတဦးက ပြောပါတယ်။

“ဇီးဖြူကုန်းရွာမှာ တပ်စွဲထားတဲ့အဖွဲ့က ချောင်းဦးရွာဘက်ကို စစ်ကြောင်းထိုးလာတာ၊ ထိတွေ့မှုအနည်းငယ်ဖြစ်တယ်။ ကာကွယ်ရေးတပ်ဖွဲ့တွေ ပြန်အဆုတ် ရွာကိုမီးတင်ရှို့တာ၊ အရင်တခါလည်းရှို့ခံထားရတာ၊ ခုလက်ကျန်အိမ်တွေကိုရှို့တာ၊ မီးမငြှိမ်းနိုင်ဘူး။ အကုန်လောင်ပြီး သူ့ဘာသာငြိမ်းသွားတာ။” လို့ ပြောပါတယ်။

ဒီတကြိမ် စစ်တပ်ကမီးရှို့တာဟာ ဒုတိယအကြိမ်ဖြစ်ပြီး၊ အိမ်ခြေ ၃၀၀ ကျော်ရှိတဲ့အနက် ပထမ တကြိမ်မီးရှို့ချိန်မှာ အိမ်ခြေ နှစ်ရာကျော်မီးလောင်ဆုံးရှုံးခဲ့ရပြီး၊ ဒီတကြိမ်မှာတော့ ကျန်ရှိနေတဲ့အိမ်တွေအားလုံးမီးထဲပါသွားတာလို့ ဒေသခံတဦးက ဆက်ပြောပါတယ်။

“အိမ်ခြေ ၃၀၀ ကျော်၊ အရင်တခါရှို့တာက နှစ်ရာကျော်ပါ။ ကျန်တရာကျော်ကို မနေ့ကဆက်ရှို့တယ်၊ လူဦးရေ ၂ ထောင်ဝန်းကျင်ရှိတယ်။ ဒေသခံတွေ အကုန်ပြေးနေကြရတယ်။ မီးလောင်ချိန်ခန့်မှန်း ၂ နာရီခန့်ကြာတယ်။ တရွာလုံးပြာကျသွားပြီ၊ စာသင်ကျောင်းနဲ့ စာရွက်စာတန်း၊ သင်ထောက်ကူပစ္စည်းတွေ အကုန်ပါသွားတယ်။ ” လို့ ဆိုပါတယ်။

ချောင်းဦးရွာကို ပြီးခဲ့တဲ့ ဖေဖော်ဝါရီ ၁၈ ရက် မနက်ပိုင်းမှာ စစ်ကောင်စီနဲ့ ပျူစောထီးအဖွဲ့ဝင် ၂၀ ကျော်လောက်က ပထမအကြိမ် မီးရှို့ဖျက်ဆီးခဲ့တာဖြစ်ပါတယ်။ ဒါ့အပြင် အိမ်နီးချင်းရွာတွေဖြစ်တဲ့ ပန်းရွာ၊ လှော်ကား၊ ဇီးဖြူကုန်းနဲ့ အင်မထီရွာတို့ကိုလည်း ဖေဖော်ဝါလအတွင်းမှာပဲ စစ်ကောင်စီက ရွာလုံးကျွတ်နီးပါး မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

မကွေး၊ ဧပြီ ၂၉၊ ၂၀၂၂။

မကွေးတိုင်း၊ ရေစကြိုမြို့နယ် ပခန်းငယ်ရဲစခန်းမှာ အခိုင်အမာ ပြန်ပြီးတပ်စွဲထားတဲ့ စစ်ကောင်စီအဖွဲ့ကို PDF ၉ဖွဲ့က ဧပြီ ၂၈ရက် နေလယ် ၁၁နာရီမှာ ဝင်ရောက်စီးနင်း တိုက်ခိုက်ခဲ့လို့ ပျူစောထီး ရဲနဲ့ စစ်သား ၁၄ဦးနီးပါး သေဆုံးခဲ့တယ်လို့ Phoenix အထူးပြောက်ကျားတပ်ဖွဲ့ဆီက သိရပါတယ်။

ပြီးခဲ့တဲ့ ၂၀၂၁ ခုနှစ် အောက်တိုဘာလကလည်း စခန်းသိမ်းတိုက်ခိုက်မှုကြောင့် လက်နက်တွေသိမ်းဆည်းရမိတဲ့ စခန်းတခုဖြစ်ပေမယ့် ထပ်ပြီး စစ်ကောင်စီက ခစန်းပြန်ချထားတာဖြစ်တယ်လို့ Phoenix အထူးပြောက်ကျားတပ်ဖွဲ့တာဝန်ခံက ပြောပါတယ်။

” အဲဒီစခန်းကိုကျနော်တို့မဟာမိတ်တွေပူးပေါင်းပြီးတော့ ထိုးစစ်ဆင်ပြီးတိုက်ခဲ့တယ်၊ သူတို့ရဲ့ ပတ်ပတ်လည်တပ်ကူလာမဲ့လမ်းကြောင်းတွေ ဖြတ်တောက်ရေးကိုပြင်ဆင်ထားတယ်၊ ဒါပေမဲ့ သူတို့အင်အားများများနဲ့ လမ်းကြောင်း ၂ ကြောင်းကနေတပ်ကူရောက်လာတယ်၊ ကျနော်တို့ကစခန်းသိမ်းနိုင်မဲ့အနေအထား စခန်းကျလုကျခင်အနေအထားမှာ သူတို့တပ်ကူတွေရောက်လာလို့ပြန်ဆုတ်ခဲ့ရတယ်” လို့ ပြောပါတယ်။

တိုက်ပွဲကြာချိန် ၄၅မိနစ်နီးပါး ဖြစ်ခဲ့တဲ့ တိုက်ပွဲမှာ စစ်ကောင်စီဘက်က ၁၀နီးပါး ကျဆုံးတာကို မြင်ခဲ့ရပြီးနောက်ထပ် တပ်ကူလာတဲ့ အဖွဲ့က ၄ယောက်လောက်ထပ်ကျကာ ၃ဦး ဒဏ်ရာရခဲ့တယ်လို့ ပြောပါတယ်။

” တပ်ကူလာတဲ့ပျူထဲက ၄ ကောင်သေချာပေါက်ကျပြီး ၃ ကောင်ထိခိုက်မှုရှိတယ်လို့သိရတယ်ဗျ၊ သူတို့စခန်းကအခိုင်အမာလုပ်ထားတော့ ကျနော်တို့ဘက်က RPG ၂ လုံး နဲ့ ၄၀ မမ လောင်ချာ ၇ လုံးပစ်ခတ်ခဲ့ပြီး လက်နက်ငယ်တွေနဲ့ပစ်ခတ်ခဲ့တယ် ” လို့ Phoenix အထူးပြောက်ကျားတပ်ဖွဲ့ တာဝန်ခံက ပြောပါတယ်။

တော်လှန်ရေး အရှိန်အဟုန်မြင့်လာတော့မှာဖြစ်သလို စစ်ကောင်စီနဲ့ ပက်သတ်တဲ့ နေရာတွေ ပျုစောထီးတွေ၊ ရဲနဲ့ စစ်သားတွေရဲ့ ဝေးရာမှာနေကြဖို့ကိုလည်း ပြောဆိုထားပါတယ်။

Phoenix အထူးပြောက်ကျားတပ်ဖွဲ့၊ 27 Revolution Force၊ မြင်းခြံခရိုင် တပ်ရင်းအမှတ် ( ၃ )၊ MSPDF၊ 11 Brothers Revolution Force၊ မြောင်မြို့နယ်ကျေးရွာတပ်ပေါင်းစု၊ သိန်းငှက်ပြောက်ကျားတပ်ဖွဲ့၊ Thwaythauk Revolution Force၊ ဒေါင်းညီနောင်အဖွဲ့ တွေက ပခန်းငယ် ရဲစခန်းကို ဝင်ရောက်တိုက်ခိုက်ခဲ့ကြတာဖြစ်တယ်လို့ သိရပါတယ်။